លោក លី រតនៈ ជាម្ចាស់កសិដ្ឋានបង្កងកសិករកម្ពុជា ប្រាប់ កម្ពុជាថ្មី ថា ពេលបច្ចុប្បន្នបង្កងអូស្រ្ដាលីនៅតែអាចលក់បានក្នុងតម្លៃខ្ពស់ ខណៈដែរប្រភេទបង្កងនេះហាក់ពិបាកចិញ្ចឹមជាងប្រភេទបង្កងផ្សេងៗ។

លោក រតនៈ បន្តថា បង្កងអូស្រ្ដាលីក្នុងកសិដ្ឋានរបស់លោកអាចលក់ចេញទៅកាន់ទីផ្សារបានចន្លោះពី ១៦ដុល្លារ ទៅ ១៧ដុល្លារ ក្នុង១គីឡូក្រាម។ ចំពោះទីផ្សារគោលដៅវិញ ម្ចាស់កសិដ្ឋានរូបនេះអះអាងថា ភាគច្រើនអតិថិជនមានតម្រូវការទៅខាងរាជធានីភ្នំពេញ ព្រះសីហនុ និងបន្ទាយមានជ័យ ពិសេសគឺតំបន់ដែលមានជនជាតិចិនរស់នៅច្រើនតែម្ដង។

លោក លី រតនៈ បានឱ្យដឹងទៀតថា ទាក់ទងនឹងការចិញ្ចឹមបង្កងអូស្រ្ដាលីនេះ វាមិនមែនងាយស្រួលដូចការលើកឡើងរបស់បុគ្គលមួយចំនួនដែរថា ប្រភេទបង្កងអូស្រ្ដាលីចំណាយដើមទុនតិច តែអាចរកចំណូលបានរាប់ពាន់ដុល្លារក្នុង១ខែ។ ផ្ទុយទៅ ចំពោះកសិដ្ឋានរបស់លោកផ្ទាល់ គ្រាន់តែថ្លៃរៀបចំស្រះទឹក​ និងបច្ចេកទេសចិញ្ចឹមគឺចំណាយអស់ជិត ៤ម៉ឺនដុល្លារទៅហើយ ដោយពុំទាន់គិតដល់ថ្លៃចំណាយផ្សេងៗទៀតផង។

យ៉ាងណាមិញ លោក លី រតនៈ បញ្ជាក់ដែរថា ប្រសិនបើកសិករដទៃទៀត មានបំណងចង់ចិញ្ចឹមបង្កងអូស្រ្ដាលីគ្រាន់តែលក្ខណៈកម្សាន្ត ឬកម្រិតតិចតួច​ លោកក៏សូមលើកទឹកចិត្ត និងស្វាមគមន៍ចែករំលែកបទពិសោធន៍ចិញ្ចឹមបាន ប៉ុន្ដែសូមកុំដាក់ទុនធំ ប្រសិនបើពុំទាន់ច្បាស់លាស់ពីបច្ចេកទេសចិញ្ចឹមវា ព្រោះវានាំឱ្យខាតពេលវេលា និងថវិកា ផងដែរ។

គួរឱ្យដឹងថា មុខរបរចិញ្ចឹមបង្កងអូស្រ្ដាលីនេះ លោក លី រតនៈ បានចាប់ផ្ដើមធ្វើវាឡើងមកតាំងពីឆ្នាំ ២០១៩ មកម្ល៉េះ។ បច្ចុប្បន្ន កសិដ្ឋានរបស់កសិករូបនេះ មានទីតាំងស្ថិតនៅ ក្រុងសិរីសោភ័ណ ខេត្តបន្ទាយមានជ័យ៕

អត្ថបទ ៖ សួស សិត

The post ទីផ្សារបង្កងអូស្រ្ដាលីនៅតែ​មានតម្រូវការខ្ពស់ពីអតិថិជន appeared first on Kampuchea Thmey Daily.

ថ្លែងប្រាប់ កម្ពុជាថ្មី លោក ចន បូរិន បានឱ្យដឹងថា កសិដ្ឋានរបស់លោកនាពេលបច្ចុប្បន្នកំពុងតែសាកល្បងដាក់ចិញ្ចឹមប្រភេទបង្កងអូស្រ្ដាលីបន្ថែមទៀត ខណៈកសិដ្ឋានក៏មានចិញ្ចឹមកន្ធាយសម្រាប់ផ្គត់ផ្គង់ទីផ្សាររួចមកហើយដែរ។

បូរិន បន្តថា មូលហេតុដែលលោកដាក់ចិញ្ចឹមបង្កងអូស្រ្ដាលីនេះ ពីព្រោះមើលឃើញថា នៅតាមភោគជនីយដ្ឋាន និងផ្សារទំនើប តាមបណ្ដាខេត្ត និងរាជធានីភ្នំពេញ ក៏កំពុងតែមានតម្រូវការបង្កងអូស្រ្ដាលី ដើម្បីយកទៅចម្អិនធ្វើម្ហូបជូនភ្ញៀវ ជារៀងរាល់ថ្ងៃ ផងដែរ។

ក្រៅពីនេះ ប្រភេទបង្កងអូស្រ្ដាលីនេះ បច្ចុប្បន្នក៏ពុំសូវមានការចិញ្ចឹមច្រើននៅឡើយ កត្តាទាំងនេះហើយដែលនាំឱ្យបង្កងអូស្រ្ដាលី មានតម្រូវខ្ពស់នៅលើទីផ្សារ។

យ៉ាងណាមិញ លោក បូរិន បានឱ្យដឹងទៀតដែរថា​ បង្កងអូស្រ្ដាលី នៅលើទីផ្សារបច្ចុប្បន្នមានតម្រូវការច្រើន ចំណែកតម្លៃក៏ល្អដោយក្នុង១គីឡូ អាចលក់បានចន្លោះពី ១៧ដុល្លារ ទៅ ១៨ដុល្លារ ផងដែរ។

គួរឱ្យដឹងថា កសិដ្ឋានរបស់លោក ចន បូរិន ក្រៅពីការចិញ្ចឹមបង្កងអូស្ត្រាលី កសិដ្ឋានក៏មានចិញ្ចឹមកន្ធាយសម្រាប់ផ្គត់ផ្គង់ទៅតាមផ្សារទំនើបក្នុងរាជធានីភ្នំពេញ ផងដែរ។ កសិដ្ឋានមានទីតាំងស្ថិតនៅគីឡូម៉ែត្រលេខ ១១៥ តាមបណ្ដាផ្លូវជាតិលេខ៨ ដែលស្ថិតនៅស្រុកកំចាយមារ ខេត្តព្រៃវែង៕

អត្ថបទ ៖ សួស សិត

The post កសិករនៅខេត្តព្រៃវែងម្នាក់ សាកល្បងចិញ្ចឹមបង្កងអូស្រ្ដាលី ព្រោះឃើញមានទីផ្សារល្អ appeared first on Kampuchea Thmey Daily.

លោក កែវ សុធាន ជាប្រជាកសិករម្នាក់រស់នៅភូមិត្រពាំងស្តៅ ឃុំត្រពាំងភ្លាំង ស្រុកឈូក ខេត្តកំពត បានបញ្ជាក់ថា បន្ទាប់ពីបានឆ្លងកាត់វគ្គបណ្តុះបណ្តាល និងការអនុវត្តដោយជោគជ័យ រយៈពេល៦ឆ្នាំមកនេះ លោកហ៊ានអះអាងថា ការចិញ្ចឹមបង្កងអូស្ត្រាលីតាមបែបធម្មជាតិ ងាយស្រួល មិនប្រើអ៊ុកស៊ីសែន ចំណាយតិច ចំណេញពេលវេលា ទទួលបានទិន្នផលល្អ ហើយរស់ជាតិឆ្ងាញ់ជាងបង្កងទឹកសាប ឬបង្គាធម្មជាតិ។

លោក កែវ សុធាន បន្តថា ការចិញ្ចឹមមិនប្រើអ៊ុកស៊ីសែន មិនចាំបាច់ផ្លាស់ប្តូរទឹក មិនប្រើចំណីច្រើនទេ វាជួយកាត់បន្ថយការចំណាយថវិកា កម្លាំងពលកម្ម និងពេលវេលាដោយគ្រាន់តែយើងចេះរៀបចំស្រះ ឬស្រែបង្កងឲ្យក្លាយជាទីជម្រកប្របកដោយសុវត្ថិភាពសម្រាប់ពួកគេរស់នៅ និងធំធាត់តែប៉ុណ្ណោះ។ សម្រាប់លោកគឺ ប្រើហ្វីប្រូកល់ដុំឥដ្ឋ និងកំណាត់ទុយយោទឹកដាក់នៅបាតស្រះ ហើយយកកំប្លោក ចក កំពីងពួយដាំពង្រាយពីលើដើម្បីបានជាម្លប់ ព្រមទាំងបញ្ចៀសហានិភ័យផ្សេងៗ។

ប្រជាកសិករកសិកររូបនោះបន្ថែមថា ប្រសិនបើចិញ្ចឹមបង្កងយកសាច់ឲ្យមានរសជាតិឆ្ងាញ់ឆ្ងាញ់ គេត្រូវរង់ចាំរយៈពេល៦ខែទើបប្រមូលផល ប៉ុន្តែបើចិញ្ចឹមយកធ្វើមេពូជត្រឹម៤ខែអាចចាប់បានហើយ ព្រោះជាអាយុកាលនៃការបន្តពូជ។ចំពោះការរបៀបប្រមូលផលបង្កងងាយបំផុត គឺលោកមិនប្រើវិធីបូមទឹកចេញពីស្រះទេ ព្រោះប្រសិនបើបូមទឹកនោះនឹងត្រូវចំណាយថវិការ និងពេលវេលា កម្លាំងរៀបចំស្រះឡើងវិញ គឺលោកដើរចាប់ពេលយប់ដោយប្រើភ្លើងពិល។

បើតាមការបញ្ជាក់របស់កសិកររូបនោះ ការចេះចិញ្ចឹម និងដាំដំណាំជាច្រើនមុខ គឺតាមរយៈការចូលរួមក្នុងវគ្គបណ្តុះបណ្តាលរបស់អង្គការនានាកាលពី៦ឆ្នាំមុន។ ហើយបច្ចុប្បន្នក៏បានរៀបចំការពង្រីកផ្ទៃដីទំហំ៦ហិកតាដាំដំណាំបន្លែរួមផ្សំផ្សេងៗទៀត និងចិញ្ចឹមត្រី ខ្យង និងបង្កងអូស្ត្រាលីតាមបែបធម្មជាតិជាដើម។ ហើយលោកក៏ត្រៀមបង្ហាត់ បង្ហាត់បង្រៀនបើសិនមានពលរដ្ឋណាចង់ចេះអំពីរបៀបដាំ និងចិញ្ចឹម លោកនឹងជួយបង្ហាត់បង្រៀនជូនដោយមិនលាក់លៀមចំណេះជំនាញមួយនេះឲ្យចេះទៅថ្ងៃមុខបន្តបាន៕

អត្ថបទ៖ សឹង រ៉ាត់

The post កសិករម្នាក់ចិញ្ចឹមបង្កងអូស្ត្រាលីតាមបែបធម្មជាតិងាយស្រួល និងទទួលផលល្អ appeared first on Kampuchea Thmey Daily.

លោក លី រតនៈ បានប្រាប់ឱ្យដឹងថា សម្រាប់ពេលបច្ចុប្ប​ន្ន បង្កងអូស្រ្ដាលីអាចលក់ចេញទៅកាន់ទីផ្សារបានចន្លោះពី ១៦ដុល្លារ ទៅ ១៧ដុល្លារ ក្នុងមួយគីឡូក្រាម ចំណែកទីផ្សារគោលដៅមានដូចជារាជធានីភ្នំពេញ ព្រះសីហនុ និងខេត្តបន្ទាយមានជ័យ ជាដើម។

ម្ចាស់កសិដ្ឋានរូបនេះ បានបញ្ជាក់ដែរថា ទាក់ទងទៅនឹងការចិញ្ចឹមបង្កងអូស្រ្ដាលីនេះដែរ អាចចាត់ទុកថា ប្រភេទបង្កងនេះ ហាក់ពិបាកចិញ្ចឹមជាងបង្កងផ្សេងៗបន្តិច នេះក៏ព្រោះតែការប្រមូលផល និងបច្ចេកទេសចិញ្ចឹមត្រូវប្រើរយៈពេលយូរជាងប្រភេទពូជបង្កងដទៃទៀត។

យ៉ាងណាមិញ ដ្បិតប្រភេទបង្កងអូស្រ្ដាលី ងាយស្រួលក្នុងការរកទីផ្សារក៏ពិតមែន តែលោក លី រតនៈ ចង់ឱ្យអ្នកដែលចិញ្ចឹមបង្កងនេះ គួរពិចារណាឡើងវិញ ខណៈថ្មីៗមានការលើកឡើងថា ការចិញ្ចឹមបង្កងអូស្រ្ដាលី ចំណាយពីដើមទុនត្រឹមតែ១ពាន់ដុល្លារ ទៅ២ពាន់ដុល្លារ ហើយចិញ្ចឹមត្រឹមតែ១២ខែ ក៏អាចប្រមូលផលបាន។

ត្រង់ចំណុចនេះ ម្ចាស់កសិដ្ឋានបង្កងកសិករកម្ពុជា យល់ឃើញថា នេះគ្រាន់តែយុទ្ធសាស្រ្ដក្នុងការធ្វើទីផ្សារដើម្បីទទួលបានប្រាក់ចំណេញរបស់បុគ្គលឆ្លៀតឱកាសមួយចំនួនទៅវិញទេ។

ជាក់ស្ដែង កសិដ្ឋានរបស់​លោក លី រតនៈ មិនមែនពឹងពាក់លើការចិញ្ចឹមបង្កងដើម្បីស្វែងរកប្រាក់ចំណូលផ្គត់ផ្គង់គ្រួសារនោះឡើយ ផ្ទុយទៅវិញ លោកផ្ទាល់ ត្រូវតែធ្វើស្រែចម្ការ និងបង្កើតមុខរបរថតចម្លងឯកសារមួយទៀត ទើបអាចទប់ទល់ទៅនឹងការខាតបង់ ខណៈការចិញ្ចឹមប​ង្កងពេលខ្លះក៏ត្រូវជួបហានិភ័យក្នុងដំណើរការចិញ្ចឹមវាផងដែរ។

គួរឱ្យដឹងថា មុខរបរចិញ្ចឹមបង្កងអូស្រ្ដាលីនេះ លោក លី រតនៈ បានចាប់ផ្ដើមធ្វើវាឡើងមកតាំងពីឆ្នាំ ២០១៩ មកម្ល៉េះ។ បច្ចុប្បន្ន កសិដ្ឋានរបស់កសិករូបនេះ មានទីតាំងស្ថិតនៅ ក្រុងសិរីសោភ័ណ ខេត្តបន្ទាយមានជ័យ៕

អត្ថបទ៖ សួស សិត

The post ម្ចាស់​កសិដ្ឋានដាក់គោលដៅចិញ្ចឹមបង្កងអូស្ត្រាលី ឱ្យបាន ១០០ គីឡូក្រាម ក្នុងមួយខែ ផ្កត់ផ្គង់ទីផ្សារក្នុងស្រុក appeared first on Kampuchea Thmey Daily.

លោក លី រតនៈ អាយុ៣៦ឆ្នាំ ជាម្ចាស់កសិដ្ឋានចិញ្ចឹមបង្កងកសិករកម្ពុជា ប្រាប់ កម្ពុជាថ្មី ថា បច្ចុប្បន្នបង្កងអូស្ដ្រាលីអា​ចលក់ចេញទៅកាន់ទីផ្សារបានចន្លោះពី១៦ដុល្លារ ទៅ១៧ដុល្លារ ក្នុង១គីឡូក្រាម ខណៈប្រភេទបង្កងនេះពុំទាន់សូវមានអ្នកចិញ្ចឹមច្រើន។

ក្រៅពីពុំសូវមានអ្នកចិញ្ចឹមច្រើន បង្កងអូស្ដ្រាលីអាចលក់បានតម្លៃខ្ពស់ ក៏ដោយសារតែភាគច្រើនអ្នកដែលនិយមបរិភោគវា គឺសុទ្ធសឹងតែជនជាតិចិនដែលមករស់នៅក្នុងប្រទេសកម្ពុជា ពិសេសនៅតាមភោគជនីយដ្ឋានធំៗរបស់ចិន ស្ថិតនៅក្រុងប៉ោយប៉ត ខេត្តបន្ទាយមានជ័យ និងភោជនីយដ្ឋានមួយចំនួនទៀតស្ថិតនៅក្រុងព្រះសីហនុ និងរាជធានីភ្នំពេញ ជាដើម។

លោក លី រតនៈ បានឱ្យដឹងទៀតថា ទោះបីជាបង្កងអូស្ដ្រាលីអាចលក់បានតម្លៃខ្ពស់ក៏បាន តែអ្វីដែលពិបាកទៀតនោះគឺការមើលថែទាំវា។ ជាក់ស្ដែងកសិដ្ឋានរបស់លោក ត្រូវជីស្រះជាច្រើនកន្លែង និងត្រូវមានប្រភពទឹកគ្រប់គ្រាន់ មុននឹងអាចដាក់ពូជបង្កងអូស្ដ្រាលីនេះចូលទៅក្នុងស្រះចិញ្ចឹមបាន ជាងនេះទៅទៀត ការចិញ្ចឹមចាំបាច់ត្រូវចេះគ្រប់គ្រងសីតុណ្ហភាពទឹកជាប្រចាំ ផងដែរ។

មុខរបរចិញ្ចឹមបង្កងអូស្រ្ដាលីនេះ លោក លី រតនៈ បានចាប់ផ្ដើមធ្វើឡើងមកតាំងពីឆ្នាំ ២០១៩ មកម្ល៉េះ។ គិតមកទល់ពេលនេះ មុខរបរនេះ មានអាយុកាលប្រមាណ៦ឆ្នាំមកហើយ។

សម្រាប់ផែនការទៅថ្ងៃខាងមុខ ម្ចាស់កសិដ្ឋានរូបនេះ គ្រោងនឹងដាក់គោលដៅចិញ្ចឹមបង្កងអូស្ដ្រាលី ឱ្យបាន១០០គីឡូ ក្នុងមួយខែ ដើម្បីឆ្លើយតបទៅនឹងតម្រូវការទីផ្សារប្រចាំថ្ងៃ ខណៈបច្ចុប្បន្នកសិដ្ឋានរបស់លោកនៅពុំទាន់អាចផ្គត់ផ្គង់ទីផ្សារបាននៅឡើយ។

គួរឱ្យដឹងថា កសិដ្ឋានចិញ្ចឹមបង្កងកសិករកម្ពុជា ជាកសិដ្ឋានចិញ្ចឹមបង្កងអូស្រ្ដាលីមួយ ដែលមានទីតាំងស្ថិតនៅក្រុងសិរីសោភ័ណ ខេត្តបន្ទាយមានជ័យ។ បច្ចុប្បន្នកសិដ្ឋានមួយនេះ មានផ្ទៃដីសម្រាប់ជីស្រះចិញ្ចឹមបង្កងប្រមាណជាង ២ហិកតា៕

អត្ថបទ ៖ សួស សិត

The post បង្កងអូស្ដ្រាលីអាចលក់បាន១គីឡូ ១៧ដុល្លារ ខណៈនៅកម្ពុជាពុំសូវមានអ្នកចិញ្ចឹមច្រើន appeared first on Kampuchea Thmey Daily.

ស្ថិតនៅក្នុងវ័យ ៣៦ឆ្នាំ លោក លី រតនៈ ជាម្ចាស់កសិដ្ឋានចិញ្ចឹមបង្កងកសិករកម្ពុជា បានប្រាប់ កម្ពុជាថ្មី ថា កសិដ្ឋានចិញ្ចឹមបង្កងអូស្ដ្រាលី របស់លោក បានចាប់ផ្តើមបើកដំណើរការតាំងពីឆ្នាំ ២០១៩ មកម្ល៉េះ។ លោក បន្តថា មូលហេតុដែលលោកចាប់យកការចិញ្ចឹមបង្កងអូស្ត្រាលី ដោយសារតែមើលឃើញថា ប្រភេទបង្កងនេះ មិនសូវមានអ្នកចិញ្ចឹមច្រើន ដូចបង្កងដៃវែង ឬបង្កងទឹកសាប នោះឡើយ។ ម្យ៉ាងវិញទៀត ប្រភេទបង្កងអូស្ត្រាលី វាមានទីផ្សារធំបានតែអតិថជនចិន ច្រើនជាងអតិថិជនខ្មែរ នេះក៏ដោយសារតម្លៃរបស់វារាងថ្លៃជាងបង្កងធម្មតាបន្ដិច។

ទាក់ទងនឹងបច្ចេកទេសចិញ្ចឹមវិញ លោក លី រតនៈ បានបញ្ជាក់ដែរថា ការចិញ្ចឹមបង្កងអូស្រ្ដាលី វាមិនខុសគ្នាអ្វីពីការចិញ្ចឹមបង្កងដៃវែង នោះឡើយ ពោលគឺគ្រាន់តែគ្រប់គ្រង់បរិមាណទឹកក្នុងសីតុណ្ហភាពមួយ និងមានផ្ទៃដីក្នុងទំហំសមរម្យមួយតែប៉ុណ្ណោះ។ ក្រៅពីនេះ ការចិញ្ចឹមជាក់ស្ដែងត្រូវរងចាំពេលវេលាចន្លោះពី ៥ខែ ទៅ៦ខែ ទើបអាចប្រមូលផលវាបាន ផងដែរ។

លោក លី រតនៈ បានប្រាប់ឱ្យដឹងទៀតថា សម្រាប់ពេលបច្ចុប្បន្ននេះ ទីផ្សារបង្កងអូស្ដ្រាលីកសិដ្ឋានរបស់លោក អាចលក់ចេញទៅកាន់ខេត្តគោលដៅទេសចរណ៍មួយចំនួន ក្នុងប្រទេសកម្ពុជា ក្នុងនោះមានដូចជា៖ ខេត្តបន្ទាយមានជ័យ ខេត្តព្រះសីហនុ ភាគច្រើននោះគឺសម្បូរជនជាតិចិនរស់នៅតែម្ដង។

ចំណែកការផ្គត់ផ្គង់វិញ លោកបានបញ្ជាក់ដែរថា បង្កងអូស្ដ្រាលីក្នុងកសិដ្ឋានរបស់លោក ក្នុងមួយខែ អាចផ្គត់ផ្គង់ទៅកាន់ទីផ្សារបានតែ ៤០គីឡូ នៃទំហំផ្ទៃដីសរុប២ហិកតា ចំពោះតម្លៃវិញ ១គីឡូអាចលក់ចេញបាន ចន្លោះពី ១៦ដុល្លារ ទៅ ១៧ដុល្លារ សម្រាប់តម្លៃបោះដុំ។

លោក លី រតនៈ បានបង្ហើបឱ្យដឹងទៀតថា មុខរបរចិញ្ចឹមបង្កងអូស្រ្ដាលីនេះ ចំណាយដើមទុនធំ តែពិបាករកទីផ្សារ ខណៈប្រជាជនខ្មែរខ្លះ នៅពុំទាន់ស្គាល់ច្បាស់ប្រភេទបង្កងនេះនៅឡើយ។ សម្រាប់លោក លី រតនៈ ការចិញ្ចឹមបង្កងអូស្រ្ដាលី មិនមែនគ្រាន់តែមានដើមទុនតែប៉ុណ្ណោះទេ តែធ្វើវាឡើងដោយទឹកចិត្តស្រឡាញ់ទើបអាចជោគជ័យទៅបាន៕

អត្ថបទ ៖ សួស សិត

The post អតិថិជនចិនគឺជាទីផ្សារធំនៃបង្កងអូស្ត្រាលី​​​​ appeared first on Kampuchea Thmey Daily.