បង្កងអូស្ដ្រាលីអាចលក់បាន១គីឡូ ១៧ដុល្លារ ខណៈនៅកម្ពុជាពុំសូវមានអ្នកចិញ្ចឹមច្រើន

ម្ចាស់កសិដ្ឋានចិញ្ចឹមបង្កងកសិករកម្ពុជា ស្ថិតនៅក្រុងសិរីសោភ័ណ ខេត្តបន្ទាយមានជ័យ បានប្រាប់ឱ្យដឹងថា បច្ចុប្បន្នបង្កងអូស្ដ្រាលីនៅតែអាចលក់បានតម្លៃថ្លៃ ខណៈនៅកម្ពុជាពុំទាន់មានអ្នកចិញ្ចឹមប្រភេទបង្កងនេះច្រើន នៅឡើយ។

លោក លី រតនៈ អាយុ៣៦ឆ្នាំ ជាម្ចាស់កសិដ្ឋានចិញ្ចឹមបង្កងកសិករកម្ពុជា ប្រាប់ កម្ពុជាថ្មី ថា បច្ចុប្បន្នបង្កងអូស្ដ្រាលីអា​ចលក់ចេញទៅកាន់ទីផ្សារបានចន្លោះពី១៦ដុល្លារ ទៅ១៧ដុល្លារ ក្នុង១គីឡូក្រាម ខណៈប្រភេទបង្កងនេះពុំទាន់សូវមានអ្នកចិញ្ចឹមច្រើន។

ក្រៅពីពុំសូវមានអ្នកចិញ្ចឹមច្រើន បង្កងអូស្ដ្រាលីអាចលក់បានតម្លៃខ្ពស់ ក៏ដោយសារតែភាគច្រើនអ្នកដែលនិយមបរិភោគវា គឺសុទ្ធសឹងតែជនជាតិចិនដែលមករស់នៅក្នុងប្រទេសកម្ពុជា ពិសេសនៅតាមភោគជនីយដ្ឋានធំៗរបស់ចិន ស្ថិតនៅក្រុងប៉ោយប៉ត ខេត្តបន្ទាយមានជ័យ និងភោជនីយដ្ឋានមួយចំនួនទៀតស្ថិតនៅក្រុងព្រះសីហនុ និងរាជធានីភ្នំពេញ ជាដើម។

លោក លី រតនៈ បានឱ្យដឹងទៀតថា ទោះបីជាបង្កងអូស្ដ្រាលីអាចលក់បានតម្លៃខ្ពស់ក៏បាន តែអ្វីដែលពិបាកទៀតនោះគឺការមើលថែទាំវា។ ជាក់ស្ដែងកសិដ្ឋានរបស់លោក ត្រូវជីស្រះជាច្រើនកន្លែង និងត្រូវមានប្រភពទឹកគ្រប់គ្រាន់ មុននឹងអាចដាក់ពូជបង្កងអូស្ដ្រាលីនេះចូលទៅក្នុងស្រះចិញ្ចឹមបាន ជាងនេះទៅទៀត ការចិញ្ចឹមចាំបាច់ត្រូវចេះគ្រប់គ្រងសីតុណ្ហភាពទឹកជាប្រចាំ ផងដែរ។

មុខរបរចិញ្ចឹមបង្កងអូស្រ្ដាលីនេះ លោក លី រតនៈ បានចាប់ផ្ដើមធ្វើឡើងមកតាំងពីឆ្នាំ ២០១៩ មកម្ល៉េះ។ គិតមកទល់ពេលនេះ មុខរបរនេះ មានអាយុកាលប្រមាណ៦ឆ្នាំមកហើយ។

សម្រាប់ផែនការទៅថ្ងៃខាងមុខ ម្ចាស់កសិដ្ឋានរូបនេះ គ្រោងនឹងដាក់គោលដៅចិញ្ចឹមបង្កងអូស្ដ្រាលី ឱ្យបាន១០០គីឡូ ក្នុងមួយខែ ដើម្បីឆ្លើយតបទៅនឹងតម្រូវការទីផ្សារប្រចាំថ្ងៃ ខណៈបច្ចុប្បន្នកសិដ្ឋានរបស់លោកនៅពុំទាន់អាចផ្គត់ផ្គង់ទីផ្សារបាននៅឡើយ។

គួរឱ្យដឹងថា កសិដ្ឋានចិញ្ចឹមបង្កងកសិករកម្ពុជា ជាកសិដ្ឋានចិញ្ចឹមបង្កងអូស្រ្ដាលីមួយ ដែលមានទីតាំងស្ថិតនៅក្រុងសិរីសោភ័ណ ខេត្តបន្ទាយមានជ័យ។ បច្ចុប្បន្នកសិដ្ឋានមួយនេះ មានផ្ទៃដីសម្រាប់ជីស្រះចិញ្ចឹមបង្កងប្រមាណជាង ២ហិកតា៕

អត្ថបទ ៖ សួស សិត