ការចុះពិនិត្យនេះ បានធ្វើឡើងនៅព្រឹកថ្ងៃទី០៥ ខែមិថុនា ឆ្នាំ២០២៦ ក្រោមការដឹកនាំរបស់លោក សោ សុផល អភិបាលរងក្រុងដូនកែវ តំណាងលោក ឌឹម គឹមសាន អភិបាលក្រុងដូនកែវ ដោយមានការចូលរួមពីមន្ត្រីការិយាល័យជំនាញពាក់ព័ន្ធ និងអាជ្ញាធរសង្កាត់បារាយណ៍។ ក្រុមការងារបានចុះពិនិត្យទីតាំងជាក់ស្តែង ស្ថិតនៅភូមិត្រពាំងឫស្សី សង្កាត់បារាយណ៍ ក្រុងដូនកែវ ខេត្តតាកែវ។

ក្នុងកិច្ចប្រជុំ និងការចុះពិនិត្យនៅទីតាំងផ្ទាល់ លោកអភិបាលរងក្រុង បានណែនាំឱ្យមន្ត្រីជំនាញភូមិបាលអនុវត្តការវាស់វែងដី និងផ្ទៀងផ្ទាត់ឯកសារពាក់ព័ន្ធឱ្យបានត្រឹមត្រូវ និងច្បាស់លាស់ ស្របតាមនីតិវិធីច្បាប់ ដើម្បីធានាថា ការប្រើប្រាស់ដីធ្លី និងការសាងសង់សំណង់ផ្សេងៗ មិនប៉ះពាល់ដល់ផលប្រយោជន៍សាធារណៈ និងមិនរំលោភលើដីរដ្ឋ។

ជាលទ្ធផលនៃការពិនិត្យ មន្ត្រីជំនាញបានរកឃើញថា ទីតាំងដីដែលកំពុងសាងសង់របងថ្មនោះ ពុំមានបណ្ណកម្មសិទ្ធិសម្គាល់ម្ចាស់ដីច្បាស់លាស់នៅឡើយទេ។ លើសពីនេះ ការសាងសង់ក៏ត្រូវបានសង្ស័យថាបានរំលោភលើដីចំណីផ្លូវសាធារណៈផងដែរ។

ដោយផ្អែកលើលទ្ធផលខាងលើ អាជ្ញាធរក្រុងដូនកែវ បានសម្រេចផ្អាកការសាងសង់របងថ្មជាបណ្តោះអាសន្ន រង់ចាំការត្រួតពិនិត្យ និងដោះស្រាយតាមនីតិវិធីច្បាប់បន្ថែមទៀត។ អាជ្ញាធរក៏បានអំពាវនាវដល់ប្រជាពលរដ្ឋទាំងអស់ ឱ្យគោរពបទប្បញ្ញត្តិ និងនីតិវិធីពាក់ព័ន្ធនឹងការកាន់កាប់ដីធ្លី និងការសាងសង់សំណង់ផ្សេងៗ ដើម្បីចៀសវាងការប៉ះពាល់ដល់សម្បត្តិសាធារណៈ និងបញ្ហាវិវាទនានា៕

​អត្ថបទ៖ វីរៈ

The post អាជ្ញាធរក្រុងដូនកែវ ផ្អាកការសាងសង់របងថ្មមួយកន្លែង ក្រោយពិនិត្យឃើញរំលោភដីចំណីផ្លូវ និងគ្មានបណ្ណកម្មសិទ្ធិច្បាស់លាស់ appeared first on Kampuchea Thmey Daily.

ដើម្បីសម្រេចទៅតាមការគ្រោងទុកលើការងារវាស់វែងដីធ្លីដើម្បីចុះបញ្ជីដីធ្លីមានលក្ខណៈជាប្រព័ន្ធ និងផ្តល់ជូននូវវិញ្ញាបនបត្រសម្គាល់ម្ចាស់អចលនវត្ថុជូនពលរដ្ឋឱ្យរួចរាល់នៅចុងឆ្នាំ២០២៦ មន្ទីរជំនាញបានខិតខំបំពេញការងារយ៉ាងសកម្មដើម្បីពន្លឿនលើការងារនេះ តាមការណែនាំនិងចង្អុលបង្ហាញរបស់ប្រមុខរាជរដ្ឋាភិបាល។ ខេត្តកំពតមានក្បាលដីប្រមាណជាង ៧៥ម៉ឺនក្បាលដីដែលបានវាស់វែងបញ្ចប់ ហើយការចែកបណ្ណកម្មសិទ្ធិដល់ដៃពលរដ្ឋបានចំនួនជាង ៦៥ម៉ឺនបណ្ណ ហើយថ្ងៃនេះបន្តចែកជូនជាង ១ម៉ឺន ៣ពាន់បណ្ណបន្ថែមទៀត។

មានមតិសំណេះសំណាលនាឱកាសនោះ លោក ម៉ៅ ធនិន អភិបាលខេត្តកំពតបានលើកឡើងថា បច្ចុប្បន្នរាជរដ្ឋាភិបាលកម្ពុជា ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានបន្តខិតខំយកចិត្តទុកដាក់ ជំរុញពន្លឿនឱ្យមានការវាស់វែងដីធ្លីជូនពលរដ្ឋឱ្យបានឆាប់រហ័សបំផុតនៅទូទាំងប្រទេស ដើម្បីធ្វើការចុះបញ្ជីដីធ្លីមានលក្ខណៈជាប្រព័ន្ធ និងផ្តល់ជូននូវវិញ្ញាបនបត្រសម្គាល់ម្ចាស់អចលនវត្ថុជូនពលរដ្ឋឱ្យបានលឿនបំផុត។

លោក ម៉ៅ ធនិន បានឱ្យដឹងថា គោលនយោបាយដីធ្លីនេះត្រូវបានរៀបចំឡើងដោយសម្តេចតេជោ ហ៊ុន សែន ប្រធានព្រឹទ្ធសភាកម្ពុជា អតីតនាយករដ្ឋមន្ត្រីនៃកម្ពុជា ក្នុងគោលបំណងឱ្យប្រជាពលរដ្ឋនៅគ្រប់តំបន់ទូទាំងប្រទេសទទួលបានសិទ្ធិកាន់កាប់ដីធ្លីដោយស្របច្បាប់ អាចទាញយកផលប្រយោជន៍ពីវិស័យដីធ្លី និងកាត់បន្ថយវិវាទដីធ្លីផងដែរ។

លោកអភិបាលខេត្តកំពតបានបន្តទៀតថា នាថ្មីៗនេះ សម្តេចតេជោ ហ៊ុន សែន ក៏បានធ្វើការជំរុញបន្ថែមឱ្យអាជ្ញាធររាជធានី-ខេត្តទាំងអស់ត្រូវពន្លឿនលើការងារវាស់វែង និងចេញបណ្ណកម្មសិទ្ធិដីធ្លីជូនពលរដ្ឋឱ្យបានឆាប់បំផុតទៅតាមគោលនយោបាយរបស់រាជរដ្ឋាភិបាល។ លោកក៏បានថ្លែងកោតសរសើរចំពោះមន្ត្រីជំនាញ នៃមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តកំពត ដែលកន្លងមកបានខិតខំប្រឹងប្រែងជម្នះ ពុះពាររាល់ឧបសគ្គ ក្នុងការអនុវត្តនីតិវិធីចុះបញ្ជីដីធ្លី និងចេញបណ្ណកម្មសិទ្ធជូនប្រជាពលរដ្ឋនៅទូទាំងខេត្តកំពត ស្របតាមផែនការរបស់ក្រសួងរៀបចំដែនដីនគរូបនីយកម្មនិងសំណង់ ដែលបានកំណត់។

បើយោងតាមរបាយការណ៍របស់លោក ព្រាប សុផាត ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តកំពត បានឱ្យដឹងថា ការប្រកាសចែកវិញ្ញាបនបត្រសម្គាល់ម្ចាស់អចលនវត្ថុជូនពលរដ្ឋនាពេលនេះ មានចំនួន ៧ភូមិ ២ឃុំ រួមមាន៖ ភូមិព្រៃថ្នង ភូមិចក្រីទីង ភូមិដំណាក់ហ្លួង ឃុំព្រៃថ្នង, ភូមិគោចិនលែង ភូមិត្រពាំងច្រាប ភូមិត្រសេកកោង និងភូមិថ្មី ឃុំថ្មី ស្រុកទឹកឈូ ខេត្តកំពត ដែលមានក្បាលដីសរុបចំនួន ១៣ ១៣១ក្បាលដី ស្មើនឹង ៧ ៨៦៦គ្រួសារ។

លោក ព្រាប សុផាត ប្រធានមន្ទីរបានបន្តថា កិច្ចការងារទាំងនេះទទួលបានលទ្ធផលល្អក៏ដោយសារមានការគាំទ្រ ដឹកនាំ ចង្អុលបង្ហាញដោយផ្ទាល់ពីសំណាក់ លោក សាយ សំអាល់ ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ និងលោក ម៉ៅ ធនិន អភិបាលខេត្តកំពត ដែលតែងតែផ្ដល់ជាធនធានថវិកា សម្ភារៈឧបករណ៍ ការគាំទ្រលើផ្នែកបច្ចេកទេសលើការងារនេះផងដែរ៕

អត្ថបទ៖ សឹង រ៉ាត់

The post អាជ្ញាធរខេត្តកំពត បន្តចែកបណ្ណកម្មសិទ្ធិដីធ្លីជាង ១ម៉ឺន ៣ពាន់បណ្ណជូនពលរដ្ឋចំនួន២ឃុំក្នុងស្រុកទឹកឈូ appeared first on Kampuchea Thmey Daily.

ពិធីចែកវិញ្ញាបនបត្រសម្គាល់ម្ចាស់អចលនវត្ថុជូនប្រជាពលរដ្ឋមានចំនួន ១៣ភូមិ រួមមាន៖ ភូមិពោធិ៍មៀវ ភូមិគគីរធំ ភូមិគគីរធំ២ ភូមិរាំងដេក ភូមិរាំងដេក២ ស្ថិតក្នុងឃុំគគីធំ និងភូមិចន្លក់ ភូមិចន្លក់ក្រៅ ភូមិទួលក្របៅ ភូមិទួលត្នោត ភូមិគគីរ ភូមិដូនស ភូមិទួលដួង ភូមិតារាបជូនស ស្ថិតឃុំគគី ស្រុកកៀនស្វាយ ខេត្តកណ្តាលកាលពីថ្ងៃទី២០ ខែឧសភា ឆ្នាំ២០២៦។

លោក ឈឿន ប៊ុណ្ណារ័ត្ន រដ្ឋលេខាធិការ ក្រសួងរៀបចំដែនដី នគរូបនីយកម្ម និងសំណង់

លោក គួច ចំរើន អភិបាលខេត្តកណ្តាល បានមានប្រសាសន៍ថា ស្រុកកៀស្វាយបានបញ្ចប់ការចុះបញ្ជីដីធ្លីលក្ខណៈជាប្រព័ន្ធរួចរាល់ហើយ តែការចែកបណ្ណប្រជាពលរដ្ឋមិនទាន់មកយកបានគ្រប់គ្នានៅឡើយទេ ដូច្នេះមន្ត្រីជំនាញ និងអាជ្ញាធរស្រុកត្រូវបន្តខិតខំរកកវិធីសាស្ត្រ ដើម្បីឱ្យម្ចាស់កម្មសិទ្ធិដីធ្លី រួសរាន់មកទទួលយកបណ្ណកម្មសិទ្ធិដីធ្លីរបស់ខ្លួន សម្រាប់ប្រើប្រាស់ស្របទៅតាមច្បាប់ឱ្យបានគ្រប់ៗគ្នា។ បន្ថែមពីលើនេះ ឯកឧត្តមអភិបាលខេត្ត បានអំពាវនាវដល់ប្រជាពលរដ្ឋដែលមានបានកម្មសិទ្ធិដីធ្លីទាំងអស់ សូមអញ្ជើញមកទទួលយកប័ណ្ណពីមន្ត្រីសូរិយោដី និងមន្ត្រីច្រកចេញចូលតែមួយ ស្ថិតក្នុងស្រុកកៀនស្វាយ ជាពិសេសសូមបងប្អូនប្រជាពលរដ្ឋដែលចូលរួមក្នុងពិធីនាថ្ងៃនេះ មេត្តាជួយផ្សព្វផ្សាយ និងផ្ដាំផ្ញើដល់បងប្អូនប្រជាពលរដ្ឋផ្សេងៗទៀតឱ្យអញ្ជើញមកទទួលបានប័ណ្ណកម្មសិទ្ធិពីការិយាល័យច្រកចេញតែមួយស្រុកឱ្យបានគ្រប់ៗគ្នាផងដែរ។

លោក គួច ចំរើន អភិបាល នៃគណៈអភិបាលខេត្តកណ្តាល

ដោយឡែក ចំពោះអាជ្ញាធរស្រុក និងមន្ត្រីពាក់ព័ន្ធទាំងអស់ លោក គូច ចំរើន បានក្រើនរំលឹក ដាច់ខាតមិនត្រូវចុះហត្ថលេខាបញ្ជាក់ឯកសារផ្សេងៗពាក់ព័ន្ធនិងរឿងដីធ្លីជូនប្រជាពលរដ្ឋ ក្រៅពីប័ណ្ណកម្មសិទ្ធិដីធ្លីដែលបានចុះបញ្ជីរួចហើយនោះទេ អាជ្ញាធរត្រូវទទួលស្គាល់តែបណ្ណកម្មសិទ្ធតែមួយគត់ប៉ុណ្ណោះ ជៀសវាងបង្កភាពស្មុគស្មាញ និងបង្កើតបញ្ហាផ្សេងៗ ពាក់ព័ន្ធនិងរឿងដីធ្លីតទៅទៀត បើមន្ត្រីណានៅតែបន្តចុះហត្ថលេខាទៀត ត្រូវទទួលខុសត្រូវចំពោះមុខច្បាប់។

ក្នុងនោះផងដែរលោក អភិបាល បានលើកទឹកចិត្ត ដល់រដ្ឋបាលស្រុកកៀនស្វាយ គណៈបញ្ជាការឯកភាពរដ្ឋបាលស្រុក សូមបន្តយកចិត្តទុកដាក់រៀបចំសណ្តាប់ធ្នាប់ សាធារណៈ ដីចំណីផ្លូវ ដើម្បីបង្ការនូវគ្រោះថ្នាក់ចរាចរណ៍ និងលើកសោភ័ណភាពតាមដងផ្លូវ។ ជាងនេះទៅទៀត អាជ្ញាធរមូលដ្ឋាន គណៈកម្មាធិការទទួលបន្ទុកកិច្ចការនារី និងកុមារស្រុក និងសហគមន៍ក្នុងមូលដ្ឋានទាំងមូល សូមផ្តល់ការចាប់អារម្មណ៍ រួមគ្នាកាត់បន្ថយ លុបបំបាត់អំពើហិង្សាក្នុងគ្រួសារ ដោយត្រូវចេះក្តាប់កំណត់មុខសញ្ញាគ្រួសារងាយរងគ្រោះ រួមគ្នាការពារ បញ្ចៀសអំពើហិង្សាក្នុងគ្រួសារ បញ្ចៀសនូវសោកនាដកម្មដែលអាចកើតមានក្នុងសង្គម៕

The post អាជ្ញាធរខេត្តកណ្ដាល ចែកវិញ្ញាបនបត្រសម្គាល់ម្ចាស់អចលនវត្ថុជូនពលរដ្ឋ ជាង១មុឺនបណ្ណ ក្នុងស្រុកកៀនស្វាយ appeared first on Kampuchea Thmey Daily.

តាមការបញ្ជាក់ពីលោកអភិបាលស្រុក ការចុះពិនិត្យនេះ ផ្តោតសំខាន់លើការស្នើសុំចេញបណ្ណកម្មសិទ្ធិដីធ្លី ជូនប្រជាពលរដ្ឋ៣ភូមិ រួមមាន ភូមិបាស្រែ ភូមិស្វាយខាងត្បូង និងភូមិស្វាយខាងជើង ស្ថិតក្នុងឃុំបាស្រែ។ សរុបប្រជាពលរដ្ឋដែលទាក់ទងមានចំនួន ៤៦៦ គ្រួសារ ជាមួយផ្ទៃដីសរុបប្រមាណ ៥៩៤ ហិកតា។

ក្នុងអំឡុងពេលចុះពិនិត្យនោះដែរក្រុមការងារបានស្តាប់យោបល់ និងបញ្ហាប្រឈមជាក់ស្តែងពីប្រជាពលរដ្ឋ ពាក់ព័ន្ធនឹងការកាន់កាប់ប្រើប្រាស់ដីធ្លី ការខ្វះឯកសារផ្លូវការ និងបញ្ហាពាក់ព័ន្ធនឹងព្រំដែនដី។ ព័ត៌មានទាំងនេះត្រូវបានប្រមូលយក ដើម្បីធ្វើជាមូលដ្ឋានសម្រាប់ការវិភាគ និងដោះស្រាយតាមនីតិវិធីច្បាប់ឱ្យបានត្រឹមត្រូវ និងមានតម្លាភាព។

ប្រជាពលរដ្ឋលើកឡើងដែរថា ការចុះដល់មូលដ្ឋានដោយផ្ទាល់ពីសំណាក់លោកអភិបាលស្រុក និងក្រុមកាងារនេះ បង្ហាញពីការយកចិត្តទុកដាក់របស់អាជ្ញាធរ ក្នុងការដោះស្រាយបញ្ហាជូនប្រជាពលរដ្ឋដោយឆាប់រហ័ស និងមានប្រសិទ្ធភាព។ ជាពិសេស ការចេញបណ្ណកម្មសិទ្ធិ គឺជាចំណុចសំខាន់មួយដែលអាចធានាសិទ្ធិកាន់កាប់ដីធ្លីយ៉ាងច្បាស់លាស់ ជួយកាត់បន្ថយជម្លោះ និងលើកកម្ពស់សុវត្ថិភាពសង្គមនៅមូលដ្ឋាន។

លោក កង អាណាន់ បន្ថែម​ថា ដំណាក់កាលបន្ទាប់ ក្រុមការងារនឹងបន្តសហការជាមួយអាជ្ញាធរពាក់ព័ន្ធ ដើម្បីពិនិត្យឯកសារ បញ្ចប់នីតិវិធីបច្ចេកទេស និងជំរុញដំណើរការចេញបណ្ណកម្មសិទ្ធិឱ្យបានលឿនតាមដែលអាចធ្វើទៅបាន ដើម្បីឆ្លើយតបទាន់ពេលវេលាចំពោះតម្រូវការរបស់ប្រជាពលរដ្ឋ៕

អត្ថបទ៖ វីរៈ

The post អភិបាលស្រុកអង្គរបូរី​ ចុះពិនិត្យទីតាំងជាក់ស្តែង ដើម្បី​ចេញបណ្ណកម្មសិទ្ធិជូនប្រជាពលរដ្ឋជិត ៥០០គ្រួសារ appeared first on Kampuchea Thmey Daily.

គួរឱ្យដឹងថា បុរីខេភីម៉នដានី មានសរុបចំនួន ៣៦គម្រោង ស្ថិតក្នុងភូមិសាស្ត្រចំនួន ៧រាជធានីខេត្តក្រុង   ផែនការមេរបស់បុរី ប្រមាណ ៣មុឺនឡូត៍ (ដី/ផ្ទះ)   តែដោយសារវិបត្តិហិរញ្ញវត្ថុធ្ងន់ធ្ងរ ជាមួយភាគីពាក់ព័ន្ធ កាលពីឆ្នាំ២០២២   បុរីខេភីម៉នដានី បានឈានដល់ការបិទផ្អាកអាជីវកម្ម បិទការទិញលក់ សាងសង់ បានជះឥទ្ធិពលលេីគម្រោងទាំង៣៦គម្រោង បិទចរន្តការងារនិងហិរញ្ញវត្ថុបុរីខេភីម៉នដានីទាំងមូល។ អតីតម្ចាស់បុរី ម៉ន ដានី ត្រូវបានសមត្ថកិច្ចចាប់ខ្លួន និងបញ្ជូនទៅឃុំខ្លួននៅពន្ធនាគារ និងកំពុងជាប់បណ្ដឹងប្រមាណ៣០ករណី ដោយតុលាការកំពុងកាត់ទោសបណ្ដើរៗ។  ស្របពេលជាមួយគ្នា អតិថិជនបុរីទាំងនេះ បានដាក់ពាក្យប្ដឹងបន្តបន្ទាប់ ទៅកាន់ក្រសួងរៀបចំដែនដី នគរូបនីយកម្ម និងសំណង់ ដើម្បីដោះស្រាយបញ្ហាផ្ទេរបណ្ណកម្មសិទ្ធិជូនពួកគាត់។

ឆ្លើយតបនឹងកង្វល់របស់អតិថិជន, ក្នុងនាមអាណាព្យាបាល ក្រសួងរៀបចំដែនដី បានខិតខំប្រឹងប្រែងពន្លឿនដំណើរការចេញបណ្ណកម្មសិទ្ធិជូនដល់អតិថិជនបុរី ខេភី ម៉ន ដានី, បុរី ភីអ វីឡា និងបុរី វី អាយ ភី ដែលនៅសេសសល់ ឱ្យទទួលបានប័ណ្ណកម្មសិទ្ធិគ្រប់ៗគ្នា តួយ៉ាងគឺការចែកបណ្ណកម្មសិទ្ធចំនួន៩៨៨បណ្ណនៅព្រឹកនេះជាដើម។ បើតាមប្រសាសន៍របស់ លោក ថេង ច័ន្ទសង្វារ, ចំពោះអតិថិជនដែលបានបង់ប្រាក់ ១០០% នៅសល់ប្រមាណជាង១០០បណ្ណទៀតប៉ុណ្ណោះ។ យ៉ាងណាមិញក្រសួង នឹងបន្តផ្សព្វផ្សាយ និងពន្លឿនការដោះស្រាយផ្ដល់បណ្ណកម្មសិទ្ធិជូនគ្រប់អតិថិជន។

អ្នកស្រី  ម៉ែន សុភី អ្នករស់នៅខេត្តព្រះវិហារ អតិថិជនដែលទិញផ្ទះ៣ល្វែង ពីបុរីម៉នដានីក្នុងគម្រោងទី២៩ បានសម្ដែងក្ដីរីករាយ និងថាបានធូរស្រាលពីការលំបាក ប​ន្ទាប់ពីទទួលបានវិញ្ញាបនបត្រសម្គាល់ម្ចាស់អចលនវត្ថុក្រោមការសម្របសម្រួលរបស់ក្រសួង ដ.ន.ស.។ អ្នកស្រី អះអាងថា ស្របពេលកូវីដ១៩ អ្នកស្រី​បានទិញផ្ទះ៣ល្វែង។ អ្នកស្រីរម្លឹកថា ក្នុងពេលកូវីដ១៩ អ្នកស្រីជួបការលំបាកផ្នែកសេដ្ឋកិច្ច ត្រូវខ្ចីបំណុល ដើម្បីបង់ប្រាក់ជូនបុរី ក្រោយមកភាគីម្ចាស់បុរីក៏ជួបវិបត្តសេដ្ឋកិច្ចធ្ងន់ធ្ងររហូតដល់ក្ស័យធន់។ អ្នកស្រីអះអាងថា រាជរដ្ឋាភិបាលកម្ពុជា បាននាំយកស្នាមញញឹម និងក្ដីរីករាយជូនអ្នកស្រីឡើងវិញ តាមរយៈការដោះស្រាយបញ្ហាជាប់គាំងរបស់ម្ចាស់គម្រោងម៉នដានី និងចែកវិញ្ញាបនបត្រសម្គាល់ម្ចាស់អចលនវត្ថុជូនអ្នកស្រីនាពេលនេះ។

អតិថិជនបុរីម៉នដានីមួយរូបទៀត ដែលទិញផ្ទះក្នុងគម្រោងទី២៩ របស់បុរីម៉នដានី គឺលោក យន់ សុឃីម  ក៏បង្ហាញពីអារម្មណ៍រំភើប រីករាយបន្ទាប់ពីទទួលបានវិញ្ញាបនបត្រសម្គាល់ម្ចាស់អចលនវត្ថុ។ លោករៀបរាប់ថា លោក បានទិញបុរីពីគម្រោងទី២៩របស់បុរីខេភីម៉នដានី ស្របពេលកូវីដ១៩ ចាប់ពីពេលនោះលោកជួបប្រទះបញ្ហាវិបត្តហិរញ្ញវត្ថុ ខំប្រឹងរកប្រាក់ទាំងត្រដាប់ត្រដួស ដើម្បីបង់ទៅកាន់ភាគីបុរី។ ទោះបីជាបានបង់ប្រាក់រួចរាល់ ក៏ភាគីក្រុមហ៊ុនមិនបានសាងសង់ផ្ទះជូនលោកឡើយ ដែលត្រង់ចំណុចនេះ បណ្ដាលឱ្យជួបប្រទះបញ្ហាផ្លូវចិត្ត ទន្ទឹងរងចាំផ្ទះជារៀងរាល់ថ្ងៃ។ លោកថា ការលំបាករបស់លោក បានផុតទៅវិញ នៅពេលដែលក្រសួង ដ.ន.ស ចែកបណ្ណសម្គាល់កម្មសិទ្ធិជូនលោក និងអតិថិជននាពេលនេះ។

ទាំងលោក យន់ សុឃីម និងអ្នកស្រី ម៉ែន សុភី ព្រមទាំងអតិថិជនផ្សេងទៀត ដែលទទួលបានបណ្ណកម្មសិទ្ធិ នាពេលនេះ សុទ្ធតែបង្ហាញការអរគុណដល់រាជរដ្ឋាភិបាលកម្ពុជា និងមន្ត្រីពាក់ព័ន្ធដែលបានខិតខំប្រឹងប្រែងដោះស្រាយបញ្ហារហូតដល់សម្រេចបានលទ្ធផល ពោលគឺការចែកបណ្ណកម្មសិទ្ធិជូនពួកគាត់។

លោក ប៉ិល ភីរៈ អនុប្រធាននាយកដ្ឋាននីតិកម្ម និងជាប្រធានក្រុមការងារប្រតិបត្តិដោះស្រាយគម្រោងទី២៩របស់បុរីខេភីម៉នដានី អះអាងថា ក្រសួង បានចាប់ផ្ដើមទទួលដោះស្រាយបញ្ហារវាងអតិថិជន និងបុរីខេភីម៉នដានី ចាប់តាំងពីដើមឆ្នាំ២០២៤ មក ដោយបានប្រមូលឯកសារពាក់ព័ន្ធ ដោយប្រមូលបាននូវបង្កាន់ដៃបង់ប្រាក់រវាងអតិថិជនជាមួយភាគីបុរី និង​ឯកសារសំខាន់ៗផ្សេងទៀត ដើម្បីបញ្ជាក់ថាអតិថិនជនពិតជាបានទិញដី ឬផ្ទះក្នុងគម្រោងរបស់បុរីខេភីម៉នដានី ក្រោយមកក្រសួងបានស្រាវជ្រាវ អញ្ជើញភាគីពាក់ព័ន្ធមកចូលដោះស្រាយ។

ជាលទ្ធផល លោកឱ្យដឹងថា ក្រសួង ដ.ន.ស ទទួលបានការចូលរួមពីសំណាក់ម្ចាស់ដីដើម ដោយបានឯកភាពប្រគល់បណ្ណសម្គាល់កម្មសិទ្ធិដីទំហំ៥០ហិកតា(ជំហានទី១) មកក្រសួង ដើម្បីបែងចែកជូនអតិថិនជនរបស់បុរី ដោយមកទល់បច្ចុប្បន្នក្រសួងបានដោះស្រាយចែកបណ្ណសម្គាល់កម្មសិទ្ធិចំនួនបួនលើក ដោយបានចែកជូនបណ្ណសម្គាល់កម្មសិទ្ធិប្រមាណ២៥០០បណ្ណជូនអតិថិជន ដែលបានបង់ប្រាក់គ្រប់១០០% ហើយក្រសួងនឹងបន្តដោះស្រាយចែកការបែងចែកបណ្ណជាង១ពាន់ទៀត ទៅដល់អតិថិជនដែលបង់រំលោះមិនទាន់គ្រប់១០០%ជាមួយបុរីម៉នដានី អតិថិជនដែលទិញផ្ទះពីបុរី ប៉ុន្តែប៉ះចំទីតាំងជាន់គ្នា៕

The post រដ្ឋាភិបាលចែកបណ្ណសម្គាល់កម្មសិទ្ធិជិត១ពាន់ទៀតជូនអតិថិជនបុរីម៉នដានី ដែលនេះជាការឈានដល់ការបញ្ចប់វិវាទដែលជាប់គាំងទាំង៣៦គម្រោង appeared first on Kampuchea Thmey Daily.

សេចក្ដីថ្លែងការណ៍រួមរវាងធនាគារជាតិ នៃកម្ពុជា និងអង្គការសហប្រជាជាតិប្រចាំកម្ពុជាស្ដីពីបច្ចុប្បន្នភាព នៃដំណើរការពិគ្រោះយោបល់ជាមួយពហុភាគី ពាក់ព័ន្ធ មីក្រូហិរញ្ញវត្ថុនៅកម្ពុជា ដើម្បីតាមដានវឌ្ឍនភាពសកម្មភាពអាទិភាពចំនួន ២២ ដែលត្រូវបានអនុម័តក្នុងកិច្ចសន្ទនាកម្រិតខ្ពស់រវាងពហុភាគីពាក់ព័ន្ធលើកទី១ កាលពីថ្ងៃទី១២ ខែកក្កដា ឆ្នាំ២០២៤។

ដើម្បីឆ្លើយតបនឹងការព្រួយបារម្ភចំពោះកំណើនយ៉ាងឆាប់រហ័សនៃវិស័យមីក្រូហិរញ្ញវត្ថុនៅកម្ពុជា និងភាពប្រទាក់ក្រឡាគ្នា​ជាមួយបញ្ហាប្រឈមផ្សេងទៀត ដូចជាការជំពាក់បំណុលលើសលប់ជាដើម ការផ្តួចផ្តើមឱ្យមានដំណើរការពិគ្រោះយោបល់បានចាប់ផ្តើមកាលពីខែវិច្ឆិកា ឆ្នាំ២០២៣ ក្នុងគោលបំណង សម្របសម្រួលឱ្យមានការចូលរួមពិភាក្សាពីភាគីពាក់ព័ន្ធក្នុងន័យស្ថាបនា បង្កើតឱ្យមានការយល់ដឹងរួមគ្នា អំពីបញ្ហាប្រឈមនានា និងកំណត់សកម្មភាពអាទិភាព និងការប្តេជ្ញាចិត្តជាក់លាក់ ដែលអាចជួយគាំទ្រដល់ភាគីពាក់ព័ន្ធទាំងអស់ ក្នុងការដោះស្រាយបញ្ហាប្រឈម និងចាប់យកកាលានុវត្តភាពក្នុងការពង្រឹង វិស័យធនាគារ និងហិរញ្ញវត្ថុ។

កិច្ចសន្ទនាតាមក្រុមនីមួយៗ និងកិច្ចប្រជុំបច្ចេកទេសជាមួយពហុភាគីពាក់ព័ន្ធ ត្រូវបានរៀបចំឡើងជាបន្តបន្ទាប់ ដោយមានការចូលរួមពិគ្រោះយោបល់ពីតំណាងក្រុម និងស្ថាប័នចំនួនជាង ១០០ ផ្សេងគ្នា រួមមាន៖ តំណាងមកពីរាជរដ្ឋា​ភិ​បាល និយ័តករ ស្ថាប័ននិងសមាគមវិជ្ជាជីវៈធនាគារ និងហិរញ្ញវត្ថុ វិនិយោគិន សង្គមស៊ីវិល អង្គការមិនមែនរដ្ឋាភិបាល និងដៃគូអភិវឌ្ឍន៍ ព្រមទាំងទីភ្នាក់ងារអង្គការ សហប្រជាជាតិ និងស្ថាប័នហិរញ្ញវត្ថុអន្តរជាតិ។

ក្នុងចំណោមសកម្មភាពអាទិភាពចំនួន២២ សកម្មភាពអាទិភាពចំនួន៤ ត្រូវបានអនុវត្តបាន ទាំងស្រុង សកម្មភាពអាទិ​ភាពចំនួន១៥ កំពុងត្រូវបានអនុវត្ត និងសកម្មភាពអាទិភាពចំនួន៣ កំពុងត្រូវបានចាប់ផ្តើមអនុវត្ត។ ចំនុចសំខាន់ៗពាក់ព័ន្ធនឹងការអនុវត្តសកម្មភាពអាទិភាពរួមមាន៖

ការពង្រឹងការផ្តល់ឥណទានប្រកបដោយទំនួលខុសត្រូវ៖ ការលើកកម្ពស់ស្តង់ដា ក្នុងការផ្តល់ឥណទានប្រកបដោយការទទួលខុសត្រូវ មានវឌ្ឍនភាពគួរឱ្យកត់សម្គាល់ ដោយរួមបញ្ចូលទាំងការពង្រឹងការអនុវត្តក្រមប្រតិបត្តិ និងការប្រើប្រាស់ឧបករណ៍វាយតម្លៃ និងតាមដានសុខដុមនីយកម្មនៃកិច្ចការពារអតិថិជន ដោយមានគ្រឹះស្ថានធនាគារ និងហិរញ្ញវត្ថុចំនួន ៣០ គ្រោងនឹងចូលរួមក្នុងការវាយតម្លៃដោយភាគីទីបីនាពេលខាងមុខ។ គោលការណ៍ណែនាំស្តីពីវិធានក្នុងការផ្តល់ឥណ ទានត្រូវបានពង្រឹង ដោយមានការហាមឃាត់ការប្រើប្រាស់បណ្ណកម្មសិទ្ធិដីធ្លីរបស់សហគមន៍ជនជាតិដើមភាគតិច ជាទ្រព្យធានា និងការទប់ស្កាត់ការលក់ដោយបង្ខំនូវបណ្ណកម្មសិទ្ធិទាំងនោះ។

បច្ចុប្បន្ន គ្រឹះស្ថាន ធនាគារនិងហិរញ្ញវត្ថុអាចពិនិត្យមើលតាមប្រព័ន្ធអនឡាញនូវព័ត៌មានលើបណ្ណកម្មសិទ្ធិ ដែលត្រូវបានចុះបញ្ជីជាបណ្ណកម្មសិទ្ធិដីធ្លីរបស់សហគមន៍ជនជាតិដើមភាគតិច និងដី ដែលជាកម្មសិទ្ធិរដ្ឋ ដែលត្រូវបានហាមឃាត់ដោយច្បាប់ក្នុងការប្រើប្រាស់ជាទ្រព្យធានា។

ការធ្វើឱ្យប្រសើរឡើងនូវគោលការណ៍លើកទឹកចិត្តរបស់គ្រឹះស្ថានធនាគារនិងហិរញ្ញវត្ថុ៖ សូចនាករសមិទ្ធកម្មគន្លឹះរបស់គ្រឹះស្ថានធនាគារនិងហិរញ្ញវត្ថុសម្រាប់វាយតម្លៃបុគ្គលិក កំពុងត្រូវបានពិនិត្យ និងកែសម្រួលឱ្យស្របតាមគោលការណ៍ដែលមានចែងក្នុងក្រម-ប្រតិបត្តិសម្រាប់គ្រឹះស្ថានធនាគារ និងហិរញ្ញវត្ថុ និងគោលការណ៍ណែនាំស្តីពីវិធានក្នុងការផ្តល់ឥណទានប្រកបដោយការទទួលខុសត្រូវ និងគោលការណ៍ “មិនធ្វើឱ្យមានការ-លំបាក។

ការការពារផ្លូវច្បាប់៖ សេចក្តីថ្លែងការណ៍រួមត្រូវបានរៀបចំឡើង ដើម្បីពង្រឹងបទប្បញ្ញត្តិ ដែលមានស្រាប់សម្រាប់ទប់ស្កាត់ការប្រើប្រាស់មិនត្រឹមត្រូវនូវឯកសារសម្គាល់អត្តសញ្ញាណដូចជា បណ្ណសមធម៌ អត្តសញ្ញាណបណ្ណ និងសៀវភៅគ្រួសារ ធ្វើជាទ្រព្យធានាសម្រាប់ឥណទានគ្រប់រូបភាព។

យន្តការការពារអ្នកប្រើប្រាស់ និងដោះស្រាយបណ្ដឹង៖ គំនិតផ្តួចផ្តើមដើម្បីពង្រឹងកិច្ចការពារអ្នកប្រើប្រាស់ និងពង្រឹងយន្តការដោះស្រាយបណ្តឹងកំពុងត្រូវបានអនុវត្ត។

ជាក់ស្តែង មជ្ឈមណ្ឌលអតិថិជនដែលប្រើប្រាស់សេវាហិរញ្ញវត្ថុកំពុងត្រូវបានរៀបចំបង្កើតឡើង ដោយសមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា និងការសិក្សាលើជម្រើសក្នុងការបង្កើតយន្តការប្រឹក្សា និងសន្ធានកម្មបំណុល​ឯករាជ្យ បន្ថែមពីលើយន្តការ ដែលកំពុងត្រូវបានអនុវត្តស្រាប់។

បន្ថែមពីនេះ យុទ្ធនាការ និងកម្មវិធីលើកកម្ពស់ចំណេះដឹងផ្នែកហិរញ្ញវត្ថុ និងការបង្កើនសិទ្ធិរបស់អតិថិជន ក៏ត្រូវបានអនុវត្តដើម្បីផ្តល់ព័ត៌មានដល់អតិថិជន ជាពិសេសអតិថិជនដែលកំពុងជួបភាពតានតឹងពាក់ព័ន្ធនឹងបំណុល។

ប្រព័ន្ធអេកូឡូស៊ីទិន្នន័យ និងការរៀបចំឥណទានឡើងវិញ៖ កិច្ចខិតខំប្រឹងប្រែងដើម្បី បង្កើតប្រព័ន្ធចែករំលែក វិភាគ និងរាយការណ៍ទិន្នន័យសម្រាប់វិស័យធនាគារនិងហិរញ្ញវត្ថុ និងវិស័យហិរញ្ញវត្ថុមិនមែនធនាគារកំពុងត្រូវបានពិនិត្យ។

វិធានការពាក់ព័ន្ធនឹងការ-រៀបចំឥណទានឡើងវិញត្រូវបានដាក់ឱ្យអនុវត្តជាបន្តបន្ទាប់ ដោយផ្តល់អាទិភាពដល់អតិថិជនដែល​​ជួបប្រទះការលំបាកផ្នែកហិរញ្ញវត្ថុ រួមទាំងក្រុមងាយរងគ្រោះ និងក្រុមជនជាតិដើមភាគតិច។

សមាគមមីក្រូហិរញ្ញវត្ថុកម្ពុជា និងសមាគមធនាគារនៅកម្ពុជាបានរៀបចំសេចក្តីព្រាងនិយមន័យប្រតិបត្តិការមីក្រូហិរញ្ញវត្ថុ សម្រាប់វិស័យធនាគារ និងហិរញ្ញវត្ថុ នឹងត្រូវដាក់ជូនធនាគារជាតិនៃកម្ពុជា ដើម្បីពិនិត្យ និងប្រមូលធាតុចូលពីភាគីពាក់ព័ន្ធ៕

សេចក្ដីប្រកាសរួមខាងក្រោម៖

The post ធនាគារជាតិ ហាមស្ថាប័នផ្ដល់កម្ចី ទទួលប្លង់ដី​សហគមន៍ជនជាតិដើមភាគតិចធ្វើជាទ្រព្យធានា appeared first on Kampuchea Thmey Daily.

អនុប្រធានមន្ទីររៀបចំដែនដី នគរូបនីយកម្ម និងសំណង់ ខេត្តសៀមរាប លោក ប៊ូ ជុំសម្បត្តិ បញ្ជាក់ថាការប្រគល់ជូនវិញ្ញាបនបត្រសម្គាល់ម្ចាស់អចលនវត្ថុ(ប័ណ្ណកម្មសិទ្ធិ)ជូនដល់ប្រជាពលរដ្ឋដែលមានក្បាលដីនៅក្នុងសង្កាត់ក្របីរៀលនាពេលនេះគឺមានចំនួន៤ភូមិ គឺមានដូចជា ៖ ១/ភូមិរកា មានក្បាលដីសរុប១.០៧៥ដែលក្នុងនោះក្បាលដីចំនួន៨៩១ អាចចេញប័ណ្ណកម្មសិទ្ធជូនបាន ២/ ភូមិគោកដូង មានក្បាលដីសរុប១.១៣៧ដែលក្នុងនោះក្បាលដីចំនួន៩០១ អាចចេញប័ណ្ណកម្មសិទ្ធជូនបាន ៣/ ភូមិប្រម៉ា មានក្បាលដីសរុប១.២៤៣ដែលក្នុងនោះក្បាលដីចំនួន៦៥៦ អាចចេញប័ណ្ណកម្មសិទ្ធជូនបាន និងទី៤/ភូមិខ្នារមានក្បាលដីសរុប១.១១២ដែលក្នុងនោះក្បាលដីចំនួន៩៧៨ អាចចេញប័ណ្ណកម្មសិទ្ធជូន បានផងដែរ។

 លោក សំកុល សុចិត្រា អភិបាលរងខេត្តសៀមរាបបានថ្លែងថា ការចុះវាស់វែងដីធ្លីឈានដល់ការផ្តល់ប័ណ្ណកម្មសិទ្ធិ គឺជាកម្មវិធីនយោបាយមួយរបស់រាជរដ្ឋាភិបាល ដើម្បីធ្វើឱ្យប្រជាពលរស់នៅយ៉ាងសុខសាន្ត មានលំនឹងផ្លូវចិត្ត ជំរុញដល់សេដ្ឋកិច្ចគ្រួសារ សង្គម និងកាត់បន្ថយភាពក្រីក្រ និងបញ្ហាវិវាទដីធ្លីជាដើម។

លោក បន្តថាការផ្តល់ប័ណ្ណកម្មសិទ្ធិនេះនឹងបញ្ចៀសបាននូវបញ្ហាជម្លោះដីធ្លី ហើយចំពោះប័ណ្ណកម្មសិទ្ធិនេះគឺបានផ្តល់ជូនដល់បងប្អូនប្រជាពលរដ្ឋណាដែលបានបំពេញគ្រប់លក្ខខណ្ឌ និងបទដ្ឋានបច្ចេកទេសស្របតាមច្បាប់ និងបទដ្ឋានគតិយុត្ត ជាធរមាន ទើបអាចធ្វើបណ្ណកម្មសិទ្ធិនេះបាន ដើម្បីធានាសុវត្ថិភាពដល់ប្រជាពលរដ្ឋជាម្ចាស់ដី និងអ្នកកាន់កាប់ ជាក់ស្តែង មិនមានការភ័យខ្លាច។

លោកអភិបាលរង  ក៏បានក្រើនរំឭកដល់ប្រជាពលរដ្ឋដែលទើបតែទទួលបានប័ណ្ណកម្មសិទ្ធិទាំងអស់ ត្រូវយកប័ណ្ណកម្មសិទ្ធិនេះរក្សាទុក និងប្រើប្រាស់ឱ្យបានត្រឹមត្រូវ ជៀសវាងការបាត់បង់។ ម្យ៉ាងវិញទៀត ពេលដែលទទួលបានប័ណ្ណកម្មសិទ្ធិហើយនោះ មិនត្រូវឈ្លោះទាស់ទែងគ្នាអំពីបញ្ហាព្រំដី ព្រោះម្នាក់ៗសុទ្ធតែបានផ្តិតមេដៃយល់ព្រមទទួលយកទាំងអស់គ្នារួចរាល់ហើយ។ ចំពោះសំណុំរឿងដែលវិវាទលើបញ្ហាដីធ្លី ដែលមានប័ណ្ណកម្មសិទ្ធិនេះ មិនអាចដោះស្រាយបានទេ ទាល់តែស្ថាប័នច្បាប់ គឺតុលាកា រទើបអាចដោះស្រាយបាន៕

អត្ថបទ៖ គឿន វេត

The post អាជ្ញាធរខេត្តសៀមរាប ប្រគល់វិញ្ញាបនបត្រសម្គាល់ម្ចាស់អចលនវត្ថុ ជូនពលរដ្ឋ៤ភូមិក្នុងសង្កាត់ក្របីរៀល appeared first on Kampuchea Thmey Daily.

នៅថ្ងៃទី២១ ខែមីនា ឆ្នាំ២០២៤ លោក ងួន រតនៈ អភិបាលខេត្តកំពង់ធំ អញ្ជើញប្រគល់វិញ្ញា បនបត្រសម្គាល់ម្ចាស់អចលនវត្ថុ ១.០៨០ បណ្ណ ជូនប្រជាពលរដ្ឋភូមិប្រាសាទ ឃុំឈូក ស្រុកប្រាសាទសំបូរ។

លោកអភិបាលខេត្តលើកឡើងថា ការផ្តល់ជូននេះ គឺជាការផ្តល់សិទ្ធិស្របច្បាប់ក្នុងការកាន់កាប់ ចាត់ចែង និងបន្តមរតក ទៅកាន់កូនចៅជំនាន់ក្រោយ។

បើតាមលោក ងួន រតនៈ ក្នុងអំឡុងនៃការចុះធ្វើប័ណ្ណជូនបងប្អូន គឺមន្រ្តីជំនាញបានធ្វើការងារដោយប្រុងប្រយ័ត្ន និងទទួលខុសត្រូវខ្ពស់ ហ្មត់ចត់បំផុត ក្នុងការធ្វើបណ្ណកម្មសិទ្ធិ ចុះបញ្ជីដីធ្លីមានលក្ខណៈជាប្រព័ន្ធសម្រាប់ភូមិនីមួយៗ រហូតសម្រេចបានផ្តល់វិញ្ញាបនបត្រសម្គាល់ម្ចាស់ អចលនវត្ថុជូនប្រជាពលរដ្ឋឱ្យប្រើប្រាស់ដោយស្របច្បាប់ និងមានសិទ្ធិជាអចិន្ត្រៃយ៍រហូត។

ការផ្តល់បណ្ណកម្មសិទ្ធិនេះនឹងបញ្ចៀសជម្លោះដីធ្លីរ៉ាំរ៉ៃដែលយន្តការនេះនៅតែបន្តដោះស្រាយនៅក្រៅប្រព័ន្ធតុលាការដោយអនុវត្តតាម យុទ្ធសាស្ត្រឈ្នះឈ្នះ ដើម្បីប្រែក្លាយទៅ ជាតំបន់មួយជាតំបន់ដែលមានសន្តិភាពដីធ្លី។

លោក ងួន រតនៈ បញ្ជាក់ថា បណ្ណកម្មសិទ្ធិនេះផ្តល់ជូនដល់ ប្រជាពលរដ្ឋណាដែលបានបំពេញគ្រប់លក្ខខណ្ឌ និងបទដ្ឋានបច្ចេកទេសស្របតាមច្បាប់ និងបទដ្ឋានគតិយុត្ត ជាធរមាន ទើបអាចធ្វើបណ្ណកម្មសិទ្ធិនេះបាន ដើម្បីធានាសុវត្ថិភាពដល់ប្រជាពលរដ្ឋជាម្ចាស់ដី និងអ្នកកាន់កាប់ ជាក់ស្តែង មិនមានការភ័យខ្លាច។

លោកអភិបាលខេត្ត ជំរុញដល់អាជ្ញាធរមូលដ្ឋានផ្សព្វផ្សាយដល់ប្រជាពលរដ្ឋមកទទួលយកវិញ្ញាបនបត្រសម្គាល់ម្ចាស់អចលនវត្ថុនេះឲ្យបានគ្រប់ៗគ្នា។

លោក អ៊ឹម សុឌីណា ប្រធានមន្ទីរដែនដី នគររូបនីយកម្ម សំណង់និង សុរិយោដីខេត្ត ធ្វើរបាយការណ៍បញ្ជាក់ផងដែរថា ការប្រគល់វិញ្ញាបនបត្រសម្គាល់ម្ចាស់អចលនវត្ថុ១០៨០ប័ណ្ណ ជូនប្រជាពលរដ្ឋមាន៖ ដីលំនៅដ្ឋានចំនួន៥១៥បណ្ណ, ដីផលិតកម្មកសិកម្មចំនួន ៥៦៣បណ្ណ, ដីវត្តចំនួន០១បណ្ណ, ដីសាលារៀនចំនួន០១ប័ណ្ណ, ដីគ្មានទិន្នន័យចំនួន១៥២​ក្បាលដី, ទ្រព្យខាងប្តីចំនួន២៣៥ប័ណ្ណ, ទ្រព្យប្រពន្ធចំនួន៤៣៥ប័ណ្ណ, ទ្រព្យលីវចំនួន៩៦បណ្ណ, ទ្រព្យរួមប្តីប្រពន្ធចំនួន៣០១បណ្ណ, ទ្រព្យរដ្ឋចំនួន០១ប័ណ្ណ, ទ្រព្យកម្មសិទ្ធិអវិភាគចំនួន០៥បណ្ណ, ទ្រព្យសហកម្មសិទ្ធិចំនួន០៦ប័ណ្ណ និងទ្រព្យវត្តចំនួន០១ប័ណ្ណ៕

អត្ថបទ៖ ឈាង មករា

The post អាជ្ញាធរខេត្តកំពង់ធំ ប្រគល់វិញ្ញាបនបត្រសម្គាល់ម្ចាស់អចលនវត្ថុ ប្រមាណ ១.០០០ បណ្ណ ជូនប្រជាពលរដ្ឋ ស្រុកប្រាសាទសំបូរ appeared first on Kampuchea Thmey Daily.