ក្រុមការងារបច្ចេកទេស នៃអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ បានលើកយកវិធីសាស្រ្តសំខាន់ៗចំនួន៣ ដល់មាតាបិតា និងអាណាព្យាបាលសម្រាប់អនុវត្ត ដើម្បីការការពារកុមារពីមាតិកាមិនសមរម្យនៅលើបណ្តាញអ៊ីនធឺណិត ឬបណ្តាញសង្គម។

១. ការកត់សម្គាល់លើការរិះគន់រំលោភបំពានតាមបណ្តាញអ៊ីនធឺណិត (Cyberbullying)

កូនរបស់លោកអ្នកអាចជាជនរងគ្រោះនៃ Cyberbullying ដោយលោកអ្នកអាចកត់សម្គាល់អាកប្បកិរិយារបស់កូន ដូចជាការមួម៉ៅ ស្ងៀមស្ងាត់ ឬការលាក់បាំងក្រោយពេលប្រើប្រាស់អ៊ីនធឺណិត។ ក្នុងករណីមានការរំលោភបំពាន អាណាព្យាបាលគប្បីធ្វើការថតទុកជាភស្តុតាង ដើម្បីស្នើសុំឱ្យមានការដោះស្រាយសមស្រប។

២. ការកំណត់វិន័យនៃការប្រើប្រាស់ (Setting Boundaries)

កំណត់ទីតាំងប្រើប្រាស់ឧបករណ៍បច្ចេកវិទ្យានៅបរិវេណចំហ ចៀសវាងការប្រើប្រាស់ដាច់ដោយឡែកម្នាក់ឯងក្នុងបន្ទប់ និងកំណត់កាលវិភាគប្រើប្រាស់ឱ្យបានត្រឹមត្រូវ។

៣. ការគ្រប់គ្រងលើរបបប្រើប្រាស់ (Parental Controls)

• ប្រើកម្មវិធីដូចជា Google Family Link ឬមុខងារផ្សេងៗទៀតដើម្បីកំណត់ពេលវេលាប្រើប្រាស់ និងការដំឡើងកម្មវិធី (App Setting)។

• បើកមុខងារ SafeSearch នៅលើបណ្តាញអ៊ីនធឺណិតដើម្បីច្រោះចេញនូវមាតិកាមិនសមរម្យ ឬប្រើប្រាស់កម្មវិធីសម្រាប់កុមារដូចជា YouTube Kids៕

The post ស្ថាប័នជំនាញ ប្រាប់ពីវិធីសាស្ត្រសំខាន់ៗ៣ ដើម្បីការពារកុមារពីមាតិកាមិនល្អលើបណ្តាញអ៊ីនធឺណិត appeared first on Kampuchea Thmey Daily.

ការក្លែងបន្លំតាមបណ្តាញសង្គម (Social Media Fraud) គឺជាការវាយប្រហារទៅលើគណនីបណ្តាញសង្គម ដូចជា Facebook Instagram Tiktok Linkedin ជាដើម ក្នុងគោលបំណងលួចព័ត៌មានផ្ទាល់ខ្លួន ឬគ្រប់គ្រងគណនីបណ្តាញសង្គមរបស់អ្នកប្រើប្រាស់។ ជនឆបោកបានប្រើប្រាស់ប្រវត្តិរូប ឬតំណភ្ជាប់ក្លែងក្លាយ វិធីសាស្ត្របោកប្រាស់ផ្សេងៗ ដើម្បីក្លែងបន្លំជាមិត្តភក្កិ ឬបុគ្គលដែលគួរឱ្យទុកចិត្តបាន រួចផ្ញើសារមកដាក់សម្ពាធលើអ្នកឱ្យធ្វើសកម្មភាពអ្វីមួយឱ្យបានឆាប់រហ័ស។

តើគួរធ្វើដូចម្តេចដើម្បីចៀសវាងការក្លែងបន្លំតាមបណ្តាញសង្គម?

ដើម្បីជៀសវាងការក្លែងបន្លំតាមបណ្តាញសង្គម ក្រសួងប្រៃសណីយ៍ និងទូគមនាគមន៍ តាមរយៈ Telegram កម្ពុជាឆ្ពោះទៅឌីជីថល បានណែនាំដូចខាងក្រោម៖

• មិនគួរយល់ព្រមតាមសំណើស្នើសុំជាមិត្តពីអ្នកមិនស្គាល់ក្នុងបណ្តាញសង្គម។
• គួរស្រាវជ្រាវប្រភពឱ្យបានច្បាស់លាស់មុននឹងចុចលើតំណភ្ជាប់ណាមួយ។
• គួរផ្ទៀងផ្ទាត់អត្តសញ្ញាណបុគ្គលឱ្យបានច្បាស់លាស់ ដើម្បីជៀសវាងការបន្លំអត្តសញ្ញាណ។
• គួរប្រើពាក្យសម្ងាត់ខុសៗគ្នាចំពោះគណនីបណ្តាញសង្គមផ្សេងៗគ្នា។
• គួរបើកមុខងារផ្ទៀងផ្ទាត់ពហុកត្តា (MFA) សម្រាប់គណនីបណ្តាញសង្គមអ្នក។
• គួរកំណត់ឯកជនភាពដើម្បីគ្រប់គ្រងអ្នកដែលអាចមើលឃើញព័ត៌មានរបស់អ្នក។
• គួរធ្វើបច្ចុប្បន្នភាពគណនីបណ្តាញរបស់អ្នកជាប្រចាំ។
• ស្វែងយល់ និងរៀនអំពីវិធីសាស្ត្រក្លែងបន្លំថ្មីៗដែលគេបានផ្សព្វផ្សាយតាមបណ្តា្ញសង្គមអំពីវិធីការពារខ្លួន៕

The post ឈ្វេងយល់អំពីការក្លែងបន្លំតាមបណ្តាញសង្គម និងវិធីការពារ appeared first on Kampuchea Thmey Daily.

បណ្ឌិត ឈត ប៊ុនថង ប្រាប់ កម្ពុជាថ្មី ថាក្នុងស្ថានភាពបច្ចុប្បន្នដែលថៃឈ្លានពានកម្ពុជា និងប្រឌិតព័ត៌មានមិនពិតទៅកាន់ពិភពលោក ​ធ្វើឱ្យប្រជាជនខ្មែរឈឺចាប់ខ្លាំងណាស់។ ជាមួយគ្នានេះ លោកក៏ឃើញជនជាតិថៃមួយចំនួន បានជេរប្រមាថប្រជាជនកម្ពុជា មន្ត្រីរាជការ ទាហាន រហូតដល់ការប្រមាថថ្នាក់ដឹកនាំកម្ពុជា លើបណ្តាញសង្គមទៀត ដែលជាទង្វើមួយអសីលធម៌បំផុត។ ចំណែកប្រជាពលរដ្ឋខ្មែរក៏មួយចំនួនបានតបតទៅវិញប្រហាក់ប្រហែលគ្នាដែរ ហេតុនេះដើម្បីរក្សានូវភាពថ្លៃថ្នូរ លោកថា ទុកឱ្យថៃឈ្នះលើការជេរប្រទេចនេះចុះ កម្ពុជាត្រូវតែរក្សាតម្លៃ និងភាពជាជនរងគ្រោះ។ ត្រង់ចំណុចនេះ លោកបណ្ឌិតមិនមែនឱ្យពលរដ្ឋឈប់តបតឡើយ ប៉ុន្តែ កម្ពុជា ត្រូវចូលរួមឆ្លើយតបទៅវិញដោយហេតុផល ទាំងខាងផ្លូវច្បាប់ សីលធម៌ និងប្រវត្តិសាស្ត្រប្រសើរជាងការជេរប្រទេច។

លោកនិយាយថា៖ “ខ្ញុំគិតថាបងប្អូនយើងបន្តលើកហេតុ លើកផល ឆ្លើយតបទៅនឹងការចោទប្រកាន់ការបំភ្លៃផ្សេងៗ ប៉ុន្តែ មិនគួរប្រើពាក្យអសុរោះជេរប្រទេច ដែលនាំឱ្យយើងក្លាយទៅជាក្រុមជាតិនិយម ទៅជាមនុស្សដែលបាត់តម្លៃដូចប្រជាពលរដ្ឋថៃជ្រុលនិយមដែលកំពុងជេរប្រមាថមកលើយើងដូច្នោះដែរ គួរចៀសវាង”។

អ្នកជំនាញរូបនេះ សំណូមពរឱ្យកូនខ្មែរប្រុងប្រយ័ត្នចំពោះការប្រើប្រាស់បណ្តាញសង្គម ដោយលោកស្នើឱ្យអត់ធ្មត់ និយាយហេតុផល ព្រោះថា ប្រសិនជាថៃប្រើប្រាស់ហិង្សា ជេរប្រទេចលើកម្ពុជា ហើយប្រជាជនខ្មែរតបតទៅវិញបែបនោះ ក៏បង្ហាញថា កម្ពុជាមិនខុសពីថៃឡើយ។ ហេតុនេះ លោករម្លឹកម្តងហើយម្តងទៀត ត្រូវចៀសវាងសកម្មភាពទាំងអស់នេះឱ្យបាន ត្រូវរក្សាភាពជាជនរងគ្រោះ និងជាអ្នករងការប្រមាថពីថៃ និងប្រកាន់យកសីលធម៌ ភាពត្រឹមត្រូវ និងច្បាប់អន្តរជាតិ៕

The post បណ្ឌិត ឈត ប៊ុនថង ផ្តាំ​ពលរដ្ឋខ្មែររក្សាភាពថ្លៃថ្នូរលើបណ្តាញសង្គម ត្រូវតបតដោយហេតុផល កុំធ្វើដូចជនជាតិថៃ appeared first on Kampuchea Thmey Daily.

ការលើកឡើងបែបនេះរបស់លោក ហ៊ុល សីលា បានធ្វើឡើងថ្ងៃទី១០ ខែមិថុនា ឆ្នាំ២០២៥ ក្នុងឱកាសដែលលោកបានមានប្រសាសន៍នៅក្នុងសិក្ខាសាលា ស្តីពីការបង្កើតមាតិកាទេសចរណ៍ឌីជីថល (Tourism Digital Content) និងបច្ចេកទេសថតរូបដោយប្រើទូរសព្ទដៃ ជូនដល់មគ្គុទ្ទេសក៍ទេសចរណ៍ជាង១០០នាក់ នៅក្នុងខេត្តសៀមរាប។

លោក បានបញ្ជាក់ថា សិក្ខាសាលា រយះពេល២ថ្ងៃនេះ មិនត្រឹមតែជួយលើកកម្ពស់ ដល់វិស័យទេសចរណ៍កម្ពុជាប៉ុណ្ណោះទេ ព្រមទាំងបង្កើនចំណេះដឹង ដល់សិក្ខាកាមឱ្យដឹងកាន់តែច្បាស់អំពីការប្រើប្រាស់បណ្ដាញសង្គម  ការបង្កើតមាតិកាទេសចរណ៍ឌីជីថល និងបច្ចេកទេសថតរូបដោយប្រើទូរសព្ទដៃ ឱ្យបានកាន់តែច្បាស់លាស់ជូនដល់មគ្គុទ្ទេសក៍ទេសចរណ៍។

លោកបានលើកទឹកចិត្ត និងគាំទ្រដល់សកម្មភាពផ្សព្វផ្សាយព័ត៌មានវិជ្ជមាន និងស្នើសុំយោគយល់មិនផ្សព្វផ្សាយព័ត៌មានអវិជ្ជមាន ដែលនាំឱ្យប៉ះពាល់ដល់ទេសចរណ៍ជាតិ ដើម្បីរួមគ្នាប្រែក្លាយទេសចរណ៍កម្ពុជា ជាទេសចរវ៉ៃឆ្លាត បៃតង  ស្អាត ចីរភាព បរិយាប័ន្ន និងភាពធន  និងរួមគ្នាបន្តត្រូវអនុវត្តន៍យុទ្ធនាការ «រដូវកាលបៃតង (Green Season)» ដើម្បីទាក់ទាញភ្ញៀវទេសចរជាតិ និងអន្តរជាតិ ។

ដោយ៖ គឿនវេត

The post មន្ត្រីក្រសួងទេសចរណ៍៖ បណ្ដាញសង្គម ដើរតួនាទីយ៉ាងសំខាន់ក្នុងការផ្សព្វផ្សាយទេសចរណ៍កម្ពុជា appeared first on Kampuchea Thmey Daily.

១–ប្រទេស​ថៃ

ត្រឹម​ឆ្នាំ​២០២៣ នៅ​ថៃ​មាន​អ្នក​ប្រើ​ប្រាស់​បណ្តាញ​​សង្គម​ប្រមាណ​ ៥២.២៥​ លាន​នាក់ដែល​ស្មើ​នឹង​ប្រមាណ ​៧២.៨​ ភាគរយ​នៃ​ចំនួន​ប្រជាជន​សរុប​​នៃ​ប្រទេស​ថៃ ​។

Facebook ​ជា​បណ្តាញ​ទំនាក់​ទំនង​សង្គម​​ដ៏​​ពេញ​និយម​មួយ​ ដោយ​មាន​អ្នក​ប្រើ​ប្រមាណ ​៤៨.១​​ លាន​នាក់ ហើយ​ YouTube ​ជា​អ្នក​តាម​ពី​ក្រោយ​ ដោយ​មាន​អ្នក​ប្រើ​ប្រាស់​ប្រមាណ ​៣៤.៩​ លាន​នាក់ ​។

ដោយ​ឡែក​ LINE ​ជា​​បណ្តាញ​ទំនាក់​ទំនង​សង្គម​សម្រាប់​ឆាត​ទាក់​ទង​ដ៏​ពេញ​និយម​ជា​ង​គេ​នៅ​ប្រទេស​ថៃ ដោយ​អ្នក​ប្រើ​អ៊ីនធឺណិត​នៅ​ថៃ ​៩៥ ភាគរយមាន​ App នេះ​នៅ​ក្នុង​ទូរសព្ទ​ ។

ដោយ​ផ្អែក​តាម​​បញ្ញា​សប្បនិម្មិត (AI) ​របស់​ Facebook ​អ្នក​ប្រើ​ Facebook នៅ​ថៃ​​ ៨៦ ភាគរយប្រើ​ប្រាស់​ Facebook Stories ​ដើម្បី​រក​មើល​ផលិត​ផល​ ឬ​សេវា​កម្ម​ថ្មីៗ​ ខណៈ​​​អ្នក​ប្រើ​៧៤ ភាគរយបាន​ប្រើ​វា​ដើម្បី​ទិញ​ផលិត​ផល​តាម​អនឡាញ​ ពោល​គឺ​តាម​រយៈ​ Facebook Stories ហើយនេះ​ស​បញ្ជាក់​ថា ប្រជាពលរដ្ឋ​ថៃ​​ជា​ច្រើន​ប្រើ​ Facebook ​ដើម្បី​ទទួល​បាន​ព័ត៌មាន​ និង​ទិញ​អីវ៉ាន់​ថ្មីៗ​ ។

២– ប្រទេស​ឥណ្ឌូណេស៊ី​

ប្រទេស​​ឥណ្ឌូណេស៊ី​​មាន​អ្នក​ប្រើ​ប្រាស់​បណ្តាញ​សង្គម​​ជាង​ ១៦៧ ​លាន​នាក់ ដែល​ស្មើ​នឹង​ ៦០.៤ ភាគរយ​នៃ​ចំនួន​ប្រជាជន​សរុប។​ បណ្តាញ​សង្គម​ដែល​មាន​ប្រជាប្រិយភាព​ជាង​គេ​​​នៅ​ប្រទេស​ដែល​មាន​ផ្ទៃ​ដី​ធំ​ជាង​គេ​​ក្នុង​ចំណោម​បណ្តា​ប្រទេស​សមាជិក​អាស៊ាន​មួយ​នេះ គឺ​មាន​ Youtube, WhatsApp, Instagram និង​ Facebook។ ភាគ​ច្រើន​អ្នក​នៅ​ឥណ្ឌូណេស៊ី​ ​ប្រើ​បណ្តាញ​សង្គម​ដើម្បី​ទំនាក់​ទំនង​​ទៅ​មិត្តភក្តិ​ គ្រួសារ​ ក៏​ដូច​ទំនាក់​ទំនង​​លើ​ដី​កោះ​ទូ​ទាំង​ប្រទេស​ ។

ដោយ​ផ្អែក​តាម​ទិន្ន័យ​ព័ត៌មាន​ពី​ការ​ផ្សព្វផ្សាយ​ពាណិជ្ជកម្ម​របស់​ Meta បណ្តាញ​សង្គម Facebook ធ្លាប់​បាន​ Boasted អ្នក​ប្រើ​ប្រាស់​ប្រមាណ ​១១៩.៩ ​នាក់​នៅ​ឥណ្ឌូណេស៊ី​កាល​ពី​ដើម​ឆ្នាំ​ ២០២៣ ។ បើ​ទោះ​បី​ជា​មាន​ប្រជាពលរដ្ឋ​នៅ​ឥណ្ឌូណេស៊ី​ប្រើ​ច្រើន ការ​ផ្សាយ​ពាណិជ្ជកម្ម​​របស់​ Meta នៅ​ប្រទេស​នេះ​ធ្លាក់​ចុះ​ពី ​៧.៧៧ ភាគរយនា​ឆ្នាំ​២០២៣ បើ​ធៀប​នឹង​ឆ្នាំ​មុន​ៗ​ ។

Youtube ​ជា​ប្រព័ន្ធ​បណ្តាញ​សង្គម​ដែល​នៅ​ឋិត​ថេរ​ ពេញ​និយម​ពី​សំណាក់​ប្រជាជន​ឥណ្ឌូណេស៊ី​ជាង​គេ ​។ មាន​អ្នក​ប្រើ​ Youtube នៅ​ឥណ្ឌូណេស៊ី​ប្រមាណ​ជាង​ ១៣៩ ​លាន​នាក់​ ហើយ​​ការ​ផ្សាយ​ពាណិជ្ជកម្ម​តាម​ Youtube ​នៅ​ឥណ្ឌូណេស៊ី​ក៏​បាន​ដល់​ចំនួន​ប្រមាណ ​៦៥.៣ ភាគរយនៃ​ចំនួន​អ្នក​ប្រើ​ប្រាស់​អ៊ីនធឺណិត​​ទាំង​អស់​នៅ​ឥណ្ឌូណេស៊ី​ ។

៣–ប្រទេស​ហ្វីលីពីន

ត្រឹម​រយៈ​ពេល​​ ៣ ​ខែ​ដំបូង​នៃ​ឆ្នាំ​ ២០២៣ អ្នក​ប្រើ​ប្រាស់​អ៊ីនធឺណិតនៅ​ហ្វីលីពីន​​ចំណាយ​ពេល​​​​ជា​មធ្យម​ ៣​ ម៉ោង និង​៣៨ ​នាទី ទៅ​លើ​ការ​​អេក្រង់​ទូរសព្ទ​សម្រាប់​ការ​មើល​ និង​ប្រើ​បណ្តាញ​សង្គម ​។ Youtube, Facebook , Instagram និង​​ X (ពី​មុន Twitter) ជា​បណ្តាញ​សង្គម​ដ៏​ពេញ​និយម​ក្នុង​ប្រទេស​មួយ​នេះ​ ។ នៅ​ដើម​ឆ្នាំ​ ២០២៣ សារជីវកម្ម Meta បាន​ផ្សាយ​ពាណិជ្ជកម្ម​​ដល់​អ្នក​លេង​ Facebook បាន​ប្រមាណ​ ៨០.៣០ ​លាន​នាក់ ។

៤–ប្រទេស​វៀតណាម

នៅ​វៀត​ណាម​ គេ​សម្គាល់​ឃើញ​ App ឈ្មោះ​ថា Zalo សម្រាប់​ឆាត​ទំនាក់​ទំនង​មាន​ភាព​ពេញ​និយម​ជាង​គេ​ ក្នុង​ប្រទេស​នេះ ដោយ​សារ​​ក្រុមហ៊ុន​នៅ​វៀតណាម​ជា​អ្នក​បង្កើត​ផ្ទាល់​ក្នុង​​បរិបទ​បច្ចេកវិទ្យា​បណ្តាញ​សង្គម​នេះ​ ដែល​មាន​អ្នក​ប្រើ​ប្រាស់​ប្រមាណ ​៨៧ ភាគរយគិត​ត្រឹម​ឆ្នាំ​ ២០២២ ហើយ​តាម​ពី​ក្រោយ​ដោយ​បណ្តាញ​សង្គម​ Facebook មាន​អ្នក​ប្រើ ​៧២ ភាគរយ និង​ Facebook Messenger ​អ្នក​ប្រើ​ប្រមាណ​ ៥៨ ភាគរយ ៕

ដោយ​៖ មាន រតនា

The post មកស្គាល់ បណ្ដាញសង្គមធំៗដែលប្រទេសមួយចំនួននៅ អាស៊ាន ពេញនិយមប្រើ appeared first on Kampuchea Thmey Daily.

យោង​តាម​ខ្លឹម​សារ​របស់​លោក កៅ សីហា បាន​លើក​ឡើង​ថា​ «ខណៈ​នេះ កាំ​ជា ( កម្ពុជា ) កំពុង​ពេញ​និយម​ជំងឺ​ឆ្កួត និយម​លើ​ពាក្យ “បែប​ថៃ”  ហើយ​នឹង​ពាក្យ “បង​អូន”… ហើយ​បើ​និយាយ​បង​ប្អូន ទៅ​វា​ថី​? យូរ​ៗទៅ ចង់​ធ្វើ​បដិវត្ត​ពាក្យ​ខ្មែរ​ដោយ​ឯកឯង​ សេរី​ទំនើង​ខុស​បែប ខុស​វេយ្យាករណ៍ ​សូម្បី​ការ​ប្រើ​ពាក្យ​ពេចន៍​ឲ្យ​ត្រូវ​តាម​បែប​ផែន​របស់​ជាតិ​សាសន៍​ខ្លួន​ឯង»។

លោក កៅ សីហា ​បានគូសបញ្ជាក់ថា ពាក្យ “បង​អូន” ជា​សំនៀង​របស់ជនបរទេស (យួន) ដែល​ចេះ​និយាយ​ភាសាខ្មែរ ហើយ​អណ្ដាត​គ្រលាស់​មិន​បាន​នូវ​តួអក្សរ​ដែល​មាន​ពាក្យ​ព្យញ្ជនៈ​ត្រួត​ជើង មិន​បាន​ដូច​ម្ចាស់​ដើម​ ទើប​ជន​ចំណាក​ស្រុក​ដែល​ជា​ជាតិសាសន៍​ ភូមិ​ផង​របង​ក្បែរ​ខាង​និយាយ “បង​អូន​ៗ” ឲ្យ​ស្រួល និង​រត់​មាត់​របស់​ពួកគេ​ក្នុង​ការ​សន្ទនា​ជា​មួយ​ម្ចាស់​ស្រុក។

ដោយ​ឡែក បែរ​មក​មើល​​សម័យបច្ចុប្បន្ន ខ្លួន​ដែល​ជា​ម្ចាស់​ស្រុក ម្ចាស់​ភាសា បែរ​ជា​ព្រម​ទទួល​យក​នូវ​ការ​ជះ​ឥទ្ធិពល​នៃ​ការ​ប្រើប្រាស់​ភាសា​របស់​ខ្លួន​ពី​ជន​បរទេស​បែប​នេះ​ទៅ​វិញ។

ស្រប​ពេល​ជា​មួយ​គ្នា​នេះ អ្នក​ដឹក​នាំ​សម្ដែង​រូប​នេះ បាន​បន្ត​​ថា «អូស​ឃ្លីប​របស់​អ្នក​ល្បីៗ​ក្នុង​របរ​អនឡាញ ស្រុក​ខ្មែរ​មក ចេញ​តែ​ក្បាល​វីដេអូ ឮ​ពាក្យ​ថា សួ​ស្ដី បង​អូន…. ចង់​តែ​សំពង​ឲ្យ​បែក​មាត់ ថា ខ្នាញ់ នុះខ្នាញ់ ហើយ​ប្រឹង​ជោរ​តាម​គ្នា​អស់ ហើយ​ជោរ​អស់​ទាំង​មិន​ដឹង​ថា ខ្លួន​កំពុង​អូសទាញ​ឱ្យ​អ្នក​ទស្សនា​ចូល​រួម​ធ្វើ​បដិវត្ត​ពាក្យ​របស់​ខ្មែរ​ខ្លួនឯង​យ៉ាង​គឃ្លើន និង​ត្រេក​ត្រអាល​ថា​ខ្លួន​ស៊ីវិល័យ​ឈាន​មុខ ក្នុង​ការ​ប្រើ​ពាក្យ​ខុស​ទាំង​នេះ។ សុំ​ទៅ​ចុះ​​ឈប់​បាន ឈប់​ទៅ​ទាំង​អ្នក​ល្បី សេដ្ឋី ​វ៉ាល់ លាន​អី​ក៏​​ដោយ ឈប់​នាំ​​គ្នា​និយាយ​ថា សួស្ដី​បង​​អូន ​នឹង​​ទៅ​ណា​​ ចូលរួម​ការ​ពារ លើក​ស្ទួយ​​អក្សរសាស្ត្រ​ជាតិ​យើងឱ្យ​គង់​វង្ស»។

ជា​មួយ​គ្នា​នេះ លោក កៅ សីហា ក៏​បាន​សំណូមពរ​ ដល់​រាជបណ្ឌិត​សភា​កម្ពុជា មេត្តា បញ្ចេញ​ឥទ្ធិពល​របស់​ខ្លួន​មក​សាយ​ភាយ​គ្រប​ដណ្ដប់ ក្រុម​អ្នក​អធិប្បាយ voice over លើ​វីដេអូ​របស់​អ្នកonlineទាំងនោះ បើ​នៅ​តែ​បន្ត សោកនាដកម្ម​នៃ​ការ​ប្រើប្រាស់​ភាសាខ្មែរ​អាច​នឹង​កើត​ឡើង។ ហើយតាម​រយៈ​នេះ​ ក៏​មាន​អ្នក​គាំ​​ទ្រ​មួយ​​ចំនួន​បាន​បញ្ចេញមតិ​គាំ​ទ្រ​​ ការ​លើក​ឡើង​របស់​លោក កៅ សីហា ផង​ដែរ៕

អត្ថបទ៖ ចាន់រ៉ា

The post លោក កៅ សីហា ចេញមុខពន្លះយ៉ាងចាស់ដៃអ្នកនិយាយពាក្យ”បងអូន” និង “បែបថៃ” appeared first on Kampuchea Thmey Daily.

ថ្លែងបើកវគ្គបណ្តុះបណ្តាលស្តីពីការប្រើប្រាស់បណ្តាញសង្គម FACEBOOK នៅព្រឹកថ្ងៃទី២៥ ធ្នូ នៅមជ្ឈមណ្ឌលសហប្រតិបត្តិការកម្ពុជា-កូរ៉េ (CKCC) លោករដ្ឋមន្ត្រីបានបន្តថា ក្នុងន័យនេះស្នើឱ្យអ្នកលេងបណ្តាញសង្គម ត្រូវផ្សព្វផ្សាយនូវព័ត៌មានពិតទាក់ទងនឹងសមិទ្ធផលនានារបស់រាជរដ្ឋាភិបាល ដើម្បីឱ្យសាធារណមតិទាំងក្នុង និងក្រៅប្រទេស បានយល់ដឹង និងចូលរួមចំណែកក្នុងការការពារសមិទ្ធផលអស់ទាំងនេះ ឱ្យស្ថិតស្ថេរគង់វង្ស។ លោករដ្ឋមន្ត្រីបានបន្តទៀតថា រាជរដ្ឋាភិបាលកម្ពុជា បាននិងកំពុងជំរុញលើការប្រើប្រព័ន្ធបច្ចេកវិទ្យា ដើម្បីជំរុញល្បឿនការងារឱ្យបានលឿន ទាន់ពេលវេលា កាត់បន្ថយការចំណាយ និងផ្សព្វផ្សាយព័ត៌មានពិតពីកម្ពុជាឱ្យបានដល់ដៃសាធារណជនក្នុង និងក្រៅប្រទេស។

ឈរលើមូលដ្ឋាននេះ រាជរដ្ឋាភិបាលកម្ពុជា បានយកចិត្តទុកដាក់យ៉ាងខ្លាំងលើការអភិវឌ្ឍប្រព័ន្ធបច្ចេកវិទ្យា ការអភិវឌ្ឍជំនាញវិជ្ជាជីវៈ ការប្រើប្រាស់បច្ចេកវិទ្យាក្នុងការបណ្តុះបណ្តាលបច្ចេកទេសវិជ្ជាជីវៈ សំដៅធ្វើឱ្យប្រជាជន ជាពិសេស យុវជនទាំងអស់ទទួលបាននូវការសិក្សាបច្ចេកវិទ្យា ការអប់រំប្រកបដោយ គុណភាព និងសមត្ថភាព ដើម្បីឱ្យពួកគេក្លាយជាធនធានមនុស្សដ៏មានសក្តានុពលក្នុងការចូលរួមចំណែកអភិវឌ្ឍន៍សេដ្ឋកិច្ច និងសង្គមជាតិឱ្យកាន់តែរីកចម្រើន។

លោករដ្ឋមន្ត្រីបានបញ្ជាក់ថា ប្រមុខរាជរដ្ឋាភិបាលកម្ពុជា បានចាត់ទុកបណ្ដាញសង្គមហ្វេសប៊ុក ជាយន្តការដ៏សំខាន់មួយក្នុងការធ្វើការ និងទទួលនិងដោះស្រាយនូវសំណូមពរ ឬបញ្ហានានា ដោយតម្រូវឱ្យគ្រប់ក្រសួង ស្ថាប័ន ត្រូវតែមានផេករបស់ខ្លួន ដើម្បីទទួលព័ត៌មាន និងដោះស្រាយនូវរាល់កង្វល់នានារបស់ប្រជាពលរដ្ឋ។

លោករដ្ឋមន្ត្រីសង្ឃឹមថាបន្ទាប់ពីវគ្គបណ្តុះបណ្តាលនេះ សិក្ខាកាមទាំងអស់ នឹងមានសមត្ថភាពខ្ពស់ក្នុងការប្រើប្រាស់បណ្តាញសង្គម ដើម្បីធ្វើការផ្សព្វផ្សាយព័ត៌មាននិង សមិទ្ធផលនានារបស់រាជរដ្ឋាភិបាល។ លោករដ្ឋមន្ត្រីបានណែនាំដល់សិក្ខាកាមក៏ត្រូវចេះប្រើប្រាស់ហេ្វសប៊ុកជាមធ្យោបាយដើម្បីវាយបក ឬបកស្រាយបំភ្លឺសាធារណៈមតិ រាល់ព័ត៌មានញុះញង់ បំផុសបំផុល ប្រជាភិថុតិ ឬបំភ្លៃការពិតនៅតាមបណ្តាញ Facebook និងបណ្តាញសង្គមផ្សេងទៀតឱ្យបានទាន់ពេលវេលា។

គួរបញ្ជាក់ថា វគ្គបណ្ដុះបណ្ដាលនេះ ធ្វើឡើងក្នុងគោលបំណងឱ្យសិក្ខាកាមបានយល់ដឹងអំពី បច្ចេកទេសនៃការប្រើប្រាស់ប្រព័ន្ធបណ្តាញសង្គមឱ្យកាន់តែមានប្រសិទ្ធភាព ដូចជា ការថត ការកាត់ត រូបភាពតាមទូរស័ព្ទ និងរបៀបបង្កើត Tiktok ។ ក្រៅពីនេះ ក៏ដើម្បីយល់ដឹងពីការជ្រើសរើសរូបភាព និងព័ត៌មានក្នុងការផ្សព្វផ្សាយ, ការចុះបដិសេដ ឬគាំទ្រលើព្រឹត្តិការណ៍ ឬព័ត៌មាននានា, ការផ្សព្វផ្សាយសមិទ្ធផលនានារបស់រាជរដ្ឋាភិបាល សកម្មភាពរបស់ថ្នាក់ដឹកនាំ ផលប្រយោជន៍នានាដល់បងប្អូនកម្មករនិយោជិត និងសាធារណជន, ការបែងចែកព័ត៌មានដែលផ្ទុយពីការពិត ទៅនឹងព័ត៌មានពិត ដែលគួរជឿនិងមិនគួរជឿ, ការរៀបចំខ្លឹមសារសរសេរ និងយុទ្ធសាស្ត្រដែលមានភាពទាក់ទាញ ប្រកបដោយប្រសិទ្ធភាព៕

ដោយ៖ សំអឿន

The post រដ្ឋមន្រ្តីការងារ៖ បណ្តាញសង្គមព័ត៌មានក្លែងក្លាយមួយចំនួនកំពុងបន្ទច់បង្អាក់ដំណើរការអភិវឌ្ឍប្រទេសរបស់រដ្ឋាភិបាល appeared first on Kampuchea Thmey Daily.