បាញ់ថ្នាំសម្លាប់មេរោគ Archives - Kampuchea Thmey Daily

គណៈកម្មការគ្រប់គ្រងផ្សារអូរឫស្សី ចុះបាញ់ថ្នាំសម្លាប់មេរោគសត្វល្អិត ក្នុងបរិវេណផ្សារ

អ៊ិន ពិសី — Thu, 02 Oct 2025 02:44:48 +0000

គណៈកម្មការគ្រប់គ្រងផ្សារអូរឫស្សី សហការជាមួយ ក្រុមការងារមកពីមណ្ឌលសុខភាពខណ្ឌ ៧ មករា បានចុះបាញ់ថ្នាំសម្លាប់មេរោគសត្វល្អិតចង្រៃ ទាំងក្នុង និងជុំវិញបរិវេណផ្សារ។

កាលពីល្ងាចថ្ងៃទី ០១ ខែតុលា ឆ្នាំ ២០២៥ គណៈកម្មការគ្រប់គ្រងផ្សារអូរឫស្សី បានសហការជាមួយ ក្រុមការងារមកពីមណ្ឌលសុខភាពខណ្ឌ ៧ មករា ធ្វើការចុះបាញ់ថ្នាំសម្លាប់មេរោគសត្វល្អិត ចង្រៃ ក្នុង និងជុំវិញបរិវេណផ្សារ ដើម្បីការពារ ថែរក្សា អនាម័យ បរិស្ថាន និងសុខុមាលភាពរបស់អាជីវករលក់ដូរ ក៏ដូចជាអតិថិជនដែលចេញចូលទិញទំនិញសម្ភារៈប្រចាំថ្ងៃ។

លោក ឡយ ស៊ាងអាង ប្រធានគណៈកម្មការផ្សារអូរឫស្សី បានបញ្ជាក់ថា ដោយមានការយកចិត្តទុកដាក់ខ្ពស់ពីលោក ឃួង ស្រេង អភិបាល នៃគណៈអភិបាលរាជធានីភ្នំពេញ និងលោក ថេង សុថុល អភិបាល នៃគណៈអភិបាលខណ្ឌ ៧ មករា តែងតែណែនាំដល់គណៈកម្មការផ្សារ ត្រូវយកចិត្តទុកដាក់ពីបញ្ហាសណ្ដាប់ធ្នាប់ បរិស្ថានអនាម័យ សន្តិសុខសុវត្ថិភាព និងចុះបាញ់ថ្នាំសម្លាប់មេរោគសត្វល្អិតចង្រៃ ក្នុង និងក្រៅបរិវេណផ្សារ ឲ្យញឹកញាប់ ព្រោះទីតាំងផ្សារជាទីប្រជុំជន មានទាំងអាជីវករ និងអតិថិជនចេញចូលផ្សារ ដូច្នេះត្រូវតែថែរក្សា អនាម័យបរិស្ថាន និងសុខុមាលភាព របស់ពួកគាត់ឲ្យបានល្អប្រសើរ ដែលជាកាតព្វកិច្ចរបស់កម្លាំងអាជ្ញាធរគ្រប់គ្រងផ្សារ។

លោកប្រធានគណៈកម្មការផ្សារ បញ្ជាក់បន្ថែមថា មិនត្រឹមតែរក្សាបរិស្ថានអនាម័យនោះទេ ជារៀងរាល់ថ្ងៃ គ្រប់ពេល អាជីវករកំពុងដំណើរការលក់ដូរ អតិថិជនចេញចូល កម្លាំងសន្តិសុខផ្សារក៏ដើរល្បាតរក្សាសន្តិសុខជូនដល់ពួកគាត់ផងដែរ ជៀសវាងកើតមានអំពើចោរកម្មជាដើម៕

អត្ថបទ ៖ សុភា

The post គណៈកម្មការគ្រប់គ្រងផ្សារអូរឫស្សី ចុះបាញ់ថ្នាំសម្លាប់មេរោគសត្វល្អិត ក្នុងបរិវេណផ្សារ appeared first on Kampuchea Thmey Daily.

យុទ្ធនាការបាញ់ថ្នាំមូសក្នុងរាជធានីភ្នំពេញ នៅតែបន្តរហូតមកដល់ថ្ងៃ២២សីហានេះ

Kang Tola — Thu, 22 Aug 2024 14:26:54 +0000

ដោយមានការយកចិត្តទុកដាក់ពីសម្តេច មហាបវរធិបតី ហ៊ុន ម៉ាណែត នាយករដ្ឋមន្ត្រី និងការចង្អុលបង្ហាញពីលោក ឃួង ស្រេង អភិបាលនៃគណៈអភិបាលរាជធានីភ្នំពេញ ពាក់ព័ន្ធនិងសុខុមាលភាពប្រជាពលរដ្ឋ បានចាត់ឱ្យមន្ទីរសុខាភិបាលរាជធានីភ្នំពេញសហការជាមួយ ក្រុមការងារកងពលតូច (ង៧០) ធ្វើសកម្មភាពបាញ់ថ្នាំសម្លាប់មូសបានជាច្រើនខណ្ឌនៅក្នុងរាជធានីភ្នំពេញ។

លោក ងី មានហេង ប្រធានមន្ទីរសុខាភិបាលរាជធានីភ្នំពេញ បានឱ្យដឹងបានអោយដឹងថា លទ្ធផលនៃយុទ្ធនាការបាញ់ថ្នាំមូស ក្នុងមូលដ្ឋានរាជធានីភ្នំពេញ នៅថ្ងៃទី២០ ខែសីហា ឆ្នាំ២០២៤ មន្ទីរសុខាភិបាលរាជធានី សហការជាមួយកងពលតូច លេខ ៧០ និងអាជ្ញាធរដែនដី បានចុះបាញ់ថ្នាំមូសជូនប្រជាពលរដ្ឋបាន១២សង្កាត់ ក្នុងខណ្ឌដូនពេញ ខណ្ឌឫស្សីកែវ ខណ្ឌមានជ័យ ខណ្ឌសែន សុខ ខណ្ឌទួលគោក និងខណ្ឌពោធិ៍សែនជ័យ រួមមាន៖ សង្កាត់ក្រាំងធ្នង់,សង្កាត់ឈ្មួញ,សង្កាត់កាកាបទី២,សង្កាត់ច្រាំងចំរេទី១,សង្កាត់ផ្សារដេប៉ូទី២,សង្កាត់ផ្សារដើមគរសង្កាត់ទំនប់ទឹក,សង្កាត់ផ្សារថ្មីទី២,សង្កាត់បឹងរាំង,សង្កាត់ផ្សារកណ្តាលទី១,សង្កាត់ច្បារអំពៅទី១,សង្កាត់ច្បារអំពៅទី២។

ចំពោះលទ្ធផលនៃយុទ្ធនាការបាញ់ថ្នាំមូស ក្នុងមូលដ្ឋាននៅថ្ងៃទី២១ ខែសីហា វិញ បានចំនួន១២សង្កាត់ ក្នុងខណ្ឌពោធិ៍សែនជ័យ ខណ្ឌឫស្សីកែវ ខណ្ឌទួល គោក ខណ្ឌដូនពេញ ខណ្ឌចំការមន ខណ្ឌ៧មករា និងខណ្ឌច្បារអំពៅ។

រួមមានសង្កាត់ត្រពាំងក្រសាំង,សង្កាត់សំរោងក្រោម,សង្កាត់ច្រាំងចំរេទី២,សង្កាត់ស្វាយប៉ាក,សង្កាត់ផ្សារដេប៉ូទី១,សង្កាត់ផ្សារដេប៉ូទី៣,សង្កាត់ផ្សារដើមថ្កូវ,សង្កាត់មនោរម្យ,សង្កាត់វាលវង់,សង្កាត់ចតុមុខ,សង្កាត់ព្រែកថ្មី,សង្កាត់និរោធ។

ដោយឡែក នៅថ្ងៃទី២២ ខែសីហានេះដែរ ការបាញ់ថ្នាំកម្ចាត់មូស តាមបណ្តាខណ្ឌ ក្នុងរាជធានីភ្នំពេញ បាន៧ខណ្ឌ ចំនួន១២សង្កាត់ ក្នុងនោះរួមមាន៖ ខណ្ឌ ចំការមន ក្នុងសង្កាត់ទន្លេបាសាក់ ខណ្ឌ ៧មករា ក្នុងសង្កាត់ អូរឫស្សីទី១និងសង្កាត់ អូរឫស្សីទី២ ខណ្ឌច្បារអំពៅបាន២សង្កាត់ គឺសង្កាត់ព្រែកប្រា និងសង្កាត់ វាលស្បូវ ខណ្ឌព្រែកព្នៅ បាន២ សង្កាត់គឺសង្កាត់គោករកានិងសង្កាត់ព្រែកព្នៅ ខណ្ឌ ដង្កោ បាន២សង្កាត់ គឺសង្កាត់ដង្កោនិងសង្កាត់ពងទឹក ខណ្ឌកំបូល បាន២ សង្កាត់គឺសង្កាត់ ភ្លើងឆេះរទេះនិងសង្កាត់កំបូល ខណ្ឌជ្រោយចង្វារ បាន១ សង្កាត់គឺសង្កាត់ ព្រែកតាសេក៕

ដោយ ៖ ស្រីរ័ត្ន

The post យុទ្ធនាការបាញ់ថ្នាំមូសក្នុងរាជធានីភ្នំពេញ នៅតែបន្តរហូតមកដល់ថ្ងៃ២២សីហានេះ appeared first on Kampuchea Thmey Daily.

ជំនាញប្រើម៉ាស៊ីនបាញ់ថ្នាំសម្លាប់មូស១៥គ្រឿង លើខណ្ឌចំនួន៥ ដែលប្រឈមការរីករាលដាលជម្ងឺគ្រុនឈាមខ្លាំង

Ngoeul Narath — Fri, 23 Feb 2024 11:53:40 +0000

អនុវត្តតាមការចង្អុលបង្ហាញពីសម្ដេចមហាបវរធិបតីហ៊ុន ម៉ាណែត នាយករដ្ឋមន្ត្រី លើការយកចិត្តទុកដាក់សុខមាលភាពប្រជាពលរដ្ឋ និងដោយយោងទៅលើស្ថានភាពជាក់ស្ដែងនៃការរីករាលដាលជំងឺគ្រុនឈាមមានការកើនឡើង លោកឃួង ស្រេងអភិបាលនៃគណៈអភិបាលរាជធានីភ្នំពេញ បានដឹកនាំប្រជុំជាមួយអាជ្ញាធរនិងមន្ត្រីជំនាញពាក់ព័ន្ធ ដើម្បីចាត់វិធានជាបន្ទាន់ ដោយចាត់ ក្រុមការងារនៃមន្ទីរសុខាភិបាលរាជធានីភ្នំពេញនិងដោយមានកិច្ចសហការពីកងពលតូចលេខ៧០ ចុះបាញ់ថ្នាំមូសនៅសង្កាត់ទាំង១០៥ ទូទាំងរាជធានីភ្នំពេញសំដៅធ្វើយ៉ាងណា លុបបំបាត់ឱ្យអស់មូសខ្លា និងគ្មានជម្ងឺគ្រុនឈាម។

នៅថ្ងៃទី១នៃយុទ្ធនាការបាញ់សម្លាប់មូសខ្លានេះ ជំនាញបានប្រើប្រាស់ ម៉ាស៊ីនបាញ់ថ្នាំសម្លាប់មូសចំនួន១៥គ្រឿង ប្រើប្រាស់កម្លាំងកងពលតូចលេខ៧០ ចំនួន២៥នាក់ សហការជាមួយក្រុមគ្រូពេទ្យ និងអាជ្ញាធរខណ្ឌពាក់ព័ន្ធទាំង៥ ដែលជាខណ្ឌមានបញ្ហាប្រឈមខ្លាំងជាងគេ ចំពោះការរីករាលដាលជម្ងឺគ្រុនឈាមនេះ ក្នុងនោះរួមមាន ខណ្ឌដង្កោ ខណ្ឌកំបូល ខណ្ឌពោធិ៍សែនជ័យ ខណ្ឌសែនសុខនិងខណ្ឌមានជ័យ។

លោកឃួង ស្រេង បានណែនាំទៅមន្ទីរសុខាភិបាលរាជធានីភ្នំពេញថា ជាជំហានដំបូងនេះ ក្រុមការងារត្រូវបាញ់ថ្នាំសម្លាប់មូសខ្លានៅទូទាំង៥ខណ្ឌនេះអោយបានរួចរាល់ ក្នុងរយៈពេលមួយសប្តាហ៍ រួចបន្តទៅខណ្ឌផ្សេងទៀតរហូតបញ្ចប់ទាំង១៤ខណ្ឌ និង១០៥សង្កាត់។

ក្រោយបញ្ចប់កិច្ចការងារទាំង១៤ខណ្ឌហើយ មន្ទីរសុខាភិបាលត្រូវបន្តការបាញ់ថ្នាំសម្លាប់មូសនៅតាមប្រឡាយ លូ នានា នៅក្នុងរាជធានីភ្នំពេញបន្តទៀតសំដៅធ្វើយ៉ាងណា លុបបំបាត់ឲ្យបាននូវជំងឺគ្រុនឈាម។

ក្នុងឱកាសនោះដែរ ក៏មានការអំពាវនាវឲ្យប្រជាពលរដ្ឋរស់នៅរាជធានីភ្នំពេញចូលរួមលុបបំបាត់ជម្រកមូសខ្លា ដូចជាលុបបំបាត់ទឹកដក់ថ្លាជាជម្រកមូសខ្លា (ទឹកដក់នៅក្នុងសំបកកង់ឡាន កង់ម៉ូតូ សំបកកំប៉ុង ដប វត្ថុដក់ទឹកភ្លៀង …. ជាជម្រកមូសខ្លា)។ យើងរួមគ្នាលុបបំបាត់ជម្រកមូសខ្លា នៅក្នុងសហគមន៏របស់យើង ដើម្បីរួមចំណែកទុបស្កាត់ការចម្លងជំងឺគ្រុនឈាម។ មូសខ្លាជាភ្នាក់ងារចំលងជំងឺគ្រុនឈាម រីឯមូសអង្កាមមិនមែនជាភ្នាក់ងារចម្លងជំងឺគ្រុនឈាមទេ។

ការទុកដាក់សំបកកង់ឡាន ម៉ូតូហាលភ្លៀងនៅក្នុងសហគមន៏ គឹជាការបង្កើតជម្រកមូសខ្លាក្រោយពេលភ្លៀងធ្លាក់។ មូសខ្លាមិនពងដាក់ក្នុងទឹកស្អុយ លូ និងទឹកល្អក់ទេ។ មូសខ្លាពងដាក់ក្នុងទឹកដក់ថ្លា គ្មានក្លិនស្អុយ ទឹកក្នុងថូផ្កា ទឹកក្នុងទម្រជើងទូចាន ទឹកដក់នៅក្នុងចានស្នោនិងកែវជ័រដែលចោលហាលភ្លៀង ទឹកដក់លើថង់ប្លាស្ទិកចោលហាលភ្លៀង ។ល។ ការដាក់អាបែតក្នុងពាងនិងអាងទឹកដើម្បីសម្លាប់ដង្កូវទឹកជាការរួមចំណែកទុបស្កាត់ការកកើតមូសខ្លាដែលជាភ្នាក់ងារចម្លងជំងឺគ្រុនឈាម៕

អត្ថបទ៖ ស្រីរ័ត្ន

The post ជំនាញប្រើម៉ាស៊ីនបាញ់ថ្នាំសម្លាប់មូស១៥គ្រឿង លើខណ្ឌចំនួន៥ ដែលប្រឈមការរីករាលដាលជម្ងឺគ្រុនឈាមខ្លាំង appeared first on Kampuchea Thmey Daily.

មន្ត្រីពេទ្យសត្វខេត្តកំពង់ចាម បន្តចុះបាញ់ថ្នាំសម្លាប់មេរោគផ្តាសាយបក្សីនៅស្រុកចំការលេី

អុន ស្រីមាន — Tue, 20 Feb 2024 07:27:54 +0000

មន្រ្តីជំនាញនៃការិយាល័យផលិតកម្ម និងបសុព្យាបាល នៃមន្ទីរកសិកម្ម រុក្ខាប្រមាញ់ និងនេសាទខេត្តកំពង់ចាម បានបន្តយុទ្ធនាការផ្សព្វផ្សាយជំងឺផ្តាសាយបក្សី និងវិធានការការពារ ដោយបាញ់ថ្នាំសម្លាញ់មេរោគនៅតំបន់ដែលធ្លាប់រងការផ្ទុះជំងឺនេះ ដេីម្បីធ្វើការបង្ការទប់ស្កាត់ការឆ្លងរីករាលដាលជំងឺផ្តាសាយបក្សី។

នៅព្រឹក ថ្ងៃទី១៩ ខែកុម្ភៈ ឆ្នាំ២០២៤ លោក នង ម៉េងហ៊ាង ប្រធានការិយាល័យផលិតកម្ម និងបសុព្យាបាលខេត្តកំពង់ចាម និងលោក សំ ពិសិដ្ឋ អភិបាលនៃគណៈអភិបាលស្រុកចំការលេី សហការជាមួយអាជ្ញាធរមូលដ្ឋានចុះផ្សព្វផ្សាយនិងបាញ់ថ្នាំសម្លាប់មេរោគបង្ការជម្ងឺឆ្លងផ្តាសាយបក្សីនៅក្នុងភូមិត្រពាំងឫស្សី ឃុំជយោ ស្រុកចំការលេី ខេត្តកំពង់ចាម។

ទន្ទឹមនេះ លោក នង ម៉េងហ៊ាង អំពាវនាវឲ្យប្រជាពលរដ្ឋដែលចិញ្ចឹមសត្វទាំងអស់ រួមទាំងកន្លែងសត្វត្តឃាតទាំងអស់ ចេះតាមដានសុខភាពសត្វចិញ្ចឹម និងសម្អាតបរិស្ថានជុំវិញ។ ប្រសិនបេីមានការសង្ស័យ ឬ មានសត្វបក្សីងាប់ត្រូវសហការ និងរាយការណ៍មកមន្ត្រីពេទ្យភូមិភ្លាមៗដេីម្បីរួមគ្នាចាត់វិធានការការពារទប់ស្កាត់ជំងឺមួយនេះកុំឱ្យឆ្លងរីករាលដាលទៀត។ គួរបញ្ជាក់ថា កន្លងមកនៅក្នុងភូមិសាស្ត្រខេត្តកំពង់ចាម មានតំបន់មួយចំនួនដែលធ្លាប់ផ្ទុះជំងឺផ្តាសាយបក្សី រួមមានក្នុងឃុំតាំងក្រាំង ស្រុកបាធាយ, ឃុំមេសជ្រៃ ស្រុកស្ទឹងត្រង់, ឃុំជយោ ស្រុកចំការលេី និងស្រុកព្រៃឈរជាដេីម៕

អត្ថបទ៖ ឡេក ចាន់ពេជ្រ

The post មន្ត្រីពេទ្យសត្វខេត្តកំពង់ចាម បន្តចុះបាញ់ថ្នាំសម្លាប់មេរោគផ្តាសាយបក្សីនៅស្រុកចំការលេី appeared first on Kampuchea Thmey Daily.

មន្ត្រីជំនាញចុះបាញ់ថ្នាំសម្លាប់មេរោគនៅតាមកសិដ្ឋានចិញ្ចឹមសត្វ សត្តឃាតដ្ឋាន ទូទាំងខេត្តសៀមរាប

KC Virak — Tue, 21 Sep 2021 01:20:00 +0000

ក្រុមការងារមន្ទីរកសិកម្ម រុក្ខប្រមាញ់ និងនេសាទខេត្តសៀមរាប បានចុះអនុវត្តវិធានជីវសុវត្ថិភាពដោយការបាញ់ថ្នាំសម្លាប់មេរោគ នៅតាមកសិដ្ឋានចិញ្ចឹមសត្វពាហនៈ សត្តឃាតដ្ឋាន ក្រោលនានានៅតាមសហគមន៍ចិញ្ចឹមសត្វពាហនៈក្នុងទូទាំងខេត្ត នៅថ្ងៃទី២០ ខែកញ្ញា ឆ្នាំ២០២១នេះ។

លោក ទា គឹមសុទ្ឋ បានណែនាំដល់មន្ត្រីជំនាញការិយាល័យផលិតកម្ម និងបសុព្យាបាល ក្រោមឱវាទមន្ទីរ ត្រូវជូនដំណឹង និងជម្រាបដល់បងប្អូនប្រជាកសិករថា ការអនុវត្តវិធានជីវសុវត្ថិភាពមានសារៈសំខាន់ណាស់ក្នុងដំណើរការចិញ្ចឹមសត្វ ទប់ស្កាត់ការឆ្លងជំងឺ សម្លាប់ភ្នាក់ងារចម្លងមេរោគ កាត់បន្ថយក្លិន ទីតាំងចិញ្ចឹមស្អាត ធ្វើឱ្យសត្វមានសុខភាពល្អ ធំធាត់លឿន និងជម្រាប បងប្អូនម្ចាស់ចិញ្ចឹមសត្វ ជាពិសេសសត្វពាហនៈ និងសត្វបក្សី សូមប្រុងប្រយ័ត្នជំងឺឆ្លងសត្វក្នុងរដូវវស្សាភ្លៀងធ្លាក់ជោគជាំ ត្រូវអនុវត្តវិធានការជីវសុវត្ថិភាព និងចាក់ថ្នាំការពារជំងឺសត្វ តាមកម្មវិធីពីមន្ទីរកសិកម្មខេត្ត។

លោក ព្រំ វិច ប្រធានការិយាល័យផលិតកម្ម និងបសុព្យាបាល មានប្រសាសន៍ថា ការបាញ់ថ្នាំជីវសុវត្ថិភាពនេះជាផ្នែកមួយជួយទប់ស្កាត់នៃជំងឺឆ្លងទៅដល់សត្វ និងការពារសុខភាពសត្វ ដោយសាររដូវវស្សាចូលមកដល់ សត្វពាហនៈ និងសត្វចិញ្ចឹមផ្សេងៗងាយរងទទួលនូវការឈឺ និងស្លាប់ដោយសារមេរោគ និងបាក់តេរីផ្សេងៗ ដែលតែងតែបង្កឱ្យសត្វមានសុខភាពខ្សោយ ងាយរងនូវអំងឺឆ្លងផ្សេងៗ។

ហេតុនេះ ទាមទារត្រូវធ្វើនូវវិធានការសុវត្ថិភាពដោយការបាញ់ថ្នាំរម្ងាប់មេរោគទាំងនៅតាមក្រោល និងនៅតាមសត្តឃាត្តដ្ឋាននានា ដើម្បីធានាបាននូវសាច់សត្វបោះទៅកាន់ទីផ្សារមានគុណភាព អនាម័យល្អសម្រាប់អ្នកបរិភោគ។

លោក ព្រំ វិច សំណូមពរឱ្យពលរដ្ឋចេះពីរបៀបអនាម័យ ទីតាំងចិញ្ចឹមសត្វទាំងអស់ឱ្យមានរបៀបរៀបរយ ទើបគ្មានជំងឺផ្សេងៗមកបៀតបៀនបាន៕

អត្ថបទ៖ កុសល

The post មន្ត្រីជំនាញចុះបាញ់ថ្នាំសម្លាប់មេរោគនៅតាមកសិដ្ឋានចិញ្ចឹមសត្វ សត្តឃាតដ្ឋាន ទូទាំងខេត្តសៀមរាប appeared first on Kampuchea Thmey Daily.

មន្ត្រីសុខាភិបាលបាញ់ថ្នាំសម្លាប់ មេរោគក្នុងផ្សារសាមគ្គីស្ទឹងត្រែង នឹងបើកឲ្យអាជីវករលក់ដូរនៅថ្ងៃស្អែកនេះ

Kang Tola — Fri, 10 Sep 2021 13:05:07 +0000

មន្ទីរសុខាភិបាលខេត្តស្ទឹងត្រែង នៅព្រលប់ល្ងាចថ្ងៃទី១០ ខែកញ្ញានេះ បានបើកយុទ្ធនាការបាញ់ថ្នាំសម្លាប់មេរោគបង្ការជំងឺកូវីដ១៩ បន្ទាប់ពីអាជ្ញាធរខេត្តបានសម្រេចបើកឲ្យ ផ្សារសាមគ្គីស្ទឹងត្រែង ផ្សារអូរឫស្សី ផ្សារគីឡូ២ និងទីប្រជុំជនលក់ដូរក្នុងភូមិសាស្ត្រក្រុង នៃខេត្តស្ទឹងត្រែង ឲ្យដំណើរការសកម្មភាពលក់ដូរជាធម្មតាវិញ នៅថ្ងៃស្អែកនេះ។

លោកអ៊ុង សូវៀត ប្រធានមន្ទីរសុខាភិបាលខេត្តបានបញ្ជាក់ថា ការបាញ់ថ្នាំនេះ គឺជាការបង្កើនការអនុវត្តយ៉ាងម៉ឺងមាត់ ក្នុងការបាញ់ថ្មាំសម្លាប់មេរោគ ជាយុទ្ធវិធីបង្ការ និងក៏ជាសកម្មភាពចលនា បងប្អូនប្រជាពលរដ្ឋយើងកុំឱ្យភ្លេចស្មារតី ក្នុងការបង្ការជំងឺ(កូវីដ១៩)ដើម្បីកាត់បន្ថយការឆ្លងរីករាលដាលនៃជំងឺកូវីដ១៩ ចុងសហគមន៍បន្តទៀត។

លោកប្រធានមន្ទីរ សុខាភិបាលបានបញ្ជាក់បន្ថែមថា នេះជាយុទ្ធនាការមួយបន្ថែមពីលើការផ្សព្វផ្សាយនិងអប់រំ ដើម្បីឲ្យប្រជាពលរដ្ឋ យើងបង្កើននៅវិធានការបង្ការជំងឺ(Covid-19) ឱ្យកាន់តែមានប្រសិទ្ធភាព ព្រោះពេលនេះរដូវធ្លាក់ភ្លៀងមកដល់អាកាសធាតុមានកំដៅថយចុះ ជាសញ្ញាមួយឱ្យយើងប្រុងប្រយ័ត្ន។

លោកបន្តថា កន្លងមកមន្ត្រីសុខាភិបាលបានផ្សព្វផ្សាយសារអប់រំ សង្កេតឃើញថា បងប្អូនប្រជាពលរដ្ឋយើង យល់ដឹង បានទូលំទូលាយ ឱ្យចេះថែរក្សាសុខភាព ធ្វើអនាម័យបានជាប្រចាំដូចជាការពាក់ម៉ាស់ ការលាងសំអាតដៃ និងអាល់កុល ឬសាប៊ូជាដើម រក្សាគម្លាតសុវត្ថិភាពជាដើម។

អាជីវករលក់ដូរនៅផ្សាសាមគ្គីក្រុងស្ទឹងត្រែងបានអះអាងថា សកម្មភាពបាញ់ថ្នាំរបស់មន្ត្រីសុខាភិបាល វាបានបញ្ចៀសការព្រួយបារម្ភក្នុងការរស់នៅរបស់បងប្អូនប្រជាពលរដ្ឋទូទៅ រួមទាំងអ្នកដំណើរផ្សេងៗផងដែរ។ ហើយក៏ជាការក្រើនរំលឹក ដល់មន្ត្រីរាជការ ប្រជាពលរដ្ឋកុំឱ្យភ្លេចខ្លួន ក្នុងការបង្ការ ជំងឺ( Covid-19)។

សូមបញ្ជាក់ថា យុទ្ធនាការបាញ់ថ្នាំចំចាត់មេរោគ និងបង្ការជំងឺឆ្លង នៅក្នុងខែឧសភាឆ្នាំ២០២១ មកដល់ថ្ងៃទី ១០ខែកញ្ញានេះ មន្ត្រីមន្ទីរសុខាភិបាល ចុះបាញ់នៅតាមមន្ទីរអង្គភាពបានចំនួន២២លើក នៅតាមទីសាធារណៈទីប្រជុំផ្សាសាមគ្គី- ចំណតរថយន្ត-និងតាមសួនច្បារសាធារណៈ ក្នុងក្រុងស្ទឹងត្រែងផងដែរ៕

ដោយ ៖ ងិនលីម

The post មន្ត្រីសុខាភិបាលបាញ់ថ្នាំសម្លាប់ មេរោគក្នុងផ្សារសាមគ្គីស្ទឹងត្រែង នឹងបើកឲ្យអាជីវករលក់ដូរនៅថ្ងៃស្អែកនេះ appeared first on Kampuchea Thmey Daily.

វៀតណាម តម្រូវឲ្យបញ្ឈប់ការបាញ់ថ្នាំសម្លាប់ កូវីដ នៅទីសាធារណៈ

Sok Sovann — Tue, 03 Aug 2021 06:26:40 +0000

ក្រសួងសុខាភិបាលវៀតណាម បានប្រាប់អាជ្ញាធរមូលដ្ឋានឲ្យបញ្ឈប់ការបាញ់ថ្នាំសម្លាប់មេរោគនៅទីតាំងបើកចំហតាមទីសាធារណៈ ជាវិធានការប្រឆាំងជំងឺកូវីដ-១៩ ដោយក្រសួងបានហៅវាថា ខ្ជះខ្ជាយនិងប៉ះពាល់ដល់បរិស្ថាន។

ការបាញ់ថ្នាំ គួរធ្វើឡើងតែនៅកន្លែងតូចចង្អៀតដែលគេរកឃើញករណីជំងឺកូវីដប៉ុណ្ណោះហើយបរិមាណសារធាតុគីមី ដែលត្រូវប្រើ ត្រូវតែគ្រប់គ្រងដើម្បីធានាសុវត្ថិភាពសម្រាប់មនុស្សក៏ដូចជាបរិស្ថានផងដែរ។

សេចក្តីថ្លែងការណ៍របស់ក្រសួងកាលពីថ្ងៃចន្ទបានឲ្យដឹងថា “សូមកុំអនុវត្តវិធីបាញ់ថ្នាំគីមី និងការរៀបចំសម្លាប់មេរោគលើមនុស្សក្នុងស្ថានភាពណាក៏ដោយ រួមទាំងការប្រើឧបករណ៍ដើម្បីបាញ់ថ្នាំនេះដោយផ្ទាល់ទៅលើមនុស្ស ឬនៅខាងក្នុងបន្ទប់សម្លាប់មេរោគផងដែរ”។

តំបន់ខ្លះ បានបាញ់ថ្នាំសម្លាប់មេរោគនៅតាមទីសាធារណៈ ដើម្បីការពារការរីករាលដាលនៃវីរុសកូវីដ-១៩។

ទីភ្នាក់ងារនិងក្រុមហ៊ុនមួយចំនួន បានដាក់បន្ទប់សម្លាប់មេរោគ ខណៈខ្លះទៀត បានប្រើម៉ាស៊ីនបាញ់ថ្នាំសម្លាប់មេរោគដោយផ្ទាល់ទៅលើមនុស្ស ដែលត្រូវបានបញ្ជូនមណ្ឌលធ្វើចត្តាឡីស័ក។

ទោះបីជាយ៉ាងណាក៏ដោយ អង្គការសុខភាពពិភពលោក (WHO) បាននិយាយថា ខ្លួនមិនណែនាំឲ្យបាញ់ថ្នាំសម្លាប់មេរោគនៅទីធ្លាខាងក្រៅទេ ព្រោះវាអាចប៉ះពាល់ដល់ទាំងអ្នកបាញ់ថ្នាំនិងមនុស្សនៅជុំវិញខ្លួន។

មជ្ឈមណ្ឌលគ្រប់គ្រងនិងបង្ការជំងឺអាមេរិក (CDC) ក៏បានចែករំលែកទស្សនៈនេះផងដែរ។

ក្រសួងបាននិយាយថា “ការប្រើប្រាស់សារធាតុគីមីសម្លាប់មេរោគក្នុងបរិមាណដ៏ច្រើនសម្រាប់ការបាញ់ថ្នាំនៅខាងក្រៅ ក៏អាចបង្កអន្តរាយដល់បរិស្ថានផងដែរ”៕

ប្រែសម្រួល៖ Vann Vann

ប្រភព៖ VN Express

ចុចអាន៖ អ៊ូហាន ត្រៀមធ្វើតេស្តប្រជាជនក្នុងទីក្រុងទាំងអស់ ខណៈកូវីដត្រឡប់មកវិញ

The post វៀតណាម តម្រូវឲ្យបញ្ឈប់ការបាញ់ថ្នាំសម្លាប់ កូវីដ នៅទីសាធារណៈ appeared first on Kampuchea Thmey Daily.