បេសកកម្មផ្សព្វផ្សាយសក្តានុពលខេត្តក្រចេះនិងមណ្ឌលគិរី Archives - Kampuchea Thmey Daily

រោងចក្រផលិតសំបកកង់រថយន្តដ៏ធំនៅស្នួល នឹងកាត់ចំណែក ១៥% ផ្គត់ផ្គង់ទីផ្សារក្នុងស្រុក អះអាងធានាគុណភាពនិងតម្លៃ

Dy Bunnara — Mon, 03 Mar 2025 04:21:13 +0000

ក្រុមហ៊ុន DoubleStar បានបង្ហើបពីផែនការក្នុងការកាត់ចំណែក ១៥% នៃផលិតផលសំបកកង់រថយន្តដែលផលិតចេញពីរោងចក្រនៅខេត្តក្រចេះ ដើម្បីលក់ផ្គត់ផ្គង់ទីផ្សារក្នុងស្រុក។

ការលើកឡើងនេះ ខណៈកាលពីពេលថ្មីៗកន្លងទៅនេះក្រុមអ្នកសារព័ត៌មានជាង ២០ ស្ថាប័ន ដឹកនាំដោយក្លិបអ្នកកាសែតកម្ពុជា បានចុះទៅទស្សនកិច្ចនៅរោងចក្រផលិតសំបកកង់រថយន្ត DOUBLESTAR ដែលមានទីតាំងនៅតំបន់សេដ្ឋកិច្ចពិសេសយូប៊ីអីស្នួល ខេត្តក្រចេះ។

លោក Chen Gang នាយកប្រចាំរោងចក្រផលិតសំបកកង់ DOUBLESTAR (រូបកណ្តាលពាក់អាវខ្មៅ)

លោក Chen Gang នាយកប្រចាំរោងចក្រផលិតសំបកកង់ DOUBLESTAR បានបញ្ជាក់ថា សម្រាប់ទិសដៅបន្ទាប់ ក្រុមហ៊ុនមានផែនការក្នុងការកាត់ចំណែកនៃផលិតផលសំបកកង់ចេញពីរោងចក្រ ដើម្បីលក់ផ្គត់ផ្គង់ទីផ្សារក្នុងស្រុក។

ខណៈដែលបច្ចុប្បន្នក្នុងមួយខែៗ ក្រុមហ៊ុនមានលទ្ធភាពផលិតសំបកកង់រថយន្តបានប្រមាណ ៧ ទៅ ៨ ម៉ឺនបម្រាស់ ដោយផ្តោតទីផ្សារនាំចេញទៅអឺរ៉ុបនិងអាមេរិក ពាក់ព័ន្ធការប្តូរទិសដៅយុទ្ធសាស្រ្តថ្មីនេះ លោកថាពលរដ្ឋកម្ពុជានឹងទទួលបានប្រយោជន៍ពីការប្រើប្រាស់សំបកកង់ដែលមានគុណភាពខ្ពស់ ដែលជាស្តង់ដាសម្រាប់ប្រើប្រាស់នៅបណ្តាប្រទេសនៅអឺរ៉ុបនិងអាមេរិក។

នៅពេលអ្នកសារព័ត៌មានចោទសួរថា តើផលិតផលដែលនឹងផលិតយកមកផ្គត់ផ្គង់ទីផ្សារក្នុងស្រុក មានគុណភាពស្តង់ដាដូចផលិតផលនាំចេញឬទេ? លោកឆ្លើយតបថា ប្រាកដហើយ និងអាចប្រសើរជាងផលិតផលនាំចេញទៅទៀត។ លោកក៏បង្ហើបថា តម្លៃអាចទទួលយកបានសម្រាប់ពលរដ្ឋកម្ពុជា បើប្រៀបធៀបតម្លៃកង់រថយន្តនាំចូលក្នុងទីផ្សារបច្ចុប្បន្ន។

ក្រុមហ៊ុនផលិតសំបកកង់ DOUBLESTAR ជាក្រុមហ៊ុនធំលំដាប់លេខ ២ របស់រដ្ឋនៅក្នុងប្រទេសចិន។ វត្តមាននៅកម្ពុជា ជាសាខារោងចក្រទី ១១ នៅបរទេសរបស់ក្រុមហ៊ុន ក្រោយក្រុមហ៊ុនបានចុះមកសិក្សាតាំងពីឆ្នាំ ២០១៣ ហើយឆ្នាំ ២០២៤ បានឈានទៅដំណើរការខ្សែសង្វាក់ផលិតកម្មនៅរោងចក្រក្នុងតំបន់សេដ្ឋកិច្ចពិសេសយូប៊ីអីស្នួលខេត្តក្រចេះ ដោយចាយទុនវិនិយោគអស់ប្រមាណ ២០០ លានដុល្លារ។

លោក Chen Gang បានបញ្ជាក់ថា ក្នុងដំណើរការខ្សែសង្វាក់ផលិតកម្ម រោងចក្របានប្រើប្រាស់វត្ថុធាតុកៅស៊ូក្នុងស្រុកមួយឆ្នាំពី ៥ ទៅ ៦ ម៉ឺនតោនហើយភាគច្រើនជាកៅស៊ូក្នុងខេត្តក្រចេះផ្ទាល់តែម្តង។

លោកក៏ជំរុញដល់ពលរដ្ឋបង្កើនផ្ទៃដីដាំដុះកៅស៊ូបន្ថែម ខណៈរោងចក្រមានផែនការពង្រីកខ្សែសង្វាក់ផលិតកម្មដំណាក់កាលទី ២ ដែលនឹងចាំបាច់ត្រូវការប្រភពវត្ថុធាតុដើមក្នុងស្រុកបន្ថែមទៀត ដើម្បីបំពេញខ្សែសង្វាក់ផលិតកម្ម។

បន្ថែមពីនេះ ក្រុមហ៊ុនមានគោលការណ៍ក្នុងការបណ្តុះបណ្តាលជំនាញបច្ចេកទេសដល់ពលរដ្ឋកម្ពុជាលើជំនាញផលិតសំបកកង់រថយន្ត ខណៈដែលក្រុមហ៊ុនដាក់ផែនការពង្រីកផលិតកម្មបន្ថែមនៅដំណាក់កាលបន្តបន្ទាប់។

លោក Zhang Lu Ze នាយកនិងជាអនុប្រធានក្រុមហ៊ុន Zhongqi Holding Group ដែលគ្រប់គ្រងអភិវឌ្ឍតំបន់សេដ្ឋកិច្ចពិសេសយូ ប៊ី អ៊ី ស្នួលក្នុងខេត្តក្រចេះបានឲ្យដឹងថា នៅតំបន់សេដ្ឋកិច្ចពិសេសយូប៊ីអីស្នួលខេត្តក្រចេះ មានលទ្ធភាពទទួលក្រុមហ៊ុនតូចធំមកបោះមូលដ្ឋានរោងចក្របានប្រមាណ ៣០០ លើផ្ទៃដីអភិវឌ្ឍជាង ៨០០ ហិកតា។

លោកថា តំបន់សេដ្ឋកិច្ចស្នួលមានលក្ខណពិសេស ដែលអាចទាក់ទាញក្រុមហ៊ុនធំៗមកបោះទីតាំងផលិតកម្ម ដោយសារនៅតំបន់នេះ មានអនុស្ថានីយដែលអាចផ្គត់ផ្គង់ថាមពលអគ្គិសនីបានគ្រប់គ្រាន់ ដើម្បីគាំទ្រដល់ខ្សែសង្វាក់រោងចក្រធំៗ ដែលត្រូវការកម្លាំងថាមពលខ្លាំងដើម្បីជំរុញក្នុងខ្សែសង្វាក់ផលិតកម្ម។

បើតាមលោក Zhang Lu Ze ក្នុងចំណោមក្រុមហ៊ុនលេចធ្លោដែលកំពុងដំណើរការនៅក្នុងតំបន់សេដ្ឋកិច្ចពិសេសស្នួលមានក្រុមហ៊ុន Doublestar ដែលមានមុខសញ្ញាវិនិយោគផលិតសំបកកង់គ្រប់ប្រភេទ។ ក្រៅពីនេះនៅមានក្រុមហ៊ុនផលិតសំបកកង់រថយន្ត Firemax ដែលគ្រោងនឹងចាប់ផ្តើមផលិតកម្មនៅអំឡុងខែឧសភា រួមទាំងក្រុមហ៊ុនដំឡើងបន្ទះសូឡា រោងចក្រឧស្ម័ន និងរោងចក្រកែច្នៃឈើជាដើម៕

The post រោងចក្រផលិតសំបកកង់រថយន្តដ៏ធំនៅស្នួល នឹងកាត់ចំណែក ១៥% ផ្គត់ផ្គង់ទីផ្សារក្នុងស្រុក អះអាងធានាគុណភាពនិងតម្លៃ appeared first on Kampuchea Thmey Daily.

លម្អិត ៣០ នាទី សម្ភាសន៍អភិបាលរងខេត្តមណ្ឌលគិរី ស្វែងយល់ពីឱកាសវិនិយោគក្នុងខេត្តមណ្ឌលគិរី

Dy Bunnara — Sat, 01 Mar 2025 07:25:45 +0000

ខេត្តមណ្ឌលគិរី ជាគោលដៅអេកូទេសចរណ៍ដ៏ពេញនិយម ហើយទេសចរភាគច្រើនស្គាល់ខេត្តភូមិភាគឥសាននេះ ដោយសារជាខេត្តដែលមានអាកាសធាតុត្រជាក់និងមានទេសភាពស្អាត។

សក្ដានុពលខេត្តមណ្ឌលគិរីមានច្រើនអនេក ហើយរដ្ឋាភិបាលបានដាក់ផែនការមេអភិវឌ្ឍវិស័យទេសចរណ៍ខេត្តមណ្ឌលគិរី ជាគោលដៅអេកូទេសចរណ៍លំដាប់អន្តរជាតិឈរលើស្ថានភាពប្រភពធនធានសក្ដានុពលសម្រាប់ការវិនិយោគ។

កាលពីពេលថ្មីៗនេះដែរ ក្លិបអ្នកកាសែតកម្ពុជាបានដឹកនាំអ្នកសារព័ត៌មានជាង ២០ ស្ថាប័នចុះបេសកកម្មផ្សព្វផ្សាយពីសក្ដានុពលសេដ្ឋកិច្ច និងការអភិវឌ្ឍក្នុងខេត្តមណ្ឌលគិរី។

ផ្តល់បទសម្ភាសន៍ជាង ៣០ នាទី ជាមួយអ្នកសារព័ត៌មាន លោក ងិន សុវិមាន អភិបាលរងខេត្តបានបង្ហាញពីភូមិសាស្រ្តនិងសក្ដានុពលនៃខេត្តមណ្ឌលគិរី ដែលកំពុងទាក់ទាញការចាប់អារម្មណ៍យ៉ាងច្រើនពីវិនិយោគិនក្នុងការវិនិយោគលើវិស័យផ្សេងៗ ខណៈកន្លងទៅនេះក៏មានក្រុមហ៊ុនអន្តរជាតិដ៏ធំមួយ បានបោះទុនវិនិយោគធ្វើអាជីវកម្មរ៉ែមាស ដែលរកចំណូលចូលជាតិរាប់សិបលានដុល្លារក្នុងមួយឆ្នាំៗ។

The post លម្អិត ៣០ នាទី សម្ភាសន៍អភិបាលរងខេត្តមណ្ឌលគិរី ស្វែងយល់ពីឱកាសវិនិយោគក្នុងខេត្តមណ្ឌលគិរី appeared first on Kampuchea Thmey Daily.

ស្រាពាងជនជាតិភាគតិច ពង្រឹងគុណភាពសុវត្ថិភាព គ្រោងចុះបញ្ជីភូមិមួយផលិតផលមួយ

Dy Bunnara — Fri, 28 Feb 2025 08:38:41 +0000

ស្រាពាងរបស់ជនជាតិដើមភាគតិចនៅខេត្តភាគឦសាន កំពុងត្រូវបានយកចិត្តទុកដាក់ក្នុងការពង្រឹងគុណភាពសុវត្ថិភាព ខណៈអាជ្ញាធរខេត្តមណ្ឌលគិរីក៏គ្រោងចុះបញ្ជីទៅក្នុងផលិតផលភូមិមួយផលិតផលមួយ ដើម្បីថែរក្សាការពារថែមទៀត។

លោក ងិន សុវិមាន អភិបាលរងខេត្តមណ្ឌលគិរីបានគូសបញ្ជាក់ថា ស្រាពាងត្រូវបានផលិតតពីមួយជំនាន់ទៅមួយជំនាន់ ក្លាយជាស្រាប្រពៃណីរបស់ជនជាតិដើមភាគតិចក្នុងខេត្តភូមិភាគឦសាន។ បច្ចុប្បន្នដោយសារការវិវឌ្ឍ ការផលិតកាន់តែល្អប្រសើរទៅតាមស្តង់ដារបច្ចេកទេស ដោយគិតគូរសុវត្ថិភាពនិងអនាម័យ ដើម្បីផ្ដល់ទំនុកចិត្តដល់អតិថិជន។

ដោយសារមើលឃើញពីគុណតម្លៃនៃស្រាប្រពៃណីមានប្រវត្តិយូរលង់នេះ បើតាមលោក ងិន សុវិមាន អាជ្ញាធរខេត្តមណ្ឌលគិរីក៏គ្រោងចុះបញ្ជីស្រាពាង ចូលទៅក្នុងបញ្ជីភូមិមួយផលិតផលមួយរបស់ខេត្តមណ្ឌលគិរី ដើម្បីថែរក្សាកេរ្តិ៍ឈ្មោះបន្តទៅមុខទៀត៕

The post ស្រាពាងជនជាតិភាគតិច ពង្រឹងគុណភាពសុវត្ថិភាព គ្រោងចុះបញ្ជីភូមិមួយផលិតផលមួយ appeared first on Kampuchea Thmey Daily.

សម្ភាសន៍ពិសេស ពីអាជីវកម្មរ៉ែថ្មអារនៅកម្ពុជា ឆ្នាំ ២០២៤ រកចំណូលសួយសារបានប្រមាណ ៩០ លានដុល្លារ

Dy Bunnara — Thu, 27 Feb 2025 03:53:57 +0000

វិស័យរ៉ែថ្មអារបានរួមចំណែកជាប្រភពចំណូលមិនមែនសារពើពន្ធ (សួយសារ) បានប្រមាណ ៩០ លានដុល្លារ ចូលក្នុងថវិកាជាតិនៅឆ្នាំ២០២៤ ខណៈធនធានដ៏មានសក្តានុពលរបស់កម្ពុជានេះ មានលទ្ធភាពពង្រីកទីផ្សារនាំចេញទៅក្រៅប្រទេសទាំងនៅតំបន់អាស៊ី និងតំបន់អឺរ៉ុបរួមរួមទាំងនៅទ្វីបអាមេរិក។

អ្នកស្រី ឡេង ដាវី អនុប្រធានសមាគមថ្មអារកម្ពុជាបានឲ្យដឹងថា ចំណូលសួយសារពីវិស័យរ៉ែថ្មអារនៅឆ្នាំ ២០២៤ កើនឡើងគុណជា ៤ បើធៀបឆ្នាំ២០២៣។

ខណៈដែលវិស័យរ៉ែថ្មអារបានរួមចំណែកសម្រាប់ទ្រទ្រង់ចំណូលថវិកាជាតិប្រមាណ ៩០ លានដុល្លារនៅឆ្នាំ ២០២៤ បើតាមអ្នកស្រី ឡេង ដាវី ថ្មអារដែលកែច្នៃរួចនៅកម្ពុជាប្រមាណ ៩០% ត្រូវបាននាំចេញទៅទីផ្សារអន្តរជាតិ ខណៈ ១០% ផ្គត់ផ្គង់ទីផ្សារក្នុងស្រុក។

បច្ចុប្បន្នមានក្រុមហ៊ុនធ្វើអាជីវកម្មរ៉ែថ្មអារនៅក្នុងប្រទេសកម្ពុជាប្រមាណ ៦៨ ក្រុមហ៊ុន ស្ថិតនៅក្នុងភូមិសាស្ត្រខេត្តចំនួន ១១ ក្នុងនោះមានដូចជា ក្រចេះ ស្ទឹងត្រែង ព្រះវិហារ រតនៈគីរី ខេត្តកំពង់ស្ពឺ តាកែវ កំពត កំពង់ឆ្នាំង ពោធិសាត់ បាត់ដំបង និងសៀមរាប។

ខេត្តក្រចេះជាទីតាំងយុទ្ធសាស្រ្តនៃការធ្វើអាជីវកម្មរ៉ែថ្មអារ។ បើតាមសមាគមថ្មអារកម្ពុជា គ្រាន់តែខេត្តក្រចេះមួយមានក្រុមហ៊ុនធ្វើអាជីវកម្មរ៉ែថ្មអារជាង ៣០ រោងចក្រ ដែលធ្វើការកែច្នៃនាំចេញទៅក្រៅប្រទេស។

ពាក់ព័ន្ធអាជីវកម្មរ៉ែថ្មអារនេះ អ្នកស្រី ឡេង ដាវី បានផ្តល់បទសម្ភាសន៍ពិសេសដល់ក្រុមអ្នកសារព័ត៌មានកម្ពុជាជាង ២០ ស្ថាប័ន ខណៈកាលពីពេលថ្មីៗនេះបានចុះទស្សនកិច្ចសិក្សាស្វែងយល់ពីសក្ដានុពលនិងការអភិវឌ្ឍន៍ធនធានរ៉ែនៅស្រុកស្នួលខេត្តក្រចេះ៕

The post សម្ភាសន៍ពិសេស ពីអាជីវកម្មរ៉ែថ្មអារនៅកម្ពុជា ឆ្នាំ ២០២៤ រកចំណូលសួយសារបានប្រមាណ ៩០ លានដុល្លារ appeared first on Kampuchea Thmey Daily.

តំបន់សេដ្ឋកិច្ចពិសេសស្នួលខេត្តក្រចេះ មានលទ្ធភាពទទួលរោងចក្រតូចធំ ៣០០ បោះទីតាំងវិនិយោគ

Dy Bunnara — Tue, 25 Feb 2025 03:22:19 +0000

តំបន់សេដ្ឋកិច្ចពិសេសយូប៊ីអីស្នួលខេត្តក្រចេះ មានលទ្ធភាពទទួលក្រុមហ៊ុនតូចធំមកបោះមូលដ្ឋានរោងចក្រផលិតកម្មបានប្រមាណ ៣០០ លើផ្ទៃដីកំពុងអភិវឌ្ឍជាង ៨០០ ហិកតា។

ក្នុងឱកាសដែលក្រុមអ្នកសារព័ត៌មានជាង ២០ ស្ថាប័ន ចុះទស្សនកិច្ចនៅតំបន់សេដ្ឋកិច្ចពិសេសស្នួល ដឹកនាំដោយក្លិបអ្នកកាសែតកម្ពុជាកាលពីពេលថ្មីៗនេះ លោក Zhang Lu Ze នាយកនិងជាអនុប្រធានក្រុមហ៊ុន Zhongqi Holding Group ដែលគ្រប់គ្រងអភិវឌ្ឍតំបន់សេដ្ឋកិច្ចពិសេសយូ ប៊ី អ៊ី ស្នួលក្នុងខេត្តក្រចេះ បានធ្វើបទបង្ហាញពីដំណើរការនិងសកម្មភាពវិនិយោគនៅតំបន់សេដ្ឋកិច្ចពិសេសស្នួល។

លោក Zhang Lu Ze នាយកនិងជាអនុប្រធានក្រុមហ៊ុន Zhongqi Holding Group (អាវស)

លោក Zhang Lu Ze បានគូសបញ្ជាក់ថា នៅលើផ្ទៃដីអភិវឌ្ឍប្រមាណ ៨១៨ ហិកតា ដែលក្រុមហ៊ុនទទួលការអនុញ្ញាតិវិនិយោគពីរដ្ឋាភិបាល តំបន់សេដ្ឋកិច្ចពិសេសស្នួលមានលទ្ធភាពអាចទទួលក្រុមហ៊ុនតូចធំមកបោះទីតាំងវិនិយោគបង្កើតរោងចក្របានប្រមាណ ៣០០ ក្រុមហ៊ុន។

ក្រុមហ៊ុនខ្នាតធំៗអាចវិនិយោគចាប់ពីទំហំផ្ទៃដី ២០ ហិកតា ដល់ ៤០ ហិកតា និងក្រុមហ៊ុនតូចៗអាចវិនិយោគក្រោមទំហំ ២ ហិកតាជាមួយទុនវិនិយោគក្រោម ១០ លានដុល្លារ។ ក្រុមហ៊ុន Doublestar ដែលបានចាយទុនជាង ២០០ លានដុល្លារ សាងសង់រោងចក្រផលិតសំបកកង់យានយន្តគ្រប់ប្រភេទដើម្បីនាំចេញទៅក្រៅប្រទេសលើផ្ទៃដីទំហំជាង ៤០ ហិកតា។

លោក Zhang Lu Ze បានបញ្ជាក់ថា «បើមានក្រុមហ៊ុនខ្នាតធំដូចជា DoubleStar ដែលត្រូវការផ្ទៃដីធំទូលាយដើម្បីបង្កើតរោងចក្រ តំបន់សេដ្ឋកិច្ចពិសេសស្នួលអាចទទួលបាន ៦០ ក្រុមហ៊ុន តែបើក្រុមហ៊ុនតូចៗទេអាចបានដល់ ៣០០ ក្រុមហ៊ុន»។

តំបន់សេដ្ឋកិច្ចស្នួលមានលក្ខណពិសេស ដែលអាចទាក់ទាញក្រុមហ៊ុនធំៗមកបោះទីតាំងផលិតកម្ម ដោយសារនៅតំបន់នេះ មានអនុស្ថានីយដែលអាចផ្គត់ផ្គង់ថាមពលអគ្គិសនីបានគ្រប់គ្រាន់ ដើម្បីគាំទ្រដល់ខ្សែសង្វាក់រោងចក្រធំៗ ដែលត្រូវការកម្លាំងថាមពលខ្លាំងដើម្បីជំរុញក្នុងខ្សែសង្វាក់ផលិតកម្ម។

ជាមួយគ្នានេះ ក្រុមហ៊ុនក៏បានវិនិយោគលើការអភិវឌ្ឍហេដ្ឋារចនាសម្ព័ន្ធសំខាន់ៗមានដូចជាផ្លូវ ទឹក ភ្លើង និងកន្លែងប្រព្រឹត្តិកម្មទឹកកខ្វក់ សរុបអស់ទឹកប្រាក់ប្រមាណ ១៥០ លានដុល្លារ។

លោក Zhang Lu Ze បានបន្តទៀតថា តំបន់សេដ្ឋកិច្ចមានក្រុមហ៊ុនដឹកជញ្ជូនចំនួន ៤ ខណៈតំបន់សេដ្ឋកិច្ចពិសេសក៏គ្រោងបង្កើតក្រុមហ៊ុនធំមួយសម្រាប់បម្រើការដឹកជញ្ជូននៅក្នុងតំបន់ រួមទាំងឃ្លាំងសម្ភារៈសម្រាប់សម្រួលដល់ការងារសាងសង់សំណង់ផ្សេងៗដល់ក្រុមហ៊ុន ដែលបោះមូលដ្ឋានវិនិយោគបង្កើតរោងចក្រនៅក្នុងតំបន់សេដ្ឋកិច្ចពិសេស។

បច្ចុប្បន្នតំបន់សេដ្ឋកិច្ចពិសេសស្នួល មានក្រុមហ៊ុនចំនួន ១៤ កំពុងដំណើរការ ដោយបានរួមចំណែកទុនវិនិយោគសរុបប្រមាណ ១ ២០០ លានដុល្លារ។

បើតាមលោក Zhang Lu Ze ក្នុងចំណោមក្រុមហ៊ុនលេចធ្លោ ដែលកំពុងដំណើរការនៅក្នុងតំបន់សេដ្ឋកិច្ចពិសេសស្នួលមានក្រុមហ៊ុន Doublestar ដែលមានមុខសញ្ញាវិនិយោគផលិតសំបកកង់គ្រប់ប្រភេទដែលចាប់ផ្តើមខ្សែសង្វាក់ផលិតកម្មតាំងពីឆ្នាំ ២០២៤ ដែលចំណាយទុនវិនិយោគអស់ប្រមាណ ១៣៨ លានដុល្លារ។

ក្រៅពីនេះនៅមានក្រុមហ៊ុនផលិតសំបកកង់រថយន្ត Firemax ដែលគ្រោងនឹងចាប់ផ្តើមផលិតកម្មនៅអំឡុងខែឧសភា រួមទាំងក្រុមហ៊ុនដំឡើងបន្ទះសូឡា រោងចក្រឧស្ម័ន រួមទាំងរោងចក្រកែច្នៃឈើជាដើម៕

The post តំបន់សេដ្ឋកិច្ចពិសេសស្នួលខេត្តក្រចេះ មានលទ្ធភាពទទួលរោងចក្រតូចធំ ៣០០ បោះទីតាំងវិនិយោគ appeared first on Kampuchea Thmey Daily.

បន្លែសរីរាង្គខេត្តមណ្ឌលគិរីមួយថ្ងៃ ប្រមូលលក់ចេញបាន ១ តោន ខណៈអតិថិជនហ៊ានទិញឲ្យតម្លៃខ្ពស់

Dy Bunnara — Fri, 21 Feb 2025 02:50:22 +0000

ការ៉ុត ស្ពៃក្ដោប ស្ពៃបូកគោ ម្ទេសហាវៃ ប៉េងប៉ោះធំ ខ្ទឹមបារាំង ខ្ទឹមក្រហម សាលាដស្រួយ ដើមខាត់ណា ខាត់ណាផ្កា ត្រូវបានសហគមន៍នៅភូមិចម្ការតែ ក្នុងក្រុងសែនមនោរម្យ ខេត្តមណ្ឌលគិរីអះអាងថា ក្នុងមួយថ្ងៃអាចប្រមូលលក់បានជាង ១ តោន តាមរយៈក្រុមហ៊ុនដែលចុះប្រមូលទិញយកទៅលក់ និងចែកចាយបន្តនៅតាមផ្សារទំនើបធំៗនៅរាជធានីភ្នំពេញ។

លោក លឿង វាន់ថន កសិករដាំបន្លែនៅសហគមន៍ភូមិចម្ការតែ ក្នុងក្រុងសែនមនោរម្យ ខេត្តមណ្ឌលគិរីបានប្រាប់ដល់ក្រុមអ្នកសារព័ត៌មានដែលបានចុះដល់ចម្ការ ក្នុងបេសកកម្មចុះផ្សព្វផ្សាយពីសក្ដានុពលរបស់ខេត្តមណ្ឌលគិរី ដឹកនាំដោយក្លិបអ្នកកាសែតកម្ពុជាថា បន្លែដែលសហគមន៍ដាំដុះមានច្រើនមុខ តាមការកុម្ម៉ង់របស់ក្រុមហ៊ុន។

ដោយអនុវត្តតាមកិច្ចសន្យាជាមួយក្រុមហ៊ុន លោក លឿង វ៉ាន់ថន បានបញ្ជាក់ថា បន្លែដែលសហគមន៍ដាំដុះផ្តោតសំខាន់លើសុវត្ថិភាព ហើយត្រូវអនុវត្តតាមបច្ចេកទេសតាមការណែនាំពីមន្រ្តីជំនាញ។

ខណៈបន្លែសរីរាង្គរបស់សហគមន៍ដាំដុះយកចិត្តទុកដាក់គិតគូរខ្ពស់ពីសុវត្ថិភាពដល់អ្នកទទួលទាន លោក លឿង វាន់ថា បានបន្តថា នៅពេលប្រមូលផលមិនបារម្ភខ្វះទីផ្សារ ដោយសារមានកិច្ចសន្យាជាមួយក្រុមហ៊ុនដែលចុះមកប្រមូលទិញយកទៅលក់ចែកចាយបន្តនៅតាមទីផ្សារធំៗដូចជាអ៊ីអន និងជីបម៉ុង ហើយក៏ទទួលបានតម្លៃខ្ពស់៕

The post បន្លែសរីរាង្គខេត្តមណ្ឌលគិរីមួយថ្ងៃ ប្រមូលលក់ចេញបាន ១ តោន ខណៈអតិថិជនហ៊ានទិញឲ្យតម្លៃខ្ពស់ appeared first on Kampuchea Thmey Daily.

តើមានលក្ខខណ្ឌយ៉ាងណាខ្លះ ដើម្បីអាចធ្វើការនៅការដ្ឋានរ៉ែមាសខេត្តមណ្ឌលគិរី?

Dy Bunnara — Thu, 20 Feb 2025 02:37:35 +0000

បុគ្គលិកនិងកម្មករ ដែលកំពុងបម្រើការងារនៅក្រុមហ៊ុនជីករុករករ៉ែមាសនៅតំបន់អូរខ្វាវ ខេត្តមណ្ឌលគិរី បច្ចុប្បន្នមានប្រមាណ ៧០០ នាក់មានទាំងខ្មែរនិងបរទេស។

មានមូលដ្ឋាននៅប្រទេសអូស្ត្រាលី ក្រុមហ៊ុន រ៉ឺនេសង់ មីនើរ៉ល បានប្រតិបត្តិការរុករករ៉ែមាសនៅតំបន់អូរខ្វាវខេត្តមណ្ឌលគិរីតាំងពីឆ្នាំ ២០២១។

លោក នូ ផល្លា ប្រធានផ្នែករដ្ឋបាល និងធនធានមនុស្សនៅក្រុមហ៊ុន រ៉ឺនេសង់ មីនើរ៉ល

លោក នូ ផល្លា ប្រធានផ្នែករដ្ឋបាល និងធនធានមនុស្សនៅក្រុមហ៊ុន រ៉ឺនេសង់ មីនើរ៉ល បានគូសបញ្ជាក់ថា លក្ខខណ្ឌក្នុងការការជ្រើសរើសបុគ្គលិកនិងកម្មករ បម្រើការងារនៅក្រុមហ៊ុនមានភាពខុសគ្នា ផ្អែកលើកម្រិតនៃការងារតាមផ្នែកនិងតួនាទីនីមួយៗ។

បុគ្គលិកជំនាញមុនត្រូវបានជ្រើសរើសមកធ្វើការ ត្រូវតែមានសមត្ថភាពចំណេះដឹង ឆ្លងកាត់ការសិក្សាដល់សាកលវិទ្យាល័យ និងការសម្ភាសជាច្រើនដំណាក់កាល។ ដោយឡែកបុគ្គលិកគ្មានជំនាញ ក៏ក្រុមហ៊ុនមានតម្រូវការដូចគ្នា ដែលអាចធ្វើការនៅរណ្តៅរ៉ែ ហើយក្រុមហ៊ុនក៏នឹងផ្តល់ការបណ្ដុះបណ្ដាលបន្ថែម ដើម្បីគាំទ្រជួយដល់អ្នកបច្ចេកទេស រួមទាំងអ្នកគ្រប់គ្រងនៅការដ្ឋាន។

បុគ្គលិកកម្មករដែលត្រូវបានជ្រើសរើសបម្រើការងារនៅការដ្ឋាន គឺក្រុមហ៊ុនផ្តល់ឱកាសស្មើៗគ្នាមិនថាប្រុសឬស្រី។

បើតាមលោក នូ ផល្លា តាមរយៈគម្រោងការដ្ឋាននៅអូរខ្វាវ បច្ចុប្បន្នបានបង្កើតការងារប្រមាណ ៧៥០ នាក់ ដែលមានចម្រុះជាតិសាសន៍ទាំងខ្មែរនិងបរទេស។ ដោយឡែកពលរដ្ឋខ្មែរដែលទទួលបានឱកាសការងារដោយផ្ទាល់ មានប្រមាណ ៦៥៩ នាក់៕

The post តើមានលក្ខខណ្ឌយ៉ាងណាខ្លះ ដើម្បីអាចធ្វើការនៅការដ្ឋានរ៉ែមាសខេត្តមណ្ឌលគិរី? appeared first on Kampuchea Thmey Daily.

រណ្តៅជីករ៉ែមាសនៅអូរខ្វាវខេត្តមណ្ឌលគិរី បំពាក់ប្រព័ន្ធសេនស័រ ផ្តល់សញ្ញាព្រមានដឹងមុន ពេលមានគ្រោះថ្នាក់

Dy Bunnara — Wed, 19 Feb 2025 02:58:41 +0000

ក្រុមហ៊ុន រ៉ឺនេសង់ មីនើរ៉ល ដែលជាក្រុមហ៊ុនឧស្សាហកម្មមានមូលដ្ឋាននៅប្រទេសអូស្រ្តាលី បានអះអាងពីការអនុវត្តស្តង់ដាសុវត្ថិភាពជាអន្តរជាតិ លើប្រតិបត្តិការរុករករ៉ែមាសនៅតំបន់អូរខ្វាវខេត្តមណ្ឌលគិរី។

ខណៈដែលកន្លងទៅ ឃើញមានហេតុការណ៍និងការផ្សព្វផ្សាយពីករណីកើតគ្រោះថ្នាក់នៅតាមការដ្ឋានរ៉ែដូចជាការបាក់ដី ការជន់លិចតាមការដ្ឋាន ប៉ុន្តែសម្រាប់ក្រុមហ៊ុនរ៉ឺណេសង់ បានអនុវត្តិគោលការណ៍ច្បាប់សុវត្ថិភាព ១០០% ស្របតាមស្តង់ដាអន្តរជាតិ ដើម្បីការពារបុគ្គលិកបម្រើការងារ។ នេះបើតាមការអះអាងរបស់ប្រធានរដ្ឋបាល នៃក្រុមហ៊ុនរីណេសង់ឆ្លើយតបសំនួររបស់កម្ពុជាថ្មី។

លោក នូ ផល្លា ប្រធានរដ្ឋបាល និងធនធានមនុស្សក្រុមហ៊ុនរឺណេសង់ បានគូសបញ្ជាក់ថា ក្នុងប្រតិបត្តិការអាជីវកម្ម ក្រុមហ៊ុនបានដាក់ចេញការអនុវត្តគោលការណ៍សុវត្ថិភាពជាចម្បង ទៅលើបុគ្គលិកបម្រើការងារនៅការដ្ឋាន ដែលទាមទារត្រូវអនុវត្តពេញលេញ ខណៈស្តង់ដាសុវត្ថិភាពត្រូវរៀបចំយ៉ាងល្អិតល្អន់ហើយរាល់បុគ្គលិកត្រូវតែគោរព។

«គោលការណ៍សុវត្ថិភាពរបស់ក្រុមហ៊ុនសម្រាប់បុគ្គលិកទូទៅ និងក្រុមហ៊ុនម៉ៅការ ត្រូវអនុវត្តឲ្យបានដាច់ខាតតែម្តង។ នៅពេលលក្ខខណ្ឌស្តង់ដារអន្តជាតិត្រូវបានអនុវត្ត គ្រោះថ្នាក់សឹងតែគ្មាន»។ នេះបើតាមលោក នូ ផល្លា។

បន្ថែមពីនេះ ក្រុមហ៊ុនមានអ្នកជំនាញមកពីស្រុកក្រៅ ដើម្បីវាយតម្លៃពីច្បាប់សុវត្ថិភាព និងសុខុមាលភាពបុគ្គលិកបម្រើការនៅតាមការដ្ឋាន។

ទិដ្ឋភាពនៅក្នុងការដ្ឋានរ៉ែមាសនៅអូរខ្វាវ កន្លងទៅក៏កើតមានកត្តាធម្មជាតិមួយចំនួន។ ពេលខ្លះទឹកភ្លៀងច្រើនពេក បានធ្វើឲ្យរចនាសម័្ពន្ធជួបផលលំបាក ប៉ុន្តែលក្ខណបណ្តាលមកពីបញ្ហាបច្ចេកទេសគឺអត់មានទេ។ នេះបើតាម លោក នូ ផល្លា។

លោក នូ ផល្លា បានថ្លែងថា នៅការដ្ឋានរ៉ែមាសដែលក្រុមហ៊ុនកំពុងប្រតិបត្តការនៅអូរខ្វាវ ខេត្តមណ្ឌលគិរី បានរៀបចំដំឡើងប្រព័ន្ធព្រមាន ករណីកើតមានដូចជាបាក់ជញ្ជាំងដែលផ្តល់សញ្ញាឲ្យកម្មករបានដឹងមុនដើម្បីបញ្ចៀសគ្រោះថ្នាក់។

«នៅតាមជញ្ជាំងរណ្តៅ គឺយើងបានដាក់ប្រព័ន្ធសេនស័រ រាល់មានការរំកិលជញ្ជាំងខុសប្រក្រតី វានឹងផ្តល់សញ្ញាឲ្យដឹងភ្លាមៗ ខណៈបុគ្គលិកដែលពាក់ព័ន្ធការងារក្នុងការដ្ឋាន បានអនុវត្តគោលការណ៍សុវត្ថិភាពបង្ការមិនឲ្យមានគ្រោះថ្នាក់»។

បើតាម លោក នូ ផល្លា គ្រោះថ្នាក់នៅការដ្ឋានរ៉ែភាគច្រើន ពាក់ព័ន្ធទៅអ្នករុករករ៉ែមាសខុសច្បាប់ ដែលមិនបានអនុវត្តស្តង់ដាសុវត្ថិភាពបានត្រឹមត្រូវ។ ដូចជាទឹកភ្លៀងជន់ ឬការបំផ្ទុះដែលមិនគោរពគោលការណ៍សុវត្ថិភាព ដែលជាការប្រថុយប្រថាននាំឲ្យកើតមានគ្រោះថ្នាក់។

ក្រុមហ៊ុន រ៉ឺនេសង់ មីនើរ៉ល ដែលទទួលសិទ្ធិធ្វើអាជីវកម្មពីរដ្ឋាភិបាល បានចាប់ផ្តើមរុករករ៉ែមាសនៅក្នុងតំបន់អូខ្វាវ ខេត្តមណ្ឌលគិរីតាំងពីឆ្នាំ ២០២១ ដែលបច្ចុប្បន្នក្រុមហ៊ុនកំពុងប្រតិបត្តិនៅក្នុងរណ្ដៅរ៉ែមាសចំនួន ៧ រណ្ដៅ និងគ្រោងនឹងបន្តរណ្តៅទី ៨ បន្ថែមទៀត។ សមត្ថភាពទាញចម្រាញ់រ៉ែមាសរបស់ក្រុមហ៊ុនបានពី ៣០០ ទៅ ៤០០ គីឡូក្រាមក្នុង ១ ខែ។ នេះបើតាមប្រភពក្រុមហ៊ុន។

បើតាមអគ្គនាយកដ្ឋានធនធានរ៉ែ បច្ចុប្បន្នកម្ពុជាបានផ្តល់សិទ្ធិដល់ក្រុមហ៊ុនធ្វើអាជីវកម្មរ៉ែមាសចំនួន ១១ ក្រុមហ៊ុន ដែលប្រតិបត្តិការនៅ ៦ ខេត្ត ដោយនៅក្នុងនោះមាន ៧ គម្រោង កំពុងធ្វើប្រតិបត្តិការទាញយករ៉ែពេញលេញតាំងឆ្នាំ២០២១ និង ៤ គម្រោង ស្ថិតក្នុងដំណាក់កាលអភិវឌ្ឍន៍៕

The post រណ្តៅជីករ៉ែមាសនៅអូរខ្វាវខេត្តមណ្ឌលគិរី បំពាក់ប្រព័ន្ធសេនស័រ ផ្តល់សញ្ញាព្រមានដឹងមុន ពេលមានគ្រោះថ្នាក់ appeared first on Kampuchea Thmey Daily.

បេសកកម្មផ្សព្វផ្សាយសក្តានុពលខេត្តក្រចេះនិងមណ្ឌលគិរី Archives - Kampuchea Thmey Daily

លម្អិត ៣០ នាទី សម្ភាសន៍​អភិបាល​រង​ខេត្ត​មណ្ឌលគិរី ​ស្វែង​យល់​ពី​ឱកាស​វិនិយោគ​ក្នុង​ខេត្ត​មណ្ឌលគិរី

ស្រាពាងជនជាតិភាគតិច ពង្រឹងគុណភាពសុវត្ថិភាព គ្រោងចុះបញ្ជីភូមិមួយផលិតផលមួយ

តំបន់​សេដ្ឋកិច្ច​ពិសេស​ស្នួល​ខេត្ត​ក្រចេះ មាន​លទ្ធភាព​ទទួល​រោងចក្រ​តូច​ធំ ៣០០ បោះ​ទីតាំង​វិនិយោគ​​ ​

តើមាន​​លក្ខខណ្ឌយ៉ាងណា​ខ្លះ ដើម្បី​អាច​ធ្វើការ​នៅ​ការដ្ឋាន​រ៉ែមាស​ខេត្ត​មណ្ឌលគិរី?

លម្អិត ៣០ នាទី សម្ភាសន៍អភិបាលរងខេត្តមណ្ឌលគិរី ស្វែងយល់ពីឱកាសវិនិយោគក្នុងខេត្តមណ្ឌលគិរី

តំបន់សេដ្ឋកិច្ចពិសេសស្នួលខេត្តក្រចេះ មានលទ្ធភាពទទួលរោងចក្រតូចធំ ៣០០ បោះទីតាំងវិនិយោគ

តើមានលក្ខខណ្ឌយ៉ាងណាខ្លះ ដើម្បីអាចធ្វើការនៅការដ្ឋានរ៉ែមាសខេត្តមណ្ឌលគិរី?