ក្រសួងឱ្យដឹងថា ក្រុមការងារកំពុងបន្តចុះពិនិត្យស្រាវជ្រាវករណីខាងលើបន្តទៀត និងបានរកឃើញសំណាកត្រីងាប់មួយចំនួន។ យោងតាមការចុះទៅពិនិត្យដល់ទីតាំងជាក់ស្ដែង កន្លែងមានត្រីងាប់ និងទឹកមានធំក្លិនស្អុយ ក្នុងព្រែកត្រែង ដែលស្ថិតនៅចចម្ងាយ ៦០០ ម៉ែត្រ ផ្នែកខាងក្រោមរោងចក្រកែឆ្នៃស្វាយចំនួនពីរ។

ជាមួយគ្នានេះ ក្រុមការងារបានចុះពិនិត្យជាក់ស្តែង មិនបានឃើញមានករណីសង្ស័យពីការលេចធ្លាយ ឬការបញ្ចេញសំណល់រាវចូលទៅក្នុងអូត្រែងនៅឡើយទេ ដោយសារក្រុមហ៊ុនទាំង២ បានរៀបចំឱ្យមានអាងប្រព្រឹត្តិកម្មទឹកតាមលក្ខណៈបច្ចេកទេស និងនៅតំបន់រោងចក្រ ទឹកដែលបានបញ្ចេញមកក្រៅ មានពណ៌ថ្លា និងក៏មិនមានក្លិនស្អុយដែរ។ ទន្ទឹមនឹងនេះ ក្រុមការងារបានយកសំណាកទឹកចំនួន៥ទីតាំង នៅខ្សែទឹកខាងលើ និងខាងក្រោម និងចំណុចទឹកស្រះរបស់រោងចក្រ នៃក្រុមហ៊ុនកែច្នៃដំណាប់ស្វាយទាំងពីរ២កន្លែង គឺក្រុមហ៊ុនយូយូរភីន និងក្រុមហ៊ុនប៉ៃស៊ិនសេង ដែលស្ថិតក្នុងភូមិសាស្រ្តក្បែរកន្លែងសង្ស័យរ ដើម្បីបញ្ជូនមកមន្ទីរពិសោធន៍របស់ក្រសួងបរិស្ថាន។

ជាមួយគ្នានេះ មន្រ្តីជំនាញបានដាក់ចេញវិធានការ ស្នើសុំឱ្យអាជ្ញាធរ ធ្វើការហាមឃាត់ប្រជាពលរដ្ឋ ផ្អាកការប្រើប្រាស់ទឹកព្រែកត្រែងមួយរយៈ និង កុំយកត្រីដែលងាប់ទៅបរិភោគ។ ក្រុមការងារបានណែនាំបន្ថែមដល់ម្ចាស់ទីតាំងរោងចក្រទាំង២ខាងលើ កុំបញ្ចេញសំណល់រាវបំពុលទឹកសាធារណៈ និងអនុវត្តបទដ្ឋានបច្ចេកទេសបរិស្ថានឱ្យបានត្រឹមត្រូវជាប្រចាំ។

ក្រសួងបរិស្ថានបានបញ្ជាក់ជំហរចំណាត់ការផ្លូវច្បាប់យ៉ាងម៉ឺងម៉ាត់ថា ក្រសួងមិនលើកលែងចំពោះក្រុមហ៊ុន ឧស្សាហកម្ម ឬរោងចក្រណា ដែលបង្កការបំពុលទឹកសាធារណៈឡើយ៕

The post មន្រ្តីបរិស្ថានស្នើពលរដ្ឋកុំបរិភោគត្រីងាប់ និងផ្អាកប្រើប្រាស់ទឹកព្រែកត្រែង នៅស្រុករតនៈមណ្ឌល ខេត្តបាត់ដំបង appeared first on Kampuchea Thmey Daily.

អ្នកនាំពាក្យក្រសួងបរិស្ថាន លោក ខ្វៃ អាទិត្យា ប្រាប់ក្រុមអ្នកសារព័ត៌មានថា មន្ត្រីជំនាញកំពុងស្ថិតនៅទីតាំងកើតហេតុ នៅផ្នែកខាងក្រោម នៃទីតាំងកើតហេតុ ដែលអាចមានចំងាយប្រហែល៦គីឡូម៉ែត្រ ដើម្បីធ្វើការស្រាវជ្រាវយ៉ាងយកចិត្តទុកដាក់ ពិនិត្យដោយផ្ទាល់នៅកន្លែងដែលប្រជាពលរដ្ឋបានរាយករណ៍ និងបានប្រមូលសំណាកទឹក យកទៅធ្វើតេស្តតាមបច្ចេកទេស នៅមន្ទីរពិសោធន៍ ដើម្បីស្វែងរកមូលហេតុពិតប្រាកដ ដែលនាំឱ្យត្រីងាប់ រហូតដល់ម៉ោង០៦:៣០នាទីល្ងាចថ្ងៃដដែល។ ក្រុមការងារនឹងបន្តពីនិត្យ នៅផ្នែកខាងលើបន្ថែមនាថ្ងៃទី៣១ ខែមីនា នេះបន្តទៀត។

លោក អ៊ាង សុផល្លែត រដ្ឋមន្រ្តីក្រសួងបរិស្ថាន បានបញ្ជាឱ្យមន្រ្តីជំនាញបន្តធ្វើការរកប្រភពនៃការបំពុលតំបន់ទឹកស្ទឹងព្រែកត្នោតឱ្យឃើញ។

សេចក្ដីរាយការណ៍ពីពលរដ្ឋនៅមូលដ្ឋានបានឱ្យដឹងថា ត្រីតូចធំជាច្រើនក្បាលបានងាប់នៅក្នុងស្ទឹងព្រែកត្នោតត្រង់ភូមិសាស្ត្រសង្កាត់សាក់សំពៅ និងសង្កាត់គងនយ។ ពលរដ្ឋឱ្យដឹងថា ទឹកស្ទឹងនេះ មានក្លិនស្អុយ និងមិនអាចយកទៅប្រើប្រាស់បានឡើយ។ ពលរដ្ឋដាក់ការសង្ស័យថា មូលហេតុដែលត្រីតូចធំជាច្រើនប្រភេទងាប់ គឺអាចមកពីមានការបំពុលទឹក ដែលក្រុមហ៊ុនកែច្នៃណាមួយនៅតាមបណ្ដោយស្ទឹងព្រែកត្នោតបង្ហូរទឹកដែលមានសារធាតុពុលចូលទៅក្នុងប្រភពទឹកសាធារណៈមួយនេះ។

អ្នកនាំពាក្យរម្លឹកឡើងវិញថា ក្រសួងបរិស្ថានបាននិងកំពុងអនុវត្តវិធានការយ៉ាងតឹងរ៉ឹង ដើម្បីទប់ស្កាត់ការបំពុលទឹកសាធារណៈ តាមរយៈយុទ្ធនាការផ្ទៃទឹកស្អាត និងការអនុវត្តច្បាប់ជាធរមាន ដែលជាផ្នែកមួយនៃយុទ្ធសាស្ត្រចក្រាវិស័យបរិស្ថាន ២០២៣-២០២៨ ក្នុងសសរស្តម្ភទី១គឺ «ភាពស្អាត»។ រោងចក្រ សហគ្រាសនិងក្រុមហ៊ុននានា ដែលរកឃើញមានបង្ហូរទឹកកខ្វក់ ដោយគ្មានការប្រព្រឹត្តិកម្ម ត្រូវបានផាកពិន័យ បញ្ជាឱ្យកែតម្រូវ ឬឈានដល់ការផ្អាកប្រតិបត្តិការបណ្តោះអាសន្ន។

រាជរដ្ឋាភិបាលបានចេញ សារាចរលេខ ០៣ (ចុះថ្ងៃទី១២ ខែមីនា ឆ្នាំ២០២៥) ស្តីពីវិធានការទប់ស្កាត់ និងកាត់បន្ថយការបំពុលតំបន់ទឹកសាធារណៈ ដើម្បីពង្រឹងកិច្ចសហការរវាងក្រសួង ស្ថាប័ននិងរដ្ឋបាលថ្នាក់ក្រោមជាតិ ពាក់ព័ន្ធ ដើម្បីធានាបាននូវសុខភាពសាធារណៈ និងនិរន្តរភាពជីវៈចម្រុះ៕

The post មន្ត្រីជំនាញក្រសួងបរិស្ថានចុះពិនិត្យទៅដល់កន្លែងពលរដ្ឋរាយការណ៍ពីករណីត្រីងាប់ក្នុងស្ទឹងព្រែកត្នោត appeared first on Kampuchea Thmey Daily.

តាមលោក ខ្វៃ អាទិត្យា ក្រសួងបរិស្ថានបានតាមដាន ត្រួតពិនិត្យ ការបញ្ចេញសំណល់រាវ ពីក្រុមហ៊ុននិងរោងចក្រ ចូលតំបន់ទឹកសាធារណៈ អនុលោមតាមស្តង់ដារ បានប្រមាណ២លាន ម៉ែត្រគីបក្នុង១ខែៗ។ អ្នកនាំពាក្យរូបនេះ បានបន្ថែមថា សមិទ្ធផល ដែលសម្រេចបាននាពេលនេះ គឺការចូលរួមពីភាគីពាក់ព័ន្ធ ជាពិសេសពី ម្ចាស់រោងចក្រ សហគ្រាស និងក្រុមហ៊ុននានា ក្នុងការគោរពច្បាប់ ជាពិសេសការអនុវត្តក្រមបរិស្ថាននិងធនធានធម្មជាតិ បង្ហាញពីតម្លាភាពប្រសិទ្ធភាពក្នុងការគ្រប់គ្រងបរិស្ថាន និងជំរូញឱ្យមានការប្រកួតប្រជែងស្មើភាពក្នុងវិស័យឧស្សហកម្មនៅកម្ពុជា។

ដើម្បីធានាភាពស្អាតនៅកម្ពុជា ស្របតាមយុទ្ធសាស្រ្តចក្រាវិស័យបរិស្ថាន រដ្ឋមន្រ្តីក្រសួងបរិស្ថាន បានជំរុញការពង្រឹងការអនុវត្តច្បាប់ដើម្បីទប់ស្កាត់ការបំពុលបរិស្ថាន ក្នុងនោះក្រុមហ៊ុន សហគ្រាស និងរោងចក្រដែលមានសក្តានុពលប្រភពបំពុល ធានាការប្រកួតប្រជែងស្មើភាព និងបង្កើនជំនឿទុកចិត្តលើផលិតកម្មស្អាត ត្រូវអនុវត្តតាមច្បាប់កម្ពុជា ដំឡើងឧបករណ៍ស្វ័យប្រវត្តិ និងប្រព័ន្ធគ្រប់គ្រងទិន្នន័យ ដើម្បីតាមដានការបញ្ចេញសំណល់រាវ។

រដ្ឋមន្រ្តីលើកឡើងថា ក្រសួងបរិស្ថានបានយកចិត្តទុកដាក់លើភាពស្អាត ក្នុងភាពស្អាតក្នុងទឹក ស្របតាមការអនុវត្តគោល នយោបាយ យុទ្ធសាស្រ្តរបស់រាជរដ្ឋាភិបាលកម្ពុជា ក្នុងនោះយុទ្ធសាស្រ្តចក្រាវិស័យបរិស្ថាន និងប្រសាសន៍ដឹកនាំដ៏ខ្ពង់ខ្ពស់ របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ដែលបានយកចិត្តទុកដាក់ខ្ពស់ លើវិធានការទប់ស្កាត់ និងកាត់បន្ថយការបំពុលតំបន់ទឹកសាធារណៈ និងលើការគ្រប់គ្រងគុណភាពទឹក ប្រកបដោយចីរភាព សម្រាប់ការអភិរក្សជីវៈចម្រុះនៅក្នុងទឹក និងការពារសុខភាពសាធារណៈ។ 

លោក អ៊ាង សុផល្លែត បានថ្លែងអំណរគុណដល់ម្ចាស់ក្រុមហ៊ុន រោងចក្រ សហគ្រាសទាំងអស់ ដែលបានអនុវត្តច្បាប់ និងបានបំពាក់ឧករណ៍ស្វ័យត្រួតពិនិត្យ តាមបណ្តាទីតាំងរបស់ខ្លួន និងជំរុញកិច្ចសហការថែមទៀតជាមួយទីតាំងផលិតកម្មដែលមានសក្តានុពលបំពុល ចូលរួមអនុវត្តច្បាប់នៅកម្ពុជាសំដៅរក្សាភាពស្អាត ធានាសុវត្ថិភាព និងសុខភាពកម្មករ និងប្រជាពលរដ្ឋ នៅក្បែរប្រភពទឹកនិងតំបន់ឧស្សាហកម្ម។

បើតាមអ្នកនាំពាក្យក្រសួងប​​រិស្ថាន បច្ចុប្បន្ន ក្រុមហ៊ុន រោងចក្រ និងសហគ្រាសចំនួន ៥៤ ទីតាំង បានដំឡើងដំឡើងឧបករណ៍ស្វ័យប្រវត្តិ និងប្រព័ន្ធគ្រប់គ្រងទិន្នន័យ ដើម្បីតាមដានការបញ្ចេញសំណល់រាវនៅក្នុងឆ្នាំ២០២៥។ ក្រុមហ៊ុន រោងចក្រ និងសហគ្រាសមួយចំនួនទៀត បានចុះកិច្ចសន្យា និងត្រៀមដំឡើងជាបន្តបន្ទាប់នៅក្នុងឆ្នាំ២០២៦។ សូមបញ្ជាក់ថា ទិន្នន័យដែលប្រមូលបាន ពីឧបករណ៍ស្វ័យត្រួតពិនិត្យ ត្រូវបានបញ្ជូនទៅប្រព័ន្ធគ្រប់គ្រង របស់ក្រសួងដោយស្វ័យប្រវត្តិ ហើយនៅក្នុងករណីខុសបច្ចេកទេសណាមួយ ឧបករណ៍ផ្ញើព័ត៌មាន ក៏ជាការជូនដំណឹងទៅកាន់ក្រសួងបរិស្ថានភ្លាមៗ និងក្រុមការងារអាចចុះអន្តរាគមន៍បានទាន់ពេលវេលា៕

The post ក្នុងឆ្នាំ២០២៥ ក្រសួងបរិស្ថានបានទប់ស្កាត់ទឹកកខ្វក់ជាង២០លានម៉ែត្រគូបពីក្នុងរោងចក្រចូលប្រភពទឹកធម្មជាតិ appeared first on Kampuchea Thmey Daily.

រដ្ឋមន្ត្រីមានប្រសាសន៍ថាក្រសួងបរិស្ថានអនុវត្តទៅតាមច្បាប់ដោយគ្មានការលើកលែងចំពោះក្រុមហ៊ុននេះ ដោយផ្អែកទៅលើក្រមបរិស្ថាននិងធម្មជាតិ។រដ្ឋមន្ត្រីក្រសួងបរិស្ថានបានបញ្ជាឲ្យបិទទ្វារទីតាំងក្រុមហ៊ុន ហាមមិនឱ្យធ្វើសកម្មភាព និងដាក់កម្លាំងសមត្ថកិច្ចឲ្យបន្តតាមដានចំពោះសកម្មភាពក្រុមហ៊ុន ជៀសវាងក្រុមហ៊ុនធ្វើសកម្មភាពជីករ៉ែបន្តទៀត។

លោក អ៊ាង សុផល្លែត បញ្ជាក់ថា ក្រសួងបរិស្ថាន នឹងសិក្សាយ៉ាងលម្អិតអំពីហេតុប៉ះពាល់ដល់បរិស្ថាននិងការប៉ះពាល់ដល់ជីវិតសត្វពាហនៈទ្រព្យសម្បត្តិរបស់ប្រជាជន ហើយក្រសួងបានតម្រូវឲ្យក្រុមហ៊ុនស្ដារចំពោះផលប៉ះពាល់លើបរិស្ថាន រៀបចំអាងប្រព្រឹត្តិកម្មទឹកស្អាតនៅក្នុងប្រភពទឹកសាធារណៈ និងផ្ដល់សំណងដល់ប្រជាពលរដ្ឋដែលរស់នៅតំបន់នោះ។

ក្រោយពីទទួលបានគោលការណ៍បញ្ជារបស់រដ្ឋមន្ត្រីក្រសួងបរិស្ថាន, លោក ស៊ុន សុវណ្ណារិទ្ធ អភិបាលខេត្តកំពង់ឆ្នាំងធានាដាក់កម្លាំងសមត្ថកិច្ចតាមដានសកម្មភាពរបស់ក្រុមហ៊ុនមិនឲ្យធ្វើសកម្មភាពបន្តទៀត។

សូមរំលឹកថានៅយប់ថ្ងៃទី០៦ ខែកក្កដា ក្រសួងបរិស្ថានបានចាត់វិធានការបន្ទាន់ដោយសម្រេចបិទអាជីវកម្ម ក្រុមហ៊ុនខាងលើនេះបន្ទាប់ពីរកឃើញថា ក្រុមហ៊ុនបានប្រព្រឹត្តល្មើសច្បាប់បរិស្ថាន ដោយបានបញ្ចេញសំណល់រាវមិនត្រឹមត្រូវប៉ះពាល់ទឹកនៅក្នុងប្រព័ន្ធទឹកអូឬស្សីក្នុងភូមិសាស្ត្រឃុំខ្លុងពពក ឃុំជាប ឃុំអភិវឌ្ឍ និងឃុំតាំងក្រសាំង ស្រុកទឹកផុស ខេត្តកំពង់ឆ្នាំង ។ ក្រុមហ៊ុន ត្រូវបានរកឃើញការគ្រប់គ្រងសំណល់រាវពុំបានត្រឹមត្រូវ ដោយអាងស្តុកសំណល់រាវជាស្រះស្តុកធម្មតាមិនមានបំពាក់ប្រព័ន្ធសម្អាតត្រឹមត្រូវទេ ដោយគ្រប់សំណល់រាវចេញពីទីតាំងកិន និងរែងរ៉ែបានបង្ហូរលាយឡំជាមួយប្រព័ន្ធលូទឹកភ្លៀង។ លើសពីនេះ ក្រុមហ៊ុនមិនមានកន្លែងទុកដាក់សំណល់រឹង និងសារធាតុគ្រោះថ្នាក់ ត្រឹមត្រូវនៅឡើយទេ។ លើសពីនេះ ក្រុមហ៊ុនពុំបានអនុវត្តធ្វើរបាយការណ៍បាយតម្លៃហេតុប៉ះពាល់បរិស្ថាន ស្របតាមក្រមបរិស្ថាននិងធនធានធម្មជាតិ និងបទដ្ឋានគតិយុត្តជាធរមាន។

យោងតាមលទ្ធផលសំណាកទឹកទាំង៦ទីតាំងខាងលើ គឺមានស្ថានភាពគុណភាពទឹកមិនអនុលោម តាមស្តង់ដារទឹកសាធារណៈ ជាពិសេសប៉ារ៉ាមែត្រ Cyanide នៅចំនួន៥ទីតាំង មានកំហាប់ប្រែប្រួល ទាប់ ខ្ពស់ ។ សារធាតុ Cyanide នេះត្រូវបានគេប្រើប្រាស់ជាទូទៅនៅក្នុងវិស័យឧស្សាហកម្ម សម្រាប់ចម្រាញ់រ៉ែមាស។ ចំពោះប៉ារ៉ាមែត្រ CODCr ជាប៉ារ៉ាមែត្របញ្ជាក់ពីសាធាតុគីមីចេញពីរោងចក្រ ដែលជាធម្មតាមិនអាចរកឃើញនៅក្នុងទឹកធម្មជាតិ គឺត្រូវបានរកឃើញគ្រប់ទីតាំងយកសំណាកទាំងអស់ ទោះបីជាស្ថិតក្នុងកម្រិតទាបក៏ដោយ។

ក្រសួងបរិស្ថាន ស្នើដល់ប្រជាពលរដ្ឋដែលពាក់ព័ន្ធនៅក្នុងតំបន់ប្រើប្រាស់ទឹកអូរឬស្សី ក្នុងស្រុកទឹកផុស ខេត្តកំពង់ឆ្នាំង ផ្អាកការប្រើប្រាស់ទឹក នេសាទ ឬយកសត្វចិញ្ចឹមចុះផឹកទឹកអូរ ជាបណ្តោះអាសន្ន រហូតដល់មានការណែនាំជាថ្មី។ ជាមួយគ្នានេះក្រសួងបរិស្ថាន សម្រេចបិទអាជីវកម្មក្រុមហ៊ុន CAMBODIAN XUAN YI MINERALS CO., LTD.៕

The post រដ្ឋមន្ត្រីបរិស្ថានបញ្ជាដាច់ណាត់ឱ្យបិទអាជីវកម្មក្រុមហ៊ុនរករ៉ែ បំពុលទឹក ងាប់សត្វគោ ត្រី នៅកំពង់ឆ្នាំង និងដាក់សមត្ថកិច្ចយាមកាម appeared first on Kampuchea Thmey Daily.

 អ្នកនាំពាក្យក្រសួងបរិស្ថាន លោក ខ្វៃ អាទិត្យា បានឱ្យដឹងថា បានការអនុវត្តច្បាប់ទប់ស្កាត់ការបំពុលបរិស្ថាននេះ ត្រូវបានត្រួតពិនិត្យតាមដាន ឱ្យក្រុមហ៊ុន និងរោងចក្រ ដែលមានសក្តានុពលប្រភពបំពុល នៅតាមរាជធានី-ខេត្ត ត្រូវអនុវត្តឱ្យបានត្រឹមត្រូវតាមក្រមបរិស្ថាន និងធនធានធម្មជាតិ លើការបំពាក់ឧបករណ៍តាមដានស្វ័យត្រួតពិនិត្យ និងប្រព័ន្ធគ្រប់គ្រងទិន្នន័យការបញ្ចេញសំណល់រាវ នៅតាមទីតាំងរបស់ក្រុមហ៊ុន និងរោងចក្រទាំងអស់។  គិតត្រឹមថ្ងៃទី៣០ ខែកញ្ញា ឆ្នាំ២០២៥ ក្រុមហ៊ុន និងរោងចក្រ ចំនួន ៥៧ ទីតាំង បានចុះកិច្ចសន្យា ដើម្បីអនុវត្តច្បាប់ត្រឹមត្រូវ និងបានបំពាក់ឧបរណ៍ស្វ័យត្រួតពិនិត្យ ក្នុងនោះ មានក្រុមហ៊ុន និងសហគ្រាសចំនួន៤៦ បានបំពាក់រួចហើយ។

អ្នកនាំពាក្យអះអាងថា ក្រសួងបរិស្ថាន បានខិតខំបំពេញតួនាទីភារកិច្ចយ៉ាងសស្រាក់សស្រាំ ដើម្បីឈានទៅសម្រេចយុទ្ធសាស្ត្រចក្រាវិស័យបរិស្ថាន ២០២៣-២០២៨ អនុលោមទៅតាមយុទ្ធសាស្រ្តបញ្ចកោណ ដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា និងប្រសាសន៍ដឹកនាំ ដ៏ខ្ពង់ខ្ពស់ របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ដែលបានយកចិត្តទុក ដាក់ខ្ពស់ លើវិធានការទប់ស្កាត់ និងកាត់បន្ថយការបំពុលតំបន់ទឹកសាធារណៈ ដើម្បីការពារបរិស្ថាន និងការពារសុខភាពសាធារណៈ។

ដោយឡែក ក្នុងរយៈពេល២ឆ្នាំកន្លងមកនេះ អ្នកនាំពាក្យបានឱ្យដឹងទៀតថា ក្រុមការងារជំនាញក្រសួងបរិស្ថាន បានចុះពិនិត្យ តាមដាន និងវាយតម្លៃគុណភាពទឹកសាធារណៈ ចំនួន៥៤ទីតាំង ទឹកកខ្វក់សម្អាតរួចចំនួន ៩ទីតាំង និងតំបន់ងាយរងការបំពុលទឹក ចំនួន១២ទីតាំង នៅតាមរាជធានី-ខេត្តគោលដៅ ដោយសហការជាមួយមន្ទីរបរិស្ថាន រាជធានី ខេត្តទាំង២៥ និងបានដំណើរការស្ថានីយតាមដានគុណភាពទឹកស្វ័យប្រវត្តិកោះពេជ្រ ទន្លេចតុមុខ។

បើតាមអ្នកនាំពាក្យលទ្ធផលការវាយតម្លៃសន្ទស្សន៍គុណភាពទឹកជារួមគុណភាពទឹកសាធារណៈ និងតំបន់ងាយរងការបំពុលទឹក ស្ថិតក្នុងចំណាត់ថ្នាក់ល្អណាស់ និងល្អ និងដោយទ្បែកទឹកកខ្វក់សម្អាតរួចអនុលោមតាមស្តង់ដាបញ្ចេញចូលប្រភពទឹកសាធារណៈ។ ព្រមជាមួយគ្នានេះ ក្រុមការងារ បានចុះពិនិត្យ និងវាយតម្លៃការគ្រប់គ្រងសំណល់រាវ នៅទីតាំងស្នើសុំបញ្ចេញសំណល់រាវ ក្នុងរយៈពេល២ឆ្នាំកន្លងមកនេះ បានចំនួនសរុប ១.៥៤៩ក្រុមហ៊ុន (ឆ្នាំ២០២៣ ចំនួន៤៦៥  ឆ្នាំ២០២៤ ចំនួន៦៧១ និង ឆមាសទី១ ឆ្នាំ២០២៥ ចំនួន៤១៣) ដោយបានចេញលិខិតអនុញ្ញាតបញ្ចេញសំណល់រាវ ចំនួនសរុប ១.៥០៦ក្រុមហ៊ុន (ឆ្នាំ២០២៣ ចំនួន៤៥៦  ឆ្នាំ២០២៤ ចំនួន៦៥៨ និងឆ្នាំ២០២៥ ឆមាសទី១ ចំនួន៣៩២)៕

The post ៩ខែក្នុងឆ្នាំ២០២៥ ក្រសួងបរិស្ថានទប់ស្កាត់ទឹកកខ្វក់ប្រមាណ១៤លានម៉ែត្រគូប មិនឱ្យបំពុលប្រភពទឹកស្អាត appeared first on Kampuchea Thmey Daily.

លោករដ្ឋមន្ត្រីបរិស្ថាន ដាក់ចេញបទបញ្ជាបែបនេះ បន្ទាប់ពីមន្រ្តីជំនាញនៃមន្ទីរបរិស្ថានខេត្តប៉ៃលិន សហការជាមួយអាជ្ញាធរពាក់ព័ន្ធ រកឃើញ  រោងចក្រកែច្នៃដំណាប់ស្វាយ មានទីតាំងស្ថិតនៅតាមបណ្តោយផ្លូវជាតិលេខ៥៧ ភូមិអូររអិល ឃុំស្ទឹងកាច់ ស្រុកសាលាក្រៅ ខេត្តប៉ៃលិន បញ្ចេញសំណល់រាវមិនត្រឹមត្រូវតាមច្បាប់ ប៉ះពាល់ដល់ប្រភពលូទឹកសាធារណៈ និងបង្កឱ្យត្រីងាប់ជាច្រើន ក្នុងអូរធម្មជាតិក្បាលឡាន នៅក្បែរតំបន់រោងចក្រនោះ និងបណ្ដាលឱ្យប្រជាពលរដ្ឋចំនួន ៤៧គ្រួសារ ទទួលរងផលប៉ះពាល់ផ្ទាល់ និងខ្វះខាតទឹកប្រើប្រាស់។

កាលពីថ្ងៃទី១៦ ខែមីនា   តបតាមបទបញ្ជាក់របស់លោក អ៊ាង សុផល្លែត និងការអនុវត្តច្បាប់ បទដ្ឋានគតិយុត្តជាធរមានរបស់ព្រះរាជាណាចកម្ពុជា ក្រុមការងារជំនាញក្រសួងបរិស្ថាន សហការជាមួយមន្ទីរបរិស្ថានខេត្តប៉ៃលិន អាជ្ញាធរមូលដ្ឋាន និងប្រជាពលរដ្ឋ ព្រមទាំងអ្នកសារព័ត៌មាន ចុះដល់ទីតាំងផ្ទាល់ យកសំណាកទឹក នៅតាមទីតាំងមួយចំនួន និងអនុវត្តវិធានការច្បាប់ជាបន្ទាន់ ជៀសវាងបង្កផលប៉ះពាល់ដល់បរិស្ថាន សង្គម ជាពិសេសសុខភាព និងការរស់នៅរបស់ប្រជាពលរដ្ឋ។

អ្នកនាំពាក្យក្រសួងបរិស្ថាន ឱ្យដឹងថា  នៅក្នុងក្រមបរិស្ថាននិងធនធានធម្មជាតិ ដែលបានអនុម័តឱ្យប្រើប្រាស់នៅឆ្នាំ២០២៣ ត្រង់មាត្រា៨២៤ តម្រូវឱ្យក្រុមហ៊ុនផ្អាកសកម្មភាពផលិតកម្មជាបណ្តោះអាសន្ន ដើម្បីជៀសវាងការបង្ហូរសំណល់រាវ ចេញពីទីតាំងក្រុមហ៊ុន បង្កឱ្យមានការបំពុលបរិស្ថានជាបន្តទៀត។ មាត្រា៨២៩ និងមាត្រា៨៤៥ បានកំណត់ទោសទណ្ឌ ដែលត្រូវអនុវត្តចំពោះការមិនបំពេញកាតព្វកិច្ច ក្នុងការគ្រប់គ្រងសំណល់រឹង រាវ ទឹកកខ្វក់ សារធាតុបំពុល ស្របតាមបទដ្ឋាន/ស្តង់ដារបញ្ចេញ។ វិធានការណ៍ទាំងនោះរួមមាន ការពិន័យជាប្រាក់ និងទោសជាប់ពន្ធធានាគារ៕

The post រដ្ឋមន្រ្តីបរិស្ថានព្រមានបិទរោងចក្រកែច្នៃដំណាប់ស្វាយនៅប៉ៃលិន បើមិនឈប់បង្ហូរសំណល់រាវចូលប្រភពទឹកសាធារណៈ appeared first on Kampuchea Thmey Daily.

លោករដ្ឋមន្ត្រីក្រសួងបរិស្ថាន ក៏ប្រាប់ឱ្យមន្ត្រីក្រសួងបរិស្ថាន ត្រូវដឹងខ្លួនថា ខ្លួនមានតួនាទីធ្វើការដើម្បីបម្រើ ការពារសុខភាពពលរដ្ឋនៅទូទាំងប្រទេសកម្ពុជា មិនមែនធ្វើការដើម្បីតែប្រយោជន៍ផ្ទាល់ខ្លួន រហូតបណ្ដាលឱ្យពលរដ្ឋរងគ្រោះថ្នាក់ដល់អាយុជីវិតឡើយ។

លោក អ៊ាង សុផល្លែត សម្ដែងការខកចិត្តដូច្នេះ ៖« កាលពីពីរសប្ដាហ៍មុន ចាប់បានរោងចក្រមួយ(ដែលបំពុលទឹក) អ្វីដែលជាការខកចិត្តរបស់ខ្ញុំ គឺចាប់បានហើយ ប៉ុន្តែឡាបូធ្វើតេស្តទឹកហ្នឹងចង់១អាទិត្យមិនទាន់ចេញ(លទ្ធផលនៃការបំពុល) មិនដឹងហេតុអ្វី? ទម្រាំចេញ(លទ្ធផល) មក ទឹកហ្នឹងស្អាតអស់ហើយ ថ្លាអស់ហើយ មិនបាប់ទៅចាប់គេទេ។ មើលឡើងវិញៗ អ្នកឯងធ្វើការគឺបម្រើប្រជាជន១៧លាននាក់ មិនមែនអ្នកឯងធ្វើការដើម្បីបម្រើផលប្រយោជន៍ខ្លួនឯងនោះទេ គិតសារដើមឡើងវិញជាបន្ទាន់! បើបងប្អូនយើងប្រើទឹកហ្នឹងទៅ​ ពុលគាត់ ឈឺគាត់ អាយុជីវិតគាត់ លោកឯងអង្គុយធ្វើការនៅក្នុងការិយាល័យ លោកឯងមិនដឹងទេ ប៉ុន្តែឳពុកម្ដាយគេ ទឹកភ្នែកប៉ុណ្ណា​ ឈឺចាប់ប៉ុណ្ណា »។

ក្រោយចប់ពិធីបើកកិច្ចប្រជុំ រដ្ឋមន្ត្រីក្រសួងបរិស្ថាន ប្រាប់ក្រុមអ្នកសារព័ត៌មានថា គិតមកទល់បច្ចុប្បន្ននេះ ក្រសួងរកឃើញថា ក្រុមហ៊ុនជាង១រយ បានបំពុលបរិស្ថាន ដោយក្នុងនោះក្រសួងបានណែនាំឱ្យរៀបចំអាងប្រព្រឹត្តិកម្ម សម្រាប់ក្រុមហ៊ុនដែលបំពុលតិចតួច និងពិន័យក្រុមហ៊ុន និងឈានដល់បិទទ្វារក្រុមហ៊ុនដែលបំពុលធ្ងន់ធ្ងររហូតដល់បណ្ដាលឱ្យជីវៈចម្រុះងាប់ និងប៉ះពាល់ខ្លាំងដល់ការរស់នៅរបស់ពលរដ្ឋ។

រដ្ឋមន្ត្រី អ៊ាង សុផល្លែត ចាត់ទុកថា នៅក្នុងនីតិកាលទី៧ ក្រសួងបរិស្ថាន ចាត់វិធានការលើក្រុមហ៊ុនដែលបំពុលទឹក បានទាន់ពេលវេលាល្អ។

កាលពីចុងខែកុម្ភៈ  រដ្ឋមន្ត្រីក្រសួងបរិស្ថាន ព្រមានមិនឱ្យមន្ត្រីនាយកដ្ឋានវាយតម្លៃហេតុប៉ះពាល់បរិស្ថាន យកតួនាទីការងារនេះ ទៅយកលុយពីក្រុមហ៊ុននានាឡើយ។​ លោក ក៏អះអាងថា   ក្នុងឆ្នាំទី១ នៃនីតិកាលទី៧ នៃរដ្ឋសភា លោកព្រមានបណ្ដេញមន្ត្រីដែលប្រព្រឹត្តកំហុសចំនួន៥ដងចេញពីក្របខណ្ឌក្រសួង ប៉ុន្តែចូលដល់ឆ្នាំទី២ លោកនឹងបណ្ដេញចេញរាល់មន្ត្រីណា ដែលប្រព្រឹត្តកំហុសឆ្គងធ្ងន់ធ្ងរលើសពី៣ដងចេញពីក្របខណ្ឌក្រសួងបរិស្ថាន។

កាលណោះលោក អ៊ាង សុផល្លែត ក៏ក្រើនរំលឹកមន្ត្រីនៃក្រសួងបរិស្ថានថា កុំដើម្បីតែលុយបន្តិចបន្តួចបានមកពីការសូកប៉ាន់របស់ក្រុមហ៊ុនខិលខូចមួយចំនួនដែលលួចបង្ហូរកាកសំំណល់រាវចូលក្នុងប្រភពទឹកបំពុលទឹក បំពុលបរិស្ថាន សុខចិត្តធ្មេចភ្នែកមិនមើលពលរដ្ឋរងគ្រោះថ្នាក់ពីការបំពុលប្រភពទឹករហូតប៉ះពាល់ដល់អាយុជីវិត៕

The post រដ្ឋមន្ត្រីបរិស្ថានខកចិត្ត ព្រោះចាប់បានរោងចក្របង្ហូរទឹកកខ្វក់ចូលស្ទឹង តែមន្ត្រីធ្វើការយឺតរហូតខូចការណ៍ធំ appeared first on Kampuchea Thmey Daily.

ក្រុមការងារអធិការកិច្ច នៃក្រសួងបរិស្ថាន ចាប់ដៃជាមួយមន្ទីរបរិស្ថានខេត្តព្រះសីហនុ និងអាជ្ញាធរក្នុងឃុំកែវផុស ស្រុកព្រៃនប់ ខេត្តព្រះសីហនុ នៅថ្ងៃទី២៦-២៧ ខែកុម្ភៈ ឆ្នាំ២០២៥  បានចុះត្រួតពិនិត្យករណីក្រុមហ៊ុនកែច្នៃស្បែក CS TAN CO., LTD. បូមបង្ហូរសំណល់រាវចូលសមុទ្រ ដែលមានទីតាំងនៅភូមិឫទ្ធី១ ឃុំកែវផុស ស្រុកស្ទឹងហាវ ខេត្តព្រះសីហនុ។

យោងតាមការអះអាងរបស់អាជ្ញាធរឃុំកែវផុស អាជ្ញាធរបានទទួលការត្អូញត្អែពីប្រជាពលរដ្ឋថាបានរងផលដោយការបង្ហូរសំណល់រាវរបស់ក្រុមហ៊ុន CS TAN CO., LTD. ដោយបានបញ្ជាក់ថាបណ្តាលឱ្យរមាស់ និងធ្វើឱ្យប៉ះពាល់លើផលនេសាទ និងជះឥទ្ធិពលដល់ជីវភាពរស់នៅយ៉ាងខ្លាំង។

ក្រុមការងារក្រសួងបរិស្ថានបានចុះពិនិត្យទីតាំងផលិតកម្ម ព្រមទាំងការគ្រប់គ្រងសំណល់រាវដោយពិនិត្យឃើញថាក្រុមហ៊ុនបានបង្ហូរសំណល់រាវដោយផ្ទាល់តាមប្រព័ន្ធលូចូលទៅស្រះស្តុក (៤ស្រះបន្តបន្ទាប់គ្នា) ដោយមិនបានឆ្លងកាត់ប្រព័ន្ធប្រព្រឹត្តិកម្ម។ មានការបង្កប់ទុយោជ័រ ភ្ជាប់ពីស្រះស្តុកទៅកាន់ព្រែកកន្លង់ចម្ងាយប្រមាណ៧០០ម៉ែត្រ។

ក្រុមការងារក្រសួងបរិស្ថានបានរកឃើញថា ក្រុមហ៊ុនបានប្រើម៉ាស៊ីនបូមទឹកចំនួន ៨គ្រឿង ដើម្បីបូមសំណល់រាវពីព្រែកកន្លង់ទៅកាន់ប្រឡាយជីកថ្មីដើម្បីបង្ហូរបន្តទៅកាន់សមុទ្រដោយផ្ទាល់ ដោយមានគ្របមែកឈើពីលើដើម្បីលាក់បាំង។ ចម្ងាយពីព្រែកកន្លង់ (ទីតាំងបូមសំណល់រាវ) ទៅកាន់សមុទ្រមានប្រវែងប្រមាណ ៣០០ម៉ែត្រ។ 

នៅចំពោះមុខមន្ត្រីជំនាញ ក្រុមហ៊ុនកែច្នៃស្បែកទទួលស្គាល់កំហុសដូចអ្វីដែលក្រុមការងារក្រសួងបរិស្ថានបានរកឃើញ ពិសេសការបូមសំណល់រាវបង្ហូរចូលសមុទ្រដោយមិនមានឆ្លងកាត់ការសម្អាតជាមុន និងមិនមានការអនុញ្ញាត។

សម្រាប់វិធានការបន្ទាន់ ក្រុមការងារបានតម្រូវឱ្យក្រុមហ៊ុនបញ្ឈប់សកម្មភាពបូមបង្ហូរសំណល់រាវទៅកាន់សមុទ្រ រហូតរៀបចំប្រព័ន្ធប្រព្រឹត្តិកម្មរួចរាល់និងទទួលបានការអនុញ្ញាតពីក្រសួងបរិស្ថាន និងបានយកសំណាកទឹកចំនួន៥ទីតាំងដើម្បីធ្វើការវិភាគ និងវាយតម្លៃដោយប្រៀបធៀបនឹងកម្រិតកំណត់ស្តង់ដារដែលមានស្រាប់ និងដើម្បីរៀបចំនីតិវិធីបន្ត។

ក្រុមការងារបានបញ្ជាក់ប្រាប់ក្រុមហ៊នដោយផ្ទាល់ថា ការបំពុលទឹកដោយធ្វើឱ្យប៉ះពាល់ដល់បរិស្ថាន ជីវៈចម្រុះ និងសុខភាពសាធារណៈ គឺជាការល្មើសទៅនឹងមាត្រា២៨៧ និងមាត្រា៦៩៤ នៃក្រមបរិស្ថាននិងធនធានធម្មជាតិ ព្រមទាំងល្មើសនឹង មាត្រា៤ និង មាត្រា៦ និងមាត្រា៩ថ្មី នៃអនុក្រឹត្យស្តីពីការត្រួតពិនិត្យការបំពុលទឹក និងប្រការ៨ នៃកិច្ចសន្យាការពារបរិស្ថាន។

ក្រមបរិស្ថាននិងធនធានធម្មជាតិ ត្រង់មាត្រា ៨៤៥ បានចែងពីការមិនអុវត្តកតាព្វកិច្ចក្នុងការគ្រប់គ្រងសំណល់រាវ និងទឹកកខ្វក់ ត្រូវផ្តន្ទាទោសដាក់ពន្ធនាគារ និងពិន័យជាប្រាក់ផងដែរ។ ហើយការបង្ហូរដោយប៉ះពាល់ដល់បរិស្ថាន ជីវចម្រុះ ឬ សុខភាពសាធារណៈ ត្រូវផ្តន្ទាទោសដាក់ពន្ធនាគារពី១ឆ្នាំ ទៅ៥ឆ្នាំ និងពិន័យជាប្រាក់តាមទំហំប៉ះពាល់បរិស្ថានជាក់ស្តែង។ នេះនៅមិនទាន់គិតទោសទណ្ឌផ្សេងទៀតដែលនឹងរកឃើញតាមនីតិវិធីបន្ត។

ក្រសួងបរិស្ថាន អគុណទៅដល់ប្រជាពលរដ្ឋ រស់នៅក្បែរទីតាំងនេះ បានជួយផ្តល់ព័ត៌មានទាន់ពេលហើយក្រសួងបរិស្ថាននិងធ្វើការអនុវត្តន៍វិធានការច្បាប់យ៉ាងតឹងរឹងដោយគ្មានការលើកលែង៕

The post ក្រសួងបរិស្ថានរកឃើញរោងចក្រកែច្នៃស្បែកនៅព្រះសីហនុ បង្ហូរទឹកកខ្វក់ និងសារធាតុខ្លាញ់ចូលសមុទ្រ ប៉ះពាល់ពលរដ្ឋ appeared first on Kampuchea Thmey Daily.