ប្រច័ណ្ឌ Archives - Kampuchea Thmey Daily

កាប់សង្សារស្ទើរដាច់ជង្គង់ ដោយសារភ្លើងប្រច័ណ្ឌ និង ខឹងនាងសុំបែក

អ៊ិន ពិសី — Wed, 25 Dec 2024 01:50:29 +0000

យុវតីអាយុ ១៧ ឆ្នាំម្នាក់ ត្រូវសង្សារកាប់ ២ កាំបិតបុ័ងតោ ស្ទើរតែដាច់ជើង និងដាច់.ក រងរបួសធ្ងន់ ដោយសារតែរឿងប្រចណ្ឌ និងខឹងនាងសុំបែកគ្នា។

ហេតុការណ៍នេះបានកើតឡើងកាលពីវេលាម៉ោង ៤ និង ៣០ នាទីព្រឹក ថ្ងៃទី ២៥ ខែធ្នូ ឆ្នាំ ២០២៤ ស្ថិតតាមបណ្ដោយផ្លូវលេខ ១៣៦ ចំណុចខាងមុខម៉ាត 7 eleven ក្បែរផ្សារកណ្ដាល សង្កាត់ផ្សារកណ្ដាល ខណ្ឌដូនពេញ រាជធានីភ្នំពេញ។

តាមការបញ្ជាក់ពីយុវតីរងគ្រោះបានឲ្យដឹងថា រូបខ្លួន និងជនសង្ស័យ បានរស់នៅជាមួយគ្នារយៈពេលជិត ២ ឆ្នាំ ក្នុងនាមជាសង្សារ ហើយត្រូវបានឪពុកម្ដាយអនុញ្ញាតឲ្យនៅជាមួយគ្នាដូចប្តីប្រពន្ធ។ ចំពោះមូលហេតុធ្វើឲ្យជនសង្ស័យដែលជាសង្សារនោះយកកាំបិតបុ័ងតោមកកាប់រូបនាងចំនួន ២ កាំបិត ដោយសារតែនាងបានចាកចេញពីផ្ទះ និង សុំជនសង្ស័យបែកគ្នារស់នៅរៀងខ្លួន ដើម្បីត្រឡប់មកនៅជាមួយម្តាយ និងមើលថែម្តាយឈឺ។ មូលហេតុនេះ ទើបធ្វើឲ្យជនសង្ស័យជិះម៉ូតូ ១ គ្រឿង តាមមកដល់ផ្ទះម្តាយយុវតីនោះ ហើយយកកាំបិតបុ័ងតោកាប់ទៅលើរូបនាងចំនួន ២ កាំបិត ត្រូវក្បាលជង្គង់ស្ទើរដាច់ និង ក ពីក្រោយ ធ្ងន់ធ្ងរផងដែរ។ គោលបំណងគឺមកកាប់សម្លាប់តែម្ដង តែត្រូវបានជនបរទេសម្នាក់ ទៅជួយ ទើបធ្វើឲ្យជនសង្ស័យរត់គេចខ្លួនបាត់ទៅ។

ក្រោយពេលកើតហេតុកម្លាំងសមត្ថកិច្ចមូលដ្ឋាន បានចុះមកដល់ចំណុចទីតាំង ចំណែកយុវតីរងគ្រោះត្រូវបានបញ្ជូនទៅកាន់មន្ទីរពេទ្យ ដើម្បីសង្គ្រោះបន្ទាន់ភ្លាមៗ៕

អត្ថបទ ៖ រដ្ឋា

The post កាប់សង្សារស្ទើរដាច់ជង្គង់ ដោយសារភ្លើងប្រច័ណ្ឌ និង ខឹងនាងសុំបែក appeared first on Kampuchea Thmey Daily.

ឆែកទូរសព្ទប្រពន្ធ ឃើញអតីតសង្សារឆាតមក កើតចិត្តប្រច័ណ្ឌ អុកឡុកក្នុងគ្រួសារ ត្រូវបងប្អូនហៅសមត្ថកិច្ចអន្តរាគមន៍ភ្លាមៗ

អ៊ិន ពិសី — Tue, 10 Dec 2024 03:50:45 +0000

បុរសជាប្ដី បានឆែកទូរសព្ទប្រពន្ធ ឃើញអតីតសង្សារឆាតមកប្រពន្ធខ្លួន ក៏កើតចិត្តខឹង អុកឡុកក្នុងគ្រួសារ ត្រូវបងប្អូនជួយហៅសមត្ថកិច្ចមកអន្តរាគមន៍ភ្លាមៗ បង្កឲ្យមានការភ្ញាក់ផ្អើលកាលពីវេលាម៉ោង ១០ និង ២០ នាទី យប់ ថ្ងៃទី ៩ ខែធ្នូ ឆ្នាំ ២០២៤ នៅដីឡូត៍ ១ កន្លែង ស្ថិតនៅផ្លូវ ៣៣៧ កែងផ្លូវ ៥៩៨ សង្កាត់បឹងកក់ទី ២ ខណ្ឌទួលគោក រាជធានីភ្នំពេញ។

តាមប្រភពព័ត៌មានពីស្ត្រីជាប្រពន្ធបានឲ្យដឹងថា គាត់ និងប្តីរបស់គាត់ បានរៀបការអស់រយៈពេល ១១ ឆ្នាំ មកហើយ។ មុនពេលកើតហេតុ គាត់បានដេកលក់មួយភាំង ហើយក៏ស្រាប់តែប្តីគាត់មកអុកឡុកក្នុងគ្រួសារ ដោយចោទប្រកាន់ថា រូបគាត់មានសហាយជាមួយសង្សារចាស់។ ពេលនោះ គាត់(ប្រពន្ធ) បានបញ្ជាក់ប្រាប់ទៀតថា កាលពីប្រមាណជិត ១ ឆ្នាំមុន រូបគាត់ និងបុរស(អតីត) គឺធ្លាប់មានទំនាក់ទំនងជាមួយគ្នាតាមការឆាតពិតប្រាកដមែន គ្រាន់តែប្រើពាក្យសម្ដីអូន និងបងធម្មតា តែប៉ុណ្ណោះ តែប្តីគាត់ប្រច័ណ្ឌហួសហេតុពេក សូម្បីតែទូរសព្ទក៏មិនចង់ឲ្យគាត់ប្រើដែរ និងចង់ទៅធ្វើការជាជាងអ៊ុតសក់ក៏មិនឲ្យទៅ ទៅធ្វើការរោងចក្រក៏មិនព្រម។

ទាក់ទិនករណីនេះដែរ បុរសជាប្តី បាននិយាយរៀបរាប់ប្រាប់ថា នៅមុនកើតរឿងថ្មីៗ នេះ គឺប្រពន្ធគាត់បានឆាតជាមួយសង្សារចាស់ដែលធ្លាប់មានទំនាក់ទំនងជាមួយគ្នាកាលពីប្រមាណជិត ១ ឆ្នាំមុន ដោយប្រពន្ធគាត់និយាយទៅកាន់អតីតសង្សារចាស់សុទ្ធតែប្រើពាក្យ «អូន និងបង អូនដេកជាមួយគេ តែនឹកដល់បង» ហើយធ្លាប់សន្យាថាឈប់មានទំនាក់ទំនង តែនៅតែមាន។

ក្រោយពេលកើតហេតុ កម្លាំងសមត្ថកិច្ចនគរបាលប៉ុស្តិ៍ និង អាជ្ញាធរ បានមកសម្របសម្រួលភ្លាមៗ ថា បើរស់នៅជាមួយគ្នាកើត កុំឈ្លោះប្រកែកគ្នា និងកុំប្រច័ណ្ឌគ្នា តែបើរស់នៅជាមួយគ្នា មិនចុះសម្រុង ព្រឹកស្អែក អាចទៅលែងលះគ្នានៅសង្កាត់ ហើយកុំប្រើអំពើហិង្សាដាក់គ្នា វាជាបទល្មើសព្រហ្មទណ្ឌ៕

អត្ថបទ ៖ សំណាង

The post ឆែកទូរសព្ទប្រពន្ធ ឃើញអតីតសង្សារឆាតមក កើតចិត្តប្រច័ណ្ឌ អុកឡុកក្នុងគ្រួសារ ត្រូវបងប្អូនហៅសមត្ថកិច្ចអន្តរាគមន៍ភ្លាមៗ appeared first on Kampuchea Thmey Daily.

សង្ស័យប្រច័ណ្ឌ ប្ដីទាញប៉័ងតោកាប់ប្រពន្ធរបួសធ្ងន់ រួចគេចខ្លួនបាត់

អ៊ិន ពិសី — Fri, 26 Jul 2024 07:54:34 +0000

ស្ត្រីជាប្រពន្ធបានរងរបួស ក ធ្ងន់ធ្ងរ បន្ទាប់ពីប្ដីយកកាំបិតប៉័ងតោកាប់ រួចត្រូវបានសាច់ញាតិដឹកទៅសង្គ្រោះនៅឯមន្ទីរពេទ្យមិត្តភាពកម្ពុជា-ចិន ព្រះកុសុមៈ សង្ស័យរឿងប្រចណ្ឌ។

ហេតុការណ៍នេះបានកើតឡើងកាលពីវេលាម៉ោង ២ និង ១០ នាទី ឈានចូលថ្ងៃទី ២៦ ខែកក្កដា ២០២៤ ចំណុចផ្ទះជួលមួយកន្លែង ផ្លូវជាតិលេខ ៣ ភូមិព្រៃព្រីងខាងត្បូង ២ សង្កាត់ចោមចៅទី ៣ ខណ្ឌពោធិ៍សែនជ័យ រាជធានីភ្នំពេញ។

បើតាមប្រភពព័ត៌មាន បានឲ្យដឹងថា ជនបង្កជាប្ដី បានកាប់លើប្រពន្ធដោយកាំបិតបុ័ងតោចំ ក ខាងក្រោយ បណ្ដាលឲ្យរយះចេញឈាមធ្ងន់ធ្ងរ ភ្លាមៗ នោះ ត្រូវបានសាច់ញាតិបញ្ជូនជនរងគ្រោះទៅសង្គ្រោះនៅមន្ទីរពេទ្យមិត្តភាពកម្ពុជា-ចិន ព្រះកុសុមៈ។

ជនរងគ្រោះឈ្មោះ អ៊ិច សុម៉ាលី អាយុ ៣៦ ឆ្នាំ មុខរបរអ្នកអនាម័យ មានទីលំនៅបន្ទប់ជួលលេខ ៦៩ ភូមិព្រៃព្រីងខាងត្បូង ២ សង្កាត់ចោមចៅទី ៣ ខណ្ឌពោធិ៍សែនជ័យ រាជធានីភ្នំពេញ។ បច្ចុប្បន្នកំពុងសម្រាកព្យាបាលនៅមន្ទីរពេទ្យមិត្តភាពកម្ពុជា-ចិន ព្រះកុសុមៈ។ រីឯជនសង្ស័យឈ្មោះ សួន អឿង អាយុ ៦៤ ឆ្នាំ មុខរបរនៅផ្ទះ មានទីលំនៅបុរីពិភពថ្មី ផ្លូវជាតិលេខ ៣ គម្រោង ១ ផ្ទះលេខ ០៦ ផ្លូវ ១៥ សង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ(គេចខ្លួន)។

តាមប្រភពព័ត៌មានដដែល បញ្ជាក់ថា ស្ត្រីរងគ្រោះជាស្ត្រីមេម៉ាយ មានកូន ២ នាក់។ ជនដៃដល់ និងស្ត្រីខាងលើ បានរួមរស់ជាប្តីប្រពន្ធអស់រយៈពេល ៧ ឆ្នាំ ហើយ បានកូនម្នាក់ អាយុប្រហែល ៥ ឆ្នាំ។

បច្ចុប្បន្ន ជនសង្ស័យបានរត់គេចខ្លួន រីឯស្ត្រីរងគ្រោះកំពុងសម្រាកព្យាបាលនៅឯមន្ទីរពេទ្យ។ សមត្ថកិច្ច បានចុះទៅធ្វើកំណត់ហេតុនៅឯមន្ទីរពេទ្យ ដើម្បីកំណត់អត្តសញ្ញាណជនដៃដល់ ស្រាវជ្រាវចាប់យកមកផ្ដន្ទាទោសតាមច្បាប់៕

អត្ថបទ ៖ សំណាង

The post សង្ស័យប្រច័ណ្ឌ ប្ដីទាញប៉័ងតោកាប់ប្រពន្ធរបួសធ្ងន់ រួចគេចខ្លួនបាត់ appeared first on Kampuchea Thmey Daily.

កើតភ្លើងប្រច័ណ្ឌ បង្កជាហិង្សា ម្នាក់ចូលពេទ្យ ម្នាក់ដេកគុក

អ៊ិន ពិសី — Tue, 04 Apr 2023 01:51:32 +0000

បុរសម្នាក់ដែលជាប្ដី ត្រូវបានភាគីម្ខាងទៀតទាញកាំបិតកាប់ក្បាលបែកឈាមខ្ចាយ បន្ទាប់ពីមានការប្រច័ណ្ឌ ធ្វើឲ្យបុរសជាប្តីទៅធាក់លើជនបង្កមួយជើងដោយគ្មានហេតុផល។

យោងតាមរបាយការណ៍របស់សមត្ថកិច្ចបានបញ្ជាក់ថា ពួកគេទាំង ២ នាក់ រស់នៅក្នុងភូមិជាមួយគ្នា ដែលបុរសម្នាក់មានប្រពន្ធឈ្មោះ គង់ គឿន អាយុ ៣៤ ឆ្នាំ រីឯភាគីម្ខាងទៀត ជាជនសង្ស័យឈ្មោះ ហឿត សួន អាយុ ៣៥ ឆ្នាំ អ្នកទាំង ២ រស់នៅភូមិបឹងទឹម ឃុំតាប៉ុន ស្រុកសង្កែ ខេត្តបាត់ដំបង។

របាយការណ៍បានបន្តថា នៅពេលកើតហេតុ ថ្ងៃទី ០៣ ខែមេសា ឆ្នាំ ២០២៣ វេលាម៉ោង ១២ និង ៣០ នាទី ថ្ងៃត្រង់ មានករណីហិង្សាដោយចេតនា មានស្ថានទម្ងន់ទោស (យកកាំបិតកាប់) មួយ បានកើតឡើង ដោយសារតែជនទាំង ២ ទាស់ពាក្យសម្ដី។ ក្នុងនោះ ដោយសារតែបុរសមានប្រពន្ធ បានប្រច័ណ្ឌប្រពន្ធទៅលើបុរសម្នាក់ទៀត ទើបមានការឈ្លោះប្រកែកគ្នា។ បុរសជាប្តីបានធាក់គេមួយជើង ទើបធ្វើឲ្យភាគីម្ខាងទៀតផ្ទុះកំហឹង ស្ទុះទៅទាញកាំបិតកាប់ទៅលើក្បាល និងដៃតែម្ដង ហើយក៏គេចចេញពីកន្លែងកើតហេតុបាត់ទៅ។

ក្រោយពេលកើតហេតុភ្លាម កម្លាំង នៃអធិការដ្ឋាននគរបាលស្រុកសង្កែ បានសហការជាមួយកម្លាំងប៉ុស្តិ៍នគរបាលរដ្ឋបាលតាប៉ុន ចុះស្រាវជ្រាវស៊ើបអង្កេត រហូតឈានដល់ការឃាត់ខ្លួនជនសង្ស័យឈ្មោះ ហឿត សុន បាននៅវេលាម៉ោង ៤ ល្ងាច ថ្ងៃដដែល ដោយគេមិនបានរត់គេចទៅណាឆ្ងាយទេ។ បច្ចុប្បន្នករណីនេះ កម្លាំងកំពុងកសាងសំណុំរឿងបញ្ជូនតាមនីតិវិធីច្បាប់៕

អត្ថបទ ៖ សោ និយមរ័ត្ន

The post កើតភ្លើងប្រច័ណ្ឌ បង្កជាហិង្សា ម្នាក់ចូលពេទ្យ ម្នាក់ដេកគុក appeared first on Kampuchea Thmey Daily.

ភ្លើងប្រច័ណ្ឌ បុរសជាប្ដី យកញញួរវាយក្បាលប្រពន្ធស្លាប់យ៉ាងវេទនាបំផុត

អ៊ិន ពិសី — Fri, 03 Feb 2023 03:43:49 +0000

ភ្លើងប្រច័ណ្ឌ បុរសជាប្ដីម្នាក់ បានយកញញួរមកវាយក្បាលប្រពន្ធជាច្រើនដងលើសៀតផ្កា បណ្ដាលឲ្យប្រកាច់ស្លាប់យ៉ាងអាណោចអាធ័មក្នុងថ្លុកឈាមលើគ្រែពូកនៅបន្ទប់ជួល។

ក្រោយបង្កមនុស្សឃាតដោយចេតនារួច បុរសជាប្ដី រត់គេចខ្លួនប្រុងជិះទូកឡើងមកក្រុងព្រះសីហនុ តែត្រូវសមត្ថកិច្ចនគរបាលតាមចាប់ខ្លួនបានភ្លាមៗ ក្រោយរូបគេធ្វើសកម្មភាពរួចប្រហែលជិត ២ ម៉ោងនោះ។

ករណីមនុស្សឃាតប្ដីវាយសម្លាប់ប្រពន្ធកាលពីវេលាម៉ោងប្រមាណ ៨ យប់ ថ្ងៃទី ២ ខែកុម្ភៈ ឆ្នាំ ២០២៣ នេះ ស្ថិតនៅភូមិកោះតូច សង្កាត់កោះរ៉ុងសន្លឹម ខេត្តព្រះសីហនុ។

សមត្ថកិច្ចបានឲ្យដឹងថា ជនសង្ស័យឈ្មោះ ឆន ប៊ុនឈឿន ភេទប្រុស អាយុ ៤៥ ឆ្នាំ មុខរបរជាងធ្វើទូក រស់នៅភូមិកោះតូច សង្កាត់កោះរ៉ុងសន្លឹម ក្រុងកោះរ៉ុង ខេត្តព្រះសីហនុ(ប្ដី)។ ចំណែកជនរងគ្រោះដែលស្លាប់ឈ្មោះ ឡុង ស្រីឡាន ភេទស្រី អាយុ ៣៣ ឆ្នាំ(ប្រពន្ធ) មុខរបរអ្នករៀបបន្ទប់ រស់នៅភូមិកោះតូច សង្កាត់កោះរ៉ុងសន្លឹម ក្រុងកោះរ៉ុង ខេត្តព្រះសីហនុ។

សមត្ថកិច្ចបានបញ្ជាក់ថា ករណីប្រព្រឹត្តអំពើមនុស្សឃាតដោយចេតនានេះអាចផ្ដើមឡើងដោយសារភ្លើងប្រច័ណ្ឌ។ ក្នុងនោះ សមត្ថកិច្ច មិនបានបញ្ជាក់លំអិតថា ករណីជម្លោះស្នេហាត្រីកោណនេះ មានជាប់ពាក់ព័ន្ធជាមួយនឹងគូភាគីខាងណានោះទេ។

បច្ចុប្បន្ន ជនសង្ស័យ និងវត្ថុតាង(ញញួរដងឈើ) ត្រូវបានបញ្ជូនទៅស្នងការខេត្តព្រះសីហនុកាលពីវេលាម៉ោង ១១ និង ២០ នាទី ថ្ងៃខែដដែល ដោយអូប័ររបស់ក្រុមហ៊ុនលោកឧកញ៉ា ទៀ វិចិត្រ (GTVC)។ ចំពោះសាកសព ត្រូវបានរក្សាទុកកន្លែងកើតហេតុ រង់ចាំមន្ត្រីជំនាញធ្វើកោសល្យវិច័យ នឹងប្រគល់ជូនគ្រួសារសពយកទៅធ្វើបុណ្យតាមប្រពៃណី៕

អត្ថបទ ៖ ស៊ុយ ចាន់ធា

The post ភ្លើងប្រច័ណ្ឌ បុរសជាប្ដី យកញញួរវាយក្បាលប្រពន្ធស្លាប់យ៉ាងវេទនាបំផុត appeared first on Kampuchea Thmey Daily.

ជះទឹកអាស៊ីតដាក់ប្តីនៅភ្នំពេញ រត់មកខេត្តរតនគិរី ត្រូវសមត្ថកិច្ចស្រាវជ្រាវឃាត់ខ្លួន

Kang Tola — Fri, 02 Dec 2022 15:57:00 +0000

រតនគិរី ៖ ដោយសារតែភ្លើងប្រច័ណ្ឌ ស្ត្រីជះទឹកអាស៊ីតដាក់ប្ដីបណ្ដាលឲ្យរលៀកពេញរាងកាយ ហើយរត់គេចខ្លួនមកខេត្តរតនគិរី ត្រូវសមត្ថកិច្ចស្រាវជ្រាវឃាត់ខ្លួនបាន។

នៅថ្ងៃទី២ ខែធ្នូ ឆ្នាំ២០២២ ការិយាល័យព្រហ្មទណ្ឌ នៃស្នងការដ្ឋាននគរបាលខេត្តរតនគិរី សហការជាមួយកម្លាំងនគរបាលនាយកដ្ឋានព្រហ្មទណ្ឌក្រសួងមហាផ្ទៃ និងនគរបាលខណ្ឌព្រែកព្នៅ រាជធានីភ្នំពេញ ឃាត់ខ្លួនជនសង្ស័យម្នាក់ដែលមានឈ្មោះ ញ៉ ហន ភេទស្រី អាយុ ៣៧ឆ្នាំ នៅចំណុចផ្ទះម៉ាស្សាមួយកន្លែង ស្ថិតក្នុងភូមិភ្នំស្វាយ សង្កាត់បឹងកន្សែង ក្រុងបានលុង ខេត្តរតនគិរី ដោយស្ត្រីរូបនេះជាប់ពាក់ព័ន្ធករណីប្រើអំពើហិង្សា ដោយជះទឹកអាស៊ីតដាក់ប្តីរបស់ខ្លួន បណ្តាលឲ្យរងរបួសរលាកពេញខ្លួន។

បន្ទាប់ពីចាប់ខ្លួន ស្ត្រីរូបនោះត្រូវបានសមត្ថកិច្ចសហការប្រគល់ខ្លួនឲ្យទៅនគរបាលខណ្ឌព្រែកព្នៅ នាំខ្លួនទៅកាន់រាជធានីភ្នំពេញ ដើម្បីបន្តនីតិវិធីកសាងសំណុំរឿងបញ្ជូនទៅតុលាការចាត់តាមផ្លូវច្បាប់។

សូមបញ្ជាក់ថា ស្ត្រីជនសង្ស័យនេះ បានប្រើប្រាស់ទឹកអាស៊ីតជះដាក់ប្តី ដែលប្រព្រឹត្តកាលពីល្ងាចថ្ងៃទី២៦ ខែវិច្ឆិកា ឆ្នាំ២០២២ នៅចំណុចស្ពានលីយ៉ុងផាត់ ស្ថិតក្នុងភូមិកណ្ដាល សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ បណ្តាលឲ្យរលាកពេញខ្លួនដោយសារតែភ្លើងប្រច័ណ្ឌហើយរត់គេច ខ្លួនចេញពីផ្ទះនៅរាជធានីភ្នំពេញ មកលាក់ខ្លួននៅក្រុងបានលុង ខេត្តរតនគិរី។

ក្រោយពីនគរបាលការិយាល័យព្រហ្មទណ្ឌ ស្នងការខេត្តរតនគិរី ប្រគល់ខ្លួនជនសង្ស័យ ជូនកម្លាំងនគរបាលខណ្ឌព្រែកព្នៅ រាជធានីភ្នំពេញ និងនគរបាលព្រហ្មទណ្ឌ នាយកដ្ឋានក្រសួងមហាផ្ទៃ។ ជនសង្ស័យស្ត្រីរូបនោះ ក៏ត្រូវបានបញ្ជូនខ្លួនទៅភ្នំពេញវិញនៅថ្ងៃទី២ ខែធ្នូ ឆ្នាំ២០២២ ផងដែរ៕

ដោយ ៖ វុទ្ធឦសាន

The post ជះទឹកអាស៊ីតដាក់ប្តីនៅភ្នំពេញ រត់មកខេត្តរតនគិរី ត្រូវសមត្ថកិច្ចស្រាវជ្រាវឃាត់ខ្លួន appeared first on Kampuchea Thmey Daily.

ស្ត្រីខ្មែរម្នាក់ ត្រូវអតីតស្វាមីជនជាតិថៃ ចាក់សម្លាប់ដោយសារភ្លើងប្រច័ណ្ឌ

Sorn Phanith — Sun, 10 Apr 2022 01:35:05 +0000

ស្ត្រីខ្មែរម្នាក់ ដែលបម្រើការងារនៅកណ្តាលខេត្តសមុទ្រប្រាកាន ត្រូវអតីតស្វាមីដែលជាជនជាតិថៃ មកតាមរករឿងដល់កន្លែងធ្វើការ ព្រមទាំងបានដកកូនកាំបិតចាក់សម្លាប់ បន្ទាប់ពីតាមសុំត្រូវរ៉ូវគ្នាវិញតែមិនបានសម្រេច។ ហេតុការដ៏រន្ធត់នេះ បានកើតឡើង កាលពីថ្ងៃទី ៩ ខែមេសា ឆ្នាំ ២០២២ វេលាម៉ោង ១១ និង៣០ នាទី ថ្ងៃត្រង់ នៅក្នុងហាងលក់ដូរមួយកន្លែង ក្នុងខេត្តសមុទ្រប្រាកាន ប្រទេសថៃ។

បើតាមការលើកឡើងពីសាក្សីដែលបានឃើញហេតុការណ៍ផ្ទាល់ភ្នែកបាននិយាយថា នៅមុនពេលកើតហេតុ គឺបុរសដែលជាអតីតស្វាមី (ជនជាតិថៃ) បានចូលមកដល់កន្លែងគិតលុយ ដែលជាកន្លែងស្ត្រីរងគ្រោះកំពុងអង្គុយធ្វើការ ដោយបាននិយាយចរចាសុំជាគ្នាវិញបន្ទាប់ពីបានបែកបាក់គ្នាជាច្រើនខែរួចមក។ សាក្សីបានបន្តថា នៅពេលនោះដែរ គេឃើញភាគីស្ត្រីរងគ្រោះបានព្យាយាមដើរចេញ ប៉ុន្តែខាងប្រុសបានដេញតាមដល់កណ្តាលហាងបានដកកូនកាំបិតពីចង្កេះចាក់ទៅលើស្ត្រីរងគ្រោះជាច្រើនកាំបិត ទើបសាក្សីដាច់ចិត្តហៅបុរសម្នាក់ទៀតដែលនៅក្នុងហាងចូលទៅចាប់បុរសជាប្តីប្រគល់ឲ្យសមត្ថកិច្ចតែម្តង។

គួរបញ្ជាក់ថា ស្ត្រីរងគ្រោះមានឈ្មោះ ណុប ណារី អាយុ ៣៤ ឆ្នាំ ជាជនជាតិខ្មែរ ជាស្ត្រីមេម៉ាយកូន៤នាក់ ចូលទៅបម្រើការងារក្នុងប្រទេសថៃដោយស្របច្បាប់ ជាមួយនិងកូន រួមនិងប្អូនប្រុសម្នាក់ផង បានរយៈពេលជាង ១ ឆ្នាំមកហើយ ដោយបានគ្នាជាមួយជនជាតិថៃឈ្មោះ វ៉ាន់ ឈុំភូមឿង អាយុ ៣១ ឆ្នាំ បានគ្នាក្នុងរយពេលខ្លី ហើយការសុំបែកពីស្ត្រីរងគ្រោះដោយសារតែខាងប្រុសផឹកស្រាជាប្រចាំ និងប្រើប្រាស់គ្រឿងញៀន ក្រោយមកម្នាក់ៗក៏មានដៃគូថ្មីរៀងៗខ្លួន ប៉ុន្តែខាងប្រុសនៅតែព្យាយាមទូរស័ព្ទទៅគំរាមនាងមិនឲ្យមានអ្នកថ្មីជាដាច់ខាត។ នៅចំពោះមុខសមត្ថកិច្ចថៃ ជនសង្ស័យបានសារភាពថា ខ្លួននៅតែស្រលាញ់នាងបើទោះបីជាបច្ចុប្បន្នខ្លួនមានដៃគូថ្មីក៏ដោយ លុះនៅពេលឮដំណឹងថា នាងមានអ្នកថ្មីដែលជាមនុស្សខ្លួនធ្លាប់ស្គាល់ទៀត ទើបមានការខឹងតែម្តង ហើយក៏បានទៅទិញស្រា ១ ដបមកផឹក រួចយកកូនកាំបិតសៀតចង្កេះទៅរកនាងតែម្តង ឯការបែកបាក់គ្នា គឺដោយសារតែខ្លួនប្រើប្រាស់គ្រឿងញៀនផង និងផឹកស្រាជាប្រចាំផង។

នៅពេលនោះដែរសមត្ថកិច្ចបានវាស់ជាតិអាល់កុលទៅលើជនសង្ស័យ គឺមានកម្រិត ១១២ មីល្លីក្រាម ក្នុង ១ លីត្រខ្យល់ ព្រមទាំងបាននាំខ្លួនទៅកាន់ស្នងការដ្ឋានដើម្បីសាកសួរ រួមជាមួយនិងកូនកាំបិតចុងស្រួច ដងខ្មៅប្រវែង ៣០ cm ទៅជាមួយផង ដើម្បីអនុវត្តតាមផ្លូវច្បាប់៕

អត្ថបទ៖ សោ និយមរ័ត្ន

The post ស្ត្រីខ្មែរម្នាក់ ត្រូវអតីតស្វាមីជនជាតិថៃ ចាក់សម្លាប់ដោយសារភ្លើងប្រច័ណ្ឌ appeared first on Kampuchea Thmey Daily.

ផ្ដន្ទាទោសប្ដី ជាប់ពន្ធនាគារ ១០ ឆ្នាំ ករណីជះទឹកអាស៊ីតដាក់ប្រពន្ធ

Sorn Phanith — Wed, 12 Jan 2022 07:42:31 +0000

ប្ដីកំណាចម្នាក់ ដែលបានជះទឹកអាស៊ីតដាក់ប្រពន្ធ បណ្ដាលឲ្យរលេះរលួយពេញផ្ទៃមុខ ដោយសារភ្លើងប្រច័ណ្ឌ ត្រូវបានចៅក្រមសាលាដំបូងរាជធានីភ្នំពេញ ប្រកាសសាលក្រមសម្រេចផ្ដន្ទាទោសដាក់ពន្ធនាគារកំណត់ ១០ ឆ្នាំ ក្រោមការចោទប្រកាន់ពីបទ « ទារុណកម្ម និងអំពើឃោរឃៅដោយប្រើទឹកអាស៊ីតខ្លាំង » ។

ជនជាប់ចោទជាប្ដីកំណាចឈ្មោះ ហេង ចាន់ឌី អាយុ ៤៣ ឆ្នាំ មានមុខរបរជាអ្នករត់ម៉ូតូឌុប មានទីលំនៅភូមិ ២ ឃុំកំពង់ទ្រាស ស្រុកក្រូចឆ្មារ ខេត្តត្បូងឃ្មុំ។ តាមអង្គហេតុនៃរឿងជននេះ បានចុះចោលប្រពន្ធទៅមានស្រីថ្មីរយៈពេល ៥ ឆ្នាំមកហើយ បន្ទាប់មកបានមកសុំរួមរស់ជាមួយប្រពន្ធវិញ ប៉ុន្តែប្រពន្ធមិនព្រមទើបធ្វើឲ្យមានអំពើឃោរឃៅកើតឡើង ។

ដោយនៅយប់ថ្ងៃទី ២៨ ខែមីនា ឆ្នាំ ២០២០ ខណៈដែលជនរងគ្រោះ ឈ្មោះ លី រ៉ានី ដើរចេញពីយាមរោងចក្រទៅក្បែរជណ្ដើរផ្ទះជួល ដែលគាត់ស្នាក់នៅ ក្នុងភូមិត្រពាំងថ្លឹង១ សង្កាត់ចោមចៅទី១ ខណ្ឌពោធិ៍សែនជ័យ ប្ដីនោះក៏បានធ្វើសកម្មភាពជះទឹកអាស៊ីតដាក់ បណ្ដាលឲ្យរងរបួសធ្ងន់ធ្ងរពេញផ្ទៃមុខនិងខ្លួនប្រាណ។

ក្រោយមកសមត្ថកិច្ចបានតាមទៅចាប់ខ្លួនជនកំណាចនោះ ដល់ខេត្តកំពង់ចាមដាក់ឃុំខ្លួនរហូតដល់ថ្ងៃទី ២៨ ខែធ្នូ ឆ្នាំ ២០២១ ទើបបើកសវនាការកាត់ទោស និងប្រកាសសាលក្រមផ្ដន្ទាទោសនៅថ្ងៃទី ១២ ខែមករា ឆ្នាំ ២០២២ នេះ៕

អត្ថបទ៖ មករា

The post ផ្ដន្ទាទោសប្ដី ជាប់ពន្ធនាគារ ១០ ឆ្នាំ ករណីជះទឹកអាស៊ីតដាក់ប្រពន្ធ appeared first on Kampuchea Thmey Daily.