សន្តិសុខសង្គម

ផ្ដន្ទាទោសប្ដី ជាប់ពន្ធនាគារ ១០ ឆ្នាំ ករណីជះទឹកអាស៊ីតដាក់ប្រពន្ធ

បានផុស

៨ ខែ មុន

នៅ

ថ្ងៃពុធ ១២ មករា ២០២២

ដោយ

ប្ដីកំណាចម្នាក់ ដែលបានជះទឹកអាស៊ីតដាក់ប្រពន្ធ បណ្ដាលឲ្យរលេះរលួយពេញផ្ទៃមុខ ដោយសារភ្លើងប្រច័ណ្ឌ ត្រូវបានចៅក្រមសាលាដំបូងរាជធានីភ្នំពេញ ប្រកាសសាលក្រមសម្រេចផ្ដន្ទាទោសដាក់ពន្ធនាគារកំណត់ ១០ ឆ្នាំ ក្រោមការចោទប្រកាន់ពីបទ « ទារុណកម្ម និងអំពើឃោរឃៅដោយប្រើទឹកអាស៊ីតខ្លាំង » ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជនជាប់ចោទជាប្ដីកំណាចឈ្មោះ ហេង ចាន់ឌី អាយុ ៤៣ ឆ្នាំ មានមុខរបរជាអ្នករត់ម៉ូតូឌុប មានទីលំនៅភូមិ ២ ឃុំកំពង់ទ្រាស ស្រុកក្រូចឆ្មារ ខេត្តត្បូងឃ្មុំ។ តាមអង្គហេតុនៃរឿងជននេះ បានចុះចោលប្រពន្ធទៅមានស្រីថ្មីរយៈពេល ៥ ឆ្នាំមកហើយ បន្ទាប់មកបានមកសុំរួមរស់ជាមួយប្រពន្ធវិញ ប៉ុន្តែប្រពន្ធមិនព្រមទើបធ្វើឲ្យមានអំពើឃោរឃៅកើតឡើង ។

ដោយនៅយប់ថ្ងៃទី ២៨ ខែមីនា ឆ្នាំ ២០២០ ខណៈដែលជនរងគ្រោះ ឈ្មោះ លី រ៉ានី ដើរចេញពីយាមរោងចក្រទៅក្បែរជណ្ដើរផ្ទះជួល ដែលគាត់ស្នាក់នៅ ក្នុងភូមិត្រពាំងថ្លឹង១ សង្កាត់ចោមចៅទី១ ខណ្ឌពោធិ៍សែនជ័យ ប្ដីនោះក៏បានធ្វើសកម្មភាពជះទឹកអាស៊ីតដាក់ បណ្ដាលឲ្យរងរបួសធ្ងន់ធ្ងរពេញផ្ទៃមុខនិងខ្លួនប្រាណ។

ក្រោយមកសមត្ថកិច្ចបានតាមទៅចាប់ខ្លួនជនកំណាចនោះ ដល់ខេត្តកំពង់ចាមដាក់ឃុំខ្លួនរហូតដល់ថ្ងៃទី ២៨ ខែធ្នូ ឆ្នាំ ២០២១ ទើបបើកសវនាការកាត់ទោស និងប្រកាសសាលក្រមផ្ដន្ទាទោសនៅថ្ងៃទី ១២ ខែមករា ឆ្នាំ ២០២២ នេះ៕

អត្ថបទ៖ មករា