ការណែនាំនេះ ធ្វើឡើងក្នុងឱកាសលោករដ្ឋមន្ត្រី ដឹកនាំកិច្ចប្រជុំពង្រឹងគុណភាពនៃការបម្រើសេវាសុខាភិបាល នៅគ្រប់កម្រិតមណ្ឌលសុខភាព ដល់មន្ទីរពេទ្យជាតិ ខេត្ត ស្រុក ដែលមានការអញ្ជើញចូលរួមដោយផ្ទាល់ពីថ្នាក់ដឹកនាំក្រសួង មន្ទីរពេទ្យជាតិ និងតាមប្រព័ន្ធ Zoom មន្ទីរសុខាភិបាលនៃរដ្ឋបាលខេត្ត កាលពីរសៀលទី១៦ ខែមិថុនា ឆ្នាំ២០២៥ នៅទីស្តីការក្រសួងសុខាភិបាល។

បន្ថែមពីនេះ ថ្នាក់ដឹកនាំក្រសួង មន្ទីរពេទ្យជាតិ និងមន្ទីរសុខាភិបាលខេត្ត ត្រូវត្រៀមលក្ខណៈឱ្យបានល្អ ដោយត្រូវរៀបចំផែនការ និងសហការជាមួយស្ថាប័ន អង្គភាពពាក់ព័ន្ធ ដើម្បីធានាឱ្យបានសេវាថែទាំសុខភាពសាធារណៈជូនប្រជាពលរដ្ឋ ជាពិសេសនៅតាមតំបន់ព្រំដែន ប្រកបដោយគុណភាព ប្រសិទ្ធភាព និងសមធម៌។ ព្រមទាំង ត្រៀមលក្ខណៈក្នុងការគាំទ្រដល់ប្រជាពលរដ្ឋ ដែលត្រូវធ្វើការចល័តទីតាំង ទៅទីកន្លែងមានសុវត្ថិភាព ដោយត្រៀមរៀបចំនូវស្បៀងអាហារ ឱសថ ទឹកស្អាត មុង ក្រមា និងសម្ភារ ឱសថប្រើប្រាស់សំខាន់ ជាពិសេសជំងឺឆ្លងផ្សេងៗ។

ត្រូវពង្រឹង និងយកចិត្តទុកដាក់បន្ថែមទៀត នូវការបម្រើសេវាពិនិត្យ និងព្យាបាល នៅតាមមន្ទីរពេទ្យខេត្ត និងមន្ទីរពេទ្យបង្អែកស្រុក ជាពិសេសនៅតាមតំបន់ព្រំដែន។ ធ្វើការសហការជាមួយមន្រ្តីរដ្ឋបាលរាជធានី ខេត្ត គ្រប់លំដាប់ថ្នាក់ក្នុងគោលបំណងធ្វើកិច្ចសហប្រតិបត្តិការរួមគ្នាដោយស្មារតីសាមគ្គី។ រក្សានូវការទំនាក់ទំនងគ្នា និងផ្តល់ព័ត៌មានជូនក្រុមការងារឱ្យបានជាប់ជានិច្ច ដើម្បីទទួលបានកិច្ចអន្តរាគមន៍ទាន់ពេលវេលា នៅពេលចាំបាច់។ រៀបចំផែនការសកម្មភាព និងបត់បែនទៅតាមសភាពការជាក់ស្តែង ស្របតាមពេលវេលា និងធនធានដែលមាន ដើម្បីឱ្យការងារកាន់តែមានប្រសិទ្ធភាព។

លើសពីនេះ នៅតាមមន្ទីរពេទ្យជាតិ និងមន្ទីរពេទ្យបង្អែកស្រុក ខេត្ត ត្រូវត្រៀមនូវការសង្រ្គោះបន្ទាន់ គ្រូពេទ្យប្រចាំការ ការរៀបចំសម្ភារបរិក្ខារពេទ្យ ការផ្គត់ផ្គង់ឱសថ និងឈាម សម្រាប់ត្រៀមក្នុងជួយសង្រ្គោះអាយុជីវិត ក្នុងករណីមានការកើតឡើងមួយជាយថាហេតុ ដើម្បីធានាការបម្រើសេវាសុខាភិបាលដល់ប្រជាជន និងពលករដោយការយកចិត្តទុកដាក់ខ្ពស់៕

The post រដ្ឋមន្ត្រីសុខាភិបាល ណែនាំដល់មន្ទីរសុខាភិបាលរាជធានី-ខេត្ត ត្រៀមលក្ខណៈជួយពលរដ្ឋនៅតាមតំបន់ព្រំដែន appeared first on Kampuchea Thmey Daily.

លោកពូ ម៉េង ហ៊ាង អ្នករត់ហាត់ប្រាណ ផ្លូវចូលវត្តព្រះបារមីវង្កតបុរី​ បានប្រាប់ថា កត្តាដែលធ្វើ ឱ្យលោកជ្រើសរើសមកហាត់ប្រាណនៅទីនេះ ដោយសារតែបរិយាកាស និងខ្យល់អាកាសល្អបរិសុទ្ធ និងមានមនុស្សច្រើន ហើយជាពិសេសនោះមនុស្សគ្រប់គ្នាដែលមកហាត់ប្រាណនៅទីនេះ មានស្នាមញញឹមល្អ មានប្រាស្រ័យទាក់ទងល្អ និងរួសរាយរាក់ទាក់ដាក់គ្នាទៅវិញទៅមកទៀតផង។

លោកពូ ម៉េង ហ៊ាង បន្ថែមទៀតថា ទីតាំងសួនផ្កាតាមរផ្លូវចូលវត្តព្រះបារមីវង្កតបុរី​នេះ ប្រជាពលរដ្ន អាចនាំគ្រួសារ និងមិត្តភក្តិមកហាត់ប្រាណ ឬដើរកម្សាន្តក៏បានដែរ ភាគច្រើនសម្រាប់លោកផ្ទាល់ ចូលចិត្តដើរ និងរត់ហាត់ប្រាណនៅពេលល្ងាច ដោយលោកពូយល់ថា ពេលវេលានេះ អាកាសធាតុល្អ និងមានខ្យល់បក់មកធ្វើឲ្យអារម្មណ៍ល្អ កាត់បន្ថយភាពតាងតឹង និងភាពស្មុគស្មាញរបស់មនុស្សគ្រប់ៗគ្នា ដែលបានមកដើរ ឬរត់ហាត់ប្រាណ នៅបរិវេណនេះ។

យុវតី ស្រីនាង និងប្អូនស្រី ដែលកំពុងវាយសី នៅទីធ្លាវត្ត វត្តព្រះបារមីវង្កតបុរី​ មានទឹកមុខស្រស់ស្រាយ បានប្រាប់ដែរថាកញ្ញា និងប្អូនស្រី រៀងរាល់ពេលទំនេរពីការងារ ឬការសិក្សា តែងតែនាំគ្នា មកវាយសីហាត់ ប្រាណនៅទីនេះជារៀងរាល់ថ្ងៃ។ ហេតុដែលនាំឲ្យកញ្ញា និងប្អូនស្រី មកហាត់ប្រាណនៅទីនេះ ព្រោះតែកញ្ញាយល់ឃើញថា កន្លែងមួយនេះ មានសុវត្ថិភាពល្អ មានបរិយាកាស និងខ្យល់អាកាសបរិសុទ្ធ។

ជាមួយគ្នានោះអ្នកស្រី ចរិយា អ្នកហាត់ប្រាណក្នុងបរិវេណវត្ត ព្រះបារមីវង្កតបុរី​ បាននិយាយដូចគ្នាថា អ្នកស្រី ចាប់អារម្មណ៍កន្លែងហាត់ប្រាណមួយនេះ ដោយសារបរិយាកាស និងខ្យល់ល្អបរិសុទ្ធ តាមផ្លូវមានផ្កាពណ៌លឿងរីកស្គុះស្គាយធ្វើឱ្យអារម្មណ៍ស្រស់ស្រាយ មុននិងក្រោយ ការដើរហាត់ប្រាណ៕

អត្ថបទ ៖ សំណាង

The post ផ្លូវចូលវត្តព្រះបារមីវង្កតបុរី​ បានក្លាយជាទីលំហែ និងហាត់ប្រាណរបស់បងប្អូនប្រជាពលរដ្ឋ​ជិតឆ្ងាយ​ appeared first on Kampuchea Thmey Daily.

លោក ឌិន សំអាត ប្រជាពលរដ្ឋរស់នៅភ្នំពេញ​បាននិយាយថា «យើងខ្ញុំសូមថ្កោលទោសមេក្លោង​ភេរវករ​ទណ្ឌិត សម រង្ស៊ី និងបក្ខពួកចិញ្ចឹមចិត្តគិតតែចង់បំផ្លាញសេចក្តីសុខជាតិ និងភាពសុខសាន្តរបស់ប្រជាជនកម្ពុជា»។

លោក​បន្ដ​ថា «ពួកគេព្យាយាមទាញកម្ពុជាឱ្យធ្លាក់ទៅក្នុងសង្គ្រាមសារជាថ្មី ដោយទង្វើនេះ​គឺជាសកម្មភាពខុសច្បាប់ដែលរាជរដ្ឋាភិបាលចាំបាច់ ត្រូវ​ពន្លឿន​ការ​តាក់តែងច្បាប់ដាក់ក្រុម​ទាំងនេះ ទៅ​ជា​ក្រុមភេរវករ ដើម្បីយកមកផ្តន្ទាទោសតាមច្បាប់ជាធរមាន»។

លោកជឿជាក់លើរាជរដ្ឋាភិបាលស្របច្បាប់ ដែលដឹកនាំដោយសម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងបានប្តេជ្ញាចិត្តចូលរួមទប់ស្កាត់ក្រុមជ្រុលនិយមដែលធ្វើសកម្មភាពទុច្ចរិត ញុះញង់ឱ្យខ្មែរបែកបាក់សាមគ្គីផ្ទៃក្នុងដើម្បីបម្រើ​មហិច្ឆតា​ទុច្ចរិត ក្នុង​ការ​ប៉ុនប៉ងដណ្តើមអំណាចដោយខុសច្បាប់។

លោក អ៊ុន ដារ៉ា ប្រធានសហភាពសហជីពកម្ពុជាពន្លឺកម្មករបានថ្លែងថា «ទណ្ឌិត សម រង្ស៊ី មានចេតនាបំបែកបំបាក់ បំផ្លិចបំផ្លាញប្រទេសកម្ពុជាដែលកំពុងមានសន្តិភាពពេញលេញ និងការអភិវឌ្ឍន៍។ ទង្វើ​យ៉ាង​គឃ្លើន​របស់​ទណ្ឌិតក្បត់ជាតិបីជំនាន់ជាសកម្មភាពបំពានច្បាប់ រំលោភរដ្ឋធម្មនុញ្ញ និងជាការញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម ដែលជាអំពើល្មើសច្បាប់មានចែងនៅក្នុងក្រមព្រហ្មទណ្ឌនៃព្រះរាជាណាចក្រកម្ពុជាដែលប្រឈមនឹងការផ្តន្ទាទោស»។

លោក​ប្រឆាំង​ដាច់​ខាត​ ក្រុមឧទ្ទាមក្រៅច្បាប់​ដែល​ចង់​ផ្តួល​រំលំ​រាជរដ្ឋាភិបាលស្របច្បាប់ និងប្រកាសប្តេជ្ញាចូលរួមការពារសន្តិភាពសម្រាប់ជាតិ និងប្រជាជន ព្រមទាំងបន្តការគាំទ្ររាជរដ្ឋាភិបាលកម្ពុជាស្របច្បាប់ ទោះក្នុងតម្លៃណាក៏ដោយ។

អ្នកស្រី សុត រដ្ឋថាន កម្មការិនីរោងចក្រនៅភ្នំពេញបាននិយាយថា ការអំពាវនាវឱ្យមានការ​ងើប​បះ​បោរ​ប្រឆាំង​នឹង​រាជរដ្ឋាភិបាល គឺជាចេតនាធ្វើសកម្មភាពប៉ុនប៉ងបង្កើតចលនា​បដិវត្តន៍ពណ៌ ដណ្តើមអំណាចដោយខុសច្បាប់ ហើយកំពុងធ្វើសកម្មភាពបំផ្លាញស្ថិរភាព សន្តិភាព និងការអភិវឌ្ឍន៍កម្ពុជាដែលខ្មែរត្រូវរួមគ្នាទប់ស្កាត់ជាដាច់ខាត។

អ្នកស្រីបន្ត​ថា «យើងខ្ញុំជាកម្មកររោងចក្រសូមប្តេជ្ញាចូលរួមជាមួយរាជរដ្ឋាភិបាល ក្នុងការថែរក្សាការពារសន្តិភាព និងបន្តអភិវឌ្ឍជាតិឱ្យសម្បូររុងរឿងថែមទៀត និងរួមគ្នាប្រឆាំងដាច់ខាតគ្រប់ទង្វើដណ្តើមអំណាចដែលមិនមែនចេញពីការបោះឆ្នោតគាំទ្រដោយប្រជាពលរដ្ឋកម្ពុជា»។

ចំណែក​លោក ថុល សុផាន់ណា អ្នក​នាំ​ពាក្យ​សមាគមសម្ព័ន្ធភាព​ដើម្បីមនុស្សធម៌បានលើកឡើងថា «យើងខ្ញុំសូមថ្កោលទោសយ៉ាងដាច់អហង្ការចំពោះទណ្ឌិតក្បត់ជាតិបីជំនាន់ឈ្មោះ សម រង្ស៊ី កាលពីថ្ងៃទី១៨ ខែមករា ឆ្នាំ២០២៥ ឆ្កួត​វង្វេង​ក្នុង​សង្វៀន​នយោបាយ​រហូត​កើត​រោគ​ចិត្ត​ហ៊ាន​អំពាវនាវ និង​ញុះញង់​ឆ្កឹះឆ្កៀល​បំបែក​បំបាក់​សាមគ្គីជាតិ​ដ៏​គ្រោះថ្នាក់បំផុត»។

លោក​បាន​អំពាវ​ដល់​គ្រប់ក្រុមភាគី អ្នកនយោបាយ ប្រជាពលរដ្ឋ និងកងកម្លាំងប្រដាប់អាវុធ​ទូទាំងប្រទេស សូម​កុំ​លង់ជឿក្រុមប្រឆាំងជ្រុលនិយមណាមួយ ឬអ្នកនយោបាយណាមួយ ដែលអូសទាញឱ្យខាតបង់ផលប្រយោជន៍ ល្មើសច្បាប់ និងចាត់ទុកបុគ្គលទាំងនោះជាជនបំផ្លាញជាតិ បំផ្លាញសន្តិភាព ដែលច្បាប់មិនគួរត្រូវលើកលែងនោះទេ។

លោក ហេង ម៉េងលី អនុ​ប្រធានសម្ព័ន្ធភាពបណ្ដុំ​សមាគមអង្គការសង្គមស៊ីវិលបានជំរុញ​ឱ្យរាជរដ្ឋាភិបាលបង្កើតច្បាប់ ដើម្បីដាក់ក្រុមជ្រុលនិយមជា «ក្រុមអង្គការភេរវករ»ឱ្យឆាប់ៗ និងចាត់វិធានការតាមផ្លូវច្បាប់ឱ្យបានម៉ឺងម៉ាត់ចំពោះក្រុមឧទ្ទាមក្រៅច្បាប់ ដែលនៅតែបន្តប្រព្រឹត្តអំពើ​អសីលធម៌ និងបំពានច្បាប់កម្ពុជា។

លោក​បញ្ជាក់​ថា «យើងខ្ញុំបន្តគាំទ្ររាជរដ្ឋាភិបាលកម្ពុជាស្របច្បាប់ ទោះក្នុងតម្លៃណាក៏ដោយ។ សូមអំពាវដល់គ្រប់ក្រុមភាគី គ្រប់សមាជិកនៃគណបក្សនយោបាយ និង​បងប្អូនប្រជាពលរដ្ឋសូមកុំលង់ជឿក្រុមប្រឆាំងជ្រុលនិយមណាមួយ ឬ​អ្នក​នយោបាយណាមួយ ដែល​អូសទាញ​ឱ្យ​ខាតបង់​ផល​ប្រយោជន៍ជាតិ និងល្មើសច្បាប់»៕

The post ប្រជាពលរដ្ឋ សហជីព និងកម្មករ ថ្កោលទោសទណ្ឌិត សម រង្ស៊ី ដែល​អំពាវនាវ​ឱ្យ​មាន​ការ​ងើប​បះបោរ​ប្រឆាំង​នឹងរាជរដ្ឋាភិបាលស្របច្បាប់ appeared first on Kampuchea Thmey Daily.

លោក អាន លឹមខេង នាយកវិទ្យាល័យចំណេះទូទៅ និងបច្ចេកទេសពួក បានឱ្យដឹងថា ពិធីរំឭកគុណនេះ មិនត្រឹមតែរំឭកឡើងពីស្នាព្រះហស្ថរបស់ព្រះបានជ័យវរ្ម័នទី៧ ដែលព្រះអង្គមានស្នាព្រះហស្ថក្នុងការកសាងប្រាសាទបុរាណប៉ុណ្ណោះទេ។ ប៉ុន្ដែ ថែមទំាងបានរំឭកគុណដល់បុព្វការីជនល្បីៗ និងអ្នកប្រាជ្ញាល្បីៗជាច្រើនទៀត រួមមាន ព្រះនាឥន្ទ្រីទេវី លោកតាក្រមង៉ុយ សម្ដេចសង្ឃជួនណាត ដែលជាអតីតអ្នកមានស្នាដៃល្បីល្បាយក្នុងការអភិវឌ្ឍវប្បធម៌ជាតិខ្មែរ។

លោកនាយកបានបង្ហាញពីក្ដីរីករាយ និងមានមោទកភាព នៅពេលដែលប្រទេសជាតិមានសុខសន្ដិភាព ហើយមានសប្បុសជន ក៏ដូចជាប្រជាពលរដ្ឋ បាននាំគ្នាធ្វើពិធីរំឭកគុណដល់អតីតព្រះមហាវីរក្សត្រខ្មែរបែបនេះ ដែលជាប្រវត្ដិសាស្ដ្ររបស់វិទ្យាល័យមួយនេះ។ លោកថា ការធ្វើពិធីនេះ បានបង្ហាញឱ្យឃើញថា ប្រជាពលរដ្ឋខ្មែរនៅតែបន្ដចូលរួមថែរក្សានូវវប្បធម៌ អរិយធម៌ និងប្រពៃណីរបស់ដូនតាខ្មែរ ហើយព្រះមហាវីរក្សត្រពីសម័យអង្គរ ពិតជាបានធ្វើឱ្យប្រទេសជាតិមានភាពរីកចំរើនយ៉ាងខ្លាំង ធ្វើឱ្យប្រជាពលរដ្ឋបានចងចាំមិនភ្លេចពីស្នាព្រះហស្ថរបស់ព្រះអង្គ ដែលបានកសាងប្រាសាអង្គរ និងប្រាសាទបុរាណជាច្រើនទៀត។

ក្នុងពិធីរំរំឭកព្រះគុណនោះដែរ ក៏មានការរៀបចំសម្ដែងធម៌ទេសនា មានប្រគំសិល្បៈឆៃយាំដង្ហែរជុំវិញរូបសំណាកព្រះបាទជ័យវរ្ម័នទី៧ មានការសម្បែងសិល្បៈចំរៀងចាប៉ីដងវែង ការសម្បែងចារ្យសាស្ដ្រាស្លឹករិត ព្រមទាំងមានការបង្ហាញនូវវប្បធម៌សិល្បៈបុរាណជាច្រើនដែលធ្វើឡើងដោយសារដៃកូនខ្មែរ ផងដែរ៕

អត្ថបទ៖ គឿនវេត

The post ប្រជាពលរដ្ឋ នាំគ្នាប្រារព្ធពិធីរំឭកគុណព្រះបាទជ័យវរ្ម័នទី៧ នៅស្រុកពួក ខេត្តសៀមរាប appeared first on Kampuchea Thmey Daily.

ទន្ទឹម​នោះ ប្រជាពលរដ្ឋ ក៏បាន​ស្នើសុំ​ជាថ្មី​ដល់​អាជ្ញាធរ​ខេត្ត-ក្រុង មន្ទីរ​ពាក់ព័ន្ធ និង​ក្រុមហ៊ុន​ប្រមូល​សំរាម សូម​កុំ​បន្ត​អនុញ្ញាត​ឱ្យ​ចាក់សំរាម​នៅ​ទីលាន​ចាស់ ព្រោះ​ពួកគាត់​កំពុង​ប្រឈម​នឹង​ផល​ប៉ះពាល់​ជាច្រើន​ដល់​សុខភាព​សាធារណៈ និង​មិន​អាច​បន្ត​ទ្រាំទ្រ​ក្លិន​ផ្សែង នៃ​ការ​ដុត ឬ ភាព​ស្អុយ​រលួយ​សំរាម​គ្រប់​ប្រភេទ​បាន​ទៀត​ទេ។

តំណាង​ប្រជាពលរដ្ឋ អះអាង កាលពី​ថ្ងៃ​ទី ៣ ខែ​ឧសភា កន្លងទៅ ថា ពួកគាត់​ពិបាក​ដកដង្ហើម​ណាស់ ព្រោះ​ការ​ដុត​គំនរ​សំរាម​ខែប្រាំង​នេះ ប្រសិនបើ​ត្រឹមតែ​ចាក់​សំរាម​ពេញ​ទីលាន​ជាក់ស្ដែង​ពិបាក​មួយ​ទៅ​ហើយ។ ជួនកាល​ពេលខ្លះ​មិន​អាច​ទ្រាំទ្រ​នឹង​ក្លិន​ផ្សែង​សំរាម​បាន រហូតដល់​នាំ​កូន​ចៅ​រត់​កន្លែង​ផ្សេង​ជា​បណ្ដោះអាសន្ន​ក៏​មាន​ដែរ។ ដូច្នេះ​សូម​អាជ្ញាធរ​មេត្តា​ណែនាំ​ដល់​ក្រុមហ៊ុន​ដឹក​សំរាម​ទៅ​ចាក់​ទីលាន​សំរាម​ថ្មី​ដែល​មាន​ទំហំ​ជាង ៥០ ហិតា នៅ​ក្បែរ​ផ្លូវជាតិ​លេខ ៤៨ ស្ថិត​នៅ​ឃុំ​ទួល​គគីរ ស្រុក​មណ្ឌលសីមា ជំនួស​វិញ ដោយសារតែ​ទីលាន​ចាស់​នេះ​លែង​អាច​ផ្ទុក​សំរាម​បាន​ទៀត​ហើយ។

រដ្ឋបាល​ខេត្ត​កោះកុង កាលពី​ថ្ងៃ​ទី ២៩ ខែ​មេសា ឆ្នាំ ២០២៤ កន្លងទៅ យោង​លិខិត​រដ្ឋបាល​របស់​ខ្លួន បាន​ចេញមុខ​អះអាង​ថា អាជ្ញាធរ​បាន​យកចិត្តទុកដាក់​គិតគូរ​ពី​ការ​គ្រប់គ្រង​សំរាម​សំណល់​រឹង​នៅ​ទីប្រជុំជន ពិសេស​កាកសំណល់​វេជ្ជសាស្ត្រ ដោយ​បាន​រៀបចំ​ឡ​នៅ​តាម​មន្ទីរពេទ្យ​សម្រាប់​ដុត​សម្លាប់​មេរោគ មុននឹង​យក​ទៅ​កម្ទេច​ចោល ដោយ​រៀបចំ​ទីលាន​សំរាម​ថ្មី​ទំហំ ៥០ ហិតា។ ចំណែក​ទី​កន្លែង​ចាក់សំរាម​ចាស់​នៅ​ក្រុង​ខេមរភូមិន្ទ​មិន​ត្រូវ​បាន​អនុញ្ញាត​ឱ្យ​បន្ត​ចាក់សំរាម​ទៀត​ឡើយ ព្រោះ​មាន​ប្រជាជន​រស់នៅ​ច្រើន​ដែល​អាច​បង្ក​ផល​ប៉ះពាល់​ដល់​សុខភាព ពិសេស​កុមារ។

អាជ្ញាធរ​ខេត្ត​កោះកុង ក៏​បដិសេធ​ផង​ដែរ​ចំពោះ​ក្រុម​មាតា​ធម្មជាតិ ដែល​បាន​បង្ហោះ​វីដេអូ​មួយ​លើ​បណ្ដាញ​សង្គម​បញ្ជាក់​ពី​ការ​មិន​យកចិត្តទុកដាក់​របស់​អាជ្ញាធរ​រដ្ឋបាល​ខេត្ត​កោះកុង​លើ​គំនរ​សំរាម​ក្នុង​ដែន​ជម្រក​សត្វព្រៃ។ តែ​អ្វី​ដែល​ក្រុម​មាតា​ធម្មជាតិ​ចង់​ទាញ​ចំណាប់អារម្មណ៍ និង​បង្ហាញ​តាមរយៈ​វីដេអូ​របស់​ខ្លួន គឺ​ផល​ប៉ះពាល់​ដល់​បរិស្ថាន មនុស្ស និង​សត្វ​ដែល​ស្ថិត​នៅ​ក្បែរ​គំនរ​សំរាម​នោះ៕

អត្ថបទ ៖ សិរីវឌ្ឍនៈ

The post ពលរដ្ឋខេត្តកោះកុង ស្នើបញ្ឈប់ការចាក់សំរាមនៅទីលានចាស់ ដោយបែរទៅទីតាំងថ្មីជំនួសវិញ appeared first on Kampuchea Thmey Daily.

សូមជម្រាបថា រាជរដ្ឋាភិបាល បានប្រកាសផ្តល់អាហារូបករណ៍ ដល់ប្រជាពលរដ្ឋរស់នៅតំបន់រុនតាឯក ដែលស្ថិតនៅ ឃុំរុនតាឯក ស្រុកបន្ទាយស្រី ខេត្តសៀមរាប ឲ្យចូលរៀនជំនាញវិជ្ជាជីវៈ និងបច្ចេក​ទេសដោយឥតគិតថ្លៃ ដើម្បីឲ្យពួកគេមានជំនាញវិជ្ជាជីវៈមួយច្បាស់លាស់ និងអាចមានការងារសមសម្យឆាប់រហ័សសម្រាប់លើកស្ទួយជីវភាព នាពេលអនាគត។ 

ការផ្តល់ជូននេះ គឺនៅក្នុងអំឡុងពេលពិធីជួបជុំសំណេះសំណាលរវាងសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី ជាមួយប្រជាពលរដ្ឋដែលរស់នៅតំបន់រុនតាឯក និងពាក់ស្នែង កាលពីថ្ងៃទី ៨ ខែធ្នូ ឆ្នាំ ២០២៣កន្លងទៅនេះ។ 

កម្មវិធីបណ្ដុះបណ្ដាលដោយឥតគិតថ្លៃសម្រាប់ប្រជាពលរដ្ឋ ដែលរស់នៅតំបន់រុនតាឯក និងពាក់ស្នែង ឲ្យបានរៀនជំនាញវិជ្ជាជីវៈ និងបច្ចេកទេស គឺរៀនខ្លីៗ ៤ខែចប់ ឆាប់ចប់ ឆាប់មានជំនាញ និងមានការងារធ្វើ ហើយអ្វីដែលកាន់អស្ចារ្យជាងនោះទៅទៀត ប្រសិនជាបងប្អូនមានប័ណ្ណក្រីក្រ នឹងទទួលបានប្រាក់ឧបត្ថម្ភជារៀងរាល់ខែចំនួន ២៨ ម៉ឺនរៀល រហូតរៀនចប់។

បើតាមមូលអាជ្ញាធរមូលដ្ឋាន ប្រជាពលរដ្ឋរស់នៅតំបន់រុនតាឯកនេះ បានចុះឈ្មោះចូលរៀនលើមុខជំនាញចំនួន ១៨ ដូចជា៖ តបណ្តាញអគ្គិសនីក្នុងអគារ បរិក្ខារត្រជាក់ ថែទាំជួសជុលរថយន្ត ជួសជុលអគ្គិសនីរថយន្ត ការតំឡើងកាមេរ៉ាសុវត្ថិភាព តបណ្តាញទឹក ការងារកំបោរ ជាងម៉ូតូ កាត់ដេរ សាឡន ម្ហូបខ្មែរ ធ្វើនំ កាត់សក់បុរស ក្រាហ្វិកកុំព្យូទ័រ កុំព្យូទ័រ សំអាងកាយ ការងាររដ្ឋបាល និងឆុងកាហ្វេ ជាដើម៕

The post ពលរដ្ឋរស់នៅតំបន់រុនតាឯក បានចុះឈ្មោះចូលរៀនជំនាញវិជ្ជាជីវៈ និងបច្ចេកទេសចំនួន ១៨ជំនាញ appeared first on Kampuchea Thmey Daily.

ថ្លែងក្នុងវេទិការកាលពីថ្ងៃទី១ ខែវិច្ឆិកា លោក ជុំ ហាត ប្រធានក្រុមប្រឹក្សាខេត្ត បានមានប្រសាសន៍ថា៖ “វេទិកានាថ្ងៃនេះធ្វើឡើងដើម្បីប្រមូលមតិយោបល់ បញ្ហាប្រឈម និងសំណូមពរនានារបស់ប្រជាពលរដ្ឋ យកមកពិភាក្សាស្រាយបំភ្លឺ និងធ្វើការដោះស្រាយឱ្យចំគោលដៅ ប្រកបដោយប្រសិទ្ធភាព និងទាន់ពេលវេលា ដែលបានបង្ហាញឱ្យឃើញពីការប្តេជ្ញាចិត្តចូលរួមសហការយ៉ាងខ្លាំងក្លានៅក្នុងដំណើរការនៃការគាំទ្រ និងជំរុញការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិស្របតាមក្របខ័ណ្ឌយុទ្ធសាស្ត្រស្តីពីកំណែទម្រង់វិមជ្ឍការ និងវិសហមជ្ឍការ ឱ្យកាន់តែទទួលបានលទ្ធផលជោគជ័យថ្មីៗឆ្លើយតបទៅនឹងសេចក្តីត្រូវការពិតប្រាកដរបស់ប្រជាពលរដ្ឋនៅមូលដ្ឋាន”។

ជាមួយគ្នានេះ លោកប្រធានក្រុមប្រឹក្សាខេត្ត បានបញ្ជាក់បន្ថែមថា រាល់មតិយោបល់ បញ្ហាប្រឈម និងសំណូមពរដែលបានលើកឡើងក្នុងវេទិកានាថ្ងៃនេះ បើក្នុងករណីដោះស្រាយបានភ្លាមៗ អាជ្ញាធរក៏ដូចជាក្រុមប្រឹក្សា គណៈអភិបាល មន្ទីរពាក់ព័ន្ធនឹងធ្វើការដោះស្រាយជូនភ្លាមៗ ហើយចំពោះករណីមិនអាចដោះស្រាយបានភ្លាមៗ នោះអាជ្ញាធរស្រុក មន្ទីរពាក់ព័ន្ធ ក្រុមប្រឹក្សា និងគណៈអភិបាល នឹងលើកយកទៅពិភាក្សារកដំណោះស្រាយជូននៅពេលក្រោយបន្តទៀត ដោយមិនទុកបញ្ហា និងសំណូមពរចោល ឬគេចវេសពីបញ្ហាដែលបានលើកឡើងក្នុងវេទិកានេះឡើយ។

រីឯ លោក ម៉ែន អេង អភិបាលរងខេត្ត បានលើកឡើងថា តាមរយ:វេទិកានេះនឹងផ្ដល់ឱកាសដល់អ្នកពាក់ព័ន្ធ និងប្រជាពលរដ្ឋទាំងអស់មានសិទ្ធិស្មើគ្នា ក្នុងការចូលរួមទទួលព័ត៌មានអំពីសមិទ្ធផលដែលរដ្ឋបាលខេត្តសម្រេចបាន ហើយថែមទាំងអាចលើកឡើងអំពីបញ្ហាប្រឈម និងសំណូមពរនានា ដែលកើតមាននៅក្នុងមូលដ្ឋានរបស់ខ្លួនមកកាន់អាជ្ញាធរ ក៏ដូចជាក្រុមប្រឹក្សា និងគណៈអភិបាលខេត្ត ដើម្បីធ្វើការពិនិត្យពិភាក្សាដោះស្រាយជូនឱ្យបានទាន់ពេលវេលាប្រកបដោយប្រសិទ្ធភាព និងប្រសិទ្ធផលខ្ពស់។

សូមបញ្ជាក់ថា ក្នុងវេទិកានៅថ្ងៃនេះទទួលបានសំណើរសំណូមពរចំនួន១៨ ដែលបញ្ហាទាំងនេះត្រូវបានប្រធានក្រុមប្រឹក្សាខេត្ត និងអភិបាលរងខេត្តធ្វើការឡើងបកស្រាយបំភ្លឺ និងទទួលយក និងបានជំរុញឱ្យអាជ្ញាធរ និងមន្ទីរពាក់ព័ន្ធត្រូវពន្លឿនក្នុងការដោះស្រាយ ឱ្យបានទាន់ពេលវេលា និងមានប្រសិទ្ធិភាពផងដែរ៕

ដោយ៖ ភក្ដី

The post ខេត្តស្វាយរៀង បើកការពិគ្រោះយោបល់ដើម្បីយកមតិ និងសំណូមពរពលរដ្ឋមកបំភ្លឺ និងដោះស្រាយ appeared first on Kampuchea Thmey Daily.

យោងតាមសេចក្តីសម្រេច ស្តីពី ការផ្អាកការផ្តល់សេវារដ្ឋបាលមួយចំនួនរបស់រដ្ឋបាលក្រុង ស្រុក ខណ្ឌ ដែលចុះហត្ថលេខាដោយសម្តេចធិបតី ហ៊ុន ម៉ាណែត កាលពីល្ងាចថ្ងៃទី ១៣ ខែកញ្ញា ឆ្នាំ ២០២៣ មានវិសាលភាពទៅលើអាជីវកម្មមួយចំនួន ដែលស្ថិតនៅក្នុងសេដ្ឋកិច្ចក្រៅប្រព័ន្ធ ដូចជា៖ ទីតាំងផលិត និងលក់ចម្លាក់ និងជាងគំនូរ, កន្លែងកាត់សក់, សម្អាងការខ្នាតតូច, អាជីវកម្មលក់សម្ភារកីឡា, តូបលក់អាហារ, ម៉ូតូឌុបទេសចរណ៍, រ៉ឺមកម៉ូតូដឹកទេសចរណ៍, ទីតាំងផលិតទៀនធូប, អាជីវកម្ម ផលិតពាង លូ ឥដ្ឋការ៉ូ, ជួសជុលគ្រឿងអគ្គិសនី, លាងម៉ូតូ, លាងរថយន្ត។ល។

តាមរយៈសេចក្តីសម្រេចនេះ ប្រជាពលរដ្ឋដែលធ្វើអាជីវកម្មដូចមានចែងក្នុងសេចក្តីសម្រេច គឺមិនតម្រូវឲ្យទៅសុំច្បាប់អនុញ្ញាតពីរដ្ឋបាលក្រុង ស្រុក និងខណ្ឌនោះឡើយ។

ទាក់ទិនបញ្ហានេះ សម្តេចធិបតី ហ៊ុន ម៉ាណែត តាមរយៈបណ្តាញសង្គមនាល្ងាចថ្ងៃទី ១៣ ខែកញ្ញា ឆ្នំា ២០២៣ បានលើកឡើងថា ថ្មីៗនេះមានការផ្សព្វផ្សាយព័ត៌មានមួយចំនួន ពាក់ពន្ធ័នឹងការតម្រូវឲ្យស្នើសុំច្បាប់អនុញ្ញាតប្រកបអាជីវកម្ម និងបន្តសុពលភាពអាជីវកម្មនៅការិយាល័យច្រកចេញ-ចូលតែមួយ នៃរដ្ឋបាលក្រុង ស្រុក ខណ្ឌ ដែលការណ៍នេះបានបង្កឲ្យមានការព្រួយបារម្ភ ក្នុងចំណោមប្រជាពលរដ្ឋដែលបាន និងកំពុងប្រកបអាជីវកម្ម, មុខរបរ និងការងារតូចតាចនៅក្នុងសេដ្ឋកិច្ចក្រៅប្រព័ន្ធ។

សម្តេចធិបតីនាយករដ្ឋមន្រ្តី បានបន្ថែមទៀតថា ក្រោយពីបានពិភាក្សាជាមួយលោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ សម្តេចធិបតី បានចេញសេចក្តីសម្រេចផ្អាកការផ្តល់សេវារដ្ឋបាលមួយចំនួនរបស់រដ្ឋបាលក្រុង ស្រុក ខណ្ឌ ពាក់ព័ន្ធនឹងការបំពេញបែបបទធ្វើអាជីវកម្មតូចជាច្រើនផងផងដែរ។

សម្តេចនាយករដ្ឋមន្រ្តី បានបញ្ជាក់ផងដែរថា រាជរដ្ឋាភិបាលផ្តល់អាទិភាពខ្ពស់បំផុត ចំពោះប្រជាពលរដ្ឋដែលស្ថិតនៅក្នុងសេដ្ឋកិច្ចក្រៅប្រព័ន្ធ។ ក្នុងគោលដៅនេះ រាជរដ្ឋាភិបាល បាននិងកំពុងរៀបចំយុទ្ធសាស្ត្រជាតិ ស្តីពី ការអភិវឌ្ឍសេដ្ឋកិច្ចក្រៅប្រព័ន្ធឆ្នាំ ២០២៣-២០២៨ ដែលនឹងត្រូវឲ្យអនុវត្តក្នុងពេលឆាប់ៗខាងមុខ ដើម្បីបង្កលក្ខណៈងាយស្រួល, ព្រមទាំងផ្តល់ប្រយោជន៍, ថែបំប៉ន និងលើកកម្ពស់ការយល់ដឹង ដល់អ្នកប្រកបអាជីវកម្ម, មុខរបរ និងការងារ ដែលស្ថិតនៅក្នុងសេដ្ឋកិច្ចក្រៅប្រព័ន្ធ»៕

The post រាជរដ្ឋាភិបាលកម្ពុជា ផ្តល់អាទិភាពខ្ពស់បំផុតចំពោះប្រជាពលរដ្ឋ ដែលស្ថិតនៅក្នុងសេដ្ឋកិច្ចក្រៅប្រព័ន្ធ appeared first on Kampuchea Thmey Daily.