ប្រទេសហ្សកហ្ស៊ី Archives - Kampuchea Thmey Daily

ជនជាតិឥណ្ឌា១១នាក់ស្លាប់នៅរមណីយដ្ឋានជិះស្គីដ៏ល្បីប្រទេសហ្សកហ្ស៊ី

Bun sopheap — Tue, 17 Dec 2024 04:44:20 +0000

មនុស្ស១២នាក់ដែលភាគច្រើនជាជនជាតិឥណ្ឌាត្រូវបានប្រទះឃើញស្លាប់នៅឯរមណីយដ្ឋានជិះស្គីលើទឹកកកដ៏ពេញនិយមមួយក្នុងប្រទេសហ្សកហ្ស៊ីក្នុងតំបន់កូកាសភាគខាងត្បូង។ នេះបើយោងតាមការចេញផ្សាយរបស់សារព័ត៌មានCNN នៅថ្ងៃទី១៧ខែធ្នូនេះ។

(រូបភាព៖ Getty)

ប៉ូលិសក្នុងតំបន់ បានឲ្យដឹងថា សាកសពជនជាតិឥណ្ឌា១១នាក់និងម្នាក់ទៀតជាជនជាតិហ្សកហ្ស៊ីត្រូវបានគេរកឃើញនៅជាន់ទីពីរខាងលើភោជនីយដ្ឋានឥណ្ឌា នៅ Gudauri ដែលជារមណីយដ្ឋានជិះស្គីដ៏ធំបំផុតនៅក្នុងប្រទេសនេះ។ មនុស្សទាំង១២នាក់សុទ្ធតែធ្វើការនៅក្នុងអគារដែលសាកសពរបស់ពួកគេត្រូវបានរកឃើញ។

ប៉ូលិសបាននិយាយថា ការធ្វើតេស្តបឋមមិនបានរកឃើញស្លាកស្នាមនៃអំពើហិង្សាលើសាកសពនោះទេ ប៉ុន្តែបានបន្ថែមថា មានម៉ាស៊ីនភ្លើងដើរដោយប្រេងមួយត្រូវបានបើក បន្ទាប់ពីអគារនេះបាត់បង់អគ្គិសនីកាលពីថ្ងៃសុក្រ។ ប៉ូលិសបាននិយាយថា មនុស្ស១២នាក់នេះបានស្លាប់ទំនងជាដោយសារការពុលកាបូនម៉ូណូអុកស៊ីត។ ប៉ូលិសបានបើកការស៊ើបអង្កេតលើឧបទ្ទវហេតុនេះ តាមមាត្រា ១១៦ នៃក្រមព្រហ្មទណ្ឌប្រទេស ដោយបង្ហាញថា វាជាឃាតកម្មដោយធ្វេសប្រហែស។

ពាក់ព័ន្ធបញ្ហានេះ ស្ថានទូតឥណ្ឌាប្រចាំនៅទីក្រុងប៊ីលីស៊ី (Tbilisi) បានប្តេជ្ញាចិត្តក្នុងការផ្តល់នូវការគាំទ្រដែលអាចធ្វើទៅបានទាំងអស់ដល់គ្រួសារអ្នកដែលបានស្លាប់បាត់បង់ជីវិត ហើយថា ខ្លួនកំពុងធ្វើការដើម្បីធ្វើមាតុភូមិនិវត្តន៍សាកសពរបស់ជនជាតិឥណ្ឌាទាំង១១នាក់។

គួរបញ្ជាក់ថា រមណីដ្ឋាន Gudauri ស្ថិតនៅលើភ្នំ Caucasus ជិតព្រំដែនជាមួយប្រទេសរុស្ស៊ី កំពុងក្លាយជាការពេញនិយមកាន់តែខ្លាំងឡើងពីភ្ញៀវទេសចរ ដោយផ្តល់ជូននូវជម្រើសច្រើននិងថោកជាងរមណីយដ្ឋានសំខាន់ៗរបស់អឺរ៉ុបនៅភ្នំអាល់។ យោងតាមក្រុមហ៊ុនប្រឹក្សាក្នុងស្រុកបានឱ្យដឹងថា អ្នកដំណើរអន្តរជាតិជាង ៣០០០០០ នាក់បានទៅទស្សនារមណីយដ្ឋាន Gudauri ក្នុងឆ្នាំ ២០២៣៕

(រូបភាព៖ Getty)

អត្ថបទ៖ ប៊ុន សុភាព

The post ជនជាតិឥណ្ឌា១១នាក់ស្លាប់នៅរមណីយដ្ឋានជិះស្គីដ៏ល្បីប្រទេសហ្សកហ្ស៊ី appeared first on Kampuchea Thmey Daily.

ឥទ្ធិពលមហាអំណាចកំពុងធ្វើឱ្យជម្លោះនយោបាយនៅហ្សកហ្ស៊ីក្លាយជាជម្ងឺរុំារ៉ៃ

Rann Reuy — Thu, 05 Dec 2024 07:25:16 +0000

ការតវ៉ាប្រឆាំងលទ្ធផលបោះឆ្នោតសភានៅទីក្រុងប៊ីលីស៊ី (Tbilsi) ប្រទេសហ្សកហ្ស៊ី (Georgia) ស្ថិតនៅតំបន់កូកាសអស់រយៈពេលជិត១សប្តាហ៍ បានផ្ទុះឡើងកាន់តែតានតឹងនឹងឈានទៅចោទប្រកាន់គ្នារវាងរុស្ស៊ីនិងភាគីអឺរ៉ុប ក្រោយនាយករដ្ឋមន្ត្រីប្រទេសនេះផ្អាកការចរចាចូលសហភាពអឺរ៉ុប ខណៈពេលដែលមន្ត្រីកាន់អំណាចបានចោទប្រកាន់ថា អ្នកចូលរួមតវ៉ាដ៏ច្រើនជាជនបរទេស រួមទាំងប្រជាជនរុស្ស៊ីដែលប្រឆាំងរដ្ឋាភិបាល។

ក្រុមអ្នកតវ៉ាប្រឈមប៉ូលិសបង្ក្រាមបាតុកម្ម។ Europeaninterest

ការផ្ទុះការតវ៉ានេះកើតឡើងក្រោយសភាអឺរ៉ុបច្រានចោលលទ្ធផលបោះឆ្នោតដែលរៀបចំឡើងកាលថ្ងៃទី២៦ខែតុលា ដោយសំអាងថា «មានភាពមិនប្រក្រតី» ព្រមទាំងទាមទារឲ្យរៀបចំការបោះឆ្នោតឡើងវិញ ក៏ប៉ុន្តែរដ្ឋាភិបាលបដិសេធបំពេញតាមដំណោះស្រាយនោះ ព្រមទាំងផ្អាកការចរចាចូលសហភាពអឺរ៉ុបរយៈពេលរហូតដល់៤ឆ្នាំ។

ក្រុមមន្ត្រីនៃបក្សកាន់អំណាចរបស់ប្រទេសហ្សកហ្ស៊ី បានចោទប្រកាន់បាតុករប្រឆាំងរដ្ឋាភិបាលនៅទីក្រុងប៊ីលីស៊ី ចំនួនច្រើនរហូតដល់១ភាគ៣នៃអ្នកតវ៉ា ជាជនបរទេសដែលបង្កឲ្យមានភាពតានតឹងនៅក្នុងប្រទេស។

សារព័ត៌មាន RT របស់រុស្ស៊ី បានដកស្រង់សម្តីរបស់លោក Mamuka Mdinaradze លេខាធិការប្រតិបត្តិនៃគណបក្ស Georgian Dream party ដែលកាន់អំណាចនៃប្រទេសហ្សកហ្ស៊ី ដោយចោទប្រកាន់ក្រុមបាតុកររាប់ពាន់ប្រឆាំងរដ្ឋាភិបាលក្នុងនោះប្រមាន១ភាគ៣នៃពួកគេជាជនបរទេស។

ចលនាប្រឆាំងរដ្ឋាភិបាលហ្សកហ្ស៊ីដែលស្ថិតនៅតំបន់កូកាស (Caucasus) ខាងត្បូង បានផ្ទុះឡើងក្រោយ នាយករដ្ឋមន្ត្រីហ្សកហ្ស៊ី លោក Irakli Kobakhidze បានប្រកាសពន្យាពេលចរចាចូលជាសមាជិកសហភាពអឺរ៉ុបរយៈពេល៤ឆ្នាំរហូតដល់ឆ្នាំ២០២៨ បន្ទាប់ពីសភាអឺរ៉ុបបានចេញសេចក្តីសម្រេចមួយច្រានចោលលទ្ធផលបោះឆ្នោតរដ្ឋសភាកាលខែតុលាកន្លងទៅ។

នាយករដ្ឋមន្ត្រីហ្សកហ្ស៊ី លោក Irakli Kobakhidze ដែលមានទំនោរដឹកនាំប្រទេសទៅរករុស្ស៊ី។

នាយករដ្ឋមន្ត្រីហ្សកហ្ស៊ី ដែលត្រូវបានក្រុមអ្នកតវ៉ាចោទប្រកាន់ថា «ទទួលរងឥទ្ធិពលពីរុស្ស៊ី»បានច្រានចោលការអនុវត្តតាមសេចក្តីសម្រេចរបស់សភាអឺរ៉ុបដោយចោទប្រកាន់អឺរ៉ុបថា «គំរាមកំហែងនិងបំភ្លើសជាប្រចាំ» ដែលភ្ជាប់រដ្ឋាភិបាលដឹកនាំដោយគណបក្ស Georgia Dream មានទំនោរទៅរករុស្ស៊ី។

សេចក្តីរាយការណ៍របស់ RT បានឲ្យដឹងថា ក្រុមអ្នកតវ៉ាបានប្រើហិង្សាប្រឆាំងសមត្ថកិច្ចអនុវត្តច្បាប់ រួមទាំងសកម្មភាព អុជកាំជ្រួច ការគប់ស្រា និងការដុតកង់ឡាននៅមុខរដ្ឋសភាជាដើម ខណៈសមត្ថកិច្ចបង្ក្រាបបាតុកម្មបានបាញ់ឧស្ម័នបង្ហូរទឹកភ្នែក បាញ់ទឹកដើម្បីបំបែកហ្វូងបាតុករ។

រហូតមកដល់ពេលនេះ បាតុករប្រមាណ២០០ត្រូវបានចាប់ខ្លួន ហើយ កម្លាំងសមត្ថកិច្ចជាង១០០នាក់ក៏បានរងរបួសផងដែរ។ ថ្លែងក្នុងសន្និសីទសារព័ត៌មាន លោក Mdinaradze បានអះអាងថា ក្នុងចំណោមបាតុករដែលបានឃុំខ្លួន មានជនជាតិរុស្ស៊ីភាគច្រើន មានប្រជាជនអាមេរិក អង់គ្លេស និងហូឡង់។

ប្រទេសហ្សកហ្ស៊ីស្ថិតនៅស្ថិតនៅតំបន់កូកាសខាងត្បូងមានព្រំដែនជាប់ជាមួយប្រទេសរុស្ស៊ី និងមានប្រជាជន៣,៧លាននាក់ បានរៀបចំការបោះឆ្នោតសភាកាលពីថ្ងៃទី២៦ខែតុលា ដោយគណបក្ស Georgia Dream ទទួលបានជ័យជម្នះជាមួយការគាំទ្រជាង៥៤%។ គណបក្សនេះបង្កើតឡើងដោយលោក Bidzina Ivanishvili ដែលជាសេដ្ឋីមានទំនាក់ទំនងយ៉ាងជិតសិទ្ធជាមួយរុស្ស៊ី។

យោងការផ្សាយរបស់ Aljazeera គណបក្សដែលគាំទ្ររុស្ស៊ី បានច្រានចោលលទ្ធផលបោះឆ្នោតដែលប្រកាសដោយគណៈកម្មាធិការរៀបចំការបោះឆ្នោតហ្សកហ្ស៊ី និងប្រកាសពីការធ្វើបាតុកម្ម ដោយប្រធានាធិបតី Salome Zourabichvili ប្រទេសនេះបានក្លាយជាប្រទេសរងគ្រោះដោយសារប្រតិបត្តិការពិសេសរបស់រុស្ស៊ី។

ចលនាតវ៉ានយោបាយកើតឡើងនៅប្រទេសហ្សកហ្ស៊ីនាពេលនេះ ត្រូវបានមេដឹកនាំហ្សកហ្ស៊ីភ្ជាប់ទៅនឹងការធ្វើបដិវត្តន៍ពណ៌ដែលកើតឡើងនៅប្រទេសអ៊ុយក្រែនកាលឆ្នាំ២០១៣។

យោង RT ទីក្រុងមូស្គូក៏បានប្រៀបធៀបការតវ៉ាប្រឆាំងរដ្ឋាភិបាលនៅហ្សកហ្ស៊ីទៅនឹងការតវ៉ានៅ Maidan ក្នុងប្រទេសអ៊ុយក្រែនដែលឈានទៅទម្លាក់រដ្ឋាភិបាលដែលស្និទ្ធទីក្រុងមូស្គូក្រោយមិនតវ៉ារឿងរុស្ស៊ីកាត់យកតំបនគ្រីមាកាលឆ្នាំ២០១៤។ អ្នកនាំពាក្យវិមានក្រឹមឡាំង លោក Dmitry Peskov បញ្ជាក់ថា ភាពចលាចលបង្ហាញ «សញ្ញានៃការប៉ុនប៉ងធ្វើបដិវត្តពណ៌ទឹកក្រូច (Orange Revolution)»។

យោងគេហទំព័រសហភាពអឺរ៉ុប Europeaninterest អគ្គលេខាធិការក្រុមប្រឹក្សាអឺរ៉ុប លោក Alain Berset បាននិយាយតាមទូរស័ព្ទជាមួយប្រធានាធិបតីហ្សកហ្ស៊ី លោកស្រី Salome Zourabichvili និងនាយករដ្ឋមន្ត្រី Irakli Kobakhidze កាលថ្ងៃពុធ ដោយអំពាវនាវឲ្យភាគីទាំងពីរទប់ស្កាត់អំពើហិង្សាដែលកំពុងពុះកញ្ជ្រោលឡើងនេះ។

បើទោះបីចាញ់ឆ្នោត យោង Aljazeera ប្រធានាធិបតីហ្សកហ្ស៊ី លោកស្រី Salome Zourabichvili បានបង្ហាញជំហរមិនចុះចេញពីអំណាចដែលនឹងត្រូវធ្វើឡើងនៅប៉ុន្មានថ្ងៃបន្ទាប់នេះ៕

ដោយ រ៉ាន់ រើយ

រធានាធិបតីហ្សកហ្ស៊ី លោកស្រី Salome Zourabichvili ដែលមានទំនោរទៅរកអឺរ៉ុប។ AP

The post ឥទ្ធិពលមហាអំណាចកំពុងធ្វើឱ្យជម្លោះនយោបាយនៅហ្សកហ្ស៊ីក្លាយជាជម្ងឺរុំារ៉ៃ appeared first on Kampuchea Thmey Daily.

រុស្ស៊ី៖ អាមេរិក កំពុងរៀបផែនការធ្វើបដិវត្តន៍ពណ៌នៅប្រទេស ហ្សកហ្ស៊ី

Sok Sovann — Mon, 26 Aug 2024 08:46:01 +0000

ភ្នាក់ងារចារកម្មបរទេសនៃសហព័ន្ធរុស្ស៊ីរាយការណ៍ថា សហរដ្ឋអាមេរិក កំពុងរៀបចំបដិវត្តន៍ពណ៌ នៅហ្សកហ្ស៊ី ព្រោះមិនពេញចិត្តចំពោះស្ថានភាពក្នុងប្រទេសនេះ មុនការបោះឆ្នោតសភាថ្ងៃទី២៦ខែតុលាខាងមុខ។

(រូបថត៖ Global Look Press)

ក្នុងសេចក្តីថ្លែងការណ៍ដែលចុះផ្សាយដោយសារព័ត៌មាន TASS នៅថ្ងៃចន្ទទី២៦ខែសីហាឆ្នាំ២០២៤, «បណ្តាអង្គការក្រៅរដ្ឋាភិបាលដែលប្រឆាំងរដ្ឋាភិបាលហ្សកហ្ស៊ី កំពុងប្រមែប្រមូលគ្នា សង្កេតមើលដំណើរការបោះឆ្នោតដោយប្រុងប្រយ័ត្ន។ ក្រុមប្រឆាំងរដ្ឋាភិបាល គ្រោងបង្កើតព័ស្តុតាងអំពីការក្លែងបន្លំអំឡុងពេលបោះឆ្នោត ហើយមិនទទួលស្គាល់លទ្ធផលឆ្នោត និងទាមទារឲ្យមានការផ្លាស់ប្តូររដ្ឋាភិបាល។ ក្រោយមក កងកម្លាំងនឹងត្រូវញុះញង់ឲ្យប្រើអំពើហិង្សា បង្ក្រាបបាតុកម្ម រួចសហរដ្ឋអាមេរិក នឹងដាក់ទណ្ឌកម្មផ្នែកនយោបាយនិងសេដ្ឋកិច្ច ប្រឆាំងរដ្ឋាភិបាលហ្សកហ្ស៊ី ក្រុមលេសប្រើប្រាស់កម្លាំងហួសហេតុប្រឆាំងប្រជាពលរដ្ឋ។

ស្របពេលជាមួយគ្នានោះដែរ ចារកម្មរុស្ស៊ីគិតទុកជាមុនថា គណបក្សកាន់អំណាច Georgian Dream ទំនងជាឈ្នះការបោះឆ្នោតថ្ងៃទី២៦ខែតុលា ហេតុដូច្នេះហើយទើបអាមេរិក មិនសប្បាយចិត្ត។ បើឈ្នះឆ្នោតមែន គណបក្សកាន់អំណាចនឹងរក្សាគោលជំហប្រឆាំងអាមេរិក ហើយបន្តនិន្នាការដែលទីក្រុងវ៉ាស៊ីនតោន មិនអាចទទួលយកបាន។

(រូបថត៖ EPA)

ពាក់ព័ន្ធការបោះឆ្នោតនេះដែរ នាយករដ្ឋមន្ត្រីហ្សកហ្ស៊ី លោក Irakli Kobakhidze បានលើកឡើងថា ប្រជាពលរដ្ឋ ត្រូវតែជ្រើសរើសរវាងការវិលត្រឡប់ទៅកាន់ «អតីតកាលដ៏ខ្មៅងងឹត» និង «អនាគតដ៏ភ្លឺស្វាងរបស់អឺរ៉ុបនិងរបស់ប្រទេសនេះ»។

លើសពីនេះលោកក៏បញ្ជាក់ដែរ នេះគឺជាការបោះឆ្នោតប្រជាមតិ ដែលប្រជាជនហ្សកហ្ស៊ីត្រូវជ្រើសរើសរវាងសង្រ្គាមនិងសន្តិភាព, ការគ្រប់គ្រងដោយមនុស្សអាយ៉ងគេនិងអធិបតេយ្យហ្សកហ្ស៊ីតាមបែបប្រជាធិបតេយ្យ និងការឃោសនាប្រមាថនិងគោលការណ៍សីលធម៌៕

អត្ថបទ៖ សុខ សុវណ្ណ

ចុចអាន៖ បទល្មើសឧបឃាត៖ អ្នកប៉ុនប៉ងផ្តួលរំលំរដ្ឋាភិបាល អាចជាប់ពន្ធនាគារ១៥ឆ្នាំ ដល់៣០ឆ្នាំ ឬ មួយជីវិត

The post រុស្ស៊ី៖ អាមេរិក កំពុងរៀបផែនការធ្វើបដិវត្តន៍ពណ៌នៅប្រទេស ហ្សកហ្ស៊ី appeared first on Kampuchea Thmey Daily.

ប្រទេសហ្សកហ្ស៊ី Archives - Kampuchea Thmey Daily

ជនជាតិឥណ្ឌា​១១​​នាក់ស្លាប់​នៅរមណីយដ្ឋាន​ជិះស្គី​ដ៏ល្បី​ប្រទេស​ហ្សកហ្ស៊ី

​ឥទ្ធិពល​មហាអំណាច​កំពុង​ធ្វើ​ឱ្យ​ជម្លោះ​នយោបាយ​​នៅហ្សកហ្ស៊ី​​​ក្លាយ​ជា​ជម្ងឺរុំារ៉ៃ

រុស្ស៊ី៖ អាមេរិក កំពុង​រៀប​ផែនការ​ធ្វើបដិវត្តន៍​ពណ៌​នៅប្រទេស ​ហ្សកហ្ស៊ី

ជនជាតិឥណ្ឌា១១នាក់ស្លាប់នៅរមណីយដ្ឋានជិះស្គីដ៏ល្បីប្រទេសហ្សកហ្ស៊ី

ឥទ្ធិពលមហាអំណាចកំពុងធ្វើឱ្យជម្លោះនយោបាយនៅហ្សកហ្ស៊ីក្លាយជាជម្ងឺរុំារ៉ៃ

រុស្ស៊ី៖ អាមេរិក កំពុងរៀបផែនការធ្វើបដិវត្តន៍ពណ៌នៅប្រទេស ហ្សកហ្ស៊ី