បទល្មើសឧបឃាត៖ អ្នកប៉ុនប៉ងផ្តួលរំលំរដ្ឋាភិបាល​ អាចជាប់ពន្ធនាគារ១៥ឆ្នាំ ដល់៣០ឆ្នាំ ឬ មួយជីវិត

ថ្មីៗនេះមានក្រុមប្រឆាំងជ្រុលនិយមក្រៅប្រទេសមួយក្តាប់តូច បានធ្វើបដិវត្តន៍ពណ៌ប៉ុនប៉ងផ្តួលរំលំរដ្ឋាភិបាលកម្ពុជា និងញុះញង់ឱ្យពលរដ្ឋខ្មែរក្នុងស្រុក ធ្វើបាតុកម្មប្រឆាំងនឹងគម្រោងកិច្ចសហប្រតិបត្តិការអភិវឌ្ឍន៍តំបន់ត្រីកោណ កម្ពុជា-ឡាវ-វៀតណាម (CLV)។ តើអ្នកញុះញង់ ឬបំផុសបំផុលឱ្យមានការធ្វើបាតុកម្មផ្តួលរំលំរដ្ឋាភិបាល មានទោសទណ្ឌដូចម្តេច?

បើតាមក្រមព្រហ្មទណ្ឌ ផ្នែកទី២ បាននិយាយពីបទល្មើសឧបឃាត និងការរួមគំនិតក្បត់ ដោយបញ្ជាក់ថា ក្នុងមាត្រា៤៥១ អ្នកដែលមានបំណងចង់ផ្តួលរំលំរដ្ឋាភិបាល និងប៉ុនប៉ងចង់ដណ្តើមអំណាច ត្រូវផ្តន្ទាទោសដាក់ពន្ធនាគារពី១៥​ឆ្នាំ ទៅ៣០ឆ្នាំ។ ចំណែកមាត្រា ៤៥២ ប្រសិនជាបុគ្គលនោះជាអ្នករាជការសាធារណៈត្រូវផ្តន្ទាទោសដាក់ពន្ធនាគារអស់មួយជីវិត។

ចំពោះអ្នកដែលចូលរួមក្នុងគម្រោងផ្តួលរលំរដ្ឋាភិបាលនេះ ត្រូវមានទោសពីបទរួមគំនិតក្បត់ ក្នុងមាត្រា ៤៥៣ ដាក់ពន្ធនាគារបី៥ឆ្នាំ ទៅ១០ឆ្នាំ ហើយបើអ្នកប្រព្រឹត្តជាអ្នករាជការសាធារណៈវិញ ត្រូវជាប់ពន្ធនាគារពី១០ឆ្នាំ ទៅ២០ឆ្នាំ។ ជាមួយគ្នានេះ មាត្រា​ ៤៥៤ បង្ហាញថា បុគ្គលណាដែលចូលរួមអំពើរួមគំនិតក្បត់ ត្រូវលើកលែងឱ្យរួចពីការទទួលទោស ប្រសិនបើ មុនការចោទប្រកាន់បុគ្គលនោះ សារភាពកំហុសទៅសមត្ថកិច្ច ហើយមានការសហការដោយនាំឱ្យស្គាល់អត្តសញ្ញាណអ្នកចូលរួមដទៃទៀត។

គួរបញ្ជាក់ថា ក្នុងករណីដែលក្រុមជ្រុលនិយមក្រៅប្រទេសនាំគ្នាធ្វើបដិវត្តន៍ពណ៌ ចោទប្រកាន់រដ្ឋាភិបាលកម្ពុជា ដោយបំភ្លៃការពិត និងញុះញង់ឱ្យពលរដ្ឋខ្មែរធ្វើបាតុកម្មប្រឆាំងរដ្ឋាភិបាលចំពោះគម្រោង CLV នេះ នៅព្រឹកថ្ងៃទី១៣ ខែសីហា ឆ្នាំ២០២៤ អ្នកនាំពាក្យក្រសួងយុត្តិធម៌ ក៏បានចេញសេចក្តីថ្លែងការណ៍ ដោយបង្ហាញពីទិដ្ឋភាពច្បាប់៣ចំណុចទាក់ទងនឹងបទល្មើសឧបឃាត ទៅដល់មេខ្លោងដែលមានគំនិតផ្តួលរលំរដ្ឋាភិបាល រួមទាំងបុគ្គលដែលចូលរួមគម្រោងនេះ។

បន្ថែមពីការបង្ហាញទិដ្ឋភាពច្បាប់នេះ អ្នកនាំពាក្យក្រសួងយុត្តិធម៌ ក៏បានអំពាវនាវជូនដល់ជនរួមជាតិ សូមកុំចាញ់ឧបាយកលបោកបញ្ឆោតរបស់មេខ្លោងនៃចលនាបដិវត្តន៍ពណ៌ ដែលជាឧក្រិដ្ឋជនប្រឆាំងនឹងសន្តិសុខជាតិ ដែលអាចនាំឱ្យខ្លួនជាប់ពាក់ព័ន្ធនឹងអំពើរួមគំនិតក្បត់ ដែលត្រូវមានទោសធ្ងន់ធ្ងរតាមច្បាប់។ មិនតែប៉ុណ្ណោះ អ្នកនាំពាក្យក្រសួងយុត្តិធម៌ ក៏បានស្នើដល់កម្លាំងមានសមត្ថកិច្ចដែលពាក់ព័ន្ធ ចាត់វិធានការតឹងរ៉ឹងបំផុត ចំពោះឧក្រិដ្ឋកម្មប្រឆាំងសន្តិសុខរបស់រដ្ឋខាងលើ ដើម្បីការពារ និងថែរក្សាសន្តិសុខជាតិ ស្ថិរភាពក្នុងសង្គម៕

ដោយ៖ អុន ស្រីមាន