ប្រទេស ស៊ូដង់ Archives - Kampuchea Thmey Daily

តើមានប្រមុខរដ្ឋណាដែលធ្លាប់ប្រឈមដីកាចាប់ខ្លួនពី ICC ដូចលោកពូទីន ហើយអនុវត្តយ៉ាងណា?

Rann Reuy — Tue, 03 Sep 2024 08:42:12 +0000

ដីកាចាប់ខ្លួនប្រធានាធិបតីរុស្ស៊ី លោក វ៉្លាឌីមៀ ពូទីន ដែលចេញកាលពីថ្ងៃទី១៧ខែមីនាឆ្នាំ២០២៣ ដោយតុលាការឧក្រិដ្ឋកម្មអន្តរជាតិ (ICC) កំពុងទាក់ទាញការចាប់អារម្មណ៍យ៉ាងខ្លាំងនាពេលនេះ ស្របពេលលោកពូទីនចេញបំពេញទស្សនកិច្ចលើកដំបូងក្នុងរដ្ឋហត្ថលេខីនិងសមាជិករបស់ ICC។

ជុំវិញដំណើរទស្សនកិច្ចរបស់លោកពូទីនដែលបានបញ្ជាកងទ័ពរបស់ខ្លួនចូលលុកលុយប្រទេសអ៊ុយក្រែនដែលបានបង្កើតសង្គ្រាមជិត១០០០កន្លងមកនេះ និងការប្រឈមមុខនឹងដីកាចាប់ខ្លួនដែលបានចេញកាលពីថ្ងៃទី១៧ខែមីនា២០២៣ តើលោកពូទីនពិតជាត្រូវចាប់ខ្លួនក្នុងដំណើរទស្សនកិច្ចនៅរដ្ឋជាសមាជិក ICC ដូចជាម៉ុងហ្គោលីនោះមែនឬយ៉ាងណា?

ប្រធានាធិបតីរុស្ស៊ី វ៉្លាឌីមៀ ពូទីន (ស្តាំ) និង ប្រធានាធិបតីម៉ុងហ្គោលី។ TASS

តទៅនេះ កម្ពុជាថ្មី សូមទាញអារម្មណ៍មិត្តអ្នកអានមកតាមដានករណីស្រដៀងគ្នានេះ ដែលមានប្រមុខរដ្ឋក្នុងអំណាចធ្លាប់ប្រឈមដីកាចាប់ខ្លួនដែរ ដើម្បីបានជ្រាបពីដំណើររឿងថាតើមានការចាប់ខ្លួនឬទេ?

ប្រធានាធិបតីស៊ូដង់ លោក Omar al-Bashir ឡើងកាន់អំណាចដោយរដ្ឋប្រហារយោធា ជាប្រមុខរដ្ឋដំបូងដែលប្រឈមដីកាចាប់ខ្លួន។

Omar al-Bashir ពេលនៅមានអំណាច។ AP

តាមការចុះផ្សាយមួយចំនួន បានលើកឡើងករណីរបស់ប្រមុខរដ្ឋស៊ូដង់ដែលបានទទួលដីកាចាប់ខ្លួនរបស់តុលាការឧក្រិដ្ឋកម្ម ដោយចោទប្រកាន់ឧក្រិដ្ឋកម្មប្រឆាំងមនុស្សជាតិនិងឧក្រិដ្ឋកម្មសង្គ្រាម។

ក្រុមប្រឹក្សាជម្រះមុនសវនាការនៃ ICC បានចេញដីកាចាប់ខ្លួនលោក Omar al-Bashir នៅថ្ងៃទី៤ខែមីនា ឆ្នាំ២០០៩ ដោយចោទប្រកាន់លោកពីបទឧក្រិដ្ឋកម្មប្រឆាំងមនុស្សជាតិចំនួន៥ករណី និងឧក្រិដ្ឋកម្មសង្គ្រាមចំនួន២ករណី ដែលសំដៅទៅលើការសម្លាប់ជនស៊ីវិលនៃទីក្រុង Darfur។

តាមរយៈការធ្វើរដ្ឋប្រហារយោធាមួយ លោក Omar al-Bashir បានឡើងកាន់អំណាចកាលថ្ងៃទី៣០ខែមិថុនាឆ្នាំ១៩៨៩ និងបន្តកាន់អំណាននេះរហូតដល់ថ្ងៃទី១១ខែមេសាឆ្នាំ២០១៩ ដោយការធ្វើរដ្ឋប្រហារទម្លាក់វិញ។

លោក Omar al-Bashir ពេលមានអំណាចដឹកនាំយោធា។

ព័ត៌មានមានមូលដ្ឋានប្រចាំតំបន់មជ្ឈិមបូព៌ា Al Jazeera បានលើកឡើងថា បន្ទាប់ពីកាន់អំណាចរយៈពេល៣០ឆ្នាំ អំណាចរបស់លោក Omar al-Bashir បានបញ្ចប់ទៅវិញស្ទើរតែដូចរបៀបដែលលោកដណ្តើមកាន់អំណាចដែរ។

Omar al-Bashir ក៏បានប្រឈដីកាចាប់ខ្លួនលើកទី២ពីតុលាការឧក្រិដ្ឋកម្មអន្តរជាតិ ដែលបានចេញក្រោយមកនៅថ្ងៃទី១២ខែកក្កដា ឆ្នាំ២០១០ ដោយបន្ថែមបទចោទចំនួន៣ករណីទៀត គឺបទចោទអំពើប្រល័យពូជសាសន៍។ លោកជាប្រមុខរដ្ឋដំបូងគេដែលត្រូវបានតុលាការ ICC ចោទប្រកាន់។

តាមការអត្ថាធិប្បាយរបស់អ្នកច្បាប់ដែលបានចុះផ្សាយនៅសារព័ត៌មាន The Dailystar រដ្ឋាភិបាលស៊ូដង់បានបដិសេធការអនុវត្តដីកានោះ ដោយសារប្រទេសស៊ូដង់មិនមែនជារដ្ឋភាគីនៃលក្ខន្តិកៈទីក្រុងរ៉ូមដែលបង្កើត ICC ដូច្នេះហើយបានអះអាងថាខ្លួនមិនចាំបាច់ប្រតិបត្តិដីកានោះទេ។

ទោះជាយ៉ាងណាក៏ដោយ ដំណោះស្រាយក្រុមប្រឹក្សាសន្តិសុខអង្គការសហប្រជាជាតិលេខ ១៥៩៣ បានបង្វែរប្រទេសស៊ូដង់ទៅ ICC ដែលផ្តល់យុត្តាធិការរបស់ ICC លើឧក្រិដ្ឋកម្មអន្តរជាតិដែលបានប្រព្រឹត្តនៅក្នុងប្រទេសស៊ូដង់ និងកាតព្វកិច្ចរដ្ឋាភិបាលរបស់ខ្លួនក្នុងការសហការជាមួយ ICC ។

បន្ទាប់ពីការចោទប្រកាន់ លោក al-Bashir បានធ្វើទស្សនកិច្ចទៅប្រទេសមួយចំនួននៅអាស៊ី អឺរ៉ុប និងអាហ្វ្រិក ដែលប្រទេសទាំងអស់នេះបដិសេធមិនចាប់ខ្លួនគាត់។ ក្នុងឆ្នាំ២០១៥ ក្នុងអំឡុងពេលដំណើរទស្សនកិច្ចទៅកាន់ប្រទេសអាហ្វ្រិកខាងត្បូងសម្រាប់កិច្ចប្រជុំសហភាពអាហ្រ្វិក (AU) តុលាការអាហ្រ្វិកខាងត្បូងបានហាមឃាត់លោក al-Bashir មិនឱ្យចាកចេញពីប្រទេស ខណៈពេលដែលវាពិចារណាថាតើត្រូវប្រគល់លោកទៅឱ្យ ICC ហើយក្រោយមកក៏ដោះលែងវិញ។

ប្រធានាធិបតីស៊ូដង់ Omar al-Bashir ក្នុងកិច្ចប្រជុំអន្តរជាតិពេលមានអំណាច។

ក្រោយមកទៀត al-Bashir បានទៅចូលរួមប្រជុំកំពូលប្រទេសតំបន់អារ៉ាប់ហៅថា Arab League ក្នុងឆ្នាំ២០១៧ ក្នុងប្រទេសហ្ស៊កដានី ដែលមិនបានអនុវត្តតាមដីកាចាប់ខ្លួននោះដែរ។

អង្គការសហប្រជាជាតិបាននិយាយថា ស្ថិតក្រោមអំណាចរបស់ al-Bashir ប្រជាជន៣០ម៉ឺននាក់ត្រូវបានសម្លាប់ និង២,៥លាននាក់បានបាត់បង់ទីជម្រកក្នុងជម្លោះដ៏ធំមួយនៅភាគខាងលិចប្រទេសក្នុងឆ្នាំ២០០៣ក្នុងជម្លោះដ៏សែនរុំារ៉ៃ។

ទោះបីមានការទាមទារម្តងហើយម្តងទៀតពីស្ថាប័នអន្តរជាតិឱ្យបង្វែរការឃុំខ្លួន al-Bashir

ទៅឱ្យទទួលទោសនៅ ICC រដ្ឋាភិបាលស៊ូដង់ដែលស្ថិតក្រោមក្រុមប្រឹក្សាមានទាំងយោធា និងស៊ីវិល បានត្រឹមសន្យាប៉ុណ្ណោះ ហើយរហូតដល់ពេលនោះអតីតប្រមុខរដ្ឋស៊ូដង់ដែលរងការចោទពីបទឧក្រិដ្ឋនៅតែមិនត្រូវបានបញ្ជូនប្រឈមមុខច្បាប់អន្តរជាតិនៅឡើយ៕

The post តើមានប្រមុខរដ្ឋណាដែលធ្លាប់ប្រឈមដីកាចាប់ខ្លួនពី ICC ដូចលោកពូទីន ហើយអនុវត្តយ៉ាងណា? appeared first on Kampuchea Thmey Daily.

បាតុករជាង១០០នាក់ ត្រូវស្លាប់និងរបួស ក្នុងរដ្ឋប្រហារនៅ ស៊ូដង់

Sok Sovann — Tue, 26 Oct 2021 01:59:32 +0000

មនុស្សយ៉ាងតិច៧នាក់ ត្រូវបានគេរាយការណ៍ថា ស្លាប់និងប្រហែល១៤០នាក់ រងរបួស បន្ទាប់ពីទាហានបានបាញ់ទៅលើហ្វូងមនុស្ស ដែលប្រឆាំងនឹងការកាន់កាប់របស់យោធានៅក្នុងប្រទេសស៊ូដង់។

ក្រុមបាតុករបានដើរតាមដងផ្លូវ បន្ទាប់ពីកងកម្លាំងប្រដាប់អាវុធ បានរំលាយការគ្រប់គ្រងស៊ីវិល ចាប់ខ្លួនមេដឹកនាំនយោបាយ និងបានអំពាវនាវឲ្យដាក់ប្រទេសក្នុងភាពអាសន្ន កាលពីថ្ងៃចន្ទ។

កងទ័ពត្រូវបានគេរាយការណ៍ថា បានចូលឆែកឆេរតាមផ្ទះនៅក្នុងរដ្ឋធានី Khartoum ដោយចាប់ខ្លួនអ្នករៀបចំការតវ៉ាក្នុងតំបន់។

រដ្ឋប្រហារនេះ ត្រូវបានថ្កោលទោសជុំវិញពិភពលោក ហើយអាមេរិកបានផ្អាកជំនួយជាទឹកប្រាក់ ៧០០ លានដុល្លារ។

មេដឹកនាំរដ្ឋប្រហារគឺលោកឧត្តមសេនីយ៍ Abdel Fattah Burhan បានស្តីបន្ទោសភាពអស្ថិរភាពនយោបាយ ជាហេតុនាំឲ្យយោធាធ្វើសកម្មភាព។

គួរបញ្ជាក់ថា មេដឹកនាំស៊ីវិល និងសមភាគីយោធារបស់ពួកគេ មានជម្លោះចាប់តាំងពីមេដឹកនាំយូរអង្វែងលោក Omar al-Bashir ត្រូវបានផ្តួលរំលំកាលពី២ឆ្នាំមុន៕

ប្រែសម្រួល៖ Vann Vann

ប្រភព៖ BBC

ចុចអាន៖ ប្រទេសស៊ូដង់ កំពុងផ្ទុះរដ្ឋប្រហារ

The post បាតុករជាង១០០នាក់ ត្រូវស្លាប់និងរបួស ក្នុងរដ្ឋប្រហារនៅ ស៊ូដង់ appeared first on Kampuchea Thmey Daily.

ប្រទេសស៊ូដង់ កំពុងផ្ទុះរដ្ឋប្រហារ

Sok Sovann — Mon, 25 Oct 2021 06:34:53 +0000

យោធាក្នុងប្រទេសស៊ូដង់ បានដាក់លោកនាយករដ្ឋមន្ត្រី Abdalla Hamdok ក្រោមការឃុំខ្លួនក្នុងផ្ទះ និងបានឃុំឃាំងសមាជិកនៃថ្នាក់ដឹកនាំស៊ីវិលជាច្រើននាក់ទៀតរបស់ប្រទេស នៅក្នុងការធ្វើរដ្ឋប្រហារ។

នាយករដ្ឋមន្ត្រីស៊ូដង់លោក Abdalla Hamdok

ទូរទស្សន៍ដែលគ្រប់គ្រងដោយអារ៉ាប៊ីសាអ៊ូឌីតបានផ្សាយថា កងកម្លាំងយោធា បានឡោមព័ទ្ធផ្ទះរបស់លោកនាយករដ្ឋមន្ត្រីកាលពីព្រឹកថ្ងៃចន្ទ មុនពេលដាក់គាត់ ក្រោមការឃុំខ្លួនក្នុងផ្ទះ។

មន្ត្រីស៊ីវិលផ្សេងទៀតដែលត្រូវបានចាប់ខ្លួន រួមមានទាំងរដ្ឋមន្ត្រីក្រសួងឧស្សាហកម្មលោក Ibrahim al-Sheikh និងអភិបាលក្រុង Khartoum លោក Ayman Khalid ផងដែរ។

គួរបញ្ជាក់ថា ប្រទេសស៊ូដង់ បានជាប់ក្នុងភាពតានតឹង ចាប់តាំងពីផែនការធ្វើរដ្ឋប្រហារបរាជ័យកាលពីខែមុន បានបង្កឲ្យមានការរើសអើងដ៏ជូរចត់រវាងក្រុមយោធា និងក្រុមជនស៊ីវិល ដែលមានបំណងបែងចែកអំណាចបន្ទាប់ពីការផ្តួលរំលំមេដឹកនាំយូរអង្វែងរបស់ប្រទេសលោក Omar al-Bashir។

លោក Al-Bashir ត្រូវបានផ្តួលរំលំបន្ទាប់ពីការតវ៉ាតាមដងផ្លូវរយៈពេលច្រើនខែក្នុងឆ្នាំ២០១៩ ហើយការផ្លាស់ប្តូរនយោបាយដែលត្រូវបានព្រមព្រៀងបន្ទាប់ពីការដកតំណែងរបស់លោក គឺមានន័យថា ការបោះឆ្នោតនឹងអាចរៀបចំធ្វើឡើងនៅចុងឆ្នាំ២០២៣៕

ប្រែសម្រួល៖ Vann Vann

ប្រភព៖ Al Jazeera

ចុចអាន៖ កងទ័ពមីយ៉ាន់ម៉ាព្រមានមិនឲ្យប្រើពាក្យ “រដ្ឋប្រហារ”

The post ប្រទេសស៊ូដង់ កំពុងផ្ទុះរដ្ឋប្រហារ appeared first on Kampuchea Thmey Daily.

កូវីដ១៩ផ្តាច់ជីវិតអតីតនាយករដ្ឋមន្ត្រី ស៊ូដង់

Sok Sovann — Thu, 26 Nov 2020 07:37:50 +0000

អតីតនាយករដ្ឋមន្ត្រីស៊ូដង់លោក Sadiq al-Mahdi បានទទួលមរណភាពនៅព្រឹកថ្ងៃព្រហស្បតិ៍នេះដោយសារវីរុសកូរ៉ូណាក្នុងមន្ទីរពេទ្យរបស់ប្រទេសអារ៉ាប់រួម។ នេះបើតាមសេចក្តីថ្លែងការណ៍ពីគណបក្ស National Umma Party (NUP) របស់គាត់។

លោក Al-Mahdi អាយុ៨៤ឆ្នាំត្រូវបានបញ្ជូនទៅកាន់មន្ទីរពេទ្យក្នុងប្រទេសស៊ូដង់កាលពីខែមុនបន្ទាប់ពីឆ្លងជំងឺកូវីដ១៩ហើយត្រូវបានផ្ទេរទៅកាន់មណ្ឌលសុខភាពមួយក្នុងប្រទេសអារ៉ាប់រួមដើម្បីធ្វើការព្យាបាលបន្ត។

លោក Al-Mahdi បានបម្រើការជានាយករដ្ឋមន្ត្រីពីរដងក្នុងឆ្នាំ១៩៦៧និងពីឆ្នាំ១៩៨៦ដល់១៩៨៩មុនពេលត្រូវបានផ្ដួលរំលំក្នុងរដ្ឋប្រហារដែលដឹកនាំដោយអតីតប្រធានាធិបតី Omar Al-Bashir។

គាត់បានដឹកនាំគណបក្ស NUP អស់រយៈពេលប្រហែលប្រាំទសវត្សរ៍៕

ប្រែសម្រួលដោយ៖ Vann Vann

ប្រភព៖ Anadolu

ចុចអាន៖ Joe Biden ៖ “យើងកំពុងធ្វើសង្គ្រាមជាមួយកូវីដ មិនមែនជាមួយអ្នកណាផ្សេងទេ”

ចុចអាន៖ ម៉ាសអំណោយរដ្ឋាភិបាលកម្ពុជា បានដឹកទៅដល់ព្រលានយន្តហោះណៃពិដោយរបស់មីយ៉ាន់ម៉ា

The post កូវីដ១៩ផ្តាច់ជីវិតអតីតនាយករដ្ឋមន្ត្រី ស៊ូដង់ appeared first on Kampuchea Thmey Daily.

ប្រទេស ស៊ូដង់ Archives - Kampuchea Thmey Daily

តើ​​មាន​ប្រមុខ​រដ្ឋណា​ដែល​ធ្លាប់​ប្រឈម​​ដី​កា​ចាប់​ខ្លួន​​ពី​ ICC ដូច​លោក​ពូទីន ហើយ​អនុវត្តយ៉ាងណា​​?​

បាតុករជាង១០០នាក់ ត្រូវស្លាប់និងរបួស ក្នុងរដ្ឋប្រហារនៅ ស៊ូដង់

ប្រទេសស៊ូដង់ កំពុងផ្ទុះរដ្ឋប្រហារ

កូវីដ១៩ផ្តាច់ជីវិតអតីតនាយករដ្ឋមន្ត្រី ស៊ូដង់

តើមានប្រមុខរដ្ឋណាដែលធ្លាប់ប្រឈមដីកាចាប់ខ្លួនពី ICC ដូចលោកពូទីន ហើយអនុវត្តយ៉ាងណា?