ការបើកសម្ពោធនេះបានធ្វើឡើងដំណើរនឹងពិធីបើកយុទ្ធនាការផ្សព្វផ្សាយស្ដីពីផលផលិតផលជលផល ដែល​សហការរៀបចំដោយក្រសួងកសិកម្ម រុក្ខាប្រមាញ់ និងនេសាទ សហភាពអឺរ៉ុប និងអង្គការ UNIDO តាមរយៈ​គម្រោង​អភិ​វឌ្ឍន៍ជលផលក្រោយប្រមូលផល(CAPFISH-Capture)។

«ម្សៅប្រហុក» នេះត្រូវបានបង្កើតឡើងនៅខែកុម្ភៈ ឆ្នាំ២០២៣ ដោយសិប្បកម្មផលិត និងកែច្នៃផលិតផលជលផល ខនហ្វីរេល ស្ថិតនៅភូមិបាក់ខែង សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ។ បើ​តាមលោក ហៃ លីអ៊ាង ប្រធានអគ្គនាយកក្រុមហ៊ុន ខនហ្វីរេល គម្រោង​កែច្នៃ​ម្សៅប្រហុកនេះ ជាចក្ខុវិស័យក្នុងការលើកកម្ពស់ប្រហុកប្រពៃណីខ្មែរ ដោយបំលែងទៅជាទម្រង់ប្រភេទ​ម្សៅ ដើម្បីងាយស្រួលក្នុងការ​ប្រើ និងមានការ​វេចខ្ចប់​ប្រកប​ទៅ​ដោយ​សុវត្ថិភាព និង​គុណភាពខ្ពស់បំផុត។

​របកគំហើញ​ថ្មីនេះ មិនត្រឹមតែជា​ការ​ចូលរួម​អភិរក្សនូវ​រសជាតិដើមដ៏ល្អឥតខ្ចោះរបស់​ប្រហុក​ខ្មែរនោះទេ ក៏ប៉ុន្តែថែមទាំងបង្កើនភាពងាយស្រួលក្នុងការប្រើប្រាស់ រក្សាទុក​ដាក់​ និងអនាម័យខ្ពស់​ផងដែរ ដែល​ធ្វើ​ឱ្យ​ប្រហុកម្សៅរបស់​ខនហ្វីរេល​ខ្មែរ លេចធ្លោនៅលើទីផ្សារជាតិ និងអន្តរជាតិ។ លោក ហៃ លីអ៊ាង គូសបញ្ជាក់បន្ថែមយ៉ាងដូច្នេះ ហើយលោក ក៏បានអះអាងពីការទទួលបាននូវការគាំទ្រយ៉ាងខ្លាំងលើផលិតផលប្រហុកម្សៅនេះពីសំណាក់ទីផ្សារជាតិ និងអន្តរជាតិ។

អញ្ជើញជាអធិបតីក្នុងពិធីសម្ពោធបើកឱ្យដំណើរការសិប្បកម្មផលិត និងកែច្នៃប្រហុកម្សៅរបស់ក្រុមហ៊ុន ខនហ្វីរេល នេះ លោក ហាស់ សារ៉េត រដ្ឋលេខាធិការក្រសួងកសិកម្ម បានថ្លែងអបអរសាទរចំពោះ​ការបើកដំណើរការសិប្បកម្មផលិតនិងកែច្នៃប្រហុកម្សៅ ដែលត្រូវបានធ្វើទំនើបកម្ម និងកែលម្អយ៉ាងល្អប្រសើរប្រកបដោយមោទនភាព ដោយប្រើប្រាស់វត្ថុធាតុដើមក្នុងស្រុក គឺប្រហុកសៀមរាប ដែលជាម៉ាកស្គាល់ភូមិសាស្រ្តទំនិញ (GI)។ លោក បន្តថា ក្រោមកិច្ចសហការជាមួយគម្រោង CAPFISH​-Capture ក្រុមហ៊ុន ខនហ្វីរេល កំពុងផ្សព្វផ្សាយប្រហុកម្សៅប្រកបដោយភាពច្នៃប្រឌិតរបស់ខ្លួនទៅកាន់ទីផ្សារអន្តរជាតិ។

តាមការកត់សម្គាល់របស់លោករដ្ឋលេខាធិការ នេះមិនត្រឹមឆ្លុះបញ្ចាំងពីសមត្ថភាពរបស់សហគ្រាសប៉ុណ្ណោះទេ ក៏ប៉ុន្តែព្រឹត្តិការណ៍នេះក៏ជាសក្ខីភាពនៃកិច្ចសហការយ៉ាងជិតស្និទ្ធរវាងស្ថាប័នរដ្ឋ និងវិស័យឯកជនក្នុងការជំរុញវិស័យកសិ-ម្ហូបអាហារនៅកម្ពុជា ហើយក៏បានបញ្ជាក់នូវការប្តេជ្ញាចិត្ត និងកិច្ចខិតខំប្រឹងប្រែងរួមគ្នាដើម្បីឆ្ពោះទៅរកកំណើនធុរកិច្ចប្រកបដោយចីរភាព សុវត្ថិភាពម្ហូបអាហារ និងការរួមចំណែករបស់វិស័យជលផលកម្ពុជាក្នុងការអភិវឌ្ឍសេដ្ឋកិច្ចប្រកបដោយបរិយាប័ន្ន។

លោក អ៊ីហ្គ័រ ឌ្រីសម៉ាន់ ឯកអគ្គរដ្ឋទូតសហភាពអឺរ៉ុបប្រចាំកម្ពុជា បានថ្លែងថា សហភាពអឺរ៉ុប មានមោទនភាពក្នុងការគាំទ្រកិច្ចខិតខំប្រឹងប្រែងនេះ និងចូលរួមចំណែកក្នុងការជំរុញការកែច្នៃក្នុងស្រុក បង្កើតការងារសមរម្យ និងលើកកម្ពស់ស្តង់ដារសុវត្ថិភាពម្ហូបអាហារខ្ពស់បំផុត ដែលជាការត្រួសត្រាយផ្លូវសម្រាប់ការនាំចេញកើនឡើង។ លោក ថា សមិទ្ធផលនេះហាក់ដូចជាតូច ប៉ុន្តែបង្ហាញពីសក្តានុពលដ៏ធំធេងក្នុងការបំពេញតម្រូវការក្នុងស្រុក រួមចំណែកដល់ការរីកលូតលាស់បៃតងជាតិ និងជួយឲ្យកម្ពុជាអាចឈរជើងប្រកួតប្រជែងក្នុងទីផ្សារពិភពលោទៀត៕

The post សិប្បកម្មកែច្នៃ«ម្សៅប្រហុក»ខ្មែរដំបូងដែលទទួលស្គាល់ស្ដង់ដារសុវត្ថិភាពចំណីអាហារអន្តរជាតិ ត្រូវបានសម្ពោធផ្លូវការ appeared first on Kampuchea Thmey Daily.

ជា​ផលិតផល​ថ្មី​របស់​ក្រុមហ៊ុន ខន​ហ្វីរេល ដែលក្រុមហ៊ុន​កំពុង​យ៉ាង​យកចិត្ត​ទុកដាក់​រក្សា​កិត្តិនាម​ម្ហូប​ដែល​ផ្សារ​ភ្ជាប់​ប្រពៃណី​វប្បធម៌​ខ្មែរ តាម​រយៈ​ការ​កែច្នៃ​ជា​ផលិតផល​ថ្មី និង​ដែល​កំពុង​សាកល្បង​បញ្ចេញ​លក់​លើ​ទីផ្សារ​ក្នុងស្រុក​មុន​ឈាន​ទៅ​ចាប់​ទីផ្សារ​នៅ​ក្រៅ​ប្រទេស។

លោក​ ហៃ លី​អ៊ាង ប្រធាន​អគ្គនាយក​ក្រុមហ៊ុន​ខនហ្វីរេល​បាន​ឲ្យ​ដឹង​ថា ប្រហុក​ជា​អត្តសញ្ញាណ​តាំង​ពី​ជីដូនជីតា​មក ប៉ុន្តែ​ជា​អកុសល​ដោយសារ​ស្រុក​ទេស​មាន​សង្គ្រាម ទើប​មិន​មានការ​អភិវឌ្ឍ​កែច្នៃ​ប្រហុក​ខ្មែរ​ឲ្យ​សមស្រប​ សម្រាប់​ទាញ​យក​ប្រយោជន៍​មក​ប្រើប្រាស់​ឲ្យ​បាន​ទូលំទូលាយ​។

គម្រោង​កែច្នៃ​ប្រហុក​ជា​ម្សៅ មាន​គោល​បំណង​លើក​កម្ពស់​ប្រហុក​ប្រពៃណី​ខ្មែរ​ ដោយ​ប្រែ​ក្លាយ​ជា​ទម្រង់​ផលិតផល​ថ្មី ដែល​ងាយ​ស្រួល​ទុកដាក់​និង​ប្រកប​ដោយ​គុណភាព​ខ្ពស់។ នេះបើតាមលោក​ ហៃ លី​អ៊ាង។

ប្រហុក​គឺ​ជា​មុខ​ម្ហូប​ដ៏​សំខាន់ ដែលគេ​និយម​ប្រើប្រាស់​ក្នុង​ការ​ចម្អិន​ជា​ម្ហូប​ខ្មែរ ដោយសារ​ប្រហុក​មាន​រសជាតិ​មិន​អាច​ខ្វះ​បាន និង​មាន​សារសំខាន់​សម្រាប់​វប្បធម៌​ខ្មែរ។ តាម​រយៈ​ការ​បម្លែង​ប្រហុក​ឲ្យ​ទៅ​ជា​ម្សៅ មិន​ត្រឹម​តែ​រក្សា​អាហារ​ឆ្ងាញ់​បែប​ប្រពៃណី​ប៉ុណ្ណោះ​ទេ ថែម​ទាំង​ធ្វើ​ឲ្យ​កាន់តែ​មាន​ភាព​ងាយស្រួល​ក្នុង​ការ​ប្រើប្រាស់ ទុកដាក់ អនាម័យ​ខ្ពស់ និង​អាច​ប្រើប្រាស់​បាន​ទាំង​ម្ហូប​ខ្មែរ និង​​ម្ហូប​បរទេស​មួយ​ចំនួន​ទៀត​ផង។

លោក ហៃ លីអ៊ាង បាន​បញ្ជាក់ថា ប្រហុក​ដែល​កែច្នៃ​ថ្មី​អាច​ប្រើប្រាស់​ជា​គ្រឿង​ផ្សំ​​បន្ថែម​យ៉ាង​ល្អ​បំផុត សម្រាប់​មុខ​ម្ហូប​អឺរ៉ុប ដូចជា​ភីហ្សា ស្ពា​ហ្គឺទី ហ៊ែមបឺហ្គ័រ ឈីស​ជា​ដើម។

«ប្រហុក​កែច្នៃ​នេះ​មានការ​ទទួល​គាំទ្រ​ខ្លាំង។ ខ្ញុំ​បាន​នាំ​ឲ្យ​ចុងភៅ​បារាំង​សាកល្បង។ មេ​ចុងភៅ​បារាំង​សរសើរ​និង​ទទួលស្គាល់​ពី​រសជាតិ​សម្រាប់​បន្ថែម​លើ​ម្ហូប​អាហារ»។

លោក​បន្ត​ថា «ប្រហុក​របស់​យើង​ធំ​ក្លិន​ខ្លាំង ហើយ​ប្រទេស​ខ្លះ​មិន​អនុញ្ញាត​ឲ្យ​នាំ​ចូល​ទេ។ ប៉ុន្តែ​ប្រហុក​កែច្នៃ​នេះ​មាន​រសជាតិ​ឆ្ងាញ់​ អាច​ទុក​បាន​យូរ ក្រៅ​ពី​អាច​ប្រើ​ក្នុង​សម្ល អាច​ជា​គ្រឿង​ផ្សំ​បន្ថែម​ក្នុង​អាហារ​បស្ចឹម​ប្រទេស​អត់​មាន​ធំ​ក្លិន​ឆ្អាប​នោះ​ទេ»។

លោកថា ជនជាតិ​ខ្មែរ​មាន​ផលិតផល​ជា​អត្តសញ្ញាណ​ជាច្រើន​ក្រៅ​ពី​អង្គរវត្ត​។ ម្រេច​កំពតក៏​ត្រូវ​បាន​ពិភពលោក​ហៅ​ថា​ជា​ស្តេច​ម្រេច​ទទួល​ស្គាល់​លើ​ឆាក​ពិភពលោក។

លោក​ហៃ លីអ៊ាង បាន​បញ្ជាក់គោលដៅ​របស់​ក្រុមហ៊ុន​ខនហ្វីរេល គឺ​ការ​បង្ហាញ​ស្នាដៃ​បន្សល់​ទុក​ពី​ដូន​តា និង​ការ​វិវឌ្ឍ​បែប​វិទ្យាសាស្ត្រ​ក្នុង​ការ​ជួយ​បង្កើត​ផលិតផល​ថ្មីៗ​ដែល​មាន​លក្ខណៈ​អត្តសញ្ញាណ​ជាតិ​ឲ្យ​អន្តរជាតិ​ទទួល​ស្គាល់។

បើតាមលោក ហៃ លី​អ៊ាង រោងចក្រ​ថ្មី​របស់​ក្រុមហ៊ុន​អាច​ផលិត​កែច្នៃប្រហុក​​មួយ​ថ្ងៃ​បាន​ជាង​មួយ​តោន​ចេញ​ពី​ប្រហុក​ធម្មជាតិ​។ យ៉ាងណាមិញ ប្រហុក​ដែល​កែ​ច្នៃ​នេះ​មិន​ទាន់​នាំ​ចេញ​ទៅក្រៅ​ទេ ទើប​តែ​សាកល្បង​លក់​ក្នុង​ទីផ្សារ​ក្នុង​ស្រុក​សិន។ គោលដៅ​របស់​សហគ្រាស​គឺ នាំ​ចេញ​ទៅទីផ្សារ​អន្តរជាតិ។

គុណភាព​ប្រហុក​កែច្នៃ​ពី​សហគ្រាស​​ខំហ្វីរេល មាន​កម្រិត​ស្តង់ដា​ដែល​អាច​ប្រើ​ប្រាស់​គ្រប់​ម្ហូប​អាហារ​ជា​គ្រឿង​ផ្សំ​​ក្នុង​ម្ហូប​គ្រប់​ប្រភេទ រហូត​អាច​ប្រើប្រាស់​ជាមួយ​​អាហារ​បស្ចិម​ប្រទេស​បាន​។ បើតាមលោក ហៃ លីអ៊ាង ប្រហុក​ជា​ម៉ាក​ទំនិញ​សម្គាល់​ភូមិសាស្ត្រ នឹង​ទទួល​បាន​កម្មសិទ្ធិ​នា​ពេល​ឆាប់ៗ​ខាង​មុខ​នេះ។

ម្សៅ​ប្រហុក​ដែលកែច្នៃ​ពីសហគ្រាស​ខនហ្វីរេល​មាន ៥ រសជាតិផ្សេង​គ្នា មាន​រសជាតិ​មធ្យម ​រសជាតិ​ស្រាល រសជាតិ​ដិត រសជាតិ​រំដេង និងរសជាតិ​ស្លឹក​ក្រូច​សើច។

ប្រធាន​ទីប្រឹក្សា​បច្ចេកទេស​របស់​អង្គការ UNIDO បាន​ឲ្យ​ដឹង​ថា មិន​ទាន់​មាន​ផលិតផល​ជលផល​ណាមួយ​ពី​ប្រទេស​កម្ពុជា​ត្រូវ​បាន​នាំ​ចេញ​ជា​ផ្លូវ​ការ​ទៅ​ប្រទេស​នៅ​សហភាព​អឺរ៉ុប​នៅ​ឡើយ​ទេ។ ការ​នាំចេញ​ផលិតផល​ជលផល​ទៅ​អឺរ៉ុប​ត្រូវ​គោរព​ស្តង់ដា​ខ្ពស់​ជា​ពិសេស​ពាក់ព័ន្ធ​អនាម័យ និង​សុវត្ថិភាព​គុណភាព​។ នេះបើតាមលោក សេតធី ស៊ីថារ៉ាម៉ា ថមបាធូ ប្រធានទីប្រឹក្សាបច្ចេកទេស អង្គការ UNIDO។

យ៉ាងណាមិញ លោក លោក សេតធី ស៊ីថារ៉ាម៉ា ថមបាធូ បាន​អះអាងថា អង្គការ UNIDO តាម​រយៈ​គម្រោង Capfish Capure កំពុង​គាំទ្រ​សហគ្រាស​ជលផល​ក្នុងស្រុក​ទាំង​បច្ចេកទេស​និង​ហិរញ្ញវត្ថុ ដើម្បី​កសាង​សមត្ថភាព​លើ​ការ​ពង្រឹង​ស្តង់​ដា​ផលិតផល​​ ក្នុងគោលបំណងរួមចំណែកលើការសម្រេចនូវចក្ខុវិស័យរយៈពេលវែងរបស់រាជរដ្ឋាភិបាលកម្ពុជាក្នុងការអភិវឌ្ឍសង្គមនិងសេដ្ឋកិច្ច សន្តិសុខស្បៀង និងកាត់បន្ថយភាពក្រីក្រ។

ដោយ​ទទួលបានការឧបត្ថម្ភថវិកាពីសហគមន៍អឺរ៉ុប គម្រោងអភិវឌ្ឍន៍ជលផលក្រោយប្រមូលផល CAPFish-Capture ​ផ្តោត​លើ​ការ​ពង្រឹងសមត្ថភាព ស្ថាប័ននៃអាជ្ញាធរមាន​សមត្ថ កិច្ចក្នុងការបង្កើតប្រព័ន្ធ ត្រួត​ពិនិត្យ​គុណភាព សុវត្ថិភាពផលិតផលជលផល ជួយគាំទ្រដល់វិស័យឯកជនក្នុងការអភិវឌ្ឍ ការ​កែច្នៃ​ផលជលផល តាមរយៈការកសាងសមត្ថភាពជំនាញ ការអនុវត្តប្រព័ន្ធ​សុវត្ថិភាព​ចំណីអាហារ ការ​គាំទ្រ​ថវិកា វិនិយោគ និងការបង្កើតយន្តការគាំទ្រដល់ធុរកិច្ច ដើម្បី​សម្រេចបានអនុលោម​ភាព​សុវត្ថិភាព​ម្ហូបអាហារនិ​ង​សម្រួលឱ្យមានការនាំចូល​ដោយផ្ទាល់និងជាផ្លូវការផលិតផល​ជលផល​កម្ពុជាចូលទៅកាន់ទីផ្សារតំបន់និងអន្តរជាតិ ផ្តោតជាពិសេសទីផ្សារសហភាពអឺរ៉ុប៕

The post ​ប្រហុក​ខ្មែរ​កែច្នៃ​កាន់តែ​ទំនើប​មួយ​ថ្ងៃ​បាន ១ តោន កំពុង​ពង្រឹង​លទ្ធភាព​នាំ​ចេញទៅ​ក្រៅ​ប្រទេស appeared first on Kampuchea Thmey Daily.

នៅតែមានឈ្មួញនាំប្រហុកត្រីពីវៀតណាមចូលភូមិសាស្ត្រខេត្តតាកែវដដែល រហូតមន្ត្រីជំនាញខណ្ឌរដ្ឋបាលជលផលខេត្តតាកែវស្ទាក់ចាប់បានរថយន្តដឹកប្រហុកមួយគ្រឿង ដែលមានដឹកប្រហុកត្រី ២០ប៉េ ប្រហែលជិត១តោន យកមករក្សាទុក ដើម្បីពិនិត្យនៅស្នាក់ការខណ្ឌរដ្ឋបាលជលផល។

ជុំវិញការបង្ក្រាបរថយន្តដឹកប្រហុកនេះ មិនទាន់មានការបកស្រាយបំភ្លឺពីមន្ត្រីជំនាញខណ្ឌរដ្ឋបាលជលផល ក៏ដូចជាមន្ត្រីជំនាញសាខា ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ ខេត្តតាកែវហៅកាត់ថា (កបប) នៅឡើយទេ នៅព្រឹកថ្ងទី២៨ ខែឧសភា ឆ្នាំ២០២៤នេះ។

ប្រជាពលរដ្ឋជាច្រើនលើកសំនួរថា តើមានមន្ត្រីណាខ្លះ ទទួលផលប្រយោជន៍ពីប្រហុកវៀតណាម បានជាឈ្មួញនៅតែឆ្លៀតនាំចូលមិនខ្លាចរអាសមត្ថកិច្ចជំនាញខេត្តតាកែវដូច្នេះ។

សូមរំឭកដែរថា រឿងប្រហហុកវៀតណាមនេះ កន្លងមកមន្ត្រីជំនាញ ក ប ប ខេត្តតាកែវ ក៏ដូចជាអាជ្ញាធរពាក់ព័ន្ធនានា បានធ្វើការបង្ក្រាបនឹងដុតបំផ្លាញចោលត្រីប្រហុកទាំងតោនៗបន្ទាប់ពីបង្ក្រាបបានហើយរកឃើញសារធាតុគីមីហាមឃាត់ដាក់លាយចូលលើប្រហុកត្រីដែលនាំចូលដោយខុសច្បាប់ពីប្រទេសវៀតណាម៕

អត្ថបទ៖ វីរៈ

The post រដ្ឋបាលជលផលខេត្តតាកែវ បន្តចាប់ឃាត់រថយន្ត​ដឹកប្រហុកត្រីលួចនាំចូលពីវៀតណាមមួយគ្រឿងទៀត appeared first on Kampuchea Thmey Daily.

ទាក់ទងនឹងការកែច្នៃប្រហុកសម្រាប់ពាណិជ្ជកម្មនេះ លោក ឌិត ទីណា រដ្ឋមន្ត្រីក្រសួងកសិកម្ម បានណែនាំឱ្យមាន​ការស្រាវជ្រាវបន្ថែមឱ្យបានច្បាស់លាស់ សម្រាប់ការប្រកួតប្រជែងនាពេលខាងមុខ ដោយផ្តោតទៅលើទាំង​បច្ចេកទេសនៃការកែច្នៃ ក្លិន រសជាតិ និងខ្សែចង្វាក់តម្លៃតាំងពីអ្នកនេសាទរហូតកែច្នៃ ដើម្បីឱ្យមានប្រសិទ្ធភាព និងនិរន្តរភាពសេដ្ឋកិច្ចពិតប្រាកដ។ លើសពីនេះទៀត ត្រូវយកចិត្តទុកដាក់លើការចុះបញ្ជីកម្មសិទ្ធិបញ្ញា និងឱ្យមានការទទួលស្គាល់ជាលក្ខណៈអន្តរជាតិ។

លោករដ្ឋមន្រ្តីលើកឡើងបែបនេះ នៅក្នុងកិច្ចប្រជុំពិភាក្សាការងារស្តីពីការជំរុញការកែច្នៃប្រហុកសម្រាប់ការនាំចេញ និងគម្រោងអភិរក្ស អភិវឌ្ឍន៍ព្រៃកោងកាង ស្ថិតនៅភូមិកែប សង្កាត់កែប ក្រុងកែប ខេត្តកែប ជាមួយមូលនិធិគីណាល់ នៅទីស្តីការក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី ២៩ មិថុនា។

ប្រហុក ត្រូវបានចាត់ទុកជាអាហារប្រពៃណីសម្រាប់ប្រជាជនកម្ពុជា ដែលជាផលិតផលមួយដ៏សំខាន់​ចូលរួមក្នុងសន្តិសុខ​ស្បៀង និងផ្តល់អាហារូបត្ថម្ភ ជាពិសេសសម្រាប់ប្រជាជននៅទីជនបទ។ បើតាមអង្គការ UNIDO បានឱ្យដឹងថា ប្រជាជន​កម្ពុជាបរិភោគប្រហុកជាមធ្យមប្រមាណចំនួន ១៨ក្រាម សម្រាប់មនុស្សម្នាក់ ក្នុងមួយថ្ងៃ។

លោកឧកញ៉ា ហៃ លីអ៊ាង ប្រធានអគ្គនាយកសហគ្រាសប៉េប៉េ អឹម និងក្រុមហ៊ុន Confirel បានលើកឡើងថា សហគ្រាស Confirel បាននិងកំពុងកែច្នៃ ដើម្បីនាំចេញប្រហុក។ បច្ចុប្បន្នក្រុមហ៊ុនបានដាក់ការស្នើសុំ​កម្មសិទ្ធិបញ្ញាថ្នាក់អន្ដរជាតិហើយ នៅពេលដែលទទួលបានកម្មសិទ្ធិបញ្ញាថ្នាក់អន្ដរជាតិ នោះនឹងបង្ហាញ​ក្ដីសង្ឃឹមយ៉ាងច្បាស់លាស់ថា ប្រហុកខ្មែរនឹងមានអនាគតវែងឆ្ងាយ មានតម្លៃ មានតម្រូវការ ក្នុងការនាំចេញ​ទៅប្រទេសក្រៅ។

លោកឧកញ៉ាបានបញ្ជាក់ថា «ចំពោះគោលដៅនាំចេញប្រហុក គឺនាំចេញទៅកាន់គ្រប់បណ្ដាប្រទេស ដែលអាចនាំចេញបានព្រោះថា ក្រុមហ៊ុនបានធ្វើទីផ្សារប្រហុកជាមួយនឹងជនជាតិបរទេសកន្លងមកឃើញថា ពីមុនប្រហុកមួយក្រឡប្រើរាប់ខែមិនអស់ទេ ប៉ុន្ដែបន្ទាប់ពីកែច្នៃប្រហុកឃើញថា ត្រឹមតែ១-៣ខែប៉ុណ្ណោះ​ប្រហុកប្រើបានរហូតដល់ ៣០គីឡូក្រាម នេះបង្ហាញទីផ្សារប្រហុកចាប់ផ្ដើមមានជាបណ្ដើៗហើយ»។

លោកឧកញ៉ា លើកឡើងបែបនេះ នៅក្នុងកម្មវិធីពានរង្វាន់ត្នោតមាស ឆ្នាំ២០២៣ ក្រោមប្រធានបទ «ការបង្កើតគុណតម្លៃនៃប្រហុក» ធ្វើឱ្យផលិតផលប្រហុក ក្លាយជាផលិតផលនាំចេញ កាលពីពេលថ្មីៗនេះ។

ដើម្បីជំរុញឱ្យកាន់តែមានប្រសិទ្ធភាព លោក ឌិត ទីណា បានគូសបញ្ជាក់ថា ជាគោលនយោបាយ ត្រូវបង្កើត​ឱ្យមានទីផ្សារកែច្នៃផលិតផលបន្ថែមទាំងធម្មជាតិ និងវារីវប្បកម្ម។ ដោយតម្រូវការទីផ្សារមានការ​កើនឡើងលឿន ដូច្នេះត្រូវកំណត់ប្រភេទពូជត្រីលូតលាស់លឿន និងអាចកែច្នៃបានលឿនទៅតាមតម្រូវការ និងស្តង់ដាទីផ្សារ។ ក្នុងការជំរុញការងារនេះ ក្រសួងជួយគាំទ្រ ទាំងផ្នែកចំណេះដឹង បច្ចេកទេស គោលនយោបាយ និងប្រព័ន្ធផ្សព្វផ្សាយ៕

The post កម្ពុជា មានសមត្ថភាពផ្គត់ផ្គង់ប្រហុក​ជាលក្ខណៈពាណិជ្ជកម្មជិត ៩ពាន់តោន​ក្នុងមួយឆ្នាំ appeared first on Kampuchea Thmey Daily.

លោក អ៊ឹង ទ្រី អនុប្រធាន​រដ្ឋបាល​ជលផល មានប្រសាសន៍ប្រាប់កម្ពុជាថ្មី នៅថ្ងៃទី ៣ ខែមករា ឆ្នាំ ២០​២៣នេះថា ការនេសាទត្រីប្រហុក និងការធ្វើត្រីប្រហុក មិនទាន់ការបញ្ចប់ទេ មកទល់នឹងថ្ងៃអង្គារនេះ គ្រាន់តែទិន្នផលត្រីមានការថយចុះប៉ុណ្ណោះ។

លោក អ៊ឹង ទ្រី បានឲ្យដឹងយ៉ាងដូច្នេះថា «គេអត់និយាយរឿងបញ្ចប់ គឺអត់បញ្ចប់ទេ ព្រោះអីនេះស៊ីសងត្រីវាឡើងដល់ត្រឹមណា ជាទូទៅខ្នើតហ្នឹងវាមានតែ ៣ថ្ងៃទេ ដែលវាត្រូវច្រើនជាងគេ អញ្ចឹងគឺខ្នើតហ្នឹងវាចាប់ផ្ដើមតាំងពីថ្ងៃនេះហ្នឹង (២៩ ធ្ន ២០២២) ឥឡូវនេះ ថ្ងៃនេះ ហាក់ដូចជាត្រីរាងថយចុះហើយ អញ្ចឹងត្រីប្រហុក មួយខ្នើតវាត្រូវ ៣ថ្ងៃហ្នឹង អាហ្នឹងគេហៅថា ដល់កំពូលតែប៉ុណ្ណឹងឯង»។

លោកអនុប្រធាន​រដ្ឋបាល​ជលផល បានឲ្យដឹងបន្តថា មកដល់ថ្ងៃទី ៣ ខែមករា ឆ្នាំ ២០២៣នេះ ប្រជានេសាទ នៅតែអាចបន្តនេសាទបាន ​និងអ្នកចង់ធ្វើត្រីប្រហុក នៅតែអាចបន្តធ្វើបានទៀត គ្រាន់តែទិន្នផលមានការថយចុះជាងមុន តែមិនមែនមានន័យថា ការនេសាទ និងការធ្វើត្រីប្រហុក ត្រូវបញ្ចប់នោះទេ។

លោក អ៊ឹង ទ្រី បានឲ្យដឹងទៀតថា សម្រាប់នៅខ្នើតក្រោយ ប្រសិនបើផ្ទៃមេឃស្រឡះល្អ​ មិនមានភ្លៀងធ្លាក់ទេនោះ ការនេសាទត្រីសម្រាប់ធ្វើប្រហុក នឹងត្រូវចាប់ផ្ដើមម្ដងទៀត។ សម្រាប់ខ្នើតដំបូងនារដូវនេសាទឆ្នាំ ២០២២-២០២៣នេះ ទិដ្ឋផលត្រីប្រហុក ឬផ្អក ​មានការកើនឡើងជាងឆ្នាំកន្លងទៅ។ រាជធានី-ខេត្ត ដែលអាចនេសាទត្រីប្រហុក និងធ្វើត្រីប្រហុកបាន រួមមាន៖ រាជធានីភ្នំពេញ, ខេត្តកណ្ដាល, តាកែវ, និងខេត្តកំពង់ឆ្នាំង ជាដើម។

សូមជម្រាបថា កាលពីថ្ងៃទី ២៨ ខែធ្នូ​ ឆ្នាំ ២០២២កន្លងទៅនេះ រដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ បានជូនដំណឹងថា ក្នុងរដូវនេសាទឆ្នាំ ២០២២-២០២៣ តាមការសង្កេត ត្រីចាប់ផ្តើមបន្លាស់ ទីចេញពីបឹងទន្លេសាប បឹង ស្ទឹង និងព្រែកនានា ចូលទន្លេសាប ទន្លេមេគង្គ និងទន្លេបាសាក់ ដែលអំណោយផលដល់ការធ្វើនេសាទបានត្រីច្រើន ជាពិសេសគន្លងដាយត្រីតាមដងទន្លេ​សាប នៅក្នុងភូមិសាស្ត្រខេត្តកណ្តាល និងរាជធានីភ្នំពេញ ពីថ្ងៃ ៧កើត ដល់ថ្ងៃ ១២កើត ខែបុស្ស ត្រូវនឹងថ្ងៃទី ២៩ ខែធ្នូ ឆ្នាំ ២០២២ ដល់ថ្ងៃទី ៣ ខែមករា ឆ្នាំ ២០២៣ ក្នុងករណីមេឃស្រឡះល្អ គ្មានភ្លៀងកក់ខែ ឬមិនទទួលរងឥទ្ធិពលព្យុះភ្លៀង។

រដ្ឋបាលជលផល បានជម្រាបជូនប្រជាពលរដ្ឋ ដែលមានបំណងធ្វើប្រហុក ផ្អក ត្រីឆ្អើរ ឬទឹកត្រី សូមរួសរាន់អញ្ជើញ មកទិញត្រី តាមពេលវេលា និងទីកន្លែងដូចមានក្នុងសេចក្តីជូនដំណឹងនេះ។ ទន្ទឹមនេះរដ្ឋបាលជលផល ក៏បានសំណូម ពរដល់អាជ្ញាធរមូលដ្ឋាន ឬសមត្ថកិច្ចពាក់ព័ន្ធ សូមបង្កលក្ខណៈងាយស្រួល ជូនដល់ប្រជាពលរដ្ឋបានធ្វើដំណើរ ស្នាក់នៅ និងដឹកជញ្ជូនផល ផលិតផលត្រី ផងដែរ៕

អត្ថបទ៖ ឃួន សុភ័ក្រ

The post មន្ត្រីរដ្ឋបាល​ជលផល ៖ ទិន្នផលនេសាទត្រី សម្រាប់ធ្វើត្រីប្រហុកមានការថយចុះបន្តិច តែមិនទាន់បញ្ចប់នៅឡើយទេ appeared first on Kampuchea Thmey Daily.

​ប្រជាពលរដ្ឋ​ដែល​មកពី​ទីជនបទ​ខេត្តកំពង់ស្ពឺ និង​ខេត្តកណ្ដាល​និង​មកពី​ស្រុក​ទឹកផុស​ខេត្តកំពង់ឆ្នាំង​កំពុង​វះពោះត្រី​ធ្វើ​ផ្អក​ប្រហុក​នៅ​កំពង់​ផែ​ថ្មី​ក្នុង​ភូមិ​ទី​៧ សង្កាត់ខ្សា​ម ក្រុង​កំពង់ឆ្នាំង​នា​ល្ងាច​ថ្ងៃទី​២៩​ ខែធ្នូ​នេះ​ បាន​ហើយ​ដឹង​ថា ត្រី​សម្រាប់​ធ្វើ​ប្រហុក​១​គីឡូ ថ្លៃ​ពី​១​ពាន់ ទៅ​៣ពាន់​រៀល​។

ចំណែក​ត្រី​សម្រាប់​ធ្វើ​ផ្អក​មានតម្លៃ​ពី​៣​ពាន់ ទៅ ៥​ពាន់​រៀល (​គឺ​ត្រី​ច​ង្កែ​) តាម​តូច​តាម​ធំ។ ប្រជាពលរដ្ឋ​បាន​ឲ្យ​ដឹង​ទៀត​ថា បើ​ប្រៀបធៀប​និង​ឆ្នាំមុន​ត្រី​សម្រាប់​ធ្វើ​ប្រហុក​មានតម្លៃ​ពី ២ ពាន់​ទៅ ៤ ពាន់​រៀល​។ ឯ​ត្រី​សម្រាប់​ធ្វើ​ផ្អក​មាន​តម្លៃ​ពី ៦ ទៅ ៩ ពាន់​រៀល​ថ្លៃ​ជាង​ឆ្នាំនេះ​។

ដោយឡែក​លោក ងិន ហ៊ុន ប្រធាន មន្ទីរ​កសិកម្ម​រុក្ខាប្រមាញ់ និង​នេសាទ​ខេត្ត​កំពង់ឆ្នាំង​នៅ​ល្ងាច​ថ្ងៃទី​២៩ ខែធ្នូ នេះ​បាន​ឲ្យ​ដឹង​តាម​ទូរ​សព្ទ​ថា​ នៅ​ក្នុង​ខ្នើត​ខែបុស្ស​នេះ​ចាប់ពី​ថ្ងៃ​៤ កើតមក គឺ​២​ថ្ងៃមុន​ត្រី​សម្រាប់​ធ្វើ​ប្រហុក​ផ្អក​ចាប់​ត្រូវ​បណ្ដើរៗ​ហើយ និង​បើ​ប្រៀបធៀប​និង​រយៈពេល​ដូចគ្នា គឺ​ត្រី​ឆ្នាំនេះ​សំបូរ​ជាង និង​មាន​តម្លៃ​ថោក​ជាង​ឆ្នាំមុន ហើយ​ខ្នើត​ខែ ក្រោយ​អាច​នឹង​សម្បូរ​ត្រី​ប្រហុក​ច្រើន​។ ប៉ុន្តែ​គិត​មកដល់​ថ្ងៃនេះ​ខាង​មន្ត្រី​ជលផល​ខេត្ត មិនទាន់​ប្រមូល​បាន​ទិន្នន័យ​នៃ​ផល​នេសាទ​នៅ ក្នុង​ខេត្ត​ឡើយ​ទេ។

លោក​ប្រធាន​មន្ទីរ​កសិកម្ម​ខេត្ត​សូម​ជូនដំណឹង​ដល់​ប្រជាពលរដ្ឋ​ផង​ដែរ ដែល​មាន​បំណង​ធ្វើ​ប្រហុក​ផ្អក​សូម​អញ្ជើញ​មក​ធ្វើ​ប្រហុក​ផ្អក​នៅ​ទី​តាំង​ចំនួន៤ កន្លែង​ក្នុង​ខេត្ត​កំពង់ឆ្នាំង​គឺ​១​ភូមិ​កំពង់ប្រាសាទ ឃុំ​សែ​ប ស្រុក​កំពង់ត្រឡាច​, ២ ចំណុច​ព្រែក​កាត់ ក្នុងភូមិ​កណ្តាល សង្កាត់​ផ្សារឆ្នាំង ក្រុង​កំពង់ឆ្នាំង​, ចំណុច​កំពង់ផែ​ថ្មី​ ក្នុង​ភូមិ​ទី​៧ សង្កាត់​ខ្សា​ម ក្រុង​កំពង់ឆ្នាំង​, និង ៤ ភូមិ​ឆ្នុកទ្រូ ឃុំ​ឆ្នុក​ទ្រូ ស្រុក​បរិបូណ៌​៕

ដោយ ៖ ឈៀង​ថា​រិ​ទ្ធ

The post ត្រី​សម្រាប់​ធ្វើ​ប្រហុក​ផ្អក​នៅ​ក្នុង​ខេត្តកំពង់ឆ្នាំង​នារដូវនេះ​ ត្រូវ​ប៉ាន់​បណ្ដើរៗ​ហើយ​ appeared first on Kampuchea Thmey Daily.

នៅក្នុងសេចក្តីជូនដំណឹងបន្ថែម ចុះថ្ងៃទី ៦ ខែមករា ឆ្នាំ ២០២២ បានជូនដំណឹងថា ក្នុងរដូវនេសាទឆ្នាំ ២០២១- ២០២២នេះ បន្ទាប់ពីបានធ្វើការសង្កេត តាមដានកំពស់ទឹក ដែលហូរចេញពីបឹងទន្លេសាប ពិនិត្យឃើញថា គន្លងដាយនៅតាមដងទន្លេសាប ក្នុងភូមិសាស្ត្រខេត្តកណ្តាល និងរាជធានីភ្នំពេញ អាចបន្តនេសាទត្រីបានច្រើន នៅក្នុងខែបុស្សនេះ ចាប់ពីថ្ងៃ ៧កើត រហូតដល់ថ្ងៃ ១២កើត ត្រូវនឹងថ្ងៃទី ៩ ដល់ថ្ងៃទី ១៤ ខែមករា ឆ្នាំ ២០២២ ប្រសិនបើមេឃស្រឡះល្អ គ្មានភ្លៀងកក់ខែ ឬទទួលរងឥទ្ធិពលព្យុះ។

រដ្ឋបាលជលផល បានបន្ថែមថា យោងលើស្ថានភាព ដូចបានជម្រាបជូនខាងលើ រដ្ឋបាលជលផលសូមអញ្ជើញប្រជាពលរដ្ឋ ដែលមានបំណងធ្វើប្រហុក ផ្អកឬត្រី ឆ្អើរសម្រាប់ទុកបរិភោគប្រចាំឆ្នាំនោះសូមមេត្តាអញ្ជើញ ទៅទិញត្រីឲ្យបានរួសរាន់តាមពេលវេលា និងទីកន្លែងដូចបានជម្រាបជូនខាងលើ។

ជាមួយនេះរដ្ឋបាលជលផល ក៏បានសំណូមពរដល់អាជ្ញាធរមូលដ្ឋាន និងសមត្ថកិច្ចពាក់ព័ន្ធ មេត្តាជួយបង្កលក្ខណៈងាយស្រួល ជូនដល់ប្រជាពលរដ្ឋ ក្នុងការធ្វើដំណើរស្នាក់នៅ និងដឹកជញ្ជូនផលិតផលផលនេសាទ បានដោយរលូនតាមការគួរ។ ទន្ទឹមនឹងនេះរដ្ឋបាលជលផល ក៏សំណូមពរដល់ប្រជាពលរដ្ឋ មេត្តាអនុវត្តតាមការណែនាំ របស់ក្រសួងសុខាភិបាល អំពីវិធានការការពារមេរោគកូវីដ-១៩ ឲ្យបានខ្ជាប់ខ្ជួន ផងដែរ។

គួររំលឹកថា រដ្ឋបាល​ជលផល នៃ​ក្រសួងកសិកម្ម រុក្ខាប្រមាញ់ ​និង​នេសាទ កាលពី​ថ្ងៃទី​ ១២ ខែធ្នូ ឆ្នាំ​២០២១ ក៏បាន​ជូនដំណឹង​ស្តីពី រដូវ​នេសាទឆ្នាំ​ ២០២១-២០២២ ដោយឲ្យប្រជាពលរដ្ឋត្រៀមទិញត្រីធ្វើ ប្រហុក ផ្អកម្តងរួចហើយ ដែលអាច​នេសាទ​ត្រីបាន​ច្រើន នៅក្នុង​ខែ​មិគសិរ​នេះ នៅ​ថ្ងៃទី ​៨កើត ដល់​ថ្ងៃទី ​១២កើត ត្រូវ​នឹង​ថ្ងៃទី ​១២ ដល់​ថ្ងៃទី ​១៦ ខែធ្នូ ឆ្នាំ ​២០២១៕

អត្ថបទ៖ ណារី

​

The post រដ្ឋបាលជលផល​ ជូនដំណឹងម្ដងទៀត ចំពោះប្រជាពលរដ្ឋ ដែលមានបំណងធ្វើប្រហុក ផ្អក ឬត្រីឆ្អើរ appeared first on Kampuchea Thmey Daily.

ចំណី​ដែល​ទិញ​គេ​ស្រាប់ មិន​សូវ​ល្អ​ដូច​យើង​ធ្វើ​ខ្លួនឯង​ឡើយ ទើប​ប្រជាជន​ខ្លាច​ប៉ះពាល់​ដល់​សុខភាព ព្រោះ​​តែង​ឃើញ​មាន​ព័ត៌មាន​ចុះផ្សាយ​ជា​ញឹកញាប់​ថា ខាង​​កាំ​កុងត្រូល​​តែង​រក​ឃើញ​អាហារ​ផ្អាប់​ទាំង​នោះ មាន​ផ្ទុក​សារធាតុ​គីមី​មួយ​ចំនួន។

បើ​តាម​ការ​ឲ្យ​ដឹង​ពី​លោក ចាន់ សេដ្ឋា អតីត​និស្សិត​ផ្នែក​គីមី​ចំណី​អាហារ នៅ​វិទ្យាស្ថាន​បច្ចេកវិទ្យា​កម្ពុជា បាន​ពន្យល់​ថា ប៉ុន្មាន​ឆ្នាំ​មុន​ពិនិត្យ​ឃើញ​មាន​ច្រើន តែ​សម្រាប់​ឥឡូវ​វិញ​លែង​សូវ​ឃើញ​ទេ។ សម្រាប់​អាហារ​ក្រៀម​ដែល​ពិនិត្យ​ឃើញ​មាន​សារធាតុ​គីមី គឺ​ពពួក​ត្រី​បបែល​ងៀត ដែល​ភាគច្រើន​មាន​ផ្ទុក​សារធាតុ​គីមី​រក្សា​ទុក​បាន​យូរ​មិន​ងាយ​ខូច។

សម្រាប់​ពពួក​ផ្អក ប្រហុក ត្រី​ហើម ដែល​មាន​ជាតិ​គីមី ភាគច្រើន​ជា​ផលិតផល​នាំ​ចូល​មកពី​ប្រទេស​ជិតខាង ហើយ​ការ​នាំចូល ​ទម្រាំ​អាច​យក​មក​ដាក់​លក់​លើ​ទីផ្សារ​មាន​រយៈពេល​យូរ ដូចនេះ​ប្រសិនបើ​គ្មាន​ការ​ទុក​ដាក់​ត្រឹមត្រូវ អាច​នឹង​ឆាប់​ខូច។ បែប​នេះ​ហើយ​ទើប​គេ​ជ្រើសរើស​ការ​ប្រើ​ថ្នាំ​មួយ​ចំនួន​ដូចជា ហ្វ័រម៉ាលីន ដែល​អាច​រក្សា​ទុក​បាន​យូរ និង​សូដ្យូម​អ៊ីដ្រូស៊ុលហ្វីត ឬ​ហៅ​ថា​ម្សៅ​ធ្វើឲ្យ​ស។

ចំពោះ​រូបរាង​ចំណី​ផ្អាប់​ទាំង​នោះ បើ​សង្កេត​ឃើញ​ថា​មាន​សភាព​ស​ៗ​ខ្លាំង គ្មាន​សត្វ​ល្អិត​មក​រោម ជាពិសេស​រុយតែម្ដង។ តែ​ប្រហុក​ខ្លះ​ដែល​មាន​ជាតិ​គីមី ក៏​មាន​រូបរាង​ធម្មតា​ដែរ ដូចនេះ​បើ​យើង​សុវត្ថិភាព មាន​តែ​ធ្វើ​ញ៉ាំ​ដោយ​ខ្លួនឯង៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ កុំចេះតែពឺត ​ញ៉ាំ​គ្រឿង​ផ្អាប់ ពិសេស​ជ្រក់ អាច​កើត​​​មហារីក​ខ្ពស់​បំផុត

ចុចអាន៖ ញ៉ាំ​អាហារ​កំប៉ុង​កំប៉ឹត​សម្បក អាច​មាន​ស្ថានភាព​សុខភាព​បែប​នេះ

The post ទិញផ្អក​ប្រហុក ត្រី​ប្រឡាក់ លក់​នៅផ្សារ​ ប្រឈមនឹងថ្នាំគីមី? appeared first on Kampuchea Thmey Daily.