ព័ត៌មានជាតិ

ត្រីសម្រាប់ធ្វើប្រហុកផ្អកនៅក្នុងខេត្តកំពង់ឆ្នាំងនារដូវនេះ ត្រូវប៉ាន់បណ្ដើរៗហើយ

បានផុស

៤ years មុន

នៅ

ថ្ងៃព្រហស្បតិ៍ ២៩ ធ្នូ ២០២២

ដោយ

កំពង់ឆ្នាំង ៖ ត្រីសម្រាប់ធ្វើប្រហុកផ្អកនៅក្នុងខេត្តកំពង់ឆ្នាំងនារដូវនេះ ត្រូវប៉ាន់បណ្ដើរៗហើយ ដែលមានតម្លៃ១គីឡូចាប់ពី១ពាន់រៀល ទៅ៥ពាន់រៀល តាមធំតាមតូច ដែលមានលក់នៅកំពង់ផែថ្មី ក្នុងភូមិទី៧ សង្កាត់ខ្សាម ក្រុងកំពង់ឆ្នាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រជាពលរដ្ឋដែលមកពីទីជនបទខេត្តកំពង់ស្ពឺ និងខេត្តកណ្ដាលនិងមកពីស្រុកទឹកផុសខេត្តកំពង់ឆ្នាំងកំពុងវះពោះត្រីធ្វើផ្អកប្រហុកនៅកំពង់ផែថ្មីក្នុងភូមិទី៧ សង្កាត់ខ្សាម ក្រុងកំពង់ឆ្នាំងនាល្ងាចថ្ងៃទី២៩ ខែធ្នូនេះ បានហើយដឹងថា ត្រីសម្រាប់ធ្វើប្រហុក១គីឡូ ថ្លៃពី១ពាន់ ទៅ៣ពាន់រៀល។

ចំណែកត្រីសម្រាប់ធ្វើផ្អកមានតម្លៃពី៣ពាន់ ទៅ ៥ពាន់រៀល (គឺត្រីចង្កែ) តាមតូចតាមធំ។ ប្រជាពលរដ្ឋបានឲ្យដឹងទៀតថា បើប្រៀបធៀបនិងឆ្នាំមុនត្រីសម្រាប់ធ្វើប្រហុកមានតម្លៃពី ២ ពាន់ទៅ ៤ ពាន់រៀល។ ឯត្រីសម្រាប់ធ្វើផ្អកមានតម្លៃពី ៦ ទៅ ៩ ពាន់រៀលថ្លៃជាងឆ្នាំនេះ។

ដោយឡែកលោក ងិន ហ៊ុន ប្រធាន មន្ទីរកសិកម្មរុក្ខាប្រមាញ់ និងនេសាទខេត្តកំពង់ឆ្នាំងនៅល្ងាចថ្ងៃទី២៩ ខែធ្នូ នេះបានឲ្យដឹងតាមទូរសព្ទថា នៅក្នុងខ្នើតខែបុស្សនេះចាប់ពីថ្ងៃ៤ កើតមក គឺ២ថ្ងៃមុនត្រីសម្រាប់ធ្វើប្រហុកផ្អកចាប់ត្រូវបណ្ដើរៗហើយ និងបើប្រៀបធៀបនិងរយៈពេលដូចគ្នា គឺត្រីឆ្នាំនេះសំបូរជាង និងមានតម្លៃថោកជាងឆ្នាំមុន ហើយខ្នើតខែ ក្រោយអាចនឹងសម្បូរត្រីប្រហុកច្រើន។ ប៉ុន្តែគិតមកដល់ថ្ងៃនេះខាងមន្ត្រីជលផលខេត្ត មិនទាន់ប្រមូលបានទិន្នន័យនៃផលនេសាទនៅ ក្នុងខេត្តឡើយទេ។

លោកប្រធានមន្ទីរកសិកម្មខេត្តសូមជូនដំណឹងដល់ប្រជាពលរដ្ឋផងដែរ ដែលមានបំណងធ្វើប្រហុកផ្អកសូមអញ្ជើញមកធ្វើប្រហុកផ្អកនៅទីតាំងចំនួន៤ កន្លែងក្នុងខេត្តកំពង់ឆ្នាំងគឺ១ភូមិកំពង់ប្រាសាទ ឃុំសែប ស្រុកកំពង់ត្រឡាច, ២ ចំណុចព្រែកកាត់ ក្នុងភូមិកណ្តាល សង្កាត់ផ្សារឆ្នាំង ក្រុងកំពង់ឆ្នាំង, ចំណុចកំពង់ផែថ្មី ក្នុងភូមិទី៧ សង្កាត់ខ្សាម ក្រុងកំពង់ឆ្នាំង, និង ៤ ភូមិឆ្នុកទ្រូ ឃុំឆ្នុកទ្រូ ស្រុកបរិបូណ៌៕

ដោយ ៖ ឈៀងថារិទ្ធ