ប្រេងឥន្ធនៈ Archives - Kampuchea Thmey Daily

ក្រុមហ៊ុនចិន Royal Vopak ស្វែងរកឱកាសបង្កើតស្ថានីយចម្រាញ់ប្រេង និងឧស្ម័ន LNG នៅកម្ពុជា

deth leng — Sat, 18 Jul 2026 03:00:37 +0000

ក្រុមហ៊ុនរបស់ចិន Royal Vopak កំពុងសហការជាមួយក្រុមហ៊ុនដៃគូក្នុងប្រទេសកម្ពុជា ដើម្បីស្វែងរកឱកាសវិនិយោគលើការបង្កើតស្ថានីយចម្រាញ់ប្រេង (Refinery Terminal) និងស្ថានីយស្តុកឧស្ម័នធម្មជាតិរាវ នៅកម្ពុជា។

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា នៅថ្ងៃទី ១៧ កក្កដា ២០២៦ បានអនុញ្ញាតឱ្យ លោក Chen Yan ប្រធានក្រុមហ៊ុន Royal Vopak ប្រចាំប្រទេសចិន និងអាស៊ីខាងកើត ចូលជួបពិភាក្សាការងារ ក្នុងឱកាសនៃការអញ្ជើញបំពេញទស្សនកិច្ចការងារ និងចូលរួមសន្និសីទបញ្ញាសិប្បនិម្មិតពិភពលោក ឆ្នាំ២០២៦ នៅសាធារណរដ្ឋប្រជាមានិតចិនពីថ្ងៃទី ១៥-១៧ កក្កដា ឆ្នាំ២០២៦។

ក្រុមហ៊ុន Royal Vopak (Koninklijke Vopak N.V.) មានជំនាញខ្ពស់ក្នុងការផ្ដល់ដំណោះស្រាយលើហេដ្ឋារចនាសម្ព័ន្ធ និងការផ្ទុកផលិតផលប្រេង, ឧស្ម័ន, គីមីឥន្ធនៈ (Petrochemical) រួមទាំងឧស្ម័នធម្មជាតិរាវ (LNG) និងឧស្ម័នឥន្ធនៈរាវ (LPG) ជាដើម។

ក្រុមហ៊ុនផ្ដោតសំខាន់លើវិស័យស្នូលមួយចំនួន រួមមាន៖ ស្ថានីយស្តុកថាមពលថ្មី និងប្រកបដោយចីរភាព, ស្ថានីយស្តុកឧស្ម័ន, ស្ថានីយស្តុកគីមីឥន្ធនៈសម្រាប់បម្រើដល់វិស័យឧស្សាហកម្ម, ស្ថានីយស្តុកសារធាតុគីមី និងស្ថានីយស្តុកប្រេង។

សម្ដេចធិបតីស្វាគមន៍ចំពោះបំណងវិនិយោគ ក៏ដូចជាកិច្ចសហការរវាងក្រុមហ៊ុន Royal Vopak និងក្រុមហ៊ុនដៃគូនៅកម្ពុជា។

ផែនការស្វែងរកឱកាសវិនិយោគលើស្ថានីយស្តុកឧស្ម័នធម្មជាតិរាវ និងស្ថានីយចម្រាញ់ប្រេង គឺស្របទៅនឹងចក្ខុវិស័យរបស់រាជរដ្ឋាភិបាលកម្ពុជា ក្នុងការអភិវឌ្ឍហេដ្ឋារចនាសម្ព័ន្ធទាំងនេះ សំដៅធានាឱ្យបាននូវសន្តិសុខថាមពលនៅប្រទេសកម្ពុជានាពេលអនាគត។

សម្តេចធិបតី បានលើកទឹកចិត្តឱ្យក្រុមហ៊ុនបន្តពង្រឹងកិច្ចសហការឱ្យកាន់តែជិតស្និទ្ធជាមួយក្រុមហ៊ុនដៃគូនៅកម្ពុជា និងបន្តពិភាក្សាលម្អិតបន្ថែមទៀតជាមួយក្រសួងស្ថាប័នពាក់ព័ន្ធ ជាពិសេសក្រសួងរ៉ែ និងថាមពល ដើម្បីជំរុញផែនការវិនិយោគនៅកម្ពុជាឱ្យលេចចេញជាផ្លែផ្កា៕

The post ក្រុមហ៊ុនចិន Royal Vopak ស្វែងរកឱកាសបង្កើតស្ថានីយចម្រាញ់ប្រេង និងឧស្ម័ន LNG នៅកម្ពុជា appeared first on Kampuchea Thmey Daily.

ឥណ្ឌា ប្រឈមនឹងការយកពន្ធ ៥០០% ពីអាមេរិក ជុំវិញការបន្តទិញប្រេងពីរុស្ស៊ី

Minea Neu — Wed, 15 Jul 2026 13:00:00 +0000

សេតវិមានបានចេញការគាំទ្រសេចក្តីព្រាងច្បាប់ទណ្ឌកម្មដល់ប្រទេសឥណ្ឌា ដែលអាចធ្វើឱ្យប្រទេសនេះប្រឈមនឹងពន្ធរបស់សហរដ្ឋអាមេរិករហូតដល់ ៥០០ភាគរយ ដោយសារតែការទិញប្រេងរបស់រុស្ស៊ីជាបន្តបន្ទាប់។

ឆ្លើយតបទៅនឹងសំណួររបស់ទីភ្នាក់ងារសារព័ត៌មាន ANI នៅថ្ងៃទី១៤ ខែកក្កដា ឆ្នាំ២០២៦ មន្ត្រីសេតវិមានម្នាក់បានបញ្ជាក់ថា ប្រធានាធិបតីអាមេរិក លោក ដូណាល់ ត្រាំ គាំទ្រច្បាប់នេះ។ មន្ត្រីរូបនោះនិយាយថា៖ « ប្រធានាធិបតី ត្រាំ គាំទ្រសេចក្តីព្រាងច្បាប់នេះ»។

មេដឹកនាំឥណ្ឌា និង លោក ដូណាល់ ត្រាំ។ រូបភាព៖ NDTV World

សំណើនេះ ជាច្បាប់ទណ្ឌកម្មរុស្ស៊ី ត្រូវបានណែនាំដោយអតីតសមាជិកព្រឹទ្ធសភាសាធារណរដ្ឋ លោក Lindsey Graham រួមជាមួយសមាជិកព្រឹទ្ធសភាប្រជាធិបតេយ្យ លោក Richard Blumenthal ។ ប្រសិនបើច្បាប់នេះត្រូវបានអនុម័ត នោះវានឹងផ្តល់អំណាចដល់ប្រធានាធិបតីអាមេរិកក្នុងការដាក់ពន្ធរហូតដល់ ៥០០ភាគរយ លើការនាំចូលរបស់ប្រទេសដែលបន្តធ្វើអាជីវកម្មជាមួយវិស័យថាមពលរបស់រុស្ស៊ី។

ពេញមួយយុទ្ធនាការសម្រាប់សេចក្តីព្រាងច្បាប់នេះ លោក Graham បានអះអាងម្តងហើយម្តងទៀតថា សម្ពាធមិនគួរធ្លាក់ត្រឹមលើទីក្រុងមូស្គូប៉ុណ្ណោះទេ ប៉ុន្តែលើប្រទេសដែលរក្សាប្រាក់ចំណូលថាមពលជាមួយរុស្ស៊ីផងដែរ។

លោកតែងតែចង្អុលទៅប្រទេសឥណ្ឌា និងប្រទេសចិន ដោយនិយាយថា ប្រទេសទាំងពីរនេះរួមគ្នាមានជិត ៧០ភាគរយនៃការនាំចេញប្រេង ឧស្ម័ន និងប្រេងកាតរបស់រុស្ស៊ី។

យោងតាម លោក Graham ការកាត់ផ្តាច់តម្រូវការនេះនឹងបង្កើនសម្ពាធសេដ្ឋកិច្ចលើទីក្រុងមូស្គូ ហើយក៏អាចជួយបញ្ចប់សង្គ្រាមនៅអ៊ុយ។

ប្រសិនបើត្រូវបានអនុម័ត ច្បាប់នេះនឹងផ្តល់ឱ្យប្រធានាធិបតីអាមេរិកនូវអំណាចទូលំទូលាយបំផុតមួយ ដែលសភាបានផ្តល់ ដើម្បីដាក់ពន្ធបន្ទាប់បន្សំលើប្រទេសដែលធ្វើពាណិជ្ជកម្មជាមួយឧស្សាហកម្មថាមពលរបស់រុស្ស៊ី។

យ៉ាងណា ស្ថានភាពកាន់តែស្មុគស្មាញ បន្ទាប់ពីការលើកលែងពន្ធបណ្តោះអាសន្នរបស់ក្រសួងរតនាគារអាមេរិក ផុតកំណត់នៅថ្ងៃទី១៧ ខែមិថុនា ឆ្នាំ២០២៦ ។ ការលើកលែងពន្ធនេះបានអនុញ្ញាតឱ្យឥណ្ឌាទិញប្រេងឆៅរបស់រុស្ស៊ីដោយមិនទទួលបានការដាក់ទណ្ឌកម្ម។ ការផុតកំណត់លើពន្ធ បានធ្វើឱ្យឥណ្ឌាស្ថិតក្នុងតំបន់ពណ៌ប្រផេះស្របច្បាប់៕

សម្រួល៖ ណឺ មិនា

The post ឥណ្ឌា ប្រឈមនឹងការយកពន្ធ ៥០០% ពីអាមេរិក ជុំវិញការបន្តទិញប្រេងពីរុស្ស៊ី appeared first on Kampuchea Thmey Daily.

តម្លៃប្រេងលក់រាយបន្តធ្លាក់ចុះ នៅចំពេលរដ្ឋាភិបាលឧបត្ថម្ភធន

deth leng — Tue, 30 Jun 2026 03:09:36 +0000

តម្លៃប្រេងឥន្ធនៈលក់រាយក្នុងស្រុកបន្តធ្លាក់ចុះ នៅថ្ងៃអង្គារទី ៣០ មិថុនា ២០២៦ ក្នុងនោះប្រេងសាំងធម្មតា មានតម្លៃ ៤០៥០ រៀល មួយលីត្រ ធ្លាក់ចុះ ៣០០ រៀល ចំណែកឯប្រេងម៉ាស៊ូតធ្លាក់ចុះ ២៥០ រៀល មកនៅតម្លៃ ៤០០០ រៀល ក្នុងមួយលីត្រ ធៀបនឹងសប្ដាហ៍មុន។ តម្លៃនេះ នឹងអនុវត្តចាប់ពីថ្ងៃទី ៣០ មិថុនា ២០២៦ រហូតដល់ពេលជូនដំណឹងថ្មី។

រាជរដ្ឋាភិបាលបានបន្តបញ្ចុះតម្លៃប្រេងចំនួន ៦,៥ សេនដុល្លារ ក្នុងមួយលីត្រ ក្នុងគោលបំណងជួយសម្រួលជីវភាពរបស់ប្រជាពលរដ្ឋ, បញ្ចុះតម្លៃ១សេនដុល្លារ បន្ថែមទៀតក្នុងមួយលីត្រនៅពេលដែលប្រេងសាំងអន្តរជាតិកើនលើសពី៩០ដុល្លារ ក្នុង១បារ៉ែល និងប្រេងម៉ាស៊ូតអន្តរជាតិកើនលើសពី១០០ ដុល្លារក្នុង១បារ៉ែល, បញ្ចុះពន្ធនាំចូលដល់សូន្យ និងបញ្ចុះអាករលើតម្លៃបន្ថែមលើប្រេងសាំង និងប្រេងម៉ាស៊ូត ដល់សូន្យ។

បញ្ចុះអាករពិសេសលើប្រេងសាំងពី ៣០% មក ១៥% និងប្រេងម៉ាស៊ូតពី ៤% មក ០ និងបញ្ចុះអាករលើតម្លៃបន្ថែមលើប្រេងសាំងពី ១០% មក ៤% និងប្រេងម៉ាស៊ូតពី ១០% មកសូន្យ៕

The post តម្លៃប្រេងលក់រាយបន្តធ្លាក់ចុះ នៅចំពេលរដ្ឋាភិបាលឧបត្ថម្ភធន appeared first on Kampuchea Thmey Daily.

អ៊ីរ៉ង់ លក់ប្រេងឆៅបញ្ចុះថ្លៃច្រើនសម្រាប់ផ្គត់ផ្គង់ទៅឲ្យចិន ក្រោយច្រកហ័រមូសបើកវិញ

Rann Reuy — Mon, 22 Jun 2026 07:28:59 +0000

អ្នកលក់ប្រេងឆៅអ៊ីរ៉ង់ទៅកាន់ប្រទេសចិន បានទម្លាក់តម្លៃប្រេងឆៅ បន្ទាប់ពីប្រទេសអ៊ីរ៉ង់បានចាប់ផ្តើមដឹកជញ្ជូនប្រេងរាប់លានបារ៉ែលចេញពីច្រកសមុទ្រ Hormuz បន្ទាប់ពីកិច្ចព្រមព្រៀងសន្តិភាពបណ្តោះអាសន្នជាមួយសហរដ្ឋអាមេរិក។ នេះបើយោងតាមការចុះផ្សាយរបស់ Bloomberg កាលពីថ្ងៃចន្ទ។

កប៉ាល់ដឹកប្រេងអ៊ីរ៉ង់តាមច្រកហ័រមូស។ Reuters

សេចក្តីរាយការណ៍នោះ បានលើកឡើងថា ទំនិញប្រេងឆៅប្រភេទស្រាលរបស់អ៊ីរ៉ង់សម្រាប់ផ្គត់ផ្គង់នៅក្នុងខែកក្កដាត្រូវបានលក់ក្នុងបញ្ចុះតម្លៃពី ២.៥០ ដុល្លារទៅ ៥ដុល្លារក្នុងមួយបារ៉ែលធៀបនឹងតម្លៃប្រេងស្តង់ដារ ប្រភេទ Brent ដែលត្រូវបានលក់ចែកចាយនៅទីផ្សារអឺរ៉ុប។ នេះបើយោងតាមការដកស្រង់សម្តីរបស់មនុស្សដែលពាក់ព័ន្ធដោយផ្ទាល់នៅក្នុងពាណិជ្ជកម្ម ដែល Bloomberg បានដកស្រង់។

ក្រៅពីការលក់បញ្ចុះថ្លៃនោះហើយ តាមសេចក្តីរាយការណ៍ អ៊ីរ៉ង់នៅលក់បញ្ចុះតម្លៃពិសេសប្រហែល ១ ដុល្លារទៀតក្នុងមួយបារ៉ែលមុនពេលកិច្ចព្រមព្រៀង។

ទីភ្នាក់ងារព័ត៌មាន Bloomberg បាននិយាយនៅក្នុងសេចក្តីរាយការណ៍ដាច់ដោយឡែកមួយថា អ៊ីរ៉ង់បានបង្កើនបរិមាណបូមប្រេងឆៅដែលខ្លួនផ្ញើដោយបើកចំហតាមរយៈច្រកសមុទ្រ Hormuz ដល់កម្រិតខ្ពស់បំផុតចាប់តាំងពីសង្គ្រាមបានចាប់ផ្តើម ខណៈដែលសកម្មភាពដឹកជញ្ជូនក្នុងតំបន់បានកើនឡើង ខណៈពេលដែលទីក្រុងតេអេរ៉ង់ និងទីក្រុងវ៉ាស៊ីនតោនបានខិតខំឆ្ពោះទៅរកកិច្ចព្រមព្រៀងសន្តិភាពយូរអង្វែង។

ប្រេងឆៅអ៊ីរ៉ង់ប្រហែលប្រាំមួយលានបារ៉ែលស្ថិតនៅលើនាវាដឹកប្រេងធំបីគ្រឿងដែលត្រូវបានអនុម័តដោយសហរដ្ឋអាមេរិកគឺ Elva, Virgo និង Vigor ដែលបានចូលទៅក្នុងចំណុចស្ទះនៅព្រឹកថ្ងៃចន្ទ ដោយដកស្រង់ទិន្នន័យតាមដានកប៉ាល់៕

រ៉ាន់ រើយ

The post អ៊ីរ៉ង់ លក់ប្រេងឆៅបញ្ចុះថ្លៃច្រើនសម្រាប់ផ្គត់ផ្គង់ទៅឲ្យចិន ក្រោយច្រកហ័រមូសបើកវិញ appeared first on Kampuchea Thmey Daily.

ប្រឈមខ្វះប្រេងយន្តហោះ អ៊ីតាលី ជូនដំណឹងពីការផ្គត់ផ្គត់មានកម្រិត

Rann Reuy — Sun, 05 Apr 2026 11:02:06 +0000

អាកាសយានដ្ឋានជាច្រើននៅក្នុងប្រទេសអ៊ីតាលីបានចេញសេចក្តីជូនដំណឹងអំពីការផ្គត់ផ្គង់ប្រេងឥន្ធនៈមានកំណត់សម្រាប់រយៈពេលប៉ុន្មានថ្ងៃខាងមុខ ខណៈដែលជម្លោះនៅមជ្ឈិមបូព៌ាបង្ហាញសញ្ញាតិចតួចនៃការបញ្ចប់ដែលអាចធ្វើឲ្យស្ថានភាពនៃវិបត្តិប្រេងឥន្ធនៈធូរស្រាលវិញ។ យោងសេចក្តីរាយការណ៍របស់ Bloomberg។

អាកាសយានដ្ឋាន Bologna។ MSFS

យោងតាមសេចក្តីជូនដំណឹងដល់ក្រុមហ៊ុនអាកាសចរណ៍ ការរឹតបន្តឹងប្រេងឥន្ធនៈសម្រាប់ជើងហោះហើរត្រូវបានណែនាំនៅអាកាសយានដ្ឋាន Bologna, Milan Linate, Treviso និង Venice។

នៅទីក្រុង Venice អាជ្ញាធរបាននិយាយថា អាទិភាពនឹងត្រូវបានផ្តល់ទៅឱ្យជើងហោះហើរផ្នែកវេជ្ជសាស្រ្ត រដ្ឋ និងជើងហោះហើរដែលលើសពីបីម៉ោង។

សម្រាប់ជើងហោះហើរផ្សេងទៀតក្រោមបីម៉ោង ទទួលបានបរិមាណជាអតិបរមា ចំនួន២០០០លីត្រក្នុងមួយយន្តហោះដែលនឹងដាក់ឲ្យអនុវត្ត។

បទប្បញ្ញត្តិស្រដៀងគ្នានេះដែរ ត្រូវបានរួមបញ្ចូលនៅក្នុងសេចក្តីជូនដំណឹងសម្រាប់អាកាសយានដ្ឋាន Bologna និង Treviso។

សេចក្តីជូនដំណឹងនេះមានសុពលភាពចាប់ពីថ្ងៃទី ២ខែមេសា ដល់ថ្ងៃទី ៩ខែមេសា។

សេចក្តីជូនដំណឹងនិយាយថា ភាពអាចរកបាននៃយន្តហោះប្រេងឥន្ធនៈ A1 របស់ក្រុមហ៊ុន Air BP Italia មានកំណត់។

ការរឹតបន្តឹងនៅក្នុងប្រទេសអ៊ីតាលីគឺជាឧទាហរណ៍ដំបូងបំផុតនៃការខ្វះខាតប្រេងឥន្ធនៈនៅអឺរ៉ុបដែលចាប់ផ្តើមប៉ះពាល់ដល់ប្រតិបត្តិការចាប់តាំងពីជម្លោះបានផ្ទុះឡើងនៅមជ្ឈិមបូព៌ា និងនាំឱ្យមានការបិទច្រកសមុទ្រ Hormuz ប្រកបដោយប្រសិទ្ធភាព ដែលធ្វើឱ្យការផ្គត់ផ្គង់ប្រេងឆៅ ឧស្ម័ន និងផលិតផលដូចជាប្រេងឥន្ធនៈយន្តហោះដល់អតិថិជនសកលត្រូវបានស្ទះ៕

The post ប្រឈមខ្វះប្រេងយន្តហោះ អ៊ីតាលី ជូនដំណឹងពីការផ្គត់ផ្គត់មានកម្រិត appeared first on Kampuchea Thmey Daily.

ក្រោយជោគជ័យលើកទី១ រុស្ស៊ីគ្រោងបញ្ជូនកប៉ាល់ដឹកប្រេងទី២ ចូលជួយគុយបា

Minea Neu — Fri, 03 Apr 2026 12:59:00 +0000

រដ្ឋមន្ត្រីក្រសួងថាមពលរុស្ស៊ី បានឱ្យដឹងថា ប្រទេសរុស្ស៊ីមានគម្រោងបញ្ជូនកប៉ាល់ដឹកប្រេងទី២ទៅកាន់ប្រទេសគុយបា ក្រោយជោគជ័យលើកប៉ាល់ទី១នៅដើមសប្តាហ៍នេះ ខណៈប្រទេសកោះគុយបាកំពុងតស៊ូក្រោមការបិទផ្លូវប្រេងដ៏ធ្ងន់ធ្ងររបស់សហរដ្ឋអាមេរិក។

យោងតាម Al Jazeera ផ្សាយទី០២ ខែមេសា ឆ្នាំ២០២៦ រដ្ឋមន្ត្រីក្រសួងថាមពលរុស្ស៊ី លោក Sergei Tsivilev និយាយកាលពីថ្ងៃព្រហស្បតិ៍ថា ប្រេងកំពុងរៀបចំ នាំយកទៅកាន់ប្រទេសគុយបា។

លោក Tsivilev និយាយថា៖ « គុយបាកំពុងស្ថិតក្នុងការបិទផ្លូវប្រេងទាំងស្រុង ហើយគ្មាននាវាដឹកប្រេងណាទៅដល់ប្រទេសដែនកោះនេះទេ។ នាវារុស្ស៊ីមួយគ្រឿងបានទម្លុះការបិទផ្លូវ។ វាជានាវាដំបូងដែលបានទៅដល់កោះនេះកាលពីដើមសប្តាហ៍»។

រដ្ឋមន្ត្រីក្រសួងថាមពលរុស្ស៊ី លោក Sergei Tsivilev ។ រូបភាព៖ TASS

លោកបន្តថា៖ « ឥឡូវនេះនាវាទីពីរកំពុងត្រៀមខ្លួនចេញទៅគុយបា។ យើងនឹងមិនទុកឱ្យប្រជាជនគុយបានៅម្នាក់ឯងក្នុងបញ្ហានោះទេ»។

ការអត្ថាធិប្បាយរបស់រដ្ឋមន្ត្រីរុស្ស៊ីកើតឡើងត្រឹមតែប៉ុន្មានថ្ងៃ បន្ទាប់ពីនាវាដឹកប្រេងរុស្ស៊ីមួយគ្រឿងបានដឹកប្រេងឆៅប្រហែល ៧០០ ០០០បារ៉ែលចតនៅស្ថានីយប្រេង Matanzas របស់គុយបាកាលពីថ្ងៃអង្គារ។

មិនតែប៉ុណ្ណោះ នេះជាការដឹកជញ្ជូនប្រេងដ៏សំខាន់លើកដំបូងក្នុងរយៈពេលជិតបីខែ។

គួរបញ្ជាក់ថារដ្ឋបាលប្រធានាធិបតីអាមេរិក លោក ដូណាល់ ត្រាំ បានបិទផ្លូវប្រេងឥន្ធនៈរបស់ប្រទេសគុយបា ប៉ុន្តែលើកលែងកាលពីសប្តាហ៍មុនវិញ អនុញ្ញាតឱ្យមានការដឹកជញ្ជូនប្រេងនៅសប្តាហ៍នេះក្នុងហេតុផលមនុស្សធម៌។

ប្រទេសគុយបាបានស៊ូទ្រាំនឹងការដាច់ចរន្តអគ្គិសនីអស់ជាច្រើនសប្តាហ៍ កំណត់លើកម្រិតនៃការប្រើប្រាស់ប្រេងឥន្ធនៈ និងកង្វះខាតស្បៀងអាហារចាប់តាំងពីរដ្ឋបាល លោក ត្រាំ បានបិទផ្លូវប្រេងចាប់តាំងពីដើមឆ្នាំ ២០២៦ ៕

កប៉ាល់ដឹកប្រេងរុស្ស៊ី។ រូបភាព៖ Reuters

ប្រែសម្រួល៖ ណឺ មិនា

The post ក្រោយជោគជ័យលើកទី១ រុស្ស៊ីគ្រោងបញ្ជូនកប៉ាល់ដឹកប្រេងទី២ ចូលជួយគុយបា appeared first on Kampuchea Thmey Daily.

ប្រមុខរាជរដ្ឋាភិបាល បញ្ជាឲ្យស្រាវជ្រាវ និងចាត់វិធានការតឹងរ៉ឹងបំផុតចំពោះករណីលួចនាំប្រេងចូលពីថៃ

Sokhom Khon — Fri, 03 Apr 2026 00:29:12 +0000

សម្តេច ហ៊ុន ម៉ាណែត នាយករដ្ឋមន្ត្រីនៃកម្ពុជា បានបង្ហោះតាមបណ្តាញសង្គមហ្វេសប៊ុកនៅព្រឹកថ្ងៃទី៣មេសានេះថា សម្តេចបានឃើញសារព័ត៌មានថៃចុះផ្សាយពីបណ្តាញលួចនាំប្រេងខុសច្បាប់ពីប្រទេសថៃចូលមកលក់នៅកម្ពុជា។

ជាការឆ្លើយតប សម្តេចបានចេញបទបញ្ជាដាក់ឱ្យរដ្ឋមន្ត្រីក្រសួងរ៉ែ និងថាមពល អគ្គស្នងការនគរបាលជាតិ និងអគ្គនាយកអគ្គនាយកដ្ឋានគយ និងរដ្ឋាករ សហការស្រាវជ្រាវឱ្យបានច្បាស់លាស់។ បើមានករណីពិតប្រាកដ ត្រូវស្វែងរកមុខសញ្ញាពាក់ព័ន្ធទាំងអស់ និងចាត់វិធានការតាមផ្លូវច្បាប់ឱ្យបានតឹងរ៉ឹងបំផុត។

សម្តេចបានបញ្ជាក់បន្ថែមថា ប្រសិនពាក់ព័ន្ធក្រុមហ៊ុនប្រេងណា ត្រូវដកអាជ្ញាប័ណ្ណ។ បើមានមន្ត្រីរាជការ ឬកងកម្លាំងប្រដាប់អាវុធពាក់ព័ន្ធ ត្រូវបញ្ចប់តួនាទី និងបណ្តេញចេញពីក្របខណ្ឌជាកំហិត ដោយមិនគិតពីឋានៈឡើយ។

សម្តេចក៏បានរំលឹកដែរថា កម្ពុជាបានផ្អាកការទិញប្រេងឥន្ធនៈ និងឧស្ម័នគ្រប់ប្រភេទពីថៃ តាំងពីខែមិថុនា ឆ្នាំ២០២៥ ហើយកម្ពុជាមានប្រភពប្រេងពីប្រទេសដទៃគ្រប់គ្រាន់ គ្មានការចាំបាច់នាំចូលពីថៃទៀតទេ៕

The post ប្រមុខរាជរដ្ឋាភិបាល បញ្ជាឲ្យស្រាវជ្រាវ និងចាត់វិធានការតឹងរ៉ឹងបំផុតចំពោះករណីលួចនាំប្រេងចូលពីថៃ appeared first on Kampuchea Thmey Daily.

មិនត្រឹមបញ្ជូនសហការលើវិស័យកងទ័ពទេ ជប៉ុនក៏ជួយផ្តល់ប្រេងដល់ហ្វីលីពីនក្នុងគ្រាវិបត្តិ

Minea Neu — Thu, 02 Apr 2026 13:00:00 +0000

ប្រទេសហ្វីលីពីនកំពុងប្រឈមមុខនឹងវិបត្តិប្រេងឥន្ធនៈធ្ងន់ធ្ងរគិតត្រឹមខែមីនា ឆ្នាំ២០២៦ ដោយមានស្តុកប្រេងមានត្រឹមតែជាង ៤៥ថ្ងៃប៉ុណ្ណោះ។ ប្រទេសនេះមានប្រជាជនជាង១១៥លាននាក់ និងជាប់ជាប្រទេសមានប្រជាជនច្រើនជាងគេទី១២នៅលើពិភពលោក ថែមទាំងប្រកាសអាសន្នលើវិស័យថាមពលបន្ទាប់ពីការផ្គត់ផ្គង់នាំចូលបានធ្លាក់ចុះ ដោយសារសង្រ្គាមនៅមជ្ឈិមបូព៌ា។

យោងតាម CNN និងរ៉យទ័រផ្សាយចុងខែមីនា ឆ្នាំ២០២៦ ប្រទេសហ្វីលីពីននាំចូលប្រេងឆៅ ៩៨% ពីខាងក្រៅ ភាគច្រើនមកពីមជ្ឈិមបូព៌ាតែត្រូវបានរំខានដោយជម្លោះនៅអ៊ីរ៉ង់។

យ៉ាងណាប្រទេសជប៉ុនកំពុងផ្តល់ប្រេងម៉ាស៊ូតដល់ប្រទេសនេះ ក្នុងនាមជាដៃគូដ៏សំខាន់មួយដើម្បីធានាពីស្ថិរភាពខ្សែសង្វាក់ផ្គត់ផ្គង់ក្នុងតំបន់។

នាយករដ្ឋមន្រ្តីជប៉ុន លោកស្រី ណាសាអេ តាកាអ៊ិឈិ។ រូបភាព៖ Reuters

ស្ថានភាពនិងកង្វះខាតប្រេងនៅហ្វីលីពីន

ភាពអាសន្នរបស់ជាតិ៖ ប្រទេសហ្វីលីពីនបានប្រកាសអាសន្នថាមពលជាតិ ដោយសារតែបញ្ហាផ្គត់ផ្គង់ប្រេងឥន្ធនៈធ្ងន់ធ្ងរកើតចេញពីជម្លោះអ៊ីរ៉ង់ រំខានដល់ការដឹកជញ្ជូននៅមជ្ឈិមបូព៌ា។

វិបត្តិផ្គត់ផ្គង់៖ របាយការណ៍មួយបង្ហាញថាការផ្គត់ផ្គង់ប្រេងនៅហ្វីលីពីនមានកំណត់ក្នុងរយៈពេល ៤៥ថ្ងៃ នាំឱ្យមានការនាំចូលប្រេងម៉ាស៊ូតចំនួន ១៤២ ០០០ បារ៉ែលពីប្រទេសជប៉ុននៅចុងខែមីនា ឆ្នាំ ២០២៦។

ការពឹងផ្អែកខ្ពស់៖ ប្រទេសនេះពឹងផ្អែកយ៉ាងខ្លាំងលើការនាំចូល ដោយប្រេងឆៅ ៩៨% មកពីមជ្ឈិមបូព៌ា។

ផលប៉ះពាល់នៃការខ្វះខាតក្នុងតំបន់៖ ទោះបីជាប្រទេសអាស៊ីអាគ្នេយ៍មួយចំនួនរងផលប៉ះពាល់ក៏ដោយ តែហ្វីលីពីនស្ថិតក្នុងចំណោមប្រទេសរងផលប៉ះពាល់ខ្លាំងបំផុត ដែលនាំឱ្យកូដករដឹកជញ្ជូនតវ៉ាប្រឆាំងនឹងតម្លៃហក់ឡើងខ្ពស់។

+ ហេតុអ្វីបានជាប្រទេសជប៉ុនផ្គត់ផ្គង់ប្រេងក្នុងប្រទេសហ្វីលីពីន? មានហេតុផល៤ យ៉ាងដែលទីក្រុងតូក្យូបញ្ចេញស្តុងប្រេងរបស់ខ្លួន ជួយហ្វីលីពីន!

ទី១. សាមគ្គីភាពខ្សែសង្វាក់ផ្គត់ផ្គង់៖ ប្រទេសជប៉ុនមានគោលបំណងរក្សាសន្តិសុខថាមពលសម្រាប់ប្រទេសអាស៊ាន ជាកន្លែងដែលជប៉ុនបង្កើតខ្សែសង្វាក់ផ្គត់ផ្គង់។

ទី២. ការចេញស្តុកប្រេងជាយុទ្ធសាស្ត្រ៖ ប្រទេសជប៉ុនមានទុនបម្រុងយ៉ាងច្រើនដែលគ្របដណ្តប់លើការប្រើប្រាស់ជាង ៨ខែ ដែលកំពុងទាញយកទុនបម្រុងទាំងនេះ ដើម្បីរក្សាស្ថិរភាពការផ្គត់ផ្គង់ក្នុងតំបន់។

ទី៣. ពង្រឹងចំណងមិត្តភាព៖ ជប៉ុនកំពុងជួយប្រទេសដូចជាហ្វីលីពីន និងវៀតណាម ដើម្បីទប់ទល់នឹងអស្ថិរភាពក្នុងតំបន់ដែលកំពុងកើនឡើង និងធានាការផ្គត់ផ្គង់ថាមពល អំឡុងសង្គ្រាមនៅអ៊ីរ៉ង់។

ទី៤. ការគាំទ្រយ៉ាងសកម្ម៖ ក្រៅពីប្រេងម៉ាស៊ូតជាង ១៤០ ០០០ បារ៉ែលដឹកជញ្ជូនទៅហ្វីលីពីន ប្រទេសជប៉ុនក៏គាំទ្រវិធានការសន្សំសំចៃថាមពលផងដែរ៕

ប្រែសម្រួល៖ ណឺ មិនា

The post មិនត្រឹមបញ្ជូនសហការលើវិស័យកងទ័ពទេ ជប៉ុនក៏ជួយផ្តល់ប្រេងដល់ហ្វីលីពីនក្នុងគ្រាវិបត្តិ appeared first on Kampuchea Thmey Daily.

ប្រេង​ឥន្ធនៈ Archives - Kampuchea Thmey Daily

ក្រុមហ៊ុនចិន Royal Vopak ស្វែងរកឱកាសបង្កើតស្ថានីយចម្រាញ់ប្រេង និងឧស្ម័ន LNG នៅកម្ពុជា

ឥណ្ឌា​ ប្រឈម​នឹងការ​យកពន្ធ ៥០០% ពីអាមេរិក ជុំវិញ​ការបន្ត​ទិញ​ប្រេង​ពីរុស្ស៊ី​