ព័ត៌មានអន្ដរជាតិ

ឥណ្ឌា ប្រឈមនឹងការយកពន្ធ ៥០០% ពីអាមេរិក ជុំវិញការបន្តទិញប្រេងពីរុស្ស៊ី

បានផុស

២ នាទី មុន

នៅ

ថ្ងៃពុធ ១៥ កក្កដា ២០២៦

ដោយ

សេតវិមានបានចេញការគាំទ្រសេចក្តីព្រាងច្បាប់ទណ្ឌកម្មដល់ប្រទេសឥណ្ឌា ដែលអាចធ្វើឱ្យប្រទេសនេះប្រឈមនឹងពន្ធរបស់សហរដ្ឋអាមេរិករហូតដល់ ៥០០ភាគរយ ដោយសារតែការទិញប្រេងរបស់រុស្ស៊ីជាបន្តបន្ទាប់។

ឆ្លើយតបទៅនឹងសំណួររបស់ទីភ្នាក់ងារសារព័ត៌មាន ANI នៅថ្ងៃទី១៤ ខែកក្កដា ឆ្នាំ២០២៦ មន្ត្រីសេតវិមានម្នាក់បានបញ្ជាក់ថា ប្រធានាធិបតីអាមេរិក លោក ដូណាល់ ត្រាំ គាំទ្រច្បាប់នេះ។ មន្ត្រីរូបនោះនិយាយថា៖ « ប្រធានាធិបតី ត្រាំ គាំទ្រសេចក្តីព្រាងច្បាប់នេះ»។

មេដឹកនាំឥណ្ឌា និង លោក ដូណាល់ ត្រាំ។ រូបភាព៖ NDTV World

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សំណើនេះ ជាច្បាប់ទណ្ឌកម្មរុស្ស៊ី ត្រូវបានណែនាំដោយអតីតសមាជិកព្រឹទ្ធសភាសាធារណរដ្ឋ លោក Lindsey Graham រួមជាមួយសមាជិកព្រឹទ្ធសភាប្រជាធិបតេយ្យ លោក Richard Blumenthal ។ ប្រសិនបើច្បាប់នេះត្រូវបានអនុម័ត នោះវានឹងផ្តល់អំណាចដល់ប្រធានាធិបតីអាមេរិកក្នុងការដាក់ពន្ធរហូតដល់ ៥០០ភាគរយ លើការនាំចូលរបស់ប្រទេសដែលបន្តធ្វើអាជីវកម្មជាមួយវិស័យថាមពលរបស់រុស្ស៊ី។

ពេញមួយយុទ្ធនាការសម្រាប់សេចក្តីព្រាងច្បាប់នេះ លោក Graham បានអះអាងម្តងហើយម្តងទៀតថា សម្ពាធមិនគួរធ្លាក់ត្រឹមលើទីក្រុងមូស្គូប៉ុណ្ណោះទេ ប៉ុន្តែលើប្រទេសដែលរក្សាប្រាក់ចំណូលថាមពលជាមួយរុស្ស៊ីផងដែរ។

លោកតែងតែចង្អុលទៅប្រទេសឥណ្ឌា និងប្រទេសចិន ដោយនិយាយថា ប្រទេសទាំងពីរនេះរួមគ្នាមានជិត ៧០ភាគរយនៃការនាំចេញប្រេង ឧស្ម័ន និងប្រេងកាតរបស់រុស្ស៊ី។

យោងតាម លោក Graham ការកាត់ផ្តាច់តម្រូវការនេះនឹងបង្កើនសម្ពាធសេដ្ឋកិច្ចលើទីក្រុងមូស្គូ ហើយក៏អាចជួយបញ្ចប់សង្គ្រាមនៅអ៊ុយ។

ប្រសិនបើត្រូវបានអនុម័ត ច្បាប់នេះនឹងផ្តល់ឱ្យប្រធានាធិបតីអាមេរិកនូវអំណាចទូលំទូលាយបំផុតមួយ ដែលសភាបានផ្តល់ ដើម្បីដាក់ពន្ធបន្ទាប់បន្សំលើប្រទេសដែលធ្វើពាណិជ្ជកម្មជាមួយឧស្សាហកម្មថាមពលរបស់រុស្ស៊ី។

យ៉ាងណា ស្ថានភាពកាន់តែស្មុគស្មាញ បន្ទាប់ពីការលើកលែងពន្ធបណ្តោះអាសន្នរបស់ក្រសួងរតនាគារអាមេរិក ផុតកំណត់នៅថ្ងៃទី១៧ ខែមិថុនា ឆ្នាំ២០២៦ ។ ការលើកលែងពន្ធនេះបានអនុញ្ញាតឱ្យឥណ្ឌាទិញប្រេងឆៅរបស់រុស្ស៊ីដោយមិនទទួលបានការដាក់ទណ្ឌកម្ម។ ការផុតកំណត់លើពន្ធ បានធ្វើឱ្យឥណ្ឌាស្ថិតក្នុងតំបន់ពណ៌ប្រផេះស្របច្បាប់៕

សម្រួល៖ ណឺ មិនា