ផាច សុជាវីឡា Archives - Kampuchea Thmey Daily

មុនប៉ះបឹងកេតថ្ងៃអាទិត្យនេះ ភ្នំពេញក្រោនមិនទាន់ចាញ់ក្នុងជើងទី២

Pha Rothana — Fri, 26 Jan 2024 09:51:47 +0000

ក្លិបបាល់ទាត់ភ្នំពេញក្រោនជាក្រុមតែមួយគត់នៅលីគកំពូលកម្ពុជា ដែលមិនទាន់ស្គាល់បរាជ័យក្នុងជើងទី២ ខណៈឈានចូលជុំទី៣ ពួកគេបើកទ្វារផ្ទះរបស់ខ្លួនទទួលក្រុមបឹងកេត នៅថ្ងៃអាទិត្យ ទី២៨ ខែមករា ឆ្នាំ២០២៤។

ការប្រកួតខេមបូឌានព្រីមៀរលីគបានបញ្ចប់ការប្រកតក្នុងជុំទី២កាលពីសប្តាហ៍មុនដោយមានតែភ្នំពេញក្រោនមួយគត់ក្នុងចំណោមក្រុមទាំង១០ដែលមិនចាញ់ក្នុងជើងទី២។ ៩លើក ក្នុងជុំទី២ ក្រុមភ្នំពេញក្រោន ស្មើគ្នាជាមួយបឹងកេត ៥-៥, ព្រះខ័នរាងស្វាយរៀង ០-០, ឈ្នះក្រសួងការពារជាតិ ៣-០, ស្មើណាហ្គាវើលដ៍ ១-១, ឈ្នះវិសាខា ៣-១, ឈ្នះអាយអេសអាយ ដង្កោសែនជ័យ ២-០, ឈ្នះអង្គរថាយហ្គឺរ ៣-២, ឈ្នះព្រៃវែង ៣-០ និងប្រកួតចុងក្រោយឈ្នះគិរីវង់សុខសែនជ័យ ៤-១។ ដូច្នេះការប្រកួត៩លើករបស់ភ្នំពេញក្រោនក្នុងជុំទី២គឺឈ្នះ៦ និងស្មើ៣ រកបាន២១ពិន្ទុ។

ទោះបីជាយ៉ាងណា ក្រុមភ្នំពេញក្រោនឈរចំណាត់ថ្នាក់លេខ២ តាមពីក្រោយក្រុមលេខ១ ព្រះខ័នរាជស្វាយរៀង តែ២ពិន្ទុ។

ការប្រកួតជុំទី៣ចាប់ផ្តើមនាចុងសប្ដាហ៍នេះ ដោយភ្នំពេញទទួលក្រុមបឹងកេតនៅថ្ងៃទី២៨ ខែមករា ឆ្នាំ២០២៤។ កាលពីសប្តាហ៍មុន បឹងកេត ធ្វើបានល្អដោយស្មើជាមួយក្រុមកំពូលតារាង ព្រះខ័នរាជស្វាយរៀង ៣-៣ នៅទឹកដីខេត្តស្វាយរៀង។ ដូច្នេះបឹងកេតជាក្រុមមួយបង្កគ្រោះថ្នាក់ដល់ភ្នំពេញក្រោននាចុងសប្តាហ៍នេះ។

ភ្នំពេញក្រោនកំពុងមមាញឹកទាំងក្នុងការប្រកួតក្នុងលីគ ពានរង្វាន់សម្តេចតេជោ ហ៊ុន សែន និង ជាពិសេសការប្រកួតជម្រុះក្នុងពានរង្វាន់ AFC Cup នៅថ្ងៃទី១៣ ខែកុម្ភៈ ជាមួយក្រុមអូស្រ្ដាលី Central Coast Mariners ។

បច្ចុប្បន្នខ្សែប្រយុទ្ធ Shintaro Shimizu របស់ភ្នំពេញក្រោនកំពុងឈរនៅលេខ២ ក្នុងតារាងកីឡាករស៊ុតបញ្ចូលទីច្រើនបំផុតនៅលីគកំពូលកម្ពុជា ដោយស៊ុតបញ្ចូលទីបាន១២គ្រាប់៕

អត្ថបទ៖ ផា រតនា

The post មុនប៉ះបឹងកេតថ្ងៃអាទិត្យនេះ ភ្នំពេញក្រោនមិនទាន់ចាញ់ក្នុងជើងទី២ appeared first on Kampuchea Thmey Daily.

ផាច សុជាវីឡា ប្តេជ្ញាយកជ័យលើ Shan United យប់នេះដើម្បីប្រវត្តិសាស្ត្របាល់ទាត់កម្ពុជា

Pha Rothana — Thu, 14 Dec 2023 00:03:56 +0000

ក្លិបភ្នំពេញក្រោន នឹងត្រូវជួបក្លិប Shan United របស់មីយ៉ាន់ម៉ា នៅវេលាម៉ោង៧យប់ ថៃ្ងព្រហស្បតិ៍ ទី១៤ ខែធ្នូ ឆ្នាំ២០២៣ សម្រាប់ការប្រកួតវគ្គសន្សំពិន្ទុក្នុងពូលចុងក្រោយ ដើម្បីស្វែងរកកៅអីឡើងទៅវគ្គបន្តជាលើកដំបូងក្នុងពានរង្វាន់លំដាប់ទី២ទ្វីបអាស៊ី AFC Cup។

ខ្សែការពារស្លាបឆ្វេងកីឡាករ ផាច សុជាវីឡា មិនសូវមានក្ដីបារម្ភច្រើនទេ ក្នុងជំនួបជាមួយ Shan United យប់នេះ ទោះបីមួយរយៈចុងក្រោយភ្នំពេញក្រោនមមាញឹកទាំងការប្រកួតក្នុងលីគកំពូលកម្ពុជានិង AFC Cup។ ការប្រកួតជាប់គ្នាច្រើនជាមូលហេតុធ្វើឲ្យកីឡាករភ្នំពេញក្រោន មិនសូវមានពេលសម្រាក និងមានបញ្ហារបួសទៀត។

ផាច សុជាវីឡា បានប្រាប់«កម្ពុជាថ្មី»៖«សម្រាប់ការប្រកួតយប់នេះ ខ្ញុំមិនសូវបារម្ភទេ ព្រោះកីឡាករយើងជាសះស្បើយច្រើន។ ណាមួយភ្នំពេញក្រោនមានកីឡាករច្រើនអាចជំនួសបាន។ ក្រុមយើងនឹងបន្ដលេងតាមរបៀបដែលក្រុមលេងដូចរាល់ដង ដើម្បីស្វែងរកជ័យជម្នះ»។

បន្ទាប់ពីជួបក្រុម Shan United ក្រុមភ្នំពេញក្រោន បន្តធ្វើការងារធ្ងន់ទៀតនឹងត្រូវជួបក្លិបវិសាខា នៅថ្ងៃចន្ទ ទី១៨ ខែធ្នូ ឆ្នាំ២០២៣ ក្នុងពានរង្វាន់ខេមបូឌានព្រីមៀរលីគ។

Shan United ជាក្រុមមួយនៅតែមិនទាន់ស្គាល់ពាក្យថាចាញ់នៅឡើយទេ ក្នុងការប្រកួតលីគកំពូលមីយ៉ាន់ម៉ា ដោយប្រកួត២១លើក ឈ្នះ១៩ ស្មើ២ មាន៥៩ពិន្ទុ ប៉ុន្តែសម្រាប់ការប្រកួតក្នុងពានរង្វាន់ AFC Cup វិញ អស់ឱកាសឡើងទៅវគ្គបន្តហើយ បន្ទាប់ពីរកបានតែ១ពិន្ទុពីការប្រកួត៥លើកកន្លងមកគឺស្មើ១ និងចាញ់៤ ស្ថិតនៅបាតតារាង។

ការប្រកួតនៅទឹកដីមីយ៉ានម៉ាយប់នេះ ភ្នំពេញក្រោន ត្រូវការត្រឹមស្មើ ឬចាញ់តិចគ្រាប់បាល់ ក៏នឹងក្លាយជាក្រុមកម្ពុជាដំបូងឆ្លងផុតវគ្គចែកពូលដើម្បីឡើងវគ្គពាក់កណ្តាលផ្តាច់ប្រចាំតំបន់អាស៊ាន Asean Zonal Semi Final នៃពានរង្វាន់ AFC Cup ពីព្រោះគូប្រជែងលេខ២ល្អបំផុតគឺ Terengganu មាន១២ពិន្ទុដូចភ្នំពេញក្រោនដែរ តែចាញ់គ្រាប់បាល់ដល់ទៅ៥គ្រាប់ឯណោះ។

កាលពីជើងទី១ ភ្នំពេញក្រោន បានយកឈ្នះ Shan United ក្នុងលទ្ធផល ៤-០ នៅពហុកីឡដ្ឋានជាតិអូឡាំពិក កាលពីថ្ងៃទី៥ ខែតុលា ឆ្នាំ២០២៣។

កីឡាករ ផាច សុជាវីឡា បានបន្ថែមថា៖«យប់នេះ យើងនឹងប្រឹងប្រែងឲ្យអស់ពីសម្ថភាព ដើម្បីយកជ័យជម្នះឲ្យបានជាដាច់ខាត ដើម្បីបង្កើតប្រវត្តិសាស្រ្តសម្រាប់បាល់ទាត់កម្ពុជា និងមុខមាត់បាល់ទាត់កម្ពុជាលើឆាកអន្តរជាតិ»៕

អត្ថបទ៖ ផា រតនា

The post ផាច សុជាវីឡា ប្តេជ្ញាយកជ័យលើ Shan United យប់នេះដើម្បីប្រវត្តិសាស្ត្របាល់ទាត់កម្ពុជា appeared first on Kampuchea Thmey Daily.

ផាច សុជាវីឡា ឱកាសលេងក្រៅប្រទេសជាកត្តាអភិវឌ្ឍខ្លួនបន្ថែមទៀត

chean virakbot — Thu, 21 Sep 2023 07:40:42 +0000

ក្រោយការដាក់ចិត្តខិតខំប្រឹងប្រែងហ្វឹកហាត់យ៉ាងខ្លាំង ខ្សែការពារស្លាបឆ្វេង ផាច សុជាវីឡា ទទួលបានឱកាសថ្មីលើសពីការរំពឹងទុកជាមួយភ្នំពេញក្រោន។ ជាពិសេសរូបគេបានបង្ហាញខ្លួនក្នុងការប្រកួតលើឆាកអន្តរជាតិក្នុងពានរង្វាន់ AFC Cup និងជម្រើសជាតិកម្ពុជាសម្រាប់ការប្រកួតមិត្តភាពអន្តរជាតិជាមួយ ហុងកុង និងម៉ាកាវ។

ផាច សុជាវីឡា បានប្រាប់«កម្ពុជាថ្មី»ថា ៖«ខ្ញុំមានអារម្មណ៍រីករាយសម្រាប់ការមកប្រកួតនៅក្រៅប្រទេស ពីព្រោះខ្ញុំអាចមានឱកាសបានប្រកួតជាមួយដៃគូថ្មីៗ កម្រិតខ្លាំង ក៏ដូចជាទទួលបានបទពិសោធថ្មីៗ ដែលធ្វើឲ្យខ្ញុំរីកចម្រើនជាលំដាប់»។

គិតត្រឹមសប្ដាហ៍ទី៥ក្នុងខេមបូឌានព្រីមៀរលីគ ផាច សុជាវីឡា រកគ្រាប់បាល់បាន១គ្រាប់ក្នុងនាមជាខ្សែការពារស្លាបឆ្វេងរបស់ភ្នំពេញក្រោន។ ពេលនេះ រូបគេកំពុងនៅជាមួយមិត្តរួមក្រុមសម្រាប់ការប្រកួតជាមួយ Cebu F.C. វេលាម៉ោង៧យប់ថ្ងៃទី២១ ខែកញ្ញា ឆ្នាំ២០២៣ នៅកីឡដ្ឋាន Rizal Memoria ក្នុងការប្រកួតសន្សំពិន្ទុក្នុងពូល F ពានរង្វាន់ AFC Cup ។

កីឡាករបន្តថា៖«ខ្ញុំគិតថាមិនសូវជាមានសម្ពាធទេចំពោះការប្រកួតនៅថ្ងៃនេះ តែពិបាកតិចតូចដោយសារទីលានរបស់ក្រុមភ្ញៀវស្មៅសិប្បនិម្មិត។ យើងមិនសូវសាំ ហើយកីឡាករអាចមានរបួស ប៉ះពាល់ដល់ការប្រកួតក្រោយៗ»។

ការប្រកួតវេលាម៉ោង៧យប់នេះទាំងកីឡាករ និងក្រុមគ្រូបង្វឹកបានដាក់គោលដៅរក៣ពិន្ទុដើម្បីដំណើរឲ្យផុតវគ្គសន្សំពិន្ទុក្នុងពូល AFC Cup៕

អត្ថបទ៖ ផា រតនា

The post ផាច សុជាវីឡា ឱកាសលេងក្រៅប្រទេសជាកត្តាអភិវឌ្ឍខ្លួនបន្ថែមទៀត appeared first on Kampuchea Thmey Daily.

ហេតុអ្វី ផាច សុជាវីឡា ចូលភ្នំពេញក្រោនជាកន្លែងប្រកួតប្រជែងខ្លាំង?

chean virakbot — Thu, 31 Aug 2023 01:24:51 +0000

ក្លិបបាល់ទាត់ភ្នំពេញក្រោនបានក្លាយជាផ្នែកដ៏សំខាន់ក្នុងការជួយជំរុញកីឡាករ ផាច សុជាវីឡា ឲ្យបានជាប់ជម្រើសជាតិកម្ពុជាដូចបំណងប្រាថ្នា បន្ទាប់ពីរូបគេបានចូលរួមជាក្លិបជើងឯកលីគកំពូលកម្ពុជា៨សម័យកាលកាលពីដើមរដូវកាលនេះ។

ក្នុងនាមជាសមាជិកថ្មី រូបគេបានចូលរួមជាមួយមិត្តក្រុមជួយឲ្យក្រុមភ្នំពេញក្រោន បានឡើងទៅដល់វគ្គចែកពូលពានរង្វាន់ AFC Cup ឆ្នាំ២០២៣ បន្ទាប់ពីឈ្នះលើក្រុមជើងលីគឡាវ Young Elephants ដោយលទ្ធផល ៣-០ វគ្គជម្រុះបឋម និងបន្តឈ្នះ Tampines Rover ២-៣ នៅវគ្គខ្វែង។

ការចូលរួមជាមួយក្លិបជោគជ័យដែលសំបូរដោយកីឡាករល្អៗគឺជាការប្រកួតប្រជែងដ៏លំបាកសម្រាប់កីឡាករម្នាក់ៗដើម្បីទទួលបានការទុកចិត្តពីគ្រូបង្វឹក ប៉ុន្តែសម្រាប់អតីតខ្សែបម្រើការពាររបស់ក្លិបអគ្គិសនីកម្ពុជា ផាច សុជាវីឡា ដែលចូលចិត្តការប្រកួតប្រជែងអ្វីថ្មីៗនេះគឺការហ៊ានប្រឈមនឹងកន្លែងមានការប្រកួតប្រជែងខ្ពស់ទើបធ្វើឲ្យខ្លួនកាន់តែមានការអភិវឌ្ឍឈានឆ្ពោះទៅបំណងប្រាថ្នារបស់ខ្លួន។

ផាច សុជាវីឡា បានប្រាប់«កម្ពុជាថ្មី»ថា ៖«ខ្ញុំមុនពេលចូលរួមជាមួយភ្នំពេញក្រោន ខ្ញុំដឹងថា នៅទីនោះមានការប្រកួតប្រជែងខ្លាំង។ អីចឹងខ្ញុំអាចនឹងមិនសូវទទួលបានឱកាសលេង តែខ្ញុំនៅតែចូលរួម ពីព្រោះខ្ញុំចង់ដឹងពីសមត្ថភាពខ្លួនឯង។ នៅកន្លែងការប្រកួតប្រជែងខ្ពស់គឺជាកន្លែងដែលយើងដឹងកម្រិតរបស់ខ្លួន និងត្រូវពង្រឹងអ្វីបន្ថែម។ ជាពិសេសរៀនពីសិស្សច្បងដើម្បីអភិវឌ្ឍខ្លួន»។

តាមរយៈការខិតខំប្រឹងប្រែងផ្ទាល់ខ្លួន បូករួមទាំងគ្រូបង្វឹកពូកែប្រើប្រាស់កីឡាករទៀតនោះបានធ្វើឲ្យ សុជាវីឡា លេចធ្លោលើទីលានទាំងការប្រកួតលីគ និង AFC Cup រហូតត្រូវបានកោះហៅចូលជម្រើសជាតិកម្ពុជាត្រៀមប្រកួតមិត្តភាពអន្តរជាតិថែមទៀតផង។

ចំណែក លោក Oleg Starynskyi គ្រូបង្វឹកភ្នំពេញក្រោន បានលើកឡើងថា ៖«ខ្ញុំរីករាយចំពោះ ផាច សុជាវីឡា ព្រោះក្តីស្សមៃរបស់គាត់ចង់ជាប់ជម្រើសជាតិបានសម្រេច។ នេះក៏ជាហេតុផលមួយដែលរូបគេចូលរួមជាមួយភ្នំពេញក្រោន។ ខ្ញុំបានទាក់ទងកីឡាករមួយចំនួនដែរ ប៉ុន្តែអ្នកខ្លះបានបដិសេធ ដោយសារពួកគេគិតថា ការចូលរួមជាមួយភ្នំពេញក្រោន ប្រហែលជានឹងមិនសូវបានលេងទេ។ យ៉ាងណា សុជាវីឡា ចូលចិត្តប្រកួតប្រជែង ទោះក្នុងតំណែងដែលគាត់លេង មានកីឡាករ សឿត បារាំង ដ៏ល្អម្នាក់ក៏ដោយ ក៏គាត់សម្រេចមកចូលរួមជាមួយយើងដើម្បីរៀនសូត្រអ្វីដែលថ្មីពីរៀមច្បង»។

កីឡារករ ផាច សុជាវីឡា បានចាប់ផ្តើមលេងបាល់ដំបូងក្នុងពានរង្វាន់តាមសាលារៀន បន្ទាប់មក រូបគេបានធ្វើតេស្តជាប់នៅក្រុមយុវជនព្រះខ័នរាជស្វាយរៀងអាយុក្រោម១៥ឆ្នាំ។ ក្រោយមក រូបគេបានធ្វើតេស្តជាប់នៅសាលាបាល់ទាត់ជាតិបាទីដើម្បីបានហ្វឹកហាត់កីឡាបាល់ទាត់កម្រិតអាជីពកាន់តែខ្ពស់។

ក្រោយចំណាយពេលវេលា៤ឆ្នាំនៅសាលាបាល់ទាត់ជាតិបាទី និងជាពេលបញ្ចប់ការសិក្សាទុតិយភូមិ ផាច សុជាវីឡា បានចូលរួមជាមួយក្លិបបាល់ទាត់អគ្គិសនីកម្ពុជា អស់រយៈពេល៤ឆ្នាំដែលជាកន្លែងបានឈ្នះជើងឯកលីគទី២ ឆ្នាំ២០២២ និងឡើងដល់វគ្គពាក់កណ្តាលផ្តាច់ព្រ័ត្រពានរង្វាន់សម្តេចតេជោ ហ៊ុន សែន លើកទី១៦ មុនពេលចូលរួមជាមួយភ្នំពេញក្រោនក្នុងរដូវកាល២០២៣-២៤៕

អត្ថបទ៖ ផា រតនា

The post ហេតុអ្វី ផាច សុជាវីឡា ចូលភ្នំពេញក្រោនជាកន្លែងប្រកួតប្រជែងខ្លាំង? appeared first on Kampuchea Thmey Daily.