ផ្នែកលក់ Archives - Kampuchea Thmey Daily

មេរៀនសំខាន់ៗមុនបើកអាជីវកម្មខ្លួនឯងពីស្ថាបនិក jimmy choo

Sonya — Fri, 20 Nov 2020 05:27:00 +0000

អ្នកស្រី Tamara Mellon ជាសហស្ថាបនិកមួយរូបនៃក្រុមហ៊ុន Jimmy Choo ដែលជាក្រុមហ៊ុនជំនាញច្នៃម៉ូតស្បែកជើងកែង កាបូបដៃ គ្រឿងសម្អាងផ្សេងៗដ៏ល្បីឈ្មោះមួយនៅអង់គ្លេស។

អ្នកស្រី Mellon ចាប់ផ្តើមការងារដំបូងបង្អស់ជាអ្នកច្នៃម៉ូដលើគ្រឿងតុបតែងឲ្យក្រុមហ៊ុនគ្រឿងសម្អាង British Vogue។ ប៉ុន្តែក្រោយមក សហស្ថានិករូបនេះបានជួបអ្នកជួសជុលស្បែកជើងលោក Jimmy Choo ដែលពេលនោះ Jimmy Choo ជាបុគ្គលិកធ្វើការនៅក្នុងក្រុង London’s East End ។ ក្រោយបានជួប Jimmy Choo អ្នកស្រីបានណែនាំឲ្យលោកធ្វើប្រភេទស្បែកជើងសម្រាប់ថតម៉ូដលើគម្របទស្សនាវដ្តី។ បន្ទាប់ពីនោះមក ការច្នៃម៉ូដស្បែកជើងទទួលបានការគាំទ្រយ៉ាងខ្លាំង ដូច្នេះហើយទើបអ្នកទាំងពីរសម្រេចចិត្តបង្កើតរោងចក្រដោយខ្លួនឯងតែម្តង។

ក្រោយមកស្លាកយីហោ Jimmy Choo បានលេចរូបរាងឡើង។ អ្នកស្រី Mellon ធ្វើការជាអ្នកគ្រប់គ្រងទទួលបន្ទុកផ្នែកច្នៃម៉ូដនៅក្រុមហ៊ុន Jimmy Choo ចាប់តាំងពីឆ្នាំ ១៩៩៦ រហូតដល់ ២០១១ ។ អំឡុងពេលនោះអ្នកស្រីផ្តោតសំខាន់លើការផ្សព្វផ្សាយសក្តានុពលនៃម៉ាក Jimmy Choo ដើម្បីឲ្យទីផ្សាក្នុងស្រុកមានការទទួលស្គាល់ រហូតអាចពង្រីកហាងរបស់ខ្លួនបាន ១០០ នៅទូទាំងពិភពលោក។

ក្នុងឆ្នាំ ២០១៦ អ្នកស្រី Mellon ទទួលបានពានរង្វាន់ OBE (Order of the British Empire)។ អ្នកស្រីក៏ធ្លាប់ធ្វើជានាយិកាឲ្យក្រុមហ៊ុន Revlon ផងដែរ ហើយក្រោយមកអ្នកស្រីក៏ចាប់ផ្តើមបង្កើតនូវស្លាកយីហោស្បែកជើងថ្មីដោយដាក់ឈ្មោះខ្លួនឯងថា Tamara Mellon ។

នៅក្នុងបទសម្ភាសន៍មួយ ជាមួយអ្នកកាសែត អ្នកស្រី Tamara Mellon បាននិយាយយ៉ាងដូច្នេះថា “មនុស្សគ្រប់រូបសុទ្ធតែអាចស្វែងរកកម្លាំងចិត្ត និងឱកាសនៅគ្រប់ទីកន្លែង ឲ្យតែអ្នកទាំងនោះមានការតាំងចិត្តដើម្បីបន្តទៅមុខនិងមិនបោះបង់។” អ្នកស្រីបន្ថែមនិងផ្តល់យោបល់ថា “កុំឈប់ធ្វើការឲ្យសោះ ពីព្រោះមិនសំខាន់ថាអ្នកកំពុងធ្វើអ្វីទេ ការងារបង្កើតឱកាស ហើយឱកាសនេះហើយដែលនាំអ្នកទៅកន្លែងដែលអ្នកចង់ទៅ។ វាមិនសំខាន់ថា អាយុអ្នកប៉ុន្មាន ឬអ្នកចង់ធ្វើអ្វីទេ អ្វីដែលសំខាន់រឿងទាំងអស់នោះគឺអាស្រ័យលើឱកាសដែលអ្នកជួបអ្នកដទៃ។ ម្យ៉ាងវិញទៀត កុំស្តាប់ដំបូន្មានមួយចំនួនដែលគ្រាន់តែបង្អាក់ផ្លូវដើររបស់អ្នកឲ្យសោះ។” អ្នកស្រីបានលើកឧទាហរណ៍ចុងក្រោយថា “ចំពោះខ្ញុំផ្ទាល់ ពេលចាប់ផ្តើមដំបូង អ្នកណាក៏ប្រាប់កុំឲ្យបង្កើតក្រុមហ៊ុន Jimmy Choo ដែរ ប៉ុន្តែចុងក្រោយខ្ញុំបែរជាអរគុណខ្លួនឯងហើយដែលមិនស្តាប់ពាក្យសម្តីទាំងនោះ”៕

ប្រែសម្រួល៖ សន្យា

ប្រភព៖ Entrepreneur

The post មេរៀនសំខាន់ៗមុនបើកអាជីវកម្មខ្លួនឯងពីស្ថាបនិក jimmy choo appeared first on Kampuchea Thmey Daily.

ចង់ពូកែលក់ មានអតិថិជនច្រើន មើល ៤ ចំនុចនេះសិន

Sonya — Thu, 19 Nov 2020 04:24:08 +0000

មានម៉ូយជាប់ចិត្តស្គាល់ច្រើន មិនមែនជារឿងដែលងាយនឹងកសាងឡើយ។ គ្រប់គ្នាត្រូវព្យាយាម សាងទំនុកចិត្ត មានផលិតផលដែលប្រកបដោយគុណភាពពិតៗ។

សម្រាប់អ្នកដែលទើបចាប់ផ្ដើមអាជីវកម្មផ្នែកលក់ដំបូងប្រាកដជាមានមន្ទិលសង្ស័យចំពោះការចាប់ផ្ដើមដូចជា៖

១. តើយើងខ្ជះខ្ជាយពេលវេលារបស់យើងទេ?

ការសង្ស័យនិងភាពមិនប្រាកដប្រជា គឺជាផ្នែកដ៏ឈឺចាប់នៃដំណើរចាប់ផ្ដើម។ ក្នុងនាមជាសហគ្រិន យើងជាអ្នកប្រថុយប្រថាននិងអ្នកចាត់វិធានការ។ ជារឿយៗសកម្មភាពនិងគំនិតផ្ដួចផ្ដើមជាច្រើនរបស់យើង អាចគ្មានប្រសិទ្ធភាព នាំឲ្យយើងសួរថាខ្លួនឯងថា តើយើងខ្ជះខ្ជាយពេលវេលាទេ?

អតិថិជនគឺជាក្រុមទីមួយដែលជួយយើងឆ្លើយសំណួរនេះ។ ពួកគេមិនប្រាប់យើងពីរបៀបចំណាយធនធានដើម្បីទទួលបានលទ្ធផលអតិបរមានោះទេ ប៉ុន្តែពួកគេនឹងប្រាប់យើងថា តើដំណោះស្រាយដែលយើងកំពុងធ្វើ គឺមានតម្លៃសម្រាប់ការវិនិយោគដំបូងដែរឬទេ។

២. តើឱកាសគឺជាអ្វី?

ការសិក្សាអំពីការប្រកួតប្រជែងនិងគម្លាតនៅក្នុងការស្នើសុំតម្លៃរបស់ពួកគេ អាចផ្ដល់ឲ្យយើងនូវការបង្ហាញពីឱកាសទីផ្សារ។ ប៉ុន្តែដើម្បីយល់ឲ្យបានច្បាស់ពីបញ្ហាត្រូវដោះស្រាយដែលអតិថិជនគោលដៅរបស់យើងកំពុងប្រឈមមុខ យើងត្រូវនិយាយជាមួយពួកគេសិន។

ជាការលំបាកក្នុងការបង្កើតផលិតផលដែលទទួលបានជោគជ័យ ដោយមិនយល់ច្បាស់ពីបញ្ហាដែលយើងកំពុងដោះស្រាយ។ អ្នកទិញថ្ងៃនេះអាចនឹងប្រើដំណោះស្រាយដែលមានការប្រកួតប្រជែងសម្រាប់ហេតុផលច្រើនជាងមួយ។ អាចមានផ្នែកច្រើនជាងមួយដែលមានតម្រូវការស្រដៀងគ្នា ប៉ុន្តែមានការរំពឹងទុកខុសគ្នា។

បើយើងពិនិត្យឲ្យដិតដល់ បញ្ហាអាចដូចគ្នា ប៉ុន្តែភាពបន្ទាន់នៃតម្រូវការសម្រាប់អ្នកទិញផ្សេងៗគ្នាអាចខុសគ្នា។ នេះគឺជាចម្លើយសំខាន់បំផុតមួយដែលអាចរកឃើញពីការនិយាយជាមួយអ្នកទិញរបស់យើង ដើម្បីបង្កើតឱកាស។

៣. តើយើងគួរកសាងអ្វីខ្លះ?

ការស្ថាបនាដំណោះស្រាយផ្សេងៗគ្នានិងការសាកល្បងផលិតផលណាដែលដោះស្រាយបញ្ហាបានល្អបំផុត មិនមែនជាជម្រើសទេ។ ការនិយាយជាមួយអ្នកទិញអំពីតម្រូវការ ការរំពឹងទុកនិងបញ្ហាប្រឈមរបស់ពួកគេ ជាមួយនឹងដំណោះស្រាយដែលមានស្រាប់ អាចជួយឲ្យយើងចាប់ផ្ដើមនៅលើគ្រឹះរឹងមាំ។

អ្នកប្រើប្រាស់អាចជួយយើងកំណត់លក្ខណៈពិសេសនៃមុខងារ បទពិសោធន៍អ្នកប្រើប្រាស់ និងចំណុចប្រទាក់ ការចំណាយ និងដំណោះស្រាយដែលពួកគេចង់ប្រើ ហើយរីករាយសម្រាប់ការចំណាយ។

៤. តើអ្នកណាជាអ្នកទិញដ៏ល្អបំផុត?

អ្នកណាក៏ជាអ្នកទិញដ៏ល្អដែរ ឲ្យតែពួកគេជាអតិថិជនរបស់យើង។ ក្នុងនាមជាអ្នកលក់ត្រូវកំណត់អត្តសញ្ញាណអ្នកទិញ ព្រោះនៅពេលដែលយើងរៀនថាពួកគេជានរណា យើងនឹងរកប្រាក់បានច្រើនក្នុងរយៈពេលវែង និងចំណាយប្រាក់តិចក្នុងការវិនិយោគជាងមុន។

សរុបសេចក្ដីមក សហគ្រិនគ្រប់រូបត្រូវដោះស្រាយភាពមិនច្បាស់លាស់។ ចូលរួមយ៉ាងសកម្មដល់អតិថិជនរបស់យើងក្នុងការសម្រេចចិត្ត ជាពិសេសនៅដើមដំបូងអាចនាំមកនូវភាពមិនច្បាស់លាស់ខ្លះដល់ដំណើរការនេះ ប៉ុន្តែបើយើងពូកែដូចចំណុចខាងលើ នោះនឹងក្លាយជាអ្នកលក់អស្ចារ្យមិនខាន៕

ប្រែសម្រួល៖ សាង ស្រីល័ក្ខ

ប្រភព៖ forbes

ចុចអាន៖ សហគ្រិនណាអាច បោះបង់ចោល ៦ ចំណុចនេះ ធានាអាចទាញយកផលពីអាជីវកម្មបានជោគជ័យ

The post ចង់ពូកែលក់ មានអតិថិជនច្រើន មើល ៤ ចំនុចនេះសិន appeared first on Kampuchea Thmey Daily.

វិធីធ្វើឱ្យអតិថិជនចាប់អារម្មណ៍តាំងពីការជជែកឬជួបប្រជុំដំបូង

phea KPT — Wed, 18 Nov 2020 04:15:00 +0000

ចំណាប់អារម្មណ៍ដំបូង អាចមានសារៈសំខាន់បំផុត ជាពិសេសនៅពេលជួបអតិថិជនយើងចង់ឱ្យគេក្លាយជាម៉ូយប្រចាំ។ ដើម្បីទទួលបានលទ្ធផលនេះ រឿងដែលបណ្តាអ្នកកំពុងធ្វើការនៅផ្នែក Front desk ត្រូវដឹងមុនដំបូងបង្អស់នោះគឺថា មនុស្សមានទំនោរចាប់អារម្មណ៍លើយើងដោយផ្អែកលើសកម្មភាព មិនមែនសម្តីចេញតាមមាត់តែមួយមុខឡើយ ។

ដូច្នេះគន្លឹះមានប្រយោជន៍មួយចំនួនខាងក្រោមនឹងជួយផ្សាភ្ជាប់កិច្ចព្រមព្រៀងខាងអារម្មណ៍និងបង្កើតទំនាក់ទំនងអតិថិជនបានល្អ៖

រៀបរយនិងទាន់ពេលវេលា
អតិថិជនមករកយើងពីព្រោះពួកគេត្រូវការជំនួយសេវាឬផលិតផល។ ពួកគេច្រើនតែត្រូវបានណែនាំមកតាមរយៈមិត្តភក្តិឬតាមរយៈបណ្តាញសង្គម ហើយគេមកព្រោះជឿជាក់ថា យើងអាចបំពេញតម្រូវការគេបាន។ ដូច្នេះវិធីល្អបំផុតមួយ ដើម្បីបង្ហាញពីតម្លៃនិងវិសាលភាពនៃសេវាកម្មរបស់យើងចំពោះអតិថិជន គឺត្រូវរៀបចំខ្លួនរួចរាល់ជាមុន។ ស្វែងយល់តាំងតែពីការកក់ និងហៅទូរស័ព្ទលើកដំបូងឬការអ៊ីមែលមកសួរ បន្ទាប់មកធ្វើឱ្យប្រាកដថាយើងរួចរាល់ កុំឱ្យគេមកដល់ហើយរង់ចាំ។

គួរតែធ្វើការស្រាវជ្រាវខ្លះៗអំពីប្រវត្តិរូបសង្ខេបរបស់អតិថិជនជាមុន ស្វែងយល់ឱ្យបានច្រើនតាមដែលអាចធ្វើបានអំពីកន្លែងដែលពួកគេធ្វើការអ្វីដែលពួកគេកំពុងស្វែងរកត្រៀមខ្លួនដើម្បីឆ្លើយសំណួរដែលពួកគេអាចនឹងមានផងដែរ។

ជាការចាំបាច់ ដែលអ្នកត្រូវមកប្រជុំទាន់ពេល។ កុំនិយាយថាចូលធ្វើការម៉ោង៨ ដូច្នេះបើគេមកម៉ោង ៧ កន្លះជាបញ្ហារបស់គេ។ ត្រូវបង្ហាញថាយើងយកការងារជាមួយនឹងអតិថិជនជាធំ និងអនុវត្តយ៉ាងម៉ត់ចត់។

រូបភាពការិយាល័យនិងខ្លួនយើងផ្ទាល់
សញ្ញាណសំខាន់នៃវិជ្ជាជីវៈ គឺអ្នកនៅជួរខាងមុខនេះហើយ។ Front desk ត្រូវតែជាការិយាល័យដែលបានរៀបចំស្អាត ដូចគ្នានឹងបុគ្គលិកទទួលអតិថិជនដែលស្អាតសមសួនដែរ។ យើងមិនចង់ឲ្យអតិថិជនដើរចូលទៅក្នុងការិយាល័យដែលពោពេញទៅដោយភាពរាយប៉ាយ ក្លិនអាហារពេលព្រឹក និងឯកសាររញ៉េរញ៉ៃឡើយ។

ការផ្តោតអារម្មណ៍

ក្នុងអំឡុងពេលប្រជុំ ចូរដាក់ឧបករណ៍ទូរសព្ទចល័តនៅស្ងៀមឬរំញ័រ ដូច្នេះផ្តោតអារម្មណ៍លើអតិថិជនដែលកំពុងនៅជាមួយព្រោះពួកគេចង់មានអារម្មណ៍ថា យើងកំពុងផ្តល់ការយកចិត្តទុកដាក់។ អ្នកទទួលភ្ញៀវឬផ្នែកអតិថិជន គួរតែស្លៀកពាក់វិជ្ជាជីវៈគ្រប់ពេល។ អតិថិជនដែលមកជួបយើង ក្នុងលើកដំបូងកំពុងថតចម្លងចងចាំគ្រប់យ៉ាងនៅទីកន្លែងដែលគេទើបតែមកដល់នេះ។ ដូច្នេះស្លៀកពាក់ដូចកាលដែលយើងមកសម្ភាសន៍ចង់បានការងារនិងប្រកាន់អាកប្បកិរិយាវិជ្ជមាន ញញឹមរាក់ទាក់ ហើយស្តាប់ដោយយកចិត្តទុកដាក់នៅពេលអតិថិជនកំពុងនិយាយ បើកចំហចំពោះការសាកសួរជជីក ហើយរួចរាល់ក្នុងការប្រឈមក្រោមសម្ពាធ។

ត្រូវច្បាស់អំពីព័ត៌មាន
ផ្នែកនៃការសន្ទនានេះអាចទទួលបានភាពមិនស្រួលភ្លាម ប្រសិនយើងខ្លួនឯងមិនច្បាស់ហើយរង់ចាំទៅសួរបន្តអ្នកផ្សេងឬមេយើងសឹងគ្រប់រឿង។ អតិថិជនកំពុងស្វែងរកចម្លើយដោយស្មោះត្រង់ មិនមែនជាការពន្យា ឬនិយាយស្រមើស្រមៃវាយស្មានទេ៕

ប្រែសម្រួល៖ សុភា

ប្រភព៖ investopedia

ចុចអាន៖ កំពូលយុទ្ធសាស្រ្ត ៥ យ៉ាងសមិទ្ធផលការងាររលូនដូចបុគ្គលជោគជ័យ

The post វិធីធ្វើឱ្យអតិថិជនចាប់អារម្មណ៍តាំងពីការជជែកឬជួបប្រជុំដំបូង appeared first on Kampuchea Thmey Daily.

មេរៀនរកស៊ី ៣ចំណុច ពីថៅកែ Walmart

Sonya — Sat, 14 Nov 2020 01:59:59 +0000

នាដើមទសវត្សឆ្នាំ ១៩៦០ លោក Sam Walton បានបង្កើតឃ្លាំងលក់រាយទំនិញគ្រប់ប្រភេទលើកដំបូងមួយ នៅក្នុងទីក្រុង Bentonville រដ្ឋអាកានសាស សហរដ្ឋអាមេរិក។

លុះមកដល់ថ្ងៃទី ២២ ខែកក្កដា ឆ្នាំ១៩៦២ ឃ្លាំងលក់រាយទំនិញចម្រុះឈ្មោះ Walmart បានបើកដំណើរការជាផ្លូវការនិងទទួលការគាំទ្រយ៉ាងច្រើនពីពលរដ្ឋអាមេរិក ព្រមទាំងក្លាយជាយីហោដ៏ល្បីល្បាញ និងធំបំផុតដោយមានទីតាំងលក់រហូតដល់ជាង ១០,០០០ កន្លែងទូទាំងសកលលោក។

តើ Sam Walton ប្រកាន់គោលការណ៍ធ្វើជំនួញដូចម្ដេច ទើបអាចជំរុញឱ្យលោកសម្រេចបានជោគជ័យដ៏ធំធេងក្នុងនាមជាថ្នាក់ដឹកនាំ Walmart?

១. រៀនពីតម្លៃនៃលុយ

ខណៈម្ចាស់ក្រុមហ៊ុនជាច្រើនសម្រេចចិត្តលក់ក្រុមហ៊ុនរបស់ខ្លួន ដើម្បីប្តូរយកប្រាក់មកភ្លក់រសជាតិនៃបទពិសោធន៍ធ្វើជាអ្នកមាន មិនយូរប៉ុន្មានពួកគេត្រូវធ្លាក់ខ្លួនជាបន្តបន្ទាប់។ ចំពោះ Sam Walton វិញលោកមិនចូលចិត្តជីវិតបែបហ៊ឺហាដូចមនុស្សទូទៅឡើយ ប៉ុន្តែលោកចូលចិត្តជីវិតដែលមានតុល្យភាពលើការចាយវាយសមហេតុផល។ Walton ជឿថា ការផ្តល់តម្លៃដល់អតិថិជន គឺជាការជួយសន្សំប្រាក់ ដែលក្រោយមកវាបានក្លាយជាបាវចនាសំខាន់របស់ Walmart មួយគឺ “Save Money, Live Better” ឬមានន័យថា “សន្សំប្រាក់ ជីវិតនឹងប្រសើរឡើង” ។

២. រៀនពីកំហុស

ក្រោយពីប្រឹងប្រែងដ៏ខ្លាំងក្លារយៈពេល ៥ ឆ្នាំ ចុងក្រោយលោក Walton បានវ៉ាដាច់ក្រុមហ៊ុនគូប្រជែងដែលរកស៊ីក្នុងវិស័យតែមួយ និងបានធ្វើឱ្យ Walmart ក្លាយជាឃ្លាំងលក់រាយសម្ភារៈចម្រុះធំបំផុតក្នុងតំបន់។

លោក Walton ស្ទើរតែបាត់បង់អ្វីៗគ្រប់យ៉ាងដោយសារកំហុសលើកិច្ចសន្យាជួលទីតាំង ដោយហេតុតែមិនមានកុងត្រាជួលត្រឹមត្រូវ ម្ចាស់ដីដែល Walton កំពុងជួល បានដំឡើងថ្លៃឈ្នួលភ្លាមៗ និងចង់ឱ្យលោកផ្ទេរយីហោ Walmart ដែលកំពុងល្បីល្បាញទៅកូនប្រុសរបស់ម្ចាស់ដីថែមទៀត។

រឿងនេះបានបណ្ដាលឱ្យ Sam Walton បដិសេធឈប់ជួលកន្លែងនោះឈរជើងតទៅទៀត បើទោះបីជាថ្លៃឈ្នួលកម្រិតណាក៏ដោយ។ ក្រោយមក Walton បានដឹងថា នេះជាកំហុសដ៏ធ្ងន់របស់ខ្លួន និងបានចំណាយពេលច្រើនជាងមុនទ្វេដងស្វែងរកទីតាំងជួលថ្មី ហើយដើម្បីការពារបញ្ហាកុងត្រាជួលទីតាំងកើតឡើងដដែលម្ដងទៀត។

៣. រៀនគ្រប់យ៉ាងពីជំនួញ

Sam Walton បានចំណាយពេលភាគច្រើននៃថ្ងៃចុងសប្ដាហ៍របស់ខ្លួនទៅលេងផ្ទះបុគ្គលិកផ្នែកគ្រប់គ្រងរបស់ Walmart ដើម្បីស្វែងយល់ពីការធ្វើជំនួញ និងជជែកគ្នាអំពីអាជីវកម្មលក់រាយ។ ជួនកាលលោកចំណាយពេលអាហារថ្ងៃត្រង់ទៅអង្គុយនៅហាងទំនិញដែលជាគូប្រជែងដើម្បីសិក្សាពីប្រតិបត្តិការរបស់ពួកគេទៀតផង។ Walton បានឱ្យដំបូន្មានថា “អ្នកគួរតែព្យាយាមរៀនរឿងរ៉ាវគ្រប់បែបយ៉ាងដែលអ្នកអាចរៀនបានអំពីជំនួញ” ៕

ប្រែសម្រួល៖ សន្យា

ប្រភព៖ Entrepreneur

ចុចអាន៖ មនុស្សប្រើល្បិចនៅកន្លែងធ្វើការ មិនមែនព្រោះគេខ្លាំងទេតែព្រោះគេភ័យខ្លាច

The post មេរៀនរកស៊ី ៣ចំណុច ពីថៅកែ Walmart appeared first on Kampuchea Thmey Daily.

តិចនិកលក់ដ៏សាមញ្ញដែលអ្នករកស៊ីគ្រប់លំដាប់មិនគួរមើលរំលង

Sonya — Thu, 12 Nov 2020 07:59:45 +0000

លក់ដូរដាច់មិនស្រាក ជាក្ដីប្រាថ្នារបស់អ្នកលក់គ្រប់រូប។ ប៉ុន្តែមានអ្នកលក់ខ្លះនៅមិនទាន់យល់ពីការលក់ដូរនេះច្បាស់នៅឡើយ ខណៈដែលខ្លួនកំពុងចេញរកស៊ី។ មានគន្លឹះច្រើនណាស់ដែលអាចយកមកអនុវត្តក្នុងទីផ្សារលក់ ដើម្បីឲ្យជំនួញកាក់កប។ រីឯវិធីសាស្ត្រសាមញ្ញៗក្នុងការលក់ដូរមួយចំនួន រមែងលេចមកជាមួយម្ចាស់អាជីវកម្មជានិច្ច ប៉ុន្តែពួកគេអាចមិនដឹងក៏ថាបាន។

១. បញ្ចុះតម្លៃ ទើបកើនសន្ទុះលក់

ដើម្បីឲ្យការលក់កើនឡើង មានវិធីជាច្រើនក្នុងការជម្រុញដូចជា ផ្តល់រង្វាន់ដល់អ្នកទិញឬអ្នកលក់បន្ត បង្កើតកម្មវិធីបញ្ចុះតម្លៃ ការបង្កើតកម្មវិធីថែមជូនទំនិញ និងការបង្កើតកម្មវិធីលើកទឹកចិត្តដល់បុគ្គលិកលក់ជាដើម។

២. តម្លើងតម្លៃប៉ះពាល់ដល់ការលក់

នៅពេលអ្នកលក់សម្រចចិត្តតម្លើងតម្លៃ នោះត្រូវដឹងពីផលប៉ះពាល់ចំនួននៃការលក់។ ប្រសិនបើអតិថិជនគ្មានជម្រើស ហើយចាំបាច់ត្រូវតែទិញ វាគឺជារឿងមួយ ប៉ុន្តែប្រសិនបើពួកគេមានជម្រើសដែលល្អជាង ពួកគេនិងទៅទិញកន្លែងផ្សេង។ អ្នកលក់នឹងចំណេញកាន់តែច្រើនបន្ទាប់ពីតម្លើងតម្លៃ ប៉ុន្តែបើតម្លើងហើយគ្មានអ្នកទិញ វានឹងខាតបង់ទ្វេរដង។

៣. តម្រូវការធ្លាក់ចុះ ត្រូវទម្លាក់តម្លៃ

ការទម្លាក់តម្លៃត្រង់នេះ ធ្វើឡើងដោយសារតម្រូវការលើទីផ្សារធ្លាក់ចុះ។ នៅពេលតម្រូវការអតិថិជនកាន់តែតិច តម្លៃលក់មិនអាចនៅតែដូចដើមទេ បើពុំនោះទេ ទំនិញប្រាកដជាសល់មិនខាន។

៤. តម្រូវការកើនឡើងក៏បញ្ចុះចុះតម្លៃ

នៅពេលដែលតម្រូវការកើនឡើងខ្ពស់ វាជាឱកាសល្អក្នុងការប្រមូលប្រាក់ចំណេញ ប៉ុន្តែបើចង់ឲ្យអតិថិជនស្រឡាញ់ស្លាកយីហោរបានយូរ គួរកុំឆ្លៀតបែបនេះអី។

៥. តម្រូវការផ្គត់ផ្គង់តិច អាចកំណត់តម្លៃលក់ខ្ពស់

ប្រសិនបើមិនមានគូប្រជែងទេនោះ អ្នកលក់អាចកំណត់តម្លៃខ្ពស់ដើម្បីយកចំណេញច្រើនបានដោយងាយ។ វាជារឿងធម្មតាចំពោះវិធីនេះ ប៉ុន្តែបើចង់ឈរជើងក្នុងនាមជាអ្នកលក់ដែលមានការគាំទ្រច្រើននិងក្នុងរយៈពេលយូរ គួរលក់ក្នុងតម្លៃដែលអាចទទួលយកបាន។

៦. លក់ដាច់កាន់តែច្រើន ត្រូវចំណាយការធ្វើទីផ្សារ

ប្រសិនបើលក់កាន់តែដាច់ ការកាត់បន្ថយធ្វើទីផ្សារប្រៀបដូចជាបើកភ្លើងខៀវឲ្យគូប្រជែងទាញអតិថិជនរបស់ខ្លួន។ ផ្ទុយទៅវិញបើបង្កើនការធ្វើទីផ្សារកាន់តែច្រើន ចំនួនការលក់និងកើនខ្ពស់ រហូតអាចពង្រឹងទីផ្សារលក់ និងជាឱកាសនៃការវាយលគូប្រជែងឲ្យដួលងើបលែង។

៧. រៀបចំយុទ្ធសាស្រ្តម្ដងទៀត បើការលក់បន្តធ្លាក់

ការលក់ធ្លាក់ចុះ អាចដោយសារតែបុគ្គលិកធ្វើការមិនសូវមានប្រសិទ្ធភាព ផលិតផល ឬសេវាកម្មថយគុណភាព មិនសូវធ្វើទីផ្សារ អ្នកផ្គត់ផ្គង់ក្នុងទីផ្សារកើនឡើង និងពេលខ្លះមកពីបម្រែបម្រួលសេដ្ឋកិច្ចជាដើម។ ដូច្នេះក្រោយរកឃើញមូលហេតុ ត្រូវរៀបចំយុទ្ធសាស្ត្រលក់ឡើងវិញ៕

ប្រែសម្រួល៖ សន្យា

ប្រភព៖ Entrepreneur

ចុចអាន៖ តិចនិកទាក់ទាញភ្ញៀវឲ្យចូលចិត្តហាងកាហ្វេរបស់យើង

The post តិចនិកលក់ដ៏សាមញ្ញដែលអ្នករកស៊ីគ្រប់លំដាប់មិនគួរមើលរំលង appeared first on Kampuchea Thmey Daily.

បង្កើនគំនិតផ្នែកលក់កាន់តែមានសុពលភាពដោយ៥យ៉ាងនេះ

សាង ស្រីល័ក្ខ — Thu, 05 Nov 2020 05:20:08 +0000

បើយើងជាសហគ្រិន យើងអាចជាមានគំនិតគិតពីផលិតផលជាច្រើនដែលយើងចង់ចាប់ផ្ដើម។ ក្ដីបារម្ភមិនមែនជាវិធីដែលយើងគួរគិតនោះទេ ប៉ុន្តែជាគំនិតដែលត្រូវអនុវត្ត។

នេះគឺជាគន្លឹះខ្លះៗ ពីវិធីស្វែងយល់ ប្រសិនបើចង់ឲ្យផលិតផលកាន់តែមានសុពលភាពនិងអតិថិជនចង់បានផលិតផលរបស់យើងកាន់តែច្រើន ៖

១. កំណត់អត្តសញ្ញាណអតិថិជន

ត្រូវសន្មតថា យើងមានទីផ្សារទូទៅសម្រាប់ផលិតផលរបស់យើងរបៀបម៉េច។ ឧទាហរណ៍បើយើងចាប់ផ្ដើមក្រុមហ៊ុនស្រាបៀរ យើងត្រូវគិតថាអតិថិជនរបស់យើងអាចជាអ្នកដែលមានអាយុចាប់ពី ២១ ឆ្នាំឡើងទៅ។ សម្រាប់ផលិតផលស្រាបៀរ តើយើងកំណត់គោលដៅជាបុរសឬនិស្សិតមហាវិទ្យាល័យ?

ការកំណត់អត្តសញ្ញាណអតិថិជនរបស់យើង ក៏អាចផ្ដល់ផលងាយស្រួលដល់យើងនិងអតិថិជនគោលដៅនិងទីផ្សាររបស់យើងដែរ។

២. ស្វែងរកអតិថិជនសក្តានុពល

ចាំបាច់ត្រូវស្វែងរកអ្នកដែលជាគោលដៅរបស់យើង ប៉ុន្តែតើអាចរកឃើញយ៉ាងដូចម្ដេច ជាពិសេសប្រសិនបើយើងបើកដំណើរការផលិតផលដំបូង ឬទៅទីផ្សារថ្មី?

ដំបូងសួរក្រុមគ្រួសារនិងមិត្តភ័ក្ដិ ឲ្យពួកគេឆ្លើយសំណួររបស់យើង។ បន្ទាប់មកត្រូវចូលទៅក្នុងបណ្ដាញ ចូលរួមជាមួយក្រុមពាក់ព័ន្ធនៃសមាជិកដែលអាចចាប់អារម្មណ៍ផលិតផលរបស់យើង។ វិធីមួយទៀតសូមផ្សាយផលិតផលនៅលើហ្វេសបុកឬអ៊ិនស្ដាក្រាមជាដើម។

៣. អង្កេតអតិថិជនសក្ដានុពល

នៅពេលដែលយើងចាប់ផ្ដើមភ្ជាប់ទំនាក់ទំនងជាមួយមនុស្ស សូមចាប់ផ្ដើមធ្វើការស្ទង់មតិពួកគេដើម្បីស្វែងយល់បន្ថែមអំពីអតិថិជនគោលដៅរបស់យើង។

សំខាន់ជាងនេះទៅទៀត ត្រូវសួរអំពីកម្រិតចំណាប់អារម្មណ៍របស់ពួកគេ ចំពោះផលិតផលរបស់យើង។ តើផលិតផលយើងបានដោះស្រាយបញ្ហាសម្រាប់ពួកគេ ឬផ្ដល់អត្ថប្រយោជន៍អ្វីខ្លះ? តើពួកគេនឹងចំណាយប្រាក់លើផលិតផលបែបនេះទៀតទេ?

៤. សាងសង់គំរូសម្រាប់ការយល់ដឹងបន្ថែម

សូមព្យាយាមបង្កើតគំរូដើមឬខ្សែដែលអាចជួយឲ្យផលិតផលរបស់យើងកាន់តែមានជីវិតរស់រវើក។ កត់ចំណាំនូវអ្វីដែលមានប្រយោជន៍សម្រាប់ពួកគេ។ រកមើលពីរបៀបដែលអតិថិជនរំភើបជាមួយនឹងផលិតផល។ បើអតិថិជនមានឆន្ទៈក្នុងការបញ្ជាទិញផលិតផលជាមុន នេះជាសញ្ញាល្អដែលផលិតផលរបស់យើងអាចទទួលបានជោគជ័យ។

៥. និយាយជាមួយអតិថិជនដែលមានស្រាប់

ប្រសិនបើយើងមានអាជីវកម្មដែលបានបង្កើតឡើង សូមទាញយកអត្ថប្រយោជន៍ពីវា។ នៅពេលដែលពួកគេកំពុងប្រើផលិតផលឬសេវាកម្មដែលមានស្រាប់របស់យើង សូមសាកសួរពួកគេអំពីផលិតផលថ្មីថាតើពួកគេចង់បានឬអត់។

យើងក៏អាចប្រើឧបករណ៍ដែលអាចឲ្យយើងជជែកផ្ទាល់ជាមួយអតិថិជន ឬផ្ដល់ឲ្យភ្នាក់ងារសេវាកម្មអតិថិជនរបស់យើង សួរសំណួរដើម្បីទទួលបានការយល់ដឹងអំពីវិធីដែលយើងអាចជួយអតិថិជនជាមួយផលិតផលថ្មី។ ឬក៏ប្រើវិធីមួយទៀតគឺជំរុញការស្ទង់មតិផលិតផល ក្នុងកំឡុងពេលទំនាក់ទំនងអតិថិជន៕

ប្រែសម្រួល ៖ សាង ស្រីល័ក្ខ

ប្រភព៖ forbes

The post បង្កើនគំនិតផ្នែកលក់កាន់តែមានសុពលភាពដោយ៥យ៉ាងនេះ appeared first on Kampuchea Thmey Daily.

ចង់លក់អនឡាញជោគជ័យត្រូវចេះប៉ុន្មានយ៉ាងនេះចាំបាច់

Sonya — Tue, 03 Nov 2020 07:13:49 +0000

ការលក់អនឡាញមិនមែនជាព្យុះភ្លៀងរយៈពេលខ្លីទេ តែជាអាជីវកម្មវែងឆ្ងាយនៃពិភពលោកសម័យកាលឌីជីថល។

តែក៏មានមិនតិចទេដែលចាប់ផ្ដើមហើយ ក៏ដួលទៅវិញ ដោយសារ មិនស្គាល់ភាពសំខាន់នៃមុខរបរនេះ គឺ ទំនុកចិត្តនិង សុចរិតភាព។

វិធីសាស្ត្ជេរបញ្ចោរ និងទាក់ទាញតាមទង្វើឱ្យអំណោយ ឬមធ្យោបាយបំភាន់ផ្សេងៗទៀត ជាការបើកទីផ្សាររយៈពេលខ្លីដែលក្រោយមក មិនអាចស្ថិតស្ថេរបានយូរព្រោះពុំមែនជាធម្មជាតិពិតនៃអាជីវកម្មNature of Business។

អាជីវកម្មNature of Business មានផលិតផលល្អ មានដំណើរការទៀងទាត់ មានសេវាកម្មត្រឹមត្រូវមិនបោកប្រាស់ គឺជាសកម្មភាពដែលត្រូវបានអនុវត្តម្តងហើយម្តងទៀតសំលៀងមិនឈប់ និងជួយង្កើតប្រាក់ចំណេញ លក់ដាច់បានច្រើនឈរជើងបានយូរ មានការគាំទ្រពីអតិថិជនពីគ្រប់ទិសទីកកើតជាប្រេនពិតៗមួយទៅឱ្យកូនចៅជំនាន់ក្រោយ។

១ មិនកុហកអ្នកទិញ

អ្នកលក់ណាក៏ដូចគ្នា រមែងចង់បានចំណូលខ្ពស់ ប៉ុន្តែមិនមែនដោយសារតែចង់បានចំណូលច្រើនមិនចាប់អារម្មណ៍នឹងអ្នកទិញនោះទេ។ ជាអ្នកលក់អនឡាញម្នាក់ មិនមែនគិតតែរឿងលុយមួយមុខនោះឡើយ ពោលគួរតែធ្វើជាអ្នកដោះស្រាយបញ្ហាឲ្យភ្ញៀវ ទើបជាគន្លឹះសំខាន់។

២ ស្គាល់ផលិតផលខ្លួនច្បាស់

រឿងមួយដែលអ្នកលក់អនឡាញត្រូវតែធ្វើនោះ គឺចេះយកចិត្តទុកដាក់ជាមួយភ្ញៀវ ពេលដែលពួកគេឆាតមកសួរនាំផលិតផល។ មិនគួរណាបង្ហាញអារម្មណ៍ធុញទ្រាន់នោះទេ ទោះបីជាពួកគេមិនទិញក៏ដោយ គឺត្រូវប្រាប់អត្ថប្រយោជន៍ផលិតផលនីមួយៗឲ្យអតិថិជនយល់ ហើយត្រូវចាំថា ទោះបីជាថ្ងៃនេះ គេមិនទិញ ក៏ថ្ងៃក្រោយគេអាចមកទិញដែរ។

៣ បណ្តាញជាមួយអតិថិជនមិនមែនអ្នកលក់បន្តទេ

ការយកចិត្តទុកដាក់ជាមួយភ្ញៀវជាចំណុចមួយអាចចងចិត្តពួកគេយ៉ាងមានប្រសិទ្ធភាព ព្រោះកាលណាអ្នកលក់ល្អជាមួយពួកគេ នោះអតិថិជនប្រាកដជាមករកម្តងទៀតជាមិនខាន ហើយបើភ្ញៀវមករកច្រើនកាលណាចំណូលយើងក៏ច្រើនតាមនឹងដែរ។

ដើម្បីឲ្យមានភ្ញៀវគាំទ្រខ្លាំងក្នុងវិស័យអនឡាញរបស់ខ្លួន គ្រាន់តែចេះយកចិត្តទុកដាក់ជាមួយអតិថិជនគ្រប់ពេល ក៏ជោគជ័យ ៥០% បាត់ទៅហើយ៕

ប្រែសម្រួល៖ សន្យា

ប្រភព៖ EF

The post ចង់លក់អនឡាញជោគជ័យត្រូវចេះប៉ុន្មានយ៉ាងនេះចាំបាច់ appeared first on Kampuchea Thmey Daily.

ផ្នែកលក់ Archives - Kampuchea Thmey Daily

មេរៀនសំខាន់ៗមុនបើកអាជីវកម្មខ្លួនឯងពីស្ថាបនិក jimmy choo

ចង់​ពូកែ​លក់ ​មាន​អតិថិជន​ច្រើន មើល ៤ ចំនុច​នេះសិន

វិធីធ្វើឱ្យអតិថិជនចាប់អារម្មណ៍តាំងពីការជជែកឬជួបប្រជុំដំបូង

មេរៀនរកស៊ី ៣ចំណុច ពីថៅកែ Walmart

តិចនិកលក់ដ៏សាមញ្ញដែលអ្នករកស៊ីគ្រប់លំដាប់មិនគួរមើលរំលង

បង្កើនគំនិតផ្នែកលក់កាន់តែ​មាន​សុពលភាពដោយ៥យ៉ាងនេះ

ចង់លក់អនឡាញជោគជ័យ​ត្រូវចេះប៉ុន្មាន​យ៉ាងនេះចាំបាច់

ចង់ពូកែលក់ មានអតិថិជនច្រើន មើល ៤ ចំនុចនេះសិន

បង្កើនគំនិតផ្នែកលក់កាន់តែមានសុពលភាពដោយ៥យ៉ាងនេះ

ចង់លក់អនឡាញជោគជ័យត្រូវចេះប៉ុន្មានយ៉ាងនេះចាំបាច់