ផ្លូវជាតិលេខ៤ Archives - Kampuchea Thmey Daily

ផ្លូវ និងស្ពានចំនួន ៧ គម្រោងធំៗចាយទុនខ្ទង់ពាន់លានដុល្លារកំពុងដំណើរការសាងសង់ គ្រោងបញ្ចប់ឆាប់ៗនេះ

Dy Bunnara — Wed, 29 Apr 2026 04:03:15 +0000

ក្រសួងសាធារណការនិងដឹកជញ្ជូន បានកំពុងអនុវត្តគម្រោងសាងសង់ហេដ្ឋារចនាសម្ព័ន្ធផ្លូវនិងស្ពានធំៗចំនួន ៧ គម្រោង ដោយប្រើប្រាស់ថវិកាហិរញ្ញប្បទានពីដៃគូអភិវឌ្ឍន៍មានប្រវែងសរុបប្រមាណ ៤៥២,៤៨ គីឡូម៉ែត្រ ក្នុងទុនចំណាយរាប់ពាន់លានដុល្លារ។

គម្រោងហេដ្ឋារចនាសម្ព័ន្ធដែលកំពុងដំណើរការសាងសង់ ហើយគ្រោងបញ្ចប់បន្តបន្ទាប់ទាំងនោះរួមមាន៖

-ផ្លូវជាតិលេខ ៤ (ភ្នំពេញ-ក្រុងព្រះសីហនុ)

ផ្លូវជាតិលេខ ៤ ជាខ្សែផ្លូវជាតិដ៏មានសារៈសំខាន់បំផុត ព្រោះផ្លូវមួយខ្សែនេះជាបណ្តាញតភ្ជាប់ពីរាជធានីភ្នំពេញដែលជាតំបន់អភិវឌ្ឍ ជាមជ្ឈមណ្ឌលសេដ្ឋកិច្ចហិរញ្ញវត្ថុនិងឧស្សាហកម្មទៅខេត្តព្រះសីហនុ ដែលជាទីក្រុងកំពង់ផែសមុទ្រទឹកជ្រៅតែមួយគត់របស់ប្រទេសកម្ពុជា។

ដោយប្រើប្រាស់ហិរញ្ញប្បទានពីធនាគារពិភពលោក ផ្លូវជាតិលេខ ៤ ដែលកំពុងដំណើរការស្ថាបនាកែលម្អ រហូតមកដល់ពេលនេះសម្រេចបានប្រមាណ ៩០%។ ការស្ថាបនាត្រូវបានពង្រីកពី ២ គន្លង ទៅ ៤ គន្លង មានប្រវែង ៤៥ គីឡូម៉ែត្រ និងពង្រីកពីទទឹង ៧ ម៉ែត្រ ទៅទទឹង ១០ ម៉ែត្រ មានប្រវែង ១៥១ គីឡូម៉ែត្រ។

ផ្លូវជាតិលេខ ៤ មុនពេលក្រសួងសាធារណការនិងដឹកជញ្ជូន យកដាក់ក្នុងផែនការការស្ថាបនាកែលម្អឡើងវិញ គឺមានសភាពខូចខាតដែលធ្វើឱ្យការដឹកជញ្ជូនទៅមកមានការលំបាកខ្លាំង។ កន្លងមកផ្លូវមួយខ្សែនេះលិចទឹក ១ ឆ្នាំ ៥ ទៅ ៦ ដង នៅពេលដែលមានភ្លៀងធ្លាក់ខ្លាំង ធ្វើឱ្យមានការលំបាកដល់ប្រជាពលរដ្ឋនៅក្នុងការរស់នៅមិនអាចទៅសាលា ទៅផ្សារ ឬទៅមន្ទីរពេទ្យ ហើយឡានដឹកទំនិញត្រូវរង់ចាំរហូតដល់ទឹកស្រក ពេលខ្លះដឹកទំនិញទៅដល់កប៉ាល់មិនទាន់ជាដើម។

-កំណាត់ផ្លូវជាតិលេខ ៥ ភាគកណ្តាល (សិរីសោភ័ណ-ប៉ោយប៉ែត)

គិតត្រឹមសប្តាហ៍ទី១ ខែមេសា ឆ្នាំ២០២៦ កំណាត់ចុងក្រោយនៃគម្រោងស្តារនិងលើកកម្រិតគុណភាពផ្លូវជាតិលេខ ៥ (សិរីសោភ័ណ-ប៉ោយប៉ែត) ខេត្តបន្ទាយមានជ័យ ស្ថាបនាសម្រចបានលទ្ធផលជារួមបានប្រមាណ ៥១,០៧%។

តាមផែនការ គម្រោងស្តារនិងលើកកម្រិតគុណភាពផ្លូវជាតិលេខ ៥ (សិរីសោភ័ណ-ប៉ោយប៉ែត) ដែលមានប្រវែង ៣៥,១៤ គីឡូម៉ែត្រ គ្រោងបញ្ចប់នៅអំឡុងឆ្នាំ២០២៧។

-កំណាត់ផ្លូវជាតិលេខ ៧ (ស្គន់-កំពង់ចាម)

គម្រោងពង្រីក និងលើកកម្រិតផ្លូវជាតិលេខ ៧ ចាប់ពីទីប្រជុំជនស្គន់រហូតដល់ក្រុងកំពង់ចាម ស្ទើរតែឈានបញ្ចប់ ១០០% ខណៈគម្រោងនឹងបញ្ចប់នៅអំឡុងឆ្នាំ២០២៦ នេះ។

ផ្លូវជាតិលេខ ៧ បានបើកការដ្ឋានសាងសង់កាលពីថ្ងៃទី ០៩ ខែមករា ឆ្នាំ ២០២៣ ក្រោមកម្ចីសម្បទានជាង ១០០ លានដុល្លារពីរដ្ឋាភិបាលចិន។ កំណាត់ផ្លូវជាតិលេខ ៧ ត្រូវបានសាងសង់ពង្រីកពី ២ គន្លងទៅ ៤ គន្លង មានប្រវែង ៤៥ គីឡូម៉ែត្រ។ តាមរយៈកំណាត់ផ្លូវនេះជួយសម្រួលដល់ការធ្វើដំណើរ, ការដឹកជញ្ជូនផលិតផលកសិកម្ម, កសិឧស្សាហកម្ម ព្រមទាំងលើកកម្ពស់ការអភិវឌ្ឍ និងសកម្មភាពសេដ្ឋកិច្ច-សង្គមជាតិ។

–ផ្លូវល្បឿនលឿនភ្នំពេញ-បាវិត

កាលពីអំឡុងខែធ្នូ ឆ្នាំ២០២៥ លោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានដឹកនាំកិច្ចប្រជុំពិភាក្សាពី “វឌ្ឍនភាព និងបញ្ហាប្រឈមនៃការអនុវត្តគម្រោងសាងសង់ផ្លូវល្បឿនលឿនភ្នំពេញ-ក្រុងបាវិត”។

កិច្ចប្រជុំនេះក៏មានការចូលរួមពីលោក ស៊ុន ចាន់ថុល ឧបនាយករដ្ឋមន្រ្តី អនុប្រធានទីមួយក្រុមប្រឹក្សាអភិវឌ្ឍន៍កម្ពុជា និងលោក ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន។

ផ្លូវល្បឿនលឿនភ្នំពេញ-បាវិត បានបើកការដ្ឋានសាងសង់កាលពីខែមិថុនា ឆ្នាំ២០២៣ ក្រោមអធិបតីភាពសម្តេចតេជោ ហ៊ុន សែន អតីតនាយករដ្ឋមន្ត្រីនៃកម្ពុជា ដែលចំណាយថវិកាសាងសង់សរុបប្រមាណ ១,៣៥ ពាន់លានដុល្លារ ក្រោមទម្រង់វិនិយោគសាងសង់-ប្រតិបត្តិការ-ផ្ទេរ (BOT) ដែលមានរយៈពេលប្រតិបត្តិការចំនួន ៥០ ឆ្នាំ។

ពាក់ព័ន្ធវឌ្ឍនភាពនៃការអនុវត្តគម្រោងផ្លូវល្បឿនលឿនភ្នំពេញ-ក្រុងបាវិត មន្រ្តីអ្នកនាំពាក្យក្រសួងសាធារណការ និងដឹកជញ្ជូនមិនបានបញ្ជាក់មកដល់ពេលនេះសម្រេចបានវឌ្ឍនភាពយ៉ាងណា ខណៈបើតាមផែនការគ្រោងបញ្ជប់នៅឆ្នាំ ២០២៧។

-ស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា)

គិតត្រឹមថ្ងៃទី ២០ ខែមេសា ឆ្នាំ២០២៦ ដំណើរការស្ថាបនាស្ពានឆ្លងទន្លេបាសាក់ (ចាក់អង្រែក្រោម-ព្រែកប្រា) សម្រេចបានប្រមាណ ៦៨% ដែលផ្អែកតាមលទ្ធផលនេះការសាងសង់គឺលឿនជាងផែនការ ៦%។

ស្ពានឆ្លងទន្លេ (ចាក់អង្រែក្រោម-ព្រែកប្រា) ដែលកំពុងដំណើរការសាងសង់មានប្រវែងសរុប ១ ៦៥០ ម៉ែត្រ (ប្រវែងស្ពាន ៨៤៥,៧០ ម៉ែត្រ, ទទឹងផ្លូវ ២៧ ម៉ែត្រ ផ្លូវតភ្ជាប់ក្បាលស្ពានប្រវែង ៨០៤,៣០ ម៉ែត្រ ទទឹងធម្មតាផ្លូវ ២០ម៉ែត្រ)។

ស្ពានឆ្លងទន្លេបាសាក់ (ចាក់អង្រែក្រោម-ព្រែកប្រា) បានបើកការដ្ឋានកាលពីខែកុម្ភៈ ឆ្នាំ២០២៤ ក្រោមអធិបតីភាពសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងលោក វ៉ាង វិនធៀន ឯកអគ្គរដ្ឋទូតចិនប្រចាំកម្ពុជា។

នៅពេលស្ថាបនាបញ្ចប់ដាក់ឲ្យដំណើរការ នឹងជួយកាត់បន្ថយការកកស្ទះចរាចរណ៍លើស្ពានព្រះមុនីវង្ស ក៏ដូចជាជួយពង្រឹងដល់ទំនាក់ទំនងសេដ្ឋកិច្ចសង្គមរវាងរាជធានីភ្នំពេញប៉ែកខាងត្បូង ព្រលានយន្តហោះអន្តរជាតិតេជោក្រុងតាខ្មៅ កាត់បន្ថយការកកស្ទះចរាចរណ៍នៅតាមដងទន្លេបាសាក់ និងជួយពន្លឿនការអភិវឌ្ឍតំបន់នោះ ជាពិសេសធ្វើឱ្យប្រសើរឡើងដល់ប្រសិទ្ធភាពនៃការដឹកជញ្ជូន និងភស្តុភារកម្មនៅក្នុងតំបន់រាជធានីភ្នំពេញ។

-ស្ពានឆ្លងកាត់ទន្លេមេគង្គ នៅខេត្តក្រចេះ

ដូចការគ្រោងទុក “ស្ពានមិត្តភាពកម្ពុជា-ចិន មេគង្គក្រចេះ” បានបើកឲ្យប្រជាពលរដ្ឋឆ្លងកាត់ជាអចិន្ត្រៃយ៍នៅថ្ងៃទី១ ខែមេសា ឆ្នាំ២០២៦។

ស្ពានមិត្តភាពកម្ពុជា-ចិន មេគង្គក្រចេះ បានបើកការដ្ឋានសាងសង់កាលពីថ្ងៃទី ០២ ខែមករា ឆ្នាំ២០២៣ ក្រោមអធិបតីភាពសម្តេចតេជោ ហ៊ុន សែន អតីតនាយករដ្ឋមន្ត្រី និងលោក វ៉ាង វិនធៀន អតីតឯកអគ្គរដ្ឋទូតចិនប្រចាំកម្ពុជា។

ស្ពានមិត្តភាពកម្ពុជា-ចិន មេគង្គក្រចេះ ជាស្ពានយុទ្ធសាស្ត្រភ្ជាប់ពីស្រុកចិត្របុរីនៅត្រើយខាងកើត ទៅស្រុកព្រែកប្រសព្វ នៅត្រើយខាងលិច។

“ស្ពានមិត្តភាពកម្ពុជា-ចិន មេគង្គក្រចេះ” ជាគម្រោងហេដ្ឋារចនាមសម្ព័ន្ធយុទ្ធសាស្រ្តមួយដ៏សំខាន់ ដែលនឹងចូលរួមបង្កើនប្រសិទ្ធភាពនៃវិស័យដឹកជញ្ជូន ពិសេសការដឹកជញ្ជូនទិន្នផលកសិ-ឧស្សាហកម្ម ភ្ជាប់ទីប្រជុំជនខេត្តក្រចេះទៅខេត្តកំពង់ធំ រួមទាំងការតភ្ជាប់វិស័យទេសចរណ៍ទៅកាន់ខេត្តភូមិភាគឦសានដែលមានខេត្តស្ទឹងត្រែង រតនគិរី និងមណ្ឌលគិរីជាមួយបណ្តាញផ្លូវជាតិសំខាន់ៗផ្សេងទៀត។

-ស្ពានឆ្លងកាត់ទន្លេមេគង្គ “ដីឥដ្ឋ-ថ្មគរ”

ស្ពានដីឥដ្ឋ-ថ្មគរ ដែលបើកការដ្ឋានសាងសង់ស្របជាមួយគម្រោងផ្លូវល្បឿនលឿនភ្នំពេញ-បាវិត គិតត្រឹមថ្ងៃទី ២២ ខែមេសា ឆ្នាំ២០២៦ សាងសង់សម្រេចវឌ្ឍនភាពការងារបានប្រមាណ ៤៧,៦ % លឿនជាងផែនការ ២,៦០%។

ស្ពានដីឥដ្ឋ-ថ្មគរ បានបើកការដ្ឋានសាងសង់កាលពីថ្ងៃទី ៧ ខែមិថុនា ឆ្នាំ២០២៣ ក្រោមអធិបតីភាពសម្តេចតេជោ ហ៊ុន សែន អតីតនាយករដ្ឋមន្ត្រី បច្ចុប្បន្នជាប្រធានព្រឹទ្ធសភា និងលោក វ៉ាង វិនធៀន អតីតឯកអគ្គរដ្ឋទូតចិនប្រចាំកម្ពុជា។

គិតត្រឹមថ្ងៃទី២២ ខែមេសា ឆ្នាំ២០២៦ ការដ្ឋានសាងសង់ស្ពានដីឥដ្ឋ-ថ្មគរ សម្រេចបានវឌ្ឍនភាពការងារ ៤៧,៦ % ខណៈតាមផែនការគ្រោងបញ្ចប់នៅឆ្នាំ ២០២៧ ទន្ទឹមការដ្ឋានសាងសង់ផ្លូវល្បឿនលឿនភ្នំំពេញបាវិត។

ស្ពាននេះជាគម្រោងដ៏សំខាន់សម្រាប់ការតភ្ជាប់សេដ្ឋកិច្ច ការដឹកជញ្ជូន ពីភាគខាងត្បូងនិងខាងកើត រាជធានីភ្នំពេញ ដោយភា្ជប់មហាវិថី ស៊ី ជីនពីង (ក្រវាត់ក្រុងទី៣) ត្រង់ចំណុចផ្លូវជាតិលេខ ១ និងត្រើយខាងកើតភ្ជាប់ទៅផ្លូវល្បឿនលឿនភ្នំពេញ-បាវិត៕

The post ផ្លូវ និងស្ពានចំនួន ៧ គម្រោងធំៗចាយទុនខ្ទង់ពាន់លានដុល្លារកំពុងដំណើរការសាងសង់ គ្រោងបញ្ចប់ឆាប់ៗនេះ appeared first on Kampuchea Thmey Daily.

ទីតាំងដីច្រោះកណ្តាលទ្រូងផ្លូវជាតិលេខ៤ ជាចំណុចលូចាស់ជាង៦០ឆ្នាំ ខណៈបច្ចុប្បន្នក្រុមការងារបច្ចេកទេសកំពុងរៀបចំឡើងវិញ

Sokhom Khon — Wed, 07 Jan 2026 02:08:20 +0000

តាមការបញ្ជាក់ពីក្រសួងសាធារណការ និងដឹកជញ្ជូន ទីតាំងដែលមានដីច្រោះកណ្តាលទ្រូងផ្លូវជាតិលេខ៤ ស្ថិតនៅចំណុចគីឡូម៉ែតលេខ ២១៣+៥២៥ ក្នុងសង្កាត់បិតត្រាំង ក្រុងព្រះសីហនុ គឺជាចំណុចដែលមានលូចាស់មានអាយុកាលប្រមាណជាង៦០ឆ្នាំមកហើយ។ បើតាមក្រសួងសាធារណការ ប្រព័ន្ធលូនេះ បានធ្វើឡើងនៅអំឡុងពេលសាងសង់ផ្លូវជាតិលេខ៤ ក្រោមជំនួយរបស់រដ្ឋាភិបាលអាម៉េរិក ព្រមទាំងមានទឹកហូរច្រោះក្រោមតួផ្លូវក្នុងអំឡុងភ្លៀងធ្លាក់ជោគជាំនារដូវវស្សាកន្លងមក។

ក្នុងដំណើរដឹកនាំមន្ត្រីបច្ចេកទេសចុះពិនិត្យទីតាំងខាងលើកាលពីថ្ងៃអង្គារ ទី៦ ខែមករា ឆ្នាំ២០២៦ លោក ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន បានណែនាំឲ្យក្រុមការងារចាក់ដីលុបដើម្បីសម្រួលចរាចរណ៍ការពារកុំឱ្យមានគ្រោះថ្នាក់ ហើយនឹងរៀបចំសាងសង់ប្រព័ន្ធលូឲ្យបានល្អឡើងវិញ និងកែសម្រួលមុខទឹកចូល និងមុខទឹកចេញឲ្យបានត្រឹមត្រូវ។ ទន្ទឹមនឹងនេះ ក្រសួងក៏នឹងបញ្ជូនក្រុមការងារបច្ចេកទេសបន្ថែមទៀត ដោយប្រើកាម៉េរា ROBOT ដើម្បីត្រួតពិនិត្យគ្រប់ប្រព័ន្ធលូដែលកាត់ទទឹងនៅលើផ្លូវជាតិលេខ៤នេះផងដែរ។

ក្រសួងសាធារណការ និងដឹកជញ្ជូន បញ្ជាក់បន្ថែមដែរថា បច្ចុប្បន្នក្រុមការងារបានចាក់ដីលុបបង្ហាប់បំពេញបណ្តោះអាសន្ន និងបានដាក់ផ្លាកសញ្ញាសុវត្ថិភាពលើទីតាំងបាក់ស្រុតនេះ ហើយប្រជាពលរដ្ឋក៏អាចធ្វើដំណើរទៅមកបានជាធម្មតា តាំងពីរសៀលថ្ងៃទី៥ ខែមករា ឆ្នាំ២០២៦ មកម៉្លេះ៕

The post ទីតាំងដីច្រោះកណ្តាលទ្រូងផ្លូវជាតិលេខ៤ ជាចំណុចលូចាស់ជាង៦០ឆ្នាំ ខណៈបច្ចុប្បន្នក្រុមការងារបច្ចេកទេសកំពុងរៀបចំឡើងវិញ appeared first on Kampuchea Thmey Daily.

ក្រសួងសាធារណការច្រានចោលការចុះផ្សាយពីភាពមិនប្រក្រតីនៃការដេញថ្លៃគម្រោងកំណាត់ផ្លូវជាតិលេខ៤

hun sirivadh — Sat, 04 Jan 2025 03:01:10 +0000

ក្រសួងសាធារណការ និងដឹកជញ្ជូន បានច្រានចោលការចុះផ្សាយរបស់សារព័ត៌មានបរទេសដែលផ្សាយជាភាសាខ្មែរដែលបានលើកឡើងថា នាយកគម្រោង និងតំណាងធនាគារពិភពលោកបានទទួលលុយសំណូកពីក្រុមហ៊ុន Poly Changda Engineering ជាង១លានដុល្លារជាថ្នូរនឹងការទទួលបានគម្រោង។

ក្នុងសេចក្ដីបំភ្លឺចុះថ្ងៃទី៣ ខែមករា ក្រសួងសាធារណការបានបញ្ជាក់ថាមកដល់ថ្ងៃទី២ ខែមករា ឆ្នាំ២០២៥ មិនទាន់មានក្រុមហ៊ុនណាមួយទទួលបានសិទ្ធិជួសជុលថែទាំលើកំណាត់ផ្លូវជាតិលេខ៤ ដែលមានប្រវែង៤៣គីឡូម៉ែត្រនេះនៅឡើយទេ។

ក្រសួងបានបញ្ជាក់ថា៖ «គណៈកម្មការត្រួតពិនិត្យកិច្ចលទ្ធកម្មអន្តរក្រសួង រវាងក្រសួងសាធារណការ និងដឹកជញ្ជូន និងក្រសួងសេដ្ឋកិច្ច និងហិរញ្ញវត្ថុ មិនដែលបានធ្វើការចរចាជាមួយក្រុមហ៊ុន Poly Changda Engineering Co., Ltd ស្ដីពីការប្រគល់កំណាត់ផ្លូវ៤៣គីឡូម៉ែត្រ ទៅឱ្យក្រុមហ៊ុននេះ ជាថ្នូរនឹងទឹកប្រាក់នោះទេ»។

ការបញ្ជាក់របស់ក្រសួងសាធារណនៅពេលនេះគឺឆ្លើយតបនឹងការចុះផ្សាយរបស់កាសែត The Cambodia Daily កាលពីថ្ងៃទី២ ខែមករា ឆ្នាំ២០២៥ ដែលបានចុះផ្សាយថាមានប្រភពសុំមិនបញ្ចេញឈ្មោះមួយលើកឡើងថារដ្ឋលេខាធិការក្រសួងសាធារណការម្នាក់ និងតំណាងធនាគារពិភពលោកម្នាក់បានទទួលលុយពីក្រុមហ៊ុន ប៉ូលី ចិន្តា ជាង១លានដុល្លារអាមេរិក ជាថ្នូរទទួលបានគម្រោងថែទាំ និងជួសជុលកំណាត់ផ្លូវជាតិលេខ៤។

ក្រសួងសាធារណការបានចាត់ទុកការចុះផ្សាយនេះថាជាព័ត៌មានមិនពិត និងស្នើឱ្យកាសែតនេះធ្វើការកែតម្រូវផងដែរ។

បើតាមក្រសួងសាធារណការ កំណាត់ផ្លូវជាតិលេខ៤ ប្រវែង៤៣គីឡូម៉ែត្រ ចន្លោះគ.ម ១៤៣+០០០ ដល់ គ.ម ១៨៦+០០០ ធ្លាប់ត្រូវបានក្រសួងផ្ដល់សិទ្ធិឱ្យក្រុមហ៊ុនបរទេសមួយកាលពីខែឧសភា ឆ្នាំ២០២២ តែត្រូវដកហូតវិញដោយសារក្រុមហ៊ុននេះ មិនបានអនុវត្តការងារទៅតាមកាលវិភាគយឺតយ៉ាវហួសហេតុ ហើយរហូតមកដល់ពេលនេះពុំទាន់មានក្រុមហ៊ុនផ្សេងមកបន្តការងារជួសជុលថែទាំបន្តនៅឡើយទេ៕

អត្ថបទដោយ ហ៊ុន សិរីវឌ្ឍន៍

The post ក្រសួងសាធារណការច្រានចោលការចុះផ្សាយពីភាពមិនប្រក្រតីនៃការដេញថ្លៃគម្រោងកំណាត់ផ្លូវជាតិលេខ៤ appeared first on Kampuchea Thmey Daily.

ប្រឡាយអមសងខាងផ្លូវជាតិលេខ៤ ក្នុងភូមិសាស្ត្រខណ្ឌពោធិ៍សែនជ័យ និងខណ្ឌកំបូល កកស្ទះដោយសំរាម និងស្មៅដុះច្រើន

Sokhom Khon — Wed, 21 Aug 2024 04:26:46 +0000

ប្រឡាយអមសងខាងផ្លូវជាតិលេខ៤ ចាប់ពីកែងផ្លូវវិមានឈ្នះ ដល់ព្រំប្រទល់ស្រុកអង្គស្នួល ដែលស្ថិតក្នុងភូមិសាស្ត្រខណ្ឌពោធិ៍សែនជ័យ និងខណ្ឌកំបូល កំពុងមានសំរាម និងស្មៅដុះពេញផ្ទៃប្រឡាយ ដែលធ្វើឲ្យស្ទះចរន្ដទឹកហូរនៅរដូវវស្សានេះ។

លោក សុផុល ជាអ្នកប្រកបរបរ ប៉ះកង់ នៅតាមផ្លូវជាតិ៤ ក្បែរប្រឡាយទឹកនោះបានលើកឡើងថា មួយរយៈចុងក្រោយនេះ គាត់បានឃើញអាជ្ញាធរដាក់គ្រឿងចក្រមកកាយស្តារដែរ ក៏ប៉ុន្តែការស្តារនោះដោយកន្លែង កន្លែងខ្លះក៏អត់ ខ្លះក៏ស្តារ មានតិចតួចមានតិចតួចប៉ុណ្ណោះ។

លោក ឃឹម ស៊ុនសូដា អភិបាលខណ្ឌកំបូលបានប្រាប់ភ្នាក់ងារសារព័ត៌មាន កម្ពុជាថ្មី នៅព្រឹកថ្ងៃទី២១សីហានេះថា ចំពោះការស្តារប្រឡាយនេះ ក្នុងមូលដ្ឋានខណ្ឌកំបូល គឺលោកបានអោយមន្ត្រីជំនាញ ធ្វើការស្តារ២ដងក្នុងមួយឆ្នាំ។ លោកអភិបាលខណ្ឌបន្ថែមថា បច្ចុប្បន្នបានស្តារម្ខាងរួចរាល់ និងកំពុងបន្តស្តារម្ខាងទៀតអោយទាន់វេលានារដូវវស្សានេះ។

លោក ប៉ាង លីដា អភិបាលរងខណ្ឌពោធិ៍សែនជ័យ ទទួលការងារបរិស្ថាន សណ្តាប់ធ្នាប់សារធារណៈ ក៏បានប្រាប់អោយដឹងនៅព្រឹក២១សីហានេះដែរថា កន្លងមកយើងតែងស្តារជារៀងរាល់ឆ្នាំ ដោយឡែកឆ្នាំនេះ ទើបតែស្តារ២-៣ ខែមុន។ លោកបានបន្តថា លោកនឹងធ្វើការស្តារបន្ថែមទៀតអោយបានទាន់ពេលវេលា។

សូមបញ្ជាក់ថា កន្លងមកអាជ្ញាធរតែងតែយកចិត្តទុកដាក់រាល់បញ្ហាដែលកើតមានក្នុងមូលដ្ឋាន ជាពិសេសស្ថានភាពផ្លូវនិងការស្តារប្រឡាយជាដើម។

នេះជាសារមួយ ក៏ជាសំណូមពរដល់អាជ្ញាធរមូលដ្ឋានដែលពាក់ព័ន្ធ ជួយពិនិត្យស្តារ សភាពប្រឡាយបង្ហូរទឹកស្អុយនេះ ដែលសំរាម និងស្មៅកំពុងដុះពាសពេញ ជាហេតុបង្កអោយការបង្ហូរទឹកមានការយឺត និងជន់លិចពេលមានភ្លៀងខ្លាំងម្តងៗ៕

អត្ថបទ៖ សំណាង

The post ប្រឡាយអមសងខាងផ្លូវជាតិលេខ៤ ក្នុងភូមិសាស្ត្រខណ្ឌពោធិ៍សែនជ័យ និងខណ្ឌកំបូល កកស្ទះដោយសំរាម និងស្មៅដុះច្រើន appeared first on Kampuchea Thmey Daily.