ផ្លែក្រូចឆ្មារ Archives - Kampuchea Thmey Daily

តម្លៃក្រូចឆ្មារលឿង កំពុងមានទីផ្សារល្អ ខណៈលក់បាន១គីឡូ៥ដុល្លារ

Sous Sith — Mon, 14 Jul 2025 10:54:00 +0000

កសិករដាំក្រូចឆ្មារលឿងម្នាក់ កំពុងមានទីផ្សារល្អ ខណៈអាចលក់ទៅកាន់ទីផ្សារបានតម្លៃចន្លោះពី ៣ដុល្លារ ទៅ៥ដុល្លារ ក្នុងមួយគីឡូក្រាម។

ស្ថិតនៅក្នុងវ័យ ៣២ឆ្នាំ អ្នកស្រី ឆេង ស្រីពេញ ជាម្ចាស់ចម្ការដាំក្រូចឆ្មារលឿង ស្ថិតនៅក្រុងកែប ខេត្តកែប ប្រាប់ កម្ពុជាថ្មី ថា ដំណាំក្រូចឆ្មារលឿងនេះ អ្នកស្រី និងស្វាមី បានចាប់ផ្ដើមដាំវាឡើងមកតាំងពីចុងឆ្នាំ ២០២៧ មកម្ល៉េះ។ ដំណាំក្រូចឆ្មារលឿងនេះ អ្នកស្រី ឆេង ស្រីពេញថា បច្ចុប្បន្នកំពង់មានទីផ្សារល្អ នេះក៏ព្រោះតែពុំសូវមានអ្នកដាំច្រើននៅឡើយ ខណៈមានតែការនាំចូលពីប្រទេសចិន តែប៉ុណ្ណោះ។

អ្នកស្រី ថ្លែងបន្តថា ក្រូចឆ្មារលឿង អាចលក់ចេញទៅកាន់ទីផ្សារបានចន្លោះចាប់ពី ៣ដុល្លារ ទៅ៥ដុល្លារ ក្នុងមួយគីឡូអាស្រ័យទៅលើការបោះដុំ និងលក់រាយ។

ម្ចាស់ចម្ការូបនេះ បញ្ជាក់ថា៖ «ក្រូចឆ្មារលឿង ងាយស្រួយដាំដុះមិនខុសអ្វីពីការដាំក្រូចឆ្មាររបស់ខ្មែរយើងនោះទេ! ពោលគឺអាស្រ័យទៅលើការមើលថែទាំដាក់ទឹក និងការពារពីពពួកសត្វល្អិត នោះយើងនឹងអាចដាំក្រូចឆា្មរប្រភេទនេះ ទទួលផលបានល្អ ជាក់ជាមិនខានឡើយ»។

អ្នកស្រី ឆេង ស្រីពេញ បានឱ្យដឹងទៀតថា ប្រភេទក្រូចឆ្មារលឿងនេះ មានទីផ្សារល្អ ក៏អាស្រ័យទៅលើការកម្មុងទិញពីខាងសណ្ឋាគារ និងភោគជនីយដ្ឋានមួយចំនួន ដែលភាគច្រើនមានតម្រូវការក្រូចឆ្មារលឿងយកទៅច្នៃជាមួយម្ហូបអាហារបែបអឺរ៉ុប និងធ្វើជាភេសជ្ជៈបែបស្រស់ៗ ដូចទៅនឹងផ្លែឈើដទៃទៀតផងដែរ។

អ្នកស្រី ឆេង ស្រីពេញ បង្ហើបឱ្យដឹងថា ចម្ការរបស់អ្នកស្រី អាចប្រមូលផលក្រូចឆ្មារលឿង បានចន្លោះពី ៤០គីឡូ ទៅ ៥០គីឡូក្រាម ក្នុងមួយថ្ងៃ។

ក្រៅពីដំណាំក្រូចឆ្មារលឿង ចម្ការរបស់អ្នកស្រី ឆេង ស្រីពេញ ក៏មានដាំប្រភេទក្រូចឆ្មារម្រាមដៃ និងក្រូចឆ្មារអត់គ្រាប់ ដែលសុទ្ធសឹងតែជាដំណាំដែលមានទីផ្សារខ្ពស់ និងពុំសូវមានអ្នកដាំច្រើននៅកម្ពុជា។

ចម្ការក្រូចឆ្មារលឿងរបស់អ្នកស្រី ឆេង ស្រីពេញ មានក្រូចឆ្មារលឿងប្រមាណ៩០០ដើម និងដំណាំចម្រុះជាច្រើនប្រភេទទៀត ក្នុងផ្ទៃដីសរុបប្រមាណ ២០ហិកតា។ បច្ចុប្បន្ន មានទីតាំងស្ថិតនៅភូមិ ដំណាក់ចង្អើរ សង្កាត់ ព្រៃធំ ក្រុងកែប ខេត្តកែប៕

អត្ថបទ ៖ សួស សិត

The post តម្លៃក្រូចឆ្មារលឿង កំពុងមានទីផ្សារល្អ ខណៈលក់បាន១គីឡូ៥ដុល្លារ appeared first on Kampuchea Thmey Daily.

កំពូលអាហារទាំង៦ ប្រឆាំងនឹងជំងឺផ្ដាសាយយ៉ាងស័ក្ដិសិទ្ធិ

Sonya — Tue, 31 Aug 2021 04:34:52 +0000

អាហារមានសារសំខាន់ណាស់ក្នុងការប្រយុទ្ធប្រឆាំងនឹងផលប៉ះពាល់អវិជ្ជមាននៃជំងឺផ្ដាសាយ ដែលធ្វើឲ្យគ្នាយើងភាគច្រើនតែងតែមានអារម្មណ៍ល្ហិតល្ហៃ ក៏ដូចជាពិបាកក្នុងខ្លួន។ ប៉ុន្តែ តើយើងគប្បីញ៉ាំអាហារ ឬភេសជ្ជៈបែបណា ដើម្បីឲ្យជំងឺផ្ដាសាយឆាប់ជាសះស្បើយ ក៏ដូចជាពង្រឹងប្រព័ន្ធភាពស៊ាំរបស់យើងឲ្យកាន់តែរឹងមាំ?

១. ម្ទេសសម្រាប់បង្កើនចំណង់អាហារឡើងវិញ

ជាទូទៅ យើងតែងតែបាត់បង់ចំណង់អាហារនៅពេលដែលយើងមិនស្រួលខ្លួន ពីព្រោះតែអាហារមិនមានរសជាតិឆ្ងាញ់ដូចពីមុន។ យ៉ាងណាមិញ អាហារហឹរមានគុណប្រយោជន៍ជួយបំបាត់អាការៈតឹងច្រមុះ និងសម្រួលដល់ការដកដង្ហើម។ ជាលទ្ធផល វាធ្វើឲ្យរសជាតិអាហារត្រលប់មករកសភាពដូចមុនវិញ។

២. បំពេញជាតិទឹកជាមួយនឹងទឹកដូង

ការបំពេញជាតិទឹកក្នុងរាងកាយមានសារសំខាន់ណាស់ ក្នុងការកម្ចាត់ជាតិពុលចេញពីរាងកាយ។ គ្នាយើងគប្បីញ៉ាំទឹកដូង ឬភេសជ្ជៈដែលសម្បូរដោយអេឡិចត្រូលីត ដើម្បីបំពេញជាតិរ៉ែ ដូចជាប៉ូតាស្យូម និងសូដ្យូម។

៣. ទឹកដោះគោជូរពង្រឹងប្រព័ន្ធភាពស៊ាំ

ប្រព័ន្ធភាពស៊ាំរបស់យើងប្រមាណ៧០%គឺប្រមូលផ្ដុំនៅក្នុងក្រពះ ដូច្នេះហើយការបញ្ចូលបាក់តេរីល្អៗក្នុងក្រពះ អាចជួយឲ្យយើងឆាប់ជាសះស្បើយពីជំងឺ ក៏ដូចជាមានសុខភាពរឹងមាំ។ ទឹកដោះគោជូរ ជួយរក្សាតុល្យភាពនៃបាក់តេរីល្អក្នុងក្រពះ ហើយក៏ជាអាហារដែលស័ក្ដិសមសម្រាប់ជំងឺផ្ដាសាយផងដែរ។

៤. តែបៃតងសម្រាប់ប្រឆាំងនឹងអុកស៊ីតកម្ម

ជាមួយគ្នានេះដែរ តែបៃតងមិនត្រឹមតែបំពេញជាតិទឹកដល់រាងកាយរបស់យើងប៉ុណ្ណោះទេ វាក៏សម្បូរទៅដោយសារធាតុប្រឆាំងនឹងអុកស៊ីតកម្ម សម្រាប់ប្រយុទ្ធនឹងពពួករ៉ាឌីកាល់សេរី។ ប្រព័ន្ធផ្លូវដង្ហើមផ្នែកខាងលើរងផលប៉ះពាល់ នៅពេលដែលយើងកើតជំងឺផ្ដាសាយ ហើយការញ៉ាំតែបៃតងក្ដៅជាមួយនឹងទឹកឃ្មុំអាចបើកផ្លូវដង្ហើមរបស់យើងឲ្យដំណើរការប្រក្រតីឡើងវិញ។

៥. ខ្ទឹមសអាចសម្លាប់មេរោគ

ខ្ទឹមសជាភ្នាក់ងារប្រឆាំងនឹងការឆ្លងមេរោគផ្សេងៗ ដូចជាបាក់តេរី និងវីរុស។ ជាក់ស្ដែង ខ្ទឹមសឆៅអាចជួយកាត់បន្ថយអាការៈគ្រុនផ្ដាសាយបានយ៉ាងអស្ចារ្យ ហើយយើងក៏អាចបញ្ចូលវាទៅក្នុងគ្រឿងផ្សំនៃអាហារដើម្បីកម្ចាត់អាការៈគ្រុនផ្ដាសាយនេះដូចគ្នា។

៦. ក្រូចឆ្មារ និងផ្លែក្រូចសម្រាប់បង្កើនវីតាមីនC

វីតាមីនCជាអាហារដ៏ល្អបំផុតសម្រាប់ជួយពង្រឹងប្រព័ន្ធភាពស៊ាំ ហើយអាហារដែលសម្បូរទៅដោយវីតាមីនCមានដូចជាផ្លែក្រូច ក្រូចឆ្មារ ស្រ្តប៊ឺរី និងប៉េងប៉ោះ។ ហេតុនេះហើយ យើងគប្បីញ៉ាំអាហារទាំងនេះជាប្រចាំ ជាពិសេសនៅពេលដែលយើងមានអាការៈគ្រុនផ្ដាសាយ៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ អង្ករ៤ ប្រភេទខុសៗគ្នា សុទ្ធតែមានសារធាតុ ចិញ្ចឹមម្យ៉ាងម្នាក់

The post កំពូលអាហារទាំង៦ ប្រឆាំងនឹងជំងឺផ្ដាសាយយ៉ាងស័ក្ដិសិទ្ធិ appeared first on Kampuchea Thmey Daily.

សម្បកក្រូចឆ្មារ គ្នាយើងដឹងទេថាមានប្រយោជន៍ច្រើនយ៉ាង?

Sonya — Sat, 01 May 2021 01:20:00 +0000

ក្រូចឆ្មារ គឺជាប្រភពនៃវីតាមីនC និងត្រូវបានប្រើប្រាស់ជាទូទៅនៅក្នុងការធ្វើជាភេសជ្ជៈ ក៏ដូចជាបន្ថែមរសជាតិទៅក្នុងអាហារ។ ប៉ុន្តែ គ្នាយើងប្រហែលជាមិនធ្លាប់ដឹងទេថា សម្បកក្រូចឆ្មារក៏ផ្ដល់អត្ថប្រយោជន៍សុខភាពជាច្រើន នៅពេលដែលយើងដឹងពីវិធីប្រើប្រាស់វាត្រឹមត្រូវ។

១. តម្លៃអាហារូបត្ថម្ភខ្ពស់

ទោះបីជាយើងញ៉ាំនៅក្នុងបរិមាណតិចតួចយ៉ាងណាក្ដី សម្បកក្រូចឆ្មារមានសារធាតុចិញ្ចឹមជាច្រើន។ សម្បកក្រូចឆ្មារមួយស្លាបព្រាបាយ ផ្ដល់នូវ៖

កាឡូរី៖ ៣
កាបូអ៊ីដ្រាត៖ ១ក្រាម
ជាតិសរសៃ៖ ១ក្រាម
ប្រូតេអ៊ីន៖ ០ក្រាម
ខ្លាញ់៖ ០ ក្រាម
វីតាមីនC៖ ៩%នៃតម្លៃប្រចាំថ្ងៃ

បន្ថែមពីនេះ វាក៏មានបរិមាណកាល់ស្យូម ប៉ូតាស្យូម និងម៉ាញេស្យូមតិចតួចផងដែរ។

២. ជួយទ្រទ្រង់សុខភាពមាត់ធ្មេញ

ជំងឺពុកធ្មេញ និងការឆ្លងមេរោគអញ្ចាញធ្មេញ គឺបណ្ដាលមកពីបាក់តេរីដូចជា Streptococcus Mutans។ រីឯសម្បកក្រូចមានផ្ទុកសារធាតុប្រឆាំងនឹងបាក់តេរី ដែលអាចរារាំងដល់ការលូតលាស់របស់មីក្រូសរីរាង្គ បានយ៉ាងមានប្រសិទ្ធភាព។

៣. ផ្ទុកសារធាតុប្រឆាំងអុកស៊ីតកម្មខ្ពស់

ជាមួយគ្នានេះដែរ សម្បកក្រូចឆ្មារមានផ្ទុកសារធាតុប្រឆាំងនឹងអុកស៊ីតកម្មខ្ពស់ រួមទាំងD-Limonene និងវីតាមីនC។ ការស្រូបយកសារធាតុប្រឆាំងនឹងអុកស៊ីតកម្មFlavonoid ដូចជាD-Limonene អាចជួយកាត់បន្ថយហានិភ័យនៃជំងឺមួយចំនួន ដូចជាជំងឺបេះដូង និងជំងឺទឹកនោមផ្អែមប្រភេទ២។

៤. ជួយពង្រឹងប្រព័ន្ធភាពស៊ាំ

សារធាតុFlavonoid និងវីតាមីនCដែលមាននៅក្នុងសំបកក្រូចឆ្មារនេះ ក៏រួមចំណែកក្នុងការពង្រឹងប្រព័ន្ធភាពស៊ាំរបស់យើងដូចគ្នា។ ជាក់ស្ដែង វីតាមីនC ប្រមូលផ្ដុំនៅក្នុងPhagocytes ដែលជាប្រភេទកោសិកាមានតួនាទីលេបយកសមាសធាតុដែលបង្កគ្រោះថ្នាក់ផ្សេងៗដល់រាងកាយរបស់យើង។

៥. លើកកម្ពស់សុខភាពបេះដូង

លើសពីនេះ សារធាតុFlavonoid វីតាមីនC និងPectin ដែលមាននៅក្នុងសម្បកក្រូចឆ្មារ ក៏អាចជួយលើកកម្ពស់សុខភាពបេះដូង ដោយធ្វើឲ្យកម្រិតកូឡេស្តេរ៉ូលក្នុងឈាមថយចុះ ក៏ដូចជាកាត់បន្ថយកត្តាហានិភ័យផ្សេងៗទៀតនៃជំងឺបេះដូង។

ការប្រើប្រាស់សម្រាប់ជំនួយសម្រស់ និងលាងសម្អាត

កម្ចាត់ក្លិនមិនល្អ៖ ដាក់សម្បកក្រូចឆ្មារចំនួនពីរបីចំណិតនៅក្នុងទូរទឹកកក ឬនៅបាតធុងសំរាម ដើម្បីកម្ចាត់ក្លិនមិនល្អ។
លាងសម្អាតពពួកដែកអ៊ីណុក៖ ដាក់អំបិលបន្តិចនៅលើសម្ភារៈដែលយើងចង់សម្អាត បន្ទាប់មក ដុសសម្អាតវាដោយប្រើសម្បកក្រូចឆ្មារ និងលាងជម្រះចេញជាមួយនឹងទឹក។
លាងសម្អាតកំសៀវ៖ ចាក់ទឹកចូលទៅក្នុងកំសៀវ និងដាក់សំបកក្រូចឆ្មារទៅក្នុងទឹកនោះ រួចដាំទឹកឲ្យពុះ ដើម្បីកម្ចាត់ជាតិខនិជ (mineral deposits ) ផ្សេងៗ។ បន្ទាប់មក ទុកវាចោលប្រហែលមួយម៉ោង ទើបលាងជម្រះចេញ។
ស្ក្រាប់ខ្លួន៖ លាយស្ករ ប្រេងអូលីវ និងសម្បកក្រូចឆ្មារចិញ្ច្រាំឲ្យម៉ត់ល្អ រួចធ្វើការម៉ាស្សាទៅលើស្បែកសើម រួចលាងជម្រះចេញ។
ម៉ាសបិទមុខ៖ លាយម្សៅអង្ករ ម្សៅសម្បកក្រូចឆ្មារ និងទឹកដោះគោត្រជាក់ ដើម្បីជម្រុះកោសិកាងាប់ និងសម្អាតស្បែក។

ការប្រើប្រាស់សម្បកក្រូចឆ្មារនៅក្នុងរបបអាហារ

បន្ថែមសម្បកក្រូចឆ្មារស្រស់ទៅក្នុងទឹកតែ ឬCocktail
បន្ថែមសម្បកក្រូចឆ្មារដែលឈូសរួចទៅក្នុងអាហារដុត សាឡាត់ ឬទឹកដោះគោជូរ
ឈូសសម្បកក្រូចឆ្មារក្លាស្សេ ដោយរោយទៅលើស៊ុប និងភេសជ្ជៈផ្សេងៗ៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ ផឹកទឹកក្រូចឆ្មារពេលព្រឹក ផ្ដល់អត្ថប្រយោជន៍ដល់សុខភាពយ៉ាងតិច ៦ យ៉ាង

ចុចអាន៖ គុណប្រយោជន៍ដ៏អស្ចារ្យនៃតែ «ស្លឹកម្រុំ» សម្រាប់សុខភាព

The post សម្បកក្រូចឆ្មារ គ្នាយើងដឹងទេថាមានប្រយោជន៍ច្រើនយ៉ាង? appeared first on Kampuchea Thmey Daily.

កុំឃើញក្រូចឆ្មារពណ៌លឿងស្មានគ្មានវីតាមីនស្មើពណ៌បៃតង អានហើយអាចភ្ញាក់ផ្អើល

Sonya — Mon, 07 Dec 2020 02:31:04 +0000

ដោយសារកម្ពុជាយើងមិនទម្លាប់ដាំផ្លែក្រូចឆ្មារអម្បូរពណ៌លឿងនិងមានទំហំធំបែបនេះ ការហូរចូលថ្មីៗនៃក្រូចឆ្មារពណ៌លឿងធ្វើឱ្យយើងគិតថា វាទំនងគ្មានវីតាមីន។

សូមអានសិន ពីអ្វីៗដែលមានសារៈប្រយោន៍ក្នុងផ្លែក្រូចឆ្មារពណ៌លឿងដែលពិភពលោកពេញនិយមខ្លំាង ជាពិសេសប្រើផ្ទាល់ក្នុងភេសជ្ជៈ។

១. ជំនួយសាច់ដុំ

ក្រុមអ្នកស្រាវជ្រាវបានរកឃើញថា ក្រូចឆ្មារពណ៌លឿងមានអង់ស៊ីមប្រឆាំងអុកស៊ីតកម្ម នៃភាពតានតឹងក្នុងរាងកាយ និងអុកស៊ីតកម្មនៃការរលាក។ សារធាតុប្រឆាំងអុកស៊ីតកម្មរបស់ក្រូចឆ្មារពណ៌លឿង អាចជួយបន្ថយការឈឺសាច់ដុំ ពេលដែលហាត់ប្រាណរួចនិងខូចសាច់ដុំដោយប្រការណាមួយ។

២. បំបាត់ការឈឺចាប់រួមគ្នា

ជាការពិត ការសិក្សាមួយបានរកឃើញថា ការទទួលទានអាហារបំប៉នបន្ថែមជាមួយក្រូចឆ្មារលឿង ដែលសំបូរទៅដោយអង់ទីអុកស៊ីដង់ ក៏ដូចជាអាស៊ីដខ្លាញ់អូមេហ្គា ៣ (ប្រេងត្រី) អាចជាវិធីព្យាបាលជំនួស សម្រាប់ការគ្រប់គ្រងរួមគ្នា។ ជាពិសេសសម្រាប់មនុស្សចាស់ ដែលឧស្សាហ៍ឈឺសន្លាក់។

៣. ទប់ស្កាត់ភាពធាត់

ភាពធាត់អាចបណ្ដាលឱ្យមានផលវិបាក ដូចជាជំងឺទឹកនោមផ្អែម ជំងឺបេះដូង និងមហារីកមួយចំនួន។ ការស្រាវជ្រាវបានរកឃើញថា ក្រូចឆ្មារពណ៌លឿងអាចមានសមត្ថភាពជួយការពារភាពធាត់។

ក្រូចឆ្មារពណ៌លឿង រារាំងការប្រមូលផ្ដុំនៃទ្រីគ្លីសេរីត កាត់បន្ថយការរលាក និងប្រឆាំងនឹងស្ត្រេសអុកស៊ីតកម្មដែលបណ្ដាលឲ្យធាត់ និងធ្វើឲ្យប្រព័ន្ធរំលាយអាហារដើរស្រួល។

៤. អាចការពារការវិវត្តនៃជំងឺក្រិន

ការសិក្សាមួយក្នុងឆ្នាំ ២០១៤ ដែលបានធ្វើឡើងលើអ្នកជំងឺ ៣០ នាក់ បានសង្កេតឃើញពីផលវិជ្ជមាននៃការបន្ថែមជាមួយក្រូចឆ្មារពណ៌លឿង ។ នៅចុងបញ្ចប់នៃការស្រាវជ្រាវ អ្នកជំងឺធ្ងន់ធ្ងរបំផុតដែលទទួលទានក្រូចឆ្មារពណ៌លឿងនេះ បានរកឃើញថា កំហាប់ប្រូតេអ៊ីន C-reactive របស់ពួកគេបានថយចុះគួរឱ្យកត់សម្គាល់។ ។

ដោយពិចារណាលើការពិតដែលថា កំហាប់ប្រូតេអ៊ីន C-reactive ត្រូវបានផលិតនៅក្នុងថ្លើម និងជាសញ្ញាសំគាល់ឈាម ដែលជាមូលហេតុនៃការរលាកនៅក្នុងខ្លួន ដែលបណ្ដាលឲ្យរាងកាយក្រិន៕

ប្រែសម្រួល៖ សាង ស្រីល័ក្ខ

ចុចអាន៖ ទឹកក្តៅមួយកែវរាល់ពេលព្រលឹម ឱសថធម្មជាតិសម្រាប់ជីវិតយឺនយូរ

ចុចអាន៖ រកអីទៀត? ញ៉ាំតែផ្លែក្រូចជាប្រចាំក៏មានសុខភាពល្អដែរ!

The post កុំឃើញក្រូចឆ្មារពណ៌លឿងស្មានគ្មានវីតាមីនស្មើពណ៌បៃតង អានហើយអាចភ្ញាក់ផ្អើល appeared first on Kampuchea Thmey Daily.

ផ្លែក្រូចឆ្មារ Archives - Kampuchea Thmey Daily

​តម្លៃក្រូចឆ្មារលឿង កំពុងមានទីផ្សារល្អ ខណៈលក់បាន១គីឡូ៥ដុល្លារ

១. ម្ទេស​សម្រាប់​បង្កើន​ចំណង់​អាហារ​ឡើង​វិញ​

២. បំពេញ​ជាតិ​ទឹក​ជាមួយ​នឹង​ទឹក​ដូង​

៣. ទឹក​ដោះ​គោ​ជូរ​​ពង្រឹង​ប្រព័ន្ធ​ភាព​ស៊ាំ​

៤. តែ​បៃតង​សម្រាប់​ប្រឆាំង​នឹង​អុកស៊ីតកម្ម​

៥. ខ្ទឹម​ស​អាច​សម្លាប់​មេរោគ​

៦. ក្រូច​ឆ្មារ និង​ផ្លែ​ក្រូច​សម្រាប់​​​បង្កើន​វីតាមីន​C

សម្បក​ក្រូច​ឆ្មារ​ គ្នា​យើង​ដឹងទេថាមានប្រយោជន៍ច្រើនយ៉ាង?

១. តម្លៃ​អាហារូបត្ថម្ភ​ខ្ពស់​

២. ជួយ​ទ្រទ្រង់​សុខភាព​មាត់​ធ្មេញ​

៣. ផ្ទុក​​សារធាតុ​ប្រឆាំង​​អុកស៊ីតកម្ម​ខ្ពស់​​

​៤. ជួយ​ពង្រឹង​ប្រព័ន្ធ​ភាព​ស៊ាំ​

​​​​៥. លើក​កម្ពស់​សុខភាព​បេះដូង​

ការ​ប្រើប្រាស់​សម្រាប់​ជំនួយ​សម្រស់​ និង​លាង​​សម្អាត​

ការ​ប្រើប្រាស់​សម្បក​ក្រូច​ឆ្មារ​នៅ​ក្នុង​របប​អាហារ​

កុំឃើញក្រូចឆ្មារ​ពណ៌​​លឿងស្មាន​គ្មាន​វីតាមីនស្មើពណ៌បៃតង អានហើយ​​អាចភ្ញាក់ផ្អើល