តំបន់​ទេចរណ៍​ភ្នំសំពៅ បាន​វិវឌ្ឍ​ជា​បន្តបន្ទាប់​តាម​រយៈ​ការខិតខំប្រឹងប្រែង​ពីថ្នាក់ដឹកនាំខេត្ត ក៏​ដូចជា​អាជ្ញាធរ​មូលដ្ឋាន ពិសេស​ពី​មន្ទីរ​ទេសចរណ៍​ខេត្ត​បាត់ដំបង ដែល​បាន​​រិះរក​គន្លឹះ​សំខាន់​ៗ​ដើម្បី​កែច្នៃ​ឲ្យ​​មាន​ផល​ប្រយោជន៍​សំខាន់​២ ក្នុង​នោះ​គឺ ទី១ ទាញ​កំណើន​ភ្ញៀវ​ជាតិ និង​អន្តរជាតិ ទី២ ទាញ​កំណើន​សេដ្ឋកិច្ច​ដល់​សហគមន៍។

ជាក់ស្តែង​​រហូតដល់​បច្ចុប្បន្ន​នេះ ការ​​វិវឌ្ឍ​ចុង​ក្រោយ​គឺបង្កើត​ផ្សារ​រាត្រី​វិថី​ទេសចរណ៍រមណីយដ្ឋាន​ភ្នំសំពៅ ដែល​ការ​បង្កើត​នេះ ធ្វើ​ឲ្យ​ប្រជាពលរដ្ឋ​ក្នុង​ស្រុក ឬ​សហគមន៍ សប្បាយ​រីករាយ​យ៉ាង​ក្រៃលែង​សម្រាប់​ការ​ផ្តល់​នូវមុខ​របរ​ថ្មី​មួយ​ដល់​ពួកគាត់​នៅក្នុង​មូលដ្ឋាន។

ពលរដ្ឋ​បាន​លើក​ឡើងថា ក្រោយ​​ពី​ការ​បង្កើត​ផ្សាររាត្រី​នេះ ពួក​គាត់​បាន​នាំ​យក​ទិន្នផល​កសិកម្ម​មក​តាំង​លក់ អាចរក​​ចំណូល​បាន​​មួយផ្នែក ហើយ​មួយ​ផ្នែក​ទៀត​បាន​ធ្វើ​នំ​ចំណី ម្ហូប​អាហារ កែច្នៃ​ផ្លែ​ឈើ និង​គ្រាប់​ធញ្ញជាតិ និង​ផលិត​ជា​វត្ថុ​អនុស្សាវរីយ៍​ផ្សេងៗគ្នា​ផង​ដែរ។

ម្ចាស់សិប្បកម្ម លោកស្រី ស្រីមុំ បាន​ឲ្យដឹង​ថា សិប្បកម្ម​លោក​ស្រីមាន​កែច្នៃ​គ្រាប់​ធញ្ញជាតិដែល​មាន​ដូច​ជា គ្រាប់​ពោត​ដំណើប​ស គ្រាប់​ល្ពៅ និង​សំបក​ណែម ដែល​ជា​កសិផល​ក្នុង​ស្រុក​យក​មក​កែច្នៃ​ជា​មួយ​ការ​បន្សំ​គ្រឿង​យ៉ាង​ឆ្ងាញ់។

លោកស្រីបន្តថា លោកស្រីសប្បាយ​រីករាយ​ចិត្ត​​ដែល​បាន​មក​ដាក់​លក់​​នៅ​ផ្សារ​រាត្រី​វិថី​​ទេសចរណ៍​នេះ ហើយ​ក៏លក់​ដាច់​គ្រាន់​បើ ព្រោះ​មាន​ភ្ញៀវ​មក​លេងច្រើន។ ក្នុងនោះ​លោកស្រី​ក៏​បាន​អរគុណ​ដល់ មន្ទីរ​ទេសចរណ៍​ផងដែរ ដោយ​លោកស្រី​លើក​ឡើងថា «នាងខ្ញុំសូម​អរគុណ​ដល់​មន្ទីរទេសចរណ៍​ខេត្ត​បាត់ដំបង ដែល​បានរៀប​ចំផ្សារ​នេះឡើង បាន​ផ្តល់​ឱកាស​ដល់​សិប្បកម្ម​ខ្ញុំ​នាំ​យក ពោត​លីង​អប់ ទៅ​ដាក់​តាំង​បង្ហាញ​ក្នុង​ផ្សារនេះ​សូមបងប្អូនជួយ​លើកស្ទួយ​គាំទ្រ និង​ជាវ​ផលិតផល​ខ្មែរទាំងអស់គ្នាផង»។

បើតាម​លោក ហម អរុណ អនុប្រធានមន្ទីរ​ទេសចរណ៍​ខេត្តបាត់ដំបង​បាន​ឲ្យ​ដឹង​ថា សម្រាប់​តូប​ដាក់​តាំង​ផលិតផល​នានា​ក្នុង​​ស្រុក​មាន​ជាង ៣០ តូប។ ក្រៅ​ពីនោះ​ក៏​មាន​អាជីវករ​មូលដ្ឋាន​ដាក់​លក់​ច្រើន​ក្នុង​បរិវេណ​នោះ​ដែរ។

លោកថា នេះ​ជា​ជំហាន​ដំបូង ហើយ​មាន​ពលរដ្ឋនិង​មហាជន​ច្រើន​ណាស់​ដែល​គាំទ្រ ហើយ​ជំហាន​បន្ទាប់លោក​នឹង​ឲ្យអាជីវករ​ក្នុងមូលដ្ឋាន​ទាំងអស់​ដាក់លក់​​ឲ្យ​មាន​សណ្តាប់​ហើយ​ក្នុង​ការលក់​ទាំង​អស់នោះ ត្រូវ​តែ​ពង្រឹង​មិន​ឲ្យ​លក់​ក្នុង​តម្លៃតាម​តែចិត្តដល់ភ្ញៀវនោះទេ រួម​នឹង​មាន​សុជីវធម៌​ជា​មួយ​ភ្ញៀវ​មិន​ថា​សាសន៍​ខ្លួនឯង ឬសាសន៍​បរទេស​នោះ​ទេ អ្នកលក់​​ត្រូវ​តែ​​មាន​សុជីវធម៌​នេះជា​កត្តាសំខាន់មួយ ដែលធ្វើឲ្យ​ភ្ញៀវចង់​មក​កម្សាន្ត​កាន់​តែ​ច្រើន រួមផ្សំ​នឹងជួយថែទាំអនាម័យទាំងអស់គ្នាផង​ដែរ។

លោក ហម អរុណ បន្តថា ការកែច្នៃបន្ថែម​​នៅរមនីយដ្ឋានភ្នំសំពៅ​នេះ ក្នុង​គោលដៅ​លើក​កម្ពស់ផ្នែក​វិស័យទេសចរណ៍​ក្នុង​ខេត្តបាត់ដំបង ឲ្យ​កាន់​តែ​ប្រសើរ​ថែម​ទៀត នឹង​​បាន​លើក​កម្ពស់​ជីវិភាព​​ប្រចាំថ្ងៃ​របស់​ប្រជាពលរដ្ឋ​ក្នុងស្រុក​ឲ្យបានប្រសើរ ​តាមរយៈ​ផលប្រយោជន៍​កសិផល​ក្នុង​​ស្រុក​ដែល​ត្រូវដាក់​តាំង​បង្ហាញ​ដល់​ភ្ញៀវបរទេស​ឲ្យ​បាន​​ស្គាល់​​កាន់​​តែ​ច្រើន ពិសេសលើ​នំចំណី ម្ហូបអាហារ ដែលផលិត​ឡើង​ពលរដ្ឋក្នុងមូលដ្ឋាន ដែល​មានរសជាតិ​​ឈ្ងុញឆ្ងាញ់ ដែល​ភ្ញៀវបរទេស ឬ​ភ្ញៀវក្នុងស្រុកពេញ​ចិត្ត​និងរសជាតិឆ្ងុយឆ្ងាញ់ រួមផ្សំ​និ​​ងអ្នកលក់ដូរមានសុជីវិធម៌ល្អ រាក់ទាក់ ហើយ​តម្លៃក៏សមរម្យ​អាច​ឲ្យភ្ញៀវមកកម្សាន្តទទួលយកបាន មិន​ថាភ្ញៀវទេសចរ​ក្នុង ឬក្រៅ​ស្រុកនោះទេ។

ភ្នំសំពៅស្ថិតតាម​បណ្តោយ​ផ្លូវជាតិលេខ​ ៥៧ អតីតផ្លូវជាតិលេខ១០ ក្នុង​ស្រុកបាណន់ ខេត្តបាត់ដំបង ត្រូវបាន​ដាក់បញ្ចូលជា​តំបន់ទេសចរណ៍ ប្រវត្តិសាស្ត្រ ដ៏ពេញ​និយម​មួយ​ក្នុងចំណោម​តំបន់ទេសចរណ៍​នានា​នៃ​ខេត្ត​បាត់ដំបង​ដែល​មាន​ការ​ចាប់​អារម្មណ៍​យ៉ាង​ផុលផុស​ពី​ភ្ញៀវ​ទេសចរ​ជាតិ និង​អន្តរជាតិ តាមរយៈ​ហ្វូង​ទ័ព​សត្វ​ប្រចៀវ សម្តែង​ការ​ហោះហើរ​ចេញ​ពីល្អាង​រាល់ពេល​ថ្ងៃ​ហៀប​អស្ដង្គត និង​បាន​ទស្សនា​កម្សាន្ត​លើ​កំពូល​ភ្នំតាម​ល្អាង​នីមួយៗ និងស្វែងយល់​ពី​ទំនៀ​ទម្លាប់ ប្រវត្តិសាស្ត្រ ពី​មួយជំនាន់ទៅមួយជំនាន់ ដែល​បាន​បន្សល់​ទុកនៅតំបន់នេះ។

អត្ថបទ៖ សៅ សារិទ្ធ

The post ផ្សាររាត្រីនៅរមណីយដ្ឋានភ្នំសំពៅ កំពុងជួយបង្កើន​សេដ្ឋកិច្ចគ្រួសារពលរដ្ឋក្នុងស្រុក និងសហគមន៍ appeared first on Kampuchea Thmey Daily.

អ្នកស្រី គួយ សៀវហេង ម្ចាស់អាជីវកម្មកាណូត សិត្បូដឹកភ្ញៀវទេសចរ មុខផ្សាររាត្រី នៃរាជធានីភ្នំពេញ បានប្រាប់ឱ្យ កម្ពុជាថ្មី ដឹងថា ដើមឆ្នាំ ២០២៤ នេះ កាណូតដឹកភ្ញៀវទេសចរ របស់អ្នកស្រី ទទួលបានភ្ញៀវទេសចរជាតិ និងអន្ដរជាតិ យ៉ាងច្រើនកុះករ។ អ្នកស្រី បន្ថែមថា បើប្រៀបធៀបនឹងឆ្នាំមុនៗ ឃើញថា ដើមឆ្នាំនេះ មានកំណើនភ្ញៀវទេសចរ មកដើរកម្សាន្ត និងជ្រើសរើសយកសេវាកម្មជួលទូកកម្សាន្ដតាមដងទន្លេ មុខព្រះបរមរាជវាំង គួរឱ្យកត់សម្គាល់។

ម្ចាស់អាជីវកម្ម កាណូតដឹកភ្ញៀវទេសចរ រូបនេះ បានឱ្យដឹងទៀតថា សម្រាប់ភ្ញៀវទេសចរ ដែលនិយមមកជិះទូកកម្សាន្ត នៅទីនេះ​ ភាគច្រើនសុទ្ធតែជា ប្រជាពលរដ្ឋខ្មែរ និងមួយចំនួនទៀតជា ជនជាតិបរទេសដែលមកពីបណ្ដាប្រទេសនានា។

អ្នកស្រី គួយ សៀវហេង បញ្ជាក់ទៀត ក្នុងចំណោមភ្ញៀវបរទេសអ្នកទាំងនោះ អ្នកស្រី សង្កេតឃើញថា ជនជាតិចិន និងអឺរ៉ុប មានចំនួនច្រើនជាងគេ បើប្រៀបធៀបនឹងជនជាតិផ្សេងៗទៀត។ អ្នកស្រី គួយ សៀវហេង បន្តទៀតថា ទាក់ទងនឹងតម្លៃសំបុត្រជិះទូកកម្សាន្ត សម្រាប់ជនជាតិខ្មែរ ក្នុងមួយនាក់ តម្លៃ ៥០០០ រៀល។ ចំណែកជនបរទេស មួយនាក់ តម្លៃសំបុត្រ 5$ ហើយចំពោះកុមារអាយុក្រោម ៦ឆ្នាំ មិន​តម្រូវឱ្យទិញសំបុត្រ នោះឡើយ។

ចំណែក លោក ជ្រិន ផានិត ភ្ញៀវទេសចរជនជាតិខ្មែរ ក៏បានប្រាប់ឱ្យ កម្ពុជាថ្មី ដឹងដែរថា លោកចូលចិត្តមកជិះទូកកម្សាន្ត នៅមុខផ្សាររាត្រី រៀងរាល់ថ្ងៃទំនេរ និងថ្ងៃចុងសប្ដាហ៍ ដើម្បីមើលទេសភាព និងស្រូបយកខ្យល់អាកាស តាមដងទន្លេ នាពេលរាត្រី។ លោក បន្ថែមថា នៅពេលបានមកជិះទូកម្ដងៗ លោកទទួលបានអារម្មណ៍ថា ធូរស្បើយអស់ទុក្ខកង្វល់ ពីបញ្ហាផ្សេងៗ ត្រូវបានប្រសើរឡើងមួយកម្រិត នៅពេលបានជិះទូកកម្សាន្ត នៅទីនេះ។

រីឯ កញ្ញា ហ៊ុយ ស្រីលក្ខណ៍ និស្សិតខ្មែរ ដែលទៅរៀននៅបរទេស ក៏បានប្រាប់ កម្ពុជាថ្មី ដែរថា កញ្ញា តែងតែមកជិះទូកនៅទីនេះ នៅពេលកញ្ញាត្រឡប់មកពីបរទេសវិញ ពីព្រោះការជិះទូកកម្សាន្ដតាមដងទន្លេ មើលទេសភាព និងស្រូបយកខ្យល់អាកាសបរិសុទ្ធ ធ្វើឱ្យកញ្ញាទទួលបានអារម្មណ៍ ស្រស់ស្រាយ និងមានគំនិតថ្មី ក្នុងការសិក្សារៀនសូត្រ បន្ទាប់ពីជិះទូកកម្សាន្តនៅមុខផ្សាររាត្រីនេះ។

កញ្ញា ហ៊ុយ ស្រីលក្ខណ៍ បានបន្ថែមទៀតថា កញ្ញា តាមរយៈការជិះទូកនាពេលរាត្រី នេះ ក៏ធ្វើឱ្យកញ្ញា បានរំសាយទុក្ខកង្វល់ទាំងអស់ដែលជួបប្រទះ កន្លងមក៕

អត្ថបទ ៖ សួស សិត

The post ដើមឆ្នាំនេះ កាណូតទេសចរនៅមុខផ្សាររាត្រី ទទួលបានភ្ញៀវជាតិ-អន្តរជាតិ ច្រើន appeared first on Kampuchea Thmey Daily.

គួរ​បញ្ជាក់​ថា តូប​ផ្សារ​រាត្រី​ថ្មី​នេះ បាន​សាងសង់​ឡើង​នៅ​លើ​សួន​ចំប៉ី ស្ថិត​ក្នុង​ភូមិ​កម្មករ សង្កាត់​ស្វាយប៉ោ​កណ្ដាល ក្រុង​បាត់ដំបង។ តូប​ទាំងនេះ មាន​ខ្នាត​តូចៗ ទល់​ខ្នង​គ្នា ដោយ​នៅ​ប៉ែក​ខាង​កើត សម្រាប់​អ្នក​លក់​ចំណីអាហារ ឯ​នៅ​ប៉ែក​ខាងលិច​សម្រាប់​លក់​សម្ភារៈ​ប្រើប្រាស់ ដូចជា លក់ ខោអាវ ស្បែកជើង ទូរស័ព្ទ ។ល។

ប៉ុន្តែ​រយៈពេល​ប៉ុន្មាន​ខែ​កន្លង​ទៅ​នេះ ក្រុម​អាជីវករ​ដែល​នៅ​ប៉ែក​ខាងលិច មិន​ទាន់​បាន​ចូល​ខ្លួន​ទៅ​លក់​ទំនិញ​របស់​ខ្លួន​ឡើយ ដោយសារ​ហេតុផល​មាន​ច្រើនយ៉ាង។ រហូត​មាន​អាជីវករ​ខ្លះ ដាក់​ស្លាក​ជួល​តូប​ថែម​ទៀត​ផង បញ្ហា​នេះ​ទំនងជា​រត់​មិន​រួច ពិសេស​តម្លៃ​តូប និង​ទំហំ​តូប វា​មិន​សមាមាត្រ​នឹង​គ្នា​ទាល់តែ​សោះ។

អាជីវករ​មួយ​រូប មាន​មុខរបរ​លក់ និង​ជួសជុល​ទូរស័ព្ទ បាន​និយាយ​ថា តូប​របស់​លោក​បាន​ត្រឹមតែ​ដាក់​ទូកញ្ចក់​ដ៏​តូច​មួយ និង​កៅអី​ពីរ​ប៉ុណ្ណោះ សឹងតែ​រក​ផ្លូវ​ចេញ​ចូល​មិនបាន។ ចំណែក​បង្គន់​អនាម័យ​ដែល​គេ​សាងសង់​នៅ​ចំ​កណ្ដាល​នោះ សុទ្ធតែ​យក​លុយ​ទាំងអស់ ដោយ​បត់ជើង​ម្ដង​មួយ​ពាន់​រៀល មិនមែន​ហ្វ្រីៗ ឲ្យ​អាជីវករ​ឡើយ។

អាជីវករ​ដដែល បាន​បន្ត​ថា រឿង​រាប់​ខែ​ហើយ​មិន​ទាន់​មាន​ក្រុម​អាជីវករ​ចូល​មក​លក់​នោះ ដោយសារ​តែ​តូប​នីមួយៗ ដែល​ក្រុមហ៊ុន​ម៉ៅការ​សាងសង់​ឡើង​គ្មាន​ធ្វើ​ទ្វារ​ឲ្យ​ទេ ដោយ​ទុក​ចំហ​មុខក្រោយ។ ជា​គោលការណ៍ តូប ត្រូវ​មាន​ទ្វារ​សំណាញ់​ដូច​ផ្សារ​រាត្រី​ចាស់ បើ​អាជីវករ​ណា​មិន​ពេញចិត្ត ឬ​គិត​ថា​វា​គ្មាន​សុវត្ថិភាព គឺ អាច​ឲ្យ​ក្រុមហ៊ុន​ប្ដូរ​ជា​ទ្វារ​រូត​ឡើង​ចុះ​បាន។ ប៉ុន្តែ​នេះ​សង្ស័យ​ជា​ល្បិច​របស់​ក្រុមហ៊ុន ព្រោះ​គេ​មិន​ដាក់​ទ្វារ​សំណាញ់​ឲ្យ ដោយសារ​គេ​ចង់​ឲ្យ​អាជីវករ​ដាក់​ទ្វារ​រូត​ទាំងអស់ ដោយ​ក្នុង​តម្លៃ ៨០០ ដុល្លារ (​មុខ,ក្រោយ​) ហើយក៏​មិន​អនុញ្ញាត​ឲ្យ​យក​ជាង​ពី​ខាងក្រៅ​មក​ធ្វើ​នោះ​ឡើយ គឺ​មាន​សិទ្ធិ​តែ​ជាង​របស់​ក្រុមហ៊ុន​ប៉ុណ្ណោះ។

ក្រុម​អាជីវករ បាន​បង្ហើប​ថា អ្នកម៉ៅការ​ធ្វើ​ផ្សារ​រាត្រី​នេះ គឺជា លោក​ឧកញ៉ា ហេង តុលា ឯ​ការ​ជួល​តូប​មាន​តម្លៃ​ខ្ពស់​នេះ ត្រូវ​បង់​ឲ្យ​រដ្ឋបាល​ខេត្ត ក្នុង​នោះ​ទាំង​ការ​ជួល​ជាង​ត​បណ្ដាញ​ភ្លើង​ផ្សេង​ទៀត។ ជាមួយ​នោះ ត្រូវ​ធ្វើ​ទ្វារ​ផ្សេង​ទៀត ដែល​ពួកគាត់​បាន​រិះគន់​ថា នេះ​ទើប​ពិតជា​រដ្ឋបាល​ខេត្ត សង្ស័យចង់កៀប​អាជីវករ​គ្រប់​ច្រក​តែម្ដង ហេតុដូច្នេះ​ហើយទើប​តូប​ជាច្រើន​ត្រូវ​បាន​អាជីវករ​ទុក​ចោល​ដោយសារ​ហួស​សមត្ថភាព។

ពាក់ព័ន្ធ​នឹង​រឿងរ៉ាវ​ខាង​លើ​នេះ​ដែរ កម្ពុជា​ថ្មី មិន​អាច​សុំ​ការ​បំភ្លឺ​ពី លោក​ឧកញ៉ា ហេង តុលា បាន​នៅ​ឡើយ​ទេ៕

អត្ថបទ ៖ សោ និយមរ័ត្ន

The post អាជីវករផ្សាររាត្រី បាត់ដំបង រអ៊ូរទាំរឿងអ្នកម៉ៅការសង់តូបអត់មានទ្វារ appeared first on Kampuchea Thmey Daily.

អ្នកស្រី កែវ ដាវី អាយុ ៦០ឆ្នាំ ម្ចាស់តូបលក់វត្ថុអនុស្សាវរីយ៍សិប្បកម្មផលិតដោយដៃ នៅក្នុងផ្សាររាត្រី បានប្រាប់កម្ពុជាថ្មីថា តូបរបស់អ្នកស្រី មានលក់វត្ថុអនុស្សាវរីយ៍ជាច្រើនមុខដូចជា៖ ផ្ទាំងគំនូរ គ្រឿងចម្លាក់តូច ខ្សែក ខ្សែដៃ សុទ្ធសឹងតែជាផលិតផលកែឆ្នែចេញពីឈើ និងជ័រ ជាពិសេសនោះគឺការធ្វើឡើងដោយដៃរបស់ប្រជាជនខ្មែរ ដែលមកពីគ្រប់បណ្ដាខេត្តផ្សេងៗ។

អ្នកស្រី បន្ថែមទៀតថា ការលក់វត្ថុអនុស្សាវរីយ៍នេះ ជាទូទៅរៀងរាល់ថ្ងៃចុងសប្ដាហ៍ តែងតែមានភ្ញៀវទេសចរជាតិ និងអន្តរជាតិ និយមដើរកម្សាន្ត និងបានទិញវត្ថុអនុស្សាវរីយ៍របស់អ្នកស្រី យ៉ាងច្រើនគួរសម។

អ្នកស្រី កែវ ដាវី បញ្ជាក់ថា ភាគច្រើនក្នុងចំណោមភ្ញៀវ ដែលទិញវត្ថុអនុស្សាវរីយ៍របស់អ្នកស្រី គឺសម្បូរទៅដោយភ្ញៀវក្នុងស្រុក ច្រើនជាងភ្ញៀវបរទេស។ អ្នកស្រី រំលឹកថា កាលពីមិនទាន់មានជំងឺកូវីដ-១៩ ភ្ញៀវដែលទិញវត្ថុអនុស្សាវរីយ៍ ភាគច្រើននោះគឺជាជនជាតិបរទេស មកពីគ្រប់ជាតិសាសន៍ នៅលើសកលលោក។ ប៉ុន្តែនៅពេលជំងឺកូវីដ-១៩ រាតត្បាតមក អ្នកស្រីសង្កេតឃើញថា ភ្ញៀវទេសចរដែលដើរកម្សាន្តផ្សាររាត្រី គឺមានតែភ្ញៀវក្នុងស្រុកភាគច្រើន។

ចំណែកអ្នកស្រី វ៉ាន់សាក់ រក្សា ម្ចាស់តូបលក់សម្លៀកបំពាក់បុរស បានប្រាប់កម្ពុជាថ្មីដែរថា តូបលក់សម្លៀកបំពាក់របស់អ្នកស្រី ភាគច្រើនលក់ខោអាវបុរស គ្រប់ម៉ូដក្នុងតម្លៃតែ ១០,០០០រៀល លើគ្រប់ម៉ូដខោអាវ។ អ្នកស្រីបន្តថា កន្លងមកអ្នកស្រី អាចលក់បានមួយថ្ងៃបានប្រាក់សរុបប្រហែល ២០០ដុល្លារ ទៅ ៣០០ដុល្លារ ដោយសរុបទាំងថ្លៃដើម។ ប៉ុនែ្តបច្ចុប្បន្ននេះ មានការថយចុះវិញ ដោយអ្នកស្រីយល់ថា បណ្ដាលមកពីការប្រែប្រួលនៃសេដ្ឋកិច្ច ទើបធ្វើឲ្យប្រជាពលរដ្ឋមិនសូវហ៊ានចំណាយ។  

អ្នកស្រី វ៉ាន់សាក់ រក្សា បានស្នើសុំទៅរាជរដ្ឋាភិបាលអាណត្តិថ្មី បន្តបង្កើតការងារក្នុងស្រុកបន្ថែមទៀត ដោយអ្នកស្រីរំពឹងថា ប្រសិនបើប្រជាពលរដ្ឋទាំងអស់មានការងារ និងមុខរបរធ្វើគ្រប់គ្នានោះ ការលក់ដូររបស់អ្នកស្រី ក៏នឹងបានប្រសើរឡើងដូចកាលពីមុនដែរ។  

រីឯលោក វេន តុលាវីន ម្ចាស់តូបលក់កាបូប ខ្សែក្រវ៉ាត់ និងនាឡិកា គ្រប់ប្រភេទ ក៏បានប្រាប់យ៉ាងខ្លីថា ការលក់ដូររបស់លោកក៏ថយចុះដែរ ដោយពីមុនលោកអាចលក់បានក្នុងមួយថ្ងៃចន្លោះពី ២៥ម៉ឺនរៀល ទៅ ៣០ម៉ឺនរៀល ជារៀងរាល់ថ្ងៃ។ លោកបន្តថា សម្រាប់ពេលបច្ចុប្បន្ននេះ ការលក់ដូររបស់លោកថយចុះមកត្រឹមតែចន្លោះ ១០ម៉ឺនរៀល ទៅ ១៥ម៉ឺនរៀលប៉ុណ្ណោះ ដោយភ្ញៀវភាគច្រើនគ្រាន់តែដើរលេងកម្សាន្ត មិនសូវទិញទំនិញផ្សេងៗ ឡើយ៕

អត្ថបទ៖ សួស សិត

The post ការលក់វត្ថុអនុស្សាវរីយ៍នៅផ្សាររាត្រី នៅតែមានភ្ញៀវទិញច្រើនគួរសម ខណៈទំនិញផ្សេងមានការថយចុះ appeared first on Kampuchea Thmey Daily.