ព័រតូរីកូ Archives - Kampuchea Thmey Daily

ព្យុះសង្ឃរា Fiona កំពុងតម្រង់ទៅកោះ Bermuda ក្រោយសម្លាប់មនុស្ស ៨នាក់នៅ ព័រតូរីកូ (មានវីដេអូ)

Sok Sovann — Thu, 22 Sep 2022 02:10:45 +0000

កាលពីថ្ងៃពុធទី២១ខែកញ្ញា ព្យុះសង្ឃរា Fiona បានបង្កើនកម្លាំងដល់ព្យុះប្រភេទ៤ដ៏មានឥទ្ធិពល នៅពេលវាឆ្ពោះទៅកាន់កោះ Bermuda បន្ទាប់ពីបង្កការបំផ្លិចបំផ្លាញនៅសាធារណរដ្ឋដូមីនីក និងព័រតូរីកូ ជាកន្លែងដែលព្យុះនេះកាត់ផ្តាច់អគ្គិសនី និងបណ្តាលឲ្យមនុស្ស ៨នាក់ស្លាប់។

បន្ទាប់ពីបណ្តាលឲ្យមានការបាក់ដីនៅព័រតូរីកូកាលពីថ្ងៃអាទិត្យ ព្យុះ Fiona បានបង្កគ្រោះទឹកជំនន់ដ៏បំផ្លិចបំផ្លាញ។ ក្នុងរយៈពេលពីរថ្ងៃបន្ទាប់ ព្យុះនេះបានបង្កើនកម្លាំង ខណៈដែលវាតម្រង់ទៅសាធារណរដ្ឋដូមីនីក និងកោះ Turks និង Caicos។

មជ្ឈមណ្ឌលព្យុះសង្ឃរាជាតិអាមេរិក (NHC) និយាយថា ព្យុះសង្ឃរា Fiona នាំមកនូវខ្យល់បក់ក្នុងល្បឿន ២១៥គីឡូម៉ែត្រក្នុងមួយម៉ោងកាលពីថ្ងៃពុធ ហើយត្រូវបានគេរំពឹងថា នឹងនាំមកនូវខ្យល់បក់ខ្លាំងជាងនេះទៀត នៅពេលសំដៅទៅភាគខាងជើង តម្រង់កោះ Bermuda។ ព្យុះ Fiona អាចទៅដល់ឆ្នេរសមុទ្រអាត្លង់ទិករបស់ប្រទេសកាណាដា នៅថ្ងៃសុក្រ។

លោក Eric Blake ប្រធានសាខាស្តីទីសម្រាប់ NHC នៅទីក្រុង Miami បាននិយាយថា កោះ Bermuda នឹងជួបប្រទះរលកខ្ពស់ៗ ខ្យល់កន្ត្រាក់ ភ្លៀងធ្លាក់ខ្លាំង និងខ្យល់បក់ខ្លាំង។

យោងតាម ក្រុមហ៊ុន LUMA Energy បានឲ្យដឹងថា ផ្ទះ និងអាជីវកម្មប្រមាណ ១.០៧ លាននៅតែគ្មានថាមពលប្រើប្រាស់លើកោះព័រតូរីកូ គិតត្រឹមរសៀលថ្ងៃ ពុធ។ ក្រុមហ៊ុននិយាយថា ការស្ដារអគ្គិសនីឡើងវិញដល់អតិថិជន ១.៥លាននាក់អាចចំណាយពេលច្រើនថ្ងៃ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ US News

ចុចអាន៖ វីដេអូ និងរូបភាព បង្ហាញពីគ្រោះមហន្តរាយដ៏ធំធេង បង្កឡើងដោយព្យុះសង្ឃរា Fiona នៅ ព័រតូរីកូ

The post ព្យុះសង្ឃរា Fiona កំពុងតម្រង់ទៅកោះ Bermuda ក្រោយសម្លាប់មនុស្ស ៨នាក់នៅ ព័រតូរីកូ (មានវីដេអូ) appeared first on Kampuchea Thmey Daily.

ព័រតូរីកូ ប្រឈមការបាក់ដី និងទឹកជំនន់ដែលគំរាមកំហែងដល់អាយុជីវិត

Sok Sovann — Sun, 18 Sep 2022 03:31:00 +0000

នៅពេលដែលព្យុះត្រូពិក Fiona កាន់តែខិតទៅជិតដែនដី ព័រតូរីកូ, កោះ Enchantment បានស្ថិតនៅក្រោមហានិភ័យនៃការបាក់ដី និងទឹកជំនន់ដែលគំរាមកំហែងដល់អាយុជីវិតរយៈពេលច្រើនថ្ងៃ។ នេះបើតាមការព្រមាន ដែលចេញដោយមជ្ឈមណ្ឌលព្យុះសង្ឃរាជាតិសហរដ្ឋអាមេរិក។

សេចក្តីប្រកាសថ្ងៃសៅរ៍ ដែលចេញផ្សាយដោយទីភ្នាក់ងារនេះ បានដាក់ព្យុះនេះនៅចម្ងាយប្រហែល២៣៣គីឡូម៉ែត្រពីទីក្រុង Ponce ជាមួយល្បឿនខ្យល់អតិបរមា ៩៦ គីឡូម៉ែត្រក្នុងមួយម៉ោង។ ព្យុះនេះ ត្រូវបានគេរំពឹងថានឹងទៅដល់ដែនដី ព័រតូរីកូ នៅយប់ថ្ងៃសៅរ៍ (ត្រូវនឹងរសៀលថ្ងៃអាទិត្យនៅកម្ពុជា)។

ទោះបីជាបច្ចុប្បន្ន Fiona ត្រូវបានគេចាត់ទុកថាជាព្យុះត្រូពិកក៏ដោយ ប៉ុន្តែអ្នកព្យាករណ៍រំពឹងថា ប្រព័ន្ធនេះនឹងប្រែក្លាយទៅជាព្យុះសង្ឃរា មុនពេលទៅដល់ឆ្នេរសមុទ្រភាគខាងត្បូង ព័រតូរីកូ នៅថ្ងៃអាទិត្យ។

តាមការព្យាករណ៍ ទឹកភ្លៀងអាចនឹងធ្លាក់ចុះពី ១២ ទៅ ១៦ អ៊ីញនៅលើកោះ ខណៈរលកសមុទ្រអាចនឹងកើនឡើងដល់កម្ពស់ ៣ហ្វីត ហើយអ្នកព្យាករណ៍បានព្រមានថា ឥទ្ធិពលព្យុះនេះនឹងបង្កឲ្យមានការបាក់ដី និងទឹកជំនន់ដែលគំរាមកំហែងដល់អាយុជីវិត។

មុននេះ ព្យុះ Fiona បានបង្កការខូចខាតលើកោះការាបៀនភាគខាងកើតមួយចំនួនរួចទៅហើយ។ ការស្លាប់មនុស្សម្នាក់ ត្រូវបានរាយការណ៍នៅក្នុងទឹកដី Guadeloupe របស់ប្រទេសបារាំង ដែលបានកត់ត្រានូវខ្យល់បក់ខ្លាំងជាង ១១២គីឡូម៉ែត្រក្នុងមួយម៉ោង និងបរិមាណទឹកភ្លៀងដែលមានកម្ពស់ប្រហែល ៩អ៊ីញ៕

ប្រែសម្រួល៖ Vann Vann

ប្រភព៖ Sputnik

ចុចអាន៖ ជប៉ុន បញ្ជាឲ្យជម្លៀសមនុស្សជិត ២លាននាក់ ខណៈព្យុះទីហ្វុង Nanmadol កាន់តែខិតជិតទៅដល់

The post ព័រតូរីកូ ប្រឈមការបាក់ដី និងទឹកជំនន់ដែលគំរាមកំហែងដល់អាយុជីវិត appeared first on Kampuchea Thmey Daily.