ព្យាបាលជំងឺឥតគិតថ្លៃ Archives - Kampuchea Thmey Daily

ក្រុមគ្រូពេទ្យសមាគមបេសកកម្មមនុស្សធម៌កម្ពុជា ចុះព្យាបាលជំងឺជូនពលរដ្ឋ នៅមណ្ឌលសុវត្ថិភាពជនភៀសសឹកក្នុងវត្តចាន់ស៊ីដោយឥតគិតថ្លៃ

អ៊ិន ពិសី — Sun, 16 Nov 2025 09:40:43 +0000

ប្រជាពលរដ្ឋ ២ ភូមិ គឺ ភូមិព្រៃចាន់ និង ភូមិជោគជ័យ ដែលរងគ្រោះដោយសារយោធាថៃបាញ់ប្រហាររងរបួសធ្ងន់ ៣ នាក់ និងស្លាប់ម្នាក់ កាលពីវេលាម៉ោងប្រមាណជិត ៤ រសៀល ថ្ងៃទី ១២ ខែវិច្ឆិកា ឆ្នាំ ២០២៥ ព្រមទាំងជនភៀសសឹកប្រហែល ៧០០ គ្រួសារ មកស្នាក់នៅក្នុងវត្តចាន់ស៊ី ឃុំកូប ស្រុកអូរជ្រៅ ខេត្តបន្ទាយមានជ័យ ត្រូវបានក្រុមគ្រូពេទ្យសមាគមបេសកកម្មមនុស្សធម៌កម្ពុជា សហការជាមួយក្រុមគ្រូពេទ្យ មន្ទីរសុខាភិបាលខេត្តបន្ទាយមានជ័យ ចុះពិនិត្យ និងព្យាបាលជំងឺទូទៅជូនពួកគាត់នៅមណ្ឌលសុវត្ថិភាពជនភៀសសឹក ក្នុងវត្តចាន់ស៊ី ដោយឥតគិតថ្លៃ ចំនួន ២ ថ្ងៃ ចាប់ពីថ្ងៃទី ១៦ ដល់ថ្ងៃទី ១៧ ខែវិច្ឆិកា ឆ្នាំ ២០២៥។ ការពិនិត្យ និងព្យាបាលជំងឺទូទៅនេះ មានក្រុមគ្រូពេទ្យស្ម័គ្រចិត្តបារាំងចំនួន ១៥ នាក់ និងខ្មែរ ៨ នាក់ ក្នុងនោះ វេជ្ជបណ្ឌិត ៥ នាក់ ដោយមិនយកកម្រៃនោះទេ។

លោកវេជ្ជបណ្ឌិត ម្នាក់ ចំណោម ៥ នាក់ បានឲ្យដឹងថា ដោយមើលឃើញប្រជាពលរដ្ឋរាប់រយគ្រួសាររងគ្រោះដោយសារយោធាថៃបាញ់ប្រហារ ហើយបានភៀសខ្លួនមកស្នាក់នៅក្នុងវត្តចាន់ស៊ីនេះ ភាគច្រើន គឺមនុស្សចាស់មានជំងឺជាប់ខ្លួន ទើប សម្ដេចធិបតី និង លោកជំទាវបណ្ឌិត ពេជ ចន្ទ មុន្នី ហ៊ុន ម៉ាណែត ឲ្យដឹកនាំក្រុមគ្រូពេទ្យ ចុះជួយពិនិត្យ និងព្យាបាលជំងឺជូនពលរដ្ឋ ព្រោះគ្មានលទ្ធភាពព្យាបាលជំងឺនៅតាមគ្លីនិកឯកជន។

ប្រជាពលរដ្ឋភៀសខ្លួនដោយសារយោធាថៃបាញ់ប្រហារប្រហែល ៧០០ គ្រួសារ មកស្នាក់នៅបណ្ដោះអាសន្នក្នុងវត្តកាន់ស៊ីនេះ បានអរគុណដល់ សម្ដេចធិបតី និង លោកជំទាវបណ្ឌិត ពេជ ចន្ទ មុន្នី ហ៊ុន ម៉ាណែត មិនត្រឹមតែផ្ដល់ទីជម្រក ទឹក ភ្លើង ម្ហូបអាហារ ថវិកា សម្ភារៈផ្ទះបាយ មុង ភួយ ប៉ុណ្ណោះទេ ថែមទាំងដឹកនាំក្រុមគ្រូពេទ្យសមាគមបេសកកម្មមនុស្សធម៌កម្ពុជា ផ្ដល់ការពិនិត្យព្យាបាលជំងឺដោយឥតគិតថ្លៃជូនពួកគាត់ទៀតផង។

ប្រជាពលរដ្ឋអញ្ជើញមកទទួលសេវាពិនិត្យ និងព្យាបាលសុខភាពទាំងអស់ បានសម្ដែងក្តីសប្បាយរីករាយ និងថ្លែងអំណរគុណជាអនេកចំពោះ សម្ដេចធិបតី និង លោកជំទាវបណ្ឌិត ពេជ ចន្ទ មុន្នី ហ៊ុន ម៉ាណែត , រដ្ឋបាលខេត្តបន្ទាយមានជ័យ និងរដ្ឋបាលស្រុកអូរជ្រៅ ដែលជួយសម្រួលដល់ក្រុមគ្រូពេទ្យជំនាញ ចុះមកពិនិត្យ និងព្យាបាលសុខភាពដល់កន្លែងស្នាក់នៅពួកគាត់ដោយពុំមានការបង់ថ្លៃអ្វីទាំងអស់ទៀតផង៕

អត្ថបទ ៖ វ៉ាន់ ណាង

The post ក្រុមគ្រូពេទ្យសមាគមបេសកកម្មមនុស្សធម៌កម្ពុជា ចុះព្យាបាលជំងឺជូនពលរដ្ឋ នៅមណ្ឌលសុវត្ថិភាពជនភៀសសឹកក្នុងវត្តចាន់ស៊ីដោយឥតគិតថ្លៃ appeared first on Kampuchea Thmey Daily.

ក្រុមគ្រូពេទ្យស្ម័គ្រចិត្តមកពីសហរដ្ឋអាមេរិក ពិនិត្យព្យាបាលជំងឺជូនប្រជាពលរដ្ឋ នៅស្រុកតាំងគោក

អ៊ិន ពិសី — Wed, 08 Oct 2025 01:57:44 +0000

កាលពីថ្ងៃទី ៧ ខែតុលា ឆ្នាំ ២០២៥ ក្រុមវេជ្ជបណ្ឌិតមកពីសហរដ្ឋអាមេរិករបស់អង្គការ Medical Mission Outreach តាមរយៈលោក ហ្វីលីព កាស្ត្រូ ជាប្រធានអង្គការ ប៊ីលេគ អភិវឌ្ឍន៍សហគមន៍អន្តរជាតិប្រចាំនៅកម្ពុជា សហការជាមួយការិយាល័យសុខាភិបាលស្រុកប្រតិបត្តិបារាយណ៍-សន្ទុក បានចុះពិនិត្យព្យាបាលជំងឺជូនប្រជាពលរដ្ឋ នៅស្រុកតាំងគោក ខេត្តកំពង់ធំ។

នាឱកាសចុះពិនិត្យព្យាបាលជំងឺជូនប្រជាពលរដ្ឋនៅស្រុកតាំងគោក លោក ហ្វីលីព កាស្ត្រូ លើកឡើងថា ការចុះពិនិត្យ និងព្យាបាលរបស់ក្រុមគ្រូពេទ្យ នៃប្រទេសសហរដ្ឋអាមេរិក នាពេលនេះ ឈរលើការលើកកម្ពស់សុខភាពសាធារណៈ ភាពជាដៃគូក្នុងការលើកកម្ពស់សុខភាពពលរដ្ឋ និងគាំទ្រលើវិស័យសុខាភិបាលនៅកម្ពុជា។ សកម្មភាពរបស់ក្រុមវេជ្ជបណ្ឌិត បានធ្វើការពិនិត្យ និងព្យាបាល ជូនពលរដ្ឋទូទៅ ដោយធ្វើជាច្រើនប្រទេសមិនសម្រាប់តែកម្ពុជានោះទេ ប៉ុន្តែរូបលោកចាប់អារម្មណ៍ ព្រមទាំងចង់ជួយពលរដ្ឋកម្ពុជា។ ក្នុងនាមប្រធានអង្គការ ប៊ីលេគ អភិវឌ្ឍន៍សហគមន៍អន្តរជាតិ នឹងអញ្ជើញក្រុមគ្រូពេទ្យដែលជាមិត្តភ័ក្ដិបរទេសរបស់លោកចំនួន ២ ក្រុម ផ្សេងទៀត មកពិនិត្យព្យាបាលនៅអំឡុងខែមករា ឆ្នាំ ២០២៦ ម្តងទៀត។

ដោយឡែក លោក ហាក់ ម៉ុងហួត អភិបាលស្រុកតាំងគោក បានថ្លែងអំណរគុណដល់ លោក ហ្វីលីព កាស្ត្រូ ដែលលោកតែងតែកៀរគរសប្បុរសជនចូលរួមអភិវឌ្ឍន៍ជាមួយអាជ្ញាធរស្រុក ជាពិសេសកៀរគរមិត្តភ័ក្ដិ ក្រុមគ្រូពេទ្យ មកពិនិត្យ និងព្យាបាលជំងឺជូនប្រជាពលរដ្ឋនៅពេលនេះ។ សកម្មភាពទាំងនេះ ជាការចូលរួមចំណែកជាមួយរាជរដ្ឋាភិបាលកម្ពុជា ដែលបាននិងកំពុងតែយកចិត្តទុកដាក់យ៉ាងខ្លាំងចំពោះសុខុមាលភាពរបស់ប្រជាពលរដ្ឋ និងជួយសម្រួលនូវបន្ទុកសេវាចំណាយរបស់ពួកគាត់បានមួយកម្រិត។

លោកបន្តថា រាជរដ្ឋាភិបាល បាន និងកំពុងពង្រឹងបន្ថែមទៀតលើការបម្រើសេវាសាធារណៈ រួមជាមួយវិស័យសុខាភិបាលផងដែរ ដែលធ្វើការបង្ខិតសេវាទាំងអស់ឲ្យនៅជិតប្រជាពលរដ្ឋកាន់តែមានប្រសិទ្ធភាព។

ជាមួយនេះ លោកក៏បានអំពាវនាវដល់ប្រជាពលរដ្ឋទាំងអស់ សូមបន្តទៅរកសេវាសុខភាពនៅមណ្ឌលសុខភាពដែលនៅជិតបំផុត ព្រោះវាអាចកាត់បន្ថយ។ ម្យ៉ាងទៀត តាមមណ្ឌលសុខភាពមានសម្ភារៈគ្រប់គ្រាន់ មានថ្នាំល្អៗ និងក្រុមគ្រូពេទ្យមានវិជ្ជាជីវៈត្រឹមត្រូវ។

គួរបញ្ជាក់ថា ការពិនិត្យ និងព្យាបាលជំងឺជូនដល់ប្រជាពលរដ្ឋដោយឥតគិតថ្លៃមានរយៈពេល ១ ថ្ងៃពេញ គឺ ចាប់ពីវេលាម៉ោង ៨ និង ០០ នាទីព្រឹក រហូតដល់ម៉ោង ៥ និង ០០ នាទីល្ងាច ដោយក្រុមគ្រូពេទ្យអាមេរិក ចំនួន ៦០ នាក់ ពេទ្យឯកទេស ៣០ នាក់ និងពិនិត្យព្យាបាលជំងឺប្រជាពលរដ្ឋសរុប ៤៣៣ នាក់ ជំងឺទូទៅ ២៥៤ នាក់ លើជំងឺភ្នែក ១៥៤ នាក់ ព្រមទាំងជំងឺមាត់ធ្មេញ ២៥ នាក់ ផងដែរ៕

អត្ថបទ ៖ ឈាង មករា

The post ក្រុមគ្រូពេទ្យស្ម័គ្រចិត្តមកពីសហរដ្ឋអាមេរិក ពិនិត្យព្យាបាលជំងឺជូនប្រជាពលរដ្ឋ នៅស្រុកតាំងគោក appeared first on Kampuchea Thmey Daily.

លោកជំទាវ ហ៊ុន ម៉ាណា ដឹកនាំក្រុមគ្រូពេទ្យស្ម័គ្រចិត្តចុះពិនិត្យ និងព្យាបាលជំងឺជូនកងទ័ព និងគ្រួសារនៅខេត្តព្រះវិហារ

កម្ពុជាថ្មី — Mon, 10 Mar 2025 07:14:49 +0000

លោកជំទាវ ហ៊ុន ម៉ាណា ប្រធានក្រុមវេជ្ជសាស្ត្រសម្ដេចតេជោ នៅព្រឹកថ្ងៃអាទិត្យ ទី៩ ខែមីនា ឆ្នាំ២០២៥ បានអញ្ជើញដឹកនាំក្រុមគ្រូពេទ្យស្ម័គ្រចិត្តចុះពិនិត្យ និងព្យាបាលជំងឺជូនប្រជាពលរដ្ឋ កងទ័ព គ្រួសារកងទ័ព ដោយឥតគិតថ្លៃចំនួន ២០៤៧នាក់ ដែលធ្វើឡើងនៅទីតាំងវរៈសេនាតូច៣៨១ ស្ថិតនៅក្នុងភូមិចំបក់សែនជ័យ ឃុំស្រអែម ស្រុកជាំក្សាន្តខេត្តព្រះវិហារ ដែលជាបេសកកម្មលើកទី ៤៩ របស់ក្រុមវេជ្ជសាស្ត្រសម្ដេចតេជោ។

នាឱកាសនោះលោកជំទាវ ហ៊ុន ម៉ាណា បានមានប្រសាសន៍សំណេះសំណាល និងពាំនាំនូវការផ្តាំផ្ញើសួរសុខទុក្ខពីសំណាក់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន , សម្ដេចមហាបវរអធិបតី ហ៊ុន ម៉ាណែត និងជំទាវបណ្ឌិត ពេជ ចន្ទមុន្នី ហ៊ុនម៉ាណែត ដល់បងប្អូនប្រជាពលរដ្ឋដែលបានចូលរួមពិនិត្យ ព្យាបាលជំងឺទាំងអស់។ លោកជំទាវមានប្រសាសន៍ទៀតថា សម្តេចតែងតែគិតគូរយកចិត្តទុកដាក់ដល់ប្រជាពលរដ្ឋ ដែលរស់នៅតាមតំបន់ដាច់ស្រយាលគ្រប់ទីកន្លែង និងគ្រប់ពេលវេលា។

លោកជំទាវបានថ្លែងអំណរគុណដល់អាជ្ញាធរគ្រប់លំដាប់ថ្នាក់នៃខេត្តព្រះវិហារ ជាពិសេសអាជ្ញាធរស្រុកជាំក្សាន្តដែលបានសម្របសម្រួលឲ្យប្រជាពលរដ្ឋបានមកទទួលការពិនិត្យ ព្យាបាលជំងឺដោយមិនគិតថ្លៃនាថ្ងៃនេះ។ មុនការពិនិត្យ ពិគ្រោះ និងព្យាបាលជំងឺ ក្រុមការងារក៏បានផ្តល់ជូនអាហារសម្រន់នៅពេលព្រឹក មានជានំបញ្ចុក នំបុ័ង បបរ និងភេសជ្ជៈ ឲ្យប្រជាពលរដ្ឋទទួលទានផងដែរ។

ជាលទ្ធផលចំនួនប្រជាពលរដ្ឋដែលទទួលបានការព្យាបាលទាំងអស់មានចំនួន ២០៤៧នាក់ រួមមាន៖ ការវះកាត់តូច ចំនួន៧២នាក់ , ពិនិត្យព្យាបាលរោគស្ត្រីចំនួន១២៥នាក់, ពិនិត្យជំងឺទូទៅចំនួន១២៩០នាក់, ពិនិត្យសម្ភព និងអេកូសាស្ត្រចំនួន១៨០នាក់, និងពិនិត្យ ព្យាបាលមាត់ធ្មេញចំនួន២៣០នាក់, លាបផ្លរ៉ាការពារធ្មេញ ១៥០នាក់ ចែកវ៉ែនតាចំនួន៦៥០នាក់។

ជាមួយគ្នានោះ ក៏មានការចែកកាតាប និងសម្ភារៈដល់សិស្សានុសិស្សចំនួន៦០០នាក់,ចែករទេះរុញជនពិការចំនួន២០គ្រឿង, និងចែកកញ្ចប់អំណោយសម្ដេចតេជោជូនប្រជាពលរដ្ឋ ចំនួន៥០០បញ្ចប់ផងដែរ៕

The post លោកជំទាវ ហ៊ុន ម៉ាណា ដឹកនាំក្រុមគ្រូពេទ្យស្ម័គ្រចិត្តចុះពិនិត្យ និងព្យាបាលជំងឺជូនកងទ័ព និងគ្រួសារនៅខេត្តព្រះវិហារ appeared first on Kampuchea Thmey Daily.

ពេញ១ខែមករា មន្ទីរពេទ្យគន្ធបុប្ផា ពិនិត្យ និងព្យាបាលជំងឺដល់កុមារជាង ១០ម៉ឺននាក់

Ngoeul Narath — Thu, 13 Feb 2025 04:25:07 +0000

រយៈពេលពេញ១ខែមករា ក្នុងឆ្នាំ២០២៥ មន្ទីរពេទ្យគន្ធបុប្ផា ពិនិត្យ និងព្យាបាលទារក កុមារ ស្រ្តីមានផ្ទៃពោះដោយមិនគិតថ្លៃ ដល់កុមារជាង១០ម៉ឺននាក់។

តាមរយៈការបង្ហាញពីតួលេខព្យាបាលជំងឺរបស់មន្ទីរពេទ្យគន្ធបុប្ផា ក្នុងខែមករា ឆ្នាំ២០២៥ នេះ, មានកុមារចំនួន ៨៨ ៦៤៨ នាក់ បានមកទទួលការពិនិត្យ និងព្យាបាលក្នុងផ្នែកជំងឺក្រៅ និងកុមារមានជំងឺធ្ងន់ៗចំនួន ១៥ ៤៦៥ នាក់ បានសម្រាកព្យាបាលនៅក្នុងមន្ទីរពេទ្យ ក្នុងនោះ មានចំនួន ២៨២ នាក់ មានជំងឺគ្រុនឈាម និង ២ ៦៦២ ត្រូវបានទទួលការវះកាត់។ ដោយឡែក ស្រ្តីមានផ្ទៃពោះចំនួន ៨ ៥៦៦ នាក់ បានមកពិនិត្យតាមដានផ្ទៃពោះ និងមកសម្រាលកូនចំនួន ១ ៧១៦ នាក់ ផងដែរ។

មន្ទីរពេទ្យគន្ធបុប្ផាអះអាងថា រាល់ការពិនិត្យ និងព្យាបាលទារក កុមារ ស្រ្តីមានផ្ទៃពោះទាំងនេះ គឺធ្វើឡើងដោយមិនគិតថ្លៃ មិនរើសអើង គុណភាព និងប្រកបដោយវិជ្ជាជីវៈ។

គួរឱ្យដឹងថា មន្ទីរពេទ្យគន្ធបុប្ផាបានបើកដំណើរឡើងវិញនៅឆ្នាំ១៩៩២ បន្ទាប់ពីមន្ទីរពេទ្យមួយនេះត្រូវបិទទ្វារដោយសារតែរបបប្រល័យពូជសាសន៍ប៉ុលពត ដែលគិតមកទល់បច្ចុបន្ននេះ មន្ទីរពេទ្យនេះបានបើកដំណើរការឡើងវិញបានរយៈពេលប្រមាណ៣៣ឆ្នាំ។

ក្នុងឆ្នាំ២០២៤ កន្លងទៅ មន្ទីរពេទ្យគន្ធបុប្ផាភ្នំពេញ និងនៅសៀមរាប បានពិនិត្យ និងព្យាបាលលើកុមារ ទារក និងស្ត្រីមានផ្ទៃពោះ ឆ្លងទន្លេ ដោយឥតគិតថ្លៃសរុប ១ ២៥៣ ៧៧៤ករណី ខណៈក្នុង១ឆ្នាំៗ មន្ទីរពេទ្យនេះ ត្រូវចំណាយថវិកាជាង៤០លានដុល្លារសហរដ្ឋអាមេរិក។

លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ប្រធានកិត្តិយសមូលនិធិគន្ធបុប្ផាកម្ពុជា ធ្លាប់បានវាយតម្លៃថា មន្ទីរពេទ្យគន្ធបុប្ផាបានព្យាបាល ដណ្ដើមជីវិតកុមារកម្ពុជាជាច្រើនពីមាត់មច្ចុរាជ ក្រោយមកកុមារដែលធ្លាប់ទទួលបានការព្យាបាលទាំងនោះ ក្លាយជាគ្រូពេទ្យហើយបានជួយព្យាបាលអ្នកជំងឺដទៃទៀត ក្លាយជាមន្ត្រីជាន់ខ្ពស់ និងខ្លះទៀតបានក្លាយជាធនធានមនុស្សដ៏មានតម្លៃសម្រាប់សង្គមកម្ពុជា។

លោកជំទាវប្រធានកិត្តិយសមូលនិធិគន្ធបុប្ផាកម្ពុជា ក៏ធ្លាប់បានថ្លែងអំណរគុណក្រុមគ្រូពេទ្យនៅក្នុងមន្ទីរពេទ្យ ដែលបានលះបង់កម្លាំងកាយ កម្លាំងចិត្ត មិនថាយប់ មិនថាថ្ងៃ ក្នុងកិច្ចការដណ្ដើមអាយុជីវិតអ្នកជំងឺពីមាត់មច្ចុរាជ និងស្នើឱ្យបន្តបំពេញកិច្ចការងារនេះតទៅទៀត ដើម្បីកុមារកម្ពុជា។

លោកជំទាវ ពេជ ចន្ទមុន្នី ហ៊ុន ម៉ាណែត ក៏បានឱ្យដឹងថា ក្មួយថ្លៃរបស់លោកជំទាវ គឺកូនរបស់ឯកឧត្ដម ហ៊ុន ម៉ានិត ក៏ទទួលបានការព្យាបាលពីមន្ទីរពេទ្យគន្ធបុប្ផាដូចគ្នា នៅពេលជួបប្រទេះបញ្ហាជំងឺដង្កាត់អ្វីមួយ។

ជាមួយគ្នានេះ លោកជំទាវបណ្ឌិតស្រ្តីទីមួយ បានចាត់ទុកការបរិច្ចាគរបស់សប្បុរសជននានាជូនមន្ទីរពេទ្យ ដើម្បីទុកព្យាបាលជំងឺកុមារ ថាគឺជាការធ្វើទានមួយដ៏ត្រឹមត្រូវ ពីព្រោះបានជួយស្រោចស្រង់អាយុជីវិតកុមារផង និងជួយឱ្យកុមារទាំងនោះទទួលបានឱកាស និងអនាគតល្អ ក៏ដូចបានជួយសង្គមជាតិ ក្រោមម្លប់នៃសន្តិភាព៕

ដោយ៖ ង៉ិល ណារ៉ាត់

The post ពេញ១ខែមករា មន្ទីរពេទ្យគន្ធបុប្ផា ពិនិត្យ និងព្យាបាលជំងឺដល់កុមារជាង ១០ម៉ឺននាក់ appeared first on Kampuchea Thmey Daily.

ពេទ្យកូរ៉េ នឹងព្យាបាលជំងឺទូទៅឥតគិតថ្លៃ ៣ថ្ងៃ ដល់ពលរដ្ឋខេត្តកំពង់ធំ

Chan Sotheavy — Fri, 04 Aug 2023 03:30:22 +0000

មន្ទីរសុខាភិបាលខេត្តកំពង់ធំ សហការជាមួយ សមាគមន៍គ្រូពេទ្យស្ម័គ្រចិត្ត ខេត្តឃ្យូងសាងប៊ុកដូ នៃសាធារណរដ្ឋកូរ៉េ ផ្តល់ជូនការពិនិត្យ និងព្យាបាល ជូនបងប្អូនប្រជាពលរដ្ឋដោយឥតគិតថ្លៃ ដល់បងប្អូនប្រជាពលរដ្ឋទូទៅ មន្ត្រីរាជការ និងកងកម្លាំង ចាប់ពីថ្ងៃទី១១ សីហា ដល់ថ្ងៃទី១៣ សីហា ឆ្នាំ២០២៣ នាពេលខាងមុខនេះ។

បើតាមសេចក្តីជូនដំណឹងរបស់ រដ្ឋបាលខេត្តកំពង់ធំ សម្រាប់កម្មវិធីពិនិត្យព្យាបាលនេះ គឺមានព្យាបាលទៅលើការព្យាបាលជំងឺទូទៅ ជំងឺមាត់ធ្មេញ ថតឆ្លុះ ក្រពះពោះវៀន រោគស្ត្រី ជំងឺកុមារ ចក្ខុរោគ(ជំងឺភ្នែក) ចាក់ម្ជុលវិទ្យាសាស្ត្រ ព្រមទាំងពិនិត្យឈាម។ ឯការពិនិត្យព្យាបាល គឺធ្វើឡើងក្នុងទីតាំង មន្ទីរពេទ្យបង្អែកខេត្តកំពង់ធំតែម្តង ដោយមានកំណត់ពេលវេលាទៅតាមថ្ងៃ និងបែងចែកការព្យាបាលជា ២ ពោលគឺព្យាបាលជូនបងប្អូនប្រជាពលរដ្ឋ រយៈពេល ២ថ្ងៃ ហើយសម្រាប់មន្ត្រីរាជការ និងកងកម្លាំង ព្រមទាំងក្រុមគ្រួសារ រយៈពេល ១ថ្ងៃ ។

គួរបញ្ជាក់ថា សម្រាប់រយៈ ២ថ្ងៃ ដែលបងប្អូនប្រជាពលរដ្ឋ អាចទទួលសេវាព្យាបាលដោយឥតគិតថ្លៃបាន គឺ៖
– សម្រាប់ថ្ងៃទី១១ ខែសីហា ឆ្នាំ២០២៣ ចាប់ពីវេលាម៉ោង ១០:០០ព្រឹក ដល់ម៉ោង ១៧:០០ល្ងាច ។
- សម្រាប់ថ្ងៃទី១២ ខែសីហា ឆ្នាំ២០២៣ ចាប់ពីវេលាម៉ោង ៧:៣០ព្រឹក ដល់ម៉ោង ១៧:០០ល្ងាច ។

ដោយឡែកសម្រាប់មន្ត្រីរាជការ និងកងកម្លាំង ព្រមទាំងក្រុមគ្រួសារ អាចទទួលការព្យាបាលបាន នៅថ្ងៃ ចុងក្រោយ ពោលគឺថ្ងៃទី១៣ ខែសីហា ឆ្នាំ២០២៣ ចាប់ពីវេលាម៉ោង ៧:៣០ព្រឹក ដល់ ១២:០០ថ្ងៃត្រង់ ៕

The post ពេទ្យកូរ៉េ នឹងព្យាបាលជំងឺទូទៅឥតគិតថ្លៃ ៣ថ្ងៃ ដល់ពលរដ្ឋខេត្តកំពង់ធំ appeared first on Kampuchea Thmey Daily.