សេចក្តីព្រាងច្បាប់នេះ គឺតាក់តែងឡើងដើម្បីឆ្លើយតបទៅនឹងតម្រូវការចាំបាច់នៃការអភិវឌ្ឍសេដ្ឋកិច្ចសង្គម និងសំណូមពររបស់វិស័យឯកជន ព្រមទាំងត្រូវបានកំណត់ជាការងារអាទិភាពនៅក្នុងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល។

សេចក្តីព្រាងច្បាប់ស្តីពីវិសោធនកម្មច្បាប់ស្តីពីផ្លូវថ្នល់ គឺជាការធ្វើវិសោធនកម្មចំនួន១៥មាត្រាលើច្បាប់ស្តីពីផ្លូវថ្នល់ ដែលបានប្រកាសឱ្យប្រើកាលពីថ្ងៃទី៤ ខែឧសភា ឆ្នាំ២០១៤។ មាត្រាទាំង១៥នៃច្បាប់ស្តីពីផ្លូវថ្នល់ ដែលបានធ្វើវិសោធនកម្មពេលនេះ គឺមាន៖ មាត្រា២៥ មាត្រា២៦ មាត្រា៤៨ មាត្រា៤៩ មាត្រា៥០ មាត្រា៥៦ មាត្រា៥៧ មាត្រា៥៨ មាត្រា៥៩ មាត្រា៦០ មាត្រា៦១ មាត្រា៦៦ មាត្រា៦៧ មាត្រា៦៨ និងមាត្រា៦៩។

ការធ្វើវិសោធនកម្មច្បាប់នេះ គឺជាជំហានវិជ្ជមានថ្មីមួយដ៏មានសារៈសំខាន់ក្នុងការលើកកម្ពស់ប្រសិទ្ធភាពនៃការគ្រប់គ្រង អភិវឌ្ឍ និងអភិរក្សហេដ្ឋារចនាសម្ព័ន្ធផ្លូវថ្នល់ ធានាចីរភាព និងគុណភាពផ្លូវថ្នល់ តាមរយៈការបង្កើនប្រសិទ្ធភាពនៃការទប់ស្កាត់យានយន្តដឹកជញ្ជូនលើសទម្ងន់កម្រិតកំណត់ និងការកែសម្រួលការពិន័យអន្តរការណ៍ឱ្យបានច្បាស់លាស់។

បន្ថែមពីលើនេះ សេចក្តីព្រាងច្បាប់នេះ នឹងជួយសម្រួលដល់ការកាត់បន្ថយចំណាយប្រតិបត្តិការដឹកជញ្ជូន និងឡូជីស្ទិករបស់វិស័យឯកជន សំដៅលើកកម្ពស់សមត្ថភាពប្រកួតប្រជែងជាតិ និងតំបន់ ព្រមទាំងដើរតួនាទីយ៉ាងសំខាន់ជាខែលការពារទ្រព្យសម្បត្តិជាតិ និងអាយុជីវិតរបស់ប្រជាពលរដ្ឋនៅលើដងផ្លូវ។

គួរឱ្យដឹងថា សេចក្តីព្រាងច្បាប់នេះ មាន២មាត្រា ត្រូវបានរដ្ឋសភាកម្ពុជាអនុម័តក្នុងចំនួន១១៤សំឡេងនៃចំនួនសមាជិករដ្ឋសភាទាំងមូល កាលពីថ្ងៃទី២២ ខែមិថុនា ឆ្នាំ២០២៦ នាសម័យប្រជុំរដ្ឋសភាជាវិសាមញ្ញ។

គួរកត់សម្គាល់ថា សម័យប្រជុំលើកទី៥ព្រឹទ្ធសភា នាព្រឹកនេះ ប្រព្រឹត្តទៅដែលមានលោក អ៊ុច បូររិទ្ធ ប្រធានស្តីទីព្រឹទ្ធសភា ជាអ្នកដឹកនាំប្រជុំ ដោយមានវត្តមានសមាជិកព្រឹទ្ធសភាចូលរួមចំនួន៥៧រូប។ អង្គប្រជុំបានដំណើរការដោយមានរបៀបវារៈតែមួយ គឺពិនិត្យហើយឱ្យយោបល់លើសេចក្តីព្រាងច្បាប់ស្តីពីវិសោធនកម្មច្បាប់ស្តីពីផ្លូវថ្នល់៕

The post ព្រឹទ្ធសភាគាំទ្រទាំងស្រុងលើសេចក្តីព្រាងច្បាប់ស្តីពីវិសោធនកម្មច្បាប់ស្តីពីផ្លូវថ្នល់ appeared first on Kampuchea Thmey Daily.

ក្នុងសេចក្ដីជូនដំណឹងនៅថ្ងៃព្រហស្បតិ៍នេះ បានឱ្យដឹងបន្ថែមថា កិច្ចប្រជុំគណៈកម្មាធិការអចិន្ត្រៃយ៍ព្រឹទ្ធសភា ក៏នឹងពិនិត្យ និងសម្រេចផងដែរទៅលើសំណើរបស់គណៈកម្មការសាធារណការ ដឹកជញ្ជូន អាកាសចរណ៍ ស៊ីវិល ប្រៃសណីយ៍ ទូរគមនាគមន៍ ឧស្សាហកម្ម វិទ្យាសាស្ត្រ បច្ចេកវិទ្យា នវានុវត្តន៍ រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ នៃព្រឹទ្ធសភា (គណៈកម្មការទី៩) សុំដាក់សេចក្តីព្រាងច្បាប់ស្តីពីវិសោធនកម្មច្បាប់ស្តីពីផ្លូវថ្នល់ ទៅក្នុងរបៀបវារៈសម័យប្រជុំលើកទី៥ ព្រឹទ្ធសភា។

ជាការកត់សម្គាល់ បន្ទាប់ពីទទួលបានការប្រគល់ភារកិច្ចពីគណៈកម្មាធិការអចិន្ត្រៃយ៍ព្រឹទ្ធសភា កាលពីព្រឹកថ្ងៃទី២៤ ខែមិថុនា ឆ្នាំ២០២៦ គណៈកម្មការទី៩ នៃព្រឹទ្ធសភា ដឹកនាំដោយលោក អ៊ុំ សារឹទ្ធ ដែលជាប្រធានគណៈកម្មការ បានដឹកនាំកិច្ចប្រជុំគណៈកម្មការនានានៃព្រឹទ្ធសភាជាមួយតំណាងរាជរដ្ឋាភិបាល ដឹកនាំដោយលោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន ដើម្បីពិនិត្យសិក្សាលើសេចក្ដីព្រាងច្បាប់ស្ដីពីវិសោធនកម្មច្បាប់ស្តីពីផ្លូវថ្នល់។

សេចក្ដីព្រាងច្បាប់ស្ដីពីវិសោធនកម្មច្បាប់ស្តីពីផ្លូវថ្នល់ ត្រូវបានរដ្ឋសភាអនុម័ត កាលពីថ្ងៃទី២២ ខែមិថុនា ដែលជាការធ្វើវិសោធនកម្មចំនួន ១៥មាត្រា លើច្បាប់ស្តីពីផ្លូវថ្នល់ ដែលបានប្រកាសឱ្យប្រើកាលពីថ្ងៃទី៤ ខែឧសភា ឆ្នាំ២០១៤។ មាត្រាទាំង១៥នៃច្បាប់ស្តីពីផ្លូវថ្នល់ ដែលបានធ្វើវិសោធនកម្មពេលនេះមានមាត្រា២៥ មាត្រា២៦ មាត្រា៤៨ មាត្រា៤៩ មាត្រា៥០ មាត្រា៥៦ មាត្រា៥៧ មាត្រា៥៨ មាត្រា៥៩ មាត្រា៦០ មាត្រា៦១ មាត្រា៦៦ មាត្រា៦៧ មាត្រា៦៨ និងមាត្រា៦៩។

ការធ្វើវិសោធនកម្មច្បាប់នេះ ធ្វើឡើងដើម្បីឆ្លើយតបទៅនឹងសំណូមពររបស់វិស័យឯកជន និងការវិវឌ្ឍជាក់ស្តែងនៃសង្គម-សេដ្ឋកិច្ច ដែលជាការងារអាទិភាពក្នុងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា ដោយផ្ដោតលើការរឹតបន្តឹងយានយន្តដឹកលើសទម្ងន់ តាមរយៈការកំណត់វិធានការត្រួតពិនិត្យ និងរៀបចំគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ និងការកែសម្រួលទម្ងន់ និងការផាកពិន័យ ដោយកែសម្រួលកម្រិតទម្ងន់អតិបរមាលើបណ្តាញផ្លូវថ្នល់ ព្រមទាំងបង្កើនពិន័យអន្តរការណ៍ និងទោសប្បញ្ញត្តិចំពោះរថយន្តដែលល្មើសច្បាប់។ ម្យ៉ាងវិញទៀត គឺរៀបចំឡើងដើម្បីការធានាសុវត្ថិភាពចរាចរណ៍ ដោយពង្រឹងការគ្រប់គ្រង និងការអភិវឌ្ឍហេដ្ឋារចនាសម្ព័ន្ធផ្លូវថ្នល់ឱ្យកាន់តែមានគុណភាព និងសុវត្ថិភាព៕

ដោយ៖ ធឿន វ៉ាន់សុង

The post ព្រឹទ្ធសភាត្រៀមបើកសម័យប្រជុំពេញអង្គដើម្បីពិនិត្យហើយឱ្យយោបល់លើវិសោធនកម្មច្បាប់ស្តីពីផ្លូវថ្នល់ appeared first on Kampuchea Thmey Daily.

ជំនួយមនុស្សធម៌នេះត្រូវបានធ្វើឡើងក្រោមអនុស្សរណៈនៃការយោគយល់គ្នារវាងមូលនិធិចែករំលែកសង្គ្រោះជីវិតសកល និងគណៈកម្មការអង្កេត បោសសម្អាត និងប្រឆាំងអំពើពុករលួយ នៃព្រឹទ្ធសភា (គណៈកម្មការទី១០) ហើយពិធីចុះហត្ថលេខាលើអនុស្សរណៈនេះ បានធ្វើជាផ្លូការ កាលពីថ្ងៃទី២២ ខែមិថុនា ឆ្នាំ២០២៦ នៅវិមានព្រឹទ្ធសភា ក្នុងរាជធានីភ្នំពេញ។

តាមព្រឹទ្ធសភា នេះជាការផ្តល់អំណោយមនុស្សធម៌របស់កូរ៉េដល់ព្រឹទ្ធសភាកម្ពុជាលើកទី៣ សម្រាប់រយៈពេល៥ឆ្នាំ ចាប់ពីឆ្នាំ២០២៦ ដល់ឆ្នាំ២០៣១ ដែលមានថវិកាសរុបចំនួន១៥លានដុល្លាអាម៉េរិក សម្រាប់ផ្តល់ដល់ខេត្តចំនួន៣ថែមទៀត គឺខេត្តកែប ខេត្តព្រៃវែង និងខេត្តបាត់ដំបង ដោយក្នុងមួយខេត្តទទួលបាន៥លានដុល្លាអាម៉េរិក។

លោក អ៊ុច បូររិទ្ធ ប្រធានស្តីទីព្រឹទ្ធសភាកម្ពុជា បានអរគុណដល់មូលនិធិ GLS ជាពិសេសលោក គីម ជុងណាម ដែលជាប្រធានមូលនិធិ ដែលបានផ្តល់ជំនួយមនុស្សធម៌ដល់ប្រជាជនកម្ពុជាជាបន្តបន្ទាប់ ដោយលោក ថា មូលនិធិនេះបាននិងកំពុងបន្តផ្តល់ជំនួយមនុស្សធម៌ដល់ប្រជាជនកម្ពុជា ក្នុងវិស័យសុខាភិបាល អប់រំ សង្គមកិច្ច នៅតាមបណ្តាខេត្តមួយចំនួននៅទូទាំងប្រទេសកម្ពុជា។

លោក បន្ថែមថា ជំនួយឧបត្ថម្ភនេះបានរួមចំណែកដ៏សំខាន់ក្នុងការអនុវត្តយុទ្ធសាស្ត្របញ្ចកោណរបស់រាជរដ្ឋាភិបាលដែលមានអាទិភាពគន្លឹះ៥ គឺមនុស្ស ផ្លូវ ទឹក ភ្លើង និងបច្ចេកវិទ្យា។ ប្រធានស្តីទីព្រឹទ្ធសភា បានអះអាងជាថ្មីនូវការគាំទ្ររបស់លោក ក៏ដូចជាព្រឹទ្ធសភាចំពោះបេសកកម្មមនុស្សធម៌របស់មូលនិធិ GLS នៅក្នុងប្រទេសកម្ពុជា។

តាមការបញ្ជាក់របស់លោក គីម ជុងណាម មូលនិធិ GLS បានផ្ដល់ជំនួយដល់កម្ពុជាចំនួន២២លើកមកហើយ ក្នុងទឹកប្រាក់សរុបប្រមាណ៣៤លានដុល្លារអាម៉េរិក ចាប់ពីឆ្នាំ២០២២ មកទល់បច្ចុប្បន្ននេះ ហើយក្នុងឆ្នាំ២០២៧ មូលនិធិ មានគម្រោងវិសាលភាពបញ្ចូលទៅខេត្តផ្សេងទៀត។

ជាការកត់សម្គាល់ ដើម្បីជាការលើកចិត្តដល់កិច្ចខិតខំប្រឹងប្រែងកៀរគររកជំនួយសប្បុរសធម៌មកជួយលើកកម្ពស់គុណភាពជីវិត និងសុខុមាលភាពប្រជាជនកម្ពុជា ប្រធានស្តីទីព្រឹទ្ធសភា បានបំពាក់គ្រឿងឥស្សរិយយសដល់ប្រធានមូលនិធិ និងសមាជិកគណៈប្រតិភូទាំងអស់ផងដែរ៕

The post កូរ៉េផ្ដល់ជំនួយមនុស្សធម៌ខ្ទង់១៥លានដុល្លារ តាមព្រឹទ្ធសភាកម្ពុជា ដើម្បីជួយលើវិស័យសុខាភិបាល អប់រំ សង្គមកិច្ច appeared first on Kampuchea Thmey Daily.

ព្រឹទ្ធសភាបានសម្រេចប្រគល់ភារកិច្ចឱ្យគណៈកម្មការសាធារណការ ដឹកជញ្ជូន អាកាសចរណ៍ស៊ីវិល ប្រៃសណីយ៍ ទូរគមនាគមន៍ ឧស្សាហកម្ម វិទ្យាសាស្ត្រ បច្ចេកវិទ្យា នវានុវត្តន៍ រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ នៃព្រឹទ្ធសភា (គណៈកម្មការទី៩) ពិនិត្យ និងសិក្សាលើសេចក្តីព្រាងច្បាប់ស្តីពីវិសោធនកម្មច្បាប់ស្តីពីផ្លូវថ្នល់។ សេចក្ដីសម្រេចនេះ បានធ្វើឡើងតាមរយៈកិច្ចប្រជុំរបស់គណៈកម្មាធិការអចិន្ត្រៃយ៍ព្រឹទ្ធសភា ដែលប្រព្រឹត្តទៅក្រោមការដឹកនាំរបស់លោក អ៊ុច បូររិទ្ធ ប្រធានស្ដីទីព្រឹទ្ធសភា។

សេចក្តីព្រាងច្បាប់ស្តីពីវិសោធនកម្មច្បាប់ស្តីពីផ្លូវថ្នល់ ជាការធ្វើវិសោធនកម្មចំនួន ១៥មាត្រា លើច្បាប់ស្តីពីផ្លូវថ្នល់ ដែលបានប្រកាសឱ្យប្រើកាលពីថ្ងៃទី៤ ខែឧសភា ឆ្នាំ២០១៤ ដើម្បីឆ្លើយតបតាមការអភិវឌ្ឍសង្គម-សេដ្ឋកិច្ចរបស់ប្រទេសជាតិ។ មាត្រាទាំង១៥នៃច្បាប់ស្តីពីផ្លូវថ្នល់ ដែលបានធ្វើវិសោធនកម្មពេលនេះមានមាត្រា២៥ មាត្រា២៦ មាត្រា៤៨ មាត្រា៤៩ មាត្រា៥០ មាត្រា៥៦ មាត្រា៥៧ មាត្រា៥៨ មាត្រា៥៩ មាត្រា៦០ មាត្រា៦១ មាត្រា៦៦ មាត្រា៦៧ មាត្រា៦៨ និងមាត្រា៦៩។

តាមការគូសបញ្ជាក់របស់រាជរដ្ឋាភិបាល សេចក្តីព្រាងច្បាប់ស្តីពីវិសោធនកម្មច្បាប់ស្តីពីផ្លូវថ្នល់នេះ បានរៀបចំឡើងដើម្បីឆ្លើយតបនឹងសំណូមពរខាងវិស័យឯកជន ក៏ដូចជាការអភិវឌ្ឍជាក់ស្តែង នៃសង្គម-សេដ្ឋកិច្ច ព្រមទាំងត្រូវបានកំណត់ជាការងារអាទិភាពនៅក្នុងយុទ្ធសាស្ត្របញ្ចកោណ ដំណាក់កាលទី១។

លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន និងជាតំណាងរាជរដ្ឋាភិបាលឡើងការពារសេចក្ដីព្រាងច្បាប់នេះ នៅក្នុងសម័យប្រជុំរដ្ឋសភា កាលពីថ្ងៃទី២២ ខែមិថុនា បានបន្ថែមថា ការធ្វើវិសោធនកម្មច្បាប់ស្តីពីផ្លូវថ្នល់ ដើម្បីកែសម្រួលកម្រិតទម្ងន់អតិបរមាលើបណ្តាញផ្លូវថ្នល់ ព្រមទាំងពិន័យអន្តរការណ៍ និងទោសប្បញ្ញត្តិចំពោះបទល្មើសនឹងការកម្រិតទម្ងន់ដឹកជញ្ជូនអតិបរមាលើបណ្តាញផ្លូវថ្នល់៕

The post ព្រឹទ្ធសភាទទួលយកសេចក្ដីព្រាងស្ដីពីវិសោធនកម្មច្បាប់ផ្លូវថ្នល់ ដោយឱ្យគណៈកម្មការជំនាញពិនិត្យសិក្សា appeared first on Kampuchea Thmey Daily.

លោក អ៊ុច បូររិទ្ធ បានលើកឡើងពីភាពរីកចម្រើនយ៉ាងឆាប់រហ័សលើគ្រប់វិស័យក្នុងទំនាក់ទំនង និងកិច្ចសហប្រតិបត្តិការដ៏ល្អរវាងកម្ពុជា និងកូរ៉េខាងត្បូង។ តួយ៉ាង លោក បានគូសបញ្ជាក់អំពីតួនាទីដ៏សំខាន់របស់អង្គការក្រៅរដ្ឋាភិបាលកូរ៉េ ដែលបាននិងកំពុងប្រតិបត្តិការយ៉ាងសកម្មនៅកម្ពុជាទៅលើវិស័យជាច្រើន ដូចជាអប់រំ សុខាភិបាល ទឹកស្អាត សង្គមកិច្ច កសិកម្ម និងអភិវឌ្ឍន៍ជនបទ ជាដើម។

ប្រធានស្តីទីព្រឹទ្ធសភា សង្កត់ធ្ងន់ថា វត្តមានរបស់អង្គការក្រៅរដ្ឋាភិបាលកូរ៉េនៅកម្ពុជា ក៏ជាសក្ខីភាពបង្ហាញពីការរឹតចំណងមិត្តភាពកាន់តែល្អប្រសើររវាងកម្ពុជា និងកូរ៉េខាងត្បូង និងជាការរួមចំណែកយ៉ាងធំធេងក្នុងការអនុវត្តតាមយុទ្ធសាស្ត្របញ្ចកោណ របស់រាជរដ្ឋាភិបាល ជាពិសេសលើការអភិវឌ្ឍធនធានមនុស្ស។

ជាការកត់សម្គាល់ ក្រុមប្រឹក្សាអង្គការក្រៅរដ្ឋាភិបាលអភិវឌ្ឍន៍កូរ៉េ មានសមាជិកចំនួន ២៨អង្គការ បាននិងកំពុងធ្វើសកម្មភាពនៅទូទាំង១៥ខេត្តរបស់កម្ពុជា និងរាជធានីភ្នំពេញ ដោយអង្គការភាគច្រើនផ្តោតលើវិស័យអប់រំ សុខាភិបាល និងទឹកស្អាត។ បើតាមការគូសបញ្ជាក់ដោយលោក ចុង ហូលី (Jung-ho Lee) ប្រធានក្រុមប្រឹក្សាអង្គការក្រៅរដ្ឋាភិបាលអភិវឌ្ឍន៍កូរ៉េប្រចាំនៅកម្ពុជា អង្គការត្រូវចំណាយថវិកាប្រចាំឆ្នាំចំនួនជាង១២លានដុល្លារ ដែលទទួលបានពីជំនួយអភិវឌ្ឍន៍ផ្លូវការ (ODA) ទីភ្នាក់ងារកិច្ចសហប្រតិបត្តិការអន្តរជាតិកូរ៉េ (KOICA) មូលនិធិសកល និងប្រភពពីការរៃអង្គាសពីសប្បុរសជន។

ភាគីទាំងពីរ ក៏បានបង្ហាញឆន្ទៈយ៉ាងមុតមាំថា តាមរយៈកិច្ចសហប្រតិបត្តិការដ៏ល្អរវាងព្រឹទ្ធសភាកម្ពុជា និងស្ថានទូតកូរ៉េនៅកម្ពុជា នឹងបន្តរួមចំណែកដល់ការលើកកម្ពស់ជីវភាពរស់នៅរបស់ប្រជាពលរដ្ឋ និងការពង្រឹងចំណងមិត្តភាព សាមគ្គីភាព ក៏ដូចជាកិច្ចសហប្រតិបត្តិការលើគ្រប់វិស័យរវាងប្រទេសទាំងពីរឱ្យកាន់តែរីកចម្រើនជាលំដាប់ និងបានត្រៀមខ្លួនសហការជាមួយអង្គការក្រៅរដ្ឋាភិបាលកូរ៉េទាំងអស់នៅកម្ពុជា។

លោក គីម ចេងយុង (KIM Chang Yong) ឯកអគ្គរដ្ឋទូតកូរ៉េប្រចាំនៅកម្ពុជា បានសម្តែងនូវការកោតសរសើរចំពោះកិច្ចខិតខំប្រឹងប្រែងរបស់កម្ពុជាក្នុងការគាំទ្រដល់សកម្មភាពរបស់អង្គការក្រៅរដ្ឋាភិបាលកូរ៉េ និងបានបញ្ជាក់ពីការប្តេជ្ញាចិត្តក្នុងការបន្តពង្រឹងនូវទំនាក់ទំនងទ្វេភាគីឱ្យកាន់តែរឹងមាំបន្ថែមទៀត៕

The post ព្រឹទ្ធសភាពង្រឹងកិច្ចសហការជាមួយអង្គការក្រៅរដ្ឋាភិបាលរបស់កូរ៉េ ដើម្បីរួមចំណែកដល់ការអភិវឌ្ឍរបស់កម្ពុជា appeared first on Kampuchea Thmey Daily.

នៅចំពោះមុខអ្នកតំណាងមកពីបណ្តាប្រទេសផ្សេងៗ លោក​បានអំពាវនាវដូច្នេះថា«សូមឱ្យប្រទេសទាំងអស់គាំទ្រលើភាពត្រឹមត្រូវ យុត្តិធម៌ និងច្បាប់អន្តរជាតិ។ យើងត្រូវតែនិយាយជាសំឡេងតែមួយ ដោយមិនមែនគាំទ្រប្រទេសមួយប្រឆាំងនឹងប្រទេសមួយទៀតទេ ប៉ុន្តែត្រូវការពារសន្តិភាព អធិបតេយ្យភាព សុចរិតភាព និងនីតិរដ្ឋ ដែលចងភ្ជាប់សហគមន៍អន្តរជាតិជាមួយគ្នា»។

ជាជំហររបស់កម្ពុជា អនុប្រធានព្រឹទ្ធសភា បានគូសបញ្ជាក់ទៅកាន់អង្គវេទិកានេះថា ជម្លោះត្រូវតែដោះស្រាយតាមគោលការណ៍យុត្តិធម៌ ស្របតាមបទដ្ឋានអន្តរជាតិ ដោយកម្ពុជាអំពាវនាវអ្នកសម្របសម្រួល អ្នកជំនាញច្បាប់ និងស្ថាប័ននានាផ្តល់ការគាំទ្រដោយមិនលំអៀង។ លោក បញ្ជាក់ពីការស្វាគមន៍របស់កម្ពុជាចំពោះអ្នកសង្កេតការណ៍អន្តរជាតិ ក្នុងជម្លោះព្រំដែននេះ ដើម្បីបង្ហាញពីតម្លាភាព ការកសាងទំនុកចិត្ត និងពង្រឹងដំណោះស្រាយដោយសន្តិវិធី និងផ្អែកលើច្បាប់។

តាមសុន្ទរកថារបស់លោក ធន់ វឌ្ឍនា ដែលថ្លែងចេញពីវេទិកាអន្តរជាតិនេះកាលពីថ្ងៃទី១៥ ខែមិថុនា ឆ្នាំ២០២៦ ក៏បានអរគុណដល់ប្រជាជាតិទាំងអស់ដែលបន្តគាំទ្រសន្តិភាព ភាពត្រឹមត្រូវ យុត្តិធម៌ និងការគោរពច្បាប់អន្តរជាតិ។

«សូមឱ្យយើងជ្រើសរើសការសន្ទនា ជាជាងការប្រឈមមុខដាក់គ្នា និងការចរចា ជាជាងប្រើអំពើហិង្សា ពីព្រោះជម្លោះប្រដាប់អាវុធបំផ្លាញហេដ្ឋារចនាសម្ព័ន្ធរូបវន្ត ដូចជាផ្លូវថ្នល់ មន្ទីរពេទ្យ សាលារៀន និងផ្ទះសម្បែង ហើយបានឆក់យកជីវិតស្ត្រី និងកុមារ»។ សុន្ទរកថារបស់លោកបន្តយ៉ាងដូច្នេះ។

ជាការកត់សម្គាល់ មុននឹងមានសេចក្ដីអំពាវនាវខាងលើ អនុប្រធានព្រឹទ្ធសភាកម្ពុជារូបនេះ ក៏បានលាតត្រដាងពីសកម្មភាពឈ្លានពានរបស់កម្រោលរបស់យោធាថៃមកលើកម្ពុជា ម្ដងហើយម្ដងទៀត ដោយនៅចុងក្រោយនេះ ក្នុងឆ្នាំ២០២៥ ភាពតានតឹងបានវិលត្រឡប់មកវិញ បន្ទាប់ពីទាហានកម្ពុជាម្នាក់ត្រូវបានទាហានថៃបាញ់សម្លាប់។

នៅចំពោះមុខភាពតានតឹងយោធាឡើងវិញនេះ លោក បានរាយការណ៍ប្រាប់វេទិកាខាងលើថា កម្ពុជា តែងតែអំពាវនាវឱ្យមានការសន្ទនាតាមរយៈយន្តការទ្វេភាគីដែលមានស្រាប់ រួមទាំងគណៈកម្មការព្រំ ដែនរួម និងគណៈកម្មាធិការព្រំដែនទូទៅ ហើយកម្ពុជា ក៏នៅតែប្តេជ្ញាចិត្តយ៉ាងមុតមាំចំពោះដំណោះស្រាយដោយសន្តិវិធី តាមរយៈកិច្ចព្រមព្រៀងដែលមានស្រាប់ និងច្បាប់អន្តរជាតិ។

លោក សង្កត់ធ្ងន់ថា កម្ពុជាបន្តរង់ចាំការឆ្លើយតបពីភាគីថៃ លើការចរចាព្រំដែនគោក និងការកំណត់ព្រំដែន។ ទាក់ទងបញ្ហាសមុទ្រវិញ លោក ថា ថៃបានលុបចោលជាឯកតោភាគីនូវអនុស្សរណៈយោគយល់គ្នាឆ្នាំ២០០១ ទាក់ទងនឹងព្រំដែនសមុទ្រ។ ដូច្នេះកម្ពុជាក៏បានសម្រេចជ្រើសយកយន្តការអន្តរជាតិមួយ គឺតាមរយៈអនុសញ្ញាអង្គការសហប្រជាជាតិស្តីពីច្បាប់សមុទ្រ (UNCLOS)។ ប្រទេសទាំងពីរ កំពុងរៀបចំសម្រាប់ការផ្សះផ្សាជាកាតព្វកិច្ចនេះ៕

The post ពីវេទិកាក្នុងប្រទេសអាស៊ែបៃហ្សង់ អនុប្រធានសភាបន្តអំពាវនាវសហគមន៍អន្តរជាតិជួយតាមដានបញ្ហាព្រំដែនកម្ពុជា-ថៃ appeared first on Kampuchea Thmey Daily.

នៅក្នុងជំនួបដែលបានធ្វើឡើងកាលពីទី១៣ ខែមិថុនា ឆ្នាំ២០២៦ ថ្នាក់ដឹកនាំទាំងពីរ ក៏បានពិភាក្សាអំពីបញ្ហាជម្លោះដែលកំពុងកើតមានឡើងពាសពេញពិភពលោក រួមទាំងជម្លោះព្រំដែនកម្ពុជា-ថៃ ដែលទាមទារឱ្យមានការរួមគ្នាជំរុញការគោរពគ្នាទៅវិញទៅមក និងការគោរពតាមសន្និសញ្ញា និងច្បាប់អន្តរជាតិ។

ទាក់ទងនឹងជម្លោះកម្ពុជា-ថៃ លោក ធន់ វឌ្ឍនា បានរាយការណ៍ប្រាប់លោកស្រី Sahiba Gafarova ថា កម្ពុជាតែងតែខិតខំដោះស្រាយបញ្ហាព្រំដែនជាមួយប្រទេសថៃដោយសន្តិវិធី ផ្អែកទៅលើកិច្ចព្រមព្រៀងដែលមានស្រាប់ និងច្បាប់អន្តរជាតិ។

ជាការឆ្លើយតប លោកស្រី ប្រធានរដ្ឋសភាអាស៊ែបៃហ្សង់ បានសម្តែងការយល់ដឹងចំពោះបញ្ហាព្រំដែនកម្ពុជា-ថៃ និងគាំទ្រចំពោះកម្ពុជា ដែលបានជ្រើសរើសផ្លូវសន្តិវិធី និងតាមច្បាប់អន្តរជាតិ។

លោកស្រី Sahiba Gafarova ក៏បានកោតសរសើរសម្តេចតេជោ ហ៊ុន សែន ថា ជាមេដឹកនាំដែលមានភាពឈ្លាសវៃ និងមានការយល់ដឹងស៊ីជម្រៅលើជម្លោះដែនដី រួមទាំងជម្លោះរវាងអាស៊ែបៃហ្សង់ និងអាមេនីផងដែរ។

ក្នុងកិច្ចពិភាក្សានេះ ថ្នាក់ដឹកនាំទាំងពីរ ក៏បានឯកភាពគ្នាជំរុញ និងសម្របសម្រួលកិច្ចសហប្រតិបត្តិការលើវិស័យអប់រំ ទេសចរណ៍ និងពាណិជ្ជកម្មរវាងប្រទេសទាំងពីរ ជាពិសេសក្នុងវិស័យអប់រំ ភាគីទាំងពីរបានបង្ហាញការប្តេជ្ញាចិត្តខ្ពស់ក្នុងការជំរុញ និងសម្របសម្រួលបង្កើនការផ្លាស់ប្តូរមន្ត្រីសភា និងអាហារូបករណ៍សម្រាប់និស្សិតកម្ពុជា៕

The post ថ្នាក់ដឹកនាំសភាកម្ពុជា និងអាស៊ែបៃហ្សង់ បញ្ជាក់ពីការគាំទ្រគ្នាលើឆាកអន្តរជាតិ appeared first on Kampuchea Thmey Daily.

ក្នុងសុន្ទរកថារបស់លោក ធន់ វឌ្ឍនា បានគូសបញ្ជាក់ពីការគាំទ្រចំពោះការដោះស្រាយបញ្ហាដោយសន្តិវិធី តាមរយៈច្បាប់អន្តរជាតិ និងការសន្ទនា ជាជាងការប្រើកម្លាំងប្រដាប់អាវុធប្រឈមមុខដាក់គ្នា។

នៅចំពោះមុខមន្ត្រីជាន់ខ្ពស់ចិន និងឥស្សរជនអន្តរជាតិល្បីៗ លោកបានរាយការណ៍ពីស្ថានភាពនៃជម្លោះតាមបណ្ដោយព្រំដែនកម្ពុជា និងថៃ ជាពិសេសសកម្មភាពឈ្លានពានរបស់យោធាថៃ ក្នុងការដណ្តើមកម្មសិទ្ធលើប្រាសាទខ្មែរនៅតាមព្រំដែន ដែលមកដល់ពេលនេះ ថៃកំពុងកាន់កាប់ដោយខុសច្បាប់លើទឹកដី និងប្រាសាទបុរាណដែលជាកម្មសិទ្ធិស្របច្បាប់របស់កម្ពុជា។  

ខណៈបញ្ហានេះមិនទាន់ត្រូវបានដោះស្រាយរវាងភាគីទាំងពីរ លោកអនុប្រធានព្រឹទ្ធសភាកម្ពុជា សង្ឃឹមថា ជម្លោះនេះនឹងត្រូវដោះស្រាយដោយសន្តិវិធី តាមរយៈការសម្របសម្រួលពីភាគីទីបី ដោយតួយ៉ាងលោកបានលើកពីតួនាទីរបស់ចិន ក៏ដូចជាបណ្តាប្រទេសជាមិត្តដទៃផ្សេងទៀតក្នុងការចូលរួមសម្របសម្រួលក្នុងជម្លោះនេះ។

លោក ធន់ វឌ្ឍនា បានសង្កត់ធ្ងន់ដល់បណ្ដាប្រទេសទាំងអស់ដើរតួនាទីជាអ្នកការទូត ជាស្ពានមិត្តភាព និងផ្តល់សំឡេងគាំទ្រសម្រាប់ភាពត្រឹមត្រូវ យុត្តិធម៌ និងសន្តិភាពយូរអង្វែង៕

ដោយ៖ ធឿន វ៉ាន់សុង

The post ពីវេទិកាប្រទេសចិន អនុប្រធានព្រឹទ្ធសភាកម្ពុជា រំពឹងលើភាគីចិនថាអាចជួយបញ្ចប់ជម្លោះព្រំដែនកម្ពុជា-ថៃ appeared first on Kampuchea Thmey Daily.