ព្រឹទ្ធសភាពង្រឹងកិច្ចសហការជាមួយអង្គការក្រៅរដ្ឋាភិបាលរបស់កូរ៉េ ដើម្បីរួមចំណែកដល់ការអភិវឌ្ឍរបស់កម្ពុជា

លោក អ៊ុច បូររិទ្ធ ប្រធានស្តីទីព្រឹទ្ធសភានៃកម្ពុជា កាលពីថ្ងៃទី១៩ ខែមិថុនា ឆ្នាំ២០២៦បានទទួលជួបក្រុមអង្គការក្រៅរដ្ឋាភិបាលរបស់កូរ៉េខាងត្បូង ដឹកនាំដោយលោក គីម ចេងយុង ឯកអគ្គរដ្ឋទូតកូរ៉េប្រចាំកម្ពុជា និងលោក ចុង ហូលី ប្រធានក្រុមប្រឹក្សាអង្គការក្រៅរដ្ឋាភិបាលអភិវឌ្ឍន៍កូរ៉េ។ ក្នុងជំនួបនោះ ភាគីទាំងពីរ បានបញ្ជាក់ពីការប្ដេជ្ញាចិត្តរួមគ្នារវាងព្រឹទ្ធសភាកម្ពុជា និងអង្គការក្រៅរដ្ឋាភិបាលរបស់កូរ៉េ ដើម្បីរួមចំណែកជួយដល់ការអភិវឌ្ឍកម្ពុជា។

លោក អ៊ុច បូររិទ្ធ បានលើកឡើងពីភាពរីកចម្រើនយ៉ាងឆាប់រហ័សលើគ្រប់វិស័យក្នុងទំនាក់ទំនង និងកិច្ចសហប្រតិបត្តិការដ៏ល្អរវាងកម្ពុជា និងកូរ៉េខាងត្បូង។ តួយ៉ាង លោក បានគូសបញ្ជាក់អំពីតួនាទីដ៏សំខាន់របស់អង្គការក្រៅរដ្ឋាភិបាលកូរ៉េ ដែលបាននិងកំពុងប្រតិបត្តិការយ៉ាងសកម្មនៅកម្ពុជាទៅលើវិស័យជាច្រើន ដូចជាអប់រំ សុខាភិបាល ទឹកស្អាត សង្គមកិច្ច កសិកម្ម និងអភិវឌ្ឍន៍ជនបទ ជាដើម។

ប្រធានស្តីទីព្រឹទ្ធសភា សង្កត់ធ្ងន់ថា វត្តមានរបស់អង្គការក្រៅរដ្ឋាភិបាលកូរ៉េនៅកម្ពុជា ក៏ជាសក្ខីភាពបង្ហាញពីការរឹតចំណងមិត្តភាពកាន់តែល្អប្រសើររវាងកម្ពុជា និងកូរ៉េខាងត្បូង និងជាការរួមចំណែកយ៉ាងធំធេងក្នុងការអនុវត្តតាមយុទ្ធសាស្ត្របញ្ចកោណ របស់រាជរដ្ឋាភិបាល ជាពិសេសលើការអភិវឌ្ឍធនធានមនុស្ស។

ជាការកត់សម្គាល់ ក្រុមប្រឹក្សាអង្គការក្រៅរដ្ឋាភិបាលអភិវឌ្ឍន៍កូរ៉េ មានសមាជិកចំនួន ២៨អង្គការ បាននិងកំពុងធ្វើសកម្មភាពនៅទូទាំង១៥ខេត្តរបស់កម្ពុជា និងរាជធានីភ្នំពេញ ដោយអង្គការភាគច្រើនផ្តោតលើវិស័យអប់រំ សុខាភិបាល និងទឹកស្អាត។ បើតាមការគូសបញ្ជាក់ដោយលោក ចុង ហូលី (Jung-ho Lee) ប្រធានក្រុមប្រឹក្សាអង្គការក្រៅរដ្ឋាភិបាលអភិវឌ្ឍន៍កូរ៉េប្រចាំនៅកម្ពុជា អង្គការត្រូវចំណាយថវិកាប្រចាំឆ្នាំចំនួនជាង១២លានដុល្លារ ដែលទទួលបានពីជំនួយអភិវឌ្ឍន៍ផ្លូវការ (ODA) ទីភ្នាក់ងារកិច្ចសហប្រតិបត្តិការអន្តរជាតិកូរ៉េ (KOICA) មូលនិធិសកល និងប្រភពពីការរៃអង្គាសពីសប្បុរសជន។

ភាគីទាំងពីរ ក៏បានបង្ហាញឆន្ទៈយ៉ាងមុតមាំថា តាមរយៈកិច្ចសហប្រតិបត្តិការដ៏ល្អរវាងព្រឹទ្ធសភាកម្ពុជា និងស្ថានទូតកូរ៉េនៅកម្ពុជា នឹងបន្តរួមចំណែកដល់ការលើកកម្ពស់ជីវភាពរស់នៅរបស់ប្រជាពលរដ្ឋ និងការពង្រឹងចំណងមិត្តភាព សាមគ្គីភាព ក៏ដូចជាកិច្ចសហប្រតិបត្តិការលើគ្រប់វិស័យរវាងប្រទេសទាំងពីរឱ្យកាន់តែរីកចម្រើនជាលំដាប់ និងបានត្រៀមខ្លួនសហការជាមួយអង្គការក្រៅរដ្ឋាភិបាលកូរ៉េទាំងអស់នៅកម្ពុជា។

លោក គីម ចេងយុង (KIM Chang Yong) ឯកអគ្គរដ្ឋទូតកូរ៉េប្រចាំនៅកម្ពុជា បានសម្តែងនូវការកោតសរសើរចំពោះកិច្ចខិតខំប្រឹងប្រែងរបស់កម្ពុជាក្នុងការគាំទ្រដល់សកម្មភាពរបស់អង្គការក្រៅរដ្ឋាភិបាលកូរ៉េ និងបានបញ្ជាក់ពីការប្តេជ្ញាចិត្តក្នុងការបន្តពង្រឹងនូវទំនាក់ទំនងទ្វេភាគីឱ្យកាន់តែរឹងមាំបន្ថែមទៀត៕