ការលើកឡើងរបស់ប្រមុខរដ្ឋស្តីទីកម្ពុជា បានធ្វើឡើងក្នុងឱកាសអញ្ជើញជួបសំណេះសំណាលជាមួយក្រុមប្រឹក្សាខេត្ត ក្រុង ស្រុក ឃុំ សង្កាត់ និងថ្នាក់ដឹកនាំមន្ទីរ-អង្គភាពនានានៃខេត្តតាកែវ នាថ្ងៃទី៧ ខែឧសភា ឆ្នាំ២០២៦។ នៅចំពោះមុខមន្រ្តីរាប់រយនាក់ សម្តេចតេជោ បានណែនាំជាថ្មីដល់មន្ត្រីទាំងអស់ត្រូវបន្តរក្សានូវស្ថិរភាពជាតិ និងយកចិត្តទុកដាក់រក្សាសន្តិសុខសណ្ដាប់ធ្នាប់សង្គម ដោយបន្តអនុវត្តគោលនយោបាយភូមិ ឃុំ មានសុវត្ថិភាព រួមមាន ការបង្ក្រាបនូវបទល្មើសផ្សេងៗ ដូចជា ចោរឆក់ ចោរប្លន់ ការជួញដូរគ្រឿងញៀន។

សម្ដេចតេជោ ក៏បានក្រើនរំឭកដល់មន្ត្រីទាំងអស់ថា៖« ចៀសវាងភាពអសកម្ម ឬការគាបសង្កត់ណាមួយ និងត្រូវចាំថា «មន្ត្រីមិនមែនជាចៅហ្វាយរបស់ប្រជាជននោះទេ គឺជាអ្នកបម្រើដ៏ស្មោះត្រង់របស់ប្រជាជន» និងបម្រើប្រជាជនប្រកប​ដោយភាពស្មោះត្រង់»។ទន្ទឹមនេះ សម្ដេចតេជោ ក៏តម្រង់ទិសឱ្យអាជ្ញាធរត្រូវយកចិត្តទុកដាក់ដោះស្រាយជម្លោះដីធ្លីជូនប្រជាពលរដ្ឋឱ្យបានរហ័ស និងមានប្រសិទ្ធភាព ជាពិសេសការដោះស្រាយក្រៅប្រព័ន្ធតុលាការ ដោយមិនត្រូវលម្អៀងខាងភាគីណានោះទេ។

ក្នុងឆ្នាំ២០២៥ បទល្មើសព្រហ្មទណ្ឌគ្រប់ប្រភេទ បានថយចុះ១៧% បើប្រៀបធៀបនឹងឆ្នាំ២០២៤ ដែលជាលទ្ធផលសម្រេចបានខ្ពស់រហូតដល់ ៩៦%។ លទ្ធផលដែលសមត្ថកិច្ចបង្ក្រាបបាននោះ រួមមាន បទល្មើសគ្រឿងញៀន អំពើជួញដូរមនុស្ស ជួញដូរពលកម្ម អាជីវកម្មផ្លូវភេទ ល្បែងស៊ីសងខុសច្បាប់គ្រប់ប្រភេទ ករណីក្មេងទំនើង ព្រមទាំងអំពើឆបោកតាមប្រព័ន្ធបច្ចេកវិទ្យា។ នេះបើតាមការអះអាងរដ្ឋមន្រ្តីក្រសួងមហាផ្ទៃ លោក ស សុខា នៅក្នុងពិធីបិទសន្និបាតប្រចាំឆ្នាំរបស់ក្រសួងមហាផ្ទៃ កាលពី ខែកុម្ភៈ ឆ្នាំ២០២៦។

គួរជម្រាបថា គោលដៅនៃការចុះជួបសំណេះសំណាលជាមួយមន្ត្រីរាជការរបស់សម្តេចតេជោនាពេលនេះ គឺជាការអនុវត្ត ក៏ដូចជាពង្រឹងគណនេយ្យភាពរវាងព្រឹទ្ធសភាជាមួយអង្គបោះឆ្នោត ដើម្បីឱ្យមានតម្លាភាព ក៏ដូចជាជំរុញឱ្យការងារមូលដ្ឋានកាន់តែមានប្រសិទ្ធភាព។ ម្យ៉ាងវិញទៀតក៏ដើម្បីផ្សារភ្ជាប់ទំនាក់ទំនងឱ្យកាន់តែជិតស្និទ្ធជាមួយអាជ្ញាធរមូលដ្ឋាន និងធ្វើការក្រើនរំឭកដល់មន្ត្រីនៅមូលដ្ឋានឱ្យបង្កើនការយកចិត្តទុកដាក់លើភារកិច្ចរបស់ខ្លួន និងការផ្តល់សេវាសាធារណៈជូនប្រជាពលរដ្ឋឱ្យបានល្អប្រសើរ។

តាកែវ គឺជាខេត្តទី៤ហើយ ដែលសម្ដេចតេជោ ហ៊ុន សែន បានកំណត់ជាគោលដៅក្នុងការចុះជួបមន្ត្រីរាជការតាមបណ្ដាខេត្តនានា បន្ទាប់ពីខេត្តកំពង់ចាម ត្បូងឃ្មុំ និងកំពង់ស្ពឺ និងកំពុងឆ្ពោះទៅបណ្ដាខេត្តផ្សេងៗទៀត៕

The post សម្តេចតេជោ ក្រើនរំឭកជាថ្មីឱ្យបង្ក្រាបបទល្មើសចោរឆក់ ប្លន់ និងគ្រឿងញៀនក្នុងមូលដ្ឋាន appeared first on Kampuchea Thmey Daily.

ការជំរុញនេះធ្វើឡើង ក្នុងឱកាសចូលរួមកិច្ចប្រជុំបូកសរុបលទ្ធផលការងារអនុវត្តគោលនយោបាយ ភូមិ ឃុំ សង្កាត់មានសុវត្តិភាព ប្រចាំឆ្នាំ២០២៥ និងលើកទិសដៅការងារអនុវត្តបន្តឆ្នាំ២០២៦ របស់រដ្ឋបាលខេត្តខេត្តសៀមរាប នាសណ្ឋាគារសុខាល័យអង្គរនា នៅព្រឹកថ្ងៃទី៣០ ខែធ្នូ ឆ្នាំ២០២៥។ កិច្ចប្រជុំនេះ មានការចូលរួមពី លោក លី សំរិទ្ធ ប្រធានក្រុមប្រឹក្សាខេត្ត លោក សំកុល សុចិត្រា អភិបាលរងខេត្ត និង លោក លោកស្រីមកពីគ្រប់ស្ថាប័ន អង្គភាពប្រតិបត្តិ និងគណៈបញ្ជាការឯកភាពរដ្ឋបាលក្រុង ស្រុក មេឃុំ ចៅសង្កាត់ អធិការនគរបាលក្រុង ស្រុក មេប៉ុស្តិ៍នគរបាលរដ្ឋបាល ប្រមាណជា ៣០០នាក់។

លោក សួស អង្គារ៍ បានផ្តោតសំខាន់ ទៅលើបញ្ហាចរាចរណ៍ ដែលជាកត្តាចំបងនៅខេត្តសៀមរាប ជាឃាតករបំបាំងមុខ ដែលបង្កឡើងដោយកត្តាមនុស្ស និងសម្ភារៈ បានបង្កធ្វើឱ្យមានជនពិការ បន្សល់ទុកសោទនាកម្មដល់ក្រុមគ្រួសារ។ ក្នុងនោះលោកក៏បានលើកឡើង ពីវេទិកាសាធារណៈ គឺជាយន្តការបញ្ជ្រៀបគោលនយោបាយ របស់រាជរដ្ឋាភិបាល  ក្នុងការស្តាប់នូវរាល់សំណូមពរ និងបញ្ហាប្រឈមរបស់ប្រជាពលរដ្ឋ និងផ្សព្វផ្សាយពីព័ត៌មានពិត ឬមិនពិតជូនប្រជាពលរដ្ឋ សំខាន់ក្នុងពេលកំពុងជួបបញ្ហាពីសង្គ្រាមឈ្លានពានរបស់ប្រទេសថៃ។

មន្ត្រីជាន់ខ្ពស់រូបនេះ បានប្រាប់ឱ្យអាជ្ញាធរក្រុង ស្រុក ឃុំសង្កាត់ ត្រូវធ្វើការផ្សព្វផ្សាយដល់ប្រជាការពារភូមិ ឱ្យពួកគាត់ស្គាល់នូវពីតួនាទីរបស់ខ្លួន និងធ្វើការផ្សព្វផ្សាយពីគោលនយោបាយភូមិ ឃុំសង្កាត់មានសុវត្ថិភាពនៅតាម មណ្ឌលជនភៀសសឹក ហើយឃុំ សង្កាត់សហការឱ្យបានល្អជាមួយនគរបាលប៉ុស្តិ៍ និងសហការជាមួយជំនាញ រកមុខសញ្ញាដែលលាក់ខ្លួនក្នុងពេលប្រជាពលរដ្ឋភៀសសឹក ព្រមទាំងសហការក្នុងការធ្វើរដ្ឋបាលបើកចំហរ និងបង្ក្រាបក្មេងទំនើង គ្រឿងញៀន ល្បែងស៊ីសង់ និង ធ្វើការផ្សព្វផ្សាយទៅតាមគ្រឹះស្ថាន វិស័យឯកជន និង ក្រុមហ៊ុន សហគ្រាស។

ជាមួយគ្នានេះ លោកបានជំរុញដល់រដ្ឋបាលខេត្ត ត្រូវបន្តពង្រឹងការងារគណៈបញ្ហាការឯកភាពរដ្ឋបាលខេត្ត ឱ្យបានរឹងមាំ ក្តាប់ឱ្យបាននូវរាល់សភាពការណ៍នានា ដែលកើតមានតាមក្រុង-ស្រុក ឃុំសង្កាត់ ក្នុងដែនសមត្ថកិច្ចខ្លួន ក្នុងពេលដែលមានបងប្អូនភៀសសឹក ចេញពីតំបន់សង្គ្រាមឈ្លានពាន តាមបណ្តោយព្រំដែនកម្ពុជា-ថៃ ដើម្បីធ្វើការដោះស្រាយឆ្លើយតបបានទាន់ពេលវេលា និងក្នុងនោះត្រូវចុះផ្សព្វផ្សាយផ្ទាល់តាមខ្នងផ្ទះ ប្រជាពលដ្ឋ អំពីគោលនយោបាយ ភូមិឃុំ មានសុវត្ថិភាព ដើម្បីស្តាប់កង្វល់ និង សំណូមពរនានាពីប្រជាពលដ្ឋ ដើម្បីរួមគ្នាដោះស្រាយ។

ចំណែក លោក សំកុល សុចិត្រា បានលើកឡើងថា «ស្របនឹងស្ថានភាព នៃសុខសន្តិភាព និង ស្ថិរភាពនយោបាយ ដែលប្រទេសជាតិ មាននាពេលបច្ចុប្បន្ន កត្តាសន្តិសុខ សុវត្ថិភាព និងសណ្ដាប់ធ្នាប់សង្គម គឺជាបុរេលក្ខខណ្ឌ ដ៏ចាំបាច់ និង អាទិភាពបំផុត ដែលទាមទារឱ្យយើងត្រូវរួមគ្នាធានាឱ្យបាននូវ កត្តាសុខសន្តិភាព ស្ថិរភាព នយោបាយ និងសន្ដិសុខសណ្ដាប់ធ្នាប់សង្គមនេះ គឺជាមូលដ្ឋានគ្រឹះសម្រាប់ការអភិវឌ្ឍ ប្រទេសជាតិ»។ លោកថា កត្តាដែលសំខាន់ ខេត្តសៀមរាប ជាគោលដៅរបស់ភ្ញៀវទេសចរណ៍ជាតិ អន្តរជាតិ ចូលមកទស្សនាកម្សាន្ត ហើយបានកំពុងទទួលបងប្អូនភៀសសឹក មកស្នាក់នៅបណ្តោះអាសន្នតាមមណ្ឌលសុវត្ថិភាព។ 

យោងតាមរបាយការណ៍របស់ស្នងការដ្ឋាននគរបាលខេត្ត បានគូសបញ្ជាក់ពីលទ្ធផលនៃការអនុវត្តគោលនយោ បាយភូមិ ឃុំសង្កាត់មានសមត្ថភាព ធ្វើបានចំនួន ៩ពាន់៤៩០លើក មានប្រជាពលរដ្ឋចូលរួម ៧៧៨ពាន់១៨នាក់ និង ការ ងារវេទិកាសាធារណៈ បានចំនួន៨ពាន់៥៦៦លើក មានប្រជាពលរដ្ឋចូលរួម ៣១៨ពាន់ ១៥០នាក់។ បានចងក្រង ប្រជាការពារ បាន ១២ពាន់៦០នាក់ ស្មើ ១ពាន់២០៦ក្រុម និង ការងារផ្តល់សៀវភៅគ្រួសារ និងស្នាក់នៅទូទាំងខេត្ត មានចំនួន ២៧៧ពាន់៦១៤គ្រួសារ មានមនុស្ស ១លាន១៨២ពាន់៥៤៩នាក់ ចាប់ពីអាយុ១៨ឡើងមាន ៨៣១ពាន់៥២៨នាក់ និងប្រជាពលរដ្ឋស្នាក់នៅបណ្តោះអាសន្ន ចំនួន ២៧ពាន់៤៩០នាក់ ៕

ដោយ៖ គឿន វេត

The post មន្ត្រីជាន់ខ្ពស់ក្រសួងមហាផ្ទៃ ជំរុញការផ្សព្វផ្សាយគោលនយោបាយភូមិ ឃុំ សង្កាត់មានសុវត្ថិភាព នៅខេត្តសៀមរាប appeared first on Kampuchea Thmey Daily.

ការចុះផ្សព្វផ្សាយនេះបានធើ្វឡើងនៅថ្ងៃទី ១៣ ខែមីនា ឆ្នាំ ២០២៥ ដឹកនាំដោយលោកវរសេនីយ៍ត្រី តូ បុណ្យនុរាជ្យ អធិការរងខណ្ឌចំការមន សហការជាមួយគណៈបញ្ជាការឯកភាពខណ្ឌ និងសង្កាត់ ចុះធ្វើវេទិកាសាធារណៈ និងផ្សព្វផ្សាយពីគោលនយោបាយភូមិ-សង្កាត់ មានសុវត្ថិភាព (ផលប៉ះពាល់ នៃការប្រើប្រាស់សារធាតុញៀន និងបញ្ហាក្មេងទំនើង) ដល់ប្រជាពលរដ្ឋ។

លោកអធិការរងខណ្ឌចំការមនទទួលផែនការងារព្រហ្មទណ្ឌ បានឲ្យដឹងថា ការអប់រំ ផ្សព្វផ្សាយផលប៉ះពាល់ គ្រឿងញៀន បញ្ហាក្មេងទំនើង និង បញ្ហាចរាចរណ៍ គឺជាកាតព្វរបស់អាជ្ញាធរ ត្រូវតែចុះផ្សព្វផ្សាយទៅកាន់មនុស្សគ្រប់មជ្ឈដ្ឋាន ដែលជាកត្តាចម្បងមួយផ្នែកធំ ដើម្បីបញ្ជ្រាបអំពីផលប៉ះពាល់ទៅកាន់ពលរដ្ឋដែលជាមូលដ្ឋានគ្រឹះមួយសម្រាប់បន្តផ្សព្វផ្សាយដល់អ្នកដទៃទៀត ដើម្បីកាត់បន្ថយបញ្ហាសង្គមបានកាន់តែប្រសើរ។

ចុងក្រោយ លោកសំណូមពរទៅកាន់ពលរដ្ឋដែលជាអាណាព្យាបាល ត្រូវត្រួតពិនិត្យការសិក្សារបស់កូនៗ ឲ្យបានជាប់ និងទូន្មានជៀសឲ្យឆ្ងាយពីគ្រឿងញៀន ដើម្បីក្លាយជាកូនល្អ សម្រាប់គ្រួសារ និង ក្លាយជាយុវជនគំរូរបស់សង្គម ហើយប្រសិនបើមានបញ្ហាអ្វីមួយនៅក្នុងមូលដ្ឋាន ត្រូវប្រញាប់រាយការណ៍ជូនអាជ្ញាធរ ដើម្បីអាជ្ញាធរមានសមត្ថកិច្ចចុះអន្តរាគមន៍ទាន់ពេលវេលា៕

ដោយ ៖ ម៉េង

The post នគរបាលខណ្ឌចំការមន បន្តផ្សព្វផ្សាយផលប៉ះពាល់គ្រឿងញៀន ការប្រើប្រាស់បារីអេឡិចត្រូនិក បញ្ហាក្មេងទំនើង appeared first on Kampuchea Thmey Daily.

ការណែនាំនេះធ្វើឡើងនាឱកាស សម្តេចតេជោ អញ្ជើញជួបសំណេះសំណាលជាមួយសមាជិកក្រុមប្រឹក្សា ខេត្តព្រះវិហារ កាលពីថ្ងៃទី ២៧​ខែមិថុនា ឆ្នាំ ២០២៥។​ សម្តេចតេជោ ថ្លែងថា៖« ខ្ញុំផ្តាំផ្ញើទៅសមាជិកក្រុមប្រឹក្សាឃុំ សង្កាត់ ធ្វើកិច្ចការឱ្យល្អ បម្រើប្រជាជនឱ្យបានល្អ​ ជាពិសេស អនុវត្តនយោបាយភូមិឃុំ មានសុវត្ថិភាព។ បញ្ហាចោរកម្ម លួច ប្លន់ គ្រឿងញៀន ក្មេងទំនើង ល្បែងស៊ីសង ត្រូវមើលរឿងនេះ»។

សម្តេចតេជោ បញ្ជាក់ថា កន្លងមកប្រមុខរាជរដ្ឋាភិបាលកម្ពុជា​ សម្តេចធិបតី ហ៊ុន ម៉ាណែត បានណែនាំជារឿយៗជុំវិញបញ្ហានេះ ប៉ុន្តែក្នុងនាមប្រធានព្រឹទ្ធសភា និងជាប្រធានគណបក្សប្រជាជនកម្ពុជា គ្រាន់តែសូមរំឭកបន្ថែម​ដើម្បីបម្រើប្រជាជន។

ការក្រើនរំឭកជាថ្មីនេះ ដោយសង្កេតឃើញថា មន្រ្តីមួយចំនួនបានខិតខំបំពេញភារកិច្ច ​និងបម្រើប្រជាពលរដ្ឋ តាមរយៈផ្តល់សេវាសាធារណៈ ឬការអនុត្តគោលនយោបាយ ភូមិ ឃុំ មានសុវត្ថិភាព បានល្អប្រសើរហើយ ប៉ុន្តែបញ្ហាទាំងនោះមួយចំនួននៅបន្តកើតមាន មិនថាសេវាសាធារណៈ ឬករណីចោរ លួចប្លន់ គ្រឿងញៀននោះទេ។

គួរជម្រាបថា ពាក់ព័ន្ធការអនុវត្តគោលនយោបាយភូមិឃុំ មានសុវត្ថិភាពនេះ ត្រូវបានសិក្សាកាលពីឆ្នាំ ២០១០ ដោយដំបូងឡើយ សម្តេចក្រឡាហោម ស ខេង អតីតរដ្ឋមន្រ្តីក្រសួងមហាផ្ទៃ បានលើកយកបញ្ហានេះនៅក្នុងក្របខណ្ឌក្រសួងមហាផ្ទៃប៉ុណ្ណោះ។ ប៉ុន្តែដោយសង្កេតឃើញអត្ថប្រយោជន៍ កម្មវិធីភូមិ ឃុំ មានសុវត្ថិភាព ត្រូវបានពង្រីកទៅជាកម្មវិធីនយោបាយរបស់រាជរដ្ឋាភិបាល របស់គណបក្ស ហើយបន្តវេនដល់រដ្ឋាភិបាលជំនាន់បន្តវេននេះ ដែលកិច្ចការនេះ មានសារៈសំខាន់ខ្លាំងណាស់ជាមួយនឹងការធានានូវស្ថិរភាពក្នុង ភូមិ ឃុំ សុវត្ថិភាព៕

The post សម្តេចតេជោ ក្រើនរំឭកជាថ្មីដល់សមាជិកក្រុមប្រឹក្សាឃុំសង្កាត់ បម្រើប្រជាជនឱ្យបានល្អ appeared first on Kampuchea Thmey Daily.

ហើយយក​អត្តសញ្ញាណប័ណ្ណ​សញ្ជាតិខ្មែរ សៀវភៅ​គ្រួសារ សៀវភៅ​ស្នាក់​នៅ ទៅ​ចែក​ជូន​ដល់ប្រជាពលរដ្ឋនៅតាមបណ្តាខ្នងផ្ទះ។

ការ​ចុះផ្សព្វផ្សាយ​នេះ​ធ្វើ​ឡើង​ក្នុង​ឱកាស​ដែល​ពិធីបុណ្យ​ចូលឆ្នាំខ្មែរ ប្រពៃណីជាតិ​ខិត​ជិត​មក​ដល់​ និង​យោង​តាម​ផែនការ​យ៉ាង​ម៉ឺងម៉ាត់​ពី​សំណាក់​លោក​ឧត្តមសេនីយ៍ទោ សិទ្ធិ ឡោះ ស្នងការ​នគរបាលខេត្តបន្ទាយមានជ័យ បាន​ដាក់​ចេញ​ដល់​កង​កម្លាំងនគរបាល តាម​បណ្តាអធិការដ្ឋាននគរបាលក្រុង-ស្រុក ទាំងអស់ ត្រូវ​បង្កើនការយកចិត្តទុកដាក់ ចាត់​តាំង​កម្លាំង​ប្រចាំ​ការ យាមល្បាត ២៤ម៉ោង ត្រៀម បង្ការ ទប់ស្កាត់ បង្ក្រាបបទល្មើសគ្រប់ប្រភេទ ពិសេសក្មេងទំនើង អនុវត្តវិធានការច្បាប់ដោយគ្មានការយោគយល់៕

ដោយ ៖ អពៅ

The post នគរបាល​ខេត្តបន្ទាយមានជ័យ ចុះ​អប់រំ​ផ្សព្វផ្សាយ​ពលរដ្ឋ​តាម​មូលដ្ឋាន ដើម្បី​ទប់ស្កាត់​អគ្គិភ័យ​នារដូវក្តៅ appeared first on Kampuchea Thmey Daily.

ការ​លើកឡើងរបស់លោក ឃួង ស្រេង បានធ្វើឡើងនារសៀលថ្ងៃទី២៤តុលានេះ ក្នុងកិច្ចប្រជុំ ផ្សព្វផ្សាយផែនការយុទ្ធសាស្ត្រស្តីពីការអនុវត្តគោលនយោបាយ “ភូមិ-ឃុំ-សង្កាត់មានសុវត្ថិភាព” របស់ក្រសួងមហាផ្ទៃ ឆ្នាំ២០២៤-២០២៨ នៅរាជធានីភ្នំពេញ ក្រោមអធិបតីភាព លោក សន្តិបណ្ឌិត ខៀវ សុភ័គ រដ្ឋលេខាធិការ ក្រសួងមហាផ្ទៃ និងជាប្រធានក្រុមការងារទី១និង​លោក ឃួង ស្រេង អភិបាល នៃគណៈអភិបាលរាជធានីភ្នំពេញ ដោយ​មានការចូលរួម​ពី​អាជ្ញាធរ​ខណ្ឌទាំង១៤ និង​កងកម្លាំងប្រដាប់អាវុធចំណុះ​ឱ្យ​គណៈបញ្ជាការឯកភាពរាជធានីភ្នំពេញ នៅសាលារាជធានីភ្នំពេញ។

លោកឃួង ស្រេង បាន​មាន​ប្រសាសន៍​លើក​ឡើង​ទៀត​ថា រដ្ឋបាល​រាជធានីភ្នំពេញ បាន​ខិត​ខំ​ប្រឹងប្រែង​បំពេញ តួនាទី​ភារកិច្ច​របស់ខ្លួន ក្នុង​ការ​រួម​ចំណែក​ថែរក្សា ស្ថេរភាពនយោបាយ សន្តិសុខ សណ្តាប់ធ្នាប់សាធារណៈ ប្រកបដោយស្មារតីទទួលខុសត្រូវខ្ពស់ ព្រម​ទាំង​បាន​ចាត់​តាំង​អនុវត្ត​យ៉ាងម៉ឹងម៉ាត់នូវគោលនយោបាយ ភូមិ-ឃុំ-សង្កាត់​មាន​សុវត្ថិភាព តាម​គោលការណ៍​ណែនាំរបស់ក្រសួងមហាផ្ទៃ ដោយ​រក្សា​បាន​នូវសន្តិសុខ សណ្តាប់ធ្នាប់​សាធារណៈ​បាន​យ៉ាង​ល្អ​ប្រសើរ ទប់ស្កាត់​បាន​ទាំងស្រុងនូវបដិវត្តពណ៌ ធានាប្រតីភាពសង្គម ជីវភាព​សង្គម​លើ​គ្រប់វិស័យ រក្សាប្រក្រតីភាពមីក្រូសេដ្ឋកិច្ច បង្កើនជំនឿទុកចិត្ត ដល់​អ្នក​វិនិយោគគិន ពានិជ្ជករ ភ្ញៀវទេសចរណ៍និងប្រជាពលរដ្ឋរស់នៅដោយភាពសុខដុមរមនា។

លោក ឃួង ស្រេង បាន​បន្ត​ថា ក្នុងឆមាសទី១ឆ្នាំ២០២៤នេះ រដ្ឋបាលរាជធានីភ្នំពេញ បានបន្តរក្សា​បាន​នៅ​សន្តិសុខ សណ្តាប់​ធ្នាប់​សាធារណៈ​បាន​យ៉ាង​ល្អ​ប្រសើរជូនប្រជាពលរដ្ឋនិងសង្គមជាតិ ដោយចំនួនបទល្មើសបានកើតឡើងចំនួន២៤៩លើក/២៦៤ករណី ថយចុះ១៥ករណី។ក្នុងនោះ គណៈបញ្ជាការឯកភាពរាជធានីភ្នំពេញ បានម្ចាស់ការ បង្ក្រាបបទល្មើសបានសរុប២៣១ករណី ពិសេសថែមទៀតនោះ គណៈ​បញ្ជាការឯកភាពរាជធានីភ្នំពេញបានចូលរួមទប់ស្កាត់ ព្រឹត្តការណ៍ថ្ងៃទី១៨សីហាឆ្នាំ២០២៤ថ្មីៗនេះ ដោយក្រុមជ្រុលនិយមមួយក្តាប់តូច បានព្យាយាមនិងប៉ុនប៉ង បង្វែល​ពី​ការធ្វើបាតុកម្មនៅរាជធានីភ្នំពេញទៅជាការបំផុសចលនា ចង់ផ្តួល​រំលំ​រាជរដ្ឋាភិបាលស្របច្បាប់។

យើង​បាន​រួម​គ្នា​ចាត់​វិធានការ​ទៅ​តាម​ផ្លូវច្បាប់បានទាន់ពេលវេលា។ ទោះបី​យើង​អនុវត្ត​បាន​ជោគជ័យ​ដូចខាងលើក្តី យើងក៏នៅមានចំណុចខ្វះខាត សេសសល់ ដែលយើងត្រូវរួមគ្នាជំនៈ ដោះស្រាយ​តាមរយៈ​ការប្រើប្រាស់កម្លាំងសរុប មធ្យោបាយ​សរុប ដើម្បីដោះស្រាយបញ្ហាប្រឈមទាំងនេះប្រកបទៅដោយប្រសិទ្ធភាព ស្របទៅតាមគោលការណ៍រដ្ឋបាលឯកភាព ដើម្បី​ឈាន​ទៅ​ការ​អភិវឌ្ឍ​តាម​បែប​ប្រជាធិបតេយ្យនៅ​ថ្នាក់ក្រោមជាតិយ៉ាងពិតប្រាកដ។

លោក សន្តិបណ្ឌិត ខៀវ សុភ័គ បាន​មាន​ប្រសាសន៍​លើក​ឡើងដែរ​ថា​ ការ​ផ្សព្វផ្សាយ​ផែនការ​យុទ្ធសាស្ត្រស្តីពីការអនុវត្តគោលនយោបាយ “ភូមិ-ឃុំ-សង្កាត់​មាន​សុវត្ថិភាព” របស់ក្រសួងមហាផ្ទៃ ឆ្នាំ២០២៤-២០២៨នេះ ធ្វើឡើង ខណៈ​ដែល​ការ​ងារ​នេះ​រដ្ឋបាលស៊ីវិល​និង​កងកម្លាំងប្រដាប់អាវុធគ្រប់ប្រភេទបាន និង​កំពុងអនុវត្តការងារនេះបានយ៉ាងល្អ១០០%នៅភ្នំពេញ។គោលនយោបាយអ្វីក៏ដោយ បើមិនមានការចូលរួមពីប្រជាពលរដ្ឋទេ គឺមិនទទួលបានជោគជ័យឡើយ។

លោក​សន្តិបណ្ឌិត បញ្ជាក់​ថា សន្តិសុខសំខាន់ណាស់ កងកម្លាំង អាជ្ញាធរពាក់ព័ន្ធទាំងអស់ត្រូវចាំថា “ប្រហែសបាត់ ប្រយ័ត្នគង់”។សំរាប់រាជធានីភ្នំពេញ ក្រោមការដឹកនាំរបស់លោកឃួង ស្រេង តែង​ក្រើន​រំលឹក​ជា​និច្ច​ដល់ អាជ្ញាធរ និង​កងកម្លាំង​ប្រដាប់​អាវុធ​គ្រប់​ប្រភេទ​ឱ្យ​យក​ចិត្ត​ក្នុង​ដាក់​ក្នុង​ការ​ធ្វើ​យ៉ាង​ណា​ឱ្យភូមិ សង្កាត់នៅរាជធានីភ្នំពេញ មានសុវត្ថិភាព៕

ដោយ ៖ ស្រីរ័ត្ន

The post ការ​ផ្សព្វផ្សាយ​ផែន​ការ​យុទ្ធសាស្ត្រគោលនយោបាយ “ភូមិ-ឃុំ-សង្កាត់​មាន​សុវត្ថិភាព” ឆ្នាំ២០២៤-២០២៨ ធ្វើ​ឡើង​ក្នុង​គោល​បំណង​ពង្រឹង​សមត្ថភាព​មន្ត្រី​អនុវត្តច្បាប់ appeared first on Kampuchea Thmey Daily.

ក្នុងកិច្ចប្រជុំធ្វើសាលារាជធានីភ្នំពេញ លោក ខៀវ សុភ័គ លើកឡើងថា ដើម្បីឱ្យប្រជាពលរដ្ឋមានសន្តិសុខ លុះត្រាតែកម្លាំងអាជ្ញាធរ រាជធានីខេត្ត ស្រុក ខណ្ឌ រក្សាបានសន្តិសុខ។ សន្តិសុខ សណ្តាប់ធ្នាប់ផ្តើមចេញបុគ្គលខ្លួនឯង បើបុគ្គលខ្លួនឯង មានសន្តិសុខ អាជ្ញាធរ រាជធានីខេត្ត ស្រុក ខណ្ឌ មានសន្តិសុខ នោះប្រទេសជាតិទាំងមូលក៏មានសន្តិសុខពេញបរិបូរណ៍ដែរ។

លោកសន្តិបណ្ឌិត ខៀវ សុភ័គ បានរម្លឹកថា នៅ៦ខែដើមឆ្នាំ២០២៤នេះ អាជ្ញាធររាជធានីភ្នំពេញ បានអនុវត្តនូវគោលនយោបាយ “ភូមិ-ឃុំ-សង្កាត់មានសុវត្ថិភាព” យ៉ាងម៉ឹងម៉ាត់ ជាក់ស្តែង ក្នុងឱកាសបុណ្យចូលឆ្នាំថ្មីកន្លងមកនេះ អាជ្ញាធររាជធានីភ្នំពេញ រក្សាបានសុខ សុវត្ថិភាពយ៉ាងល្អប្រសើរ។ រក្សាសន្តិសុខ សណ្តាប់យ៉ាងល្អប្រសើរផងដែរ នៅក្នុងព្រឹត្តិការណ៍កីឡាស៊ីហ្គេម លើកទី៣២ និងការប្រកួតកីឡាប៉ារ៉ាហ្គេម លើកទី១២ ដោយទទួលបានលទ្ធផលល្អ ប្រសើរ គួរជាទីមោទនៈ។

 លោកសន្តិបណ្ឌិត បានបន្តថា គ្រោះថ្នាក់ចរាចរណ៍ក្នុង១ឆ្នាំៗ សម្លាប់មនុស្សជាង២០០០នាក់ ដែលជាមធ្យមក្នុង១ថ្ងៃសម្លាប់មនុស្សប្រមាណ៥នាក់។ ក្នុងនាមជាសមត្ថកិច្ច គឺត្រូវរួមគ្នាដើម្បីធ្វើយ៉ាងណា កាត់បន្ថយឱ្យបាននូវអត្រាមរណៈភាពឱ្យនៅក្រោម៥នាក់ក្នុងមួយថ្ងៃ។

លោកសង្ឃឹមថា អាជ្ញាធរ រាជធានីភ្នំពេញនឹងខិតខំបំពេញការងារឱ្យកាន់តែល្អបន្ថែមទៀត ដើម្បីរក្សាភាពសុខសាន្តជូនប្រជាពលរដ្ឋ ព្រោះអាជ្ញាធរគឺជាអ្នកបំរើពលរដ្ឋ៕

The post មន្ត្រីជាន់ខ្ពស់៖ ការទប់ស្កាត់បទល្មើសមុនពេលកើតជារឿងសំខាន់ បើបទល្មើសកើតហើយ ទើបបង្ក្រាបមិនល្អឡើយ appeared first on Kampuchea Thmey Daily.

ក្នុងកិច្ចប្រជុំពេញអង្គគណៈរដ្ឋមន្ត្រី លើកទី៦ នាព្រឹកថ្ងៃទី១៥ ខែមីនា ឆ្នាំ២០២៤នេះ សម្ដេចធិបតី ហ៊ុន ម៉ាណែត បានថ្លែងថា វិធានការគន្លឹះពាក់ព័ន្ធនឹងគោលនយោបាយភូមិ ឃុំ សង្កាត់ មានសុវត្ថិភាព គឺជាកិច្ចការដ៏សំខាន់មួយរបស់រាជរដ្ឋាភិបាល នីតិកាលទី៧នេះ។

សម្ដេចធិបតី បានបញ្ជាក់ឱ្យដឹងថា ក្នុងរយៈពេល ៦ខែនេះ រាជរដ្ឋាភិបាល បានរៀបចំកែសម្រួលរចនាសម្ព័ន្ធអាជ្ញាធរជាតិប្រយុទ្ធប្រឆាំងគ្រឿងញៀន ដែលមានការចូលរួមដឹកនាំកម្រិតឧបនាយករដ្ឋមន្ត្រីចំនួន ៤រូប ក្នុងការចូលរួមប្រយុទ្ធប្រឆាំងនឹងបញ្ហាគ្រឿងញៀន ដើម្បីធានាដល់ការជំរុញប្រសិទ្ធភាពនៃកិច្ចការនេះ ដែលមានភាពស្មុគស្មាញ។ ជាការកត់សម្គាល់ សម្ដេចធិបតី បានប្រគល់តួនាទីជាប្រធានអាជ្ញាធរជាតិប្រយុទ្ធប្រឆាំងគ្រឿងញៀន ឱ្យលោកឧបនាយករដ្ឋមន្ត្រី នេត សាវឿន អមដោយអនុប្រធាន ៣រូប គឺលោកឧបនាយករដ្ឋមន្រ្តី ស សុខា រដ្ឋមន្រ្តីក្រសួងមហាផ្ទៃ លោកឧបនាយករដ្ឋមន្ត្រី ទៀ សីហា រដ្ឋមន្ត្រីក្រសួងការពារជាតិ និងលោកឧបនាយករដ្ឋមន្ត្រី កើត​ រិទ្ធ រដ្ឋមន្ត្រីក្រសួងយុត្តិធម៌។

បើតាមការបញ្ជាក់បន្ថែមពីសម្ដេចធិបតី រាជរដ្ឋាភិបាល ក៏បានដាក់ចេញផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់​ លើកទី៩ ដោយបង្កើតឱ្យមានគណៈបញ្ជាការអនុវត្តយុទ្ធនាការ ហើយព្រមជាមួយគ្នា សម្ដេច បានចេញបទបញ្ជាយ៉ាងដាច់ខាតសម្រាប់ការប្រយុទ្ធប្រឆាំងការប្រើប្រាស់គ្រឿងញៀន នៅតាមក្រសួង ស្ថាប័នថ្នាក់ជាតិ រដ្ឋបាលថ្នាក់ក្រោមជាតិ និងកងកម្លាំងប្រដាប់អាវុធគ្រប់ប្រភេទ។

សម្ដេចនាយករដ្ឋមន្ត្រី សង្កត់ធ្ងន់ថា ជាវិធានការ គឺរាជរដ្ឋាភិបាល ការចាត់វិធានការបញ្ចប់មុខតំណែង និងបានបណ្ដេញចេញពីក្របខណ្ឌ ដោយគ្មានការលើកលែងចំពោះមន្ត្រីរាជការស៊ីវិល មន្ត្រីនគរបាលជាតិ យោធិន ព្រមទាំងមន្ត្រីជាប់កិច្ចសន្យា ដែលបានរកឃើញថា មានការប្រើប្រាស់ ឬជាប់ពាក់ព័ន្ធនឹងគ្រឿងញៀនខុសច្បាប់ ។

វិធានការគន្លឹះពាក់ព័ន្ធនឹងគោលនយោបាយភូមិ ឃុំ សង្កាត់ មានសុវត្ថិភាពនេះដែរ រាជរដ្ឋាភិបាលកម្ពុជា ក៏បានបញ្ចប់អាជ្ញាបណ្ណល្បែងផ្សងសំណាងថ្មី និងបិទទីតាំងល្បែងផ្សងសំណាងតាមមូលដ្ឋានដែលគ្មានអាជ្ញាបណ្ណ ព្រមទាំងការពិនិត្យកែសម្រួលឡើងវិញលើការគ្រប់គ្រងល្បែងផ្សងសំណាង កុំឱ្យរីករាលដាលនៅតាមមូលដ្ឋានផងដែរ៕

The post នាយករដ្ឋមន្ត្រី៖ ៦ខែនេះ រាជរដ្ឋាភិបាលបានចេញវិធានការជាបន្តបន្ទាប់ ដើម្បីធានាភូមិឃុំសង្កាត់មានសុវត្ថិភាព appeared first on Kampuchea Thmey Daily.