ភេទទី ៣ Archives - Kampuchea Thmey Daily

ភេទទី៣ថៃមួយក្រុម វាយប្លន់ទេសចរចិន នៅប៉ាតាយ៉ា

Sok Sovann — Tue, 17 Feb 2026 08:13:44 +0000

ប្រទេសថៃកាន់តែអសន្តិសុខសម្រាប់ភ្ញៀវទេសចរ ដោយកើតមានហេតុការណ៍ជាបន្តបន្ទាប់ ខណៈករណីចុងក្រោយនេះ គឺមនុស្សភេទទី៣ មួយក្រុមមានគ្នា៣នាក់ បានវាយប្លន់ទេសចរចិនម្នាក់នៅ ប៉ាតាយ៉ា។

(រូប៖ Khaosod)

តាមការផ្សាយរបស់ Khaosod, ហេតុការណ៍នេះកើតឡើងកាលពីថ្ងៃចន្ទទី១៦ខែកុម្ភៈ នៅសណ្ឋាគារប៉ាតាយ៉ាក្នុងឃុំ Nong Prue នៃស្រុក Bang Lamung នៃខេត្ត Chonburi។

ជនរងគ្រោះមានឈ្មោះ Jiang Zili អាយុ២៧ឆ្នាំ បានប្រាប់ប៉ូលិសថា គាត់បានហៅភេទទី៣មកបន្ទប់ ប៉ុន្តែបែរជាវាយនិងប្លន់យកលុយរបស់គាត់អស់ ២០ ០០០បាត។

ប្រាប់ទៅប៉ូលិស ជនជាតិចិនរៀបរាប់ថា ដំបូងគាត់ឈ្លោះជាមួយភេទទី៣ម្នាក់នៅក្នុងបន្ទប់សណ្ឋាគារ ហើយក៏មានភេទទី៣ ពីរនាក់ទៀតមកដល់ រួចប្រវាយប្រតប់គ្នា និងបានលួចយកលុយ ២០ ០០០បាតនៅក្នុងបន្ទប់នោះ។

(រូប៖ Khaosod)

ប៉ូលិសថៃបានឆែកមើលកាមេរ៉ាសុវត្ថិភាពរួចហើយ និងកំពុងតាមចាប់ខ្លួនភេទទី៣ ទាំង៣នាក់នោះ។

មិនមែនជារឿងថ្មីឡើយ ដែលទេសចរបរទេសតែងត្រូវជនជាតិថៃវាយធ្វើបាបនៅ ជាពិសេសក្នុងឆ្នាំ ២០២៥និងដើមឆ្នាំ២០២៦ មានហេតុការណ៍កើតឡើងជាបន្តបន្ទាប់លើទេសចរ។

ករណីល្បីមួយក្នុងឆ្នាំ២០២៥ គឺពាក់ព័ន្ធការចាប់ជំរិតតួសម្តែងជនជាតិចិនម្នាក់នៅទីក្រុងបាងកក ដែលធ្វើឲ្យចំនួនភ្ញៀវទេសចរមកពីអាស៊ីបូព៌ាធ្លាក់ចុះយ៉ាងគំហុក។

ឯករណីល្បីបំផុតទូទាំងពិភពលោក គឺការដុតជនជាតិម៉ាឡេស៊ី២នាក់ទាំងរស់នៅកណ្តាលក្រុងបាងកក ដែលហេតុការណ៍នោះ បង្កភាពភ័យខ្លាច ហើយគេមើលឃើញថា ថៃមិនមែនជាប្រទេសមានសុវត្ថិភាពឡើយ៕

អត្ថបទ៖ សុខ សុវណ្ណ

ថៃ រកឃើញគ្រាប់បែក ៤គ្រាប់ បង្កៃក្នុងគុម្ពចេក ត្រៀមបំផ្ទុះបង្កការបំផ្លិចបំផ្លាញ

The post ភេទទី៣ថៃមួយក្រុម វាយប្លន់ទេសចរចិន នៅប៉ាតាយ៉ា appeared first on Kampuchea Thmey Daily.

ពេជ្រ សូលីកា អំពាវនាវបញ្ឈប់ការរើសអើងភេទខុសគ្នា

Din Thary — Fri, 03 Nov 2023 03:14:40 +0000

ខណៈដែលថ្មីៗនេះ មហាជនផ្ទុះការវែកញែកជុំវិញរឿងរើសភើងភេទខុសគ្នា ពេលនេះស្រាប់តារាចម្រៀងចាយសម្រស់កូនមួយ ពេជ្រ សូលីកា បានចេញមកលើកឡើងពីចំណុចល្អៗរបស់ភេទទី៣ ដែលធ្លាប់ជួយនាង។ មិនតែប៉ុណ្ណោះ ពេជ្រ សូលីកា អំពាវនាវសុំឲ្យបញ្ឈប់ការរើសអើងភេទខុសគ្នាផងដែរ។

ខ្លឹមសាររបស់តារាស្រី ពេជ្រ សូលីកា បានបញ្ជាក់ថា «ភេទទី៣ ឬអ្នករើសអើងហៅថា «ខ្ទើយ» អាចនិយាយបានថា ៩០ភាគរយ ដែលមានភេទដូចជាពួកគាត់នៅក្បែរខ្លួននាងរាល់ថ្ងៃនឹងបានជួយការងារដល់នាងជាច្រើន រួមការងារផង រួមសុខរួមទុក្ខផង។នាងថាមនុស្សដែលពេញលក្ខណៈខ្លះសន្ដានមិនបាននឹងពួកគាត់ផង គ្មានទំនួលខុសត្រូវ មិនឲ្យតម្លៃមនុស្សស្រី លើកដៃវាយស្រីអាងអី្វអាងខ្លួនជាប្រុស»។

អ្នកនាង ពេជ្រ សូលីកា បាននិយាយបន្តថា ទោះពួកគាត់ជាភេទអ្វីក៏ពួកគាត់នៅតែប្រឹងប្រែងខំធ្វើការដោយកម្លាំងញើសឈាមរបស់គាត់ដូចតែយើងអ៊ីចឹងដែរ។

ពេជ្រ សូលីកា សង្កត់ធ្ងន់ថា «លើលោកនេះគ្មានអ្នកណាអាចកំណត់ជោគវាសនាខ្លួនឯងបានទេ ហើយកាន់តែមិនអាចហាមឃាត់ធម្មជាតិបាន ចូលរួមបញ្ឈប់ការរើសអើងជាមួយខ្ញុំភេទខុសគ្នាតែក៏ជាមនុស្ស»។

ជាមួយគ្នានេះ ក៏មានការបញ្ចេញទស្សនៈរបស់អ្នកគាំទ្រដែរថា សន្ដានមនុស្សមួយចំនួនការរើសអើងនៅតែមានមិនថាភេទ ទ្រព្យសម្បត្តិ ការងារតែងតែជួបនៅក្នុងសង្គម។ ភាគច្រើននៃពួកគាត់ គឺជាមនុស្សមានទឹកចិត្តស្មោះត្រង់នឹងគោរពចំពោះអ្នកដ៏ទៃណាស់ ហេតុអី្វក៏រើសអើងពួកគាត់អ៊ីចឹង។ ភាគច្រើននៃពួកគាត់ គឺជាមនុស្សល្អមានទឹកចិត្តល្អស្មោះស ស្មោះត្រង់ ចូលចិត្តគោរព និងឲ្យតម្លៃដល់គ្នាវិញ ទៅមក។

សូមបញ្ជាក់ថាអ្នកនាង ពេជ្រ សូលីកា បច្ចុប្បន្នសម្ពាយឈ្មោះជាស្ត្រីមេម៉ាកូនមួយបន្ទាប់ពីចំណងស្នេហ៍កូន១ រវាងតារាស្រីនាង និងស្វាមីខ្មែររស់នៅក្រៅប្រទេសឈ្មោះ គីម ហាន គឺបានឈានដល់ផ្លូវបែកបាក់មួយរយៈធំកន្លងមកនេះ។ យ៉ាងណាសព្វថ្ងៃ សូលីកា បានខំប្រឹងដើម្បីចិញ្ចឹមកូនផងដែរ៕

អត្ថបទ៖ចាន់រ៉ា

The post ពេជ្រ សូលីកា អំពាវនាវបញ្ឈប់ការរើសអើងភេទខុសគ្នា appeared first on Kampuchea Thmey Daily.

ចាប់ខ្លួនមនុស្ស ២០០ នាក់ ដែលចូលរួមមង្គលការភេទទីបី នៅប្រទេស នីហ្សេរីយ៉ា

Boa Sokunveary — Wed, 30 Aug 2023 08:34:45 +0000

ការចាប់ខ្លួនភេទទីបីនៅប្រទេស នីហ្សេរីយ៉ា គឺជាបញ្ហាធម្មតា ព្រោះទីនោះមិនមានច្បាប់អនុញ្ញាតឲ្យភេទទីបីរៀបការឡើយ ។ សម្រាប់អ្នកប្រព្រឹត្តិ អាចជាប់ពន្ធនាគាររហូតដល់ ១០ ឆ្នាំឯណោះ ។

កាលពីថ្ងៃអង្គារ ទី២៩ ខែសីហា ប៉ូលិសនៅនីហ្សេរីយ៉ា បានឲ្យដឹងថា គាត់ចាប់ខ្លួនមនុស្សយ៉ាងតិច ៦៧ នាក់ ខណៈពួកគេកំពុងចូលរួមពិធីមង្គលការភេទទីបី ។

ជនសង្ស័យដែលជាដៃគូ ត្រូវបានចាប់ខ្លួននៅទីក្រុង Ekpan ភាគខាងត្បូងនៃរដ្ឋ Delta វេលាម៉ោង ២ ព្រឹក នៅថ្ងៃច័ន្ទ ទី២៨ ខែសីហា នៅក្នុងកម្មវិធីផ្ទាល់តែម្ដង ។

រូបតំណាង

លោក Bright Edafe អ្នកតំណាងឲ្យប៉ូលិសបានបញ្ជាក់ថា ដំបូងប៉ូលិសបានសម្រុកចូលសណ្ឋាគារមួយនៅ Ekpan ជាកន្លែងពិធីមង្គលការមនុស្សស្រឡាញ់ភេទដូចគ្នា ហើយចាប់ខ្លួនមនុស្សចំនួន ២០០ នាក់ ។

បន្ទាប់ពីការស៊ើបអង្កេតដំបូង សល់តែ ៦៧ នាក់ប៉ុណ្ណោះដែលគេឃុំខ្លួន ។ លោកនិយាយទៀតថា “ពួកយើងរស់នៅក្នុងទ្វីបអាហ្វ្រិក យើងមិនអាចធ្វើតាមលោកខាងលិចទេ ព្រោះយើងមានវប្បធម៌ខុសគ្នា។”

ជាការពិតណាស់ នេះគឺជាការចាប់ខ្លួនខ្នាតធំបំផុតប្រចាំប្រទេសដែលមានច្បាប់ប្រឆាំងអ្នកស្រលាញ់ភេទដូចគ្នា ៕

ប្រែសម្រួល៖ វារី

ប្រភព៖ NBC

ចុចអាន៖ លិចទូកដ ដឹកភ្ញៀវមកពីពិធីមង្គលការ ស្លាប់មនុស្ស ១០០នាក់ នៅនីហ្សេរីយ៉ា

The post ចាប់ខ្លួនមនុស្ស ២០០ នាក់ ដែលចូលរួមមង្គលការភេទទីបី នៅប្រទេស នីហ្សេរីយ៉ា appeared first on Kampuchea Thmey Daily.

ប្ដីប្រពន្ធប្ដូរភេទល្បីនៅ ឥណ្ឌា កំពុងមានកូនក្នុងពោះ

Boa Sokunveary — Tue, 07 Feb 2023 08:14:59 +0000

តាមការប៉ាន់ស្មានបានឲ្យដឹងថាប្រទេសឥណ្ឌាមានប្រជាជនកែភេទប្រហែល ២ លាននាក់ ក្នុងនោះមានប្ដីប្រពន្ធមួយគូនៅរដ្ឋខេរ៉ាឡាភាគខាងត្បូង បានផ្អាកដំណើរការផ្លាស់ប្ដូរភេទដើម្បីមានកូនជាមុនសិន ។

ភរិយាមានឈ្មោះថា Ziya Paval អាយុ ២១ ឆ្នាំ មានភេទជាបុរសពីកំណើត ចំណែកឯស្វាមីមានឈ្មោះថា Zahad អាយុ ២៣ ឆ្នាំ មានភេទជាមនុស្សស្រីពីកំណើត ដោយសារលោក Zahad មិនទាន់កាន់ស្បូនចោល ដូច្នេះការពរពោះលើកនេះត្រូវក្លាយជាបន្ទុករបស់គាត់ផ្ទាល់ ។

ខណៈអ្នកស្រី Ziya ជាគ្រូបង្រៀនរាំនៅស្រុក Kozhikode ដែលធ្លាប់ទទួលការហ្វឹកហាត់ពីមជ្ឈមណ្ឌលសហគមន៍អ្នកប្តូរភេទ លោក Zahad មានការងារគោលនៅផ្សារទំនើបមួយកន្លែងផងដែរ។ ដំបូងឡើយគ្រួសាររបស់គាត់មិនគាំទ្រជម្រើសអ្នកទាំងពីរទេ លុះដល់ពេលមានកូនទើបគ្រប់គ្នាត្រលប់មកគាំទ្រនិងផ្ដល់កម្លាំងចិត្តយ៉ាងកក់ក្ដៅវិញ ។

សូមបញ្ជាក់ដែរថា ការផ្សព្វផ្សាយជាសាធារណៈត្រូវបានអនុញ្ញាតដោយម្ដាយលោក Zahad ហើយ ទើបពួកគេអាចបង្ហោះក្នុងបណ្ដាញសង្គម Instagram ទាំងគ្មានការបារម្ភ ៕

ប្រែសម្រួល ៖ វារី

ប្រភព ៖ BBC

ចុចអាន ៖ ស្ត្រីម្នាក់កើតជំងឺកាមរោគ ដោយសាររបួសដៃពេលធ្វើក្រចក

The post ប្ដីប្រពន្ធប្ដូរភេទល្បីនៅ ឥណ្ឌា កំពុងមានកូនក្នុងពោះ appeared first on Kampuchea Thmey Daily.

ឆ្ងល់អត់ ម៉េចពួកម៉ាកយើងខ្លះ មានចរិតផ្ទុយពីភេទ?

Sonya — Mon, 02 Aug 2021 09:35:00 +0000

គ្នាយើងច្បាស់ជាប្រទះឃើញញឹកញាប់ហើយ មិត្តភក្តិយើងខ្លះ ខ្លួនប្រុសបែរជាតុបតែងជាស្រី ខ្លះទៀតខ្លួនជាស្រីបែរតុបតែងជាប្រុស មានខ្លះឈានដល់កែភេទទៀតផង។ គ្នាយើងមានដឹងមកពីបញ្ហាអីអត់? បើអត់ដឹង អត្ថបទនេះ នឹងស្រាយចម្ងល់គ្នាយើងទាំងអស់គ្នា។

Transgender ជាពាក្យបច្ចេកទេស សម្រាប់ពណ៌នាក្រុមមនុស្ស មិនទទួលស្គាល់ភេទពីកំណើតរបស់ខ្លួន ចាប់តាំងពីក្មេងមកម៉្លេះ។ ទោះមិនមែនជាជំងឺ ឬបញ្ហាផ្លូវចិត្ត ក្មេងៗទាំងនេះនៅតែអាចមានបញ្ហាស្រ្តេស និងបាក់ទឹកចិត្តដូចគ្នា។ អាចដោយសារធ្លាប់រងការធ្វើបាប រើសអើង ត្រូវសង្គមបោះបង់ចោល អាម៉ាស់ចំពោះអ្វីខ្លួនកំពុងមាន ហើយការធ្វើរោគវិនិច្ឆ័យ ត្រូវធ្វើឡើងចំពោះតែក្មេងៗមានបញ្ហាធ្ងន់ធ្ងរ ឬប៉ះពាល់ដល់ការរស់នៅ ទាំងនៅផ្ទះ នៅសាលា ឬក្នុងសង្គមតែប៉ុណ្ណោះ។

១- រោគសញ្ញាមិនពេញភេទខ្លួនឯង

– បែងចែកភេទមិនដាច់រវាងភេទពីកំណើត និងភេទខ្លួនឯងកំណត់
– មានអារម្មណ៍ថា ‍កំពុងជាប់ក្នុងសម្បកខ្លួនអ្នកផ្សេង
– ចាប់អារម្មណ៍ខ្លាំងលើរបស់លេង របស់ប្រើប្រាស់ និងមានអត្តចរិត ផ្ទុយពីភេទខ្លួនឯង
– ចង់ក្លាយជាមនុស្សភេទផ្ទុយពីភេទកំណើត
– មានអារម្មណ៍មិនពេញចិត្ត និងមិនស្រួលចិត្តជាមួយប្រដាប់ភេទខ្លួន
– មានចំណង់ផ្លូវភេទខ្លាំងជាមួយក្មេងៗមានភេទដូចគ្នា។

២- កត្តាប្រឈម

មកទល់នឹងពេលនេះ នៅតែមានការខ្វែងគំនិតគ្នាឡើយទេ ពាក់ព័ន្ធអ្វីជាមូលហេតុពិតប្រាកដបណ្តាលឲ្យក្មេងៗមិនពេញចិត្តភេទកំណើតរបស់ខ្លួន ប៉ុន្តែភាគច្រើន អាចមកពីកត្តាសង្គម។ បច្ចុប្បន្ន សង្គមជាច្រើនជុំវិញពិភពលោក យល់ថា Transgender ជាក្រុមមនុស្សប្រឆាំងច្បាប់ធម្មជាតិ ជាហេតុនាំឲ្យក្មេងៗ ហាក់មានសម្ពាធដើម្បីសម្របតាមប៉ាម៉ាក់ពួកគេ ឬអាម៉ាស់ មានអារម្មណ៍ខ្លួនឯងខុសពីអ្នកដទៃ ឬត្រូវសង្គមទាត់ចោល និងរើសអើងតែម្តង។ យ៉ាងណា ក្មេងៗក្រុមនេះ ភាគច្រើននៅតែតស៊ូរស់នៅដោយសន្តិវិធី ជាមួយនឹងភេទកំណត់ដោយខ្លួនឯង។

៣- ធ្វើរោគវិនិច្ជ័យ

មានបញ្ហាផ្លូវចិត្តធ្ងន់ធ្ងរ ឬមិនស្រួលក្នុងចិត្ត ដោយសារការបែងចែកភេទមិនដាច់ រវាងភេទពីកំណើតនិងភេទខ្លួនកំណត់ រយៈពេលយ៉ាងតិច ៦ខែ អាចជាសញ្ញាមិនពេញភេទខ្លួនឯង។ គ្នាយើងមានរោគសញ្ញានេះ តែងរងសម្ពាធធ្ងន់ធ្ងរ រំខានដល់ការរស់នៅប្រចាំថ្ងៃ។ ដើម្បីធ្វើរោគវិនិច្ជ័យបាន គ្រូពេទ្យនឹងពិនិត្យផ្តោតសំខាន់លើភាពខុសគ្នារវាងអវយវៈភេទខាងក្រៅ និងខាងក្នុងខ្លួន (Intersex) និងបញ្ហាមួយចំនួនទៀតដែលអាចប៉ះពាល់ដល់ការលូតលាស់ប្រដាប់ភេទ។

៤- ការព្យាបាល

ការព្យាបាលដោយចិត្តសាស្ត្រអាចជួយព្យាបាលបាន។ វិធីព្យាបាលនេះនឹងធ្វើឲ្យក្មេងយល់ពីភេទរបស់ខ្លួន និងគ្រប់គ្រងទឹកចិត្តក៏ដូចជាស្រ្តេសបាន។

៥- ជំងឺប្រឈមផ្សេងៗ

ក្មេងៗ ឬគ្នាយើងមានបញ្ហានេះ អាចប្រឈមនឹងការឈឺចាប់ដោយសារករណីប្រឆាំងគ្នាពាក់ព័ន្ធការកំណត់អត្តសញ្ញាភេទរបស់ខ្លួន។ អាចត្រូវរងការរើសអើង ធ្វើទារុណកម្មទាំងផ្លូវចិត្ត ទាំងផ្លូវកាយ និងអាចសង្គមបោះបង់ចោលទៀតផង នាំឲ្យងាយកើតជំងឺថប់បារម្ភ បាក់ទឹកចិត្ត ឈានដល់ការប្រើប្រាស់សារធាតុញៀន៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ “ការស្រឡាញ់ភេទដូចគ្នា” មិនមែនជាជំងឺដែលត្រូវព្យាបាលឬជាបញ្ហាដែលត្រូវរិះគន់ឡើយ

ចុចអាន៖ ការស្រឡាញ់ភេទដូចគ្នាមិនមែនជាជំងឺ ក៏មិនមែនជាបទល្មើសដែរ!

The post ឆ្ងល់អត់ ម៉េចពួកម៉ាកយើងខ្លះ មានចរិតផ្ទុយពីភេទ? appeared first on Kampuchea Thmey Daily.

ទាហានភេទទី ៣ ដំបូងគេរបស់កូរ៉េខាងត្បូង ត្រូវរកឃើញស្លាប់ក្នុងផ្ទះ

Sok Chivon — Thu, 04 Mar 2021 07:40:03 +0000

ទីភ្នាក់ងារសារព័ត៌មាន Yonhap បានរាយការណ៍ថា ទាហានភេទទី ៣ ដំបូងគេរបស់កូរ៉េខាងត្បូងដែលត្រូវបានបណ្ដេញចេញពីជួរយោធាកាលពីឆ្នាំមុនសម្រាប់ការវះកាត់ប្តូរភេទត្រូវបានគេរកឃើញស្លាប់នៅក្នុងផ្ទះរបស់ខ្លួនកាលពីថ្ងៃពុធ ទី៣ ខែមីនា ។

ដោយដកស្រង់សម្ដីប៉ូលិសសារព័ត៌មាន Yonhap បានរាយការណ៍ថា ទាហានភេទទី ៣ ឈ្មោះ Byun Hui-su អាយុ ២៣ ឆ្នាំដែលជាពលបាលត្រីមុនពេលត្រូវបានបណ្ដេញចេញ បន្ទាប់ពីនាងបានធ្វើការវះកាត់កែភេទនៅប្រទេសថៃ ពេលនាងឈប់សម្រាកត្រូវបានរកឃើញដោយមន្រ្តីសង្គ្រោះបន្ទាន់នៅឯផ្ទះរបស់នាងនៅក្នុងទីក្រុង Cheongju ភាគខាងត្បូងទីក្រុងសេអ៊ូល ។

មិនទាន់មានព័ត៌មានណាមួយបញ្ជាក់ពីមូលហេតុនៃការស្លាប់របស់នាងនៅឡើយទេ ខណៈអ្នកនាំពាក្យប៉ូលិសទីក្រុង Cheongju មិនអាចទាក់ទងសុំការបំភ្លឺបន្ថែមបានភ្លាមៗនោះទេ ។

Yonhap បានរាយការណ៍ថា មជ្ឈមណ្ឌលប្រឹក្សាក្នុងតំបន់មួយដែល Byun ត្រូវបានចុះឈ្មោះបានរាយការណ៍ទៅមន្រ្តីសង្គ្រោះបន្ទាន់ថា នាងមិនអាចទាក់ទងបានទេចាប់តាំងពីថ្ងៃទី ២៨ ខែកុម្ភៈ ៕

ប្រែសម្រួលដោយ ៖ ជីវ័ន្ត

ប្រភព ៖ Asianone

ចុចអាន ៖ ចារកម្មកូរ៉េខាងត្បូង៖ Hacker កូរ៉េខាងជើងលួចទិន្នន័យវ៉ាក់សាំងពីក្រុមហ៊ុន Pfizer

ចុចអាន ៖ ចំណងទំនាក់ទំនងកូរ៉េខាងត្បូង និងកូរ៉េខាងជើង អាចស្ដារឡើងវិញដោយសារជំនួយមួយនេះ

The post ទាហានភេទទី ៣ ដំបូងគេរបស់កូរ៉េខាងត្បូង ត្រូវរកឃើញស្លាប់ក្នុងផ្ទះ appeared first on Kampuchea Thmey Daily.