មាត់-ធ្មេញ Archives - Kampuchea Thmey Daily

៨ យ៉ាងពីអនាម័យមាត់ធ្មេញ ជួយធ្មេញមានសុខភាពល្អ

Sonya — Fri, 03 Sep 2021 09:41:04 +0000

មាត់ធ្មេញគ្មានអនាម័យ មិនត្រឹមតែមានបញ្ហាច្រើនទេ ក៏ប្រឈមជំងឺមហារីកទៀតផង។ ក្នុងមាត់យើង អាចមានផ្ទុកបាក់តេរីរាប់ពាន់ រាប់លានប្រភេទ អាចបង្កការរលាក និងជះឥទ្ធិពលអាក្រក់ទៅលើសរីរាង្គដទៃទៀត ហើយបើយោងតាមការស្រាវជ្រាវថ្មីមួយ របស់អ្នកជំនាញស៊ុយអែត គ្នាយើងសម្បូរកំបោរជាប់ធ្មេញ ភាគច្រើនប្រឈមកើតជំងឺមហារីកលំពែង ខណៈការសិក្សានៅហូឡង់ កំបោរធ្មេញច្រើន មានទំនាក់ទំនងជាមួយសុខភាពបេះដូងផងដែរ។ ដើម្បីទទួលបានមាត់ធ្មេញមានសុខភាពល្អ គ្នាយើងគួរចាប់ផ្តើមបង្កទម្លាប់ល្អដែលរៀបរាប់ក្នុងអត្ថបទនេះទៅ។

១- ដុសសម្អាតធ្មេញ អណ្ដាត និងសាច់ថ្ពាល់ខាងក្នុង

ដុសសម្អាតធ្មេញ ជាវិធីដែលងាយស្រួល និងលឿនបំផុត ដើម្បីកម្ចាត់កាកសំណល់អាហារ ឬកំបោរជាប់ធ្មេញ ព្រោះកាលណាធ្មេញស្អាតមិនមានកំបោរកាន់ បាក់តេរីក្នុងមាត់ ក៏មិនសូវមានដែរ។ ប៉ុន្ដែការដុសសម្អាតតែធ្មេញមួយមុខ មិនទាន់គ្រប់គ្រាន់នោះទេ អណ្ដាត និងសាច់ថ្ពាល់ខាងក្នុង ក៏គួរសម្អាតដោយយកចិត្តទុកដាក់ផងដែរ។

២- ប្រើអំបោះទាក់ចន្លោះធ្មេញ

ប្រើអំបោះទាក់ចន្លោះធ្មេញត្រឹមត្រូវ មានប្រយោជន៍ច្រើនជួយសម្អាតធ្មេញនៅពេលដែលសរសៃច្រាសចូលទៅមិនដល់។ ម៉្យាងទៀត អំបោះទាក់ធ្មេញមានច្រើនប្រភេទសម្រាប់ជ្រើសរើស គ្នាយើងមានបំណះធ្មេញគ្រើម គួរប្រើអំបោះទាក់ មានជាតិក្រមួន ហើយបើយើងមានធ្មេញចន្លោះ គួរប្រើអំបោះទាក់ប្រភេទខ្សែក្រង។ ម៉្យាងទៀត សម្រាប់គ្នាយើងមានធ្មេញធម្មតា អាចប្រើអំបោះទាក់គ្មានជាតិក្រមួនបាន។

៣- ប្រើថ្នាំដុសធ្មេញ និងទឹកខ្ពុលមាត់មានជាតិភ្លុយអរ (Fluoride)

ភ្លុយអរ គឺជាសារធាតុរ៉ែធម្មជាតិ ល្អសម្រាប់ជួយឲ្យធ្មេញរឹងមាំ និងការពារជាតិកាត់របស់អាស៊ីដ។ ម៉្យាងទៀត យើងគួរតែជ្រើសរើសថ្នាំដុសធ្មេញ និងទឹកខ្ពុលមាត់មានកម្រិតសារធាតុភ្លុយអរសក្ដិសមទៅនឹងអាយុធ្មេញយើង។

៤- ចៀសវាងអាហា រឬភេសជ្ជៈសម្បូរជាតិស្ករ

ញ៉ាំ ឬផឹកអាហារជាតិស្ករខ្ពស់ នឹងធ្វើឲ្យកម្រិត pH ក្នុងទឹកមាត់ថយចុះ ធ្វើឲ្យកំបោរជាប់ធ្មេញក្លាយទៅជាអាស៊ីដកាត់ធ្មេញ។ ហេតុនេះ យើងគួរតែចៀសវាង ពិសេសរឿងញ៉ាំស្ករគ្រាប់ ឬនំកញ្ចប់។ ប៉ុន្តែបើគ្នាយើងខ្វះជាតិផ្អែមមិនបាន ញ៉ាំម្ហូបអាហារធម្មតាសិន បន្ទាប់មកចាំញ៉ាំស្ករគ្រាប់តាមក្រោយ ព្រោះធ្វើបែបនេះ វាអាចជួយបង្អាក់ជាតិផ្អែមបានខ្លះៗដែរ។

៥- ជ្រើសរើសស្ករកៅស៊ូត្រឹមត្រូវ

ការទំពារស្ករកៅស៊ូទាំងអស់ មិនមែនសុទ្ធតែមានប្រយោជន៍ទេ ព្រោះប្រភេទស្ករកៅស៊ូខ្លះ សម្បូរជាតិស្ករ នឹងឆាប់ធ្វើឲ្យមានរោគពុកធ្មេញ។សម្រាប់ស្ករកៅស៊ូ យើងគួរទំពារ គួរតែជាស្ករ Xylitol ព្រោះវាជាសារធាតុស្ករម៉្យាង ជួយកាត់បន្ថយបាក់តេរីបានច្រើន ដែលបាក់តេរីទាំងនោះ សុទ្ធតែអាចធ្វើឲ្យមានជំងឺពុកធ្មេញ។

៦- ដុសសម្អាតឲ្យចំកន្លែង

ដុសសម្អាតធ្មេញជាមួយនឹងសរសៃច្រាសធំ ពិតជាពិបាកឲ្យចូលតាមកន្លុកកន្លៀតធ្មេញក្នុងមាត់ណាស់ ពិសេសនៅម្ដុំធ្មេញថ្គាម ហេតុនេះយើងគួរតែប្ដូរមកប្រើសរសៃច្រាសទន់ មានចុងសរសៃស្ដើង ទើបអាចសម្អាតបានស្អាតល្អ ចូលទៅសម្អាតបានគ្រប់ផ្នែកធ្មេញ។

៧- គិតឲ្យបានច្បាស់មុនផឹកភេសជ្ជៈណាមួយ

ភេសជ្ជៈមានជាតិអាស៊ីដ ដូចជា ទឹកសូដា ភេសជ្ជៈប៉ូវកម្លាំង និងភេសជ្ជៈសម្រាប់ហាត់កីឡា សុទ្ធតែអាចធ្វើធ្មេញពុកបាន។ ក្រោយពីការហាត់ប្រាណរួច បើយើងផឹកភេសជ្ជៈប៉ូវកម្លាំងនោះ គួរតែផឹកទឹកធម្មតាតាមក្រោយ ដើម្បីលាងសម្អាតជាតិអាស៊ីដ ចេញពីធ្មេញ។ បើងងុយគេង ប៉ុន្តែចង់ដាស់ស្មារតីខ្លួនឯង គួរតែផឹកកាហ្វេខ្មៅ ប្រសើរជាងភេសជ្ជៈប៉ូវកម្លាំង ព្រោះកាហ្វេមិនកាត់ធ្មេញ ដូចភេសជ្ជៈប៉ូវកម្លាំងនោះទេ។

៨- ផឹកស្រាក្រហម និងញ៉ាំឈីស

ដោយសារតែស្រាក្រហម ជាប្រភេទភេសជ្ជៈជាតិអាស៊ីដ អាចធ្វើឲ្យស្រទាប់ការពារធ្មេញសឹកបាន ហេតុនេះដើម្បីបង្ការកុំឲ្យធ្មេញខូចខាត យើងគួរតែផឹកស្រាក្រហម និងញ៉ាំឈីសមួយដុំ ព្រោះឈីសមានសមត្ថភាពបន្សាបជាតិអាស៊ីដនៅក្នុងមាត់បាន។

វិធីសាស្ត្រងាយៗទាំងអស់នេះ គឺមានប្រសិទ្ធភាពខ្ពស់ រក្សាធ្មេញបានស្អាតល្អ និងមានសុខភាពរឹងមាំ។ ភាពអត់ធ្មត់ និងអនុវត្តឲ្យបានទៀងទាត់ ជាវិធីការពារដ៏ល្អ មិនត្រឹមតែសុខភាពមាត់ធ្មេញ សូម្បីតែសុខភាពរាងកាយ ក៏អាចជួយបានដែរ៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ កំពូលអាហារ ៤មុខឆ្ងាញ់ៗ តែអាចធ្វើឲ្យធ្មេញលឿងសាហាវ

ចុចអាន៖ ឈឺអណ្ដាតក្រោយញ៉ាំផ្លែឈើ អាចមកពីជ្រាំងមាត់ ឬដំបៅ

The post ៨ យ៉ាងពីអនាម័យមាត់ធ្មេញ ជួយធ្មេញមានសុខភាពល្អ appeared first on Kampuchea Thmey Daily.

កំពូលអាហារ ៤មុខឆ្ងាញ់ៗ តែអាចធ្វើឲ្យធ្មេញលឿងសាហាវ

Sonya — Thu, 26 Aug 2021 08:09:50 +0000

ជឿថា គ្នាយើងគ្មានអ្នកណាចង់ឲ្យធ្មេញលឿង ញញឹមចេញមកមិនស្រស់ស្រាយទេ ហើយធ្មេញលឿងក៏មិនមែនជាបញ្ហាធំដុំដែរ គ្រាន់តែវាអាចធ្វើឲ្យយើងមិនមានទំនុកចិត្តខ្លាំងពេលញញឹម បាក់សម្រស់តែប៉ុណ្ណឹង។ ម៉្យាងវិញទៀត ការសម្អាតធ្មេញឲ្យសឡើងវិញ ក៏តម្លៃអាចលើសពីការស្មាន យកល្អយើងអាចកម្ចាត់បញ្ហាធ្មេញលឿងជាមួយការតម ឬកាត់បន្ថយការញ៉ាំអាហារប៉ុន្មានខាងក្រោមនេះ ព្រោះវាធ្វើឲ្យធ្មេញឡើងពណ៌ស្រអាប់ខ្លាំង។

១. កាហ្វេ ឬតែ

មិនថាយើងញ៉ាំកាហ្វេ តែ ឬក៏ភេសជ្ជៈកំប៉ុងផ្សេងៗនោះទេ យើងនឹងប្រឈមនឹងការធ្វើឲ្យធ្មេញយើងឡើងពណ៌លឿង។ កាហ្វេ និងតែ មានជាតិ Tannin ដែលអាចធ្វើឲ្យធ្មេញស្រអាប់ ហើយវាក៏ធ្វើឲ្យតុល្យភាព PH ក្នុងមាត់ផ្លាស់ប្ដូរជាហេតុបណ្ដាលឲ្យធ្មេញឆាប់ខូចដោយសារជាតិអាស៊ីដពីអាហារយើងញ៉ាំ។

២. ស្រា

ស្រាក្រហមក៏ដោយ ស្រាសក៏ដោយ សុទ្ធតែអាចធ្វើឲ្យធ្មេញបាត់បង់ពណ៌សភ្លឺ ប្រែជាពណ៌លឿងបាន។ នៅក្នុងស្រាក្រហម មានជាតិ Tannin ដែលបណ្ដាលឲ្យធ្មេញយើងបាត់បង់ពណ៌សភ្លឺស្អាតក្លាយជាស្រអាប់វិញ។ ចំណែកស្រាស មានជាតិអាស៊ីដដែលមិនល្អចំពោះធ្មេញយើង។

៣. ពពួកផ្លែប៊ើរី

ត្បិតតែ ពពួកផ្លែប៊ើរីមានប្រយោជន៍រាប់មិនអស់សម្រាប់សុខភាពយើងក៏ពិតមែន ប៉ុន្តែសារជាតិពណ៌ក្រម៉ៅដែលវាមានអាចបណ្ដាលឲ្យធ្មេញលឿង ឬឡើងក្រហមតាមពណ៌ផ្លែប៊ើរី។ ប៉ុន្តែ បើយើងមិនចង់ឲ្យធ្មេញឡើងលឿងដោយសារការញ៉ាំផ្លែប៊ើរីទេ យើងអាចដុសធ្មេញភ្លាមៗក្រោយញ៉ាំវា ដើម្បីចៀសវាងពណ៌របស់វាជាប់លើធ្មេញ។

៤. ការី

ការីអាចជាអាហារដែលធ្វើឲ្យធ្មេញយើងលឿងពណ៌ខ្លាំងបំផុតមួយ ព្រោះវាមានសារជាតិមួយហៅថា Curcumin ដែលអាចធ្វើឲ្យធ្មេញលឿង ហើយកាលពីមុន ចំពោះរុក្ខជាតិណាដែលមានសារជាតិនេះ គេយកទៅធ្វើជាពណ៌ជ្រលក់កំណាត់ផ្សេងៗ ព្រោះវាមានពណ៌ដិត៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ ឈឺធ្មេញពេលយប់ម្ដងម្កាល អាចប្រើវិធីទាំងនេះ ដោះស្រាយបានមួយគ្រាសិន

ចុចអាន៖ ទម្លាប់ខុសមួយចំនួន ដែលមនុស្សមានទំនោរធ្វើ បន្ទាប់ពីដុសធ្មេញរួច

The post កំពូលអាហារ ៤មុខឆ្ងាញ់ៗ តែអាចធ្វើឲ្យធ្មេញលឿងសាហាវ appeared first on Kampuchea Thmey Daily.

ការបង្ករោគពីធ្មេញអាចនាំឲ្យមានគ្រោះថ្នាក់ដល់ជីវិត

Bo Doula — Sun, 20 Dec 2020 00:46:37 +0000

នៅពេលលោកអ្នកឈឺធ្មេញហើយមានសភាពហើមមុខ លឹបភ្នែក ឬហើមតំបន់ក្រោមឆ្អឹងថ្គាម ឬចង្កា ដែលប៉ះពាល់ និងពិបាកដល់ការលេបចំណីអាហារ ឬទឹកមាត់ (មានន័យថាប៉ះពាល់ដល់ផ្លូវដកដង្ហើម) អ្នកជំងឺអាចស្លាប់បាន ប្រសិនបើមិនទទួលការការព្យាបាលបានត្រឹមត្រូវ។

១) មូលហេតុធំៗ និងសំខាន់ៗ៖
– ការបង្កររោគចុងឬសធ្មេញស្រួចស្រាវ ដោយសារការងាប់បណ្ដូលធ្មេញ ឬការព្យាបាលរន្ធឬសធ្មេញមិនបានត្រឹមត្រូវ
– ជំងឺរលាកជាលិកាជុំវិញធ្មេញដែលបង្កជាខ្ទុះ
– ការរលាកសាច់ដែលគ្របពីលើធ្មេញថ្គាមទាល់ខាងក្រោមដែលដុះចេញមក
– ការប្រើប្រាស់ឧបករណ៍មិនស្អាត (មិនបានសំលាប់មេរោគឲ្យបានត្រឹមត្រូវ)

២) កត្តាបង្កគ្រោះថ្នាក់ដល់អាយុជីវិត៖
– ប្រសិនបើមិនព្យាបាលឲ្យទាន់ពេលវេលាទេនោះ មេរោគ (Bacteria) ដែលបង្កឲ្យមានការករខ្ទុះអាចរីករាលដាលពីតំបន់ធ្មេញទៅកាន់តំបន់ផ្សេងៗទៀតដូចជាៈ
· ផ្នែកធ្មេញខាងលើ៖ នាំឲ្យហើមមុខជុំវិញភ្នែក រួចឆ្លងចូលទៅតំបន់ Cavernous Sinus និងអាចឆ្លងចូលទៅកាន់ខួរក្បាល។
· ផ្នែកធ្មេញខាងក្រោម៖ នាំឲ្យហើមតំបន់ក្រោមចង្កា និងតំបន់ឆ្អឹងថ្គាមក្រោម (ធ្វើឲ្យពិបាកលេខទឹកមាត់ និងស្ទះផ្លូវដង្ហើម) ហើយអាចរីករាលដាលដល់តំបន់ទ្រូង (Mediastinum) និង Infective Endocarditis។ មួយវិញទៀតមេរោគអាចចូលទៅក្នុងឈាមដោយផ្ទាល់ (Septicemia)។

៣) ការព្យាបាល៖
ការព្យាបាលអាចធ្វើទៅតាមដំណាក់កាលដូចខាងក្រោមៈ
– ធ្វើការចោះបង្ហូរខ្ទុះរួចលាងសំអាតឲ្យត្រឹមត្រូវ
– ការយកខ្ទុះទៅវិភាគរកមេរោគ និងការប្រើប្រាស់ថ្នាំត្រឹមត្រូវ
– យកមូលហេតុដែលបង្ករោគចេញៈ ដោយការព្យាបាលធ្មេញ ឬដកធ្មេញនោះចេញតែម្តង
– ការប្រើប្រាស់ថ្នាំ
– ក្នុងករណីធ្ងន់ធ្ងរត្រូវសម្រាកព្យាបាលនៅមន្ទីរពេទ្យ។

៤) អនុសាសន៍ និងការការពារ៖
– សូមជួបជាមួយទន្តបណ្ឌិត ឬគ្រូពេទ្យជំនាញពេលលោកអ្នកមានបញ្ហាធ្មេញ ឬហើមមុខមាត់ ជៀសវាងការប្រើប្រាស់ថ្នាំដោយខ្លួនឯង។
– បញ្ហាមាត់ធ្មេញអាចបង្កគ្រោះថ្នាក់ដល់អាយុជីវិត សូមមកជួបជាមួយទន្តបណ្ឌិត ជារៀងរាល់ ៦ខែម្តង ដើម្បីពិនិត្យសុខភាពមាត់ធ្មេញលោកអ្នក៕

អត្ថបទ ៖ រស្មី

The post ការបង្ករោគពីធ្មេញអាចនាំឲ្យមានគ្រោះថ្នាក់ដល់ជីវិត appeared first on Kampuchea Thmey Daily.

មាត់-ធ្មេញ Archives - Kampuchea Thmey Daily

៨ យ៉ាងពីអនាម័យមាត់ធ្មេញ ជួយធ្មេញមានសុខភាពល្អ

១- ដុស​សម្អាត​ធ្មេញ ​អណ្ដាត ​និង​សាច់​ថ្ពាល់​ខាង​ក្នុង

២- ប្រើ​អំបោះ​ទាក់​ចន្លោះ​ធ្មេញ

៣- ប្រើ​ថ្នាំ​ដុស​ធ្មេញ​ និង​ទឹក​ខ្ពុល​មាត់​​មាន​ជាតិ​ភ្លុយអរ (Fluoride)

៤- ចៀសវាង​អាហា រ​ឬ​ភេសជ្ជៈ​សម្បូរ​ជាតិ​​ស្ករ

៥- ជ្រើសរើស​ស្ករ​កៅស៊ូ​ត្រឹមត្រូវ

៦- ដុស​សម្អាត​ឲ្យ​ចំ​កន្លែង

៧- គិត​ឲ្យ​បាន​ច្បាស់មុន​ផឹក​​ភេសជ្ជៈណា​មួយ

៨- ផឹក​ស្រា​ក្រហម​ និង​ញ៉ាំ​ឈីស