មិនពាក់ម៉ាស់ Archives - Kampuchea Thmey Daily

អាជ្ញាធរខេត្តសៀមរាប ចុះផាកពិន័យអ្នកមិនពាក់ម៉ាស និងពាក់ម៉ាសមិនត្រឹមត្រូវ នៅតាមផ្សារមួយចំនួន

Sorn Phanith — Fri, 11 Jun 2021 07:05:24 +0000

ក្រុមការងារចម្រុះនៃខេត្តសៀមរាប នៅព្រឹកថ្ងៃទី១១ ខែមិថុនា ឆ្នាំ២០២១នេះ បានសហការគ្នាចុះតាមដានផាកពិន័យអ្នកមិនពាក់ម៉ាសនិងពាក់ម៉ាសមិនត្រឹមត្រូវ នៅតាមផ្សារមួយចំនួននៅក្នុងក្រុងសៀមរាប។

អាជ្ញាធរបានឲ្យដឹងថា កម្លាំងសមត្ថកិច្ចចម្រុះរួមមាន កម្លាំងនគរបាលព្រហ្មទណ្ឌកម្រិតស្រាល,អាវុធហត្ថ,ប្រជាការពារ,សន្តិសុខផ្សារ និងមន្ទីរសុខាភិបាល បានចុះផាកពិន័យអ្នកមិនពាក់ម៉ាសបានអ្នកបង់លុយរួចចំនួន១៤ករណី អ្នកមិនទាន់បង់លុយចំនួន១៧ករណី។

អាជ្ញាធរបន្ថែមថា កាលពីថ្ងៃទី១០ ខែមិថុនា ឆ្នាំ២០២១ ក្រុមការងារត្រួតពិនិត្យតាមដានការពាក់ម៉ាសបានចុះអនុវត្តការងារផាកពិន័យ នៅផ្សាររាត្រីអង្គរឃ្យុងយូ ជាលទ្ធផលផាកពិន័យបាន១នាក់ជាបុរសទទួលយកបង្កាន់ដៃទុកបង់តាមក្រោយ។ នៅព្រឹកថ្ងៃទី១១ ខែមិថុនា ឆ្នាំ២០២១នេះ ក្រុមការងារត្រួតពិនិត្យ បន្តតាមដានការពាក់ម៉ាសបានចុះធ្វើការផាកពិន័យនៅផ្សារដើមក្រឡាញ់ សរុបទាំងអស់បាន១២នាក់ ស្រីចំនួន៥នាក់ និងបុរសចំនួន៧នាក់ អ្នកបង់ថវិកានៅកន្លែងមិនមាន អ្នកទទួលយកបង្កាន់ដៃទុកបង់តាមក្រោយមានចំនួន១២នាក់។

ក្នុងករណីខាងលើនេះ អាជ្ញាធរខេត្តសៀមរាប នឹងបន្តចុះតាមដានផាកពិន័យអ្នកមិនពាក់ម៉ាសនិងពាក់ម៉ាសមិនត្រឹមត្រូវនៅតាមផ្សារនិងភូមិឋានមួយចំនួននៃខេត្តសៀមរាបបន្ថែមទៀត ដើម្បីបង្ការ កុំឲ្យមានការរាលដាលនៃជំងឺកូវីដ១៩ថែមទៀត៕

អត្ថបទ៖ កុសល

សូមចុចអាន៖ ខេត្តរតនគិរី រកឃើញអ្នកឆ្លងជំងឺកូវីដ១៩ម្នាក់ ជាអ្នកធ្វើដំណើរមកពីភ្នំពេញ

The post អាជ្ញាធរខេត្តសៀមរាប ចុះផាកពិន័យអ្នកមិនពាក់ម៉ាស និងពាក់ម៉ាសមិនត្រឹមត្រូវ នៅតាមផ្សារមួយចំនួន appeared first on Kampuchea Thmey Daily.

ក្រុងសៀមរាបអាជ្ញាធរចុះផាកពិន័យអ្នកមិនពាក់ម៉ាស

deth leng — Wed, 09 Jun 2021 08:09:51 +0000

អាជ្ញាធរខេត្តសៀមរាបនៅថ្ងៃទី ៩ ខែមិថុនានេះ បានចុះធ្វើការផាកពិន័យចំពោះអាជីវករលក់ដូរដែលមិនពាក់ម៉ាស និងពាក់ម៉ាសមិនបានត្រឹមត្រូវ នៅផ្សារលើធំថ្មី ក្រុងសៀមរាប។

ការចុះផាកពិន័យនេះ បានធ្វើឡើងបន្ទាប់ពីអាជ្ញាធរ បានធ្វើការណែនាំជាច្រើនដងមកហើយ ប៉ុន្តែអាជីវករ និងពលរដ្ឋមួយចំនួនតូច នៅតែមិនអនុវត្តតាមការណែនាំរបស់រាជរដ្ឋាភិបាល និងក្រសួងសុខាភិបាល។

លោក ពិន ប្រាកដ អភិបាលរងខេត្តសៀមរាប បានឱ្យដឹងថា មានអាជីវករ និងពលរដ្ឋប្រមាណ៥ភាគរយប៉ុណ្ណោះ ដែលពួកគាត់មិនពាក់ម៉ាស់ និង មិនអនុត្ដតាមច្បាប់។

លោកអភិបាលរងខេត្ត មានប្រសាសន៍ទៀតថា នេះជាលើកទី១ សម្រាប់ការចុះផាកពិន័យ ចំពោះអ្នកដែលអត់ពាក់ម៉ាស់ និងពាក់ម៉ាសមិនត្រឹមត្រូវ ហើយអាជ្ញាធរនឹងធ្វើការផាកពិន័យបន្ដទៀត ទៅលើអ្នកមិនអនុវត្ដតាមច្បាប់ ក៏ដូចជាតាមការណែនាំរបស់ក្រសួងសុខាភិបាល។

យោងតាមអនុក្រិត្យ ស្ដីពីកាតព្វកិច្ចពាក់ម៉ាស់ តាមមាត្រា ១៩ នៃអនុក្រឹត្យនេះចែងថា បុគ្គលដែលមិនពាក់ម៉ាស់នៅកន្លែងចាំបាច់ដែលក្រសួងសុខាភិបាលបានណែនាំនឹងត្រូវរងការផាកពិន័យពី ២០ ម៉ឺនរៀល ទៅ១លានរៀល ប្រសិនបើបុគ្គលនោះមិនធ្វើតាមការព្រមានលើកទី ១។

ចំណែកអ្នករៀបចំកម្មវិធីអ្វីមួយដែលមិនគោរពទៅតាមគោលការណ៍គម្លាតសង្គមត្រូវរងការផាកពិន័យពី ១លាន ទៅ៥លានរៀល ក្នុងករណីមិនធ្វើតាមការព្រមានលើកទី១។

ខេត្តសៀមរាបមានអ្នកវិជ្ជមានជំងឺកូវីដ១៩ សរុបចំនួន ២៤៩នាក់ ព្យាបាលជាសះស្បើយចំនួន៩០នាក់ កំពុងសម្រាកព្យាបាលនៅមន្ទីរពេទ្យបង្អែកខេត្តសៀមរាប ចំនួន១៥៧នាក់ និង ស្លាប់ចំនួន ០២នាក់ ដែលគាត់ទាំងពីរនាក់ ជាអ្នកជំងឺខូចតម្រងនោមធ្ងន់ធ្ងរ និង រ៉ាំរ៉ៃ មុននឹងរកឃើញវិជ្ជមានជំងឺកូវីដ-១៩៕ អត្ថបទ៖ គឿនវេត

The post ក្រុងសៀមរាបអាជ្ញាធរចុះផាកពិន័យអ្នកមិនពាក់ម៉ាស appeared first on Kampuchea Thmey Daily.

ខេត្តកណ្តាល ប្រកាសផាកពិន័យ អ្នកមិនពាក់ម៉ាសនិងរក្សាគម្លាតសុវត្ថិភាព

Sorn Phanith — Mon, 29 Mar 2021 07:14:08 +0000

រដ្ឋបាលខេត្តកណ្ដាល បានប្រកាសអនុវត្តច្បាប់និងចាត់វិធានការការផាកពិន័យ តាមប្រកាសអន្តរក្រសួងដល់បុគ្គលនីតិវិធីនិងជនទាំងឡាយណា ដែលមិនអនុវត្តកាតព្វកិច្ចពាក់ម៉ាសនិងកាតព្វកិច្ចរក្សាគម្លាតសុវត្ថិភាពបុគ្គលចាប់ពីថ្ងៃទី២៩ ខែមីនា ឆ្នាំ២០២១នេះតទៅ។

យោងតាមសេចក្តីជូនដំណឹងរបស់រដ្ឋបាលខេត្តកណ្ដាលចុះថ្ងៃទី២៩ ខែមីនា ឆ្នាំ២០២១ បានឲ្យបានដឹងថា ដើម្បីចូលរួមទប់ស្កាត់ការឆ្លងរីករាលដាលនៃជំងឺកូវីដ១៩ ក្នុងព្រឹត្តិការណ៍សហគមន៍២០កុម្ភៈ ដែលបានអូសបន្លាយនៅក្នុងមូលដ្ឋានខេត្តកណ្ដាលនោះ គណៈបញ្ជាការឯកភាពរដ្ឋបាលខេត្តក៏ដូចជាគណៈបញ្ជាការឯកភាពរដ្ឋបាលក្រុងស្រុកនឹងអនុវត្តច្បាប់និងចាត់វិធានការការផាកពិន័យ តាមប្រកាសអន្តរក្រសួងដល់បុគ្គលនីតិវិធីនិងជនទាំងឡាយណា ដែលមិនអនុវត្តកាតព្វកិច្ចពាក់ម៉ាសនិងកាតព្វកិច្ចរក្សាគម្លាតសុវត្ថិភាពបុគ្គលដូចមានចែង នៅក្នុងប្រកាសចុះថ្ងៃទី២២ ខែមីនាឆ្នាំ២០២១ របស់ក្រសួងសុខាភិបាល។ រដ្ឋបាលខេត្តបានសូមឲ្យបងប្អូនប្រជាពលរដ្ឋសាធារណជនអ្នករស់នៅនិងប្រកបអាជីវកម្ម នៅក្នុងមូលដ្ឋានខេត្តកណ្ដាលចូលរួមសហការអនុវត្តតាមច្បាប់និងលិខិតបទដ្ឋានគតិយុត្តនានាជាធរមានពាក់ព័ន្ធនឹងការទប់ស្កាត់ការឆ្លងរាលដាលជំងឺកូវីដ១៩ ឲ្យមានប្រសិទ្ធភាពនិងការទទួលខុសត្រូវខ្ពស់ ដើម្បីចៀសវាងទទួលរងនូវការអនុវត្តច្បាប់និងពិន័យពីអាជ្ញាធរមានសមត្ថកិច្ច។

ការប្រកាសរបស់រដ្ឋបាលខេត្តកណ្តាលនេះ បានធ្វើឡើងបន្ទាប់ពីសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃកាលពីថ្មីៗនេះ បានណែនាំទៅដល់ អភិបាលរាជធានី ខេត្ត និងជាប្រធានគណៈបញ្ជាការឯកភាពរដ្ឋបាលរាជធានី ខេត្ត ត្រូវផ្ដល់ការគាំទ្រ និងផ្ដល់គោលការណ៍ណែនាំដល់គណៈបញ្ជាការឯកភាពរដ្ឋបាលក្រុង ស្រុក ខណ្ឌ ចូលរួមសហការឲ្យបានជិតស្និទ្ធជាមួយមន្ត្រីសុខាភិបាល ក្នុងការអនុវត្តការផាកពិន័យអន្តរការណ៍លើបុគ្គល ឬនីតិបុគ្គលដែលមិនអនុវត្តនូវកាតព្វកិច្ចពាក់ម៉ាស់ និងកាតព្វកិច្ចរក្សាគម្លាតសុវត្ថិភាពបុគ្គល ស្របតាមច្បាប់ និងលិខិតបទដ្ឋានគតិយុត្តិជាធរមាន។

ចំណែកក្រសួងសុខាភិបាលកំណត់រាជធានីខេត្តចំនួន៥ ជាកន្លែងត្រូវតែអនុវត្តវិធានការសុខាភិបាល ដោយពាក់ម៉ាស់ និងរក្សាគម្លាត គឺរាជធានីភ្នំពេញ ខេត្តកណ្តាល ខេត្តសៀមរាប ខេត្តព្រៃវែង និងខេត្តព្រះសីហនុ។ យោងតាមអនុក្រឹត្យរបស់រាជរដ្ឋាភិបាលអ្នក ដែលមិនអនុវត្តពាក់ម៉ាសនិងរក្សាគម្លាតសុវត្ថិភាពតាមការណែនាំរបស់ក្រសួងសុខាភិបាលនិងអាជ្ញាធរមានសមត្ថកិច្ចត្រូវផាកពិន័យប្រាក់ពី២០ម៉ឺនរៀលដល់១លានរៀល៕

អត្ថបទ៖ សំអឿន

សូមចុចអាន៖ លម្អិតបន្ថែមបុរសស្លាប់ដោយសារជំងឺកូវីដ១៩ ជាអ្នកបើកឡានឲ្យជនជាតិចិន

The post ខេត្តកណ្តាល ប្រកាសផាកពិន័យ អ្នកមិនពាក់ម៉ាសនិងរក្សាគម្លាតសុវត្ថិភាព appeared first on Kampuchea Thmey Daily.

ត្រូវពាក់ម៉ាស រក្សាគម្លាត អាជ្ញាធរចាប់ផ្តើមអនុវត្តការផាកពិន័យអ្នកល្មើស

deth leng — Sat, 27 Mar 2021 05:05:40 +0000

ក្រសួងមហាផ្ទៃ នៅថ្ងៃទី ២៧ ខែមីនា ឆ្នាំ ២០២១ នេះ បានចេញសេចក្តីណែនាំមួយ ឲ្យអភិបាលរាជធានីខេត្ត ត្រូវផ្តល់ការគាំទ្រ និងគោលការណ៍ណែនាំដល់គណៈបញ្ជារដ្ឋបាល ក្រុង ស្រុកខណ្ឌ ត្រូវចូលរួមសហការជាមួយមន្ត្រីសុខាភិបាល ក្នុងការអនុវត្តការផាកពិន័យអន្តរការលើបុគ្គល ឬនិតិបុគ្គលដែលប្រព្រឹត្តិល្មើសនឹងវិធានការសុខាភិបាល ទប់ស្កាត់ជំងឺកូវីដ១៩។

ក្រសួងសុខាភិបាលកម្ពុជាកាលពីថ្ងៃទី ២៣ ខែមីនា បានចេញប្រកាសពីទីកន្លែងមួយចំនួន ដែលត្រូវគោរពកាតព្វកិច្ចពាក់ម៉ាស និងរក្សាគម្លាតសុវត្ថិភាពដើម្បីទប់ស្កាត់ការឆ្លងកូវីដ១៩ ក្នុងសហគមន៍ បើមិនដូច្នោះទេនឹងត្រូវទទួលរងពិន័យតាមច្បាប់។

តាមប្រកាសរបស់ក្រសួងសុខាភិបាល អ្នកបើកបរយានយន្តគ្រប់ប្រភេទដែលជាមធ្យោបាយធ្វើដំណើររួម ឬមធ្យោបាយដឹកជញ្ជូនសម្រាប់បម្រើឱ្យសាធារណជន អ្នកដំណើរតាមមធ្យោបាយធ្វើដំណើររួម ឬមធ្យោបាយដឹកជញ្ជូនសម្រាប់បម្រើឱ្យសាធារណជន ត្រូវបានកំណត់ឱ្យពាក់ម៉ាសជាចាំបាច់។

ចំណែកកាតព្វកិច្ចពាក់ម៉ាស ដែលត្រូវបានលើកលែង ពោលគឺមិនមានការផាកពិន័យ ក្នុងអំឡុងពេលធ្វើដំណើរតាមមធ្យោបាយឯកជនបិទជិតតែម្នាក់ឯង ឬជាមួយបុគ្គល ដែលរស់នៅក្នុងលំនៅឋានជាមួយគ្នា។

បន្ថែមលើនេះបុគ្គលផ្សេងទៀតដែលកំពុងស្ថិតនៅតាមទីសារធារណៈជួបជុំមនុស្សចាប់ពី ២ នាក់ឡើងទៅ ហើយមិនពាក់ម៉ាស់ ក៏ត្រូវរងការពិន័យដែរ។

ការរងពិន័យ និងទទួលទណ្ឌកម្មដូចមានចែងក្នុងអនុក្រឹត្យស្តីពីវិធានសុខាភិបាលដើម្បីទប់ស្កាត់ការឆ្លងរាលដាលនៃជំងឺកូវីដ១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត។ មាត្រា១៩ នៃអនុក្រឹត្យ បានចែងថា អ្នកមិនពាក់ម៉ាស់ត្រូវផ្តន្ទាទោសជាពិន័យអន្តរការណ៍ពី ២០ម៉ឺនរៀល ទៅ ១លានរៀល៕

អត្ថបទ៖ ឡេង ដេត

The post ត្រូវពាក់ម៉ាស រក្សាគម្លាត អាជ្ញាធរចាប់ផ្តើមអនុវត្តការផាកពិន័យអ្នកល្មើស appeared first on Kampuchea Thmey Daily.

មិនពាក់ម៉ាស់ Archives - Kampuchea Thmey Daily

ក្រុង​សៀមរាប​អាជ្ញាធរ​ចុះ​ផាក​ពិន័យ​អ្នក​មិន​ពាក់​ម៉ាស

ខេត្តកណ្តាល​ ប្រកាស​ផាក​ពិន័យ​ អ្នក​មិន​ពាក់​ម៉ាស​និង​រក្សា​គម្លាត​សុវត្ថិភាព

ត្រូវពាក់ម៉ាស រក្សាគម្លាត អាជ្ញាធរចាប់ផ្តើមអនុវត្តការផាកពិន័យអ្នកល្មើស

ក្រុងសៀមរាបអាជ្ញាធរចុះផាកពិន័យអ្នកមិនពាក់ម៉ាស

ខេត្តកណ្តាល ប្រកាសផាកពិន័យ អ្នកមិនពាក់ម៉ាសនិងរក្សាគម្លាតសុវត្ថិភាព