យោងតាមសេចក្ដីប្រកាសរួមរវាងរាជរដ្ឋាភិបាលកម្ពុជា និង កម្មវិធីសហប្រជាជាតិរួមគ្នាស្តីពីមេរោគអេដស៍/ជំងឺអេដស៍ (UNAIDS) កាលពីថ្ងៃទី ១២ ខែមិថុនា ឆ្នាំ ២០២៦ បានឲ្យដឹងថា តាមការប៉ាន់ប្រមាណ មានករណីឆ្លងថ្មីចំនួន ៩៥៨ នៅឆ្នាំ ២០២៥ ក្នុងនោះ ៨៤% ស្ថិតនៅក្នុងចំណោមក្រុមប្រជាជនប្រឈមមុខខ្ពស់ និង ដៃគូរបស់ពួកគេ។ ការលុបបំបាត់ការឆ្លង មេរោគអេដស៍ថ្មី ដោយកម្រិតគោលដៅតិចជាង ២៥០ ករណី ក្នុង ១ ឆ្នាំ នៅឆ្នាំ ២០៣០ គឺជាគោលដៅជាតិចម្បង ប៉ុន្តែដើម្បីសម្រេចបាននូវគោលដៅនេះ ទាមទារឲ្យមានការខិតខំប្រកបដោយយុទ្ធសាស្ត្រ និង មានចីរភាព។

លោកវេជ្ជបណ្ឌិត អ៊ុក វិជ្ជា ប្រធានមជ្ឈមណ្ឌលជាតិប្រយុទ្ធនឹងជំងឺអេដស៍សើរស្បែក និង កាមរោគ នៃក្រសួងសុខាភិបាល បានឲ្យដឹងថា តួលេខនេះ បើធៀបទៅនឹងឆ្នាំ ២០២៤ ករណីឆ្លងថ្មី មានរហូតដល់ទៅចំនួន ១ ២០០ នាក់។ ក្នុងចំណោមករណីឆ្លងថ្មី ១ ២០០ នេះ គឺ ៨៨% ត្រូវបានប្រមូលផ្តុំនៅក្នុងក្រុមប្រឈមមុខខ្ពស់ និង ដៃគូរបស់ពួកគាត់ ដែលមាន ៤៤% ស្ថិតក្នុងចន្លោះអាយុ ១៤ ដល់ ២៤ ឆ្នាំ។

លោកវេជ្ជបណ្ឌិត បានបញ្ជាក់ថា អត្រា ៤៤% នៃក្រុមយុវវ័យ ក្នុងចំណោមករណីឆ្លងថ្មី ១ ២០០ នាក់ និង ក្រុមយុវវ័យដែលជាក្រុមប្រឈមមុខខ្ពស់តែប៉ុណ្ណោះ មិនមែនក្រុមយុវវ័យទូទៅនៅទូទាំងប្រទេស ដូចដែលបណ្តាញសង្គមមួយចំនួនបានផ្សព្វផ្សាយនោះទេ។

លោកវេជ្ជបណ្ឌិត បានបន្ថែមថា ការមាក់ងាយ ការរើសអើង និង ឧបសគ្គផ្សេងៗ នៅតែជារបាំងរារាំងមនុស្សមួយចំនួនពីការប្រើប្រាស់ សេវាដែលពួកគេត្រូវការ។ ការយល់ដឹងទាបអំពីមេរោគអេដស៍ និង វិធីបង្ការការឆ្លងមេរោគអេដស៍ បង្កើនភាពងាយរងគ្រោះនឹងការឆ្លងមេរោគអេដស៍ និង ជំងឺកាមរោគ ជាពិសេសក្នុងចំណោមយុវវ័យ។ ការវិនិយោគបន្តលើការឆ្លើយតបមេរោគអេដស៍ រួមទាំងលើសេវាដឹកនាំដោយសហគមន៍ មានសារៈសំខាន់ ដើម្បីការពារសមិទ្ធផលដែលយើងបានទទួល និង ធានាថា គ្មាននរណាម្នាក់ត្រូវបានទុកចោលឡើយ។ ដើម្បីឆ្លើយតបទៅនឹងបញ្ហាទាំងនេះ កម្ពុជា កំពុងផ្លាស់ប្តូរពីគម្រោងបណ្តោះអាសន្តគាំទ្រដោយម្ចាស់ជំនួយ ទៅរកប្រព័ន្ធមួយប្រកបដោយចីរភាពដែលដឹកនាំ និង គ្រប់គ្រងដោយរាជរដ្ឋាភិបាលកម្ពុជា។ យ៉ាងណាក៏ដោយ ប្រទេសកម្ពុជា សម្រេចបានគោលដៅសកល មេរោគអេដស៍ ៩៥-៩៥-៩៥ ក្លាយជាប្រទេសដំបូងគេនៅតំបន់អាស៊ី និង ប៉ាស៊ីហ្វិក ដែលនឹងឈានឆ្ពោះទៅរកការបញ្ចប់ជំងឺអេដស៍ដែលជាបញ្ហាគំរាមគំហែងចំពោះសុខភាពសាធារណៈនៅឆ្នាំ ២០៣០។ គោលដៅ ៩៥-៩៥-៩៥ មានន័យថា ៩៥% នៃអ្នករស់នៅជាមួយមេរោគអេដស៍បានដឹងពីស្ថានភាព មេរោគអេដស៍របស់ខ្លួន ៩៥% នៃអ្នកដែលដឹងថាខ្លួនមានផ្ទុកមេរោគអេដស៍បានទទួលបានការ ព្យាបាលដោយឱសថប្រឆាំងមេរោគអេដស៍ និង ៩៥% នៃអ្នកកំពុងទទួលការព្យាបាលដោយឱសថ ប្រឆាំងមេរោគអេដស៍ សម្រេចបានការបង្ក្រាបមេរោគអេដស៍ឲ្យនៅកម្រិតទាបបំផុត។

គួរបញ្ជាក់ថា គិតត្រឹមត្រីមាសទី ១ ឆ្នាំ ២០២៦ ក្រសួងសុខាភិបាល បាននិងកំពុងផ្តល់សេវាបង្ការ ថែទាំ និង ព្យាបាល នៅទូទាំងប្រទេស ដោយមានអ្នកផ្ទុករស់ជាមួយមេរោគអេដស៍ ចំនួន ៧២ ៤៤០ នាក់ កំពុងទទួលសេវាព្យាបាលដោយឱសថប្រឆាំងមេរោគអេដស៍ នៅតាមសេវាចំនួន ៧៤ កន្លែង ក្នុងរាជធានី ខេត្ត ទាំង ២៥ ក្នុងនោះមាន ៧២ កន្លែង ស្ថិតក្នុងមូលដ្ឋានសុខាភិបាលសាធារណៈ និង ២ កន្លែងទៀត ដំណើរការដោយអង្គការមិនមែនរដ្ឋាភិបាល។ ក្នុងនោះ ៧៦,១៨% ស្មើនឹង ៥៥ ១៩៨ នាក់ ក្នុងចំណោម ៧២ ៤៤០ នាក់ នៃអ្នកផ្ទុកមេរោគអេដស៍ ដែលកំពុងទទួលឱសថប្រឆាំងមេរោគអេដស៍ បានទទួលប័ណ្ណមូលនិធិសមធម៌សុខាភិបាល ហើយនឹងបន្តចុះបញ្ជីជាបន្តបន្ទាប់៕
អត្ថបទ ៖ សំអឿន

The post កម្ពុជា កំពុងស្ថិតលើផ្លូវត្រឹមត្រូវក្នុងការឈានឆ្ពោះទៅរកការលុបបំបាត់ការឆ្លងថ្មី នៃមេរោគអេដស៍ នៅឆ្នាំ ២០៣០ appeared first on Kampuchea Thmey Daily.

​គោលដៅសកលមេរោគអេដស៍ ៩៥-៩៥-៩៥ គឺមានន័យថា ៩៥% នៃ​អ្នក​ផ្ទុកមេរោគ​អេដស៍បានដឹងពីស្ថានភាពផ្ទុកមេរោគអេដស៍របស់ខ្លួន, ៩៥% នៃអ្នក​ដែលដឹងស្ថានភាព​ផ្ទុកមេរោគអេដស៍បានទទួល​ការព្យាបាលដោយឱសថប្រឆាំងមេរោគអេដស៍ និង​៩៥% ​នៃអ្នកដែល​បាន​​​ទទួលការព្យា​បាល​ដោយឱសថប្រឆាំងមេរោគអេដស៍ មានបន្ទុកមេរោគអេដស៍កម្រិតទាប។

នាយកប្រចាំតំបន់នៃ UNAIDS  ​គូសបញ្ជាក់បន្ថែមថា​ កម្ពុជាគឺជាប្រទេសមួយក្នុងចំណោមប្រទេស៧ ក្នុង​ពិភពលោក​ និងជាប្រទេសទីមួយនៅក្នុងតំបន់អាស៊ី-ប៉ាស៊ីហ្វិក ដែលអាចសម្រេចបានគោលដៅសកលនេះយ៉ាងត្រចះត្រចង់​ និងបានលើកទឹកចិត្តឱ្យកម្ពុជាចែករំលែកបទពិសោធន៍ជោគជ័យ​​ ទៅកាន់បណ្ដាប្រទេសក្នុង​ពិភពលោក​។

នាយកប្រចាំតំបន់នៃ UNAIDS  ក៏បានសម្ដែងនូវការវាយតម្លៃខ្ពស់ចំពោះការយកចិត្តទុកដាក់ និង ភាពជាអ្នកដឹកនាំ​ របស់រាជរដ្ឋាភិបាលកម្ពុជា​ ក្នុងការលើកកម្ពស់សុខភាពសាធារណៈ ពិសេសការដាក់ចេញ​​ និងការអនុវត្តនូវក្របខណ្ឌគោលនយោបាយជាតិស្តីពីគាំពារសង្គម និងគូសបញ្ជាក់ថា UNAIDS នៅតែបន្តផ្ដល់នូវការគាំទ្រ ក៏ដូចជាសហការជាមួយកម្ពុជា នៅក្នុងវិស័យសុខាភិបាល ជាពិសេស​ គឺការប្រយុទ្ធប្រឆាំងនឹងជំងឺអេដស៍នេះ។

សម្ដេចធិបតីបានវាយតម្លៃខ្ពស់ចំពោះតួនាទីរបស់អង្គការសហប្រជាជាតិនៅក្នុងការរួមចំណែកអភិវឌ្ឍសង្គម-សេដ្ឋកិច្ចកម្ពុជា ជាពិសេសក្នុងវិស័យសុខាភិបាលកម្ពុជា ក៏ដូចជាការគាំទ្រដល់កម្មវិធីប្រយុទ្ធនឹងជំងឺអេដស៍នៅកម្ពុជា។

សម្ដេចធិបតីក៏បានគូសបញ្ជាក់ជូនលោកនាយកប្រចាំតំបន់ថា ទាំង​រាជរដ្ឋាភិបាល​អាណត្តិមុនៗរហូតមកដល់​រាជរដ្ឋាភិបាលអាណត្តិទី៧នេះ, រាជរដ្ឋាភិបាលនៅតែផ្តល់អាទិភាពខ្ពស់​ និងចាត់ទុកប្រជាជនជាស្នូល តាមរយៈ​ការលេីកកម្ពស់សុខភាព,​ ការអប់រំ និងការបង្កើតការងារ ដែលជាគ្រឹះដ៏រឹងមាំសម្រាប់ទ្រទ្រង់ការរីកចម្រើនរបស់ប្រទេសជាតិ។ បន្ថែមពីនេះ, រាជរដ្ឋាភិបាលតែងតែយកចិត្តទុកដាក់ខ្ពស់ និងកិច្ចខិតខំលើកកម្ពស់វិស័យសុខាភិបាល តាមរយៈការធ្វេីឱ្យកាន់តែប្រសេីរឡេីងមូលដ្ឋានសុខាភិបាលទាំងថ្នាក់ជាតិ និងថ្នាក់មូលដ្ឋាន​។

ព្រមជាមួយគ្នានេះ, សម្ដេចធិបតីបានបន្ថែមថា ទោះបីជាកម្ពុជាសម្រេចបានសមិទ្ធផលជាច្រេីនក្នុងវិស័យសុខាភិបាលក្តី, កម្ពុជានៅតែចាត់ទុកជំងឺអេដស៍ និងជំងឺឆ្លងនានា ជាហានិភ័យចម្បងចំពោះសុខភាពសាធារណៈ ដែលរាជរដ្ឋាភិបាលត្រូវបន្តដោះស្រាយ និងយកចិត្តទុកដាក់ខ្ពស់​​ជានិច្ច។
 
មុននឹងបញ្ចប់, សម្ដេចធិបតីបានលើកទឹក​ឱ្យUNAIDS បន្តការផ្សារភ្ជាប់ទំនាក់ទំនង​ និងពង្រឹងកិច្ចសហប្រតិបត្តិការជាមួយកម្ពុជាក្នុង​ការ​អភិវឌ្ឍវិស័យសុខាភិបាល​ ព្រមទាំង​បាន​គូសបញ្ជាក់ថា​ រាជរដ្ឋាភិបាល​កម្ពុជាត្រៀមខ្លួនជាស្រេចក្នុងការគាំទ្រ និងសហការជាមួយអង្គការសហប្រជាជាតិ ព្រមទាំងដៃគូអភិវឌ្ឍន៍នានា ដើម្បីឈានទៅសម្រេចបាននូវសមិទ្ធផលថ្មីៗជាបន្តបន្ទាប់​ បន្ថែមទៀត៕

The post UNAIDSលើកទឹកចិត្តឱ្យកម្ពុជាចែករំលែកពីភាពជោគជ័យ នៃការសម្រេចបាននូវគោលដៅសកលមេរោគអេដស៍ ៩៥-៩៥-៩៥ appeared first on Kampuchea Thmey Daily.

លោកវេជ្ជបណ្ឌិត អ៊ុក វិជ្ជា ប្រធានមជ្ឈមណ្ឌលជាតិប្រយុទ្ធនឹងជំងឺអេដស៍សើស្បែក និងកាមរោគ នៃក្រសួងសុខាភិបាល បានមានប្រសាសន៍នៅព្រឹកថ្ងៃទី ២៨ ឧសភា នេះថា ក្រសួងសុខាភិបាល បាននិងកំពុងផ្តល់សេវាបង្ការ ថែទាំ និងព្យាបាលនៅទូទាំងប្រទេស ដោយគិតត្រឹមត្រីមាសទី ១ ឆ្នាំ ២០២៦ មានអ្នកផ្ទុករស់នៅជាមួយមេរោគអេដស៍ ចំនួន ៧២ ៤៤០ នាក់ កំពុងទទួលសេវាព្យាបាលដោយឱសថប្រឆាំងមេរោគអេដស៍ នៅតាមសេវាចំនួន ៧៤ កន្លែង ក្នុងរាជធានី ខេត្ត ទាំង ២៥ ក្នុងនោះ មាន ៧២ កន្លែង ស្ថិតក្នុងមូលដ្ឋានសុខាភិបាលសាធារណៈ និង ២ កន្លែងទៀត ដំណើរការដោយអង្គការមិនមែនរដ្ឋាភិបាល (មន្ទីរពេទ្យកុមារអង្គរ និងគ្លីនិកឈូកស)។

លោកវេជ្ជបណ្ឌិត បានបន្តថា ក្នុងចំណោមអ្នកជំងឺ ៧២ ៤៤០ នាក់ កំពុងទទួលសេវាព្យាបាលដោយឱសថប្រឆាំងមេរោគអេដស៍ ក្នុងនោះមានអ្នកជំងឺ ៥៥ ១៩៨ នាក់ ស្មើនឹង ៧៦,១៨% បានទទួលប័ណ្ណមូលនិធិសមធម៌សុខាភិបាល ហើយនឹងបន្តចុះបញ្ជីជាបន្តបន្ទាប់។

លោកវេជ្ជបណ្ឌិត បានបន្តថា «ការផ្តល់ប័ណ្ណសមធម៌ជូនដល់អ្នកផ្ទុកមេរោគអេដស៍នេះ នៅមិនទាន់ដឹងថា នឹងបញ្ចប់នៅពេលណាទេ ដោយសារមានអ្នកជំងឺចាស់ និងថ្មី មកស្នើសុំជាបន្តបន្ទាប់ ប៉ុន្តែអ្នកផ្ទុកមេរោគអេដស៍ អាចទទួលបានប័ណ្ណសមធម៌នេះបាន ទាមទារឱ្យចុះបញ្ជីនៅតាមទីតាំងដែលគាត់ទៅទទួលសេវាតាមរយៈថេបប្លែកជាប្រព័ន្ធឌីជីថលតភ្ជាប់ប្រព័ន្ធទិន្នន័យជាមួយក្រសួងផែនការ ហើយការងារនេះ ក៏មានសហការជាមួយអង្គការ យូអេស អេអាយឌី អង្គការយូអិនអេដស៍ អង្គការយូអិនឌីភី»។

លោកវេជ្ជបណ្ឌិត បានបន្តទៀតថា អ្នកផ្ទុកមេរោគអេដស៍ទទួលបានប័ណ្ណសមធម៌ពិតជាមានសារៈសំខាន់ណាស់ក្នុងការចូលរួមកាត់បន្ថយការចំណាយច្រើននៅក្នុងគ្រួសារ ព្រោះពួកគាត់ទទួលបានការលើកលែងបង់ប្រាក់ពេលទៅពិនិត្យ និងព្យាបាលជំងឺផ្សេងៗ នៅតាមមន្ទីរពេទ្យរដ្ឋ ដោយរាជរដ្ឋាភិបាលជាអ្នកបង់ថ្លៃជំនួសជួយរួមចំណែកកាត់បន្ថយការចំណាយផ្សេងៗ ក្នុងគ្រួសារ លើកស្ទួយជីវភាពកាន់តែប្រសើរ។

លោកវេជ្ជបណ្ឌិត បានអំពាវនាវដល់អ្នកសង្ស័យថាមានផ្ទុកមេរោគអេដស៍ ត្រូវក្លាហានចេញមកធ្វើតេស្តឈាមរកមេរោគអេដស៍ ដើម្បីទទួលបានការព្យាបាលជំងឺត្រឹមត្រូវ និងទទួលបានប័ណ្ណសមធម៌ ដើម្បីទទួលបានអត្ថប្រយោជន៍ជាច្រើនពីរាជរដ្ឋាភិបាល។ ចំណែកអ្នកផ្ទុកមេរោគអេដស៍ ត្រូវព្យាបាលឱ្យបានទៀងទាត់ជាប់លាប់ និងត្រឹមត្រូវ ពោលគឺអនុវត្តទៅតាមការណែនាំរបស់គ្រូពេទ្យ ហើយកាលណាអ្នកជំងឺព្យាបាលបានត្រឹមត្រូវ នឹងអាចរស់នៅបានយូរអង្វែងដូចប្រជាពលរដ្ឋធម្មតាដែរ។

គួរបញ្ជាក់ថា តាមការប៉ាន់ស្មាននៅឆ្នាំ ២០២៤ កម្ពុជា មានចំនួនអ្នករស់នៅជាមួយមេរោគអេដស៍ប្រមាណ ៧៦ ០០០ នាក់ ក្នុងនោះមានអ្នកជំងឺ ៧២ ៤៤០ នាក់ កំពុងទទួលសេវាព្យាបាលដោយឱសថប្រឆាំងមេរោគអេដស៍ហើយ ប្រហែលនៅសល់អ្នករស់នៅជាមួយមេរោគអេដស៍ជាង ៣៥ ០០០ នាក់ នៅមិនទាន់បានដឹងខ្លួន និងមិនទាន់បានធ្វើតេស្ត និងទទួលសេវាព្យាបាលនៅឡើយទេ ខណៈក្នុង ១ ឆ្នាំៗ មានអ្នកឆ្លងថ្មី នៃមេរោគអេដស៍ប្រមាណ ១ ២០០ នាក់ និងស្លាប់ប្រមាណ ១ ១០០ នាក់៕
អត្ថបទ ៖ សំអឿន

The post អ្នកផ្ទុកមេរោគអេដស៍ជាង ៥៥ ០០០ នាក់ ទទួលបានបណ្ណមូលនិធិសមធម៌ពីរាជរដ្ឋាភិបាល appeared first on Kampuchea Thmey Daily.

ការអំពាវនាវជាថ្មី ខណៈចំនួនឆ្លងថ្មីនៃមេរោគអេដស៍ក្នុងចំណោមមនុស្សពេញវ័យមានប្រមាណ ១ ២០០នាក់ ក្នុងនោះ ៤៤% ជាយុវវ័យមានអាយុពី១៥-២៤ឆ្នាំ។ នេះបើផែ្អកតាមរបាយការណ៍ក្នុងឆ្នាំ ២០២៤។ ការអំពាវនាវនេះ ក៏បន្ទាប់ពីមានការជជែកវែកញែកជុំវិញករណី បុគ្គលមួយរូបជាអ្នកផលិតមាតិកា (Content creator) បានចម្លងមេរោគអេដស៍ ទៅដៃគូម្ខាងទៀតដែលកំពុងបង្កការព្រួយបារម្ភដល់សុខភាពសាធារណៈ។

តាមរយៈកម្ពុជាថ្មី ក្នុងនាមអាជ្ញាធរជាតិប្រយុទ្ធនឹងជំងឺអេដស៍ បណ្ឌិត ឈឹម ឃិនដារ៉េត អំពាវនាវដល់ សាធារណជន ជាពិសេសយុវជនថា ៖«អេដស៍មិនទាន់ចប់ អេដស៍នៅជាការគំរាមកំហែងដល់សុខភាពសាធារណៈនៅកម្ពុជា មេរោគអេដស៍នៅក្បែរយើង ដូចស្រមោល ប្រសិនបើយើងប្រហែសតែបន្តិច នោះមេរោគអេដស៍អេដស៍នឹងឆ្លងចូលខ្លួនប្រាណយើងភ្លាម»។ ក្នុងន័យនេះ លោកបណ្ឌិតអំពាវនាវឱ្យចៀសវាងការប្រព្រឹត្តប្រឈមនឹងឆ្លងមេរោគអេដស៍, ចូលរួមលុបបំបាត់ការមាក់ងាយរើសអើង អ្នកផ្ទុកមរោគអេដស៍ ប្រជាជនគន្លឹះ (ក្រុមបុរសរួមភេទជាមួយបុរស, ក្រុមស្ត្រីបំប្លែងភេទ, ក្រុមអ្នកបម្រើសេវាកម្សាន្ត, អ្នកប្រើគ្រឿងញៀន)។

មន្រ្តីជំនាញ ក៏ក្រើនរំឭកដល់យុវជនកុំប្រញាប់ប្រឡូកនឹងការរួមភេទដែលអាចឱ្យប៉ះពាល់សុខភាពផង  និងការសិក្សារៀនសូត្រផង និងលើកទឹកចិត្តឱ្យយុវជនស្វែងយល់ពីការអប់រំសុខភាពបន្តពូជ ជាពិសេសអំពីមេរោគអេដស៍និងជំងឺអេដស៍ រួមជាមួយជំងឺកាមរោគនានា ដើម្បីការពារខ្លួនកុំឱ្យឆ្លងមេរោគ។

សូមបញ្ជាក់ថា​ ការសិក្សាប៉ាន់ប្រមាណអំពីស្ថានភាពមេរោគអេដស៍និងជំងឺអេដស៍នៅប្រទេសកម្ពុជា ត្រូវធ្វើឡើងដោយមានកិច្ចសហការរវាងក្រសួងសុខាភិបាល អាជ្ញាធរជាតិប្រយុទ្ធនឹងជំងឺអេដស៍ និងអង្គការ UNAIDS ប្រចាំប្រទេសកម្ពុជា ព្រមទាំងមានការចូលរួមពីអង្គការសង្គមស៊ីវិលធ្វើការងារ្រយុទ្ធនឹងជំងឺអេដស៍។ តាមបែបវិទ្យាសាស្ត្រ ការធ្វើប៉ាន់ប្រមាណ គឺយើងធ្វើតាមរយៈការប្រមូលទិន្នន័យនៅឆ្នាំបន្ទាប់នៃឆ្នាំអនុវត្ត គឺមានន័យថាលទ្ធផលនៃការប៉ាន់ប្រមាណឆ្នាំ២០២៤ យើងត្រូវប្រមូលនិងវិភាគនៅឆ្នាំ២០២៥ ហើយប្រកាសជាផ្លូវការដោយអាជ្ញាធរជាតិប្រយុទ្ធនឹងជំងឺអេដស៍ ក្រសួងសុខាភិបាល និងអង្គការ UNAIDS ប្រចាំប្រទេសកម្ពុជា នៅក្នុងឆ្នាំ២០២៥។ ដោយឡែក ស្ថានភាពមេរោគអេដស៍និងជំងឺអេដស៍ឆ្នាំ២០២៥ គឺត្រូវប្រមូល វិភាគ និងប្រកាសឱ្យប្រើប្រាស់ជាផ្លូវការនៅឆ្នាំ២០២៦។

បើតាមបណ្ឌិត ឈឹម ឃិនដារ៉េត ដោយមកដល់ពេលនេះ ទិន្នន័យឆ្នាំ២០២៥ នៅមិនទាន់ប្រកាសឱ្យប្រើប្រាស់ជាផ្លូវការនោះទេ។ យ៉ាងណាមិញ ទិន្នន័យឆ្នាំ២០២៤ ចំនួនអ្នកផ្ទុកមេរោគអេដស៍មានប្រមាណ ៧៦ ០០០នាក់ ក្នុងនោះគិតត្រឹមត្រីមាសទី៤ ឆ្នាំ២០២៥ ដែលក្នុងនោះនៅត្រីមាសទី៤ ឆ្នាំ២០២៥ អ្នកផ្ទុកមេរោគអេដស៍ចំនួន ៧២ ០៩៧នាក់បានទទួលសេវាថែទាំព្យាបាលនៅមូលដ្ឋានសុខាភិបាលរដ្ឋ។

ផ្អែកតាមច្បាប់ស្តីពីការបង្ការ និងការប្រយុទ្ធទប់ស្កាត់ការរីករាលដាលមេរោគអេដស៍/ជំងឺអេដស៍ មាត្រា ១៨៖ហាមឃាត់ដាច់ខាតចំពោះអ្នកដែលដឹងថា ខ្លួនមានមេរោគអេដស៍/ជំងឺអេដស៍ (HIV/AIDS) ទៅប្រព្រឹត្តក្នុងចេតនាចម្លងទៅអ្នកដទៃ។ មាត្រា ៥០៖ ជនណាដែលប្រព្រឹត្តផ្ទុយនឹងមាត្រា១៨ នៃច្បាប់នេះ ត្រូវផ្តន្ទាទោសដាក់ពន្ធនាគារពី ១០ (ដប់) ឆ្នាំ ទៅ១៥ (ដប់ប្រាំ) ឆ្នាំ៕

The post មន្រ្តីជំនាញ អំពាវនាវជាពិសេសដល់យុវជន ចូលរួមការពារមេរោគអេដស៍ខណៈការឆ្លងថ្មីក្នុងចំណោមពួកគេមានអត្រាខ្ពស់ appeared first on Kampuchea Thmey Daily.

ថ្លែងក្នុងទិវាស្រោមអនាម័យអន្តរជាតិ ស្របជាមួយទិវានៃក្តីស្រឡាញ់ ក្រោមប្រធានបទ «កុំស្ទាក់ស្ទើប្រើស្រោមអនាម័យ» ដែលរៀបចំឡើងដោយអង្គការមូលនិធិថែទាំសុខភាពអ្នកជំងឺអេដស៍ ( AHF) កម្ពុជា កាលពីរសៀលថ្ងៃទី១៤ ខែកុម្ភៈ ឆ្នាំ២០២៦ នៅផ្សារទំនើប ខេម៉ល ផ្លូវវេងស្រេង រាជធានីភ្នំពេញ លោកបណ្ឌិត ឈឹម ឃិនដារ៉េត អគ្គលេខាធិកាអាជ្ញាធរជាតិប្រយុទ្ធនឹងជំងឺអេដស៍បានមានប្រសាសន៍ថា ការរៀបចំទិវាស្រោមអនាម័យអន្តរជាតិ ស្របជាមួយទិវានែក្តីស្រឡាញ់ របស់អង្គការ AHF កម្ពុជា ក្រោមប្រធានបទ «កុំស្ទាក់ស្ទើប្រើស្រោមអនាម័យ» នាពេលនេះគឺជាការឆ្លើយតបទៅនឹងគោលនយោបាយររបស់រាជរដ្ឋាភិបាលក្នុងការឆ្លើយតប និងទប់ស្កាត់នូវមេរោគអេដស៍ និងជំងឺអេដស៍នៅកម្ពុជា ខណៈមកដល់ពេលនេះប្រទេសកម្ពុជានៅតែចាត់ទុកមេរោគអេដស៍ និងជំងឺអេដស៍ នៅតែមាន ហានិភ័យ និងត្រូររួមគ្នាទប់ស្កាត់កុំឱ្យមានការរីករាលដាលបន្ថែមទៀត។

លោកបណ្ឌិត ឈឹម ឃិនដារ៉េត បានបន្តថា ថ្មីៗនេះរាជរដ្ឋាភិបាលក្រោមកិច្ចដឹកនាំដ៏ស្វាហាប់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ក៏បានដាក់ចេញផែនការដើម្បីឆ្លើយតបទៅនឹងស្ថានភាពជាក់ស្ដែង និងជំរុញនូវការអនុវត្តន៍ស្រោមអនាម័យឱ្យបាន ១០០% ដើម្បីធ្វើយ៉ាងណាទប់ស្កាត់ឱ្យខានតែបាននូវការឆ្លងថ្មីនៃមេរោគអេដស៍ដ៏កាចសាហាវមួយនេះ និងទប់ស្កាត់ធ្វើយ៉ាងឱ្យកុំឱ្យមានការឆ្លងមេរោគនេះថ្មីបន្ថែមទៀត និងធ្វើយ៉ាងណាឱ្យការឆ្លងថ្មីនេះ មានតិចជាងម្នាក់ក្នុងមួយថ្ងៃ ឫក្នុងរង្វង់ ២០០នាក់ ក្នុងមួយឆ្នាំ ខណៈបច្ចុប្បន្នមានអ្នកឆ្លងមេរោគអេដស៍១២០០នាក់ ក្នុងមួយឆ្នាំឬស្មើនឹងប្រមាណជាង៣នាក់ក្នុង១ថ្ងៃដែលជាចំនួនមួយខ្ពស់គួរឱ្យព្រួបារម្ភផងដែរ។

លោកសាស្ត្រាចារ្យជំនួយ អ៊ុក វិជ្ជា ប្រធានមជ្ឈមណ្ឌលជាតិប្រយុទ្ធនឺងជំងឺអេដស៍សើស្បែក និងកាមរោគបានបញ្ជាក់ថាទិវាស្រោមអនាម័យអន្តរជាតិនេះធ្វើឡើងដើម្បីជាការក្រើនរម្លឹកដល់យុវជន និងប្រជាពលរដ្ឋដែលថា ជំងឺអេដស៍នៅតែមានហានិភ័យដ៏ធំមួយនៅកម្ពុជា ខណៈមកដល់សព្វថ្ងៃនេះមានមនុស្សបានឆ្លងមេរោគអេដស៍នេះកើនឡើងជាបន្តបន្ទាប់ ហើយមានតែការប្រើប្រាស់ស្រោមអនាម័យទេ ជាមធ្យោបាយដ៏ល្អបំផុត និងមានប្រសិទ្ធភាពបំផុត ក្នុងការការពារពីមេរោគអេដស៍ និងជំងឺផ្សេងៗ។

ចំណែកលោកស្រីបណ្ឌិត សឿ សុជាតា អនុរដ្ឋលេខាធិកាក្រសួង ក្រសួងអប់រំយុវជន និងកីឡាបានលើកឡើងថាការប្រើប្រាស់ស្រោមអនាម័យពិតជាមានសារសំខាន់ណាស់ព្រោះថាក្រៅពីទប់ស្កាត់ការឆ្លងមេរោគអេដស៍ ជំងឺកាមរោគផ្សេងៗបានប៉ុណ្ណោះទេថែមទាំងអាចការពារការមានផ្ទៃពោះដែលមិនបានគ្រោងទុកផងដែរ។

លោកវេជ្ជបណ្ឌិត ចន ផាន់ណា ប្រធានគ្រប់គ្រងកម្មវិធីប្រចាំប្រទេស អង្គការមូលនិធិថែទាំសុខភាពអ្នកជំងឺអេដស៍ (AHF)បានបញ្ជាក់ថា ការរៀបចំអបអរសាទរទិវាស្រោមអនាម័យអន្តរជាតិ ជាមួយយុទ្ធនាការផ្សព្វផ្សាយកម្មវិធីយុទ្ធនាការផ្សព្វផ្សាយទិវានៃក្តីស្រឡាញ់១៤ កុម្ភៈ ឆ្នាំ២០២៦នេះ ធ្វើឡើងក្នុងគោលបំណងដើម្បីស្វែងយល់ពីសារប្រយោជន៍នៃស្រោមអនាម័យ និងដើម្បីលើកកម្ពស់ការប្រើប្រាស់ស្រោមអនាម័យ ដែលជាវិធីសាមញ្ញ ប៉ុន្តែមានប្រសិទ្ធភាពក្នុងការរក្សាសុខភាព និងសុវត្ថិភាព ដែលបានរៀបចំទូទាំងពិភពលោកដោយអង្គការមូលនិធិថែទាំសុខភាពអ្នកជំងឺអេស៍ ទូទាំង ៤៧ប្រទេស។

លោកវេជ្ជបណ្ឌិត ចន ផាន់ណា បានបញ្ជាក់ទៀតថា ការកើនឡើងនៃអត្រាឆ្លងជំងឺកាមរោគនៅទូទាំងពិភពលោក ជាពិសេសជំងឺស្វាយ មិនមែនជារឿងអាថ៌កំបាំងទេ វាជាអ្វីដែលកើតឡើងនៅពេលដែលមូលនិធិសកលថយចុះ ហើយស្រោមអនាម័យមិនត្រូវបានផ្តល់អាទិភាពសម្រាប់ការបង្ការមេរោគអេដស៍។ បើគ្មានការកែតម្រូវជាបន្ទាន់ទេ ការឆ្លងមេរោគអេដស៍នឹងកើនឡើងក្នុងពេលឆាប់ៗនេះ ដូចនេះយើងទាំងអស់គ្នាត្រូវមានការប្តេជ្ញាចិត្តឡើងវិញដើម្បីធានាថា ស្រោមអនាម័យគឺឥតគិតថ្លៃ ឬមានតម្លៃសមរម្យ និងអាចរកបានយ៉ាងទូលំទូលាយសម្រាប់អ្នកដែលត្រូវការវាបំផុត។ ទិវាស្រោមអនាម័យអន្តរជាតិក៏បានរម្លឹកយើងថា ស្រោមអនាម័យមានសុវត្ថិភាពជាង ទាក់ទាញ និងការបង្កាសម្រាប់ទូទាំងពិភពលោក៖ «កុំស្ទាក់ស្ទើរប្រើស្រោមអនាម័យ»៕

អត្ថបទ៖ សំអឿន

The post មន្ត្រីជាន់ខ្ពស់ជំរុញឱ្យយុវវ័យកុំស្ទាក់ស្ទើរប្រើស្រោមអនាម័យដើម្បីចូលរួមទប់ស្កាត់ការឆ្លងរាលដាលមេរោគអេដស៍នៅកម្ពុជា appeared first on Kampuchea Thmey Daily.

ថ្លែងក្នុងកិច្ចប្រជុំស្តីពីការប្រកាសការលើកកម្ពស់ការប្រើប្រាស់ស្រោមអនាម័យ និងការឆ្លើយតមទៅនឹងមេរោគអេដស៍ និងជំងឺអេដស៍ជាមួយបណ្តាញសារព័ត៌មានដែលរៀបចំឡើងដោយអង្គការមូលនិធិថែទាំសុខភាពអ្នកជំងឺអេដស៍ (AHF) កាលពីរសៀលថ្ងៃទី ៤ កុម្ភៈ ឆ្នាំ២០២៦ លោកទេសរដ្ឋមន្ត្រី អៀង មូលី មានប្រសាសន៦ថា ការឆ្លងថ្មីនៃអ្នកជំងឺអេដស៍ភាគច្រើនទៅលើក្រុមគោលដៅមួយចំនួនដូចជានារីរកស៊ីបម្រើសេវាផ្លូវភេទ ការស្រឡាញ់ភេទដូចគ្នា និងអ្នកប្រើប្រាស់គ្រឿងញៀន ដោយសារក្រុមទាំងនេះរួមភេទជាមួយដៃគូមិនបានប្រើប្រាស់ស្រោមអនាម័យត្រឹមត្រូវ។

លោកបានលើកឡើងថា«ដើម្បីទប់ស្កាត់ការឆ្លងមេរោគអេដស៍ រដ្ឋាភិបាលបានចេញគោលនយោបាយលើកទឹកចិត្តដល់អ្នកដឹងខ្លួន ឬសង្ស័យផ្ទុកមេរោគនេះដើម្បីទៅធ្វើតេស្តរកមេរោគអេដស៍ដោយផ្តល់គោលការណ៍មួយចំនួនដូចជាការផ្តល់ប័ណ្ណប.ស.ស និងផ្តល់សេវាព្យាបាលជូនគាត់»។ លោកគូសបញ្ជាក់ថា ការប្រើស្រោមអនាម័យពិតជាមានសារៈសំខាន់ណាស់ក្នុងទប់ស្កាត់ការឆ្លងមេរោគអេដស៍ ការឆ្លងជំងឺកាមរោគផ្សេងៗ និងការមិនចង់មានកូនដ៏មានប្រសិទ្ធភាព។ ដូច្នេះត្រូវតែធ្វើការផ្សព្វផ្សាយឱ្យបានទូលំទូលាយ ដែលរាជរដ្ឋាភិបាលចង់បានក្នុងលុបបំបាត់ការឆ្លងជំងឺអេដស៍នេះ។

ចំណែក លោកវេជ្ជបណ្ឌិត ឈឹម សារ៉ាត់ នាយកប្រចាំតំបន់អាស៊ីអង្កការមូលនិធិថែទាំសុខភាពអ្នកឆ្លងជំងឺអេដស៍(AHF)បានលើកឡើងថា ការផ្សព្វផ្សាយឱ្យប្រើប្រាស់ស្រោមអនាម័យ ដើម្បីឱ្យពលរដ្ឋយល់ដឹងកាន់តែទូលំទូលាយ ក្នុងការទប់ស្កាត់ការឆ្លងមេរោគអេដស៍។ លោកបានបន្តថា ការផ្សព្វផ្សាយការប្រើប្រាស់ស្រោមអនាម័យជាមួយនឹងសារសាមញ្ញមួយ “កុំស្ទាក់ស្ទើរប្រើស្រោមអនាម័យ” ស្រោមអនាម័យ គឺជាឧបករណ៍ដ៏មានឥទ្ធិពលបំផុត និងចំណាយតិចបំផុតមួយក្នុងការបង្ការមេរោគអេដស៍ និងជំងឺកាមរោគ។

ទោះជាមូលនិធិសម្រាប់កម្មវិធីសុខភាពកំពុងថយចុះ ប៉ុន្តែហានិភ័យនៃការឆ្លងមេរោគអេដស៍ និងជំងឺកាមរោគមិនទាន់បានថយចុះនៅឡើយទេ។ នៅក្នុងបរិបទនេះស្រោមអនាម័យមានសារៈសំខាន់ជាងពេលណាៗទាំងអស់ នៅតែជាមធ្យាបាយមួយ ក្នុងចំណោមមធ្យាបាយផ្សេងៗទៀតមានតម្លៃសមរម្យ និងមានប្រសិទ្ធភាពបំផុត ដែលយើងមានដើម្បីបង្ការមេរោគអេដស៍ ជំងឺឆ្លងតាមការរួមភេទផ្សេងទៀត និងការមានផ្ទៃពោះដោយមិនបានគ្រោងទុក។ ស្រោមអនាម័យមិនមែនជាបច្ចេកវិទ្យាថ្មីទេ ប៉ុន្តែវាត្រូវបានបញ្ជាក់ឱ្យឃើញថា វាអាចទុកចិត្តបាន និងមានឥទ្ធិពលខ្លាំង។ វាផ្តល់ការការពារពីរយ៉ាងគឺ វាការពារប្រឆាំងនឹងមេរោគអេដស៍ និងជំងឺកាមរោគផ្សេងទៀត។

លោកវជ្ជបណ្ឌិតថ្លែងថា« ប្រទេសកម្ពុជាបានបង្ហាញភាពជាអ្នកដឹកនាំដ៏រឹងមាំរួចហើយ តាមរយៈគោលនយោបាយប្រើប្រាស់ស្រោមអនាម័យ ១០០ ភាគរយ ជាពិសេសនៅក្នុងគ្រឹះស្ថានកម្សាន្តនានា។ គោលនយោបាយនេះ បានជួយសង្គ្រោះជីវិត និងបង្ហាញថានៅពេលដែលមានគោលការណ៍ច្បាស់លាស់ ការប្តេជ្ញាចិត្ត និងកិច្ចសហប្រតិបត្តិការ នឹងនាំឱ្យសុខភាពសាធារណៈប្រសើរឡើង »។

គួរបញ្ជាក់ថា អង្គការមូលនិធិថែទាំសុខភាពអ្នកជំងឺអេដស៍ (AHF) គឺជាអង្គការមិនស្វែងរកប្រាក់ចំណេញសកលដែលផ្តល់ថ្នាំទំនើប និងការតស៊ូមតិដល់មនុស្សជាង ២,៨ លាននាក់នៅក្នុងប្រទេសចំនួន ៥០ ទូទាំងពិភពលោកនៅអាហ្វ្រិក អាមេរិក តំបន់អាស៊ី/ប៉ាស៊ីហ្វិក និងអឺរ៉ុប។ បច្ចុប្បន្ន (AHF) ជាអ្នកផ្តល់សេវាថែទាំសុខភាពអេដស៍ មិនស្វែងរកប្រាក់ចំណេញធំជាងគេបំផុតនៅលើពិភពលោក៕

អត្ថបទ៖ សំអឿន

The post មន្រ្តីព្រមានថា មេរោគអេដស៍អាចផ្ទុះឡើងវិញ បើអត្រាអ្នកឆ្លងថ្មីមិនធ្លាក់ក្រោម១នាក់ក្នុងមួយថ្ងៃ appeared first on Kampuchea Thmey Daily.

ក្នុងចំណោមអ្នកឆ្លងថ្មី មានមនុស្សវ័យក្មេងដែលមានអាយុពី ១៥ ទៅ ២៤ ឆ្នាំច្រើនជាងគេ។ បើយោងតាមមជ្ឈមណ្ឌលសម្រាប់មេរោគអេដស៍/ជំងឺអេដស៍ និងជំងឺឆ្លងតាមផ្លូវភេទ (CHAS) នៅចន្លោះខែមករា និងខែមិថុនា មនុស្សជិត ២០០ នាក់​ក៏ត្រូវបានគេធ្វើរោគវិនិច្ឆ័យថាមានផ្ទុកមេរោគអេដស៍ ហើយមនុស្សជាង៩០នាក់បានស្លាប់ដោយសារជំងឺដែលទាក់ទងនឹងមេរោគអេដស៍។

តាំង​ពី​រកឃើញករណី​ដំបូង​​ក្នុង​ឆ្នាំ​១៩៩០ មេរោគ​អេដស៍​បាន​រីក​រាល​ដាល​ជា​លំដាប់​នៅ​ទូទាំង​ប្រទេស​ឡាវ។ ថ្ងៃនេះ ចំនួនអ្នកឆ្លងសរុបបានកើនដល់ជិត ២៤,០០០នាក់ ដោយមានអ្នកស្លាប់ជាង ៦,០០០នាក់។ អត្រាឆ្លងក៏បន្តកើនឡើងយឺតៗជារៀងរាល់ឆ្នាំ។

ទោះបីជាមានការពង្រីកការធ្វើតេស្ត និងការព្យាបាលនៅទូទាំងខេត្តទាំង ១៨ ក៏ដោយ ក៏ការរើសអើង និងកង្វះការយល់ដឹងនៅតែបន្តរារាំងមនុស្សជាច្រើនពីការស្វែងរកជំនួយព្យាបាល។ អាជ្ញាធរឡាវសង្កត់ធ្ងន់ថា ការធ្វើតេស្តដំបូង និងការព្យាបាលដោយថ្នាំប្រឆាំងវីរុស (ART) អាចអនុញ្ញាតឱ្យអ្នកផ្ទុកមេរោគអេដស៍ការពារជីវិតប្រកបដោយសុខភាពល្អ ប៉ុន្តែបានព្រមានថាការកើនឡើងនៃការឆ្លងមេរោគក្នុងចំណោមយុវជននៅតែជាកង្វល់ធ្ងន់ធ្ងរនៅឡើយ៕

អត្ថបទ៖ ប៊ុន សុភាព

The post ​មេរោគ​អេដស៍​​ឆ្លង​ខ្លាំង​ក្នុង​ចំណោម​យុវជន​ឡាវ នៅឆ្នាំ២០២៥ appeared first on Kampuchea Thmey Daily.

លោក​វេជ្ជបណ្ឌិត អ៊ុក វិជ្ជា ប្រធាន​មជ្ឈមណ្ឌល​ជាតិ​ប្រយុទ្ធ​នឹង​ជំងឺអេដស៍​សើ​ស្បែក និង​កាមរោគ នៃ​ក្រសួងសុខាភិបាល បាន​មានប្រសាសន៍​នៅ​ព្រឹក​ថ្ងៃទី ​៩ ​កក្កដា ​នេះ​ថា ​គិត​មកដល់​ត្រីមាស​ទី ១ ឆ្នាំ ២០២៥ នេះ ​មាន​អ្នក​ផ្ទុកមេរោគ​អេដស៍​ចំនួន ៥០ ៤៣៥ នាក់ ​ទទួលបាន​បណ្ណ​មូលនិធិ​សមធម៌​ពី​រាជរដ្ឋាភិបាល ​ស្មើ​នឹង​ ៧១%​ ក្នុងចំណោម​អ្នក​ព្យាបាល​សរុប ៧០ ៦៥៤ នាក់ ​ហើយ ​ក្រុមការងារ​នៅ​សេវា​ព្យាបាល​ដោយ​ឱសថ​ប្រឆាំង​មេរោគ​អេដស៍ នឹង​បន្ត​អនុវត្ត​នីតិវិធី​ចុះបញ្ជី​បណ្ណ​មូលនិធិ​សមធម៌​ជា​បន្តបន្ទាប់។

លោក​វេជ្ជបណ្ឌិត បាន​បន្តថា ការផ្តល់​ប័ណ្ណ​សមធម៌​ជូន​ដល់​អ្នក​ផ្ទុកមេរោគ​អេដស៍​នេះ នៅ​មិនទាន់​ដឹងថា នឹង​បញ្ចប់​នៅពេលណា​ទេ ដោយសារ​មាន​អ្នកជំងឺ​ចាស់ និង​ថ្មី មក​ស្នើសុំ​ជា​បន្តបន្ទាប់ ប៉ុន្តែ​អ្នក​ផ្ទុកមេរោគ​អេដស៍ អាច​ទទួលបាន​ប័ណ្ណ​សមធម៌​នេះ​បាន ទាមទារ​ឱ្យ​ចុះបញ្ជី​នៅតាម​ទីតាំង​ដែល​គាត់​ទៅ​ទទួល​សេវា​តាមរយៈ​ថេប​ប្លែក​ជា​ប្រព័ន្ធ​ឌីជីថល​ត​ភ្ជាប់​ប្រព័ន្ធ​ទិន្នន័យ​ជាមួយ​ក្រសួងផែនការ ហើយ​ការងារ​នេះ​ ក៏មាន​សហការ​ជាមួយ​អង្គការ យូ​អេស អេ​អាយ​ឌី អង្គការ​យូ​អិន​អេដស៍ អង្គការ​យូ​អិន​ឌី​ភី។

លោក​វេជ្ជបណ្ឌិត បាន​បន្តទៀតថា អ្នក​ផ្ទុកមេរោគ​អេដស៍​ទទួលបាន​ប័ណ្ណ​សមធម៌​ពិត​ជាមាន​សារៈសំខាន់​ណាស់​ក្នុង​ការចូលរួម​កាត់បន្ថយ​ការចំណាយ​ច្រើន​នៅក្នុង​គ្រួសារ ព្រោះ​ពួកគាត់​ទទួល​បាន​ការលើកលែង​បង់ប្រាក់​ពេល​ទៅពិនិត្យ និង​ព្យាបាល​ជំងឺ​ផ្សេងៗ នៅតាម​មន្ទីរពេទ្យ​រដ្ឋ ដោយ​រាជរដ្ឋាភិបាល​ជា​អ្នក​បង់ថ្លៃ​ជំនួស​ជួយ​រួមចំណែក​កាត់បន្ថយ​ការចំណាយ​ផ្សេងៗ ក្នុង​គ្រួសារ លើក​ស្ទួយ​ជីវភាព​កាន់តែ​ប្រសើរ។

លោក​វេជ្ជបណ្ឌិត បាន​អំពាវនាវ​ដល់​អ្នក​សង្ស័យ​ថា​មាន​ផ្ទុកមេរោគ​អេដស៍ ត្រូវ​ក្លាហាន​ចេញមក​ធ្វើតេស្ត​ឈាម​រក​មេរោគ​អេដស៍ ដើម្បី​ទទួលបាន​ការព្យាបាល​ជំងឺ​ត្រឹមត្រូវ និង​ទទួលបាន​ប័ណ្ណ​សមធម៌ ដើម្បី​ទទួលបាន​អត្ថប្រយោជន៍​ជាច្រើន​ពី​រាជរដ្ឋាភិបាល។ ចំណែក​អ្នក​ផ្ទុកមេរោគ​អេដស៍ ត្រូវ​ព្យាបាល​ឱ្យបាន​ទៀងទាត់​ជាប់លាប់ និង​ត្រឹមត្រូវ ពោលគឺ​អនុវត្ត​ទៅតាម​ការណែនាំ​របស់​គ្រូ​ពេទ្យ ហើយ​កាលណា​អ្នកជំងឺ​ព្យាបាល​បាន​ត្រឹមត្រូវ នឹង​អាច​រស់នៅ​បានយូរ​អង្វែង​ដូច​ប្រជាពលរដ្ឋ​ធម្មតា​ដែរ។

គួរ​បញ្ជាក់​ថា តាម​ការ​ប៉ាន់ស្មាន​នៅ​ឆ្នាំ ២០២៤ កម្ពុជា មាន​ចំនួន​អ្នករស់នៅ​ជាមួយ​មេរោគ​អេដស៍​ប្រមាណ ៧៦ ០០០ នាក់ ក្នុងនោះ​មាន​អ្នកជំងឺ​អេដស៍​សកម្ម​ដែល​កំពុង​ទទួល​សេវា​ព្យាបាល​ដោយ​ឱសថ​ប្រឆាំង​មេរោគ​អេដស៍​ទាំង ៧៤ កន្លែង ចំនួន ៧០ ៦៥៤ នាក់​ហើយ ​ប្រហែល​នៅសល់​អ្នក​រស់នៅ​ជាមួយ​មេរោគ​អេដស៍​ជាង ​៥ ០០០ នាក់ នៅ​មិនទាន់​បានដឹងខ្លួន និង​មិនទាន់បាន​ធ្វើតេស្ត និង​ទទួល​សេវា​ព្យាបាល​នៅឡើយ​ទេ ខណៈ​ក្នុង ១ ឆ្នាំៗ មាន​អ្នក​ឆ្លង​ថ្មី នៃ​មេរោគ​អេដស៍​ប្រមាណ ១ ២០០ នាក់ និង​ស្លាប់​ប្រមាណ ១ ១០០ នាក់៕

អត្ថបទ ៖ សំអឿន

The post អ្នកផ្ទុកមេរោគអេដស៍ជាង ៥ ម៉ឺននាក់ ទទួលបានបណ្ណមូលនិធិសមធម៌ពីរាជរដ្ឋាភិបាល appeared first on Kampuchea Thmey Daily.