ម្អម Archives - Kampuchea Thmey Daily

ដំណាំម្អមនៅតែមានទីផ្សារល្អ និងផ្ដល់ចំណូលបន្ថែមបានយ៉ាងល្អប្រសើរ ដល់កសិករក្នុងក្រុងសៀមរាប

Ken Malis — Mon, 09 Mar 2026 03:20:01 +0000

របរដាំដំណាំរួមផ្សំ ជាពិសេសដំណាំម្អម កំពុងក្លាយជាប្រភពចំណូលបន្ថែមដ៏សំខាន់សម្រាប់កសិករនៅក្នុងសង្កាត់ជ្រាវ ក្រុងសៀមរាប ដោយសារបច្ចុប្បន្នដំណាំប្រភេទនេះមានទីផ្សារល្អ និងមានតម្រូវការខ្ពស់ជាប្រចាំពីសំណាក់អាជីវករ។

អ្នកស្រី ជិន សារុំ កសិករដាំដំណាំម្អម រស់នៅក្នុងភូមិវាល សង្កាត់ជ្រាវ ក្រុងសៀមរាប បានលើកឡើងថា ម្អម គឺជាប្រភេទដំណាំវិលជុំដែលងាយស្រួលដាំដុះ និងអាចប្រមូលផលបានគ្រប់រដូវកាល។ អ្នកស្រីបានបញ្ជាក់ថា របរនេះអាចផ្ដល់ប្រាក់ចំណូលបន្ថែមជូនគ្រួសារចន្លោះពី ៣០ម៉ឺន ទៅ ៥០ម៉ឺនរៀលក្នុងមួយខែ ខណៈដែលតម្លៃលើទីផ្សារក្នុងឆ្នាំនេះក៏មានសភាពសមរម្យផងដែរ។

អ្នកស្រី បានឲ្យដឹងទៀតថា មូលហេតុដែលអ្នកស្រីជ្រើសរើសដាំម្អម ព្រោះអ្នកស្រីមើលឃើញថា បច្ចុប្បន្នដំណាំនេះ កំពុងមានតម្រូវការខ្ពស់សម្រាប់យកទៅធ្វើជាគ្រឿងផ្សំក្នុងមុខម្ហូបខ្មែរ ហើយដំណាំនេះទៀតសោតងាយស្រួលថែទាំ មិនសូវរើសដី និងមិនត្រូវការបច្ចេកទេសស្មុគស្មាញដូចដំណាំដទៃ។ ការដាំនេះដែរ អ្នកស្រីក៏អាចដាំបន្ថែមលើដំណាំរួមផ្សំផ្សេងទៀតដូចជា ស្ពៃ, ត្រកួន, ខ្ទឹម និងជីគ្រប់ប្រភេទ ដើម្បីផ្គត់ផ្គង់ទីផ្សារក្នុងក្រុងសៀមរាបផងដែរ។

អ្នកស្រី ជិន សារុំ បានបញ្ចាក់ទៀតថា ក្នុងមួយថ្ងៃៗ អ្នកស្រីទទួលបានការកុម្ម៉ង់ពីអាជីវករតាមផ្សារនានា ចាប់ពី ១០០បាច់ ទៅ ៤០០បាច់ អាស្រ័យទៅតាមតម្រូវការជាក់ស្ដែង។ ទោះជាយ៉ាងណា ដោយសារតំបន់ដែលអ្នកស្រីរស់នៅប្រឈមនឹងការលិចទឹកក្នុងរដូវវស្សា ទើបខ្ញុំសម្រេចចិត្តដាំម្អមនេះតែក្នុងរដូវប្រាំងប៉ុណ្ណោះ។

កសិករគំរូរូបនេះក៏បានផ្ដាំផ្ញើ និងលើកទឹកចិត្តដល់បងប្អូនប្រជាពលរដ្ឋដែលមានដីទំនេរនៅជុំវិញផ្ទះ គួរងាកមកដាំដំណាំរួមផ្សំផ្សេងៗ ជាជាងការទូកដីឱ្យទំនេរចោល ព្រោះការធ្វើបែបនេះ មិនត្រឹមតែជួយកាត់បន្ថយការចំណាយប្រចាំថ្ងៃក្នុងគ្រួសារប៉ុណ្ណោះទេ ប៉ុន្តែថែមទាំងអាចបង្កើតជាប្រភពចំណូលបន្ថែម កាត់បន្ថយការនាំចូលបន្លែពីក្រៅ និងធានាបាននូវបន្លែសុវត្ថិភាពសម្រាប់បរិភោគទៀតផង៕

ដោយ៖ គឿនវេត

The post ដំណាំម្អមនៅតែមានទីផ្សារល្អ និងផ្ដល់ចំណូលបន្ថែមបានយ៉ាងល្អប្រសើរ ដល់កសិករក្នុងក្រុងសៀមរាប appeared first on Kampuchea Thmey Daily.

កសិករប្រាប់វិធីដាំម្អមឲ្យលូតលាស់ល្អ អាចរកចំណូលបានជាង ១២ ម៉ឺនរៀលក្នុងមួយថ្ងៃ

Din Thary — Tue, 05 Nov 2024 03:47:42 +0000

អ្នកស្រី កក់ ស្រីកង មានវ័យ ៦៣ ឆ្នាំ រស់នៅភូមិត្រស់ ឃុំអូរតាគី ស្រុកថ្មគោល ខេត្តបាត់ដំបង បានបង្ហើបពីវិធីសាស្រ្តដាំម្អមឲ្យលូតលាស់ល្អ ដើម្បីយកទៅលក់នៅលើទីផ្សារ ដែលអាចទទួលបានចំណូលជាង ១២ ម៉ឺនរៀល ក្នុងមួយថ្ងៃពីរបរដាំម្អមនេះ។

អ្នកស្រី កក់ ស្រីកង បានប្រកបរបរដាំដំណាំម្អមនេះតាំងពី ឆ្នាំ២០០០មក លើផ្ទៃដីប្រមាណ ១ ហិតា បើគិតមកដល់ពេលនេះ មានរយៈពេល ២៤ឆ្នាំហើយ។ មុខរបរមួយនេះ បានជួយដោះបន្ទុកលើជីវភាពគ្រួសាររបស់អ្នកស្រីបានល្អប្រសើរ ប៉ុន្តែនៅប៉ុន្មានឆ្នាំចុងក្រោយនេះអ្នកស្រីថា ចំណូលប្រចាំថ្ងៃបានថយចុះ ព្រោះមានអ្នកដាំដំណាំម្អមនេះច្រើន។

អ្នកស្រី កក់ ស្រីកង បានឲ្យដឹងថា ម្អមជាដំណាំមួយប្រភេទងាយស្រួលដាំ ហើយក៏ងាយប្រឈមសត្វល្អិតដូចជា ក្រា ដង្កូវ មមាច ផ្សិត ជាដើម ហើយការប្រើថ្នាំបាញ់លុះត្រាតែដល់កម្រិតមួយទើបអ្នកស្រីប្រើ តែថ្នាំគីមីអ្នកស្រីមិនដែលប្រើទេ ហើយប្រើតែជីសរីរាង្គប៉ុណ្ណោះ និងឧស្សាបញ្ចូលទឹកផង។

កសិកររូបនេះ បានគូសបញ្ជាក់ថា «បើការដាំមិនមានបទពិសោធន៍និងថែទាំនោះទេ ដើមម្អមមិនមានសុខភាពល្អនោះដែរ។ ដំបូង ត្រូវវាយដីឲ្យបានល្អដូចដាំស្រូវ ហើយស្ទូងក៏មិនខុសពីស្រូវដែរ បន្ទាប់ពីស្ទូងបានរយៈពេលចន្លោះពីមួយទៅពីរខែ នោះអាចប្រមូលផលបានហើយ»។

អ្នកស្រីបន្តថា បច្ចុប្បន្នក្នុងមួយថ្ងៃ ម៉ូយកុម្ម៉ង់ទិញចាប់ពី ៥០ ទៅ ៥៧ ថង់ រកចំណូលបានជាង ១២ ម៉ឺនរៀលក្នុងមួយថ្ងៃ ខណៈកាលពីប៉ុន្មានឆ្នាំមុន ទីផ្សារត្រូវការចន្លោះពី ៦០ ថង់ ទៅ ៨០ ថង់ ហើយក្នុង ១ ថង់មានតម្លៃ ២៥០០ រៀល។ បើតាមកសិកររូបនេះ ឆ្នាំនេះការកុម្ម៉ង់មានការថយចុះតិចតូចដែរ តែលើទីផ្សារធំៗដូចជាផ្សារភូពុយ ផ្សារបឹងឈូក ផ្សារនៅតាមច្រកព្រំដែនថៃ និងភ្នំពេញ ជាដើមនៅដដែល ហើយសព្វថ្ងៃអ្នកស្រីក៏បានរួមចំណែកជួយទ្រទ្រង់ជីវភាពគ្រួសារអ្នកភូមិស្រុកជាកម្មករបាន ៧ នាក់ដែរ។

ជាមួយគ្នានេះ មន្ត្រីនៃមន្ទីរកសិកម្មខេត្តបានឲ្យដឹងថា ជាការប្រសើរសម្រាប់ប្រជាកសិករ ដែលបានមានគំនិតកែច្នៃដាំម្អម ដើម្បីជាចំណែកមួយនៃសេដ្ឋកិច្ចគ្រួសារឲ្យបានប្រសើរ បន្ថែមពីផលដាំណាំស្រូវ ស្របពេលបច្ចុប្បន្នកសិករបានប្រើប្រាស់ថ្នាំសត្វល្អិត និង ថ្នាំសម្លាប់ស្មៅច្រើនស្ទើរគ្រប់តំបន់ ដែលធ្វើឲ្យម្អមតាមស្រែស្ទើរតែដាច់ពូជ ហើយនៅតំបន់មួយចំនួនក៏រកម្អមស្លរឬធ្វើអន្លក់មិនបានផងក៏មាន។

ម្អមគឺជាឈ្មោះស្មៅរុក្ខជាតិម្យ៉ាង ដែលមានទម្រង់ដើមតូចៗ ស្លឹកល្អិត និងមានក្លិនឆ្ងុយប្រហើរ ដែលមានដុះតាមវាលស្រែ តាមធម្មជាតិ។ ប្រជាជនខ្មែរតែងនិយមយកមកផ្សំជាម្ហូបអាហារ តាមតម្រូវការគ្រួសារនីមួយៗ ខណៈដែលសម័យមុនស្មៅម្អមនេះសម្បូរបែបណាស់ដុះនៅតាមដីស្រែក្នុងតំបន់នីមួយៗ មិនមានកសិករដាំដុះនោះទេ។

ដោយឡែក មកដល់សម័យបច្ចុប្បន្ន ដោយសារតែតម្រូវការរបស់ប្រជាពលរដ្ឋច្រើន ទើបមានកសិករមានគំនិតកែច្នៃមកដាំសម្រាប់ចូលទីផ្សារ ដើម្បីជាជំនួយសេដ្ឋកិច្ចលើជីវភាពគ្រួសារផង៕

អត្ថបទ៖ សៅ សារិទ្ធ

The post កសិករប្រាប់វិធីដាំម្អមឲ្យលូតលាស់ល្អ អាចរកចំណូលបានជាង ១២ ម៉ឺនរៀលក្នុងមួយថ្ងៃ appeared first on Kampuchea Thmey Daily.

ម្អម មានប្រយោជន៍ និងប្រើរបៀបម៉េច ដើម្បីជួយដល់រាងកាយ

សាង ស្រីល័ក្ខ — Fri, 10 Sep 2021 07:10:00 +0000

ស្វែងយល់ពីការប្រើប្រាស់

១- ដើមម្អមប្រើដើម្បីអ្វី?

ម្អមជារុក្ខជាតិតូចៗ មានកម្ពស់ពី ១៥-៣០ សង់ទីម៉ែត្រ ដើមប្រហោងមានរោមច្រើន ភាគច្រើនដុះតាមវាលស្រែ ឬដាំជាបន្លែ មានរសជាតិប្រហើរ ឈួល ចត់តិចៗ។ គេអាចញ៉ាំរុក្ខជាតិនេះ ជាបន្លែបាន ហើយគេក៏អាចប្រើវាដាំទឹកផឹកធ្វើជាថ្នាំព្យាបាល គ្រុន ក្អកមាន់ ក្រួសក្នុងតម្រងនោម នោមឈាម ពស់ចឹក កើតបូស រលាកស្បែកមានខ្ទុះ និងរមាស់។

២- ម្អមដំណើរការម៉េច?

គេនៅមិនទាន់ដឹងពីសកម្មភាពរបស់រុក្ខជាតិនេះនៅឡើយទេ ប៉ុន្តែគេដឹងថាវាមានជាតិប្រេង Tanin និងសារធាតុក្លិន Flavonoid។

កត្តាគួរប្រុងប្រយ័ត្ន

៣- មុនប្រើគួរដឹងអីខ្លះ?

ប្រឹក្សាយោបល់ជាមួយគ្រូពេទ្យ ឱសថការី ឬអ្នកឯកទេសឱសថរុក្ខជាតិ ប្រសិនបើ៖

– ហាមប្រើចំពោះស្រ្តីមានគភ៌
– កំពុងប្រើប្រាស់ថ្នាំផ្សេងៗ រួមទាំងថ្នាំ អាចទិញបានដោយគ្មានវេជ្ជបញ្ជា។
– ធ្លាប់មានប្រតិកម្មអាលែកហ្ស៊ីជាមួយនឹងម្អម ថ្នាំពេទ្យ ឬឱសថរុក្ខជាតិផ្សេងៗទៀត
– មានជំងឺ ឬស្ថានភាពសុខភាពផ្សេងៗទៀត
– ធ្លាប់មានប្រតិកម្មអាលែកហ្ស៊ីប្រភេទផ្សេងទៀត ដូចជា ជាមួយ អាហារ សារធាតុពណ៌ សារធាតុរក្សាអាហារ ឬ សត្វ។

លក្ខខណ្ឌចុះបញ្ជីការផ្លូវច្បាប់សម្រាប់ឱសថរុក្ខជាតិ មិនតឹងរ៉ឹងដូចការចុះបញ្ជីការផ្លូវច្បាប់ទៅលើថ្នាំពេទ្យទេ។ ដូចនេះ គួរតែមានការសិក្សាបន្ថែមពីសុវត្ថិភាពលើឱសថទាំងនេះ។ ត្រូវប្រាកដថា អត្ថប្រយោជន៍នៃការប្រើថ្នាំនេះ ខ្ពស់ជាងកត្តាប្រឈម។ សូមពិគ្រោះជាមួយគ្រូពេទ្យសម្រាប់ព័ត៌មានបន្ថែម។

ស្វែងយល់ពីផលរំខាន

៤- មានផលរំខានអីខ្លះ?

បើមានការបារម្ភពីផលរំខានណាមួយ សូមពិភាក្សាជាមួយគ្រូពេទ្យ ឬគ្រូឱសថបុរាណ។

ស្វែងយល់ពីអន្តរកម្មថ្នាំ

៥- មានអន្តរកម្មជាមួយអីខ្លះ?

ម្អម អាចមានអន្តរកម្មជាមួយថ្នាំយើងកំពុងប្រើប្រាស់បច្ចុប្បន្ន ឬស្ថានភាពជំងឺណាមួយ។ ប្រឹក្សាយោបល់ជាមួយអ្នកឯកទេសឱសថរុក្ខជាតិ ឬគ្រូពេទ្ យមុននឹងធ្វើការប្រើប្រាស់។

ស្វែងយល់ពីកម្រិតថ្នាំ

ព័ត៌មានទាំងនេះ មិនបានរាប់ជាការណែនាំរបស់គ្រូពេទ្យនោះទេ។ ត្រូវតែពិភាក្សាជាមួយគ្រូពេទ្យ ឬឱសថការី មុនពេលចាប់ផ្តើមប្រើប្រាស់ថ្នាំប្រភេទនេះ។

៦- កម្រិតប្រើធម្មតាម៉េចដែរ?

កម្រិតដូសក្នុងការប្រើប្រាស់ម្អម អាចមានលក្ខណៈខុសគ្នាសម្រាប់អ្នកជំងឺម្នាក់ៗ។ កម្រិតដែលប្រើប្រាស់អាស្រ័យលើអាយុ សុខភាព និងស្ថានភាពរាងកាយមួយចំនួនទៀត។ ឱសថរុក្ខជាតិ មិនមែនតែងមានសុវត្ថិភាពទាំងអស់នោះទេ ហេតុនេះសូមប្រឹក្សាយោបល់ជាមួយអ្នកឯកទេសឱសថរុក្ខជាតិ ឬគ្រូពេទ្យជំនាញជាមុនសិន។ ជាទូទៅកម្រិតប្រើ ពី ១៥-៣០ ក្រាម/ថ្ងៃ។ ចំពោះព្យាបាលជំងឺក្រួសក្នុងតម្រងនោម ត្រូវប្រើពី ២០-៣០ ក្រាម ប្រើជាទម្រង់រុក្ខជាតិស្រស់ បុកដាក់ទឹកផឹក។

៧- ទម្រង់ម្អមមានអ្វីខ្លះ?

– ម្អមស្រស់
– ម្អមក្រៀម

អត្ថបទផ្ដល់ដោយ៖ Hello Krupet

ចុចអាន៖ផឹកទឹកផ្លែឈើស្រស់លើសកម្រិតពេក មិនល្អ ហើយឆាប់ស្លាប់

ចុចអាន៖តែកូវជីជំនួយភ្នែក និងមានប្រយោជន៍ច្រើនដល់សុខភាព

The post ម្អម មានប្រយោជន៍ និងប្រើរបៀបម៉េច ដើម្បីជួយដល់រាងកាយ appeared first on Kampuchea Thmey Daily.

ម្អម Archives - Kampuchea Thmey Daily

ដំណាំម្អមនៅតែមានទីផ្សារល្អ និងផ្ដល់ចំណូលបន្ថែមបានយ៉ាងល្អប្រសើរ ដល់កសិករក្នុងក្រុងសៀមរាប

កសិករ​ប្រាប់វិធីដាំម្អមឲ្យលូតលាស់ល្អ អាចរកចំណូលបានជាង ១២ ម៉ឺនរៀលក្នុងមួយថ្ងៃ

ម្អម មានប្រយោជន៍ និងប្រើរបៀបម៉េច ដើម្បីជួយដល់រាងកាយ

កសិករប្រាប់វិធីដាំម្អមឲ្យលូតលាស់ល្អ អាចរកចំណូលបានជាង ១២ ម៉ឺនរៀលក្នុងមួយថ្ងៃ