សុខភាព

តែកូវជីជំនួយភ្នែក និងមានប្រយោជន៍ច្រើនដល់សុខភាព

បានផុស

៥ years មុន

នៅ

ថ្ងៃសុក្រ ១០ កញ្ញា ២០២១

ដោយ

តែកូវជី (Goji berry) មានពណ៌ស្រស់ស្អាត គ្មានជាតិកាហ្វេអ៊ីន និងមានរសជាតិផ្អែមតិចៗ។ យោងតាមក្រសួងកសិកម្មសហរដ្ឋអាមេរិក (USDA) បានឲ្យដឹងថា ក្នុងកូវជី ១០០ ក្រាមមានផ្ទុកកាបូអ៊ីដ្រាត ៧៧,១ ក្រាម ស្ករ ៤៥,៦ ក្រាម ប្រូតេអ៊ីន ១៤,៣ ក្រាម ជាតិសរសៃ ១៣ ក្រាម ខ្លាញ់ ០,៣៩ ក្រាម វីតាមីន A ២៦៨០០ IU វីតាមីន C ៤៨,៤ មីលីក្រាម ជាតិដែក ៦,៨ មិល្លីក្រាម កាល់ស្យូម ១៩០ មិល្លីក្រាម។ តែកូវជីមិនត្រឹមតែជំនួយដល់ភ្នែកទេ ថែមទាំងមានប្រយោជន៍ជាច្រើនដល់សុខភាពទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តែកូវជីផ្តល់ប្រយោជន៍ដល់សុខភាពដូចជា៖

១. ជំនួយភ្នែក៖ កូវជីសម្បូរទៅដោយវីតាមីន A ដែលល្អចំពោះភ្នែក និងកាត់បន្ថយការចុះខ្សោយនៃភ្នែក។

២. ប្រឆាំងភាពចាស់៖ កូវជីមានផ្ទុកសារធាតុប្រឆាំងអុកស៊ីតកម្ម (phytochemicals) ដែលអាចពន្យារភាពចាស់។ ការស្រាវជ្រាវបាបង្ហាញថាសារធាតុនេះជួយការពារអុកស៊ីតកម្ម DNA និងជួយស្តារ DNA ដែលខូច។

៣. ជំនួយសុខភាពថ្លើម៖ កូវជីជួយការពារថ្លើមពីការបំផ្លាញរបស់ជាតិពុល និងកាកសំណល់កោសិកានៅលើ DNA ខ្លាញ់ប្រូតេអ៊ីន និងសមាសធាតុសំខាន់ៗដទៃទៀតនៃកោសិកា។

៤. ជួយសម្រកទម្ងន់៖ កូវជីមានជាតិសរសៃខ្ពស់ដែលអាចធ្វើឱ្យយើងមានអារម្មណ៍ឆ្អែតបានយូរ។ តែកូវជីក៏ជួយដល់ការដុតរំលាយអាហារដែលជួយជំរុញដល់ការសម្រកទម្ងន់។

៥. ជំនួយស្បែក៖ បេតាការ៉ូទីនក្នុងកូវជីបន្ថយពន្យារភាពចាស់នៃស្បែក និងបន្ថយការខូចខាតស្បែកពីពន្លឺកាំរស្មីយូវី ស័ក្តិសមបំផុតសម្រាប់អ្នកដែលមានស្បែកងាយប្រតិកម្ម និងងាយនឹងត្រូវកម្តៅថ្ងៃ។ បេតាខារ៉ូទីនបង្កើតពន្លឺធម្មជាតិដែលធ្វើឱ្យស្បែករបស់យើងស្រស់ស្អាត និងក្មេងជាងវ័យ។

៦. ពង្រឹងប្រព័ន្ធការពាររាងកាយ៖ កូវជីផ្ទុកវីតាមីន C ខ្ពស់ដែលជាវីតាមីនជួយបង្កើនប្រព័ន្ធការពាររាងកាយ ព្រោះវាអាចជួយជំរុញការផលិតកោសិកាឈាមស។

៧. ធ្វើឱ្យអាម្មណ៍ល្អ៖ សារធាតុសកម្មនៅក្នុងកូវជីមានឥទ្ធិពលលើអ័រម៉ូននៅក្នុងរាងកាយ ដែលអាចជួយធ្វើឱ្យអារម្មណ៍យើងមានតុល្យភាព ការពារការថប់បារម្ភ និងជំងឺធ្លាក់ទឹកចិត្ត។

៨. ជំនួយសុខភាពបេះដូង៖ កូវជីមានសមត្ថភាពបញ្ចុះកូឡេស្តេរ៉ុលបានរហូតដល់ ៧០% ហើយក៏ជួយកាត់បន្ថយទ្រីគ្លីសេរីដផងដែរ។ តែកូវជីក៏ការពារប្រឆាំងនឹងកូលេស្តេរ៉ុលអាក្រក់ (LDL) ផងដែរ។

៩. ការពារពីជំងឺមហារីក៖ តែកូវជីមានសារធាតុប្រឆាំងអុកស៊ីតកម្មដែលការពារអុកស៊ីតកម្មរបស់កោសិកា និងបន្ថយហានិភ័យនៃជំងឺមហារីក។ វាក៏ប្រឆាំងរ៉ាឌីកាល់សេរី និងការពារការខូចខាត DNA ដែរ។

១០. ជួយការពារជំងឺទឹកនោមផ្អែម៖ ការស្រាវជ្រាវបានបង្ហាញថាតែកូវជីនេះអាចជួយឱ្យរាងកាយគ្រប់គ្រងការបញ្ចេញជាតិគ្លុយកូស និងអាំងស៊ុយលីន។

ផលប៉ះពាល់

តែកូវជីផ្តល់ប្រយោជន៍ដល់សុខភាពច្រើនតែក៏មានផលប៉ះពាល់ដែរ។

កូវជីមានផ្ទុកសារធាតុ betaine ដែលជាសារធាតុគីមីដែលអាចបង្កឱ្យរលូតកូន ដូច្នេះស្ត្រីមានផ្ទៃពោះមិនគួរញ៉ាំតែនេះទេ។
ប្រសិនយើងកំពុងប្រើថ្នាំបញ្ចុះសម្ពាធឈាម ឬថ្នាំបន្ថយជាតិស្ករ ចៀសវាងញុំាតែកូវជីព្រោះកូវជីក៏មានឥទ្ធិពលស្រដៀងគ្នានឹងថ្នាំទាំងនេះដែរ ដែលអាចបណ្តាលកម្រិតជាតិស្ករធ្លាក់កាន់តែខ្លាំង។
ចៀសវាងញុំាតែកូវជីពេលយប់ព្រោះបណ្តាលឱ្យគេងមិនលក់។
ចៀសវាងញុំាកូវជីលើស ២៨ ក្រាម ឬ ២ ស្លាបព្រាបាយក្នុង ១ ថ្ងៃ។
ចៀសវាងញុំាតែកូវជី បើយើងមានបញ្ហាក្រពះពោះវៀន។