ដើម្បីពង្រឹងការអនុវត្តច្បាប់ស្ដីពីព្រៃឈើ ទប់ស្កាត់ការប៉ះពាល់បរិស្ថាន និងសុខភាពប្រជាពលរដ្ឋជិតខាង ដោយក្រុមការងារចម្រុះ បានពន្យល់ណែនាំដល់អាជីវករទាំងអស់ឱ្យបញ្ឈប់សកម្មភាពអាជីវកម្មខុសច្បាប់នេះបន្តទៀត និងធ្វើកិច្ចសន្យារុះរើចេញដោយខ្លួនឯង ដោយទុកពេលកំណត់ត្រឹមថ្ងៃទី០៣ ខែកុម្ភៈ ឆ្នាំ២០២៦។

ក្នុងនោះផងដែរ មន្ទីរកសិកម្ម រុក្ខាប្រមាញ់ និងនេសាទរាជធានីភ្នំពេញ ដែលមានខណ្ឌរដ្ឋបាលព្រៃឈើភ្នំពេញ ជាសេនាធិការ នឹងបន្តកិច្ចសហការយ៉ាងជិតស្និទ្ធជាមួយរដ្ឋបាលខណ្ឌចំការមន ចុះពិនិត្យ តាមដាន ដើម្បីទប់ស្កាត់ការធ្វើអាជីវកម្មខុសច្បាប់ទាំងនេះ មិនឱ្យកើតមានឡើងជាថ្មីបន្តទៀត និងបន្តតាមដានស្រាវជ្រាវទីតាំងអាជីវកម្មគ្មានច្បាប់ផ្សេងទៀត ដើម្បីចាត់វិធានការតាមនីតិវិធីច្បាប់។

ក្រុមការងាររបស់មន្ទីរកសិកម្ម បានចុះពិនិត្យសកម្មភាពអាជីវកម្មនៅទីតាំងខាងលើជាថ្មីម្ដងទៀត ដើម្បីផ្ទៀតផ្ទាត់លទ្ធផលដែលកំណត់ឱ្យរុះរើតាមកិច្ចសន្យារបស់ក្រុមការងារដែលបានដាក់ចេញកាលពីថ្ងៃទី២៦ ខែមករា ឆ្នាំ២០២៦។ ជាលទ្ធផលជាក់ស្ដែងពិនិត្យឃើញថា ទីតាំងអាជីវកម្មទាំងអស់នៅលើចិញ្ចើមកំណាត់ផ្លូវ៤៧៤នេះ បានបញ្ឈប់សកម្មភាពអាជីវកម្មកែច្នៃផល អនុផលព្រៃឈើ និងបានរុះរើសសម្ភារឧបករណ៍ចេញទាំងស្រុង។

សូមបញ្ជាក់ផងដែរថា ចំពោះអ្នកប្រកបអាជីវកម្ម លក់ដូរបាយម្ហូប និង កាហ្វេ អាជ្ញាធរជំនាញមិនបានតម្រូវអោយមានការរុះរើអ្វីនោះទេ អាចប្រកបរលក់ដូរជាធម្មតា។ អាជ្ញាធរបញ្ឈប់តែអាជីកម្មកែច្នៃផល អនុផលព្រៃឈើគ្មានច្បាប់ត្រឹមត្រូវតែប៉ុណ្ណោះ ដោយឡែកអាជីវកម្មជាង១០កន្លែងផ្សេងទៀត មានច្បាប់ត្រឹមត្រូវ មន្រី្ដជំនាញអនុញ្ញាតឲ្យបន្តអាជីវកកម្មទៀតបាន៕

The post អាជីវករក្រឡឹង អារច្រៀកឈើ លើផ្លូវ៤៧៤ យល់ព្រមបញ្ឈប់អាជីវកម្មខុសច្បាប់ ធ្វើកិច្ចសន្យារុះរើដោយខ្លួនឯង appeared first on Kampuchea Thmey Daily.

ការទទួលស្គាល់កំហុសនេះ បន្ទាប់ពីមានហេតុការណ៍កើតឡើងកាលពីថ្ងៃទី៣០ ខែមេសា ឆ្នាំ២០២៥ ដោយកម្លាំងជំនាញខណ្ឌរដ្ឋបាលព្រៃឈើ កម្លាំងជំនាញមន្ទីរបរិស្ថានសហការជាមួយកម្លាំងគណៈបញ្ជាការឯកភាពស្រុក បានចុះបង្ក្រាបដកហូតយកជន្លង់ម្រេចរបស់ឈ្មោះ សឿន នឿន ចំនួន ៥០០ជន្លង់ ដែលលោកបានទិញទុកដាំដំណាំម្រេចក្នុងចំការ ។ ដោយសារការដកជន្លង់ម្រេចធ្វើឱ្យប៉ះពាល់ដល់សេដ្ឋកិច្ចគ្រួសារលោក សឿន នឿន ក៏កើតមានកំហឹងជាខ្លាំង រហូតដល់ថ្ងៃទី១ ខែឧសភា ឆ្នាំ២០២៥ លោកបានធ្វើបទសម្ភាសន៍ជាមួយសារព័ត៌មាន(កម្ពុជាថ្មី) ដោយមានបញ្ចេញកំហឹង និងពាក្យសម្តីពុំគប្បី ធ្វើឱ្យប៉ះពាល់ទៅលើមន្ត្រីជំនាញខណ្ឌរដ្ឋបាលព្រៃឈើ មន្ត្រីជំនាញនៃមន្ទីរបរិស្ថាន និងអាជ្ញាធរគ្រប់លំដាប់ថ្នាក់ ។

ក្នុងលិខិតសុំទោសេជាសាធារណៈ ផ្តិតមេដៃដោយលោក សឿន នឿន​ ចុះថ្ងៃទី ០៦ ខែឧសភា ឆ្នាំ ២០២៥ បានឱ្យដឹងថា៖«ចំពោះទង្វើខ្ញុំបាទខាងលើ ខ្ញុំបាទសូមខន្តីអភ័យទោស ចំពោះការបញ្ចេញអារម្មណ៍ និងពាក្យសម្តីមួយពេលទាំង​កំហឹងដោយខ្វះការពិចារណា ធ្វើប៉ះពាល់ដល់កេរ្តិ៍ឈ្មោះ និងកិត្តិយសទៅលើចំពោះមន្ត្រីជំនាញ និងអាជ្ញាធរគ្រប់លំដាប់ថ្នាក់ ជាពិសេសធ្វើឱ្យសាធារណជន មានការភាន់ច្រឡំ។ ហេតុនេះខ្ញុំសូមទទួលខុសត្រូវទាំងស្រុង និងសូមអភ័យទោសយ៉ាងជ្រាលជ្រៅចំពោះការខុសឆ្គងនោះ ខ្ញុំនឹងព្យាយាមកែតម្រូវ និងបង្កើនការប្រុងប្រយ័ត្នក្នុងពេលអនាគត»។

ភ្ជាប់ជាមួយការសុំទោសនេះ លោក សឿន នឿន បានសន្យាថា នឹងមិនប្រព្រឹត្តនូវកំហុសឆ្គងខាងលើ ដោយចេតនាក្តី អចេតនាក្តី បន្តទៀតទេ ។ ជាមួយគ្នានេះ លោកបានគោរពថ្លែងអំណរគុណដល់មន្ត្រីជំនាញ និងអាជ្ញាធរគ្រប់លំដាប់ថ្នាក់ តែងតែជួយសម្របសម្រួល ផ្សព្វផ្សាយ ណែនាំឱ្យរូបលោក និងតំណាងប្រជាកសិករដាំម្រេចជាច្រើននាក់ទៀតទូទាំងស្រុកពេជ្រាដា បានដឹងអំពីច្បាប់ និងនីតិវិធី ដើម្បីជួយកសិករដាំដំណាំម្រេច ជាពិសេសទិញជន្លង់ម្រេចស្របច្បាប់យកមកដាំបន្តទៀតបាន៕

អត្ថបទ៖រៀម សុខហេង

The post ម្ចាស់ជន្លង់ម្រេច ចេញមុខសុំទោស​ដែលចោទប្រកាន់សមត្ថកិច្ចថាដកហូតជន្លង់ម្រេចគ្មានមូលហេតុ appeared first on Kampuchea Thmey Daily.

លោក អ៊ូ សុភក្តី នាយខណ្ឌរដ្ឋបាលព្រៃឈើមណ្ឌលគិរី បានប្រាប់សារព័ត៌មាន «កម្ពុជាថ្មី» នៅថ្ងៃទី២៣ ខែកុម្ភៈ ឆ្នាំ២០២៥ ថា ក្រុមការងារខណ្ឌរដ្ឋបាលព្រៃឈើមណ្ឌលគិរី បានឆ្មក់ចូលបង្រ្កាបទីតាំងសិប្បកម្មកែច្នៃឈើក្នុងលំនៅដ្ឋានមួយកន្លែងរបស់ឈ្មោះ ញ៉ន រ៉ាន់ ភេទប្រុស សង្ស័យពីបទ (សន្និធិផលអនុផលព្រៃឈើ និងបង្កើតរោងសិប្បកម្មកែច្នៃផលអនុផលព្រៃឈើ) ដោយមិនមានលិខិតអនុញ្ញាតពីរដ្ឋបាលព្រៃឈើ ត្រង់ចំណុចនិយាមកាលេខ (710946-1390677) ស្ថិតក្នុងភូមិពូញ៉ាវ ឃុំមេម៉ង់ ស្រុកកែវសីមា ខេត្តមណ្ឌលគិរី។

លោកនាយខណ្ឌដដែលរូបនេះ បានបញ្ជាក់ថា ក្នុងប្រតិបត្តិការបង្ក្រាបនោះ ក្រុមការងារខណ្ឌរដ្ឋបាលព្រៃឈើមណ្ឌលគិរី សហការជាមួយអាជ្ញាធរភូមិពូញ៉ាវ ឃុំមេម៉ង់ និងប៉ុស្តិ៍នគរបាលរដ្ឋបាលមេម៉ង់ ដោយមានការសម្របសម្រួលនីតិវិធី ពីលោក ស៊ាវ ងីឈាន់ ព្រះរាជអាជ្ញារងអមសាលាដំបូងខេត្តមណ្ឌលគិរី ចុះត្រួតពិនិត្យ និងឆែកឆេចុះបង្ក្រាបទីតាំងកែច្នៃឈើនោះបានដោយជោគជ័យ។

លោកបន្ថែមថា ក្នុងការចុះបង្ក្រាបទីតាំងនោះ សមត្ថកិច្ចជំនាញបានដកហូតវត្ថុតាងបទល្មើមួយចំនួនរួមមាន ម៉ូទ័រ(កាត់ ជ្រី ឈូស និងខាត់) ចំនួន ៦គ្រឿង ឈើអារប្រភេទលេខ១ (សុក្រម) ចំនួន ៧៦ដុំ/សន្លឹកស្មើនឹង ១ ៥០៧ (មួយម៉ែត្រត្រីគុណប្រាំរយប្រាំពីរ)។

បច្ចុប្បន្ន ក្រុមការងារបានដឹកជញ្ជូនវត្ថុតាងយកមកថែរក្សា នៅស្នាក់ការខណ្ឌរដ្ឋបាលព្រៃឈើមណ្ឌលគិរី ស្ថិតក្នុងភូមិចំការតែ សង្កាត់ស្ពានមានជ័យ ក្រុងសែនមនោរម្យ ខេត្តមណ្ឌលគិរី ដើម្បីចាត់ការតាមនីតិច្បាប់ស្តីពីព្រៃឈើផងដែរ៕

អត្ថបទ៖រៀម សុខហេង

The post មន្ត្រីជំនាញរដ្ឋបាលព្រៃឈើ ខេត្តមណ្ឌលគិរី ចុះបង្ក្រាបទីតាំងសិប្បកម្មកែច្នៃមួយកន្លែងដែលគ្មានច្បាប់អនុញ្ញាត appeared first on Kampuchea Thmey Daily.

ការអំពាវនាវនេះ បានធ្វើឡើងនៅពេលដែលលោកដឹកនាំមន្រ្តីរាជការរដ្ឋបាលព្រៃឈើ ចុះដាំកូនឈើទាលបន្ថែមទៀតនៅសួនច្បារសម្ដេចវិបុលបញ្ញា សុខ អាន ក្បែរវិមានឯករាជ្យខេត្ត ក្រុងដូនកែវ នាព្រឹកថ្ងៃទី៣ ខែមករា ឆ្នាំ២០២៥នេះ។

លោក ស៊ឹម ឡាប៉័ង បានលើកឡើងថា ដើមឈើមានសារៈសំខាន់ណាស់ ចំពោះជីវិតមនុស្សសត្វ និងជីវៈចម្រុះគ្រប់ប្រភេទ ពិសេសវាជារបាំងខ្យល់ របាំងទឹកជំនន់ និងនាំមកនូវទឹកភ្លៀង សម្រាប់បង្កបង្កើនផលចិញ្ចឹមជីវិតមនុស្សលោកថែមទៀត។

បន្ថែមពីនោះ លោកនាយខណ្ឌរដ្ឋបាលព្រៃឈើ ក៏អំពាវនាវឱ្យប្រជាពលរដ្ឋថែរក្សា និងដាំដើមឈើនៅតាមផ្ទះរាងៗខ្លួន ដើម្បីជាផលប្រយោជន៍សម្រាប់បរិស្ថានស្អាតទាំងអស់គ្នា ព្រមទាំងសម្រាប់កូនចៅជំនាន់ក្រោយ បានស្គាល់ពីប្រភេទ​ឈើកម្រ ជាពិសេសដើមឈើអាចជួយបង្កើតអុកស៊ីសែនក្នុងបរិយាកាស និងស្រូបយកឧស្ម័នកាបូនិច ដែលជួយ​សម្រួលដល់ការរស់នៅប្រចាំថ្ងៃ។

គួររលឹកថា នៅសួនច្បារសម្ដេចវិបុលបញ្ញា សុខ អាន កាលពីពេលកន្លងទៅ ដើមឈើចំនួន៣៤៦ដើមត្រូវបានដាំជាបន្តបន្ទាប់នៅក្នុងសួនច្បារនេះ ដើម្បីលម្អសោភ័ណភាព និងបរិស្ថាន៕

​អត្ថបទ៖ វីរៈ

The post នាយខណ្ឌរដ្ឋបាលព្រៃឈើតាកែវ អំពាវនាវឲ្យពលរដ្ឋចូលរួមថែរក្សា និងដាំដើមឈើនៅតាមផ្ទះឲ្យបានច្រើន appeared first on Kampuchea Thmey Daily.

ការដាក់ឱ្យដំណើការរោងចក្រនេះធ្វើឡើងកាលពីថ្ងៃទី៤ ខែធ្នូនេះ ដែលរោងចក្រមានទីតាំងស្ថិតនៅសង្កាត់លេខ ១ ក្រុងព្រះសីហនុ ខេត្តព្រះសីហនុ។

លោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជាបានមានប្រសាសន៍នៅក្នុងកម្មវិធីនោះជំនឿជឿជាក់យ៉ាងមុតមាំថា រោងចក្រនេះនឹងមិនត្រឹមតែនាំមកនូវអត្ថប្រយោជន៍សេដ្ឋកិច្ចសម្រាប់កម្ពុជាប៉ុណ្ណោះទេ ប៉ុន្តែថែមទាំងរួមចំណែកដល់ការបង្កើតការងារ និងបណ្តុះបណ្តាលជំនាញសម្រាប់ប្រជាជនកម្ពុជា ព្រមទាំងលើកកម្ពស់ការផ្ទេរបច្ចេកវិទ្យា និងការពង្រឹងសមត្ថភាពឧស្សាហកម្មកម្ពុជាផងដែរ។

លោកក៏បានស្នើដល់ក្រុមហ៊ុនត្រូវផ្តោតការយកចិត្តទុកដាក់ខ្ពស់អំពីបរិស្ថានវិនិយោគប្រកបដោយភាពអំណោយផល, ឧត្តមភាពប្រៀបធៀបរបស់កម្ពុជា រួមទាំងធនធានធម្មជាតិដ៏សម្បូរបែប, កម្លាំងពលកម្មវ័យក្មេងដែលមានជំនាញក្នុងវិស័យឧស្សាហកម្មនិងផលិតកម្ម ពិសេស តម្លៃពលកម្មដែលមានភាពប្រកួតប្រជែងខ្ពស់ និងការបន្តកសាងហេដ្ឋារចនាសម្ព័ន្ធសម្រាប់សម្រួលដល់ការដឹកជញ្ជូន ដែលកត្តាទាំងនេះបានធ្វើឱ្យកម្ពុជាក្លាយជាគោលដៅដ៏ទាក់ទាញសម្រាប់ការបណ្តាក់ទុនវិនិយោគ។

ជាមួយគ្នានោះដែរ លោក ជា  វុទ្ធីបានបង្ហាញអំពីកំណើននៃការវិនិយោគក្នុងរយៈពេល១១ខែនៃឆ្នាំ២០២៤ ដែលមានប្រមាណ ៤០% បើប្រៀបធៀបនឹងរយៈពេលដូចគ្នាក្នុងឆ្នាំ២០២៣ ដោយគិតចាប់ពីខែមករា ដល់ខែវិច្ឆិកា ឆ្នាំ២០២៤ ការវិនិយោគរបស់វៀតណាមជាប់ចំណាត់ថ្នាក់ទី៣ ក្នុងទំហំទុនវិនិយោគប្រមាណ ៥៥៧ លានដុល្លារអាម៉េរិក។

លោកសង្ឃឹមថា៖«ក្រុមហ៊ុនអាចនឹងមានលទ្ធភាពពង្រីកការវិនិយោគបន្ថែមទៀតជាបន្តបន្ទាប់នាពេលដ៏ខ្លីខាងមុខ ពិសេសការវិនិយោគលើដំណាំឈើដាំក្នុងស្រុក ដែលមិនត្រឹមតែបានផ្គត់ផ្គង់តម្រូវការផលិតកម្មរបស់ក្រុមហ៊ុននាពេលខាងមុខប៉ុណ្ណោះទេ ប៉ុន្តែអាចយកទៅកែច្នៃធ្វើគ្រឿងសង្ហារឹម ខណៈដែលកំទេចកំទីសំណល់ឈើអាចយកទៅប្រើប្រាស់ជាថាមពលកកើតឡើងវិញ ហើយដំណាំឈើដាំនេះក៏អាចទទួលបានអត្ថប្រយោជន៍ពីឥណទានកាបូនផងដែរ»៕

The post ​ TNTVN Forestry របស់វៀតណាមបើកដំណើការរោងចក្រកែច្នៃឈើដាំនៅកម្ពុជា appeared first on Kampuchea Thmey Daily.

បើតាមច្បាប់ស្ដីពីព្រៃឈើ ត្រង់ជំពូកទី១០ ពាក់ព័ន្ធនឹងការអភិរក្សសត្វព្រៃ បានចែងថា ពពួកសត្វព្រៃគ្រប់ប្រភេទនៅក្នុងប្រទេសកម្ពុជា ជាសម្បត្តិរបស់រដ្ឋ និងជាសមាសភាគនៃធនធានព្រៃឈើ។ ពពួកសត្វព្រៃទាំងអស់នេះ គឺស្ថិតនៅក្រោមការគ្រប់គ្រង ការសិក្សាស្រាវជ្រាវ និងការអភិរក្សដោយរដ្ឋបាលព្រៃឈើ។ ទន្ទឹមនេះ គ្រប់ប្រភេទសត្វព្រៃទាំងអស់ គឺត្រូវបានបែងចែកជា៣ក្រុម គឺ ១) ក្រុមប្រភេទជិតផុតពូជ ២) ក្រុមប្រភេទមានដោយកម្រ និង៣) ក្រុមប្រភេទមានដោយបង្គួរ។ បើនិយាយចំពោះសត្វក្ងោក ត្រូវបានកំណត់ និងចាត់ថ្នាក់ជាប្រភេទសត្វស្លាបនៃក្រុមប្រភេទសត្វព្រៃមានដោយកម្រ។

តែយ៉ាងណាក្ដី ក្នុងករណីមានការឯកភាពពីក្រសួងកសិកម្ម រុក្ខាប្រមាញ់ និងនេសាទ គឺរដ្ឋបាលព្រៃឈើមានសិទិ្ធចេញលិខិតអនុញ្ញាតចំពោះប្រភេទសត្វជិតផុតពូជ និងប្រភេទសត្វមានដោយកម្រសម្រាប់គោលបំណងការសិក្សាអប់រំ ឬការស្រាវជ្រាវវិទ្យាសាស្ត្រ ការគាំទ្រដល់កម្មវិធីនៃការចាប់បង្កាត់ពូជ និងការផ្លាស់ប្ដូរប្រភេទសត្វតាមរយៈកិច្ចព្រមព្រៀងសហប្រតិបត្តិការអន្តរជាតិ តែប៉ុណ្ណោះ។ ប៉ុន្តែ ចំពោះសកម្មភាពការយាយីដល់ប្រភេទសត្វទាំងនេះ ការបរបាញ់ ការទាក់ចាប់ ការយកធ្វើជាកម្មសិទ្ធិ ឬថែរក្សាជាលក្ខណៈសួនសត្វ ឬគ្រួសារ ការដឹកជញ្ជូន ធ្វើពាណិជ្ជកម្ម និងការនាំចេញនាំចូល គឺត្រូវបានហាមឃាត់ជាដាច់ខាត ហើយសកម្មភាពទាំងនេះត្រូវបានចាត់ទុកថា ជាបទល្មើសដែលផ្ទុយពីច្បាប់។  

បទល្មើសនៃការបរបាញ់ ការសម្លាប់ និងការចិញ្ចឹមដោយមានគោលបំណងធ្វើពាណិជកម្មលើប្រភេទសត្វជិតផុតពូជ  និងប្រភេទសត្វមានដោយកម្រ គឺត្រូវផ្តន្ទាទោសជាប់ពន្ធនាគារពី១ឆ្នាំ ទៅ៥ឆ្នាំ និងពិន័យជាទឹកប្រាក់ពី១០លានរៀល ទៅ១០០លានរៀល។ ទន្ទឹមនេះ វត្ថុតាងទាំងអស់នៃបទល្មើសសត្វព្រៃដែលរឹបអូសបានត្រូវទុកជាទ្រព្យសម្បត្តិរដ្ឋ។

ដោយឡែក ប្រភេទសត្វមានដោយបង្គួរ ច្បាប់ស្ដីពីព្រៃឈើ បានអនុញ្ញាតឲ្យមានការចិញ្ចឹម ឬថែរក្សាជាលក្ខណៈសួនសត្វ ឬលក្ខណៈជាគ្រួសារ ហើយក៏អនុញ្ញាតឲ្យធ្វើពាណិជ្ជកម្មដែរ។ ការនាំចេញនាំចូលប្រភេទសត្វមានដោយបង្គួរនេះ គឺត្រូវមានលិខិតអនុញ្ញាតពីរដ្ឋបាលព្រៃឈើ ដោយមានការឯកភាពពីក្រសួងកសិកម្ម រុក្ខាប្រមាញ់ និងនេសាទ៕

ដោយ៖ ធឿន វ៉ាន់សុង

The post តើការចិញ្ចឹមសត្វព្រៃជាលក្ខណៈឯកជន ខុសច្បាប់ដែរឬទេ? appeared first on Kampuchea Thmey Daily.

លោក ជុំ សុន្ទរី អ្នកនាំពាក្យក្រសួងការបរទេសកម្ពុជា បានឲ្យអ្នកសារព័ត៌មានដឹងនៅរសៀលថ្ងៃទី ១៨ ខែវិច្ឆិកានេះថា ចំពោះករណីមន្រ្តីរបស់កម្ពុជា ដែលត្រូវបានឃាត់ខ្លួននៅទីក្រុងទីញូវយ៉កនោះ គឺក្រសួ​ងការបរទេស និងស្ថានទូតកម្ពុជានៅទីក្រុងវ៉ាស៊ីនតោន និងក្រុងទីញូវយ៉ក កំពុងធ្វើការសម្របសម្រួលតាមច្រកការទូត និងតាមផ្លូវច្បាប់ដើម្បីការពារ និងស្វែងរកយុត្តិធម៌ជូនមន្រ្តីរបស់កម្ពុជា ដែលត្រូវបានឃាត់ខ្លួន ក្នុងពេលកំពុងបំពេញបេសកកម្មផ្លូវការ។

លោក ជុំ សុន្ទរី បានបញ្ជាក់ដែរថា «ក្នុងពេលជាមួយគ្នានេះ ស្ថានទូតយើងក៏កំពុងស្វះស្វែងដើម្បីបានចូលជួបសាម៉ីខ្លួន ហើយក៏កំពុងរកមេធាវីការពារក្តីនេះផងដែរ»។

កាលពីពេលថ្មីៗនេះ មានការភ្ញាក់ផ្អើលជាខ្លាំង នៅពេលមន្ត្រីក្រោមឱវាទក្រសួងកសិកម្ម រុក្ខាប្រមាញ់ និងនេសាទម្នាក់ ត្រូវបានឃាត់ខ្លួននៅអាកាសយានដ្ឋានអន្តរជាតិ ចន អេហ្វ កេណ្ណឌី ក្នុងក្រុងទីញូវយ៉ក សហរដ្ឋអាមេរិក។ ក្រសួងយុត្តិធម៌សហរដ្ឋអាមេរិក កាលពីថ្ងៃទី ១៦ ខែវិច្ឆិកា ឆ្នាំ ២០២២ បានផ្សព្វផ្សាយនៅគេហទំព័ររបស់ខ្លួនថា លោក គ្រី ម៉ះផល និងប្រធានរដ្ឋបាលព្រៃឈើកម្ពុជា ត្រូវបានចោទប្រកាន់ពីបទសមគំនិតក្នុង​ការរត់ពន្ធសត្វស្វាក្តាម ទៅសហរដ្ឋអាមេរិក។

ពាក់ព័ន្ធនឹងបញ្ហានេះ ក្រសួងកសិកម្ម រុក្ខាប្រមាញ់ និងនេសាទ បានចេញសេចក្ដីប្រកាសព័ត៌មានទាំងយប់ ថ្ងៃទី ១៧ ខែវិច្ឆិកា ដោយបានបង្ហាញការភ្ញាក់ផ្អើល និងក្តីទោមនស្សយ៉ាងខ្លាំង ដោយបានទទួលដំណឹងថា លោក គ្រី ម៉ះផល ប្រធាននាយកដ្ឋានសត្វព្រៃ និងជីវចម្រុះនៃរដ្ឋបាលព្រៃឈើ ត្រូវបាន ឃាត់ខ្លួននៅអាកាសយានដ្ឋានអន្តរជាតិ ចន អេហ្វ កេណ្ណឌី ក្នុងទីក្រុងញូវយ៉ក សហរដ្ឋអាមេរិក អំឡុងពេល លោកកំពុងរង់ចាំបន្តដំណើរទៅចូលរួមកិច្ចប្រជុំអនុសញ្ញាការពារសត្វ និងរុក្ខជាតិជិតផុតពូជ CITES (សាយតេស) នៅប្រទេសប៉ាណាម៉ា។

ជាមួយគ្នានេះ ក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ថា ក្រសួងប្រកាន់ខ្ជាប់នូវគោលការណ៍ និងច្បាប់ ដែលមានចែងនៅក្នុងអនុសញ្ញាសាយតេស។ បើតាមក្រសួងកសិកម្មដដែល វាជា រឿងដ៏គួរឲ្យហួសចិត្តជាទីបំផុត ដែលលោក គ្រី ប៉ះផល ត្រូវបានឃាត់ខ្លួនក្រោមបទចោទប្រកាន់នេះ ខណៈពេលដែលលោក កំពុងធ្វើដំណើរទៅចូលរួមកិច្ចប្រជុំផ្លូវការ ដើម្បីការពារសត្វ និងរុក្ខជាតិជិត ផុតពូជ នៅឯវេទិកាអង្គការសហប្រជាជាតិ និងខណៈពេលដែលប្រទេសទាំងពីរ គឺកម្ពុជា និងសហរដ្ឋអាមេរិក កំពុងមានទំនាក់ទំនងសហប្រតិបត្តិការយ៉ាងជិតស្និទ្ធ។

សេចក្ដីប្រកាសព័ត៌មានរបស់ក្រសួងកសិកម្ម រុក្ខាប្រមាញ់ និងនេសាទ ក៏បានបញ្ជាក់ដែរថា នៅកម្ពុជា សត្វស្វាក្តាមជាប្រភេទសត្វសម្បូរ និងមានវត្តមាននៅទូទាំងប្រទេស ទាំងក្នុងព្រៃធម្មជាតិ ទាំងក្នុងតំបន់ជាយក្រុង និងទីក្រុង ដូចជានៅរមណីដ្ឋានវត្តភ្នំ ក្នុងរាជធានីភ្នំពេញជាដើម។ លើសពីនេះទៀត សត្វស្វាក្តាម ត្រូវបានចិញ្ចឹមនៅកម្ពុជា តាំងពីឆ្នាំ ២០០៥​មកម្ល៉េះ ហើយត្រូវបាននាំចេញសម្រាប់ គោលដៅវេជ្ជសាស្ត្រ ជាពិសេសសម្រាប់ដំណាក់កាលធ្វើពិសោធន៍ ដើម្បីផលិត​ឱសថ វ៉ាក់សាំង ឬគ្រឿងសំអាង។ សត្វស្វាក្តាមទាំងនេះ មិនមែនត្រូវបានចាប់ពីព្រៃ ហើយបញ្ចូនចេញទៅក្រៅ ប្រទេសនោះទេ។

ក្រសួងកសិកម្ម បានបញ្ជាក់ទៀតថា កសិដ្ឋានដែលចិញ្ចឹមសត្វស្វាក្តាមទាំងនេះទៀតសោត ទម្រាំទទួលបាន ការទទួលស្គាល់តាមផ្លូវច្បាប់ គឺសុទ្ធតែតម្រូវឲ្យគោរពតាមបទដ្ឋានអនាម័យ និងវិធីសាស្ត្រចិញ្ចឹម ត្រឹមត្រូវ ដើម្បីរក្សាឲ្យបាននូវហ្សេនេទិករបស់វា មិនឲ្យផុតពូជនោះឡើយ។

បើតាមក្រសួងកសិកម្មដដែល សមត្ថកិច្ចគ្រប់គ្រងសាយតេសកម្ពុជា បានអនុញ្ញាតឲ្យនាំចេញសត្វស្វាក្តាម ដោយផ្អែកលើច្បាប់ និងបទប្បញ្ញត្តិជាតិ និងអន្តរជាតិ។ ចំពោះការនាំចូលទៅសហរដ្ឋអាមេរិក ក្រុមហ៊ុន ដែលប្រកបអាជីវកម្មនាំចេញសត្វស្វាក្តាមនេះ ត្រូវអនុវត្តទៅតាមនីតិវិធីរបស់សហរដ្ឋអាមេរិក។

សេចក្ដីប្រកាសព័ត៌មានខាងលើ បានគូសបញ្ជាក់ថា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងរាជរដ្ឋាភិបាលកម្ពុជា នឹងខិតខំប្រឹងប្រែងឲ្យអស់ពីលទ្ធភាព ដើម្បីស្វែងរកយុត្តិធម៌ជូនមន្ត្រីរបស់ខ្លួន ជាពិសេសអ្នកដែលបំពេញកាតព្វ​កិច្ចផ្លូវការតំណាងប្រទេស ស្របតាមអនុសញ្ញាអន្តរជាតិ។ ក្រ​សួងកសិកម្ម រុក្ខាប្រមាញ់ និងនេសាទ បានធានាថា ច្បាប់ និងបទប្បញ្ញត្តិ ព្រមទាំងអនុសញ្ញាអន្តរជាតិនានានឹងត្រូវបានគោរព។

គួរជម្រាបជូនដែរថា បើយោងតាមរបា​យការណ៍ ស្ដីពី សភាពការណ៍កសិកម្ម រុក្ខាប្រមាញ់ និងនេសាទ ប្រចាំខែតុលា ឆ្នាំ ២០២២ និងទិសដៅអនុវត្តបន្ត របស់ក្រសួងកសិកម្ម រុក្ខាប្រមាញ់ និងនេសាទ បានឲ្យដឹងថា ក្រុមហ៊ុនចំនួន ៥ មានកសិដ្ឋានស្រាវជ្រាវ ចិញ្ចឹម និងបង្កាត់ពូជសត្វស្វាក្ដាម យកកូននាំចេញចំនួន ៦ទីតាំង ស្ថិតនៅរាជធានីភ្នំពេញ ខេត្តកំពង់ធំ សៀមរាប កំពង់ចាម កំពង់ស្ពឺ ពោធិ៍សាត់ និងខេត្តកំពង់ឆ្នាំង។ ក្នុងកសិដ្ឋានទាំង ៦ទីតាំងនោះ គិតត្រឹមខែតុលា ឆ្នាំ ២០២២ មានស្វាក្ដាមចំនួន ១៣៩,​៦០៥ក្បាល ដែលក្នុងនោះកូនកើតក្នុងខែតុលា មានចំនួន ៤,៨៦៣ក្បាល៕

The post ក្រសួងការបរទេស កំពុងស្វែងរកវិធីការពារ និងរកយុត្តិ​ធម៌ជូនមន្ត្រីរដ្ឋបាលព្រៃឈើមួយរូប ដែលត្រូវបានឃាត់ខ្លួននៅអាមេរិក appeared first on Kampuchea Thmey Daily.

សេចក្ដីប្រកាសព័ត៌មានរបស់រដ្ឋបាលព្រៃឈើចេញផ្សាយនៅថ្ងៃទី ៤ ខែសីហា ២០២២នេះបង្ហាញថា រាជរដ្ឋាភិបាលសម្រេចយកតំបន់ភ្នំតាម៉ៅសម្រាប់ធ្វើការអភិវឌ្ឍដោយសារជាតំបន់ដែលនៅក្បែរទីក្រុង ក្បែរព្រលានយន្តហោះថ្មី និងកៀកតំបន់ទេសចរណ៍ទន្លេបាទី។

ប្រភពដដែលលើកឡើងថាការអភិវឌ្ឍតំបន់នេះមិនមែនជាការលក់ដូរដូចការលើកឡើងនោះទេ តែជាការដោះដូរតំបន់ជាថ្នូរនឹងការអភិវឌ្ឍបន្ថែមដល់ឧទ្យានសួនសត្វ និងមជ្ឈមណ្ឌលសង្គ្រោះសត្វព្រៃភ្នំតាម៉ៅដោយកែលម្អរឧទ្យានសួនសត្វភ្នំតាម៉ៅឱ្យមានភាពប្រសើរឡើងមានប្រព័ន្ធផ្លូវ អាគារ សួនច្បារ អាងស្តុកទឹក ក៏ដូចជាការបង្កើតសារមន្ទីរជាតិនៅរាជធានីភ្នំពេញ ការបង្កើតសួនសត្វសាហ្វារី នៅខេត្តសៀមរាប ការបង្កើតសួនភូតគាមនៅខេត្តមណ្ឌលគិរី និងការសាងសង់អគារធ្វើការរបស់មន្ត្រីរាជការ។

រដ្ឋបាលព្រៃឈើបានសង្កត់ធ្ងន់ថា ការដោះដូរ គឺអនុវត្តដោយមានភាពតឹងរ៉ឹង មានការវាយតម្លៃពីក្រុមហ៊ុនឯកជន និងមានគណៈកម្មការឯកជនភាវូនីយកម្ម ដែលមានអន្តរក្រសួង ពិនិត្យ និងវាយតម្លៃអំពោះការដោះដូរយ៉ាងត្រឹមត្រូវ។
រដ្ឋបាលព្រៃឈើ បានបញ្ជាក់ទៀតថា តំបន់នេះពុំមានសត្វព្រៃសំខាន់ៗជិតផុតពូជ និងកម្រ ដូចការលើកឡើងនោះទេ ហើយតំបន់នេះមានជ្រូកព្រៃដែលតែងតែមករំខានដល់ដំណាំប្រជាពលរដ្ឋ។

សត្វព្រៃដេលលើកឡើងកន្លងមក គឺជាសត្វព្រៃបានថែរក្សានៅក្នុងឧទ្យានសួនសត្វភ្នំតាម៉ៅ ដែលមានសុវត្ថិភាព១០០​ភាគរយ ហើយការអភិវឌ្ឍនេះ មិនមានការប៉ះពាល់ទាល់តែសោះ។

រដ្ឋបាលព្រៃឈើលើកឡើងទៀតថា សត្វដែលតែងតែលើកឡើងដោយអង្គការ សង្គមជនបរិស្ថាន និងសាធារណជននានា គឺជាសត្វព្រៃដែលកំពុងរស់នៅក្នុងទ្រុងនៃឧទ្យានសួនសត្វភ្នំតាម៉ៅ និងសត្វព្រៃមួយចំនួនទៀតដូចជាប្រើស រមុាំង ក្រៀល រនាល ទុង ត្រូវបានដោះលែងឱ្យរស់ក្នុងបរិវេណរបស់ឧទ្យានសួនសត្វភ្នំតាម៉ៅ ដែលមានរបងព័ទ្ធជុំវិញលើផ្ទៃដីជាង ៤០០ហិកតា និងមិនមានសត្វព្រៃអាចចេញមកខាងក្រៅនោះទេ និងបានមើលថែរក្សា ផ្តល់ចំណីដោយរដ្ឋបាលព្រៃឈើ និងអង្គការនានា។ ការលើកឡើងកន្លងមកបានធ្វើឱ្យមានការភ័ន្តច្រលំថា ការអភិវឌ្ឍតំបន់នេះប៉ះពាល់ដល់សត្វព្រៃ៕

The post រដ្ឋបាល​ព្រៃឈើ​បំភ្លឺចម្ងល់​ជុំវិញ​ការអភិវឌ្ឍ​តំបន់ភ្នំតាម៉ៅ​ ថា​មិនមែន​ជាការលក់​ដូរនោះទេ​ appeared first on Kampuchea Thmey Daily.