តាមការចុះផ្សាយរបស់ Daily Mail កាលពីថ្ងៃអង្គារទី៩ខែមេសា, វីដេអូនេះ ត្រូវបានគេថតនៅទីក្រុង Arlington នៃរដ្ឋ Texas បង្ហាញឲ្យឃើញនូវវត្ថុហោះយ៉ាងចម្លែក ដោយដល់ថ្នាក់មានអ្នកខ្លះហ៊ាននិយាយថា នោះជាយានអវកាសទៀតផង។

បច្ចុប្បន្ន វីដេអូមួយនេះ កំពុងផ្ទុះខ្លាំងនៅលើបណ្តាញសង្គម ប៉ុន្តែមានការអះអាងមួយដែលគេគិតថា សមហេតុផលជាងគេ នោះគឺថា វាគ្រាន់តែជាស្រមោលយន្តហោះនៅរយៈកម្ពស់ខ្ពស់ប៉ុណ្ណោះ។

Texas គឺជាទីតាំងដែលអាចមើលឃើញសូរ្យគ្រាសពេញលេញបានយ៉ាងពេញភ្នែក កាលពីថ្ងៃទី៨ខែមេសា ហើយរដ្ឋនេះទៀតសោត មានឈ្មោះបោះសំឡេងជាយូរមកហើយថាជាកន្លែង ដែលគេសង្ស័យថា ធ្លាប់មានប្រវត្តិជួបប្រទះជាមួយយានអវកាស។

ទោះបីជាយ៉ាងណាក៏ដោយ មិនទាន់មានការអះអាងជាផ្លូវការថាតើ វត្ថុក្នុងវីដេអូនេះ ពិតជាអ្វីនោះទេ។

សម្រាប់រដ្ឋ Texas, គេអាចមើលឃើញសូរ្យគ្រាសពេញលេញរយៈពេល៣នាទីនិង៥១វិនាទី ព្រោះវាស្ថិតនៅផ្លូវរបស់សូរ្យគ្រាស មុនពេលបាតុភូតនេះបញ្ចប់នៅរដ្ឋ Maine។

មិនត្រឹមតែជាចំណីភ្នែក សូរ្យគ្រាសនេះក៏បានក្លាយជាឱកាសមាស សម្រាប់អង្គការណាសា ដើម្បីធ្វើពិសោធន៍វិទ្យាសាស្រ្តនានា ហើយផ្តល់ឱកាសដ៏កម្រដល់វិស័យពាណិជ្ជកម្មនិងការរៀបចំកម្មវិធីកម្សាន្តផ្សេងៗផងដែរ។

យោងតាមអង្គការណាសា, សូរ្យគ្រាសនេះ បានផ្តល់ឱកាសមាសដើម្បីសិក្សាអំពី Corona របស់ព្រះអាទិត្យ ដែលជាធម្មតាជះឥទ្ធិពលខ្លាំងលើអ្វីៗទាំងអស់ចាប់ពីផ្កាយរណប រហូតដល់បណ្តាញថាមពល។

សូមបញ្ជាក់ថា លើកចុងក្រោយដែលសហរដ្ឋអាមេរិក ទទួលបានរសជាតិសូរ្យគ្រាសបែបនេះគឺនៅក្នុងឆ្នាំ២០១៧ ហើយពួកគេនឹងមិនបានឃើញទស្សនីយភាពបែបនេះទៀតឡើយ ពោលគឺត្រូវចាំរហូតដល់ឆ្នាំ២០៤៥ឯណោះ៕

សូមទស្សនាវីដេអូ៖

អត្ថបទ៖ សុខ សុវណ្ណ

ចុចអាន៖ មនុស្សរាប់លាននាក់ ទទួលបានទស្សនីយភាពដ៏មហស្ចារ្យ នៃសូរ្យគ្រាសកម្របំផុត ក្នុងឆាកជីវិត

The post ថតជាប់វត្ថុចម្លែកហោះលើមេឃនៅរដ្ឋTexas កាលសូរ្យគ្រាសថ្ងៃមុន appeared first on Kampuchea Thmey Daily.

ភ្លើងឆេះព្រៃដ៏​ធំ​ទី​ពីរ​ក្នុង​ប្រវត្តិសាស្ត្រ​រដ្ឋ​តិចសាស់នេះត្រូវបានគេឲ្យឈ្មោះថា Smokehouse Creek Fire ដែលមកដល់ពេលនេះបាន​ឆាបឆេះ​ផ្ទៃដី​ចំនួន ៨៥ ម៉ឺនហិចតា​នៅ​ភាគ​ខាងជើង​ទីក្រុង Amarillo ខណៈភ្លើងឆេះព្រៃធំទីមួយគឺ East Amarillo Complex ដែលបានឆេះជាង ៩០ ម៉ឺនហិចតាក្នុងឆ្នាំ២០០៦ ។

ទន្ទឹមនោះ អភិបាលរដ្ឋតិចសាស់ក៏បានចេញសេចក្តីប្រកាសគ្រោះមហន្តរាយចំពោះ ៦០ តំបន់នៅក្នុងរដ្ឋនេះផងដែរ ខណៈតំបន់ Hutchinson County ជាតំបន់ដែលរងគ្រោះខ្លាំងជាងគេ ហើយមកដល់ពេលនេះ ផ្ទះ និងអាជីវកម្មជាង ៤,៥០០ កំពុងគ្មានអគ្គិសនីប្រើប្រាស់ ។

ស្របពេលជាមួយគ្នានេះ យោងតាមអាជ្ញាធរក្នុងតំបន់បានឲ្យដឹងថា ភ្លើងឆេះ Smokehouse Creek បានបណ្តាលឲ្យពលរដ្ឋរស់នៅក្នុងទីក្រុងជាច្រើន ក៏ដូចជាសង្កាត់ក្នុងទីក្រុង Amarillo និងសហគមន៍ផ្សេងទៀតត្រូវជម្លៀសចេញផងដែរ ។

បន្ថែមពីនេះ ទីភ្នាក់ងារអាកាសធាតុជាតិក៏បានព្រមានអ្នករស់នៅក្បែរទីក្រុង Amarillo ស្នាក់នៅក្នុងផ្ទះជាមួយសត្វចិញ្ចឹមរបស់ពួកគេ ដោយសារតែគុណភាពខ្យល់មិនល្អ ខណៈរដ្ឋតិចសាស់ក៏បានចេញការព្រមានដល់កសិករអំពីផលប៉ះពាល់ដែលអាចកើតមានលើផលកសិកម្ម និងគោក្របីផងដែរ ។

ភ្លើងឆេះព្រៃនេះក៏បានបង្កឲ្យមានការព្រួយបារម្ភពីការប៉ះពាល់ដល់ទីតាំងរោងចក្រផលិតអាវុធនុយក្លេអ៊ែរ Pantex នៅទីក្រុង Amarillo ដោយបានបង្ខំឲ្យរោងចក្រនេះបិទជាបណ្តោះអាសន្ន និងជម្លៀសបុគ្គលិកចេញពីរោងចក្រផងដែរ ។ ក្នុងពេលជាមួយគ្នានេះ អ្នកពន្លត់អគ្គីភ័យរាប់រយនាក់ និងអ្នកសង្គ្រោះ ត្រូវបានដាក់ពង្រាយដើម្បីប្រុងជើងការពន្លត់អគ្គីភ័យ ។

គួរបញ្ជាក់ថា ដោយសារតែបញ្ហាស្មៅស្ងួត សីតុណ្ហភាពក្ដៅ និងខ្យល់បក់ខ្លាំងទើបបង្កឲ្យភ្លើងឆេះយ៉ាងឆាប់រហ័ស ប៉ុន្តែក្រុមអ្នកពន្លត់អគ្គិភ័យក៏កំពុងញាប់ដៃញាប់ជើងពន្លត់ភ្លើងឆេះនេះផងដែរ ជាពិសេវាអាចនឹងរលត់ទៅវិញផងដែរ ប្រសិនបើឥទ្ធិពលខ្យល់ព្យុះកំបុតត្បូងដែលវាយប្រហារនៅទីក្រុងឈីកាហ្គោបង្កជាភ្លៀងធ្លាក់ ៕

អត្ថបទ ៖ ប៊ុន សុភាព

The post រដ្ឋតិចសាស់ ជួបភ្លើងឆេះព្រៃធំបំផុតទី ២ ក្នុងប្រវត្តិសាស្ត្រ លេបត្របាក់ផ្ទៃដី ៨៥ ម៉ឺនហិចតា appeared first on Kampuchea Thmey Daily.