ថតជាប់វត្ថុចម្លែកហោះលើមេឃនៅរដ្ឋTexas កាលសូរ្យគ្រាសថ្ងៃមុន

ជារឿងមួយដែលមិនទាន់មានការបកស្រាយច្បាស់ទុកឲ្យគ្រប់គ្នាមានមន្ទិលសង្ស័យ ចំពោះវីដេអូមួយដែលគេថតជាប់វត្ថុចម្លែក ហោះកាត់ពពកនៅលើមេឃ កាលពីថ្ងៃទី៨ខែមេសា ដែលត្រូវជាថ្ងៃកើតបាតុភូតសូរ្យគ្រាសមហាកម្រ នៅតំបន់អាមេរិកខាងជើង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Daily Mail កាលពីថ្ងៃអង្គារទី៩ខែមេសា, វីដេអូនេះ ត្រូវបានគេថតនៅទីក្រុង Arlington នៃរដ្ឋ Texas បង្ហាញឲ្យឃើញនូវវត្ថុហោះយ៉ាងចម្លែក ដោយដល់ថ្នាក់មានអ្នកខ្លះហ៊ាននិយាយថា នោះជាយានអវកាសទៀតផង។

បច្ចុប្បន្ន វីដេអូមួយនេះ កំពុងផ្ទុះខ្លាំងនៅលើបណ្តាញសង្គម ប៉ុន្តែមានការអះអាងមួយដែលគេគិតថា សមហេតុផលជាងគេ នោះគឺថា វាគ្រាន់តែជាស្រមោលយន្តហោះនៅរយៈកម្ពស់ខ្ពស់ប៉ុណ្ណោះ។

Texas គឺជាទីតាំងដែលអាចមើលឃើញសូរ្យគ្រាសពេញលេញបានយ៉ាងពេញភ្នែក កាលពីថ្ងៃទី៨ខែមេសា ហើយរដ្ឋនេះទៀតសោត មានឈ្មោះបោះសំឡេងជាយូរមកហើយថាជាកន្លែង ដែលគេសង្ស័យថា ធ្លាប់មានប្រវត្តិជួបប្រទះជាមួយយានអវកាស។

ទោះបីជាយ៉ាងណាក៏ដោយ មិនទាន់មានការអះអាងជាផ្លូវការថាតើ វត្ថុក្នុងវីដេអូនេះ ពិតជាអ្វីនោះទេ។

សម្រាប់រដ្ឋ Texas, គេអាចមើលឃើញសូរ្យគ្រាសពេញលេញរយៈពេល៣នាទីនិង៥១វិនាទី ព្រោះវាស្ថិតនៅផ្លូវរបស់សូរ្យគ្រាស មុនពេលបាតុភូតនេះបញ្ចប់នៅរដ្ឋ Maine។

មិនត្រឹមតែជាចំណីភ្នែក សូរ្យគ្រាសនេះក៏បានក្លាយជាឱកាសមាស សម្រាប់អង្គការណាសា ដើម្បីធ្វើពិសោធន៍វិទ្យាសាស្រ្តនានា ហើយផ្តល់ឱកាសដ៏កម្រដល់វិស័យពាណិជ្ជកម្មនិងការរៀបចំកម្មវិធីកម្សាន្តផ្សេងៗផងដែរ។

យោងតាមអង្គការណាសា, សូរ្យគ្រាសនេះ បានផ្តល់ឱកាសមាសដើម្បីសិក្សាអំពី Corona របស់ព្រះអាទិត្យ ដែលជាធម្មតាជះឥទ្ធិពលខ្លាំងលើអ្វីៗទាំងអស់ចាប់ពីផ្កាយរណប រហូតដល់បណ្តាញថាមពល។

សូមបញ្ជាក់ថា លើកចុងក្រោយដែលសហរដ្ឋអាមេរិក ទទួលបានរសជាតិសូរ្យគ្រាសបែបនេះគឺនៅក្នុងឆ្នាំ២០១៧ ហើយពួកគេនឹងមិនបានឃើញទស្សនីយភាពបែបនេះទៀតឡើយ ពោលគឺត្រូវចាំរហូតដល់ឆ្នាំ២០៤៥ឯណោះ៕

សូមទស្សនាវីដេអូ៖

អត្ថបទ៖ សុខ សុវណ្ណ

ចុចអាន៖ មនុស្សរាប់លាននាក់ ទទួលបានទស្សនីយភាពដ៏មហស្ចារ្យ នៃសូរ្យគ្រាសកម្របំផុត ក្នុងឆាកជីវិត