លោក ឌី ពុទ្ធិ ជាសិល្បករក្នុងគម្រោងការ អមោឃបាស – the next generation បានឱ្យ កម្ពុជាថ្មី ដឹងនៅថ្ងៃទី៧ ខែមីនា ឆ្នាំ២០២៤ នេះថា គម្រោង អមោឃបាស-The Next Generation បានរៀបចំផ្ទាំងទស្សនីយភាពរបាំក្បាច់បុរាណ និងរបាំបុរាណច្នៃរឿង មានរយៈពេល ២ថ្ងៃ នៅថ្ងៃសៅរ៍ អាទិត្យ ថ្ងៃទី៩ ទី១០ ខែមីនា ឆ្នាំ២០២៤ វេលាម៉ោង ៥ ដល់ ៦ល្ងាច នៅក្នុងកម្មវីធី Maloop Garden Market “Art, Craft, and Home Decor”។

លោក ឌី ពុទ្ធិ បានឱ្យដឹងថា នៅថ្ងៃទី៩ មីនា មានការសម្ដែងរបាំចំនួន ៤ គឺ ១. របាំឆួយឆាយជំទង់ ជាស្នាដៃចាស់ តែងគ្រឿងធំបែបចតុមុខ របាំនេះនិយាយអំពីសោភ័ណភាពដ៏វិចិត្រ កិរិយាមាយាទរម្យទម និងសមត្ថភាពដ៏វិសេស នៃតួអង្គទើបតែប្តូរវ័យកុមារភាពមកជាវ័យជំទង់។ ២. របាំអត្ថន័យមនោសញ្ចេតនា ជាស្នាដៃចាស់ តែងគ្រឿងធំបែបចតុមុខ របាំនេះបង្ហាញអំពីការប្រើប្រាស់កាយវិការ និងបច្ចេកទេសនានា នៃរបាំក្បាច់បុរាណដើម្បីស្តែងនូវអារម្មណ៍ មនោសញ្ចេតនា ស្រលាញ់ សោមនស្សរីករាយ ក៏ដូចជា ទុក្ខសោក។

ចំណែកទី៣ គឺ របាំនាងនាគ ស្នាដៃបង្កើតថ្មីដោយ អ្នកគ្រូ សុភីលីន ជៀម ស្សាភីរ៉ូ ស្ថាបនិក និងជានាយិកា នៃក្រុមសិល្បៈ សុភីលីន Sophiline Arts Ensemble ជាចង្កោមរបាំទាំងបួនដែលមានចំណងជើងថា រដូវយាត្រាចរ​។ របាំនេះតែងគ្រឿងធំបែបចតុមុខ ប៉ុន្តែប្រើប្រាស់ស្បៃវែងជាងធម្មតាដំណាងឱ្យកន្ទុយនាគ។ របាំនាងនាគ នេះចង់បង្ហាញអំពីវិបត្តិអត្តសញ្ញាណ។ ទី៤ របាំហរិហរៈ​​ ជា​ស្នាដៃរបស់ អ្នកគ្រូសុភីលីន ជាម ស្សាភីរ៉ូ ជាស្នាដៃមួយក្នុងចំណោមស្នាដៃទាំងបួនដែលមានចំណងជើងថា រដូវយាត្រាចរ។ របាំហរិហរៈ​​​ ចង់បង្ហាញអំពីការរួបរួម និងតុល្យភាព។

រីឯនៅថ្ងៃទី១០ មីនា មាន ១របាំ គឺ របាំសហធាតុ ជារបាំក្បាច់បុរាណច្នៃ ដែលពិពណ៌នាអំពីទឹក ដី ភ្លើង ខ្យល់ ជាធាតុទាំងបួននៅក្នុងរូបភាពជាសភាវៈមានជីវិត ស្នាដៃនេះចង់បង្ហាញអំពីតម្លៃ នៃការរួបរួម សហការ និងការស្វែងរកដំណោះស្រាយ ដើម្បីឆ្លើយតបទៅនឹងជម្លោះដែលកើតមានឡើងពីភាពលោភលន់ ការចង់បាន និងអំណាច។ សាមគ្គីភាព គឺជាចំណែកដ៏សំខាន់របស់សហគមន៍ ហើយគ្មានបុគ្គលណាម្នាក់អាចរស់នៅដោយគ្មានទំនាក់ទំនង ការគាំទ្រ សេចក្តីស្រឡាញ់ និងកិច្ចសហប្រតិបត្តិការក្នុងដំណើរជីវិតនោះទេ។ ដំឡើងស្នាដៃដោយសិល្បករ លោក ឃុន ចាយ។

ទីតាំង៖ ម្លប់ អាស័យដ្ឋាន៖ ផ្លូវតាផុន (ខាងលិចផ្លូវ ២៧១ ចម្ងាយ ៣០០ម៉ែត្រ)

https://maps.app.goo.gl/g4jJWBfgT97tMasm6

តម្លៃសបុត្រទស្សនា ១០ ដុល្លារអាមេរិក។ លេខទូរសព្ទទិញសំបុត្រ 070 949 040 (Telegram)៕

The post ទស្សនីយភាពរបាំក្បាច់បុរាណចំនួនបួន ត្រៀមអង្រួនចុងសប្ដាហ៍នេះ appeared first on Kampuchea Thmey Daily.

លោក ឃុន ចាយ ជាស្ថាបនិក នៃ​របាំបុរាណច្នៃ “សហធាតុ” បានឱ្យ “កម្ពុជាថ្មី” ដឹងនៅថ្ងៃនេះថា របាំនេះមានរបាំមួយនេះមានរយៈពេល ១៧ នាទី ដោយមានតួអង្គសម្ដែងចំនួន ៥ នាក់ ដូចជា លោករូបលោកផ្ទាល់ សម្ដែងជាធាតុភ្លើង, លោក ឥន សេរីវិបុល សម្ដែងជាធាតុខ្យល់, លោក សឿ ចំរើន សម្ដែងជាតួសរីរាង្គ, លោក ភន សន្យា សម្ដែងជាធាតុទឹក និងលោក ប៉ាត រស្មី សម្ដែងជាធាតុដី។

លោក ឃុន ចាយ មានប្រសាសន៍បន្ថែមទៀតថា៖ របាំនេះបានថ្លែងពីដំណើរបេសកកម្ម នៃធាតុទាំង៤ មានដូចជា ទឹក ដី ភ្លើង និងខ្យល់ ក្នុងការផ្ដល់នូវធាតុទាំងបួន ក៏ដូចជាពរជ័យទៅឱ្យសិរីរាង្គមួយ។ តែផ្ទុយទៅវិញ ធាតុភ្លើងបានលួចយកសិរីរាង្គនោះ ដោយគិតថា ខ្លួនគឺជាភ្លើង ជាធាតុមួយដែលអស្ចារ្យលើសធាតុផ្សេងៗ ដោយអាចដុតបំផ្លាញទ្វីបទាំងមូលបាន ដូច្នេះមិនចាំបាច់ត្រូវការគ្រាំទ្រ សហការពីធាតុដទៃនោះឡើយ”។

ស្ថាបនិករបាំបុរាណច្នៃ វ័យ ២៦ ឆ្នាំរូបនេះ បញ្ជាក់បន្ថែមថា៖ “ជាចុងក្រោយ ធាតុភ្លើងបានបរាជ័យក្នុងបេសកម្មម្នាក់ឯងមួយនេះ ហើយធាតុទាំង៣ បានណែនាំ។ ទីបំផុត ធាតុទាំង៤ បានត្រលប់មករួបរួមគ្នាជាថ្មី ហើយបេសកកម្មមួយនេះក៏ទទួលបានផ្លែផ្លាជាទីមោទនៈ ហើយសិរីរាង្គក៏បានជីវិតពេញបរិបូរណ៍ ពេញដោយពរជ័យរស់នៅប្រកបដោយសុភមង្គល និងសុខសន្ដិភាព”។

សិល្បករ នៃក្រុមនារ្យរស រូបនេះ បានឱ្យដឹងបន្ថែមថា លោកបង្កើតខ្លឹមសាររបាំនេះ ដោយសារ កាលកំឡុងដើមត្រីមាសទី២ (ខែមេសា) ឆ្នាំ២០២៣ លោកបានចូលរួមវគ្គសិក្សាមួយនៅប្រទេសថៃ រយៈពេល ៣ ខែ។ ខណៈប្រទេសកម្ពុជាមានសន្តិភាព រូបលោកអាចមករៀនឆ្លងប្រទេសដោយចិត្តរីករាយ ប៉ុន្តែលោកឃើញសិស្សជនជាតិមីយ៉ាន់ម៉ា ខ្វល់ខ្វាយច្រើនពីគ្រួសារពួកគេក្នុងមាតុភូមិ ក៏ដូចជាសុវត្ថិភាពផ្ទាល់ខ្លួន ដោយពួកគេបារម្ភថា ពេលរៀនចប់ពីប្រទេសថៃហើយ មិនដឹងពួកគេអាចវិលចូលប្រទេស អាចជួបញាតិមិត្តវិញបាន ឬទេ ហើយចូលដោយរបៀបណា?”។

លោក ឃុន ចាយ បានបញ្ជាក់បន្ថែមថា លោកចង់ធ្វើជាសារមួយតាមរយៈស្នាដៃរបាំ “សហធាតុ” នេះ ទៅកាន់ប្រជាជនកម្ពជា ក៏ដូចជាទូទាំងពិភពលោកទាំងមូល បន្ដយល់ថា លើកលោកនេះគ្មានបុគ្គលណាដែលអាចរស់នៅខ្វះការគ្រាំទ្រ ក្ដីស្រលាញ់ សហការ សន្ដិភាព និងសេរីភាពបានទេ ដូច្នេះសូមបន្ដរួបរួមគ្នារក្សាសមទ្ធិផលដែលយើងកំពុងមានដូចជា សន្ដិភាព សេរីភាព ការអភិវឌ្ឍជាដើម ដើម្បីធានានិរន្ដរភាព នៃសន្ដិភាព នៃប្រជាជាតិកម្ពុជាទាំងមូល៕

អត្ថបទ៖ ច័ន្ទ វីរៈ

The post ដំណើររឿង របាំបុរាណច្នៃថ្មី “សហធាតុ” មានខ្លឹមសារពិសេស យ៉ាងណា? appeared first on Kampuchea Thmey Daily.

លោក ឃុន ចាយ ជាស្ថាបនិក នៃ​របាំបុរាណច្នៃ សហធាតុ បានឱ្យ កម្ពុជាថ្មី ដឹងថា មូលហេតុដែលលោកដំឡើងស្នាដៃនេះឡើង ដោយសារ កាលពីកំឡុងខែមករា ដល់ខែមេសា ឆ្នាំ២០២៣ លោកទទួលបានឱកាសទៅចូលរៀនក្នុងកម្មវិធីមួយនៅប្រទេសថៃ រយៈពេលបីខែ។ ក្នុងរយៈពេលនោះ លោកបានមើលឃើញពីទុក្ខលំបាក ក្ដីឈឺចាប់ ក្ដីកង្វល់ជាច្រើនពីសំណាក់សិស្សៗដែលបានមកពីប្រទេសមីយ៉ាន់ម៉ា។

លោក ឃុន ចាយ មានប្រសាសន៍បន្តថា៖ “ខណៈកម្ពុជា មានសន្តិភាព ខ្ញុំអាចមករៀនឆ្លងប្រទេសដោយចិត្តរីករាយ តែសិស្សជនជាតិមីយ៉ាន់ម៉ា បារម្ភពីគ្រួសារពួកគេក្នុងប្រទេសមីយ៉ាន់ម៉ា ក៏ដូចជាសុវត្ថិភាពផ្ទាល់ខ្លួន ហើយពួកគេបារម្ភថា ពេលរៀនចប់ពីប្រទេសថៃហើយ តើពួកគេអាចវិលចូលប្រទេស អាចជួបញាតិមិត្តវិញបាន ឬទេ ហើយចូលដោយរបៀបណា?”។

សិល្បករ នៃក្រុមនារ្យរស ខាងលើនេះ បានបញ្ជាក់បន្ថែមថា លោកសូមឧទ្ទិសស្នាដៃនេះទៅដល់ប្រជាជនស្លូតត្រង់ ដែលបានបាត់បង់ជីវិត រងរបួស ជាប់ឃុំឃាំង និងបានរត់គេចខ្លួន នៅក្នងប្រទេសមីយ៉ាន់ម៉ាទាំងមូល ដោយសាររបបយោធាផ្ដាច់ការមីយ៉ាន់ម៉ា។

លោក ឃុន ចាយ លើកឡើងបន្តថា៖ “ខ្ញុំសូមឱ្យស្នាដៃមួយនេះ អាចឧទ្ទិសដល់វត្ថុសក្ដិសិទ្ធិក្នុងលោក ជួយឃុំគ្រងឱ្យប្រទេសមីយ៉ាន់ម៉ាឆាប់ទទួលបានសន្ដិភាព សេរីភាព សុភមង្គល និងមកចរចា សហការ រួបរួមគ្នាឡើងវិញសារជាថ្មី ដើម្បីប្រយោជន៍រួម។

សិល្បករវ័យ ២៦ ឆ្នាំរូបនេះ បានបញ្ជាក់បន្ថែមថា លោកចង់ធ្វើជាសារមួយតាមរយៈស្នាដៃរបាំ “សហធាតុ” នេះ ទៅកាន់ប្រជាជនកម្ពជា ក៏ដូចជាទូទាំងពិភពលោកទាំងមូលបន្ដយល់ថា លើកលោកនេះគ្មានបុគ្គលណាដែលអាចរស់នៅខ្វះការគ្រាំទ្រ ក្ដីស្រលាញ់ សហការ សន្ដិភាព និងសេរីភាពបានទេ ដូច្នេះសូមបន្ដរួបរួមគ្នារក្សាសមទ្ធិផលដែលយើងកំពុងមានដូចជា សន្ដិភាព សេរីភាព ការអភិវឌ្ឍជាដើម ដើម្បីធានានិរន្ដរភាព នៃសន្ដិភាព នៃប្រជាជាតិកម្ពុជាទាំងមូល។

គួរបញ្ជាក់ថា របាំទម្រង់បុរាណច្នៃ សហធាតុ នេះ ត្រូវបានសម្ដែងលើកដំបូល កាលពីចុងសប្ដាហ៍នេះ លុះដល់ថ្ងៃអង្គារនេះ យោធាមីយ៉ាន់ម៉ា បានប្រកាសលើកលែងទោសចំនួន ៥ ករណីដល់អតីតមេដឹកនាំរដ្ឋាភិបាលស៊ីវិល លោកស្រី អ៊ុងសាន ស៊ូជី ដែលជាប់ចោទក្នុងចំណោមសំណុំរឿងក្ដីក្ដាំសរុប ១៩ ករណី តម្រូវឱ្យជាប់ពន្ធនាគារ ៣៣ ឆ្នាំ។ ៥ ករណីដែលយោធាមីយ៉ាន់ម៉ាប្រកាសលើកលែងទោសនោះ គឺបន្ថយការជាប់ពន្ធនាគាររបស់ លោកស្រី អ៊ុងសាន ស៊ូជី រយៈពេល ៦ ឆ្នាំ។

គួររំលឹកថា កាលពីខែមេសា ឆ្នាំ២០២៣នេះ យោធាមីយ៉ាន់ម៉ា បានទម្លាក់គ្រាប់បែក ទៅលើភូមិមួយនៅតំបន់ Sagaing ភាគកណ្តាល ដែលបានសម្លាប់មនុស្សជាង ១០០នាក់ រួមទាំងកុមារផងដែរ។ សមាគមប្រជាជាតិអាស៊ីអាគ្នេយ៍ (អាស៊ាន) បានប្រកាសថ្កោលទោស មួយថ្ងៃបន្ទាប់ពីយោធាមីយ៉ាន់ម៉ា បញ្ជាក់ពីការវាយប្រហារអាកាសលើពិធីមួយដែលរៀបចំឡើងដោយរដ្ឋាភិបាលឯកភាពជាតិ (NUG)។

ការប្រយុទ្ធគ្នាបានផ្ទុះឡើងនៅក្នុងផ្នែកខ្លះ នៃប្រទេស​មីយ៉ាន់ម៉ា ចាប់តាំងពីរដ្ឋប្រហារយោធាក្នុងឆ្នាំ ២០២១ ដោយក្រុមយោធាបានប្រយុទ្ធជាមួយក្រុមប្រដាប់អាវុធជនជាតិ​ភាគតិច និងកងកម្លាំងការពារប្រជាជន (PDF) រាប់សិបលើកនៅទូទាំងប្រទេស។ រដ្ឋាភិបាល កម្ពុជា ធ្លាប់បានជួយសម្រប​សម្រួលវិវាទ ព្រមទាំងផ្ដល់ជំនួយជា ថវិកា សម្ភារ និងវ៉ាក់សាំងកូវីដ-១៩ ដល់ប្រជាជនមីយ៉ាន់ម៉ា ជាបន្តបន្ទាប់ផងដែរ៕

អត្ថបទ៖ ច័ន្ទ វីរៈ

The post សិល្បករកម្ពុជា ខំបង្កើតរបាំបុរាណច្នៃ ដើម្បីសុំសុខសន្តិភាព ដល់ មីយ៉ាន់ម៉ា appeared first on Kampuchea Thmey Daily.