ហេតុការណ៍​ផ្ទុះក្នុង​​រោងចក្រផលិត​កាំជ្រួច Huasheng បាន​កើតឡើង​ នៅម៉ោង​ប្រហែល​ ១៦:៤០ ម៉ោងក្នុងស្រុក កាល​ពី​​ថ្ងៃចន្ទ ក្នុង​ទីក្រុង ​Liuyang ចំណែក​ក្រុមអ្នកជួយសង្គ្រោះ​បាន​ជម្លៀសមនុស្ស​ចេញ​ចម្ងាយ​ពី ៣គីឡូម៉ែត្រ ពីរោងចក្រ។

យោង​តាម​សារព័ត៌មាន BBC ចុះ​ផ្សាយ​ថ្ងៃ​ទី​៥ ខែ​ឧសភា ឆ្នាំ​២០២៦ អាជ្ញាធរក៏​បាន​​ដាក់​ពង្រាយ​កង​កម្លាំង​សន្តិសុខ​ជាង​ ៥០០​នាក់​ ដើម្បីធ្វើប្រតិបត្តិ​ការស្វែងរក ជួយសង្គ្រោះ និងព្យាបាល​អ្នករងរបួស ខណៈក៏​​​ប្រើ​​មនុស្ស​​យន្ត ​​ដើម្បីជួយស្វែង​រកអ្នកដែល​ជាប់​នៅ​ក្នុង​អគារ។

ប្រព័ន្ធផ្សព្វផ្សាយរដ្ឋចិន បាន​រាយការណ៍ថា ប៉ូលិសកំពុងស៊ើប​អង្កេត​ពី​មូលហេតុ​នៃការផ្ទុះនេះ។

ដោយ​ឡែក អ្នក​យកព័ត៌មាន​របស់​ CCTV បាន​កត់សម្គាល់​ពីកន្លែង​កើត​ហេតុ​ថា ​ផលប៉ះពាល់នៃការផ្ទុះនេះ​គឺ​បាន​បំផ្លិចបំផ្លាញ​យ៉ាងខ្លាំង ​ជា​ពិសេស​បង្អួចនៃអគារ​លំនៅឋាន​មួយ ​ក្បែរ​រោងចក្រក៏ត្រូវបានបែក​ខ្ទេចខ្ទីផងដែរ​។

មិន​តែ​ប៉ុណ្ណោះ ប្រធានាធិបតី​ចិន​ ស៊ី ជីនពីង ជំរុញឱ្យ​អាជ្ញាធរ​ខិតខំ​ប្រឹងប្រែង​ជួយ​សង្រ្គោះ​ ដើម្បីស្វែងរកមនុស្ស​បាត់​ខ្លួន​ និង​ព្យាបាល​​អ្នក​រង​របួស។

លោក ស៊ី ក៏បានអំពាវនាវឱ្យមានការស៊ើបអង្កេត​លើ​ហេតុការណ៍នេះ​ ដើម្បី​នាំអ្នក​​​នៅ​ពី​ក្រោយ​មកទទួលខុសត្រូវ៕

ប្រែសម្រួល៖ ណឺ មិនា

The post ស្លាប់ ២១នាក់ និង​របួស​៦១នាក់ ​ក្នុងហេតុការណ៍​ផ្ទុះ​​រោង​ចក្រ​ផលិត​កាំ​ជ្រួច​ក្នុង​ខេត្ត​ ហ៊ូណាន ប្រទេស​ចិន​ appeared first on Kampuchea Thmey Daily.

ជាធម្មតា សកម្មភាពរោងចក្រចិន​កើនឡើងនៅដើមឆ្នាំ ដោយក្រុមហ៊ុនផលិតនានាប្រញាប់ប្រញាល់បំពេញតម្រូវការបញ្ជាទិញ និងដឹកជញ្ជូនទំនិញ មុន​ចូលដល់ថ្ងៃ​​បុណ្យចូលឆ្នាំចិន។ ​ភាពមមាញឹក​មុនថ្ងៃឈប់សម្រាកនៅឆ្នាំនេះ ហាក់ដូចជាខ្លាំងដូចរាល់ដង ទោះបីជាមានការដំឡើងពន្ធរបស់ពី ត្រាំ ក្ដី។​​

លោក Renaud Anjoran ស្ថាបនិក និងជានាយកប្រតិបត្តិក្រុមហ៊ុនផលិតគ្រឿងអេឡិចត្រូនិក​នៅខេត្តក្វាងទុង Agilian Technology ​បាននិយាយថា រោងចក្ររបស់លោក​ដំណើរការស្ទើរតែពេញចំណុះ ទោះបីជារង​ការដាក់ពន្ធរយៈពេលមួយឆ្នាំហើយក្ដី។

លោកថ្លែងយ៉ាងដូច្នេះថា៖ «យើងរវល់ខ្លាំងណាស់។ ​យើង​ត្រលប់ទៅស្ថានភាពដែល​ដូចជា​គ្មាន​ពន្ធគយ។ អតិថិជនអាមេរិកមិន​បាន​គិតគូរ​អំពីការទិញទំនិញ​ពីកន្លែងផ្សេងទៀតទេ»។ លោកបន្ថែមថា ​អតិថិជនមួយចំនួនត្រូវចំណាយ​បន្ថែមដើម្បីទិញ និង​ដឹកជញ្ជូនទំនិញទៀតផង​។

រោងចក្ររបស់លោកនៅក្នុងទីក្រុង Dongguan ​នាំចេញ​ផលិតផលជាងពាក់កណ្តាលរបស់ខ្លួនទៅកាន់សហរដ្ឋអាមេរិក ដោយរក្សាការនាំចេញនៅកម្រិត​ដូចមុនពេលលោក ត្រាំ ដាក់ពន្ធកាលពីឆ្នាំមុនដែរ។

​ដោយឡែក ក្រុមហ៊ុនស្រាវជ្រាវទីផ្សារ China Beige Book ​ដែលផ្ដោតលើទីផ្សារចិន បាន​និយាយថា៖ «​រោងចក្រនានាបានឃើញការបញ្ជាទិញ ផលិតកម្ម និងប្រាក់ចំណូលកើនឡើងខ្ពស់ មុនថ្ងៃឈប់សម្រាកបុណ្យចូលឆ្នាំចិន»។ ក្រុមហ៊ុន​បាន​ប៉ាន់ប្រមាណថា ក្នុងខែមករា ទិន្នផលឧស្សាហកម្មបានកើនឡើងបើប្រៀបធៀបទៅនឹងឆ្នាំមុន ដោយការបញ្ជាទិញក្នុងស្រុក និងនាំចេញ «បានកើនឡើងយ៉ាងខ្លាំងធៀបនឹងឆ្នាំមុន និងខែមុន(ធ្នូ ២០២៥)»។

ទិន្នន័យផ្លូវការអំពីទិន្នផលឧស្សាហកម្មសម្រាប់ខែមករា និងកុម្ភៈពីរដ្ឋាភិបាលចិន គ្រោង​នឹង​ចេញនៅខែក្រោយ។​

កំពង់ផែសំខាន់ៗរបស់​ចិន ​មាន​កុងតឺន័រច្រើនជាងធម្មតា រហូតដល់ ៤០% ក្នុងសប្តាហ៍​គិតថ្ងៃទី ១ ខែកុម្ភៈ បើប្រៀបធៀបទៅនឹងពេលវេលាដូចគ្នាកាលពីឆ្នាំមុន ដែល​នេះគឺជាកំណើន​ខ្លាំង​បំផុតក្នុងរយៈពេលជាង១​ឆ្នាំ​។ នេះ​បើ​​​តាម​ក្រុម​អ្នកវិភាគ​ផ្នែក​ដឹកជញ្ជូន និង​ភស្តុភារ​នៅ​ធនាគារ HSBC។

នៅកំពង់ផែទីក្រុង Ningbo ដែលជាកំពង់ផែសំខាន់មួយរបស់​ចិន ​កន្លែងចុះចត​ទំនិញ​សុទ្ធតែដាក់លើសចំណុះ។ ​កប៉ាល់មួយចំនួនត្រូវបានកក់ឱ្យដឹកទំនិញលើសកំណត់របស់ខ្លួនដល់ទៅ ២០% ខណៈកំពង់ផែដដែលបាន​ឈប់ទទួលយកកុងតឺន័រថ្មី។ ​នេះបើតាមការអះអាងរបស់លោក Jay Guo សាកលវិទ្យាធិការនៃវិទ្យាស្ថាន Ningbo China សម្រាប់នវានុវត្តន៍ខ្សែ​ច្រវ៉ាក់ផ្គត់ផ្គង់។

ភាពមមាញឹកបែបនេះ ក៏បាន​ជំរុញឱ្យមាន​កំណើនតម្លៃដឹកជញ្ជូនផងដែរ ខណៈអ្នកជំនាញទីផ្សារខ្លះបាន​លើកឡើងថា ​ភាពមមាញឹកនៅ​រោងចក្រចិនកើតឡើងទោះបីជាក្រុមហ៊ុននានា កំពុងស្វែងរកការធ្វើពិពិធកម្មខ្សែច្រវ៉ាក់ផ្គត់ផ្គង់របស់ពួកគេក្ដី។ ក្រុមហ៊ុនពហុជាតិជាច្រើនកំពុងពន្លឿនយុទ្ធសាស្ត្រផ្គត់ផ្គង់ «ចិន+១» នៅអាស៊ីអាគ្នេយ៍ និងនៅជិតទីផ្សារដូចជាម៉ិកស៊ិក និងផ្នែកខ្លះនៃអឺរ៉ុប ប៉ុន្តែពួកគេនៅតែបន្តរក្សាផលិតកម្ម ឬការផ្គត់ផ្គង់ដ៏សំខាន់នៅ​ចិន៕

The post រោងចក្រ និងកំពង់ផែចិន នៅតែមមាញឹក «ដូចគ្មានពន្ធ ត្រាំ» ​មុនចូលឆ្នាំចិន appeared first on Kampuchea Thmey Daily.

តាម​ការចុះផ្សាយរបស់បណ្ដាញព័ត៌មាន​ CNBC ​ការផ្អាកនេះ ក៏ប៉ះពាល់ដល់វិស័យការងារចិនផងដែរ។

មន្រ្តីដៃគូជាន់ខ្ពស់​នៃក្រុមហ៊ុនប្រឹក្សាយោបល់ Tidalwave Solutions នៅក្រុងសៀងហៃ លោក Cameron Johnson ​បាននិយាយប្រាប់ CNBC ថា៖ «ខ្ញុំស្គាល់រោងចក្រជាច្រើន ដែលបានប្រាប់ពាក់កណ្តាលនៃបុគ្គលិករបស់​ខ្លួនឱ្យត្រឡប់ទៅផ្ទះវិញក្នុងរយៈពេល ២-៣ សប្តាហ៍ កន្លងទៅនេះ ហើយបានបញ្ឈប់​ផលិតកម្មរបស់​ពួកគេទៀតផង»។ លោក​បាន​បន្ត​ថា រោងចក្រ​​ដែល​ផលិត​របស់​ក្មេង​លេង សម្ភារៈ​កីឡា និង​ទំនិញ​ក្នុង​ហាង​តម្លៃ​ទាបៗ​ ​គឺ​រង​ផល​ប៉ះពាល់​ខ្លាំង​បំផុត​ដោយសារតែចំណាត់ការពន្ធគយនៅ​ពេល​នេះ។

លោក Johnson បាននិយាយទៀតថា ​ទោះបីជាការផ្អាកផលិតកម្មមិន​ទាន់មាន​ទ្រង់ទ្រាយធំនៅឡើយ​ក្ដី «ប៉ុន្តែវាកំពុងកើតឡើងនៅក្នុងមជ្ឈមណ្ឌលនាំចេញសំខាន់ៗនៃតំបន់ Yiwu និង Dongguan ហើយមានការព្រួយបារម្ភថាវានឹងកើនឡើង»។ អ្នកជំនាញដដែលបន្ថែមថា៖ «មានក្តីសង្ឃឹមថាពន្ធនឹងត្រូវបានបន្ទាប ដូច្នេះការបញ្ជាទិញអាចបន្ត ប៉ុន្តែក្នុងពេលជាមួយគ្នានេះ ក្រុមហ៊ុនកំពុង​ផ្អាកបុគ្គលិក និង​ផលិតកម្មមួយចំនួនជាបណ្ដោះអាសន្ន»។

យោងតាមការប៉ាន់ស្មានរបស់ធនាគារអាមេរិក Goldman Sachs ​កម្មករនៅចិន​ប្រហែល ១០-២០ លាន​នាក់ ​​ធ្វើការ​ក្នុង​អាជីវកម្មដែល​នាំចេញ​ទៅសហរដ្ឋអាមេរិក។ ចំនួនកម្មករផ្លូវការ​ក្នុងទីក្រុងនានារបស់ប្រទេសចិនកាលពីឆ្នាំមុន មានចំនួន ៤៧៣,៤៥ លាននាក់។ ​

គួរគូសបញ្ជាក់ថា ប្រធានាធិបតីអាមេរិក ដូណាល់ ត្រាំ បាន​ប្រកាសពន្ធជាបន្តបន្ទាប់លើ​ទំនិញចិន ១៤៥ ភាគរយ ដែលធ្វើឱ្យទំនិញខ្លះឡើងដល់ ២៤៥ ភាគរយ ដោយបំផ្ទុះសង្រ្គាមពាណិជ្ជកម្មទ្រង់ទ្រាយធំជាថ្មីជាមួយចិន​ ដែលសងសឹកជាមួយ​នឹង​ពន្ធ ១២៥ ភាគរយ លើទំនិញ​របស់អាមេរិក។ សហរដ្ឋអាមេរិក​គឺជាទីផ្សារដ៏ធំរបស់ចិន រួមចំណែកដល់ការនាំចេញសរុបប្រមាណ ៤៣៨,៩ ប៊ីលាន​ដុល្លារ កាលពីឆ្នាំមុន។

ខណៈលោក ត្រាំ អះអាងថា ការចរចាទ្វេភាគីកំពុងដំណើរការ ចិន​បាន​ច្រាលចោលពីវឌ្ឍនភាពបែបនេះ ទោះបីជាគូវិវាទទាំងសងខាង បង្ហាញជំហរស្វែងរកដំណោះស្រាយក្ដី។

ស្ថាបនិក និងជានាយកប្រតិបត្តិនៃក្រុមហ៊ុនគ្រប់គ្រងខ្សែសង្វាក់ផ្គត់ផ្គង់ Imex Sourcing Services នៅទីក្រុង ក្វាងចូវ លោក Ash Monga ​បាននិយាយថា ផលប៉ះពាល់នៃ​កំណើន​ពន្ធទ្វេដង​នាពេលថ្មីៗនេះគឺ «ធំជាង» វិបត្តិកូវីដ១៩ ទៅទៀត។ លោកបានកត់សម្គាល់ថា សម្រាប់អាជីវកម្មខ្នាតតូចដែលមានធនធាន​ត្រឹមតែប៉ុន្មានលានដុល្លារនោះ ​ការដំឡើងពន្ធភ្លាមៗអាចនឹង​ក្លាយជាបន្ទុកធ្ងន់ធ្ងរ ហើយបង្ខំឱ្យពួកគេបញ្ឈប់អាជីវកម្ម។​

តាមការចុះផ្សាយរបស់ CNBC គេសង្កេតមើលឃើញថា ការដំឡើងពន្ធរបស់​សហរដ្ឋអាមេរិក ធ្វើឱ្យក្រុមហ៊ុនផលិតកម្មខ្លះផ្លាស់ប្ដូរយុទ្ធសាស្រ្តនៃការលក់របស់ខ្លួន រួមទាំង​ការងាកទៅប្រើប្រាស់ «ការផ្សាយផ្ទាល់» នៅលើវេទិកាពាណិជ្ជកម្មអេឡិចត្រូនិក។

ស្ថាបនិកក្រុមហ៊ុនប្រឹក្សាទីផ្សារ ChoZan លោកស្រី Ashley Dudarenok ​បាន​និយាយថាក្រុមហ៊ុនចិនកាន់តែតិចទៅៗ ​ដែល​ពិចារណាបង្វែរការនាំចេញទៅកាន់សហរដ្ឋអាមេរិក​ដោយប្រើច្រកនាំចេញនៃប្រទេសដទៃ ដោយសារ​តែ​សហរដ្ឋអាមេរិកបង្កើនការត្រួតពិនិត្យ​លើការដឹកជញ្ជូន។

លោកស្រី Dudarenok បានបន្ថែមថា ក្រុមហ៊ុនចិន​ជាច្រើនកំពុងធ្វើពិពិធកម្មផលិតកម្មទៅកាន់ប្រទេសឥណ្ឌា ជាជាងនៅអាស៊ីអាគ្នេយ៍ ខណៈ​ក្រុមហ៊ុនផ្សេងទៀត កំពុង​បង្វែរការនាំចេញរបស់ខ្លួនពីសហរដ្ឋអាមេរិក​ ទៅ​កាន់​អឺរ៉ុប និងអាមេរិកឡាទីន។

ទន្ទឹម​នឹង​ព័ត៌មាន​​ជុំវិញ​​បញ្ហា​ក្នុងស្រុកបែបនេះ មន្ត្រីជាន់ខ្ពស់ចិនកាលពីថ្ងៃចន្ទ បានគូសបញ្ជាក់អំពីផែនការគាំទ្រការងារ និងជួយផ្នែកហិរញ្ញវត្ថុដល់អ្នកនាំចេញ ខណៈ​បង្ហាញអំពីលទ្ធភាពនៃការបញ្ចេញ​គោលនយោបាយជំរុញសេដ្ឋកិច្ចបន្ថែមទៀត ដោយសារភាពតានតឹងពាណិជ្ជកម្ម​ជាមួយអាមេរិក។

គេមើលឃើញថា មុនភាពតានតឹង​ចុងក្រោយ ចិន​បាន​ប្រឈមមុខនឹង​បញ្ហា​សេដ្ឋកិច្ចក្នុងស្រុករួចហើយ រួមទាំងកម្សោយតម្រូវការ និងវិបត្តិអចលនទ្រព្យ ដែលពន្យឺតកំណើនក្រោយវិបត្តិកូវីដ១៩។ កន្លងមក មាន​សេចក្ដីរាយការណ៍ថា ចិន​នឹង​ផ្ដោតលើការជំរុញតម្រូវការក្នុងស្រុក ដើម្បីប៉ះប៉ូវផលប៉ះពាល់នៃវិធានការពន្ធរបស់សហរដ្ឋអាមេរិក៕

​

The post រោងចក្រនៅចិនខ្លះផ្អាកប្រតិបត្តិការ ដើម្បីរក ទីផ្សារថ្មីជំនួសអាមេរិក appeared first on Kampuchea Thmey Daily.