លិចផ្លូវ Archives - Kampuchea Thmey Daily

ទឹកដក់លិចផ្លូវបេតុងភូមិព្រះពន្លា ប្រវែង ១៧០ ម៉ែត្រ បង្កផលលំបាកសម្រាប់ការរស់នៅ

អ៊ិន ពិសី — Mon, 14 Jul 2025 10:19:42 +0000

ប្រជាពលរដ្ឋរស់នៅសង្កាត់ព្រែកប្រា ស្នើសុំអាជ្ញាធរ សូមមេត្តាពន្លឿនជួយរកដំណោះស្រាយបញ្ហាគ្មានប្រព័ន្ធលូ ទឹកដក់លិចកាន់ស្នឹម ជះក្លិនស្អុយ និង រអិលពិបាករស់នៅ។

ជាក់ស្ដែងនៅចំណុចផ្លូវបេតុង ១ កន្លែង ទឹកដក់កាន់ស្នឹម មានប្រវែង ១៧០ ម៉ែត្រ ស្ថិតក្នុងភូមិព្រះពន្លា សង្កាត់ព្រែកប្រា ខណ្ឌច្បារអំពៅ រាជធានីភ្នំពេញ។

លោក សាំ វឌ្ឍនា ពលរដ្ឋរស់នៅតំបន់ខាងលើបានឲ្យដឹងថា ចំណុចទឹកដក់នេះ ឲ្យតែមានទឹកភ្លៀងធ្លាក់ខ្លាំងតែបន្តិចគឺដឹងតែដក់លិចតែម្ដង។ ប្រសិនបើលិច ច្រើនថ្ងៃទើបស្រកអស់ ប៉ុន្តែបើនៅមានរលឹម ឬភ្លៀងបន្តធ្លាក់ ទឹកលិចបន្តឡើងរហូតស្មើកជើង។

លោកបន្តថា នៅពេលទឹកដក់យូរ ក្លាយទៅជាទឹកស្អុយ ជះក្លិនមិនល្អដល់ពួកគាត់ ដែលមានមនុស្សចាស់ និង ក្មេងតូចៗ។ ដូច្នេះ ពលរដ្ឋសំណូមពរអាជ្ញាធរជួយពន្លឿន ស្វែងរកដំណោះស្រាយជូនពួកគាត់ ដើម្បីសម្រួលបន្ទុកក្នុងការរស់នៅ និង សុខភាព។

ចំពោះបញ្ហានេះ លោកស្រី ជួប ស៊ីយ៉ុន ចៅសង្កាត់ព្រែកប្រា បានឲ្យដឹងថា មន្ត្រីសង្កាត់ តែងតែចុះត្រួតពិនិត្យ ដើម្បីស្វែងរកដំណោះស្រាយជូនប្រជាពលរដ្ឋក្នុងមូលដ្ឋានជានិច្ច រៀងរាល់ពេលមានភ្លៀងធ្លាក់។ លោកស្រី ក៏បានដាក់សំណើទៅកាន់មន្ទីរសាធារណការរាជធានីភ្នំពេញ ជារៀងរាល់ឆ្នាំ ហើយឆ្នាំនេះ ក៏នៅតែបន្តដាក់សំណើបន្តទៀត ដើម្បីឆាប់បានដោះស្រាយបញ្ហាជូនពលរដ្ឋ។

លោកស្រី បន្តថា ចំណុចភូមិព្រះពន្លា ផ្លូវបេតុងនេះ គឺមានប្រវែង ១៧០ ម៉ែត្រ មិនមានប្រព័ន្ធលូនោះទេ។ បញ្ហាទឹកដក់នេះ មិនអាចធ្វើប្រព័ន្ធលូបាន ក៏ព្រោះតែផ្លូវ ៣៦៩ មិនទាន់មានលូសម្រាប់តភ្ជាប់ ទើបបង្កឲ្យផ្លូវបេតុងតាមភូមិព្រះពន្លា និង ភូមិមួយចំនួនលិចដក់ទឹកបែបនេះ។

ជាមួយនេះ ចៅសង្កាត់ព្រែកប្រា បានសំណូមពរប្រជាពលរដ្ឋនៅភូមិព្រះពន្លា សូមយោគយល់ និងអធ្យាស្រ័យ និងមេត្តាអត់ធ្មត់បន្តិច។ បញ្ហាទឹកលិចនេះ នឹងដោះស្រាយក្នុងពេលខាងមុខឆាប់ៗ នេះ រង់ចាំមន្ទីរសាធារណការរាជធានីភ្នំពេញ បញ្ចប់ការដាក់ប្រព័ន្ធលូនៅផ្លូវ ១០៥ ដែលមានប្រវែងជាង ១ ពាន់ម៉ែត្រ កំពុងតែធ្វើ។ ដូច្នេះរង់ចាំរហូតទាល់តែបញ្ចប់គម្រោងប្រព័ន្ធលូ ១០៥ ទើបចាប់ផ្ដើមគម្រោងប្រព័ន្ធលូចំណុច ៣៦៩ នឹងតភ្ជាប់ចូលមកតាមភូមិនីមួយៗ៕

អត្ថបទ ៖ រដ្ឋា

សូមទស្សនាវីដេអូខាងក្រោម ៖

The post ទឹកដក់លិចផ្លូវបេតុងភូមិព្រះពន្លា ប្រវែង ១៧០ ម៉ែត្រ បង្កផលលំបាកសម្រាប់ការរស់នៅ appeared first on Kampuchea Thmey Daily.

ចៅហ្វាយខណ្ឌសែនសុខ ចុះពិនិត្យស្ថានភាពទឹកលិច ខណៈស្ថានីយបូមទឹកកប់ស្រូវ កំពុងពន្លឿនការបូមទម្លាក់ទៅបឹងតាមោក

អ៊ិន ពិសី — Sat, 10 Aug 2024 04:16:23 +0000

គិតត្រឹមព្រឹកថ្ងៃទី ១០ ខែសីហា ឆ្នាំ ២០២៤ នេះ ទឹកនៅតំបន់សង្កាត់ភ្នំពេញថ្មី និងសង្កាត់ឃ្មួញ បានស្រក ៥០ ភាគរយហើយ ក្រោយភ្លៀងធ្លាក់យ៉ាងខ្លាំង ២ ថ្ងៃ ជាប់គ្នា បណ្ដាលឲ្យលិចផ្លូវមួយចំនួន ក្នុងខណ្ឌសែនសុខ ហើយពេលនេះស្ថានីយបូមទឹកកប់ស្រូវ កំពុងពន្លឿនការបូមទម្លាក់ទៅបឹងតាមោក។

គួររំលឹកថា កាលពីយប់ថ្ងៃទី ៨ ខែសីហា បន្ទាប់ពីមានភ្លៀងធ្លាក់យ៉ាងខ្លាំងដែលធ្វើឲ្យមូលដ្ឋានខណ្ឌមួយចំនួនក្នុងរាជធានីភ្នំពេញត្រូវបានជន់លិចដោយកន្លែង ជាក់ស្ដែងនៅសង្កាត់ឃ្មួញ និង សង្កាត់ភ្នំពេញថ្មី របស់មូលដ្ឋានខណ្ឌសែនសុខ ក៏ទទួលការជន់លិចដោយជំនន់ទឹកភ្លៀងនេះផងដែរ។

រហូតនៅព្រឹកថ្ងៃទី ១០ សីហា នេះ ដោយមិនមានភ្លៀងធ្លាក់បន្ថែម ទឹកនៅតំបន់ផ្លូវ ១៩៨៦ កែងផ្លូវ ១០០៣ សង្កាត់ភ្នំពេញថ្មី បានស្រកចុះប្រហែល ៥០% ហើយ ពេលនេះស្ថានីយបូមទឹកកប់ស្រូវ កំពុងពន្លឿនដំណើរការបូមទាំង ៥ ម៉ាស៊ីន៕

អត្ថបទ ៖ សំណាង

The post ចៅហ្វាយខណ្ឌសែនសុខ ចុះពិនិត្យស្ថានភាពទឹកលិច ខណៈស្ថានីយបូមទឹកកប់ស្រូវ កំពុងពន្លឿនការបូមទម្លាក់ទៅបឹងតាមោក appeared first on Kampuchea Thmey Daily.

ទឹកឡើងហូរកាត់ផ្លូវជាតិលេខ ៥ ប្រវែង ១០០ ម៉ែត្រ អ្នកធ្វើដំណើរសូមប្រុងប្រយ័ត្ន

deth leng — Thu, 23 Sep 2021 02:59:37 +0000

យោងតាមរបាយការណ៍របស់រដ្ឋបាលឃុំឈានឡើង ស្រុកសាមគ្គីមានជ័យ ខេត្តកំពង់ឆ្នាំងបានឱ្យដឹងថា គិតត្រឹមម៉ោង ៥ និង៤៥នាទី ថ្ងៃទី២៣ ខែកញ្ញា ស្ថានភាពទឹកភ្លៀង និងជំនន់ទឹកភ្លៀងនៅក្នុងរយៈពេលប៉ុន្មានថ្ងៃកន្លងមកនេះ ធ្វើឱ្យអាងទំបន់ទឹកអន្លង់ជ្រៃ ស្ថិតនៅផ្នែកខាងលើ តំបន់ស្ទឹងក្រាំងពន្លៃ មានស្ថានភាពទឹកឡើង ធ្វើឱ្យទឹកហូរលើផ្លូវជាតិលេខ៥ ប្រវែង ១០០ម៉ែត្រ នៅចន្លោះគីឡូម៉ែត្រ ៣៩-៤០។

រូបភាពលិចផ្លូវ កាលពីជាង ២ សប្តាហ៍មុន

ជាមួយគ្នានេះដែរមន្ទីរសាធារណការ និងដឹកជញ្ជូនខេត្តកំពង់ឆ្នាំង ក៏សូមអំពាវនាវដល់ប្រជាពលរដ្ឋធ្វើចរាចរលើដងផ្លូវជាតិលេខ ៥ នៅចំណុចខាងលើនេះ មេត្តាប្រុងប្រយ័ត្នឲ្យបានខ្ពស់ ដើម្បីចៀសវាងគ្រោះថ្នាក់ជាយថាហេតុ។

នៅក្នុងសភាពការណ៍នេះដែរ មន្ទីរធនធានទឹក និងឧតុនិយមខេត្តកំ ពង់ឆ្នាំង បានសហការជាមួយរដ្ឋ បាលស្រុកសាមគ្គីមានជ័យ ធ្វើការផ្សព្វផ្សាយដល់ប្រជាពលរដ្ឋដែលរស់នៅតាមដងស្ទឹងក្រាំងពន្លៃ ឱ្យបានជ្រាបជាព័ត៌មាន និងមានលក្ខ ណៈប្រុងប្រយ័ត្នជាមុន ដើម្បីជៀស វាងគ្រោះថ្នាក់ផ្សេងៗដែលអាចកើត មានឡើងជាយថាហេតុ៕

អត្ថបទៈ ឈៀង ថារិទ្ធ

The post ទឹកឡើងហូរកាត់ផ្លូវជាតិលេខ ៥ ប្រវែង ១០០ ម៉ែត្រ អ្នកធ្វើដំណើរសូមប្រុងប្រយ័ត្ន appeared first on Kampuchea Thmey Daily.

ផ្លូវជាតិលេខ២ម្តុំចាក់អង្រែលើធ្លាយទុយយោទឹក លិចលើដងផ្លូវ អាជ្ញាធរកំពុងរកមូលហេតុ

Kang Tola — Tue, 29 Dec 2020 12:35:02 +0000

ភ្នំពេញ ៖ អ្នកធ្វើដំណើរតាមដងផ្លូវជាតិលេខ២ ម្តុំសង្កាត់ចាក់អង្រែលើខណ្ឌមានជ័យរាជធានីភ្នំពេញបានរងការលិចលង់ ហើយអាជ្ញាធរកំពុងស្រាវជ្រាវស្តីពីការធ្លាយទុយយោទឹកនេះមកពីមូលហេតុអ្វី។

តាមប្រភពពីលោកជា សុខៃ ចៅសង្កាត់ចាក់អង្រែក្រោមបានឲ្យដឹងថា ទីតាំងដែលរងការលិចលង់នេះ គឺស្ថិតនៅក្នុងទឹកដីសង្កាត់ចាក់អង្រែលើ ពុំមែនជាទឹកដីសង្កាត់ចាក់អង្រែក្រោមនោះទេ។

លោកចៅសង្កាត់ដដែលបន្តថា ពេលនេះអង្គភាពរដ្ឋាករទឹកស្វយ័តកំពុងធ្វើការជួសជុលដែលអាចទប់ស្កាត់បាន។

ដោយឡែកទូរសព្ទលោកកែវ សាវឿន ចៅសង្កាត់ចាក់អង្រែលើ កម្ពុជាថ្មីខលចូលប៉ុន្តែពុំមានអ្នកលើក។ តាមប្រភពពីអ្នកដំណើរបាននិយាយថា មូលហេតុដែលបង្កឲ្យធ្លាយទុយយោទឹកស្អាតនេះ គឺបង្កឡើងដោយរថយន្តដឹកដីដែលមានចំណុះរាប់តោនដែលបានដឹកចេញពីដេប៉ូខ្សាច់យក្សដែលមានទីតាំងស្ថិតនៅក្នុងមូលដ្ឋានសង្កាត់ចាក់អង្រែលើនេះ។

អ្នកដំណើរនិយាយថា ពីមុនមកផ្លូវជាតិលេខ២នេះធ្លាប់ផ្ទុះទុយយោបូមខ្សាច់បង្កឲ្យហូរដីខ្សាច់ពេញលើផ្លូវ។ ប៉ុន្តែនៅរសៀលថ្ងៃទី២៩ខែធ្នូនេះ គឺផ្លូវជាតិលេខ២រងការលិចលង់ដោយសារតែធ្លាយទុយយោទឹកស្អាតរបស់រដ្ឋ៕
ដោយ ៖ នរា

The post ផ្លូវជាតិលេខ២ម្តុំចាក់អង្រែលើធ្លាយទុយយោទឹក លិចលើដងផ្លូវ អាជ្ញាធរកំពុងរកមូលហេតុ appeared first on Kampuchea Thmey Daily.

លិចផ្លូវ Archives - Kampuchea Thmey Daily

ទឹកដក់លិចផ្លូវបេតុងភូមិព្រះពន្លា ប្រវែង ១៧០ ម៉ែត្រ បង្កផលលំបាកសម្រាប់ការរស់នៅ

ទឹកឡើងហូរកាត់ផ្លូវជាតិលេខ ៥ ប្រវែង ១០០ ម៉ែត្រ អ្នកធ្វើដំណើរសូមប្រុងប្រយ័ត្ន

ផ្លូ​វ​ជាតិ​លេខ​២​ម្តុំ​ចាក់អង្រែលើ​ធ្លាយ​ទុយយោ​ទឹក លិច​លើ​ដងផ្លូវ អាជ្ញាធរ​កំពុងរ​កមូ​ល​ហេតុ​

ផ្លូវជាតិលេខ២ម្តុំចាក់អង្រែលើធ្លាយទុយយោទឹក លិចលើដងផ្លូវ អាជ្ញាធរកំពុងរកមូលហេតុ