លោកវេជ្ជបណ្ឌិត ហ៊ុយ រ៉េកុល Archives - Kampuchea Thmey Daily

គិតត្រឹមសប្ដាហ៍ទី ១ ខែតុលានេះ កម្ពុជា មានអ្នកកើតជំងឺគ្រុនឈាមជាង ៤ ម៉ឺន ៤ ពាន់ករណី និងស្លាប់ ៥៥ នាក់

អ៊ិន ពិសី — Wed, 08 Oct 2025 09:08:10 +0000

គិតត្រឹមសប្ដាហ៍ទី ១ នៃខែតុលា ឆ្នាំ ២០២៥ នេះ កម្ពុជា មានករណីជំងឺគ្រុនឈាមប្រមាណជាង ៤ ម៉ឺន ៤ ពាន់ករណី និងស្លាប់ ៥៥ នាក់ ប៉ុន្តែស្ថានភាពជំងឺកំពុងថយចុះវិញជាបន្តបន្ទាប់ប្រមាណជាង ៤០ ករណី ក្នុងមួយថ្ងៃៗ ចាប់តាំងពីដើមខែសីហា រហូតមកដល់ដើមខែតុលា នេះ។

លោកវេជ្ជបណ្ឌិត ហ៊ុយ រ៉េកុល ប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ប៉ារ៉ាស៊ីតសាស្ត្រ និងបាណកសាស្ត្រ បានមានប្រសាសន៍នៅរសៀលថ្ងៃទី ៨ តុលា នេះថា ឆ្នាំ ២០២៥ គឺជាឆ្នាំ នៃវដ្តជំងឺគ្រុនឈាមដែលបណ្តាលឱ្យកើតមានជំងឺគ្រុនឈាមច្រើនដោយគិតពីខែមករារហូតមកដល់សប្ដាហ៍ទី ១ នៃខែតុលា ឆ្នាំ ២០២៥ នេះ មានករណីជំងឺសរុបជាង ៤ ម៉ឺន ៤ ពាន់ករណី និងស្លាប់ ៥៥ នាក់។

លោកវេជ្ជបណ្ឌិត បានបន្តថា បច្ចុប្បន្ន ស្ថានភាពជំងឺគ្រុនឈាម បាននិងកំពុងថយចុះវិញជាបន្តបន្ទាប់ជាង ៤០ ករណី ក្នុងមួយថ្ងៃៗ ចាប់តាំងពីដើមខែសីហារហូតមកដល់ដើមខែតុលានេះ។

លោកវេជ្ជបណ្ឌិត បានបន្តទៀតថា «បើប្រៀបធៀបជាមួយសន្ទស្សន៍ព្យាករណ៍សម្រាប់ឆ្នាំ ២០២៥ នេះ គឺ ជំងឺគ្រុនឈាមអាចកើតមានប្រមាណជា ជាង ៧ ម៉ឺន ៦ ពាន់ករណី តែដោយចលនាបុរេសកម្ម និងកិច្ចសហការចូលរួមពីគ្រប់កម្រិត ព្រមទាំងសហគមន៍ ក៏ដូចជាការជំរុញលើកទឹកចិត្ត និងចង្អុលបង្ហាញជាប្រចាំរបស់ ឯកឧត្ដមសាស្ត្រាចារ្យរដ្ឋមន្ត្រីក្រសួងសុខាភិបាល មកដល់ពេលនេះ គឺយើងបានបង្ការទប់ស្កាត់មិនឱ្យកើតមានជំងឺគ្រុនឈាមប្រមាណជា ៤១% ឬ ស្មើនឹង ៨៦ នាក់ ក្នុងមួយថ្ងៃ ដែលសរុបគឺបង្ការបានជាង ៣ ម៉ឺននាក់ មិនឱ្យកើតជំងឺគ្រុនឈាម»។

លោកវេជ្ជបណ្ឌិត បានបន្ថែមថា បើប្រៀបធៀបឆ្នាំ ២០២៤ បានបង្ហាញថា ឆ្នាំ ២០២៥ នេះ ស្ថានភាពជំងឺត្រូវបានកាត់បន្ថយកំពូលប្រចាំឆ្នាំមកត្រឹមសប្ដាហ៍ទី ២៩ ឬដើមខែសីហា ដែលឆ្នាំ ២០២៤ គឺកំពូលនៅសប្ដាហ៍ទី ៣៤ ឬចុងខែសីហា ដែលបញ្ជាក់យ៉ាងច្បាស់អំពីសមិទ្ធផល នៃការចូលរួមបង្ការ និងគ្រប់គ្រងស្ថានភាពជំងឺមានប្រសិទ្ធភាពខ្ពស់គួរជាទីមោទនភាព។

លោកវេជ្ជបណ្ឌិត បន្ថែមទៀតថា បើទោះបីជាឆ្នាំ ២០២៥ នេះ ស្ថានភាពបន្ទុកជំងឺគ្រុនឈាមកំពុងធ្លាក់ចុះវិញមែន ប៉ុន្តែនិន្នាការ នៃការថយចុះនៅមានកម្រិតទាប ដែលទាមទារឱ្យគ្រប់គ្នា សហគមន៍ អាជ្ញាធរមូលដ្ឋាន ប្រជាពលរដ្ឋគ្រប់រូប ត្រូវពង្រឹងកិច្ចអន្តរាគមន៍អនុវត្ត អនាម័យបរិស្ថាន លុបបំបាត់ប្រភពសម្ភារៈដក់ទឹកមិនប្រាស់ សំបកកង់យានជំនិះ លុបបំបាត់ដង្កូវទឹកតាមគេហដ្ឋានរៀងៗ ខ្លួន ជាប្រចាំ និងត្រូវស្វែងរកសេវាថែទាំសុខភាពបន្ទាប់ពីក្តៅខ្លួនខ្លាំងភ្លាមៗ មិនលើសពី ២ ថ្ងៃ ពិសេសទៅប៉ុស្តិ៍សុខភាព ឬ មណ្ឌលសុខភាព ឬមន្ទីរពេទ្យនៅជិតបំផុតមិនឱ្យយឺតពេល។ បើយឺតពេលមួយថ្ងៃ ជាកត្តាជំរុញការវិវត្តន៍ជំងឺធ្ងន់ធ្ងរអាចយាយីដល់អាយុជីវិត។

លោកវេជ្ជបណ្ឌិត បានឱ្យដឹងទៀតថា «ចូរចងចាំថា បើនៅតែបន្តមានវត្ថុដក់ទឹកពាសវាលពាសកាល បន្តមានដង្កូវទឹក គឺនៅតែបន្តកើតមានសត្វមូសខាំជានិច្ច «ចូររួមគ្នា ធ្វើអនាម័យបរិស្ថានគ្រប់គ្នា ព្រោះបញ្ហាមានសត្វមូស គឺជាបញ្ហា និងកាតព្វកិច្ចរបស់យើងគ្រប់គ្នាក្នុងការបង្ការ និងកម្ចាត់»។ សូមអំពាវនាវដល់អាជ្ញាធរមូលដ្ឋានចាត់វិធានការចាំបាច់លើអនាម័យបរិស្ថាន គ្មានទឹកដក់ គ្មានដង្កូវទឹក»។

គួរជ្រាបផងដែរថា សម្រាប់ឆ្នាំ ២០២៥ នេះ មិនមែនតែកម្ពុជាមានការកើនឡើងករណីជំងឺគ្រុនឈាមតាមរបាយការណ៍អង្គការសុខភាពពិភពលោក ជំងឺគ្រុនឈាមនៅបណ្ដាប្រទេសអាស៊ីប៉ាស៊ីហ្វិកក៏មានកំណើនយ៉ាងខ្លាំងតាំងពីពាក់កណ្ដាលឆ្នាំ ២០២៤ ដល់ ២០២៥ នេះ ព្រោះពាក់ព័ន្ធនឹងជុំជាវដ្ត នៃជំងឺ និងកត្តាអាកាសធាតុភ្លៀងធ្លាក់ច្រើន ក៏ដូចជាកត្តាបម្លាស់ទីរបស់ប្រជាជនពីមួយប្រទេសទៅមួយប្រទេសផងដែរ៕

អត្ថបទ ៖ សំអឿន

The post គិតត្រឹមសប្ដាហ៍ទី ១ ខែតុលានេះ កម្ពុជា មានអ្នកកើតជំងឺគ្រុនឈាមជាង ៤ ម៉ឺន ៤ ពាន់ករណី និងស្លាប់ ៥៥ នាក់ appeared first on Kampuchea Thmey Daily.

កម្ពុជា មានករណីជំងឺគ្រុនចាញ់ជិត ៤០ ករណី ថយចុះជាង ៩០% និងគ្មានអ្នកស្លាប់ក្នុងរយៈពេល ៨ ខែ

អ៊ិន ពិសី — Thu, 04 Sep 2025 03:31:14 +0000

នៅក្នុងរយៈពេល ៨ ខែ ឆ្នាំ ២០២៥ នេះ កម្ពុជា មានករណីជំងឺគ្រុនចាញ់ប្រមាណជិត ៤០ ករណី មានការថយចុះជាង ៩០% និងគ្មានអ្នកស្លាប់ បើធៀបទៅនឹងរយៈពេល ៨ ខែ ដូចគ្នា ឆ្នាំ ២០២៤ ដែលនេះជាសញ្ញាមួយបង្ហាញថា កម្ពុជា កំពុងស្ថិតក្នុងស្ថានភាពឈានទៅសូន្យ នាដំណាច់ឆ្នាំ ២០២៥ នេះ។

លោកវេជ្ជបណ្ឌិត ហ៊ុយ រ៉េកុល ប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ប៉ារ៉ាស៊ីតសាស្ត្រ និងបាណកសាស្ត្រ បានមានប្រសាសន៍នៅព្រឹកថ្ងៃទី ៤ កញ្ញា នេះថា ៨ ខែ ឆ្នាំ ២០២៥ នេះ មានជំងឺគ្រុនចាញ់ ចំនួន ៣៧ ករណី គ្មានស្លាប់ គឺ ថយចុះជាង ៩១% បើធៀបទៅនឹង ៨ ខែ ឆ្នាំ ២០២៤ កន្លងទៅ មានរហូតដល់ទៅ ២៥៥ ករណី ដែលនេះជាសញ្ញាមួយបង្ហាញថា កម្ពុជា កំពុងស្ថិតក្នុងស្ថានភាពឈានទៅសូន្យ នាដំណាច់ឆ្នាំនេះ ខណៈប្រទេសកម្ពុជា បានបញ្ចប់លែងមានករណីស្លាប់ ដោយសារជំងឺគ្រុនចាញ់តាំងពីឆ្នាំ ២០១៨។

លោកវេជ្ជបណ្ឌិត បានបន្តទៀតថា ការថយចុះជំងឺគ្រុនចាញ់ជាបន្តបន្ទាប់នេះដោយសារកម្ពុជាបានអនុវត្តយុទ្ធសាស្ត្រជាតិលុបបំបាត់ជំងឺគ្រុនចាញ់ឆ្នាំ ២០១១-២០២៥ ដែលជាត្រីវិស័យដ៏ត្រឹមត្រូវ សមស្របតាមយុទ្ធសាស្ត្រតំបន់ និងសកលលោក។ ការយកចិត្តទុកដាក់ និងគាំទ្រខ្ពស់ពីក្រសួងសុខាភិបាល និងមានកិច្ចសហការពេញលេញពីគ្រប់ដៃគូពាក់ព័ន្ធ ក្រោមយន្តការសម្របសម្រួលអភិបាលកិច្ចតម្រង់ទិសបច្ចេកទេសផ្ទាល់ជាប្រចាំរបស់មជ្ឈមណ្ឌលជាតិប្រយុទ្ធនឹងជំងឺគ្រុនចាញ់ប៉ារ៉ាស៊ីតសាស្ត្រ និងបាណកសាស្ត្រ គឺ ជំងឺគ្រុនចាញ់កំពុងឆ្ពោះទៅសូន្យករណី នៃការចម្លងក្នុងតំបន់ និងក៏កំពុងបន្តឈានទៅសូន្យករណីក្នុងគ្រប់ភូមិសាស្ត្រទូទាំងប្រទេសនាដំណាច់ឆ្នាំ ២០២៥ ដែលជាគោលដៅចុងក្រោយ។

លោកវេជ្ជបណ្ឌិត បានរំលឹកថា មុនពេលមានយុទ្ធសាស្ត្រជាតិលុបបំបាត់ជំងឺគ្រុនចាញ់ឆ្នាំ ២០១១-២០២៥ ករណីជំងឺគ្រុនចាញ់រាយការណ៍មានជាមធ្យម ១៣ ម៉ឺនករណី និងស្លាប់ ៧០០ ទៅ ៨០០ នាក់ ក្នុងមួយឆ្នាំៗ។

លោកវេជ្ជបណ្ឌិត បានបន្ថែមថា ក្រៅពីនេះ យើងបានបន្ថែមវិធីសាស្ត្រ និងបង្កើនការផ្សព្វផ្សាយដល់ប្រជាពលរដ្ឋរស់នៅក្នុងសំបុកចម្លងជំងឺគ្រុនចាញ់ឱ្យបានយល់ដឹងកាន់តែច្បាស់ពីវិធីការពារជំងឺគ្រុនចាញ់ ផ្តល់ថ្នាំបង្ការការពារដល់ពលរដ្ឋរស់នៅតំបន់ប្រឈមខ្ពស់ជាងគេទៅនឹងជំងឺគ្រុនចាញ់ ក៏ដូចជាផ្តល់មុងជ្រលក់ថ្នាំដល់ពលរដ្ឋមានមុខរបរចូលព្រៃប្រចាំថ្ងៃផងដែរ។

លោកវេជ្ជបណ្ឌិត ហ៊ុយ រ៉េកុល សង្ឃឹមថា កម្ពុជា នឹងអាចលុបបំបាត់ជំងឺគ្រុនចាញ់ឱ្យអស់ទាំងស្រុងនៅបំណាច់ឆ្នាំ ២០២៥ នេះ៕

អត្ថបទ ៖ សំអឿន

The post កម្ពុជា មានករណីជំងឺគ្រុនចាញ់ជិត ៤០ ករណី ថយចុះជាង ៩០% និងគ្មានអ្នកស្លាប់ក្នុងរយៈពេល ៨ ខែ appeared first on Kampuchea Thmey Daily.

មន្ត្រីជាន់ខ្ពស់ ៖ កម្ពុជា កំពុងស្ថិតក្នុងស្ថានភាពឈានទៅសូន្យករណីជំងឺគ្រុនចាញ់ នាដំណាច់ឆ្នាំ ២០២៥

អ៊ិន ពិសី — Tue, 12 Aug 2025 09:28:20 +0000

មន្ត្រីជាន់ខ្ពស់ នៃមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ប៉ារ៉ាស៊ីតសាស្ត្រ និងបាណកសាស្ត្រ បានអះអាងថា បច្ចុប្បន្ននេះ កម្ពុជា កំពុងស្ថិតក្នុងស្ថានភាពឈានទៅសូន្យករណីជំងឺគ្រុនចាញ់នាដំណាច់ឆ្នាំ ២០២៥ នេះ។

លោកវេជ្ជបណ្ឌិត ហ៊ុយ រ៉េកុល ប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ប៉ារ៉ាស៊ីតសាស្ត្រ និងបាណកសាស្ត្រ បានមានប្រសាសន៍នៅរសៀលថ្ងៃទី ១២ សីហា នេះថា ការឈានទៅសូន្យករណីជំងឺគ្រុនចាញ់នាដំណាច់ឆ្នាំ ២០២៥ នេះ ដោយសារការយកចិត្តទុកដាក់ និងគាំទ្រខ្ពស់ពីក្រសួងសុខាភិបាល និងមានកិច្ចសហការពេញលេញពីគ្រប់ដៃគូពាក់ព័ន្ធ ក្រោមការយន្តការសម្របសម្រួលអភិបាលកិច្ចតម្រង់ទិសបច្ចេកទេសផ្ទាល់ជាប្រចាំរបស់មជ្ឈមណ្ឌលជាតិប្រយុទ្ធនឹងជំងឺគ្រុនចាញ់ប៉ារ៉ាស៊ីតសាស្ត្រ និងបាណកសាស្ត្រ គឺ ជំងឺគ្រុនចាញ់ កំពុងឆ្ពោះទៅសូន្យករណី នៃការចម្លងក្នុងតំបន់ និងក៏កំពុងបន្តឈានទៅសូន្យករណីក្នុងគ្រប់ភូមិសាស្ត្រទូទាំងប្រទេសនាដំណាច់ឆ្នាំ ២០២៥ ដែលជាគោលដៅចុងក្រោយ។

ជាងនេះទៀត កម្ពុជា មានយុទ្ធសាស្ត្រជាតិលុបបំបាត់ជំងឺគ្រុនចាញ់ឆ្នាំ ២០១១-២០២៥ ដែលកំពុងប្រតិបត្តិនេះ គឺជាត្រីវិស័យដ៏ត្រឹមត្រូវ ដែលសមស្របតាមយុទ្ធសាស្ត្រតំបន់ និងសកលលោក។ មុនពេលមានយុទ្ធសាស្ត្រនេះ កម្ពុជា មានករណីជំងឺគ្រុនចាញ់រាយការណ៍មានជិត ២០ ម៉ឺនករណី ក្នុងមួយឆ្នាំ (ជាមធ្យមមាន ១៣ ម៉ឺនករណី ក្នុងមួយឆ្នាំៗ) និងស្លាប់ ៧០០ – ៨០០ នាក់ ក្នុងមួយឆ្នាំ។

លោកវេជ្ជបណ្ឌិត ហ៊ុយ រ៉េកុល បានពន្យល់ថា ក្រៅពីនេះយើងបានបន្ថែមវិធីសាស្ត្រ និងបង្កើនការផ្សព្វផ្សាយដល់ប្រជាពលរដ្ឋដែលរស់នៅក្នុងសំបុកចម្លងជំងឺគ្រុនចាញ់ឱ្យបានយល់ដឹងកាន់តែច្បាស់ពីវិធីការពារជំងឺគ្រុនចាញ់ ផ្តល់ថ្នាំបង្ការការពារដល់ប្រជាពលរដ្ឋរស់នៅតំបន់ប្រឈមខ្ពស់ជាងគេទៅនឹងជំងឺគ្រុនចាញ់ ក៏ដូចជាផ្តល់មុងជ្រលក់ថ្នាំដល់ប្រជាពលរដ្ឋមានមុខរបរចូលព្រៃប្រចាំថ្ងៃផងដែរ។

ជាមួយគ្នានេះ ការមានសម្ភារៈគ្រប់គ្រាន់ដូចជា ឧបករណ៍ធ្វើតេស្តរកមេរោគគ្រុនចាញ់ និងឱសថព្យាបាលជំងឺគ្រុនចាញ់ប្រកបដោយប្រសិទ្ធភាពខ្ពស់ និងដោយសារមានការចូលរួមគាំទ្រពីថ្នាក់ដឹកនាំគ្រប់ជាន់ថ្នាក់ មន្ទីរសុខាភិបាល រាជធានីខេត្ត អាជ្ញាធរមូលដ្ឋាន អង្គការដៃគូ ពិសេសប្រមុខរាជរដ្ឋាភិបាលកម្ពុជា បានដាក់ចេញយុទ្ធសាស្ត្រជាតិលុបបំបាត់ជំងឺគ្រុនចាញ់ ទើបបានធ្វើឱ្យការងារប្រយុទ្ធនឹងជំងឺគ្រុនចាញ់ទទួលបានលទ្ធផលល្អប្រសើរ។

លោកវេជ្ជបណ្ឌិត បានបន្ថែមទៀតថា «យើងកំពុងស្ថិតលើមាគ៌ាត្រឹមត្រូវ សង្ឃឹមថាលុបបំបាត់បាន។ យើងកំពុងសស្រាក់សស្រាំណាស់ តាមដានស្ថានភាព និងរុករកជំងឺគ្រុនចាញ់»។

លោកវេជ្ជបណ្ឌិត ហ៊ុយ រ៉េកុល សង្ឃឹមថា កម្ពុជា នឹងអាចលុបបំបាត់ជំងឺគ្រុនចាញ់ឱ្យអស់ទាំងស្រុង នៅឆ្នាំ ២០២៥ ដោយសារពីមួយឆ្នាំទៅមួយឆ្នាំបានកាត់បន្ថយករណីជំងឺគ្រុនចាញ់ថយចុះស្ទើរមួយរយភាគរយ និងមិនមានអ្នកស្លាប់ដោយសារជំងឺនេះទេ ប្រសិនបើមិនមានវិបត្តិអ្វីមួយមករារាំងឧបសគ្គនោះ។

គួរបញ្ជាក់ថា ក្នុងឆមាសទី ១ ឆ្នាំ ២០២៥ កម្ពុជា មានករណីជំងឺគ្រុនចាញ់ជាង ១០ ករណី និងគ្មានអ្នកស្លាប់តាំងពីឆ្នាំ ២០១៨ មក ថយចុះ ៩៤% បើធៀបទៅនឹងរយៈពេល ៦ ខែដូចគ្នា ឆ្នាំ ២០២៤ កន្លងទៅ៕

អត្ថបទ ៖ សំអឿន

The post មន្ត្រីជាន់ខ្ពស់ ៖ កម្ពុជា កំពុងស្ថិតក្នុងស្ថានភាពឈានទៅសូន្យករណីជំងឺគ្រុនចាញ់ នាដំណាច់ឆ្នាំ ២០២៥ appeared first on Kampuchea Thmey Daily.

ឆមាសទី ១ ឆ្នាំ ២០២៥ កម្ពុជា មានជំងឺគ្រុនឈាមជាង ៧ ពាន់ករណី ស្លាប់ ១៥ នាក់ ថយចុះជាងឆ្នាំមុន

អ៊ិន ពិសី — Tue, 08 Jul 2025 10:30:00 +0000

នៅក្នុងឆមាសទី ១ ឆ្នាំ ២០២៥ នេះ កម្ពុជា មានជំងឺគ្រុនឈាមជាង ៧ ០០០ ករណី ក្នុងនោះ ស្លាប់ ១៥ នាក់ ថយចុះជាងឆ្នាំមុន ដែលមានអ្នកស្លាប់រហូតដល់ទៅ ២៣ នាក់។

លោកវេជ្ជបណ្ឌិត ហ៊ុយ រ៉េកុល ប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រ បានមានប្រសាសន៍នៅរសៀលថ្ងៃទី ៨ កក្កដា នេះថា ឆមាសទី ១ ឆ្នាំ ២០២៥ នេះ មានជំងឺគ្រុនឈាមប្រមាណជា ៧ ០០០ ករណី បើធៀបទៅនឹងរយៈពេលដូចគ្នាឆ្នាំ ២០២៤ គឺមានចំនួនប្រហាក់ប្រហែលគ្នា តែឆ្នាំ ២០២៥ មានករណីស្លាប់តិចជាងឆ្នាំ ២០២៤ មានត្រឹមស្លាប់ ១៥ នាក់ គឺ ថយ ៣៥% ខណៈ ៦ ខែ ឆ្នាំ ២០២៤ មាន ២៣ នាក់ ឯណោះ។

លោកវេជ្ជបណ្ឌិត បានបន្តថា ឆ្នាំ ២០២៥ នេះ ជាឆ្នាំ នៃវដ្ដជំងឺគ្រុនឈាមរៀងរាល់ ៥-៦ ឆ្នាំ ម្តង ដែលទាមទារឱ្យមានការចូលរួមអនុវត្តរាល់វិធានការបង្ការការពារជំងឺគ្រុនឈាមឱ្យបានសកម្ម ពិសេសសូមចូលរួមធ្វើតាមការណែនាំរបស់ក្រសួងសុខាភិបាលដែលបានផ្សព្វផ្សាយជាបន្តបន្ទាប់។

លោកវេជ្ជបណ្ឌិត បានអំពាវនាវដល់អាណាព្យាបាល មាតាបិតា កុមារាកុមារីគ្រប់រូប រួមទាំងអាជ្ញាធរមូលដ្ឋាន ត្រូវចូលរួមកម្ចាត់ដង្កូវទឹកនៅតាមទីកន្លែងដែលមានទឹកដក់ដូចជា ពាង អាងទឹក ថូផ្កា ចានទ្រជើង ក្រឡ ជាដើម និងអាជីវករ និងម្ចាស់ជីវកម្មទាំងឡាយ ដែលប្រកបរបរពាក់ព័ន្ធនឹងសំបកកង់ឡានម៉ូតូ សូមធ្វើការគ្រប់គ្រងសំបកកង់ទាំងនោះឱ្យមានសុវត្ថិភាព ជៀសផុតពីការដក់ទឹក ដោយមិនត្រូវទុកចោលពាសវាលពាសកាល បង្កើតបានជាប្រភពកកើត និងជម្រកមូសខ្លាដ៏គ្រោះថ្នាក់បំផុតដែលអំណោយផលដល់ការចម្លងជំងឺគ្រុនឈាមកើនឡើង និងអាចឈានទៅរកការរាតត្បាតគ្រប់ពេលវេលា។

ជាមួយគ្នានេះដែរ លោកវេជ្ជបណ្ឌិត បានណែនាំឱ្យកុមារស្លៀកពាក់ខោអាវដៃវែងជើងវែង និងសម្រាន្តក្នុងមុងជាប្រចាំទាំងថ្ងៃទាំងយប់ មិនត្រូវអង្គុយលេងនៅជិតទីកន្លែងងងឹត និងករណីមានរោគសញ្ញាក្តៅខ្លួនខ្លាំងភ្លាមៗ ត្រូវប្រញាប់នាំអ្នកជំងឺទៅរកសេវាពិនិត្យ និងព្យាបាលរបស់រដ្ឋ (សេវាសាធារណៈ) ដូចជា មណ្ឌលសុខភាព និងមន្ទីរពេទ្យ ដែលនៅជិតបំផុត និងកុំសាកល្បងព្យាបាលជំងឺដោយខ្លួនឯង ឬពន្យារពេលតាមដានព្យាបាលអ្នកជំងឺនៅសេវាឯកជនដែលគ្មានសមត្ថភាពផ្នែកជំងឺគ្រុនឈាមនេះឱ្យសោះ ព្រោះអាចធ្វើឱ្យកុមារស្លាប់បាត់បង់ជីវិតបាន។

លោកវេជ្ជបណ្ឌិត ហ៊ុយ រ៉េកុល បានបញ្ជាក់ថា កុមារដែលស្លាប់បាត់បង់ជីវិតដោយសារជំងឺគ្រុនឈាមភាគច្រើនបណ្តាលមកពីមាតាបិតា ឬអាណាព្យាបាល បញ្ជូនអ្នកជំងឺទៅមន្ទីរពេទ្យរដ្ឋមានការយឺតយ៉ាវ៕

អត្ថបទ ៖ សំអឿន

The post ឆមាសទី ១ ឆ្នាំ ២០២៥ កម្ពុជា មានជំងឺគ្រុនឈាមជាង ៧ ពាន់ករណី ស្លាប់ ១៥ នាក់ ថយចុះជាងឆ្នាំមុន appeared first on Kampuchea Thmey Daily.

ឆ្នាំ ២០២៤ មនុស្សជាង ៥ ម៉ឺននាក់ បានទប់ស្កាត់មិនឱ្យឆ្លង ឬ ឈឺ ដោយសារជំងឺគ្រុនឈាម

អ៊ិន ពិសី — Fri, 10 Jan 2025 03:39:11 +0000

នៅឆ្នាំ ២០២៤ មជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រ បានទប់ស្កាត់បង្ការមនុស្សប្រមាណជាង ៥ ម៉ឺននាក់ មិនឱ្យឆ្លង ឬ ឈឺ ដោយសារជំងឺគ្រុនឈាម ដែលធ្វើឱ្យអត្រាឈឺ និង ស្លាប់ មានការថយចុះគួរកត់សម្គាល់។

លោកវេជ្ជបណ្ឌិត ហ៊ុយ រ៉េកុល ប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រ បានមានប្រសាសន៍នៅព្រឹកថ្ងៃទី ១០ មករា នេះថា តាមការវាយតម្លៃស្ថានភាពជំងឺគ្រុនឈាមនៅឆ្នាំ ២០២៤ ស្ថិតក្នុងស្ថានភាពវិវត្តកម្រិតទាបបំផុតជាធម្មតា និងបានទប់ស្កាត់បង្ការកុំឱ្យមនុស្សឈឺដោយជំងឺគ្រុនឈាមប្រមាណជា ៦៤ – ៧៤% ស្មើនឹងមនុស្សចំនួន ៣៤ ២០០ ទៅ ៥៤ ២៥៨ នាក់។

លោកវេជ្ជបណ្ឌិត ហ៊ុយ រ៉េកុល បានបន្តថា ជាក់ស្ដែង ឆ្នាំ ២០២៤ មានកុមារ និងមនុស្សពេញវ័យ ឆ្លងជំងឺគ្រុនឈាមចំនួន ១៨ ៧៤២ ករណី និងស្លាប់ចំនួន ៤៥ នាក់ បើធៀបទៅនឹងឆ្នាំ ២០២៣ មានការថយចុះចំនួន ១៦ ០២០ ករណី ឬ ស្មើនឹង ៤៦% ក្នុងចំណោម ៣៤ ៧៦២ ករណី។

លោកវេជ្ជបណ្ឌិត បានបន្តទៀតថា ការថយចុះ នៃករណីជំងឺគ្រុនឈាមនេះ អាចបណ្តាលមកពីមានការកើនឡើងនូវចំនួនប្រជាជនមានការយល់ដឹងច្រើន បានមកទទួលសេវាព្យាបាលនៅមន្ទីរពេទ្យរដ្ឋ ដោយសារគុណភាពសេវា និងសមត្ថភាពផ្តល់សេវារបស់គ្រូពេទ្យព្យាបាលនៅមន្ទីរពេទ្យទូទាំងប្រទេសមានការកើនឡើងជាលំដាប់ពីមួយឆ្នាំទៅមួយឆ្នាំ។ ការដាក់ថ្នាំអាបែតបានគ្រប់គ្រាន់ និងបានធ្វើការចែកចាយដល់មន្ទីរសុខាភិបាលនៅទូទាំងប្រទេសបានទាន់ពេលវេលាសម្រាប់ដាក់នៅក្នុងពាង ឬ អាងទឹកតាមខ្នងផ្ទះប្រជាពលរដ្ឋ ដើម្បីសម្លាប់ដង្កូវទឹកដែលជាភ្នាក់ងារចម្លងជំងឺគ្រុនឈាម។ ជាងនេះទៅទៀត ប្រជាពលរដ្ឋមានការយល់ដឹងខ្ពស់ពីវិធានការអនាម័យ និងបរិស្ថាន នៅតាមសហគមន៍បានល្អប្រសើរដូចជា សំអាតលំនៅដ្ឋានបានស្អាត លុបបំបាត់ ឬ ដុតកម្ទេចចោល ឬ ទុកដាក់មានរបៀបរាល់វត្ថុដែលអាចដក់ទឹកបានដូចជា សំបកកង់ឡាន សំបកដប កំប៉ុង ត្រឡោកដូង ចានបាយ កំប៉ុងជ័រ ដែលជាជម្រក នៃការកកើតដង្កូវទឹកជាភ្នាក់ងារចម្លងជំងឺគ្រុនឈាម។

លោកវេជ្ជបណ្ឌិត បានអំពាវនាវដល់អាណាព្យាបាល មាតាបិតា កុមារា កុមារី គ្រប់រូប រួមទាំងអាជ្ញាធរមូលដ្ឋាន ត្រូវចូលរួមកម្ចាត់ដង្កូវទឹកនៅតាមទីកន្លែងដែលមានទឹកដក់ ដូចជា ពាង អាងទឹក ថូផ្កា ចានទ្រជើង ក្រឡ ខាប់ ជាដើម និងណែនាំឱ្យកុមារស្លៀកពាក់ខោអាវដៃវែងជើងវែង និងសម្រាន្តក្នុងមុងជាប្រចាំទាំងថ្ងៃទាំងយប់ មិនត្រូវអង្គុយលេងនៅជិតទីកន្លែងងងឹត និងករណីមានរោគសញ្ញាក្តៅខ្លួនខ្លាំងភ្លាមៗ ត្រូវប្រញាប់នាំអ្នកជំងឺទៅរកសេវាពិនិត្យ និងព្យាបាលរបស់រដ្ឋ (សេវាសាធារណៈ) ដូចជា មណ្ឌលសុខភាព និងមន្ទីរពេទ្យ ដែលនៅជិតបំផុត និងកុំសាកល្បងព្យាបាលជំងឺដោយខ្លួនឯង ឬ ពន្យារពេលតាមដានព្យាបាលអ្នកជំងឺនៅសេវាឯកជនគ្មានសមត្ថភាពផ្នែកជំងឺគ្រុនឈាមនេះឱ្យសោះ ព្រោះអាចធ្វើឱ្យកុមារស្លាប់បាត់បង់ជីវិតបាន។ ព្រោះថាកុមារដែលស្លាប់បាត់បង់ជីវិតដោយសារជំងឺគ្រុនឈាមភាគច្រើនបណ្តាលមកពីមាតាបិតា ឬ អាណាព្យាបាល បញ្ជូនអ្នកជំងឺទៅមន្ទីរពេទ្យរដ្ឋមានការយឺតយ៉ាវ។

ជាមួយគ្នានេះដែរ លោកវេជ្ជបណ្ឌិត បានណែនាំឱ្យអាជីវករ និងម្ចាស់អាជីវកម្មទាំងឡាយដែលប្រកបរបរពាក់ព័ន្ធនឹងសំបកកង់ឡានម៉ូតូ សូមធ្វើការគ្រប់គ្រងសំបកកង់ទាំងនោះឱ្យមានសុវត្ថិភាព ជៀសផុតពីការដក់ទឹក ដោយមិនត្រូវទុកចោលពាសវាលពាសកាល បង្កើតបានជាប្រភពកកើត និងជម្រកមូសខ្លាដ៏គ្រោះថ្នាក់បំផុត ដែលអំណោយផលដល់ការចម្លងជំងឺគ្រុនឈាមកើនឡើង និងអាចឈានទៅរកការរាតត្បាតគ្រប់ពេលវេលា៕

អត្ថបទ ៖ សំអឿន

The post ឆ្នាំ ២០២៤ មនុស្សជាង ៥ ម៉ឺននាក់ បានទប់ស្កាត់មិនឱ្យឆ្លង ឬ ឈឺ ដោយសារជំងឺគ្រុនឈាម appeared first on Kampuchea Thmey Daily.

ក្រសួងសុខាភិបាល តៀមថ្នាំអាបេត ២០០តោន សេរ៉ូម ៦៤០០០ កំប្លោក ដើម្បីទប់ស្កាត់ការរាតត្បាតជំងឺគ្រុនឈាម

Sous Sith — Tue, 27 Feb 2024 08:59:24 +0000

លោកវេជ្ជបណ្ឌិត ហ៊ុយ រ៉េកុល ប្រធាន មជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រ បានមានប្រសាសន៍ នៅថ្ងៃទី២៧ខែកម្ភៈ នេះថា ក្រសួងសុខាភិបាលបានតៀមថ្នាំអាបេតចំនួន ២០០តោន សេរ៉ូម៦៤០០០ កំប្លោក និងថ្នាំបាញ់សម្លាប់មូស ១ម៉ឺនលីត្រ ដើម្បីទប់ស្កាត់ការរាតត្បាតជំងឺគ្រុនឈាមទ្រង់ទ្រាយធំ នៅឆ្នាំ២០២៤ នេះ។

លោកវេជ្ជបណ្ឌិត ហ៊ុយ រ៉េកុល មានប្រសាសន៍បន្តថា ក្រសួងបានត្រៀមសារអប់រំ ពីវិធានការការពារជំងឺគ្រុនឈាមសម្រាប់ផ្សព្វផ្សាយតាមប្រព័ន្ធបណ្តាញសង្គម វិទ្យុ អនឡាញ និងទូរទ្សសន៍ ដើម្បីបញ្ជ្រាបដល់ប្រជាពលរដ្ឋបានយល់ដឹង ការពារកូនចៅកុំឱ្យឆ្លងជំងឺគ្រុនឈាម ដោយសារឆ្នាំនេះដល់វដ្តនៃការផ្ទុះជំងឺគ្រុនឈាមទ្រង់ទ្រាយធំ ខណៈការផ្ទុះចុងក្រោយនៅឆ្នាំ២០១៩។

លោកវេជ្ជបណ្ឌិត បានបន្ថែមទៀតថា ចាប់ពីថ្ងៃទី១ ខែមករា រហូតមកដល់ ថ្ងៃទី២៦ ខែកម្ភៈ ឆ្នាំ២០២៤ នេះ មានករណីជំងឺគ្រុនឈាម ចំនួន ២,៦៣៤ ករណី មិនមានអ្នកស្លាប់មានការកើនឡើងជិត៤ដង នេះបើធៀបទៅនឹងរយៈពេលដូចគ្នាកាលពីដើមឆ្នាំ២០២៣ ដែលមានចំនួន ៦៧៧ ករណីក្នុងនោះស្លាប់ ២ករណី។

ជាមួយគ្នានោះ លោកវេជ្ជបណ្ឌិត ហ៊ុយ រ៉េកុល បានអំពាវនាវដល់អាណាព្យាបាល មាតាបិតា កុមារាកុមារីគ្រប់រូប រួមទាំងអាជ្ញាធរមូលដ្ឋានត្រូវចូលរួមកំចាត់ដង្កូវទឹកនៅតាមទីកន្លែងដែលមានទឹកដក់ដូចជា ពាង អាងទឹក ថូផ្កា ចានទ្រជើង ក្រឡ ខាប់ ជាដើម។ សម្រាប់ អាជីវករ និងម្ចាស់ជីវកម្មទាំងឡាយ ដែលប្រកបរបរពាក់ព័ន្ធនឹងសំបកកង់ឡានម៉ូតូ ត្រូវគ្រប់គ្រងសំបកកង់ទាំងនេះឱ្យមានសុវត្ថិភាព ជៀសផុតពីការដក់ទឹកដោយមិនត្រូវទុកចោលពាសវាលពាសកាល បង្កើតបានជាប្រភពកកើត និងជម្រកមូសខ្លាដ៏គ្រោះថ្នាក់បំផុត ដែលបណ្ដោលឱ្យមានការចម្លងជំងឺគ្រុនឈាមកើនឡើង និងអាចឈានទៅរកការរាតត្បាតគ្រប់ពេលវេលា។

លោកវេជ្ជបណ្ឌិត បានបញ្ជាក់ថា « សូមឱ្យប្រជាពលរដ្ឋចូលរួមអនុវត្តវិធការការការពាររបស់ក្រសួងសុខាភិបាលឱ្យបានគ្រប់ៗគ្នា ព្រោះថាក្រសួងមិនអាចមកសម្អាតបរិស្ថាននៅជុំវិញផ្ទះបងប្អូនជំនួសបងប្អូនបានទេ ដូចនេះសូមបងប្អូនសម្អាតទាំងអស់គ្នា ពិសេសកុំបោះចោលពាសវាលពាសកាលតាមផ្លូវសាធារណៈនូវសំបកកុំប៉ុងកាហ្វេ ចានស្នោរ ថង់ប្លាស្ទិក ព្រោះថាវត្ថុទាំងនោះជាវត្ថុអាចដក់ទឹកបានបង្កជាដង្កូវទឹកកកើតទៅជាមូសខ្លា ដែលជាភ្នាក់ងារចម្លងជំងឺគ្រុនឈាម»។

ជាចុងក្រោយ លោក វេជ្ជបណ្ឌិត បានណែនាំទៀតថាក្នុងករណីមានរោគសញ្ញាក្តៅខ្លួនខ្លាំងភ្លាមៗ ត្រូវប្រញាប់នាំអ្នកជំងឺទៅរកសេវាពិនិត្យនិងព្យាបាលរបស់រដ្ឋ ដូចជាមណ្ឌលសុខភាព និងមន្ទីរពេទ្យ ដែលនៅជិតបំផុត និងកុំសាកល្បងព្យាបាលជំងឺ ដោយខ្លួនឯង ឬពន្យារពេលតាមដានព្យាបាលអ្នកជំងឺនៅសេវាឯកជនដែលគ្មានសមត្ថភាពផ្នែកជំងឺគ្រុនឈាមឱ្យសោះ ព្រោះអាចធ្វើឱ្យកុមារស្លាប់បាត់បង់ជីវិតបាន ខណៈកុមារដែលស្លាប់កន្លងមកដោយសារការបញ្ជូនអ្នកជំងឺទៅមន្ទីរពេទ្យរដ្ឋមានការយឺតយ៉ាវ៕

អត្ថបទ ៖ សំអឿន

The post ក្រសួងសុខាភិបាល តៀមថ្នាំអាបេត ២០០តោន សេរ៉ូម ៦៤០០០ កំប្លោក ដើម្បីទប់ស្កាត់ការរាតត្បាតជំងឺគ្រុនឈាម appeared first on Kampuchea Thmey Daily.