លោកសាស្ត្រាចារ្យ គី សន់ទី ប្រធានមន្ទីរពេទ្យគន្ធបុប្ផា មានប្រសាសន៍ប្រាប់ “កម្ពុជាថ្មី” នៅរសៀលថ្ងៃទី១០ ខែកក្កដា ឆ្នាំ២០២៣នេះថា ក្នុងរដូវវស្សា ធ្លាក់ភ្លៀងច្រើន ករណីជំងឺគ្រុនឈាម និងជំងឺរលាកប្រព័ន្ធផ្លូវដង្ហើម ពិសេសជំងឺរលាកសួតលើកកុមារតូចៗ អាចមានហានិភ័យគម្រាមកំហែងដល់អាយុជីវីតកុមារ។

លោកវេជ្ជបណ្ឌិត គី សន់ទី មានប្រសាសន៍បន្តថា ឪពុកម្ដាយ ឬអាណាព្យាបាលកុមារត្រូវយកចិត្តទុកដាក់ថែទាំ កូនចៅ ដោយរស់នៅស្អាតមានអនាម័យ និងចូលរួមទាំងអស់គ្នា ពិសេសបំបាត់ជម្រកមូសខ្លាការពារជំងឺគ្រុនឈាម។ អាណាព្យាបាល ត្រួវស្វែងរកការពិគ្រោះព្យាបាលជំងឺ ជាមួយគ្រូពេទ្យមានជំនាញវិជ្ជាជីវៈ ពេលកូនចៅមានជំងឺដង្កាត់។

លោកវេជ្ជបណ្ឌិត គី សន់ទី មានប្រសាសន៍បន្ថែមថា កុំស្វែងរកទិញថ្នាំព្យាបាលកូនចៅដោយខ្លួនឯង តែត្រូវស្វែងរកការព្យាបាលមួយត្រឹមត្រូវ នៅមណ្ឌលសុខភាព មន្ទីរពេទ្យបង្អែកជាដើម។ ស្វែងរកការបញ្ជូនអ្នកជំងឺធ្ងន់ធ្ងរ ប្រកបដោយសុវត្ថិភាព និងត្រឹមត្រូវតាមក្បួនខ្នាតបច្ចកទេស មកកាន់មន្ទីរពេទ្យឯកទេសមានជំនាញដែលទុកចិត្តបាន។

ប្រធានមន្ទីរពេទ្យគន្ធបុប្ផា ខាងលើ បានឱ្យដឹងបន្ថែមថា មានកុមារចំនួន ១ ៣២៦ នាក់ មានជំងឺគ្រុនឈាមធ្ងន់ធ្ងរ ត្រូវបានសម្រាកព្យាបាលក្នុងមន្ទីរពេទ្យគន្ធបុប្ផា។​

គួរបញ្ជាក់ថា រាល់ការព្យាបាលទាំងអស់នៅមន្ទីរពេទ្យគន្ធបុប្ផាទាំងនៅរាជធានីភ្នំពេញ និងខេត្តសៀមរាប គឺមិនគិតថ្លៃសម្រាប់គ្រប់ៗគ្នា ដោយគ្មានការរើសអើង។ មន្ទីរពេទ្យគន្ធបុប្ផាទាំង ៥ទីតាំង នៅតែត្រូវការថវិកាជាប្រចាំប្រមាណ ៨៤ម៉ឺនដុល្លារក្នុង ១សប្តាហ៍ ឬត្រូវចំណាយប្រមាណ ៤០ លានដុល្លារ ក្នុង១ឆ្នាំ ដើម្បីធ្វើប្រតិបត្តិការមនុស្សធម៌សង្រ្គោះជីវិតកុមារនៅកម្ពុជា ដោយមានការជួយបំពេញបន្ថែមគ្នាទៅវិញទៅមក រវាងមូលនិធិគន្ធបុប្ផាស្វីស និងមូលនិធិគន្ធបុប្ផាកម្ពុជា ក៏ដូចជាពីសំណាក់ក្រសួងសុខាភិបាល នៃព្រះរាជាណាចក្រកម្ពុជា។ ការបរិច្ចាគនេះតែមួយអាចគ្រប់គ្រាន់នៅឡើយទេសម្រាប់ការគាំទ្រផ្នែកហិរញ្ញវត្ថុដល់មន្ទីរពេទ្យគន្ធបុប្ផា ព្រោះមន្ទីរពេទ្យនេះ មិនមែនជាស្ថាប័នដែលរកប្រាក់ចំណូល។

មូលនិធិគន្ធបុប្ធាកម្ពុជាបានបង្កើត KHQR CODE (ទាំងប្រាក់រៀល និងដុល្លារអាមេរិក) សម្រាប់គ្រប់ App ធនាគារទាំងអស់ក្នុងព្រះរាជាណាចក្រកម្ពុជា ដែលមានកម្មវិធីស្ដែន QR CODE ដើម្បីសម្រួលដល់ការចូលរួមបរិច្ចាគពីសំណាក់សប្បុរសជននានា ក្នុងគោលបំណងជួយនាំភាពញញឹមដល់កុមារដែលជាអនាគតដ៏ភ្លឺស្វាងរបស់កម្ពុជា តាមរយៈការរួមគ្នារក្សានិរន្តរភាពនៃកិច្ចដំណើរការរបស់មន្ទីរពេទ្យគន្ធបុប្ផា ទាំង ៥ទីតាំង នៅព្រះរាជាណាចក្រកម្ពុជា៕

អត្ថបទ៖ ច័ន្ទ វីរៈ

The post សូមអាណាព្យាបាលប្រុងប្រយ័ត្ន ជំងឺសាហាវ ៣ ផ្ដល់ហានិភ័យដល់ជីវិតកុមារ ក្នុងរដូវវស្សា appeared first on Kampuchea Thmey Daily.

លោកសាស្ត្រាចារ្យ គី សង់ទី ប្រធានមន្ទីរពេទ្យគន្ធបុប្ផា បានឱ្យ “កម្ពុជាថ្មី” ដឹងថា ៣០ឆ្នាំកន្លងទៅចាប់ពីថ្ងៃទី២ ខែវិច្ឆិកា ឆ្នាំ១៩៩២ មូលនិធិគន្ធបុប្ផាស្វីស បានចំណាយថវិកាប្រមាណ ៨៣៤ លានដុល្លារអាមេរិក ដែលក្នុងនោះក៏មានការចូលរួមមួយផ្នែកផងដែររបស់រាជរដ្ឋាភិបាលកម្ពុជា និងរដ្ឋាភិបាលស្វីស។

លោកសាស្ត្រាចារ្យ គី សង់ទី បានឱ្យដឹងបន្តថា ៣០ឆ្នាំ មន្ទីរពេទ្យគន្ធបុប្ផា បានពិនិត្យព្យាបាលកុមារ និងស្ត្រីមានផ្ទៃពោះ បានចំនួន ២១ ២៤៦ ១៧៧ ករណី និងកាត់បន្ថយអត្រាស្លាប់ក្នុងមន្ទីរពេទ្យពី ៧% មកត្រឹម ០,៣%។ រាល់ការព្យាបាលទាំងអស់ គឺឥតគិតថ្លៃសម្រាប់គ្រប់ៗគ្នា ដោយគ្មានការរើសអើង កុមារគ្រប់ៗរូប ទោះមាន ឬក្រ មានសិទ្ធិទទួលបាននូវការព្យាបាលប្រកបដោយគុណភាព និងត្រឹមត្រូវ។

មន្ទីរពេទ្យគន្ធបុប្ផា ដឹងគុណ និងចងចាំលោកវេជ្ជបណ្ឌិត បេអាត រិចឈ្នឺរ និងលោកវេជ្ជបណ្ឌិត ភីទ័រ ស្ទូឌ័រ សហស្ថាបនិកមន្ទីរពេទ្យគន្ធបុប្ផា, គណៈប្រតិភូមូលនិធិគន្ធបុប្ផាស្វីស Dr med BeatRichner ដឹកនាំដោយលោកបណ្ឌិត René Schwarzenbach & Ilona Schwarzenbach ប្រធានមូលនិធិ ជាមួយអនុប្រធានមូលនិធិទាំងពីរ Prof.med Michael Grotzer និង Dr Philip Robinson and Mrs Genevieve Studer ដែលបានមកគោរពវិញ្ញាណក្ខន្ធរំលឹកគុណ នៅមុខចេតិយរបស់វេជ្ជបណ្ឌិត បេអាតរិចឈ្នឺរ និងភីទ័រ ស្ទូឌ័រ នាមន្ទីរពេទ្យជ័យវរ្ម័នទី៧ នៃខេត្តសៀមរាប-អង្គរ និងធ្វើទស្សនកិច្ចសួរសុខទុក្ខបុគ្គលិកពេទ្យកម្ពុជា។

ដំណើរការ ៣០ឆ្នាំនៃមន្ទីរពេទ្យគន្ធបុប្ផា គឺជា៣០ឆ្នាំ នៃសហប្រតិបត្តិការរវាងមន្ទីរពេទ្យគន្ធបុប្ផារបស់កម្ពុជា និងមន្ទីរពេទ្យកុមារសាកលវិទ្យាល័យហ្សុយរិក ប្រទេសស្វីស ព្រមទាំងការចូលរួមគាំទ្រជាប់ជាប្រចាំរបស់សប្បុរសជនស្វីស និងកម្ពុជា។

មន្ទីរពេទ្យគន្ធបុប្ផា ជាកូន ចៅ ចៅទួត សូមក្រាបថ្វាយបង្គំ រាជានុញ្ញាតថ្លែងនូវព្រះគុណូបការៈដ៏មហាជ្រាលជ្រៅ ថ្វាយចំពោះ ព្រះករុណា ព្រះបាទសម្ដេចព្រះ នរោត្ដម សីហនុ ព្រះមហាវីរក្សត្រ ព្រះវរាជបិតាឯករាជ្យ បូរណភាពទឹកដី និងឯកភាពជាតិខ្មែរ “ព្រះបរមរតនកោដ្ឋ”, ព្រះករុណាព្រះបាទសម្ដេចព្រះបរមនាថ នរោត្ដម-សីហមុនី ព្រះមហាក្សត្រ នៃព្រះរាជាណាចក្រកម្ពុជា និងសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ដែលព្រះអង្គ តែងតែគាំទ្រទាំងស្មារតី និងព្រះរាជទ្រព្យ សម្រាប់ដំណើរការមន្ទីរពេទ្យគន្ធបុប្ផា Dr med BeatRichner តាំងពីឆ្នាំ១៩៩២។

អរគុណប្រជាជនស្វីស និងរដ្ឋាភិបាលស្វីស, សប្បុរសជនគ្រប់លំដាប់ថ្នាក់នៅកម្ពុជា និងរាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន, កាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន, មូលនិធិគន្ធបុប្ផាកម្ពុជា, មន្ត្រីរាជការ បុគ្គលិកកម្មករកម្ពុជានៃមន្ទីរពេទ្យគន្ធបុប្ផាគ្រប់ជំនាន់ ដែលបានចូលរួមក្នុងបេសកកម្មព្យាបាលសង្រ្គោះជីវិតកុមារកម្ពុជា។

យើងសង្ឃឹមថា មន្ទីរពេទ្យគន្ធបុប្ផា នឹងបន្តដំណើរទៅមុខទៀតក្នុងស្មារតីនៃមរតករបស់ស្ថាបនិកទាំងពីរ បេអាតរិចឈ្នឺរ ភីទ័ស្ទូឌ័រ៕

The post ខួប ៣០ឆ្នាំ មន្ទីរពេទ្យគន្ធបុប្ផា៖ ជួយកុមារ និងស្ត្រីជាង ២១ លាននាក់ ចំណាយ ៨៣៤ លានដុល្លារ appeared first on Kampuchea Thmey Daily.

លោកសាស្ត្រាចារ្យ គី សង់ទី ប្រធានមន្ទីរពេទ្យគន្ធបុប្ផា មានប្រសាសន៍ប្រាប់ “កម្ពុជាថ្មី” ថា នៅរយៈពេល ២ខែ ដើមឆ្នាំ២០២២ នេះ មាន ១០ ជំងឺ កុមារភាគច្រើន បានទៅពិនិត្យ និងព្យាបាលនៅមន្ទីរពេទ្យគន្ធបុប្ផា។

១. គ្រោះថ្នាក់ចរាចរណ៍ និងគ្រោះថ្នាក់ផ្សេងៗ មានបែកក្បាល ហូរឈាមក្នុងខួរក្បាល បាក់ដៃ បាក់ជើង បែកសរីរាង្គគ្រឿងក្នុង ធ្លាយពោះវៀន ជាដើម ដែលអ្នកជំងឺភាគច្រើនមានសភាពធ្ងន់ធ្ងរពេលមកដល់មន្ទីរពេទ្យ។

២. ជំងឺរលាកផ្លូវដង្ហើម ប្រហែល ៣០-៤០ភាគរយ នៃជំងឺកុមារទូទៅ មានដូចជា រលាកបំពង់ក ក្ដៅខ្លួន រលាកសួត រលាកទងសួត និងរលាកស្រោមសួត ជាដើម ដែលបណ្ដាលមកពីវីរុសផ្សេងៗ និងពួកបាក់តេរី។ ករណីខ្លះមានសភាពធ្ងន់ធ្ងរ ពិសេសកុមារអាយុក្រោម ៣ឆ្នាំ។

៦. ជំងឺវះកាត់ផ្សេងៗ ដូចជា រលាកខ្នែងពោះវៀន រលាកស្រោមពោះ

៧. ជំងឺប្រព័ន្ធប្រសាទ ដុំសាច់ក្នុងខួរក្បាល

៨. ជំងឺបេះដូងពីកំណើត ត្រូវការវះកាត់

៩. ជំងឺរបេងកុមារនៅតែមាន ប៉ុន្តែបានថយចុះ

១០. ជំងឺហឺតកុមារ មានច្រើន។

លោកសាស្ត្រាចារ្យ គី សង់ទី បានឱ្យដឹងបន្តទៀតថា នៅ២ខែ ដើមឆ្នាំ២០២២នេះ មន្ទីរពេទ្យគន្ធបុប្ផាបាន ពិគ្រោះ ពិនិត្យព្យាបាលជំងឺក្រៅ ចំនួន ៨២ ០៩១ នាក់, ព្យាបាលជំងឺសម្រាកពេទ្យ ចំនួន ១៣ ០៩៨ នាក់, ជំងឺវះកាត់កុមារ ចំនួ​ន ៣ ៤៤៧នាក់, វះកាត់បេះដូង ៨៩ នាក់, ជំងឺគ្រុនឈាម ចំនួន ៨៤ នាក់, ពិនិត្យ និងតាមដានផ្ទៃពោះ នៅផ្នែកពិគ្រោះក្រៅផ្នែកសម្ភព ចំនួន ១២ ៣៤០នាក់ និងសម្រាលកូន ចំនួន ២ ៨០៩ នាក់។

ប្រធានមន្ទីរពេទ្យគន្ធបុប្ផា រូបនេះបានផ្ដាំផ្ញើ សូមប្រជាពលរដ្ឋ អាណាព្យាបាលរក្សាអនាម័យ រស់នៅស្អាត មើលថែកូនចៅឱ្យបានល្អ កុំទិញថ្នាំ ឬប្រើថ្នាំដោយខ្លួនឯង ដោយមិនមានវេជ្ជបញ្ជា ត្រូវរកពេទ្យជំនាញ មកព្យាបាលឱ្យទាន់ពេល ព្រមទាំងអនុវត្តវិធានការ ៣កុំ ៣ការពារ ឱ្យបានម៉ឹងម៉ាត់ និងនាំកូនចៅទៅចាក់វ៉ាក់សាំងកូវីដ-១៩ នៅតាមទីតាំងដែលអាជ្ញាធរផ្ដល់ឱ្យ ឬនៅមន្ទីរពេទ្យគន្ធបុប្ផា ផ្ទាល់។

គួរបញ្ជាក់ថា រាល់ការព្យាបាលទាំងអស់នៅមន្ទីរពេទ្យគន្ធបុប្ផាទាំងនៅរាជធានីភ្នំពេញ និងខេត្តសៀមរាប គឺមិនគិតថ្លៃសម្រាប់គ្រប់ៗគ្នា ដោយគ្មានការរើសអើង។ ទោះបី​អាណាព្យាបាល និងអ្នកជំងឺមកមន្ទីរពេទ្យគន្ធបុប្ឆា ហើយមានវិជ្ជមានកូវីដ-១៩ ក្ដី ក៏ក្រុមគ្រូពេទ្យនៅតែព្យាបាលអ្នកជំងឺ ប៉ុន្តែមុននឹងអនុញ្ញាតឱ្យពួកគាត់ចូលពិនិត្យព្យាបាល ឬសម្រាកគេងនៅពេទ្យ គឺត្រូវធ្វើតេស្តរកមេរោគ​កូវីដ-១៩ សិន៕

អត្ថបទ៖ ច័ន្ទ វីរៈ

The post អាណាព្យាបាលគួរប្រយ័ត្ន ១០ ជំងឺ កុមារភាគច្រើនបានទៅព្យាបាល នៅមន្ទីរពេទ្យគន្ធបុប្ផា appeared first on Kampuchea Thmey Daily.

លោកសាស្ត្រាចារ្យ គី សង់ទី ប្រធានមន្ទីរពេទ្យគន្ធបុប្ផា មានប្រសាសន៍ប្រាប់ “កម្ពុជាថ្មី” ថា ២ ខែដើម ឆ្នាំ២០២២នេះ អាណាព្យាបាលបាននាំយកកុមារប្រមាណ ១៧ ៣៩០ ករណី មកពិគ្រោះ ពិនិត្យព្យាបាលនៅមន្ទីរពេទ្យគន្ធបុប្ផា ក្នុងនោះ មានកុមារជាង ៣០ភាគរយ (ឬជាង ៥ ០០០ នាក់) មានជំងឺជំងឺរលាកផ្លូវដង្ហើមស្រួចស្រាវ។

លោកវេជ្ជបណ្ឌិត គី សង់ទី មានប្រសាសន៍បន្តថា ជំងឺរលាកផ្លូវដង្ហើមមានន័យទូលំទូលាយ មាន ផ្ដាសាយ រលាកច្រមុះ រលាកបំពង់ក រលាកទងសួត ជាដើម។ ការឈឺជំងឺផ្ដាសាយ កើតតាមរយៈការឆ្លងគ្នា ដោយសារការរស់នៅ ឬការប្រាស្រ័កទាក់ទង ឬការរស់នៅជុំគ្នា ការរស់នៅមិនស្អាត អត់អនាម័យ នាំឱ្យមានការឆ្លងគ្នា តាមវីរុស និងបាក់តេរីមួយចំនួន។

ប្រធានមន្ទីរពេទ្យគន្ធបុប្ផា រូបនេះ បានបញ្ជាក់បន្ថែមថា ជំងឺផ្ដាសាយលើកុមារ មានជាប្រចាំឆ្នាំ ច្រើននៅរដូវរំហើយ ឬមានចាប់ពីខែវិច្ឆិកា ដល់ខែកុម្ភៈ។ ចំពោះជំងឺផ្លូវដង្ហើម ២ខែដើមឆ្នាំនេះ ពុំមានករណីច្រើនលើសលុបជាងឆ្នាំមុននោះទេ។

លោកវេជ្ជបណ្ឌិត គី សង់ទី បានផ្ដាំផ្ញើ សូមប្រជាពលរដ្ឋ អាណាព្យាបាលរក្សាអនាម័យ រស់នៅស្អាត មើលថែកូនចៅឱ្យបានល្អ កុំទិញថ្នាំ ឬប្រើថ្នាំដោយខ្លួនឯង ដោយមិនមានវេជ្ជបញ្ជា ត្រូវរកពេទ្យជំនាញ មកព្យាបាលឱ្យទាន់ពេល ព្រមទាំងអនុវត្តវិធានការ ៣កុំ ៣ការពារ ឱ្យបានម៉ឹងម៉ាត់ និងនាំកូនចៅទៅចាក់វ៉ាក់សាំងកូវីដ-១៩ នៅតាមទីតាំងដែលអាជ្ញាធរផ្ដល់ឱ្យ ឬនៅមន្ទីរពេទ្យគន្ធបុប្ផា ផ្ទាល់។

គួរបញ្ជាក់ថា រាល់ការព្យាបាលទាំងអស់នៅមន្ទីរពេទ្យគន្ធបុប្ផាទាំងនៅរាជធានីភ្នំពេញ និងខេត្តសៀមរាប គឺមិនគិតថ្លៃសម្រាប់គ្រប់ៗគ្នា ដោយគ្មានការរើសអើង។ ទោះបី​អាណាព្យាបាល និងអ្នកជំងឺមកមន្ទីរពេទ្យគន្ធបុប្ឆា ហើយមានវិជ្ជមានកូវីដ-១៩ ក្ដី ក៏ក្រុមគ្រូពេទ្យនៅតែព្យាបាលអ្នកជំងឺ ប៉ុន្តែមុននឹងអនុញ្ញាតឱ្យពួកគាត់ចូលពិនិត្យព្យាបាល ឬសម្រាកគេងនៅពេទ្យ គឺត្រូវធ្វើតេស្តរកមេរោគ​កូវីដ-១៩ សិន៕

អត្ថបទ៖ ច័ន្ទ វីរៈ

The post ២ ខែដើមឆ្នាំ កុមារឈឺរលាកផ្លូវដង្ហើមជាង ៣០ % នៃជំងឺសុរប នៅមន្ទីរពេទ្យគន្ធបុប្ផា appeared first on Kampuchea Thmey Daily.

លោកសាស្ត្រាចារ្យ គី សង់ទី ប្រធានមន្ទីរពេទ្យគន្ធបុប្ផា មានប្រសាសន៍បញ្ជាក់ប្រាប់ “កម្ពុជាថ្មី” បន្ថែមថា គោលបំណងនៃការធ្វើតេស្ដរកមេរោគកូវីដ-១៩ គឺដើម្បីឱ្យដឹងថា ប្រជាពលរដ្ឋដែលនាំកូនចៅមកព្យាបាលជំងឺនោះ មានផ្ទុកមេរោគ​កូវីដ-១៩ ឬទេ។

លោកសាស្ត្រាចារ្យ គី សង់ទី មានប្រសាសន៍ថា៖ “បើមាន ដើម្បីយើងស្រួលញែកគាត់ដាក់ដាច់ដោយឡែកភ្លាម ដើម្បីចៀសវាងកុំឱ្យនៅលាយឡំជាមួយអ្នកជំងឺផ្សេងទៀត​​​។ ម៉្យាងទៀត នឹងមានការឆ្លង បើយើងមិនដឹង (អ្នកជំងឺវិជ្ជមាន) នឹងឆ្លងដល់បុគ្គលិកដែលព្យាបាល។ បើអ្នកជំងឺអត់មានកូវីដ គាត់ (ក្រុមគ្រូពេទ្យ) អត់ត្រូវការពាក់ស្លៀកបំពាក់ការពារកូវីដនោះទេ”។

ប្រធានមន្ទីរពេទ្យគន្ធបុប្ផា រូបនេះបញ្ជាក់បន្តថា បុគ្គលិកមន្ទីរពេទ្យត្រូវធ្វើតេស្តរាល់ប្រជាពលរដ្ឋដែលចូលមករកសេវាព្យាបាល និងសុខភាពនៅមន្ទីរពេទ្យគន្ធបុប្ផាគ្រប់សាខា ព្រោះវិធានការថ្មី ក្រសួងសុខាភិបាលបានចេញសេចក្ដីណែនាំ ដោយគ្រប់មន្ទីរពេទ្យ ត្រូវធ្វើតេស្តមុនព្យាបាល។

លោកសាស្ត្រាចារ្យ គី សង់ទី មានប្រសាសន៍ថា៖ “ការធ្វើតេស្តដោយ Rapid Test បានជួយយើងដើម្បីពិនិត្យរកមេរោគពីក្មេង និងឪពុកម្ដាយ ដែលត្រូវធ្វើទាំងអស់គ្នា។ ជួនការឪពុកម្ដាយ ឬអាណាព្យាបាលយកក្មេងមកហ្នឹងគាត់មានវិជ្ជមានតែកូនអត់មាន ហើយជួនកាលកូនមានវិជ្ជមាន តែឪពុកម្ដាយ ឬអាណាព្យាបាលអត់មាន ប៉ុន្តែភាគច្រើនគឺមានទាំង២ អ៊ីចឹងយើងត្រូវព្យាបាលកូនក្មេងដែលមានជំងឺហ្នឹងផង ហើយយើងត្រូវព្យាបាលឪពុកម្ដាយហ្នឹងផង”។

លោកមានប្រសាសន៍បន្តថា៖ “បើយើងមិនដឹងអ្នកជំងឺណាមកព្យាបាលនៅមន្ទីរពេទ្យថាជំងឺកូវីដ ឬអត់ នឹងធ្វើឱ្យមានការឆ្លងគ្នា ព្រោះមន្ទីរពេទ្យបន្ទប់រួមគ្នា ហើយមិនត្រឹមតែឆ្លងទៅអ្នកជំងឺជិតខាងក្នុងសាលជាមួយគ្នាទេ គឺអាចឆ្លងទៅបុគ្គលិកសុខាភិបាល។ បើកាលណាឆ្លងទៅបុគ្គលិក គឺយើងពិបាកហើយ។ បុគ្គលិកត្រូវធ្វើចត្តាឡីស័ក ត្រូវធ្វើការព្យាបាលខ្លួនឯង នឹងអាចមានបញ្ហាខ្វះខាតកម្លាំង ឬបុគ្គលិកព្យាបាលជំងឺជូនប្រជាពលរដ្ឋ”។

ចំពោះទិន្នន័យ ឬចំនួនកុមារ ស្ត្រីមានផ្ទះពោះ/ស្ត្រីសម្រាលកូន និងអាព្យាបាលរបស់កុមារ ដែលឆ្លងកូវីដ-១៩ ហើយត្រូវបានព្យាបាលនៅមន្ទីរគន្ធនោះ ត្រូវបានលោកសាស្ត្រាចារ្យ គី សង់ទី ឱ្យដឹងថា តាមគោការណ៍គឺខាងមន្ទីរពេទ្យបានបញ្ជូនទៅ ក្រសួងសុខាភិបាល និងនាយកដ្ឋានប្រយុទ្ធប្រឆាំងជំងឺឆ្លង ជាអ្នកត្រួតពិនិត្យ និងតាមដាន ផ្សព្វផ្សាយ។

គួររំលឹកថា នៅក្នុងខែមិថុនា ឆ្នាំ២០២១នេះ មានកុមារដែលមានស្ថានភាពជំងឺផ្សេងៗគ្នាសរុបជាង២៥,០០០នាក់ និងស្រ្តីមានផ្ទៃពោះ  ព្រមទាំងស្រីសម្រាលកូន សរុបជាង៥,០០០នាក់ បានទទួលព្យាបាលនៅ មន្ទីរពេទ្យគន្ធបុប្ផាភ្នំពេញ និងសៀមរាប៕

អត្ថបទ៖ ច័ន្ទ វីរៈ

The post ទន្ទឹមមានការបារម្ភពេលឈឺ មានការមិនទទួលអ្នកជំងឺ តើមន្ទីរពេទ្យកុមារគន្ធបុប្ផាបែបណាដែរ? appeared first on Kampuchea Thmey Daily.