តាមរយៈទំព័រហ្វេសបុកផេកផ្លូវការនៅព្រឹកព្រលឹមថ្ងៃអង្គារ ទី២៦ ឧសភានេះ លោក គួច ចំរើន បានសរសេររៀបរាប់ថា «ខេត្ត​កណ្ដាល​ ខ្មែរ​ស្នេហា​ជាតិ​ណា​ ផ្ដល់​ព័ត៌មាន​ជា​សម្ងាត់​ដល់យេីងខ្ញុំ​ អំពើ​ទីតាំង​ និង​ការ​ប្រព្រឹត្តិ​ Scam Online ក្នុង​ខេត្ត​កណ្ដាល​ ឈានទៅបង្ក្រាបបាន​ ខ្ញុំបាទ​ ជូន​រង្វាន់​ ២​លានរៀល​ និង​រក្សា​ការ​សម្ងាត់​ជូន​»។

សម្ដេចតេជោ ហ៊ុន សែន ប្រមុខរដ្ឋស្ដីទីនៃព្រះរាជណាចក្រកម្ពុជា ក្នុងពិធីអញ្ជើញជួបសំណេះសំណាលជាមួយថ្នាក់ដឹកនាំក្រសួង ស្ថាប័ន និងក្រុមប្រឹក្សារាជធានី ខណ្ឌ សង្កាត់ មន្ទីរអង្គភាពនានា ជុំវិញរដ្ឋបាលរាជធានីភ្នំពេញ កាលពីព្រឹកថ្ងៃអាទិត្យ ទី២៤ ខែឧសភា សម្ដេចបានព្រមានដល់អ្នកជាប់ពាក់ព័ន្ធក្នុងបទល្មើសឆបោកតាមប្រព័ន្ធបច្ចេកវិទ្យា (Scam Online) ឬមិនអនុវត្តច្បាប់តាមបទបញ្ជារបស់រាជរដ្ឋាភិបាលកម្ពុជា មិនត្រូវលើកលែងឡើយ។

សម្ដេចប្រមុខរដ្ឋស្តីទី មានប្រសាសន៍ថា៖ «គ្មានការយោគយល់ណាមួយដែលអាចធ្វើទៅរួច នៅពេលដែលអ្នកឯងមិនព្រមធ្វើ ឬក៏ចូលពាក់ព័ន្ធ(បទល្មើសឆបោកតាមប្រព័ន្ធបច្ចេកវិទ្យា) កុំថាខ្ញុំជាកូនមេដឹកនាំដែលបានតស៊ូច្រើនឆ្នាំ កុំនិយាយថាខ្ញុំបានបូជាជីវិតសម្រាប់គណបក្សអស់រយៈពេលច្រើនឆ្នាំ កុំនិយាយថាខ្ញុំបានបម្រើជាតិអស់រយៈពេលប៉ុន្មានឆ្នាំ អត់ទេ ឯងយកស្រោមរបស់មន្រ្តីរដ្ឋ យកទៅប្រព្រឹត្តបទល្មើស ឬយកស្រោមមន្រ្តីរដ្ឋ ទៅកាន់នៅទីកន្លែងមួយដែលអ្នកឯងមិនព្រមចេញបញ្ជា ឬចេញធ្វើសកម្មភាព»។

តាមរបាយការណ៍របស់អគ្គស្នងការដ្ឋាននគរបាលជាតិ គិតចាប់ពីថ្ងៃទី១ ដល់ថ្ងៃទី២២ ខែឧសភា ឆ្នាំ២០២៦ ពោលគឺក្នុងរយៈពេល៣សប្ដាហ៍ ក្នុងខែឧសភា សមត្ថកិច្ចកម្ពុជា បានបង្រ្កាបបទល្មើសឆបោកតាមប្រព័ន្ធបច្ចេកវិទ្យាចំនួន៥០ទីតាំង ដោយឃាត់ខ្លួនបានអ្នកពាក់ព័ន្ធប្រមាណ៣ ៣២០នាក់ ស្មើនឹង៣២សញ្ជាតិ។

តាមរយៈសេចក្ដីប្រកាសព័ត៌មានកាលពីថ្ងៃទី២៤ ខែឧសភា អគ្គស្នងការដ្ឋាននគរបាលជាតិ បានឱ្យដឹងថា ក្នុងចំណោមអ្នកទាំងនោះមានមនុស្សចំនួន៩៦នាក់ ស្មើនឹង៦សញ្ជាតិ ត្រូវបានកសាងសំណុំរឿងបញ្ជូនទៅតុលាការ និង១ ០៣០នាក់ ស្មើនឹង១៦សញ្ជាតិ ត្រូវបានបណ្តេញចេញពីប្រទេសកម្ពុជា និងក្នុងនោះសាមីជន បានស្នើសុំត្រឡប់ទៅប្រទេសកំណើតវិញចំនួន៤៥នាក់ ស្មើនឹង៨សញ្ជាតិ ខណៈកំពុងបន្តនីតិវិធីនៅតាមស្នងការដ្ឋាននគរបាលរាជធានីខេត្តចំនួន១ ៥៩០នាក់ ស្មើនឹង១៦សញ្ជាតិ។ រីឯមនុស្ស៥៥៩នាក់ផ្សេងទៀត ធ្វើការអប់រំបុគ្គល ដោយសារមិនជាប់ពាក់ព័ន្ធ។

ក្នុងប្រតិបត្តិការដ៏ក្តៅគគុកនេះ បានធ្វើឱ្យក្រុមជនឆបោកតាមប្រព័ន្ធបច្ចេកវិទ្យាមួយចំនួនរត់គេចទៅសម្ងំលាក់ខ្លួននៅទីកន្លែងនានាក្នុងប្រទេស និងមួយចំនួនទៀតបានចាកចេញពីប្រទេសកម្ពុជា ហើយព្យាយាមបន្តប្រតិបត្តិការឆបោកនៅតាមប្រទេសក្នុងតំបន់មួយចំនួនទៀត៕

អត្ថបទ៖ សុខុម

The post អភិបាលខេត្តកណ្ដាល ប្រកាសផ្ដល់ប្រាក់រង្វាន់ ២លានរៀលដល់ជនណាដែលផ្ដល់ព័ត៌មានពីទីតាំង​ប្រព្រឹត្តិ​បទល្មើស Online Scam appeared first on Kampuchea Thmey Daily.

លោកអភិបាលខេត្តកណ្ដាល បន្តថា៖ ក្រុមគ្រួសារវីរៈកងទ័ព បានលះបង់សាច់ញាតិ ពិសេសប្ដី ដែលនេះគឺជាការលះបង់មួយដ៏ធំធេង ហើយការលំបាករបស់កងទ័ពជួរមុខរបស់យើង គឺមានតែក្រុមគ្រួសារផ្ទាល់ទេ ដែលដឹងច្បាស់អំពីសុខទុក្ខរបស់ពួកគាត់ សម្រាប់ប្រជាពលរដ្ឋដែលមិនមានសាច់ញាតិជាកងទ័ពជួរជួរមុខ បានត្រឹមដឹងសុខទុក្ខតាមរយៈការបង្ហាញដោយសារព័ត៌មាន ឬវីដេអូសកម្មភាពផ្សេងៗ ដូចនេះមានតែក្រុមគ្រួសារវីរៈកងទ័ពជួរមុខនោះទេ ដែលមានការឈឺចាប់ខ្លាំងជាងបងប្អូនរបស់យើងផ្សេងទៀត ព្រោះថាការរំលោភបំពានទឹកដីពីសំណាក់យោធាថៃ និងការធ្វើឱ្យវីរៈកងទ័ពរបស់យើងទទួលរងគ្រោះថ្នាក់ផ្សេងៗ ដែលធ្វើឱ្យយើងជាក្រុមគ្រួសារវីរៈកងទ័ពជួបមុខ មានការឈឺចាប់បំផុត។

ដូច្នេះហើយទើបរាជរដ្ឋាភិបាលតែងតែណែនាំដល់អាជ្ញាធរគ្រប់លំដាប់ថ្នាក់ ត្រូវយកចិត្តទុកដាក់ចំពោះសុខទុក្ខរបស់គ្រួសារកងទ័ពជួរមុខនៅក្នុងមូលដ្ឋានរបស់ខ្លួន ដើម្បីឱ្យវីរៈកងទ័ពរបស់យើងដែលកំពុងឈរជើងការពារបូរណភាពទឹកដី នៅតាមខ្សែបន្ទាត់ព្រំដែនមានអារម្មណ៍ស្ងប់ ព្រោះថាក្រុមគ្រួសាររបស់គាត់ត្រូវបានយកចិត្តទុកដាក់ មើលការខុសត្រូវ និងមិនបោះបង់ពួកគាត់ចោលឡើយ នោះធ្វើអោយស្មារតីក្នុងការការពារបូរណភាពទឹកដីរបស់យើង កាន់តែអង់អាចក្លាហាន មោះមុត ក្នុងការការពារបូរណភាពទឹកដី។

ជាមួយគ្នានេះដែរឯកឧត្តម គួច ចំរើន អភិបាលខេត្តកណ្ដាល បាននាំនូវការផ្ដាំផ្ញើ សាកសួរសុខទុក្ខ ពីសំណាក់សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្ដេចគតិព្រឹទ្ធបណ្ឌិត ព្រមទាំងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ដោយក្ដីនឹករលឹកបំផុត។

ក្នុងឱកាសនោះដែរ លោកអភិបាលខេត្តកណ្ដាល ក៏បានជម្រាបជូនដល់ក្រុមគ្រួសារវីរៈកងទ័ពជួរមុខ នៅពេលជួបបញ្ហាប្រឈម សំណូមពរ សូមរាយការណ៍ជូនអាជ្ញាធរដែលនៅជិតបំផុត ដើម្បីពួកគាត់ជួយសម្របសម្រួល និងដោះស្រាយបានទាន់ពេលវេលា ហើយក៏សូមឱ្យមានទំនាក់ទំនងល្អជាមួយអាជ្ញាធរដែលនៅជិតខ្លួន ដើម្បីមានភាពងាយស្រួលក្នុងការផ្ដល់ព័ត៌មាន ឬតម្រូវការចាំបាច់ណាមួយដែលបងប្អូនត្រូវការ ដើម្បីឱ្យពួកគាត់បានជួយផ្ដល់សេវាឱ្យបានលឿន រហ័ស និងប្រកបដោយការទទួលខុសត្រូវខ្ពស់៕ដោយ៖ អុឹងម៉េង

The post អភិបាលខេត្តកណ្ដាល ជួបសំណេះសំណាលជាមួយក្រុមគ្រួសារវីរៈកងទ័ពជួរមុខ នៅសាលាស្រុកកៀនស្វាយ appeared first on Kampuchea Thmey Daily.

ការជំរុញ និងលើកទឹកចិត្តនេះ គឺបន្ទាប់ពីលោកអភិបាលខេត្ត កត់សម្គាល់ឃើញថា បច្ចុប្បន្ននេះបច្ចេកវិទ្យាបានក្លាយទៅជាសមរភូមិមួយផ្នែកនៅក្នុងសង្គ្រាម។ លោក គួច ចំរើន បានបញ្ជាក់ថា បច្ចេកវិទ្យាពិតជាមានការចាំបាច់ក្នុងការការពារបូរណភាពទឹកដី ដែលត្រូវតែធ្វើការហ្វឹកហាត់ និងស្វែងរកអ្នកដែលមានសមត្ថភាពចេះដឹង និងការយល់ដឹងទៅលើទេពកោសល្យខាងផ្នែកប្រព័ន្ធបច្ចេកវិទ្យានេះ។

ក្នុងពេលសំណេះសំណាល និងជូនដំណើរយោធិននៃកងរាជអាវុធហត្ថទើបជ្រើសរើសថ្មីចំនួន១៥នាក់ ដែលត្រូវចូលទៅហ្វឹកហ្វឺន នៅវិទ្យាស្ថានកងរាជអាវុធហត្ថ កំបូល នាព្រឹកថ្ងៃទី២៣ ខែមីនា ឆ្នាំ២០២៦នេះ លោកអភិបាលខេត្តកណ្ដាល បានមានប្រសាសន៍ដូច្នេះថា សូមយោធិននៃកងរាជអាវុធហត្ថទើបជ្រើសរើសថ្មីសម្រួចចិត្តនិងខិតខំប្រឹងប្រែងដើម្បីស្វែងយល់ពីបច្ចេកវិទ្យា ព្រោះសង្គ្រាមបច្ចុប្បន្ន គឺជាសមរភូមិបច្ចេកវិទ្យា ប្រសិនបើយើងមិនយល់ដឹងលើបញ្ហានោះទេ បញ្ហាគ្រោះថ្នាក់នឹងនៅជិតយើង ប៉ុន្តែនៅពេលដែលយើងយល់ដឹងពីបញ្ហាបច្ចេកវិទ្យានេះច្បាស់លាស់ យើងអាចបញ្ជៀសនូវបញ្ហានេះឱ្យចាក់ឆ្ងាយពីគ្រោះថ្នាក់បាន។

មិនត្រឹមតែប៉ុនហ្នឹង លោក បន្ថែមថា ការយល់ដឹងពីបច្ចេកវិទ្យា ក៏ថែមទាំងបង្កើតបាននូវគុណសម្បត្តិដ៏ធំធេង ដើម្បីរួមជាមួយយុទ្ធមិត្តក្នុងការប្រយុទ្ធប្រឆាំងជាមួយពួកសត្រូវចំពោះមុខឱ្យបានជោគជ័យផងដែរ។

លោក គួច ចំរើន ក៏បានផ្ដាំដល់យោធិននៃកងរាជអាវុធហត្ថទើបជ្រើសរើសថ្មី ត្រូវគោរពវិន័យឱ្យបានល្អក្នុងការហ្វឹកហាត់ដើម្បីឱ្យមានកាយសម្បទារឹងមាំ រហ័សរហួន ព្រោះបេសកកម្មស្ថិតក្នុងចំណុចក្ដៅ ក្នុងការរៀបចំសន្តិសុខ សណ្ដាប់ធ្នាប់ ជូនថ្នាក់ដឹកនាំ និងប្រជាពលរដ្ឋទូទាំងប្រទេស និងការបង្ក្រាបបទល្មើសផ្សេងៗដែលកើតមានក្នុងមូលដ្ឋានរបស់ខ្លួន៕

The post ភ្ជាប់ការហ្វឹកហាត់ អភិបាលខេត្តកណ្ដាល ជំរុញឱ្យកម្លាំងអាវុធហត្ថទើបរើសថ្មី ខិតខំស្វែងយល់ពីបច្ចេកវិទ្យា appeared first on Kampuchea Thmey Daily.

លោកបានជំរុញបែបនេះ នៅក្នុងកិច្ចប្រជុំបូកសរុបលទ្ធផលការងារប្រចាំឆ្នាំ២០២៥ និងលើកទិសដៅឆ្នាំ២០២៦ របស់សហភាពសហព័ន្ធយុវជនកម្ពុជា ខេត្តកណ្តាល នាព្រឹកថ្ងៃទី១១ ខែកុម្ភៈ ឆ្នាំ២០២៦។ ទន្ទឹមនេះ លោកបានណែនាំដល់មន្ទីរសុខាភិបាល នៃរដ្ឋបាលខេត្តកណ្ដាល មន្ទីរពេទ្យជ័យជំនះ និងមន្ទីរពេទ្យតេជោសែនកោះធំ គិតគូរៀបចំឱ្យមានប្រព័ន្ធគ្រប់គ្រងឈាមឱ្យបានល្អ ត្រូវតាមដានបរិមាណឈាមឱ្យបានជាប្រចាំ ព្រមទាំងធ្វើការផ្ទេរទៅមជ្ឈមណ្ឌលជាតិផ្តល់ឈាមនៅពេលចាំបាច់ ដើម្បីកាត់បន្ថយការខូចខាត់ធនធានឈាម ដោយសារតែឈាមអាចរក្សាទុកបានត្រឹមតែ៤ សប្តាហ៍ប៉ុណ្ណោះ។

ជាមួយគ្នានេះ លោកក៏បានលើកទឹកចិត្តដល់សមាជិកឱ្យបន្តពង្រឹងសកម្មភាពស្ម័គ្រចិត្ត ក្នុងការបម្រើសង្គមជាតិ ជាពិសេសត្រូវបន្តផ្សព្វផ្សាយ និងពង្រីកសមាជិក ស.ស.យ.ក ឱ្យបានកាន់តែច្រើនឡើងថែមទៀត សំដៅជួយគ្នាក្នុងការងារកសាងសង្គមជាតិឱ្យមានភាពរីកចម្រើន។

លោកអភិបាលខេត្ត បានបញ្ជាក់ថា «ការងាររបស់សមាជិក ស.ស.យ.ក គឺជាការងារស្ម័គ្រចិត្ត ដោយមិនមានប្រាក់ឧបត្ថម្ភ ឬប្រាក់ខែឡើយ ប៉ុន្តែជាឱកាសដ៏មានតម្លៃសម្រាប់យុវជនក្នុងការចូលរួមសកម្មភាពសង្គម និងមនុស្សធម៌ ទទួលបាននូវបទពិសោធន៍ជាក់ស្ដែងពីការងាររបស់ខ្លួន មានឱកាសទទួលបានជោគជ័យឆាប់រហ័សក្នុងជីវិត»។

ក្នុងឱកាសនោះដែរ លោកអភិបាលខេត្ត បានកោតសរសើរចំពោះ ថ្នាក់ដឹកនាំ ព្រមទាំងសមាជិកសមាជិកាសហភាពសហព័ន្ធយុវជនកម្ពុជា ខេត្តកណ្តាល (ស.ស.យ.ក) ទាំងអស់ដែលបានខិតខំបំពេញការងារស្នូលរបស់ខ្លួន ក្នុងការបម្រើកិច្ចការសង្គម និងការងារស្ម័គ្រចិត្តនានាទទួលបានលទ្ធផលយ៉ាងល្អប្រសើរ៕

The post ប្រធាន ស.ស.យ.ក ខេត្តកណ្តាល ជំរុញទឹកចិត្តដល់សមាជិក បន្តចូលរួមបរិច្ចឈាមស្ម័គ្រចិត្តឱ្យបានទៀងទាត់ appeared first on Kampuchea Thmey Daily.

លោកអភិបាលខេត្ត អំពាវនាវដល់ប្រជាពលរដ្ឋសិស្សានុសិស្ស អាជ្ញាធរគ្រប់ថ្នាក់ មន្ទីរពាក់ព័ន្ធ និងដៃគូអភិវឌ្ឍន៍ទាំងអស់សូមបន្តខិតខំ និងការប្តេជ្ញាចិត្តខ្ពស់ចេញជាសកម្មភាព ក្នុងការថែរក្សាសម្អាតបរិស្ថាន ក្នុងមូលដ្ឋានឱ្យបានស្អាតជានិច្ច ដើម្បីបរិស្ថានល្អ មានសេចក្តីសុខក្នុងការរស់នៅ ទទួលបានសុខភាពល្អ និងអាយុវែង។

លោកអភិបាលខេត្ត បានបញ្ជាក់ថា ការចូលរួមសម្អាតបរិស្ថានរបស់យើងទាំងអស់គ្នា គឺពិតជាមានសារៈសំខាន់ណាស់ ពីព្រោះសំរាមបានកើតឡើងដោយសារមនុស្ស ហើយបើមនុស្សគ្រប់រូបគ្មានការយល់ដឹងអំពីផលប៉ះពាល់ នៃសំរាមទាំងកាកសំណល់រឹងរាវ និងមិនបានចូលរួមក្នុងការគ្រប់គ្រងសំរាមនោះទេវានឹងបង្ករផលប៉ះពាល់យ៉ាងខ្លាំងដល់បរិស្ថាន និងការរស់នៅរបស់យើងជាក់ជាមិនខាន។ ជាពិសេសគឺសំណល់ប្លាស្ទិក ដែលមិនរលាយហើយកង្កជាតិពុលចំពោះបរិស្ថាន ដែលទាមទារឱ្យយើងទាំងអស់គ្នាត្រូវចេះគ្រប់គ្រងទុកដាក់សំរាមទាំងនោះឱ្យបានត្រឹមត្រូវ និងត្រូវចេះកែច្នៃសំណល់ប្លាស្ទិកទាំងនោះមកប្រើប្រាស់ឡើងវិញទើបជាការប្រសើរ ចំនេញទាំងសេដ្ឋកិច្ច និងបរិស្ថានស្អាត។

លោក គួច ចំរើន បានបញ្ជាក់បន្តថា ប្រទេសកម្ពុជាបានផ្តោតលើការរួមគ្នាដើម្បី “ស្អាតទឹក ស្អាតដី ស្អាតខ្យល់” ដែលជាវត្ថុបំណងរបស់យុទ្ធនាការ «កម្ពុជាស្អាត ខ្មែរធ្វើបាន» និងយុទ្ធសាស្រ្តចក្រាវិស័យបរិស្ថាន ព្រមទាំងស្របតាមគោលនយោបាយ «ភូមិ-ឃុំ-សង្កាត់ មានសុវត្ថិភាព» របស់រាជរដ្ឋាភិបាលកម្ពុជាផងដែរ។ ក្រៅពីការប្រារព្ធទិវាសម្អាតពិភពលោកនៅទីនេះ រដ្ឋបាល ខេត្តកណ្តាល ក៏បាននិងកំពុងរៀបចំទិវាតាមភូមិ ឃុំ-ស្រុក ទូទាំងខេត្ត និងចូលរួមជាមួយបណ្តាខេត្តផ្សេងៗ ដើម្បីរក្សានូវកិត្តិនាមរបស់ប្រទេសកម្ពុជា ដែលជាប់ចំណាត់ថ្នាក់ទី៣ ឈានមុខគេ ក្នុងចំណោម ១៩១ ប្រទេសដែលបានចូលរួមទិវានេះ កាលពីឆ្នាំ២០២៤ កន្លងទៅ។

លោកអភិបាលខេត្ត បានបន្ថែមថា ក្នុងរយៈពេលជាង ២៥ខែ នៃការអនុវត្តយុទ្ធសាស្ត្របញ្ចកោណ ដំណាក់កាលទី១ រដ្ឋបាលខេត្ត រដ្ឋបាលក្រុង-ស្រុក និងមន្ទីរ-អង្គភាពជុំវិញខេត្ត បានខិតខំធ្វើការអភិវឌ្ឍ ហេដ្ឋារចនាសម្ព័ន្ធរូបវន្តសំខាន់ៗ ធ្វើឱ្យខេត្តមានការប្រែប្រួលមុខមាត់ថ្មី និងរីកចម្រើន យ៉ាងឆាប់រហ័សលើគ្រប់វិស័យ ប្រកបដោយសោភណភាព និងបរិស្ថានបៃតង ក្នុងនោះ រួមមានការស្តារ និងអភិវឌ្ឍហេដ្ឋារចនាសម្ព័ន្ធ ការកែលម្អប្រព័ន្ធផ្លូវថ្នល់ ប្រព័ន្ធប្រឡាយ-លូ បណ្តាញទឹកស្អាត បណ្តាញអគ្គិសនី ភ្លើងបំភ្លឺសាធារណៈ ការកែលម្អលំហបៃតង សាធារណៈ និងសួនច្បារតាមមាត់ស្ទឹង-ទន្លេ ព្រមទាំងពង្រឹងការគ្រប់គ្រងសំណល់ រឹង-រាវគ្រប់ប្រភេទ។ ជាពិសេសទៀតនោះ សំណល់ប្លាស្ទិកប្រមាណជាង ៩០០ តោន ទើបត្រូវបាន ប្រមូលចេញពីទន្លេសាប ទន្លេមេគង្គ និងទន្លេបាសាក់ ក្នុងភូមិសាស្ត្រខេត្តកណ្តាល ហើយថ្ងៃនេះ យើងនឹងបន្តប្រមូលសំរាមនៅទីនេះជាមួយគ្នា រហូតខេត្តកណ្តាលស្អាត គ្មានសំណល់ប្លាស្ទិកក្នុងទន្លេ នៅតាមភូមិ ឃុំ-សង្កាត់ ក្រុង-ស្រុក ក្នុងខេត្តរបស់យើង ៕

អត្ថបទ៖ ម៉េង

The post លោក គួច ចំរើន៖ សំណល់ប្លាស្ទិកជាង ៩០០តោនត្រូវបានប្រមូលចេញពីទន្លេសាប ទន្លេមេគង្គ និងទន្លេបាសាក់ ក្នុងភូមិសាស្ត្រខេត្តកណ្តាល appeared first on Kampuchea Thmey Daily.

អភិបាលខេត្តកណ្ដាល លោក គួច ចំរើន បានលើកឡើងដូច្នេះនៅក្នុងឱកាសអញ្ជើញជាអធិបតីពិធីប្រកាសចូលកាន់មុខតំណែងអភិបាលរងក្រុងតាខ្មៅ នាព្រឹកថ្ងៃទី១៥ ខែកញ្ញា ឆ្នាំ២០២៥ នៅសាលាក្រុងតាខ្មៅ។

បើតាមលោក គួច ចំរើន គិតដល់ពេលនេះ ប្រជាពលរដ្ឋដែលបានស្លាប់ដោយគ្រោះថ្នាក់ចរាចរណ៍សម្រាប់ខេត្តកណ្ដាលមានចំនួន៦៤នាក់ បើប្រៀបធៀបទៅនឹងឆ្នាំ២០២៤ មានប្រជាពលរដ្ឋបានស្លាប់ដោយគ្រោះថ្នាក់ចរាចរណ៍ប្រមាណជាង ១០០នាក់។

អត្រាចុះថយក្នុងការស្លាប់ដោយគ្រោះថ្នាក់ចរាចរណ៍នេះ លោកអភិបាលខេត្តគូសបញ្ជាក់ថា ដោយមានការចូលរួមអនុវត្តបានយ៉ាងខ្ជាប់ខ្ជួនរបស់កងកម្លាំងមានសមត្ថកិច្ច អាជ្ញាធរពាក់ព័ន្ធ និងពិសេសប្រជាពលរដ្ឋបានចូលរួមគោរព និងអនុវត្តច្បាប់ចរាចរណ៍បានយ៉ាងល្អប្រសើរ ដែលធ្វើឱ្យចំនួនអ្នកស្លាប់មានការថយចុះ។

បើទោះជាមានការថយចុះយ៉ាងក៏ពិតមែន តែលោកអភិបាលខេត្ត ថា គ្រោះថ្នាក់ចរាចរណ៍នៅតែបានឆក់យកអាយុជីវិតរបស់ប្រជាពលរដ្ឋក្នុងខេត្តកណ្ដាល បើធៀបជាមួយសង្គ្រាមរវាងកម្ពុជា និងថៃ ពេលកន្លងមក មានការស្លាប់ច្រើនជាងសង្គ្រាមទៀត។ ក្នុងន័យនេះ លោក គួច ចំរើន បានណែនាំឱ្យកងកម្លាំង អាជ្ញាធរពាក់ព័ន្ធ ត្រូវបន្តខិតខំយកចិត្តទុកដាក់ក្នុងការអប់រំ និងផ្សព្វផ្សាយឱ្យបានទូលំទូលាយដល់ប្រជាពលរដ្ឋជាប្រចាំ ដើម្បីរូមគ្នាបង្ការ ទប់ស្កាត់ បញ្ជៀសការស្លាប់ និងរបួសដោយគ្រោះថ្នាក់ចរាចរណ៍ឱ្យបាននៅទាបបំផុត តាមដែលអាចធ្វើទៅបាន៕

The post អភិបាលខេត្តកណ្ដាលនៅតែបារម្ភ បើទោះអ្នកស្លាប់ដោយគ្រោះថ្នាក់ចរាចរណ៍ថយចុះ appeared first on Kampuchea Thmey Daily.

ក្នុងពិធីសំណេះសំណាលជាមួយគ្រួសារកងកម្លាំងប្រដាប់អាវុធក្នុងខេត្តកណ្តាល ដែលសាមីអង្គភាពបញ្ជូនទៅសមរភូមិមុខ កាលពីថ្ងៃទី១៤ ខែកញ្ញា លោក គួច ចំរើន បានណែនាំឱ្យអាជ្ញាធរ និងមន្ទីរអង្គភាពពាក់ព័ន្ធទាំងអស់ ត្រូវចិត្តទុកបញ្ហាប្រឈម និងសំណូមពររបស់គ្រួសារវីរកងទ័ពជើងមុខ នៅក្នុងមូលដ្ឋានរបស់ខ្លួន គឺជាការងារអាទិភាពមួយ ក្នុងការសម្របសម្រួល ដោះស្រាយ ដោយអនុវត្តទៅតាមច្បាប់ និងលិខិតបទដ្ឋានគតិយុត្តិ ប្រកបដោយការទទួលខុសត្រូវខ្ពស់ ។ លោកបញ្ជាក់ថា៖«បងប្អូនវីរកងទ័ពដ៏អង់អាចក្លាហានរបស់យើង បានកំពុងឈរជើងការពារបូរណភាពទឹកដីតាមខ្សែបន្ទាត់ព្រំដែនយ៉ាងស្វាហាប់ ក្នុងនាមយើងជាអ្នកនៅសមរភូមិក្រោយ នៅចាំជួយជាកម្លាំងរួបរួមសាមគ្គីក្នុងការចូលរួមការពារអធិបតេយ្យជាតិ»។

ក្នុងន័យនេះ លោកបញ្ជាក់ថា ការជួយនៅពីក្រោយគឺជាកម្លាំងដ៏សំខាន់មួយក្នុងការគាំទ្រកងកម្លាំងប្រដាប់អាវុធនៅសមរភូមិមុខ ដោយមិនឱ្យកងកម្លាំងប្រដាប់អាវុធនៅសមរភូមិមមុខ នៅឯកោទេ ពោលគឺមានតែទទួលបានការគោរព ដឹងគុណនូវមនោសញ្ចេតនាដ៏ជ្រាលជ្រៅ និងគិតគូរយកចិត្តទុកដាក់ដល់ក្រុមគ្រួសារវីរកងទ័ពរបស់យើង អោយទទួលបានភាពកក់ក្តៅ ដើម្បីជាកម្លាំងចិត្តដល់កងទ័ពនៅសមរភូមិមុខ។

នៅចំពោះមុខក្រុមគ្រួសារកងទ័ព លោកបានកោតសរសើរចំពោះវីរភាពដ៏អង់អាចក្លាហានរបស់កងទ័ពកម្ពុជាដែលបានយកអស់កម្លាំងកាយចិត្តលះបង់ការពារ អធិបតេយ្យភាពបូរណភាពទឹកដីកម្ពុជា មិនឱ្យចោរសៀមឈ្លានពានបានឡើយ។ បន្ថែមពីនេះ លោកបានថ្លែងអំណរគុណ និងដឹងគុណយ៉ាងជ្រាលជ្រៅចំពោះ អ៊ុំ ពូមីង បងប្អូន ក្រុមគ្រួសារវីរកងទ័ពទាំងអស់ ដែលបានលះបង់ប្ដី ឪពុក បងប្អូន កូនក្មួយ ប្រឆាំងសត្រូវឈ្លានពាននៅសមរភូមិមុខ ហើយយើងទាំងអស់គ្នា នៅសមរភូមិក្រោយ នឹងធ្វើជាកម្លាំងចលករ ជំរុញអ្នកនៅសមរភូមិមុខ តាមរយៈការលើកទឹកចិត្ត ផ្ដល់សម្ភារ ស្បៀងអាហារ​ជូនទៅសមរភូមិមុខ ជាពិសេស យកចិត្តទុកដាក់ដល់ក្រុមគ្រួសារវីរកងទ័ពគ្រប់បែបយ៉ាង។

លើសពីនេះ លោក អភិបាលខេត្តកណ្តាល បានជំរុញឱ្យមន្ទីរជំនាញ និងអាជ្ញាធរមូលដ្ឋានផ្ដល់ការយកចិត្តទុកដាក់ចំពោះពលករខ្មែរ ដែលទើបត្រឡប់មកពីប្រទេសថៃ ដោយត្រូវខិតខំជួយស្វែងរកការងារធ្វើជូនពួកគាត់តាមជំនាញដើម្បីបានប្រាក់ផ្គត់ផ្គង់ក្រុមគ្រួសារ។ ក្នុងនោះដែរ រដ្ឋបាលខេត្តកណ្ដាល បានឧបត្ថម្ភនូវគ្រួសារវីរកងទ័ពដែលមកសំណេះសំណាលនាឱកាសនោះដែរ ដោយក្នុងម្នាក់ៗទទួលបាន អង្ករ ២៥ គីឡូក្រាម, ទឹកសុទ្ធ ១កេស, មី ១ កេស, ទឹកត្រី ១ យួរ, ទឹកស៊ីវ ១យួរ, ប្រេងឆា ១ ដប, ប្រហុក ១ គីឡូក្រាម និងថវិកា ១០ ម៉ឺនរៀល៕

The post អភិបាលខេត្តកណ្តាល ណែនាំអាជ្ញាធរយកចិត្តទុកដាក់ដោះស្រាយបញ្ហាប្រឈមគ្រួសារវីរកងទ័ពជួរមុខ appeared first on Kampuchea Thmey Daily.

ក្នុង​ការ​ចុះ​ត្រួតពិនិត្យ​វឌ្ឍនភាព​គម្រោង​ដាក់​លូ​រំដោះ​ទឹកភ្លៀង​នៅតាម​បណ្តោយ​ផ្លូវ​លេខ ​១០៨ និង​ផ្លូវជាតិ​លេខ​ ២១A ស្ថិតនៅ​ក្រុង​តាខ្មៅ ខេត្តកណ្ដាល លោក​អភិបាល​ បាន​ណែនាំ​ដល់​ក្រុមការងារ​បច្ចេកទេស​សាងសង់​ប្រព័ន្ធ​លូ ពន្លឿន​ការសាងសង់​ឱ្យ​រួចរាល់​មុន​ការប្រឡង​សញ្ញាបត្រ​មធ្យម​សិក្សា​ទុតិយភូមិ ដែល​នឹង​ប្រព្រឹត្តទៅ​នៅ​ថ្ងៃទី ​២៨ ខែសីហា ឆ្នាំ​ ២០២៥ ​នេះ ដើម្បី​ជួយ​រំដោះ​ទឹក​ភ្លៀង​មិន​ឱ្យ​លិច​នៅ​មណ្ឌល​ប្រឡង ដែល​បង្ក​ឱ្យ​មាន​ការ​លំបាក ប៉ះពាល់​ដល់​អារម្មណ៍​របស់​សិស្សានុ​សិស្ស​ត្រូវ​មក​ប្រលង។

លោក​អភិបាល​ បាន​បន្តថា ជា​រៀងរាល់ឆ្នាំ​ ក្នុង​តំបន់​នេះ នា​រដូវវស្សា​ម្ដងៗ តែងតែ​រង​នូវ​ការ​ជន់​លិច​ដោយ​ជំនន់​ទឹកភ្លៀង ពិសេស​វិទ្យាល័យ ហ៊ុន សែន តាខ្មៅ និង​ វិទ្យាល័យ ហ៊ុន សែន សេរីភាព ដែល​ជា​មណ្ឌល​ប្រលង​សញ្ញាបត្រ​មធ្យម​ទុតិយភូមិ តែងតែ​រង​ការ​ជន់​លិច និង​បង្ក​ផលវិបាក​ដល់​សិស្សានុសិស្ស​ពេល​ប្រឡង ពិសេស​បានធ្វើឱ្យ​ប្រជាពលរដ្ឋ​នៅ​តំបន់​នេះ​ជួប​ការលំបាក​ក្នុងការ​ធ្វើ​ដំណើរ ខូចខាត​សម្ភារៈ​ពេល​ទឹក​ជន់​លិច និង​ពេល​មាន​ភ្លៀង​ខ្លាំង​ម្ដងៗ ដូច្នេះ​ក្រុមការងារ​បច្ចេកទេស​ដែល​កំពុង​អនុវត្ត​គម្រោង ក្នុងការ​សាងសង់​ប្រព័ន្ធ​រំដោះ​ទឹកភ្លៀង សូម​ពន្លឿន​ការ​សាងសង់​ឱ្យ​បាន​លឿន​ និង​ត្រូវ​រួចរាល់​មុន​ការ​ប្រលង​សញ្ញាបត្រ​មធ្យមសិក្សា​ទុតិយភូមិ​នៅ​ឆ្នាំនេះ ប្រកប​ដោយ​ស្តង់ដារ​បច្ចេកទេស ដើម្បី​ធានា​ឱ្យ​ប្រព័ន្ធ​លូ​រំដោះ​ទឹក​នេះ បាន​រំដោះ​ទឹកភ្លៀង​ បញ្ចៀស​ការ​ជន់​លិច កាត់បន្ថយ​ការ​លំបាក​របស់​សិស្សានុសិស្ស និង​ពលរដ្ឋ​នៅ​តំបន់​នេះ​ផង​ដែរ។

តាម​ការ​បញ្ជាក់​របស់​ក្រុមការងារ​អនុវត្ត​គម្រោង ​លូ​រំដោះ​ទឹកភ្លៀង​នេះ មាន​ប្រវែង​ ៧៩០​ ម៉ែត្រ ដោយ​បាន​ដាក់​លូ​ជ្រុង​ទំហំ ២ ​ម៉ែត្រ x២​ ម៉ែត្រ ដែលមាន​សមត្ថភាព​អាច​រំដោះ​ទឹកភ្លៀង​បាន​ពី ៥០០០​ ម៉ែត្រគូប ទៅ​ ៦០០០ ​ម៉ែត្រគូប ក្នុង​ ១ ​ម៉ោង ហើយ​នៅពេល​គម្រោង​នេះ​អនុវត្ត​រួច តំបន់​នេះ នឹង​លែង​មាន​ការ​ជន់​លិច​ដោយ​ជំនន់​ទឹកភ្លៀង​ទៀតហើយ។

ជាមួយ​គ្នា​នេះ​ដែរ លោក​អភិបាល​ខេត្ត​កណ្ដាល បាន​សូម​ការ​យោគយល់​អធ្យាស្រ័យ​ពី​ប្រជាពលរដ្ឋ​នៅ​ក្នុង​ក្រុង​តាខ្មៅ ក៏ដូចជា​អ្នក​ធ្វើដំណើរ​ឆ្លងកាត់​អំឡុង​ពេល​អនុវត្ត​គម្រោង​ដែល​ធ្វើ​ឱ្យ​ប៉ះពាល់​ដល់​ការ​ធ្វើដំណើរ ការ​ប្រកប​របរ​ចិញ្ចឹមជីវិត បង្ក​ការ​រំខាន​ដល់​ការ​រស់នៅ ប៉ុន្តែ​ពេល​គម្រោង​នេះ​អនុវត្ត​រួចរាល់ តំបន់​នេះ​ អាច​នឹង​ជៀស​ផុត​ការ​ជន់​លិច​ដោយ​ទឹកភ្លៀង​តែងតែ​លិច​ជា​រៀងរាល់​ឆ្នាំ៕

អត្ថបទ ៖ ម៉េង

The post អភិបាលខេត្តកណ្ដាល ចុះពិនិត្យក្រុមការងារបច្ចេកទេសសង់ប្រព័ន្ធលូរំដោះទឹកភ្លៀង នៅក្រុងតាខ្មៅ ដើម្បីពន្លឿនការសាងសង់ឱ្យរួចរាល់មុនប្រឡងបាក់ឌុប appeared first on Kampuchea Thmey Daily.