អ្នកនាំពាក្យកងទ័ពជើងទឹកថៃ លោកឧត្តមនាវីត្រី ប៉ារ៉ាច រតនាឆាយាផាន នាពេលថ្មីៗនេះ បាននិយាយថា កងទ័ពជើងទឹកភូមិន្ទថៃ នឹងឆ្លើយតបដោយកម្លាំងយោធា ប្រសិនបើរកឃើញថា មានកងទ័ពកម្ពុជាបានឆ្លងចូលក្នុងទឹកដីថៃ បន្ទាប់ពីទង់ជាតិថៃមួយបានបាត់ពីដងទង់ជាតិ ក្នុងតំបន់ព្រំដែនយុទ្ធសាស្ត្ររាងក្រចកសេះ នៅភូមិផាកខាត។ សេចក្តីថ្លែងការណ៍ជាសាធារណៈ ដែលលោក ឆាំង យុ ហៅថា ជាសម្ដីដ៏ក្អេងក្អាងរបស់កងទ័ពថៃនេះ គឺមិនត្រឹមតែជារឿងដែលគួរឱ្យអស់សំណើចតែប៉ុណ្ណោះទេ ប៉ុន្តែក៏ជាទង្វើពោរពេញទៅដោយពុតត្បុតថែមទៀតផង។

លោក ឆាំង យុ បានលើកឡើងតាមរយៈសំណេរនាថ្ងៃទី២១ ខែមេសា ថា កងទ័ពថៃហាក់មើលមិនឃើញពីភាពពុតត្បុតរបស់ខ្លួន ក្នុងការទាមទារកាន់កាប់លើទីតាំងព្រំដែនជាទីសក្ការរបស់ប្រទេសដទៃ ខណៈពេលដែលខ្លួនកំពុងតែកាន់កាប់ដោយខុសច្បាប់លើដែនអធិបតេយ្យភាពរបស់ភាគីដែលខ្លួនកំពុងចោទប្រកាន់។ លោក បានសម្ដែងនូវការអស់សំណើច និងហួសចិត្តចំពោះការបង្កទៅជាការខឹងសម្បាររបស់កងទ័ពថៃនេះ គឺគ្រាន់ផ្អែកទៅលើជំនឿរបស់ខ្លួនថាទង់ជាតិថៃមួយផ្ទាំងបានបាត់ទៅតែប៉ុណ្ណោះ។

លោក ឆាំង យុ បានពណ៌នាបែបឌឺដងឱ្យថៃ ថា ថ្ងៃនេះបាត់ទង់ជាតិ ប្រហែលជាថ្ងៃស្អែក អាចមានការបាត់ដើមឈើមួយដើម ឬវត្ថុបុរាណប្លែកៗផ្សេងទៀតចេញពីដែនអធិបតេយ្យភាពរបស់ថៃ ដែលអាចត្រូវប្រើប្រាស់ធ្វើជាលេសស្របច្បាប់ ដើម្បីបង្កឱ្យមានជម្លោះប្រដាប់អាវុធទ្រង់ទ្រាយធំរវាងប្រទេសទាំងពីរក៏ថាបាន។

លោកបានលើកពីភាពផ្ទុយគ្នារវាងកម្ពុជា និងថៃ ដោយខណៈពេលកងទ័ពថៃកំពុងស៊ើបអង្កេតទៅលើកាលៈទេសៈគួរឱ្យសង្ស័យជុំវិញការបាត់ទង់ជាតិដ៏អាថ៌កំបាំងរបស់ខ្លួន និងកំពុងស្វែងរកលទ្ធភាពប្រើប្រាស់កម្លាំងយោធា ជាការឆ្លើយតបនោះ តែសម្រាប់រាជរដ្ឋាភិបាលកម្ពុជា លោកថា នៅតែបន្តបង្ហាញនូវជំហរដ៏ម៉ឺងម៉ាត់ និងមានភាពចាស់ទុំជាងមុនក្នុងការដោះស្រាយវិវាទព្រំដែន តាមរយៈវិធានការទូតដោយសន្តិវិធី។

ក្នុងន័យនេះ លោក ឆាំង យុ បានបង្ហាញក្ដីសង្ឃឹមថា ភាពម៉ឺងម៉ាត់ ភាពចាស់ទុំ និងសន្តិភាព នឹងទទួលបានជ័យជម្នះជាស្ថាពរលើការសម្តែងការខឹងសម្បារខុសរឿង ក្នុងកាលៈទេសៈទាំងនេះ៕

The post រឿងថៃបាត់ទង់ជាតិ លោក ឆាំង យុ មើលឃើញថា គ្រាន់ជាឆាកល្ខោនសម្ដែងឡើងដើម្បីបង្កជម្លោះជាមួយកម្ពុជា appeared first on Kampuchea Thmey Daily.

នាយកមជ្ឈមណ្ឌលឯកសារកម្ពុជា លោក ឆាំង យុ ថ្មីៗនេះ បានលើកឡើងថា ក្រុមអ្នកសង្កេតការណ៍អាស៊ាន (AOT) គឺត្រូវហ៊ានផ្សព្វផ្សាយទង្វើថៃឈ្លានពានមកលើកម្ពុជា និងបញ្ជាក់ឲ្យច្បាស់ថាទង្វើរបស់ថៃរំលោភបំពានលើកម្ពុជា គឺមិនគោរពដល់សហរដ្ឋអាម៉េរិក និងអាស៊ាន។

លោក ឆាំង យុ សង្កត់ធ្ងន់ដូច្នេះ៖«សកម្មភាពរំលោភបំពានគឺមិនមែនគ្រាន់តែជាការរំលោភអធិបតេយ្យភាពរបស់កម្ពុជាតែប៉ុណ្ណោះនោះទេ វាគឺជាការមិនគោរព និងគ្មានភាពអាម៉ាស់មុខចំពោះសហរដ្ឋអាម៉េរិក និងអាស៊ានថែមទៀតផង។»។

ជាការកត់សម្គាល់កន្លងមកនេះ ប្រជាពលរដ្ឋខ្មែរមួយចំនួនបានរិះគន់ពីតួនាទី និងប្រសិទ្ធភាពការងាររបស់អ្នកសង្កេតការណ៍អាស៊ាន (AOT) បន្ទាប់ពីAOTចុះទៅសង្កេត ផ្ទៀងផ្ទាត់ និងរាយការណ៍ នៅទីតាំងដែលយោធាថៃធ្វើសកម្មភាពបំពានមកលើកម្ពុជា ប៉ុន្តែមិនឃើញលទ្ធផលផ្លែផ្កាណាមួយ គឺបានត្រឹមតែទៅមើល។

គួរឱ្យដឹងថាក្រុមអ្នកសង្កេតការណ៍អាស៊ាន(AOT) ត្រូវបានចុះហត្ថលេខាដោយរដ្ឋមន្ត្រីការពារជាតិកម្ពុជា-ថៃ បង្កើតឡើងជាផ្លូវការនៅថ្ងៃទី២៣ ខែតុលា ឆ្នាំ២០២៥ ក្នុងបំណងដើម្បីផ្ទៀងផ្ទាត់ និងអនុវត្តន៍បទឈប់បាញ់ឱ្យបានពេញលេញ និងមានប្រសិទ្ធភាព  ក្រោយពីមានការប្រយុទ្ធគ្នារវាងកងកម្លាំងប្រដាប់អាវុធរវាងថៃ ជាមួយកម្ពុជា លើកទី១ កាលពីចុងខែកក្កដា ឆ្នាំ២០២៥ កន្លងទៅ។ ក្រុមអ្នកសង្កេតការណ៍អាស៊ាន បង្កើតឡើងដោយមានភាគីម៉ាឡេស៊ីជាអ្នកដឹកនាំ ហើយក្រុមនេះ មួយក្រុមមានមូលដ្ឋាននៅក្នុងប្រទេសកម្ពុជា និងមួយក្រុមទៀតមានមូលដ្ឋាននៅក្នុងប្រទេសថៃ។

ក្នុងឆ្នាំ ២០២៦ នេះ ប្រទេសហ្វីលីពីនបានក្លាយជាប្រធានអាស៊ានប្ដូរវេន ដូច្នេះភាគីកងទ័ពហ្វីលីពីនក៏មានតួនាទីជាប្រធានក្រុមដឹកនាំក្រុមអ្នកសង្កេតការណ៍អាស៊ាន(AOT) បន្តបន្តពីម៉ាឡេស៊ី។

ក្នុងជំនួបជាមួយនាយករដ្ឋមន្ត្រីកម្ពុជាកាលពីថ្ងៃទី ១២  ខែកុម្ភៈ អគ្គមេបញ្ជាការកងទ័ពហ្វីលីពីនអះអាងថាហ្វីលីពីនបានតាមដានយ៉ាងយកចិត្តទុកដាក់ចំពោះបញ្ហានេះ និងបានត្រៀមខ្លួនរួចជាស្រេចក្នុងការបន្តដឹកនាំក្រុម AOT ក្នុងគោលបំណងសម្របសម្រួលដោះស្រាយបញ្ហាព្រំដែនដោយអព្យាក្រឹត្យ សំដៅនាំមកនូវសន្តិភាព និងស្ថិរភាពយូរអង្វែងសម្រាប់កម្ពុជា-ថៃ និងតំបន់ទាំងមូលផងដែរ។

អគ្គមេបញ្ជាការកងទ័ពហ្វីលីពីន ក៏បានគូសបញ្ជាក់ពីភាពចាំបាច់ក្នុងការពិនិត្យកែសម្រួលរចនាសម្ព័ន្ធមួយចំនួនរបស់ក្រុមអ្នកសង្កេតការណ៍អាស៊ាន(AOT) ពីព្រោះហ្វីលីពីនយល់ថា អ្នកដឹកនាំ AOT គឺមានតួនាទីសំខាន់ និងការទទួលខុសត្រូវខ្ពស់៕

ដោយ/ង៉ិល ណារ៉ាត់

The post អ្នកជំនាញ៖ AOT ត្រូវហ៊ានផ្សាយទង្វើថៃឈ្លានពានកម្ពុជា និងបញ្ជាក់ឲ្យច្បាស់ថាទង្វើរបស់ថៃ គឺមិនគោរពដល់សហរដ្ឋអាម៉េរិក និងអាស៊ាន appeared first on Kampuchea Thmey Daily.

លោក ឆាំង យុ វាយតម្លៃបែបនេះ គឺបន្ទាប់ពីអ្នករាយការណ៍ពិសេសស្ដីពីស្ថានភាពសិទ្ធិមនុស្សនៅកម្ពុជា វីទិត មុនតាប៊ន  ទើបបានធ្វើសេចក្ដីថ្លែងការណ៍​ស្វាគមន៍​សេចក្ដី​ថ្លែងការណ៍​សន្ដិភាព​កម្ពុជា​ថៃ​ កាលពីថ្ងៃទី២៥ ខែវិច្ឆិកា។ កាលណោះ លោក វីទិត​មុន តាប៊ន សរសេរក្នុងសេចក្ដីថ្លែងការណ៍ថា  ​ការ​អនុវត្តន៍​មនុស្ស​ធម៌​គឺ​ជា​កត្តា​ចាំ​បាច់​ ​ដែល​ត្រូវ​កាត់​បន្ថយ​នូវ​ភាព​តាន​តឹង​ និង​ដោះស្រាយ​ជម្លោះ​ដោយ​សន្ដិវិធី​ស្របតាម​ច្បាប់​អន្តជាតិ និងថាជនស៊ីវិល​ដែល​រងផលប៉ះពាល់​ដោយ​ស្ថានការណ៍​នៅ​ព្រំដែន​គួរ​តែ​ត្រូវ​បាន​ជួយ​តាម​ស្ដង់​ដារ​សិទ្ធិ​មនុស្ស។

លោក ឆាំង យុ ពិនិត្យឃើញថា សេចក្ដីថ្លែងការណ៍របស់អ្នករាយការណ៍ពិសេសស្ដីពីស្ថានភាពសិទ្ធិមនុស្សរបៀបនេះ ជា៖«សេចក្តីថ្លែងការណ៍គ្រាន់តែរៀបរាប់ឡើងវិញនូវគោលការណ៍ជាមូលដ្ឋានរបស់អង្គការសហប្រជាជាតិ និងរបៀបដែលអង្គការសហប្រជាជាតិចង់ឱ្យប្រទេសនានាធ្វើការជាមួយគ្នាដើម្បីសម្រេចបាននូវសន្តិភាព។ សេចក្តីថ្លែងការណ៍នេះ គឺគ្មានអត្ថន័យអ្វីដើម្បីជំរុញឱ្យមានភាពរីកចម្រើនទៅដល់សន្តិភាពនោះទេ។ »។

ប្រធានមជ្ឈមណ្ឌលឯកសារកម្ពុជា មើលឃើញថា ពាក្យពេចន៍ ប្រើប្រាស់នៅក្នុងសេចក្តីថ្លែងការណ៍មានប្រយោជន៍ ប៉ុន្តែរឿងរ៉ាវក្នុងជីវិតពិតអំពីសេចក្តីស្លាប់ និងទុក្ខលំបាកវេទនារបស់ប្រជាជនស្លូតត្រង់ ដែលពួកគាត់ស្តាប់ទៅហាក់ដូចជាគ្មានន័យខ្លឹមសារ ឥតបានការ ប្រសិនបើគ្មានការធ្វើសកម្មភាពណាមួយជាក់លាក់ពិតប្រាកដ។

ជម្លោះប្រដាប់អាវុធទ្រង់ទ្រាយធំបានផ្ទុះឡើងតាមបណ្ដោយព្រំដែន នៅចុងខែកក្កដា ឆ្នាំ២០២៥ ដោយភាគីយោធាថៃជាអ្នកបើកការបាញ់ប្រហារមកលើកម្ពុជា បង្ខំឱ្យភាគីកម្ពុជា ប្រើប្រាស់សិទ្ធិការពារខ្លួនទៅតាមធម្មនុញ្ញអង្គការសហប្រជាជាតិ។ ក្រោយពីឆ្លងកាត់ការប្រយុទ្ធជាច្រើនថ្ងៃ ភាគីទាំងពីរបានឈានដល់ការឯកភាពលើកិច្ចព្រមព្រៀងឈប់បាញ់ ក្រោមការសម្របសម្រួលពីសំណាក់ប្រធានាធិបតីសហរដ្ឋអាមេរិក និងប្រធានអាស៊ាន។ ត្បិតបទឈប់បាញ់ចូលជាធរមាននៅវេលាម៉ោង០០ ថ្ងៃទី២៨ ខែកក្កដា ក៏ពិតមែន ប៉ុន្តែប៉ុន្មានម៉ោងក្រោយមក គឺនៅម៉ោង០៧៖៥០នាទីព្រឹកថ្ងៃទី២៩ ខែកក្កដា យោធាថៃបានចូលមកព័ទ្ធចាប់យោធិនកម្ពុជាយកទៅឃុំខ្លួនដោយខុសច្បាប់ និងជាបន្តបន្ទាប់មកថៃ បំពានបទឈប់បាញ់ បើកការបាញ់ប្រហារមកលើកងទ័ពកម្ពុជាជាបន្តបន្ទាប់តែកម្ពុជាមិនតបត។ ថៃបានរាយបន្លាលួសព័ទ្ធផ្ទះពលរដ្ឋខ្មែរ បំពានសិទ្ធិ បើកការបាញ់ប្រហារ និងបាញ់សម្លាប់ពលរដ្ឋខ្មែរ។

ក្នុងពេលកើតមានបញ្ហានេះ អ្នករាយការណ៍ពិសេសស្ដីពីស្ថានភាពសិទ្ធិមនុស្សនៅកម្ពុជា លោក វីទិត មុនតាប៊ន ដែលមានសញ្ជាតិថៃ​​​​ បានបិទភ្នែកបិទមាត់ជាច្រើនខែ មិនបានធ្វើសេចក្ដីថ្លែងការណ៍ ឬការអន្តរាគមន៍ រាយការណ៍ពីស្ថានភាពដែលពលរដ្ឋខ្មែររងការរំលោភសិទ្ធិពីសំណាក់យោធាថៃទៅកាន់វេទិកាអន្តរជាតិឡើយ។  

 ក្រោយពីយោធាកម្ពុជា ត្រូវថៃចាប់ឃុំខ្លួនដោយខុសច្បាប់ជាង១១០ថ្ងៃ សម្តេចតេជោ  ហ៊ុន សែន ប្រធានព្រឹទ្ធសភា បានសួរទៅលោក វិទិត មុនតាប៊ន ថានៅទីណា ម្តេចក៏មិននិយាយអ្វីសោះជុំវិញបញ្ហាថៃរំលោភសិទ្ធិ និងច្បាប់អន្តរជាតិបែបនេះ។

បន្ទាប់មកនៅថ្ងៃទី ១៩ ខែវិច្ឆិកា ទូត​ខ្មែរ​ប្រចាំ​អង្គការ​សហប្រជាជាតិនៅ​ទីក្រុង​ហ្សឺណែវ ​រាយការណ៍ប្រាប់ឧត្តម​ស្នង​ការសិទ្ធិ​មនុស្ស​អង្គការ​សហប្រជាជាតិ​លោក Volker Türk ថា ​ ​ ​អ្នក​រាយការណ៍​ពិសេស​ស្ដីពី​សិទ្ធិ​មនុស្ស​នៅ​កម្ពុជា អសកម្ម​ក្នុង​ការ​ឆ្លើយ​តប​ពី​ការ​បំពាន​តាម​ព្រំដែន​ដោយ​ថៃ​នេះ។ លោក​ក៏​ព្រមាន​ថា​កម្ពុជា​នឹង​ចាត់​វិធាន​ការ​សម​ស្រប​ផង​ដែរ​ចំពោះ​ភាព​អសកម្ម​នេះ។

លោក​ថា៖ «អាណត្តិរបស់អ្នករាយការណ៍ពិសេស​មិនមែនគ្របដណ្តប់ត្រឹមតែ​ការ​អភិវឌ្ឍ​សិទ្ធិ​មនុស្ស​ក្នុងស្រុកប៉ុណ្ណោះទេ ប៉ុន្តែថែមទាំងការបំពានសិទ្ធិដែលកើតចេញពី ឬជាប់​ទាក់ទង​នឹង​ជម្លោះ​ប្រដាប់អាវុធដែលកំពុងបន្តផងដែរ»។

គួរឱ្យដឹង​ផងដែរ​ថា​លោក វិទីត មុនតាប៊ន គឺ​ជា​អ្នករាយការណ៍​ពិសេស​ស្តីពី​សិទ្ធិ​មនុស្ស​នៅ​កម្ពុជា​បន្ត​ការងារ​ពី​លោក​ស្រី Rhona Smith ​នៅ​ឆ្នាំ​២០២១។ លោក​កើត​នៅ​ខែ​វិច្ឆិកា ឆ្នាំ១៩៥២ គឺ​ជា​ជនជាតិថៃ ដែល​ទទួល​ការ​អប់រំ​នៅ​ចក្រភព​អង់គ្លេស​ ជា​អ្នក​ដែល​ធ្វើ​ការ​ច្រើន​ក្នុង​ស្ថាប័ន​សិទ្ធិ​មនុស្ស​សហប្រជាជាតិ និង​ជា​សាស្ត្រាចារ្យ​ផ្នែ​ច្បាប់​នៅ​ប្រទេស​ថៃ​ផងដែរ៕

The post អ្នកជំនាញឯកសារប្រវត្តិសាស្ត្រថា សេចក្ដីថ្លែងការណ៍រឿងព្រំដែនខ្មែរ- ថៃរបស់វីទិត មុនតាប៊ន គ្មានបានការ មិនចម្រុងចម្រើនដល់សន្តិភាព appeared first on Kampuchea Thmey Daily.

ការបន្លឺសំឡេងរំខាននៅពេលយប់ដោយឧបករណ៍បំពងសំឡេងចេញពីរថយន្តរបស់យោធាថៃ ត្រូវបានកត់សម្គាល់នៅភូមិព្រៃចាន់ និងភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ដែលបង្កឲ្យមានការព្រួយបារម្ភចំពោះ បញ្ហាផ្លូវចិត្តរបស់ជនស៊ីវិលកម្ពុជា។

លោក ឆាំង យុ នាយកមជ្ឈមណ្ឌលឯកសារកម្ពុជា បានលើកឡើងក្នុងអត្ថបទមួយថា ការប្រើសំឡេងរំខានបែបនេះ មិនមែនជាយុទ្ធសាស្ត្រដែលបង្ហាញពីភាពច្នៃប្រឌិត ឬសមត្ថភាពយោធាទេ ប៉ុន្តែជាសកម្មភាពមិនសមរម្យដែលបង្ហាញពីអត្តចរិតក្មេងខ្ចី និងការខ្វះគោរពច្បាប់។

“វិន័យ វិជ្ជាជីវៈ និងការគោរពនីតិរដ្ឋ គឺជាសញ្ញានៃកងយោធាដែលមានគុណភាព។ កងយោធាណាមួយដែលយាយីលើជនស៊ីវិលស្លូតត្រង់ គឺមិនអាចត្រូវបានចាត់ទុកថា ស្ថិតក្រោមស្ដង់ដាពិភពលោកនៃវិជ្ជាជីវៈយោធាបានទេ”។ លោកឆាំង យុ បានបញ្ជាក់។

លោកបន្ថែមថា អត្តចរិតបែបនេះរបស់យោធាថៃ កាន់តែបង្ហាញពីគោលនយោបាយមុខពីរ រវាងការបង្ហាញភាពសន្តិភាព​លើឆាកអន្តរជាតិ និងការប្រព្រឹត្តទង្វើរំខានដល់ជនស៊ីវិលស្លូតត្រង់កម្ពុជា ដែលស្ថិតនៅក្រៅព្រំដែននៃស្ថាប័នវិជ្ជាជីវៈ ដូចជា អ្នកលេង ជនពាល ចោរប្លន់ ឬជនល្មើសច្បាប់ជាដើម។

លោក ឆាំង យុ បានអំពាវនាវឲ្យមានការឆ្លើយតបដោយការថ្កោលទោសចំពោះអត្តចរិតក្មេងខ្ចីមិនសមរម្យរបស់អ្នកជិតខាងកម្ពុជា និងឆ្លើយតបដោយការតាំងចិត្តដ៏ឱឡារិក និងសេចក្តីថ្លៃថ្នូរថា ប្រជាជាតិកម្ពុជា មិនប្រព្រឹត្តទង្វើដោយគ្មានការទទួលខុសត្រូវបែបនេះទេ ហើយកម្ពុជាក៏មិនរាថយដោយសារទង្វើក្មេងខ្ចីរបស់យោធាថៃបែបនេះដែរ៕

The post លោក ឆាំង យុ ៖ ការប្រើសំឡេងរំខានដោយយោធាថៃ ជាអាកប្បកិរិយា «ក្មេងខ្ចី» និង «មិនគោរពច្បាប់អន្តរជាតិ» appeared first on Kampuchea Thmey Daily.