លោក ធន់ សុភា Archives - Kampuchea Thmey Daily

លោក ធន់ សុភា រំលឹកគុណបំណាច់មនុស្ស២នាក់ក្នុងថ្ងៃសម្ពោធក្លឹបប្រដាល់ថ្មីធ្វើឲ្យលោកមានថ្ងៃនេះ

Sina Noun — Thu, 22 May 2025 02:49:46 +0000

នៅល្ងាចថ្ងៃទី២១ ខែឧសភា ឆ្នាំ២០២៥ ម្សិលមិញនេះលោក ធន់ សុភា បានបើកសម្ពោធក្លឹបថ្មីដែលសាងសង់ប្រហែល ៧ម៉ឺនដុល្លារជាផ្លូវការហើយក្រោមអធិបតីភាពថ្នាក់ដឹកនាំប្រដាល់ និងគ្រូៗប្រដាល់ រួមទាំងសិស្សគុនជាច្រើននាក់។

ពិធីសម្ពោធក្លឹបយប់មិញ

ថ្លែងក្នុងពិធីបើកសម្ពោធនោះលោក ធន់ សុភា មិនអាចបំភ្លេចបានឡើយនូវគុណបំណាច់មនុស្សសំខាន់ ២នាក់ដែលជំរុញឲ្យលោកតស៊ូ ព្យាយាម តាំងពីតូចៗមកនោះគឺឯកឧត្ដម តែម ម៉ឺន អតីតប្រធានសហព័ន្ធចាស់ និងព្រឹទ្ធាចារ្យ ឈិត សារឹម។

លោក តែម ម៉ឺន

លោក ធន់ សុភា រឹលឹកទៀតថា អ្នកមានគុណទាំងនេះនាក់នេះបានស្ដីប្រដៅណែនាំតាំងពីលោកនៅវ័យជាង ១០ឆ្នាំមកម្ល៉េះឲ្យលោកមានការតស៊ូ ខំប្រឹងប្រែងហ្វឹកហាត់ និងដើរតែផ្លូវល្អ ធ្វើយ៉ាងណាទើបឈានទៅរកភាពជោគជ័យក្នុងអាជីពប្រដាល់គុនខ្មែរនេះ។ ដូច្នេះហើយកេរ្តិ៍ឈ្មោះ និងភាពជោគជ័យរហូតអាចបើកក្លឹបធំបែបនេះជាការជួយតម្រង់ផ្លូវរបស់លោកទាំងពីរខាងលើ។

លោក ធន់ សុភា និងព្រឹទ្ធាចារ្យ ឈិត សារឹម

បញ្ជាក់ដែរថា ពិធីសម្ពោធក្លឹបថ្មីធន់សុភាគុនខ្មែររបស់លោក ធន់ សុភា កាលពីម្សិលមិញនេះធ្វើនៅទីតាំងក្លឹបឯភូមិទ្រពាំងទទឹង សង្កាត់ពន្សាំង ខណ្ឌព្រែកព្នៅ រាជធានីភ្នំពេញ។ នាឱកាសនោះដែរមានការអញ្ចើញចូលរួមជាអធិតីភាពពីឯកឧត្ដម តែម ម៉ឹន ប្រធានកិត្តិយសប្រដាល់គុនខ្មែរ ព្រឹទ្ធាចារ្យ ឈិត សារឹម ថ្នាក់ដឹកនាំសហព័ន្ធ គ្រូៗ រួមទាំងតំណាងម្ចាស់ឧបត្ថម្ភកម្មវិធីជាច្រើនទៀតដែរ៕

អត្ថបទដោយ៖ នួន ស៊ីណា

The post លោក ធន់ សុភា រំលឹកគុណបំណាច់មនុស្ស២នាក់ក្នុងថ្ងៃសម្ពោធក្លឹបប្រដាល់ថ្មីធ្វើឲ្យលោកមានថ្ងៃនេះ appeared first on Kampuchea Thmey Daily.

លោក ធន់ សុភា ក្លឹបថ្មីនឹងជួយយុវជននៅតំបន់នោះងាកមកហាត់កីឡាកាត់បន្ថយក្មេងទំនើងផង

Sina Noun — Thu, 20 Mar 2025 08:20:56 +0000

គ្រូប្រដាល់ល្បីឈ្មោះលើវិស័យគុនខ្មែរ លោក ធន់ សុភា ថាក្លឹបថ្មីធន់សុភាគុនខ្មែរនេះនឹងជួយដល់យុវជនក្នុងតំបន់ពន្សាំងងាកមកហាត់កីឡាពិសេសមរតកក្បាច់គុនខ្មែរ និងចូលរួមកាត់បន្ថយក្មេងទំនើងនៅតាមភូមិស្រុកផងដែរ។

ទិដ្ឋភាពក្លឹបលោក ធន់ សុភា

លោក ធន់ សុភា បានឲ្យដឹងថា ក្លឹបប្រដាល់ធន់សុភាគុនខ្មែរនឹងជួយដល់យុវជនក្នុងសង្កាត់ពន្សាំង ខណ្ឌព្រែកព្នៅ ឬតំបន់ក្បែរនោះងាកមកហាត់កីឡាដើម្បីសុខភាពល្អផង និងហាត់ចាប់អាជីពនេះផង។ ក្លឹបនៅជិតផ្ទះប្រជាពលរដ្ឋ ដូច្នេះងាយស្រួលចូលហាត់ និងមិនសូវចំណាយពេល ឬថវិកាអស់ច្រើនជាក់ស្ដែងមានប្រជាពលរដ្ឋមួយចំនួនមកផ្ញើកូនឲ្យហាត់ជាមួយលោកបណ្ដើរៗហើយដែរ។

ទិដ្ឋភាពក្លឹបលោក ធន់ សុភា

គ្រូប្រដាល់រូបនេះបន្ថែមទៀតថា ក្លឹបប្រដាល់គឺមានប្រយោជន៍ និងជួយសង្គមបានច្រើនតាមរយៈការបណ្ដុះចិត្តប្រជាពលរដ្ឋឲ្យស្រឡាញ់ចូលចិត្តហាត់កីឡាមានសុខភាពល្អ ជាកន្លែងអប់រំ កែប្រែយុវជនឲ្យដើរក្នុងផ្លូវល្អ ជៀសវាងអំពើអបាយមុខនានា ជួយកាត់បន្ថយក្មេងទំនើងតាមរយៈការអប់រំ ស្ដីប្រដៅ យកពេលទំនេរចាប់ហាត់កីឡាជំនួសវិញ។ មួយវិញទៀតផ្ដល់អាជីពមួយច្បាស់លាស់ និងទទួលបានចំណូលសម្រាប់ផ្គត់ផ្គង់ជីវភាពរស់នៅប្រចាំថ្ងៃផងដែរ។

ទិដ្ឋភាពក្លឹបលោក ធន់ សុភា

បញ្ជាក់ដែរថា លោក ធន់ សុភា បានបើកក្លឹបថ្មីផ្ទាល់ខ្លួនមួយកាលពីពេលថ្មីៗនេះ និងបានសាងសងរួចរាល់ចូលហ្វឹកហាត់ជាបណ្ដើរៗហើយដែរ។ ក្លឹបថ្មីនេះមានទីតាំងនៅសង្កាត់ពន្សាំង ខណ្ឌព្រែកព្នៅ រាជធានីភ្នំពេញ៕

លោក ធន់ សុភា

អត្ថបទដោយ៖ នួន ស៊ីណា

The post លោក ធន់ សុភា ក្លឹបថ្មីនឹងជួយយុវជននៅតំបន់នោះងាកមកហាត់កីឡាកាត់បន្ថយក្មេងទំនើងផង appeared first on Kampuchea Thmey Daily.

គ្រូប្រដាល់ល្បីឈ្មោះលើវិថីគុនខ្មែរ លោក ធន់ សុភា ខ្ចីធនាគារខ្ទង់ ៤ម៉ឺនដុល្លារបង្គ្រប់ថ្លៃសាងសង់ក្លឹប

Sina Noun — Tue, 04 Mar 2025 08:42:40 +0000

គ្រូប្រដាល់ល្បីឈ្មោះលើវិថីគុនខ្មែរ និងបណ្ដុះបានធន់ធានល្អៗជាច្រើនគឺលោក ធន់ សុភា ទម្លាយឲ្យដឹងថាក្លឹបប្រដាល់ថ្មីដែលលោកកំពុងសាងសង់នេះត្រូវចំណាយថវិការហូតខ្ទង់ជាង ៦ម៉ឺនដុល្លារឯណោះ ខណៈថវិកាបង្គ្រប់បន្ថែម ៤ម៉ឺនដុល្លារទៀតលោកខ្ចីពីធនាគារ។

លោក ធន់ សុភា

លោក ធន់ សុភា បានឲ្យដឹងថា ការសាងសងក្លឹបថ្មីផ្ទាល់ខ្លួនរបស់លោកនៅពេលនេះជិតរួចរាល់ ១០០% ទៅហើយ ស្របពេលការថែមថយកែរកុនផ្សេងៗនឹងបញ្ចប់ជាផ្លូវការអាចចូលហាត់បាននៅចន្លោះពាក់កណ្ដាលខែមីនា ឆ្នាំ២០២៥។

ដោយសារតែមានកែកុនជាបន្តបន្ទាប់ដូចជាបន្ថែមបន្ទប់ស្នាក់នៅឲ្យច្រើនជាងមុន អូសភ្លើងចូល ជីកអណ្ឌូង និងដាក់សម្ភារហ្វឹកហាត់ថ្មីទាំងស្រុង រួមទាំងការតុបតែងខ្លះទៀតឲ្យត្រូវស្ទង់ដារ ដូច្នេះហើយទើបការចំណាយមានការកើនឡើងច្រើនបែបនេះ។ ថវិកាជំនួយពីឧកញ៉ា សំអាង វឌ្ឍនៈ រួមទាំងសិស្សខ្លួនផងនោះសរុបបានខ្ទង់ជិត ៣ម៉ឺនដុល្លារ។ ដោយសារខ្វះថវិកាបង្គ្រប់ខ្ទង់ ៤ម៉ឺនដុល្លារទៀត លោក និងភរិយា សម្រេចខ្ចីធនាគារ និងសង់ទៅវិញជាប្រចាំខែចន្លោះ ៦០០ដុល្លារក្នុងមួយខែ។

លោក ធន់ សុភា កំពុងបង្ហាត់សិស្ស

ឆ្លើយតបនិងសំនួរថា មូលហេតុអ្វីបានជាលោកគ្រូហ៊ានចំណាយថវិកាយ៉ាងច្រើន និងជាថវិកាខ្ចីធនាគារទៅទៀតលើវិស័យប្រដាល់គុនខ្មែរនេះ? លោក ធន់ សុភា ឆ្លើយយ៉ាងខ្លីថា ព្រោះក្ដីស្រឡាញ់ក្បាច់គុនខ្មែរ ចង់អភិរក្សមរតករបស់ខ្មែរឲ្យនៅគង់វង្ស និងជួយដល់យុវជនខ្មែរដែលចង់ហ្វឹកហាត់ គ្មានកន្លែងស្នាក់នៅ ឬការងារធ្វើជាដើម។

រូបគំរូបក្លឹបលោក ធន់ សុភា

បញ្ជាក់ដែរថា លោក ធន់ សុភា ជាគ្រូប្រដាល់ល្បីឈ្មោះមួយរូបនៅកម្ពុជា និងបានបណ្ដុះបណ្ដាលធនធានកីឡាករឲ្យមានកេរ្តិ៍ឈ្មោះជាច្រើននាពេលកន្លងមក។ លោកជាគ្រូប្រដាល់ប្រចាំសមាគមប្រដាល់ក្រសួងការពារជាតិ។ ថ្មីៗនេះលោកកំពុងសាងសង់ក្លឹបប្រដាល់ផ្ទាល់ខ្លួនមួយនៅសង្កាត់ពន្សាំង ខណ្ឌព្រែកព្នៅ រាជធានីភ្នំពេញ៕

The post គ្រូប្រដាល់ល្បីឈ្មោះលើវិថីគុនខ្មែរ លោក ធន់ សុភា ខ្ចីធនាគារខ្ទង់ ៤ម៉ឺនដុល្លារបង្គ្រប់ថ្លៃសាងសង់ក្លឹប appeared first on Kampuchea Thmey Daily.

លោក ធន់ សុភា Archives - Kampuchea Thmey Daily

លោក​ ធន់​ សុភា​ ក្លឹប​ថ្មី​នឹង​ជួយ​យុវជន​នៅ​​តំបន់​នោះ​ងាកមក​ហាត់​កីឡាកាត់​បន្ថយ​​ក្មេងទំនើង​ផង​

លោក ធន់ សុភា ក្លឹបថ្មីនឹងជួយយុវជននៅតំបន់នោះងាកមកហាត់កីឡាកាត់បន្ថយក្មេងទំនើងផង