លោក សាផុន វឌ្ឍនៈ Archives - Kampuchea Thmey Daily

សាកលវិទ្យាល័យពេទ្យដ៏ធំមួយនៅកម្ពុជា នឹងដាក់បញ្ចូលមុខវិជ្ជា ក្រមសីលធម៌វិជ្ជាជីវៈ ជាលើកដំបូងក្នុងឆ្នាំសិក្សាថ្មីនេះ

អ៊ិន ពិសី — Fri, 21 Nov 2025 02:55:43 +0000

សាកលវិទ្យាល័យវិទ្យាសាស្ត្រសុខាភិបាលដែលជាសាកលវិទ្យាល័យធំជាងគេនៅក្នុងប្រទេសកម្ពុជា នឹងដាក់បញ្ចូលមុខវិជ្ជាក្រមសីលធម៌វិជ្ជាជីវៈជាលើកដំបូងនៅក្នុងឆ្នាំសិក្សាថ្មីនេះ ដើម្បីបណ្តុះបណ្តាលធនធានមនុស្សក្នុងវិស័យសុខាភិបាលប្រកបដោយគុណភាព និងការឈានទៅរកឧត្តមភាព និងមានការទទួលស្គាល់គុណភាពទាំងកម្រិត ជាតិ តំបន់ និងអន្តរជាតិ។

នៅក្នុងឱកាសពិធីបើកបវេសនកាល ឆ្នាំសិក្សា ២០២៥-២០២៦ កាលពីថ្ងៃទី ១៩ វិច្ឆិកា លោកសាស្ត្រាចារ្យ សាផុន វឌ្ឍនៈ ទីប្រឹក្សាក្រសួងសុខាភិបាល និងជាសកលវិទ្យាធិការ នៃសាកលវិទ្យាល័យវិទ្យាសាស្ត្រសុខាភិបាល បានឱ្យដឹងថា មុខវិជ្ជា ក្រមសីលធម៌វិជ្ជាជីវៈ (MedPro) នេះ ត្រូវបានធ្វើការបណ្តុះបណ្តាលគ្រូបង្គោលដោយលោកសាស្ត្រាចារ្យទេសរដ្ឋមន្ត្រី គាត ឆែមរិទ្ធី ហើយបានបង្រៀនមុខវិជ្ជានេះដល់និស្សិតវេជ្ជបណ្ឌិតទូទៅ និងវេជ្ជបណ្ឌិតឯកទេសបានចំនួន ០៤ លើក រួចហើយ។

លោកសាស្ត្រាចារ្យ សាផុន វឌ្ឍនៈ បានបន្តថា ដើម្បីបន្តនិរន្តភាព នៃការបង្រៀនមុខវិជ្ជា MedPro នេះ ក្នុងឆ្នាំសិក្សាថ្មីនេះ សាកលវិទ្យាល័យបានធ្វើសមាហរណកម្មមុខវិជ្ជា MedPro នេះ ចូលទៅក្នុងកម្មវិធីសិក្សាចំនួន ០៣ ក្នុងនោះរួមមាន ១.ថ្នាក់បរិញ្ញាបត្រវិទ្យាសាស្ត្រវេជ្ជសាស្ត្រដោយបញ្ចូលនៅឆ្នាំទី ៣ និងទី ៦ សម្រាប់កម្មវិធីសិក្សាចាស់ដែលត្រូវបន្តរហូតដល់ចប់ និងបញ្ចូលនៅឆ្នាំទី ១ ទី ៣ និងទី ៦ សម្រាប់កម្មវិធីសិក្សាថ្មី។ ២.ថ្នាក់វេជ្ជបណ្ឌិតទូទៅដោយបញ្ចូលនៅឆ្នាំទី ៨ សម្រាប់កម្មវិធីសិក្សាចាស់ ដែលត្រូវបន្តរហូតដល់ចប់ និង សម្រាប់កម្មវិធីសិក្សាថ្មី និង៣.ថ្នាក់វេជ្ជបណ្ឌិតឯកទេស សម្រាប់កម្មវិធីសិក្សាចាស់ដែលត្រូវបន្តរហូតដល់ចប់ បញ្ចូលនៅឆ្នាំទី ២ ចំពោះថ្នាក់ឯកទេសដែលមាន ៣ ឆ្នាំ និងបញ្ចូលនៅឆ្នាំទី ៣ ចំពោះថ្នាក់ឯកទេសដែលមាន ៤ ឆ្នាំ។

លោកសាស្ត្រាចារ្យ សាផុន វឌ្ឍនៈ បានបន្តទៀតថា ដោយឡែក សម្រាប់កម្មវិធីសិក្សាថ្មី សាកលវិទ្យាល័យ នឹងបញ្ចូលនៅឆ្នាំទី ១ និងឆ្នាំទី ២ ចំពោះថ្នាក់ឯកទេសដែលមាន ៣ ឆ្នាំ ឬនៅឆ្នាំទី ៣ សម្រាប់ថ្នាក់ឯកទេសដែលមាន ៤ ឆ្នាំ។ បន្ថែមនេះពីលើនេះទៀត សាកលវិទ្យាល័យ ក៏បានបន្ថែមការវាយតម្លៃក្រមសីលធម៌ វិជ្ជាជីវៈ ក្នុងពេលអនុវត្តត្រាប់ និងក្នុងអំឡុងពេលធ្វើកម្មសិក្សានៅតាមទីតាំងកម្មសិក្សានានាផងដែរ។ ក្រៅពីនេះ សាកលវិទ្យាល័យ បានចូលរួមយ៉ាងសកម្មជាមួយក្រសួងសុខាភិបាលក្នុងការអនុវត្តគម្រោងពង្រឹងគុណភាពបណ្ដុះបណ្ដាលមុនពេលបម្រើការងារ សម្រាប់មន្ត្រីសុខាភិបាល ដើម្បីចែករំលែកបទពិសោធរបស់សាកលវិទ្យាល័យវិទ្យាសាស្ត្រសុខាភិបាល ដែលបានអនុវត្តកន្លងមកជូនដល់សាលាមធ្យមសិក្សាសុខាភិបាល ភូមិភាគទាំង ៤ និងគ្រឹះស្ថានបណ្តុះបណ្តាលឯកជនផ្សេងៗ ដែលផ្តល់ការបណ្តុះបណ្តាលក្នុងវិស័យសុខាភិបាលផងដែរ។

លោកសាស្ត្រាចារ្យ សាផុន វឌ្ឍនៈ បានបញ្ជាក់ថា គិតត្រឹមខែតុលា ឆ្នាំ ២០២៥ នេះសាកលវិទ្យាល័យបានដំណើរការកម្មវិធីបណ្ដុះបណ្ដាលចំនួន ៥១ កម្មវិធី ដោយមាននិស្សិតកំពុងសិក្សាសរុបចំនួន ៨,៦០១ នាក់ ក្នុងនោះជានិស្សិតស្រីចំនួន ៥,២៩៣ នាក់។ ក្នុងចំណោមនិស្សិតកំពុងសិក្សាទាំងនោះ មាននិស្សិតចំនួន ៦១១ នាក់ (ស្រីចំនួន ៤២០ នាក់) បានទទួលអាហារូបករណ៍បង់ថ្លៃជំនួសដោយរាជរដ្ឋាភិបាលកម្ពុជា និងនិស្សិតថ្នាក់វេជ្ជបណ្ឌិតឯកទេសចំនួន ៧៨ នាក់ (ស្រីចំនួន ៣៤ នាក់) បានទទួលអាហារូបករណ៍ពី សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន និងនិស្សិតថ្នាក់បរិញ្ញាបត្រជាន់ខ្ពស់ចំនួន ០២ នាក់ ( ជាបុរស) បានទទួលអាហារូបករណ៍ពី សម្តេចមហាបវរធិបតី ហ៊ុន ម៉ាណែត និង លោកជំទាវបណ្ឌិត ពេជ ចន្ទមុន្នី។ បន្ថែមនេះ និស្សិតដែលបានបញ្ចប់ការសិក្សាពី ស.វ.ស ក្នុងឆ្នាំសិក្សា ២០២៤ -២០២៥ មានចំនួនសរុប ១,២៩៧ នាក់៕

អត្ថបទ ៖ សំអឿន

The post សាកលវិទ្យាល័យពេទ្យដ៏ធំមួយនៅកម្ពុជា នឹងដាក់បញ្ចូលមុខវិជ្ជា ក្រមសីលធម៌វិជ្ជាជីវៈ ជាលើកដំបូងក្នុងឆ្នាំសិក្សាថ្មីនេះ appeared first on Kampuchea Thmey Daily.

និស្សិតពេទ្យជិត ៦០០ នាក់ បន្ថែមទៀត បានចូលរួមជាសមាជិកក្រុមការងារ គ្រូពេទ្យស្ម័គ្រចិត្ត ឯកឧត្ដម ហ៊ុន ម៉ានី

អ៊ិន ពិសី — Thu, 17 Jul 2025 08:32:31 +0000

និស្សិតសាកលវិទ្យាល័យវិទ្យាសាស្ត្រសុខាភិបាលចំនួន ៥៨៤ នាក់ បន្ថែមទៀត បានចូលរួមជាសមាជិកក្រុមការងារគ្រូពេទ្យស្ម័គ្រចិត្ត ឯកឧត្ដម ហ៊ុន ម៉ានី ដែលធ្វើឱ្យចំនួនសមាជិកក្រុមការងារគ្រូពេទ្យស្ម័គ្រចិត្ត ឯកឧត្ដម ហ៊ុន ម៉ានី ប្រចាំសាកលវិទ្យាល័យ កើនឡើងដល់ជាង ៣ ៤០០ នាក់។

ថ្លែងក្នុងពិធីសំណេះសំណាលជាមួយសមាជិកថ្មីរបស់ក្រុមការងារគ្រូពេទ្យស្ម័គ្រចិត្ត ឯកឧត្ដម ហ៊ុន ម៉ានី ប្រចាំសាកលវិទ្យាល័យវិទ្យាសាស្ត្រសុខាភិបាល កាលពីព្រឹកថ្ងៃទី ១៧ កក្កដា នេះ ក្រោមអធិបតីភាពដ៏ខ្ពង់ខ្ពស់ ឯកឧត្ដម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ ប្រធានសហភាពសហព័ន្ធយុវជនកម្ពុជា និងជាប្រធានកិត្តិយសក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី , លោកសាស្ត្រាចារ្យ សាផុន វឌ្ឍនៈ ទីប្រឹក្សាក្រសួងសុខាភិបាល សកលវិទ្យាធិការ នៃសាកលវិទ្យាល័យវិទ្យាសាស្ត្រសុខាភិបាល និងជាអនុប្រធានប្រតិបត្តិទទួលបន្ទុកជាប្រធានប្រតិបត្តិក្រុមការងារគ្រូពេទ្យស្ម័គ្រចិត្ត ឯកឧត្ដម ហ៊ុន ម៉ានី ប្រចាំសាកលវិទ្យាល័យវិទ្យាសាស្ត្រសុខាភិបាល បានគោរពថ្លែងអំណរគុណយ៉ាងជ្រាលជ្រៅចំពោះ ឯកឧត្ដមប្រធាន ហ៊ុន ម៉ានី ដែលបានផ្តល់កិត្តិយស និងឱកាសដល់និស្សិតសាកលវិទ្យាល័យវិទ្យាសាស្ត្រសុខាភិបាល បានទទួលការរៀនសូត្របន្ថែម អនុវត្តផ្ទាល់នៅមូលដ្ឋាន និងឱកាសចូលរួមលើកកម្ពស់សុខភាព និងសុខុមាលភាពរបស់ប្រជាពលរដ្ឋ ដែលជាអាទិភាពមួយដ៏សំខាន់របស់រាជរដ្ឋាភិបាល នៃព្រះរាជាណាចក្រកម្ពុជា ដែលមាន សម្តេចមហាបវរធិបតី ហ៊ុន ម៉ាណែត ជាប្រមុខដឹកនាំដ៏ខ្ពង់ខ្ពស់។

លោកសាស្ត្រាចារ្យ បានបន្តទៀតថា «ការចូលរួមសកម្មភាពមនុស្សធម៌ និងសង្គមទាំងនេះ បានបង្ហាញច្បាស់អំពីការយកចិត្តទុកដាក់របស់ ឯកឧត្ដមប្រធាន និងក្រុមការងារគ្រូពេទ្យស្ម័គ្រចិត្ត ឯកឧត្ដម ហ៊ុន ម៉ានី ទាំងអស់ ដែលតែងតែខ្វល់ខ្វាយគិតគូរ និងរួមសុខ រួមទុក្ខ ជាមួយប្រជាពលរដ្ឋដែលជួបការលំបាកក្នុងគ្រប់កាលៈទេសៈ។ ប្រជាពលរដ្ឋ បានយល់អំពីអំពើល្អរបស់ ឯកឧត្ដមប្រធាន ហ៊ុន ម៉ានី ក៏ដូចជា សម្តេចតេជោ សម្តេចមហាបវរធិបតី និងក្រុមគ្រួសារ ថ្នាក់ដឹកនាំក្នុងជួររាជរដ្ឋាភិបាលកម្ពុជា ហើយមានទឹកចិត្តកាន់តែស្រលាញ់ គាំទ្រ សម្តេចមហាបវរធិបតី ហ៊ុន ម៉ាណែត បន្តជាប្រមុខដឹកនាំនាវាកម្ពុជាទៅមុខទៀត ដើម្បីធ្វើឱ្យប្រទេសជាតិយើង ឱ្យកាន់តែមានការរីកចម្រើន ក្រោមម្លប់សន្តិភាពដ៏ត្រជាក់ត្រជំ»។

លោកសាស្ត្រាចារ្យ បានបន្ថែមថា អំពើល្អទាំងនេះ ក៏ជាគំរូដ៏ឧត្តុង្គឧត្ដមសម្រាប់និស្សិតសាកលវិទ្យាល័យវិទ្យាសាស្ត្រសុខាភិបាល អនុវត្តតាម ដើម្បីអភិវឌ្ឍន៍ខ្លួនឱ្យក្លាយជាអ្នកវិជ្ជាជីវៈសុខាភិបាលដែលមាន គុណធម៌ សីលធម៌វិជ្ជាជីវៈខ្ពស់ និងតែងតែប្រកាន់ខ្ជាប់នូវស្មារតី ស្រឡាញ់ជាតិ ប្រព្រឹត្តតែអំពើល្អ សុចរិត ត្រឹមត្រូវ និង មិនទុកឱ្យប្រជាពលរដ្ឋណាម្នាក់ មិនទទួលបានសេវាសុខាភិបាលប្រកបដោយគុណភាពឡើយ។

អញ្ជើញមានមតិក្នុងឱកាសនោះ ឯកឧត្ដមឧបនាយករដ្ឋមន្ត្រី បានរំលេចពីសារៈសំខាន់ នៃការងារស្ម័គ្រចិត្តដែលត្រូវការទឹកចិត្តចេញពីបេះដូង ស ពីការវាស់វែងភាពអត់ធ្មត់ និងការជួបប្រទះនូវការប្រតិបត្តិដោយផ្ទាល់រវាងការរៀននៅក្នុងថ្នាក់ និងការអនុវត្តជាក់ស្តែង ដើម្បីទទួលការហ្វឹកហាត់ជាក់ស្ដែង និងទទួលបទពិសោធនាំមកនូវអនុស្សាវរីយ៍យូរអង្វែង។

គួរបញ្ជាក់ថា គិតពីឆ្នាំ ២០២៣ មកដល់បច្ចុប្បន្ននេះ ក្រុមការងារគ្រូពេទ្យស្ម័គ្រចិត្ត ឯកឧត្ដម ហ៊ុន ម៉ានី ប្រចាំសាកលវិទ្យាល័យវិទ្យាសាស្ត្រសុខាភិបាល បានចូលរួមចំណែកផ្តល់សេវាអប់រំ ថែទាំ ព្យាបាលសុខភាពជូនប្រជាពលរដ្ឋដោយឥតគិតថ្លៃ បានចំនួន ២០ លើក សរុបប្រជាពលរដ្ឋមកទទួលសេវា ចំនួន ១៥៦ ៩១៥ នាក់។ ក្រៅពីសកម្មភាពចុះអប់រំ ថែទាំ ព្យាបាល សុខភាពនេះ មន្ត្រី បុគ្គលិក និស្សិតសាកលវិទ្យាល័យវិទ្យាសាស្ត្រសុខាភិបាល បានចូលរួមយ៉ាងសកម្មជាមួយការងារសង្គមផ្សេងៗ ដែលរួមមាន ការចូលរួមសកម្មភាពក្នុងនាមជាសមាជិកសហភាពសហព័ន្ធយុវជនកម្ពុជា សកម្មភាពកាកបាទក្រហមកម្ពុជា សកម្មភាពសប្បុរសធម៌ជួយនិស្សិតខ្វះខាតលទ្ធភាពបន្តការសិក្សា ការងារបរិច្ចាគឈាម ការងារបរិស្ថាន កីឡា និងសិល្បៈ និងជាពិសេសការចូលរួមជាមួយរាជរដ្ឋាភិបាល គាំទ្រលើកទឹកចិត្តកងទ័ពកំពុងប្រចាំការ ការពារប្រទេស នៅសមរភូមិមុខ៕

អត្ថបទ ៖ សំអឿន

The post និស្សិតពេទ្យជិត ៦០០ នាក់ បន្ថែមទៀត បានចូលរួមជាសមាជិកក្រុមការងារ គ្រូពេទ្យស្ម័គ្រចិត្ត ឯកឧត្ដម ហ៊ុន ម៉ានី appeared first on Kampuchea Thmey Daily.

និស្សិតពេទ្យជិត ៦០០ នាក់ ធ្វើសច្ចាប្រណិធានវិជ្ជាជីវៈសុខាភិបាលដែលជាវិជ្ជា ប្រកបដោយឧត្ដមគតិ សុចរិត និងក្រមសីលធម៌

អ៊ិន ពិសី — Wed, 04 Jun 2025 02:53:18 +0000

សាកលវិទ្យាល័យវិទ្យាសាស្ត្រសុខាភិបាល “ស.វ.ស” បានរៀបចំពិធីសច្ចាប្រណិធានវិជ្ជាជីវៈសុខាភិបាល និងសិក្ខាសាលាតម្រង់ទិសនិស្សិតថ្នាក់បរិញ្ញាបត្ររងគ្រប់ជំនាញ ឆ្នាំសិក្សា ២០២៤-២០២៥ ប្រមាណជិត ៦០០ នាក់ ដែលវិជ្ជាជីវៈសុខាភិបាលនេះ ជាវិជ្ជាដែលទទួលបានប្រកបដោយឧត្ដមគតិ សុចរិត និងក្រមសីលធម៌។

ថ្លែងក្នុងពិធីសច្ចាប្រណិធានវិជ្ជាជីវៈសុខាភិបាល និងសិក្ខាសាលាតម្រង់ទិសនិស្សិតថ្នាក់បរិញ្ញាបត្ររងគ្រប់ជំនាញ ឆ្នាំសិក្សា ២០២៤-២០២៥ កាលពីថ្ងៃទី ៣ មិថុនា លោកសាស្ត្រាចារ្យ សាផុន វឌ្ឍនៈ ទីប្រឹក្សាក្រសួងសុខាភិបាល និងជាសកលវិទ្យាធិការ នៃសាកលវិទ្យាល័យវិទ្យាសាស្ត្រសុខាភិបាល (ស.វ.ស) បានរំលេចពីតម្លៃនិមិត្តរូបសំខាន់ៗ និងជាការដាស់តឿននូវគុណធម៌យ៉ាងជ្រៅជ្រះក្នុងឯកសណ្ឋានវិជ្ជាជីវៈសុខាភិបាលនេះ។

លោកសាស្ត្រាចារ្យសកលវិទ្យាធិការ បានលើកឡើងថា «ពេលក្មួយៗ (និស្សិត) ពាក់ឯកសណ្ឋានវិជ្ជាជីវៈសុខាភិបាលនេះ មិនមែនជាសញ្ញាបញ្ជាក់នូវការមានចម្លើយនៅរាល់សំណួរនោះទេ តែឯកសណ្ឋានគឺជាការសន្យារបស់ក្មួយៗ ត្រូវខិតខំស្វែងរកចម្លើយឱ្យបានល្អបំផុត សម្រាប់អ្នកដែលក្មួយៗ ទៅផ្ដល់សេវាសុខាភិបាលជូន ដោយប្រើប្រាស់ចំណេះវិជ្ជាដែលទទួលបានប្រកបដោយឧត្តមគតិ សុចរិត និងក្រមសីលធម៌»។

លោកសាស្ត្រាចារ្យ បានគូសបញ្ជាក់ផងដែរពីដំណើរសំខាន់ៗ ដែលនិស្សិតត្រូវជួបរួមមាន ពេលវេលាដ៏លំបាកចំពោះមុខ ជីវិតមនុស្សដែលកំពុងផុយស្រួយ អាចជួបនឹងកាលៈទេសៈមួយដែលឈឺចាប់បំផុត និងអាចរកឃើញនូវលទ្ធភាពជាមនុស្សដ៏អស្ចារ្យមួយរូបដណ្ដើមជីវិតដែលស្ទើរនឹងផុតទៅបាត់ហើយនោះត្រលប់មកវិញ។

លោកសាស្ត្រាចារ្យសកលវិទ្យាធិការ បានថ្លែងអំណរគុណចំពោះសាស្ត្រាចារ្យដែលបង្រៀននៅ ស.វ.ស និងនៅតាមទីតាំងកម្មសិក្សា ដែលតែងតែខិតខំផ្ទេរនូវចំណេះវិជ្ជា និងធ្វើជាគំរូល្អដល់និស្សិត និងថ្លែងអំណរគុណចំពោះអាណាព្យាបាល និងក្រុមគ្រួសារទាំងអស់របស់និស្សិត នៃ ស.វ.ស គ្រប់ៗ រូប ដែលលើកទឹកចិត្ត និងលះបង់គ្រប់បែបយ៉ាង ដើម្បីឱ្យនិស្សិតមានឱកាសដូចពេលនេះ៕

អត្ថបទ ៖ សំអឿន

The post និស្សិតពេទ្យជិត ៦០០ នាក់ ធ្វើសច្ចាប្រណិធានវិជ្ជាជីវៈសុខាភិបាលដែលជាវិជ្ជា ប្រកបដោយឧត្ដមគតិ សុចរិត និងក្រមសីលធម៌ appeared first on Kampuchea Thmey Daily.

សាស្ត្រាចារ្យ សាផុន វឌ្ឍនៈ៖ សកម្មភាពមនុស្សធម៌ក្រុមគ្រូពេទ្យស្ម័គ្រចិត្ត ហ៊ុន ម៉ានី ចូលរួមសម្រាលបន្ទុកពលរដ្ឋកម្ពុជាច្រើន

deth leng — Wed, 15 Mar 2023 08:28:08 +0000

លោក សាស្ត្រាចារ្យ សាផុន វឌ្ឍនៈ ទីប្រឹក្សាក្រសួងសុខាភិបាល សាកលវិទ្យាធិការ នៃសាកលវិទ្យាល័យវិទ្យាសាស្ត្រសុខាភិបាល និងជាអនុប្រធានប្រតិបត្តិក្រុមការងារគ្រូពេទ្យស្ម័គ្រចិត្ត លោក ហ៊ុន ម៉ានី ទទួលបន្ទុកជាប្រធានប្រតិបត្តិក្រុមការងារ គ្រូពេទ្យស្ម័គ្រចិត្ត លោក ហ៊ុន ម៉ានី ប្រចាំសាកលវិទ្យាល័យវិទ្យាសាស្ត្រសុខាភិបាល បានមានប្រសាសន៍ថា និស្សិតសាកលវិទ្យាល័យវិទ្យាសាស្ត្រសុខាភិបាល បានចូលរួមសកម្មភាពមនុស្សធម៌ជាមួយក្រុមគ្រូពេទ្យស្ម័គ្រចិត្ត លោក ហ៊ុន ម៉ានី ក្នុងបុព្វហេតុចូលរួមចំណែកជួយសម្រាលបន្ទុករបស់ប្រជាពលរដ្ឋកម្ពុជាយ៉ាងច្រើនឱ្យទទួលបាននូវការពិនិត្យព្យាបាលជំងឺដោយឥតគិតថ្លៃ។

ក្នុងពិធីសំណេះសំណាលជាមួយនិស្សិតជាសមាជិក-សមាជិការ ក្រុមការងារគ្រូពេទ្យស្ម័គចិត្ត លោកហ៊ុន ម៉ានី នៅព្រឹកថ្ងៃទី ១៥មីនា លោកសាស្ត្រាចារ្យ បានបន្តថាគិតមកដល់ថ្ងៃនេះ មានមន្ត្រីបុគ្គលិក និស្សិតសាកលវិទ្យាល័យវិទ្យាសាស្ត្រសុខាភិបាល សរុបចំនួន ២,១៥៧ នាក់និងនិស្សិតពីគ្រប់មហាវិទ្យាល័យ ចំនួន ២,០៧៥ នាក់ បានស្ម័គ្រចិត្តចូលរួមជាសមាជិកក្រុមគ្រូពេទ្យស្ម័គ្រចិត្ត លោក ហ៊ុន ម៉ានី។

ទន្ទឹមនឹងនេះលោកសាស្ត្រាចារ្យបានបន្តទៀតថា ដោយមានការដឹកនាំចង្អុលបង្ហាញទិស ពីលោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាលនិងជាប្រធានក្រុមប្រឹក្សាភិបាលសាកលវិទ្យាល័យវិទ្យាសាស្ត្រសុខាភិបាល សាកលវិទ្យាល័យបាននិងកំពុងពង្រឹង និងពង្រីកការបណ្តុះបណ្តាល នៅសាកលវិទ្យាល័យឱ្យកា ន់តែមានគុណភាពខ្ពស់ ស្របតាមស្ដង់ដារជាតិ តំបន់ និងអន្តរជាតិ។

ជាមួយគ្នានេះដែរ អនុវត្តតាមអនុសាសន៍ណែនាំដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា តម្រូវឱ្យក្រសួងសុខាភិបាលយកចិត្តទុកដាក់លើគុណភាព បណ្តុះបណ្តាលធនធានមនុស្សលើគ្រប់វិស័យ ជាពិសេសវិស័យសុខាភិបាល ដោយត្រូវ បញ្ចូលជំនាញទន់ និងក្រមសីលធម៌ ក្នុងកម្មវិធីបណ្ដុះបណ្ដាល សាកលវិទ្យាល័យ បានជំរុញ និងខិតខំបន្ថែមទៀត ក្នុងការបញ្ជ្រាបចំណេះដឹង និងជំនាញទន់ផ្សេងៗ ក្នុងការបណ្តុះបណ្តាល នៅសាកលវិទ្យាល័យវិទ្យាសាស្ត្រសុខាភិបាល ដែលរួមមានការត្រៀមខ្លួនក្នុងការបំពេញការងារក្នុងវិស័យសុខាភិបាល បទពិសោធន៍ការងារក្នុងសហគមន៍ ការចូលរួមសកម្មភាព សង្គម មនុស្សធម៌ កាកបាទក្រហម សហភាពសហព័ន្ធយុវជនកម្ពុជាផ្សេងៗ ដើម្បីធ្វើយ៉ាងណាឱ្យនិស្សិតដែលបានបញ្ចប់ការសិក្សាពីសាកលវិទ្យាល័យវិទ្យាសាស្ត្រសុខាភិបាល ទទួល បានជំនាញវិជ្ជាជីវៈខ្ពស់ ប្រកបដោយក្រមសីលធម៌ វិន័យត្រឹមត្រូវ ឱ្យសក្តិសមជាក្រុមគ្រូពេទ្យស្ម័គ្រចិត្តរបស់លោកហ៊ុន ម៉ានី ដែលមានភារកិច្ចសង្រ្គោះប្រជាពលរដ្ឋមានជំងឺ។

លោក លេង ផាលី ប្រធានប្រតិបត្តិក្រុមការងារគ្រូពេទ្យស្ម័គ្រចិត្តលោក ហ៊ុន ម៉ានី បានមានប្រសាសន៍ថាការងារស្ម័គ្រចិត្តនេះមានសារសំខាន់ខ្លាំងណាស់សម្រាប់ប្អូនៗជានិស្សិតក្នុងការទទួលបាននូវបទពិសោធន៍នៅក្នុងសង្គម។ជាងនេះទៀតការចូលរួមការងារស្ម័គ្រចិត្តមិនត្រឹមតែសម្រាប់ជាប្រយោជន៍ដល់សង្គមប៉ុណ្ណោះទេតែដើម្បីអភិវឌ្ឍន៍ស្មារតី ចំណេះជំនាញរបស់បុគ្គលរៀងៗខ្លួនម្នាក់ៗផងដែរពិសេសបុគ្គលម្នាក់ៗអាចសិក្សាអំពីកម្រិតនៃការអត់ធ្មត់ តស៊ូ របស់ខ្លួនដើម្បីសម្រេចគោលដៅណាមួយ៕

អត្ថបទ៖ សំអឿន

The post សាស្ត្រាចារ្យ សាផុន វឌ្ឍនៈ៖ សកម្មភាពមនុស្សធម៌ក្រុមគ្រូពេទ្យស្ម័គ្រចិត្ត ហ៊ុន ម៉ានី ចូលរួមសម្រាលបន្ទុកពលរដ្ឋកម្ពុជាច្រើន appeared first on Kampuchea Thmey Daily.

និស្សិតបរទេស ១៤ ប្រទេស កំពុងសិក្សាឯកទេសជំងឺឆ្លងនៅសាកលវិទ្យាល័យសុខាភិបាល

Dy Bunnara — Wed, 19 Oct 2022 09:14:22 +0000

និស្សិតពេទ្យបរទេសចំនួន ២៩ នាក់មកពី ១៤ ប្រទេស កំពុងសិក្សាថ្នាក់បរិញ្ញាបត្រជាន់ខ្ពស់ផ្នែកជំងឺឆ្លងនៅសាកលវិទ្យាល័យវិទ្យាសាស្រ្តសុខាភិបាល (ស.វ.ស)។

លោកសាស្រ្តាចារ្យ សាផុន វឌ្ឍនៈ សាកលវិទ្យាធិការនៃសាកលវិទ្យាល័យវិទ្យាសាស្រ្តសុខាភិបាលបានមានប្រសាសន៍ក្នុងពិធីសំណេះសំណាលជាមួយនិស្សិតវេជ្ជបណ្ឌិតឯកទេស ដែលត្រូវបន្តការសិក្សានៅសាធារណៈរដ្ឋបារាំងក្នុងឆ្នាំ២០២២ កាលពីរសៀលថ្ងៃទី ១៨ តុលាថា សាកលវិទ្យាល័យវិទ្យាសាស្រ្តសុខាភិបាល និងសាកលវិទ្យាល័យ Paris Saclay ប្រទេសបារាំងបានបង្កើតកម្មវិធីបណ្តុះបណ្តាលរួមគ្នា (Join Degree) ថ្នាក់បរិញ្ញាបត្រជាន់ខ្ពស់ ជំងឺឆ្លងកាលពីឆ្នាំ២០១៨ ដោយសិក្សារយៈពេល២ឆ្នាំសម្រាប់ទទួលនិស្សិតមកពីបរទេស។

លោកសាស្រ្តាចារ្យបានបន្តថា និស្សិតបរទេសចំនួន ២៩ នាក់ មកពីប្រទេសចំនួន ១៤ មកសិក្សានៅសាកលវិទ្យាល័យវិទ្យាសាស្រ្តសុខាភិបាលក្នុងនោះមកពីបារាំង ១១ នាក់ ប៉រទុយហ្គាល់ ១នាក់ ស៊ុយអែត១នាក់ ហូល្លង់១នាក់ អេស្ប៉ាញ ២ នាក់ ហា្គណា ៤ នាក់ ថៃ ១ នាក់ ឥណ្ឌូនេស៊ី ១ នាក់ ហ្វីលីពីន១នាក់ កូរ៉េ១នាក់ ឥណ្ឌា ១នាក់ ប៉ាគីស្ថាន១នាក់ បង់ក្លាដេស២នាក់ និងម៉ារ៉ុក១នាក់។

លោកសាស្រ្តាចារ្យបានបន្តទៀតថា ការដែលនិស្សិតបរទេសមកសិក្សានៅកម្ពុជានេះដោយសារសាកលវិទ្យាល័យយើងមានគ្រូល្អៗដែលបង្រៀនព្រោះការសិក្សាបង្រៀនជាសាភាអង់គ្លេសដែលបង្រៀនដោយគ្រូសាកលវិទ្យា គ្រូមកពីបារាំងនិងគ្រូមកពីវិទ្យាស្ថានប៉ាស័្ទរកម្ពុជា។ ម្យ៉ាងទៀតប្រទេសកម្ពុជាមានជំងឺឆ្លងច្រើនប្រភេទដែលបង្កលក្ខណៈងាយស្រួលដល់និស្សិតពេទ្យបរទេសក្នុងការសិក្សាស្រាវជ្រាវផងដែរ។

លោកសាស្រ្តាចារ្យបានបន្ថែមទៀតថា ដោយសារកម្ពុជាមានការបើកចំហរសម្រាប់និស្សិតទៅសិក្សានៅបរទេសនិងទទួលនិស្សិតបរទេសមកសិក្សានៅប្រទេសរបស់ខ្លួនទើបបានជាក្នុងឆ្នាំ២០២២ សាកលវិទ្យាល័យវិទ្យាសាស្រ្តសុខាភិបាល ទទួលបានការជ្រើសរើសដោយ The World’s Universities With Real Impact (WURI) ជាសាកលវិទ្យាល័យមួយ ប្រកបដោយភាពច្នៃប្រឌិត ក្នុងចំណោមសាកលវិទ្យាល័យ នៅលើពិភពលោក ដោយទទួល បានចំណាត់ថ្នាក់ ៥១-១០០ សម្រាប់លទ្ធផលក្នុងការផ្លាស់ប្តូរ និស្សិត និងភាពបើកចំហ (Real Impact in Student Mobility and Openness)។

លោកសាស្រ្តាចារ្យបានបញ្ជាក់ថា ភាពជោគជ័យដែលសាកលវិទ្យាល័យអាចទទួលបានទាំងនេះ កើតមានឡើង ក៏អាស្រ័យដោយមានការចង្អុលបង្ហាញ និងណែនាំដោយផ្ទាល់ ពីសំណាក់លោកសាស្រ្តាចារ្យ រដ្ឋមន្រ្តី និងជាប្រធានក្រុមប្រឹក្សាភិបាលស.វ.ស។

គិតមកដល់ពេលបច្ចុប្បន្ននេះសាកលវិទ្យាល័យវិទ្យាសាស្រ្តសុខាភិបាល មានដៃគូជាតិ និងអន្តរជាតិ សហការចំនួន ៧២ ស្ថាប័ន។ ចាប់ពីឆ្នាំ២០១៤ ស.វ.ស បានទទួលសាស្រ្តាចារ្យបរទេសមកពីប្រទេសបារាំង ជប៉ុន កូរ៉េ និងបណ្តាប្រទេសជាមិត្តនានាដទៃទៀត មកបង្រៀននៅសាកលវិទ្យាល័យ វិទ្យាសាស្រ្តសុខាភិបាលចំនួន ៨៣៣ នាក់។ ស.វ.ស បានទទួលនិស្សិតបរទេស រួមមានបារាំង ជប៉ុន Belgique អាឡឺម៉ង់ មកធ្វើកម្មសិក្សាបានចំនួន ៥២០ នាក់៕

អត្ថបទ៖ សំអឿន

The post និស្សិតបរទេស ១៤ ប្រទេស កំពុងសិក្សាឯកទេសជំងឺឆ្លងនៅសាកលវិទ្យាល័យសុខាភិបាល appeared first on Kampuchea Thmey Daily.

លោក សាផុន វឌ្ឍនៈ Archives - Kampuchea Thmey Daily

និស្សិតពេទ្យជិត ៦០០ នាក់ បន្ថែមទៀត បានចូលរួមជាសមាជិកក្រុមការងារ គ្រូពេទ្យស្ម័គ្រចិត្ត ឯកឧត្ដម ហ៊ុន ម៉ានី

និស្សិតបរទេស ១៤​ ប្រទេស​ ​កំពុង​សិក្សា​ឯកទេស​​ជំងឺ​ឆ្លង​នៅសាកលវិទ្យាល័យសុខាភិបាល

និស្សិតបរទេស ១៤ ប្រទេស កំពុងសិក្សាឯកទេសជំងឺឆ្លងនៅសាកលវិទ្យាល័យសុខាភិបាល