លោក សេដ្ឋា ថាវីស៊ីន Archives - Kampuchea Thmey Daily

ផែថងថាន រងការស៊ើបអង្កេតលើក្រមសីលធម៌ អាចឈានទៅដកដំណែង ដូចលោក ថាវីស៊ីន ដែរ

Rann Reuy — Tue, 24 Jun 2025 03:25:18 +0000

គណៈកម្មាធិការជាតិប្រឆាំងអំពើពុករលួយ (NACC) បានចាប់ផ្តើមបើកការស៊ើបអង្កេតលើករណីបំពានក្រមសីលធម៌ធ្ងន់ធ្ងរ របស់ នាយក្រដ្ឋមន្ត្រី លោកស្រី ផែថងថាន ស៊ីណាវ៉ាត្រ (Paetongtarn Shinawatra) ជុំវិញការលេចធ្លាយសារចរចាតាមទូរស័ព្ទជាមួយសម្តេចតេជោ ហ៊ុន សែន ប្រធានព្រឹទ្ធសភាកម្ពុជា។ ការស៊ើបអង្កេតបឋមនឹងត្រូវរយៈពេល១០ថ្ងៃ។ ក្នុងករណីរកឃើញកំហុសដែលមានចែង លោកស្រី ប្រឈមការដកហូតដំណែង ដូចអតីតនាយករដ្ឋមន្ត្រី សេដ្ឋា ថាវីស៊ីន មកពីគណបក្សភឿថៃដែរ។

លោកស្រី ផែថងថាន ស៊ីណាវ៉ាត្រ និង លោក សេដ្ឋា ថាវីស៊ីន ក្នុងអំឡុងពេលឃោសនាបោះឆ្នោត។ឆ្នាំ២០២៣។ Bangkok Post

នៅថ្ងៃទី២០ខែមិថុនាឆ្នាំ២០២៥ ព្រឹទ្ធសមាជិកនៃប្រទេសថៃបានស្នើសុំជាផ្លូវការឱ្យទាំង NACC និងតុលាការធម្មនុញ្ញពិនិត្យមើលថាតើការប្រព្រឹត្តរបស់នាយករដ្ឋមន្ត្រីគឺស្មើនឹង ការប្រព្រឹត្តខុសក្រមសីលធម៌យ៉ាងធ្ងន់ធ្ងរ»។ ការស៊ើបអង្កេតនេះកើតឡើង ចំពេលមានសម្ពាធកាន់តែខ្លាំងឡើង បន្ទាប់ពីបែកធ្លាយការសន្ទនាតាមទូរស័ព្ទជាមួយសម្តេច ហ៊ុន សែន ដែលបង្កជាព្យុះនយោបាយសម្រាប់ការបន្តតំណែងរបស់នាយករដ្ឋមន្ត្រី ផែថងថាន ក៏ដូចជាអនាគតមិនច្បាស់លាស់នៃការដឹកនាំរដ្ឋាភិបាលចម្រុះរបស់គណបក្សភឿថៃរបស់លោកស្រី។

តាមសេចក្តីរាយការណ៍របស់សារព័ត៌មាន The Nation គណៈកម្មាធិការជាតិប្រឆាំងអំពើពុករលួយ (NACC) នៅថ្ងៃចន្ទ បានឯកភាពជាឯកច្ឆ័ន្ទក្នុងការចាប់ផ្តើមការស៊ើបអង្កេតបឋមលើវីដេអូឃ្លីបដែលលេចធ្លាយនៃការសន្ទនារវាង នាយក្រដ្ឋមន្ត្រី លោកស្រី ផែថងថាន ស៊ីណាវ៉ាត្រ និង សម្តេចតេជោ ហ៊ុន សែន ប្រធានព្រឹទ្ធសភាកម្ពុជា។

គណៈកម្មាការជឿជាក់ថា ខ្លឹមសារអាចបង្កើតជាការបំពានយ៉ាងធ្ងន់ធ្ងរលើបទដ្ឋានសីលធម៌ ជាពិសេសទាក់ទងនឹងការកត់សម្គាល់ដែលទាក់ទងនឹងភាពតានតឹងនៅតាមព្រំដែនកម្ពុជា-ថៃ។

តាមសេចក្តីរាយការណ៍នោះ NACC បានកំណត់ពេលវេលា ១០ថ្ងៃដើម្បីបញ្ចប់ការស៊ើបអង្កេតបឋម។ ដំណើរការនេះនឹងរួមបញ្ចូលការចម្លង និងការបកប្រែយ៉ាងត្រឹមត្រូវនូវសំឡេងពីខ្មែរទៅជាភាសាថៃ ការសាកសួរសាក្សីដែលពាក់ព័ន្ធ និងពិនិត្យមើលច្បាប់ជាធរមាន។

ការត្រួតពិនិត្យនេះក៏នឹងយោងទៅលើសេចក្តីសម្រេចរបស់តុលាការធម្មនុញ្ញពីមុន ដែលនាំទៅដល់ការដកសិទ្ធិរបស់អតីតនាយករដ្ឋមន្ត្រី សេដ្ឋា ថាវីស៊ីន ជុំវិញការតែងតាំង លោក Phichit Chuenban ជារដ្ឋមន្ត្រីទីស្តីការគណៈរដ្ឋមន្ត្រី ដ៏ចម្រូងចម្រាស។

លើសពីនេះ គណៈកម្មការនឹងពិនិត្យថាតើតុលាការធម្មនុញ្ញបានទទួលយកញត្តិពាក់ព័ន្ធទាក់ទងនឹងស្ថានភាពរបស់លោកស្រី ផែថងថាន រួចហើយឬនៅ។ ប្រសិនបើការស៊ើបអង្កេតបឋមរកឃើញហេតុផលគ្រប់គ្រាន់ សំណុំរឿងនឹងបន្តទៅការស៊ើបអង្កេតជាផ្លូវការដោយក្រុមប្រឹក្សា NACC ហើយប្រសិនបើចាំបាច់ ការស៊ើបអង្កេតពេញលេញអាចនឹងត្រូវចាប់ផ្តើម។

បណ្ដឹងសីលធម៌ប្រឆាំងនឹងនាយករដ្ឋមន្ត្រីត្រូវបានចុះហត្ថលេខាដោយសមាជិកព្រឹទ្ធសភាជាច្រើនរូប រួមទាំងប្រធានព្រឹទ្ធសភាលោក Mongkol Surasajja ហើយត្រូវបានដាក់ទៅ NACC រួចហើយ។ ពាក្យបណ្តឹងដូចគ្នានេះក៏ត្រូវបានបញ្ជូនទៅតុលាការធម្មនុញ្ញផងដែរ ដើម្បីពិចារណាថាតើតំណែងនាយករដ្ឋមន្ត្រីរបស់ផែថងថាន គួរតែត្រូវបានបញ្ចប់ ដោយផ្អែកលើសកម្មភាពរបស់នាងនៅក្នុងការសន្ទនាដែលលេចធ្លាយនោះដែរទេ៕

រ៉ាន់ រើយ

លោកស្រី ផែថងថាន ស៊ីណាវ៉ាត្រ និង លោក សេដ្ឋា ថាវីស៊ីន ថតជុំគ្នាជាមួយតំណាងរាស្ត្រ បក្សភឿថៃ។

The post ផែថងថាន រងការស៊ើបអង្កេតលើក្រមសីលធម៌ អាចឈានទៅដកដំណែង ដូចលោក ថាវីស៊ីន ដែរ appeared first on Kampuchea Thmey Daily.

លោក សេដ្ឋា ថាវីស៊ីន បង្ហើបគម្រោងព្រែកជីក «Kra» ស្របពេលថាក់ស៊ីនទៅខាងត្បូង

Rann Reuy — Mon, 24 Feb 2025 10:42:03 +0000

អតីតនាយករដ្ឋមន្ត្រីដែលកាន់អំណាច១ឆ្នាំ លោក សេដ្ឋា ថាវីស៊ីន បានផ្តល់បទសម្ភាសន៍ដល់សារព័ត៌មានថៃនៅថ្ងៃចន្ទនេះ ដោយបង្ហើបប្រាប់ថា គម្រោងព្រែកជីកក្រា (Kra Canal) ដែលថៃហៅថា ជាស្ពានដីគោគស្ថិតនៅភាគខាងត្បូងប្រទេសនឹងផ្តល់ផលប្រយោជន៍ធំធេងដល់សេដ្ឋកិច្ចរបស់ប្រទេសថៃ។

អតីតនាយករដ្ឋមន្ត្រីដែលកាន់អំណាច១ឆ្នាំ លោក សេដ្ឋា ថាវីស៊ីន ធ្វើបទបង្ហាញដល់អ្នកវិនិយោគិនពេលលោកកាន់អំណាច។ X

សារព័ត៌មានថៃ Khaosod និងសារព័ត៌មាន Matichon បានជួបសម្ភាសន៍អតីតនាយករដ្ឋមន្ត្រីថៃ និងជាអ្នកជំនួញក្នុងវិស័យអចលនទ្រព្យដ៏ចំណាន ស្របពេលដែល លោក ថាក់ស៊ីន ស៊ីណាវ៉ាត្រា កំពុងបំពេញទស្សនកិច្ចក្នុងខេត្តភាគខាងត្បូងថៃ។ លោក ថាក់ស៊ីន អតីតនាយករដ្ឋមន្ត្រីដ៏មានឥទ្ធិពលក្នុងទសវត្សរ៍ឆ្នាំ២០០០ និងជាឪពុកនាយករដ្ឋមន្ត្រី ផែថងថាន ស៊ីណាវ៉ាត្រា នឹងត្រូវគេជឿថា មានឥទ្ធិពលយ៉ាងខ្លាំងក្នុងរដ្ឋាភិបាលថៃបច្ចុប្បន្ន។

លោក សេដ្ឋា ថាវីស៊ីន ត្រូវបានស្រង់សម្តី៖«គម្រោងសាងសង់ស្ពានដីគោកដែលស្នើឡើងនេះ ប្រសិនបើជោគជ័យនឹងផ្តល់ផលប្រយោជន៍យ៉ាងច្រើនដល់ប្រទេសថៃ ហើយប្រែក្លាយព្រះរាជាណាចក្រទៅជាប្រទេសស្វីសនៃបូព៌ា»។

អតីតនាយករដ្ឋមន្ត្រី សេដ្ឋា ថាវីស៊ីន បាននិយាយថា ផ្លូវសមុទ្រឆ្លងកាត់ច្រកសមុទ្រ Melacca មានការកកស្ទះខ្លាំង ហើយប្រទេសថៃនឹងទទួលបានអត្ថប្រយោជន៍ផ្នែកសេដ្ឋកិច្ច ប្រសិនបើវាអាចផ្តល់ជម្រើសជំនួស។

លោក សេដ្ឋា បានបន្ថែមថា ដោយសារថៃមិនចូលរួមក្នុងការប្រកួតប្រជែងរវាងអាមេរិក និងចិន មហាអំណាចទាំងពីរអាចជឿជាក់បានថា កប៉ាល់ដឹកទំនិញដែលធ្វើដំណើរឆ្លងកាត់ព្រែកជែកបស់ប្រទេសថៃនឹងមិនមានការរំខានឡើយ។

លោក ថាក់ស៊ីនបានធ្វើដំណើរទៅកាន់ប្រទេសថៃនៅថ្ងៃទី២៣ខែកុម្ភៈ ហើយនៅមុនដំណើរទស្សនកិច្ចទៅកាន់ភាគខាងត្បូងដែលតែងមានអំពើហិង្សា និងជាតំបន់ដែលទាមទារបំបែករដ្ឋក្នុងអាណត្តិរបស់លោកថាក់ស៊ីនគ្រប់គ្រងប្រទេសក្នុងទសវត្សរ៍ឆ្នាំ២០០០។

អំពើហិង្សានៅខេត្តយ៉ាឡា បណ្តាលឲ្យជនស៊ីវិលម្នាក់បានស្លាប់ និង១១នាក់ផ្សេងទៀតបានរងរបួស ក្នុងនោះមានប៉ូលិស៧នាក់ នៅពេលដែលគ្រាប់បែកបានផ្ទុះនៅខាងក្រៅផ្សារទំនើបមួយកន្លែងក្នុងស្រុក Bannang Sata កាលពីយប់ថ្ងៃទី២២ខែកុម្ភៈ។

នៅខេត្តណារ៉ាធីវ៉ាត់ គ្រាប់បែកមួយគ្រាប់ទៀតបានផ្ទុះឡើងលើរថយន្តភីកអាប់របស់ក្រុមពន្លត់អគ្គិភ័យដែលចតនៅក្បែរប៉មបញ្ជាការចរាចរណ៍ផ្លូវអាកាសនៅព្រលានយន្តហោះណារ៉ាធីវ៉ាត់ នៅព្រឹកថ្ងៃទី២៣ខែកុម្ភៈ៕

The post លោក សេដ្ឋា ថាវីស៊ីន បង្ហើបគម្រោងព្រែកជីក «Kra» ស្របពេលថាក់ស៊ីនទៅខាងត្បូង appeared first on Kampuchea Thmey Daily.

ប្រវត្តិត្រួសៗរបស់កូនស្រីពៅលោកថាក់ស៊ីនដែលទំនងក្លាយជានាយករដ្ឋមន្ត្រីថៃទី៣១

Rann Reuy — Fri, 16 Aug 2024 00:59:58 +0000

មានប្រវត្តិរៀនសូត្រខាងវិទ្យាសាស្រ្តនយោបាយ គ្រប់គ្រងធុរកិច្ចនិងជាអ្នកជំនួញ មុនប្រឡូកចូលក្នុងវិស័យនយោបាយដ៏លេចធ្លោនៅមុនការបោះឆ្នោតសកលឆ្នាំ២០២៣ លោកស្រី ផែថងថាន ស៊ីណាវ៉ាត្រា (Paetongtarn Shinawatra) ដែលជាកូនស្រីពៅរបស់អតីតៈនាយករដ្ឋមន្ត្រីថាក់ស៊ីនស៊ីណាវ៉ាត្រា ពេលនេះកំពុងឆ្ពោះទៅកាន់ដំណែងនាយករដ្ឋមន្ត្រីថៃទី៣១។

លោកស្រី ផែថងថាន ស៊ីណាវ៉ាត្រា ធ្លាប់អមដំណើរឪពុកលោក ថាក់ស៊ីន ស៊ីណាវ៉ាត្រា ជាលក្ខណៈគ្រួសារ មកកាន់កម្ពុជាកាលខែមីនាឆ្នាំ២០២៤នេះ ដើម្បីជួបជុំសួរសុខទុក្ខជាលក្ខណៈមិត្តភាពផង និងជាគ្រួសារផង ជាមួយសម្តេចតេជោ ហ៊ុន សែន។

ការប្រឡូកចូលនយោបាយរបស់កូនស្រីពៅ លោកថាក់ស៊ីន បានធ្វើឱ្យគណបក្សភឿថៃកើនឡើងប្រជាប្រិយភាពក្រឺតៗកាលពីអំឡុងខែមិថុនាឆ្នាំ២០២៣ ពេលដែលគណបក្សនេះបានតែងតាំងលោកស្រីជាអ្នកដឹកនាំគណបក្ស និងឈានទៅកាន់តំណែងបេក្ខភាពនាយករដ្ឋមន្ត្រីរបស់គណបក្សនេះ។

បន្ទាប់ពីតុលាការធម្មនុញ្ញថៃសកាលពីថ្ងៃអង្គារបានបោះឆ្នោតដកដំណែងនាយករដ្ឋមន្ត្រី សេដ្ឋា ថាវីស៊ីន នៃគណបក្សភឿថៃ ដែលឡើងកាន់អំណាចមិនដល់១ឆ្នាំផងនោះ ពេលនេះគណបក្សនេះដែលជាប្រធានសម្ព័ន្ធភាពរដ្ឋាភិបាលចម្រុះ បានសម្រេចតែងតាំងលោកស្រី ផែថងថាន ជាបេក្ខភាពនាយករដ្ឋមន្ត្រីសម្រាប់ការបោះឆ្នោតសំដែងការទុកចិត្តពីរដ្ឋសភានៅថ្ងៃសុក្រនេះ។

ខាងក្រោមនេះជាប្រវត្តិត្រួសៗរបស់លោកស្រី លោកស្រី ផែថងថាន ស៊ីណាវ៉ាត្រា (Paetongtarn Shinawatra)

មិនទាន់មានការផ្សព្វផ្សាយទូលំទូលាយ ពីប្រវត្តិកូនស្រីពៅរបស់លោកថាក់ស៊ីនស៊ីណាវ៉ាត្រា អតីតនាយករដ្ឋមន្ត្រីដ៏មានប្រជាប្រិយលោកថាក់ស៊ីន ដែលបានដឹកនាំប្រទេសថៃ ពីឆ្នាំ ២០០១ ដល់ឆ្នាំ ២០០៦ ប៉ុន្តែមានការចុះផ្សាយខ្លះដែលនាំទៅដល់ប្រវត្តិលោកស្រី ផែថងថាន។

យោងតាមគេហទំព័រ www.prestigeonline.com អ្នកនាង ផែថងថាន (Paetongtarn) បានបញ្ចប់ថា្នក់បរិញ្ញាបត្រផ្នែកវិទ្យាសាស្ត្រនយោបាយ ដែលជំនាញខាងសង្គមវិទ្យា (Sociology) និងនរវិទ្យា (Anthropology) ពីសាកលវិទ្យាល័យ Chulalongkorn ក្នុងប្រទេសថៃ មុនបន្តការសិក្សាថ្នាក់អនុបណ្ឌិតផ្នែកគ្រប់គ្រងសណ្ឋាគារអន្តរជាតិ នៅសាកលវិទ្យាល័យ Surrey នៅអង់គ្លេស។

គេហទំព័រដែលបង្ហាញពីប្រវត្តិអ្នកជំនួញ ឱ្យដឹងទៀតថា ក្រៅពីតួនាទីគ្រប់គ្រង អ្នកនាងផែថងថាន ក៏ជាសមាជិកក្រុមប្រឹក្សាភិបាល សម្រាប់ធុរកិច្ចផ្សេងៗទៀត ក្នុងទ្រព្យសកម្មរបស់ក្រុមហ៊ុន ដូចជាសណ្ឋាគារ Rosewood Bangkok និងសណ្ឋាគារ Thames Valley Khao Yai Hotel ព្រមទាំងកន្លែងវាយកូនគោល Alpine Golf Club។

អ្នកនាង Paetongtarn បានរៀបការជាមួយលោក Pidok Por Sooksawas (Por) ដែលជាអាកាសយានិក នៅក្រុមហ៊ុនអាកាសចរណ៍ Thai Aviation Service ហើយជាមួយគ្នានេះ អ្នកនាងបាននិយាយដោយឥតលាក់លៀមថា អ្នកនាងចូលចិត្តការដើរកម្សាន្ត ដែលជាការជំរុញទឹកចិត្ត ដើម្បីយកមកអភិវឌ្ឍសណ្ឋាគាររបស់នាងឱ្យមានភាពកាន់តែប្រសើរឡើងៗក្នុងប្រទេសថៃ។ នេះផ្អែកតាមគេហទំព័រដដែលនេះ។

បណ្តាញសារព័ត៌មាន The Nation ដែលមានមូលដ្ឋាននៅប្រទេសថៃ បានផ្សព្វផ្សាយកាលពីមុនការបោះឆ្នោតប្រទេសថៃក្នុងខែឧសភាឆ្នាំ២០២៣ ឱ្យដឹងថា អ្នកនាងបានបង្ហាញពីប្រជាប្រិយភាពយ៉ាងខ្លាំង ពេលអ្នកនាងធ្វើដំណើរទៅភាគឦសានប្រទេស ហើយអ្នកគាំទ្រជាច្រើនបានលើកបង្ហាញរូបថតរបស់អ្នកនាង។ ក្នុងពេលនោះ បងប្រុសរបស់នាង ដែលបានអមដំណើរទៅកាន់ទីនោះដែរ បានស្រែកប្រាប់ហ្វូងអ្នកគាំទ្រថា «គ្រួសារភឿថៃ» ម្តងហើយម្តងទៀត។

លោកបានប្រាប់ថា ប្រជាជនមានក្តីសង្ឃឹមខ្ពស់ ចំពោះអ្នកនាងប្រធាន Paetongtarn បន្ទាប់ពី «ការលំបាក៨ឆ្នាំ» ដោយសំដៅទៅលើរយៈពេលចាប់តាំងពីរដ្ឋប្រហារយោធាឆ្នាំ ២០១៤ គឺជាពេលវេលាដែលលោក ប្រាយុធ ដឹកនាំរដ្ឋប្រហារទម្លាក់លោកស្រីយីងឡាក់ ដែលពីតំណែងនាយករដ្ឋមន្ត្រី៕

ដោយ រ៉ាន់ រើយ

The post ប្រវត្តិត្រួសៗរបស់កូនស្រីពៅលោកថាក់ស៊ីនដែលទំនងក្លាយជានាយករដ្ឋមន្ត្រីថៃទី៣១ appeared first on Kampuchea Thmey Daily.

តើការដកតំណែងនាយករដ្ឋមន្រ្តីរបស់លោក សេដ្ឋា អាចប៉ះពាល់សេដ្ឋកិច្ចថៃដោយរបៀបណា?

Huon Dina — Thu, 15 Aug 2024 10:29:20 +0000

ខ្វះតែ១សប្ដាហ៍ប៉ុណ្ណោះដល់គម្រប់ខួប១ឆ្នាំនៃការទទួលបានអំណាចកំពូលរបស់ប្រទេស តុលាការធម្មនុញ្ញថៃកាលពីថ្ងៃពុធ បានសម្រេចដកតំណែងនាយករដ្ឋមន្រ្តីរបស់លោក សេដ្ឋា ថាវីស៊ីន ក្រោយរកឃើញថាលោកមានពិរុទ្ធពីបទរំលោភលើក្រមសីលធម៌ ចំពោះការតែងតាំងមេធាវីដែលធ្លាប់រងការផ្តន្ទាទោសព្រហ្មទណ្ឌ ឱ្យបម្រើការក្នុងគណៈរដ្ឋមន្ត្រីរបស់លោក។

គេមើលឃើញថា សាលក្រមរបស់តុលាការនេះ កំពុងបន្ថែមភាពអាប់អួរទៅលើបរិយាកាសនយោបាយក្នុងស្រុករបស់ប្រទេសថៃ ក្រោយតុលាការដដែលកាលពីថ្ងៃពុធសប្ដាហ៍មុន បានសម្រេចរំលាយគណបក្សចលនាឆ្ពោះទៅមុខ (MFP) ដែលទទួលបានសម្លេងគាំទ្រច្រើនជាងគេបំផុតក្នុងការបោះឆ្នោតកាលពីខែឧសភាឆ្នាំមុន។

សាលក្រមដដែល ក៏ប្រកាសឡើងផងដែរ ខណៈប្រទេសថៃមើលឃើញពីដំណើរមិនសូវស្រួលនៃសេដ្ឋកិច្ច ដែលញំញីដោយសារកម្ចីពិបាកទារខ្ពស់ កម្សោយនៃការចំណាយ-ការប្រើប្រាស់ និងការធ្លាក់ចុះនៃផលិតកម្ម និងការបិទរោងចក្រជាដើម។ អ្នកវិភាគមើលឃើញថា ភាពស្រពិចស្រពិលនៃស្ថានភាពនយោបាយបច្ចុប្បន្នរបស់ថៃ និងចុងក្រោយបំផុតគឺការដកតំណែងលោក សេដ្ឋា នឹងធ្វើឱ្យកំណើនសេដ្ឋកិច្ចដែលដើរអូសជើងរួចហើយនោះ បន្តត្រដាបត្រដួស។

កាលពីចុងខែមុន ក្រសួងហិរញ្ញវត្ថុថៃបានព្យាករថា សេដ្ឋកិច្ចរបស់ប្រទេសសម្រាប់ឆ្នាំ ២០២៤ នេះ នឹងមានកំណើន ២,៧ ភាគរយ ដោយសារតែភាពរឹងមាំនៃលំហូរភ្ញៀវទេសចរបរទេស និងកំណើននៃការនាំចេញ។ ការព្យាករនេះ មិនបានរាប់បញ្ជូលនូវគោលនយោបាយចម្រូងចម្រាស់ «កាបូបឌីជីថល» ដែលរដ្ឋាភិបាលថៃរបស់លោក សេដ្ឋា ត្រូវចំណាយប្រាក់ជាង ១២ ប៊ីលានដុល្លារ ដើម្បីចែកពលរដ្ឋថៃក្នុងគោលបំណងជំរុញការចំណាយរបស់ក្នុងស្រុកនោះទេ។ បើតាមក្រសួង គោលនយោបាយនេះ អាចជួញជំរុញសេដ្ឋកិច្ចពី ១,២ ដល់ ១,៨ ភាគរយ បន្ថែមទៀត ពីលើការព្យាករ។

យ៉ាងណាមិញ អ្នកវិភាគខ្លះព្រួយបារម្ភថា ការដកលោក សេដ្ឋា ចេញពីតំណែងអាចនឹងប៉ះពាល់ដល់គំនិតផ្ដួចផ្ដើមសេដ្ឋកិច្ចមួយនេះ ក្នុងចំណោមគំនិតផ្ដួចផ្ដើមផ្សេងៗទៀត ដែលប្រកាសឡើងដោយរដ្ឋាភិបាលរបស់លោក សេដ្ឋា។

ប៉ុន្តែនេះគ្រាន់តែជាការព្រួយបារម្ភមួយជ្រុងប៉ុណ្ណោះ។ សាលក្រមកាលពីថ្ងៃពុធរបស់តុលាការ គឺជារឿងដ៏គួរឱ្យភ្ញាក់ផ្អើលសម្រាប់សហព័ន្ធឧស្សាហកម្មថៃ (FTI) ដែលបានបានព្រមានរួចមកហើយថា អស្ថិរភាពនយោបាយនៅក្នុងប្រទេសថៃ ទាំងការរំលាយគណបក្ស MFP និងការដកតំណែងលោក សេដ្ឋា នឹងបង្កផលប៉ះពាល់ផ្នែកសេដ្ឋកិច្ច ជាពិសេសការវិនិយោគ។

ប្រធាន FTI លោក Kriangkrai Thiennukul បានលើកឡើងថា សេចក្តីសម្រេចរបស់តុលាការថៃ បានធ្វើឱ្យ វិនិយោគិនមានការភ្ញាក់ផ្អើល និងបង្ខំពួកគេឱ្យផ្អាកការវិនិយោគរបស់ខ្លួនសិន។ លោកនិយាយថា ថៃបច្ចុប្បន្ន កំពុងប្រឈមមុខនឹងបញ្ហាសេដ្ឋកិច្ច ចំពេលពិភពលោកស្ថិតនៅក្នុងភាពមិនប្រាកដប្រជា ដូច្នេះវាមានសារៈសំខាន់ណាស់ ដែលប្រទេសនេះត្រូវស្តារទំនុកចិត្ត ទាក់ទាញការវិនិយោគថ្មីៗ និងប្រមូលការចូលរួមទាំងពីវិនិយោគិនថៃ និងអន្តរជាតិ។

លោក Kriangkrai បាននិយាយយ៉ាងដូច្នេះថា៖ «នេះគឺជារយៈពេលដ៏សំខាន់មួយ។ សម្រាប់អ្នកវិនិយោគ ស្ថិរភាពនយោបាយគឺជារឿងសំខាន់បំផុត។ យើងទាមទារឱ្យមានការគ្រប់គ្រងប្រកបដោយស្ថិរភាព និងមិនផ្លាស់ប្ដូរ។ ការផ្លាស់ប្តូរជាញឹកញាប់ក្នុងគណបក្សនយោបាយ បានរំខានដល់ការបន្តគោលនយោបាយរបស់រដ្ឋាភិបាល ដែលនាំឱ្យខ្វះភាពស៊ីសង្វាក់គ្នា»។ នេះបើតាមការស្រង់សម្ដីរបស់កាសែត The Nation។

អ្នកជំនាញដដែល បានលើកឡើងបន្តថា វិនិយោគិនមួយចំនួនដែលពន្យារពេលសម្រេចចិត្តក្នុងការវិនិយោគលើគម្រោងថ្មី អាចសម្រេចចិត្តមិនពង្រីកអាជីវកម្មរបស់ខ្លួនក្នុងប្រទេសថៃ ហើយវាពិតជាអាចទៅរួច ដែលវិនិយោគិនទាំងនេះនឹងផ្លាស់ប្តូរផែនការវិនិយោគទៅបណ្ដាប្រទេសជិតខាងវិញ។

មុនតុលាការប្រកាសសាលក្រម មានវិនិយោគិនជាច្រើនបានសាកសួរ FTI អំពីទស្សនវិស័យនយោបាយក្នុងប្រទេសថៃ ដោយសារពួកគេចង់បានព័ត៌មានច្បាស់លាស់ និងត្រឹមត្រូវ ដើម្បីរៀបចំផែនការវិនិយោគរបស់ខ្លួនក្នុងប្រទេសនេះ។ លោក Kriangkrai បានសង្កត់ធ្ងន់ថា ភាពមិនប្រាកដប្រជា ជាពិសេសក្នុងវិស័យនយោបាយ អាចធ្វើឲ្យប្រទេសថៃបាត់បង់ឱកាសអាជីវកម្មជាច្រើន ជាពិសេសពីវិនិយោគិនមកពីអាមេរិក ឬអឺរ៉ុប ខណៈវិនិយោគិននៅអាស៊ី ដូចជាជប៉ុន ដែលឈរជើងនៅថៃរាប់ទសវត្សរ៍មកហើយនោះ អាចចាប់ផ្តើមសម្របខ្លួននឹងស្ថានការណ៍នយោបាយ ហើយកែសម្រួលយុទ្ធសាស្ត្ររបស់ពួកគេ។

អនុរដ្ឋមន្ត្រីស្តីទីហិរញ្ញវត្ថុថៃ លោក Julapun Amornvivat បានយល់ស្របនឹងការព្រួយបារម្ភរបស់លោក Kriangkrai ដោយថ្លែងថា ការដកតំណែងនាយករដ្ឋមន្ត្រី ទំនងជាប៉ះពាល់ដល់ទំនុកចិត្តរបស់វិនិយោគិន និងប៉ះពាល់ដល់ការអនុវត្តគោលនយោបាយផ្សេងៗរបស់រដ្ឋាភិបាល។

ទាក់ទិននឹងគោលនយោបាយកាបូបឌីជីថល លោក Julapun បានប្រាប់អ្នកយកព័ត៌មាននៅសភាថៃនាថ្ងៃព្រហស្បតិ៍ថា វានឹងអាស្រ័យលើនាយករដ្ឋមន្រ្តី និងគណៈរដ្ឋមន្រ្តីថ្មី។ ការណ៍ថ្លែងបែបនេះ កំពុងធ្វើឱ្យមានភាពស្រពិចស្រពិលបន្ថែមទៀត ក្រោយមានសេចក្ដីរាយការណ៍ថា អតីតនាយករដ្ឋមន្រ្តី លោក ថាក់ស៊ីន ស៊ីណាវ៉ាត្រា ដែលជាស្ថាបនិកគណបក្សភឿថៃ បានប្រាប់លោកស្រី ផែតងតាន ស៊ីណាវ៉ាត្រា ដែលជាប្រធានបក្សបច្ចុប្បន្ន ឱ្យទម្លាក់ចោលនូវគម្រោង «កាបូបឌីជីថល» ដោយសារតែសេដ្ឋកិច្ចទន់ខ្សោយ។ ធនាគារកណ្ដាលថៃ និងសេដ្ឋវិទូ នាពេលកន្លងមក ប្រឆាំងនឹងគម្រោងនេះ ដោយថា វានឹងបង្កកំណើនអតិផរណា។

ទោះជាយ៉ាងណាក៏ដោយ លោក Julapun លើកឡើងថា គណបក្សថៃនឹងយកគម្រោងកាបូបឌីជីថលទៅចរចាជាមួយក្រុមនយោបាយចម្រុះរបស់ខ្លួន ដែលបង្កើតឡើងក្រោយការបោះឆ្នោតឆ្នាំមុន ដើម្បីបង្កើតគណៈរដ្ឋមន្ត្រីថ្មី។ អ្នកវិភាគខ្លះមានសុទិដ្ឋិនិយមថា គម្រោងកាបូបឌីជីថល ដែលគ្រោងអនុវត្តនៅចុងឆ្នាំ ២០២៤ នេះ នឹងវិវត្តទៅមុខដោយជោគជ័យ ដោយសារតែគណបក្សភឿថៃមានសម្លេងភាគច្រើនក្នុងរដ្ឋាភិបាលចម្រុះ។

ទោះបីជាយ៉ាងណាក៏ដោយ អ្នកជំនាញបានលើកឡើងថា ការដកតំណែងលោក សេដ្ឋា នៅតែប៉ះពាល់ដល់គម្រោងសេដ្ឋកិច្ចផ្សេងៗទៀតដូចជា ផែនការរៀបចំរចនាសម្ព័ន្ធសេដ្ឋកិច្ចដើម្បីជំរុញកំណើន មូលនិធិថ្មី Vayupak Fund ដែលគាំទ្រដល់ការអភិវឌ្ឍ និងជំរុញការវិនិយោគលើទីផ្សារមូលធនរបស់ថៃ និងផែនការបញ្ចេញថវិកាជាតិជាដើម។

ទន្ទឹមនឹងនេះ ប្រធានក្រុមប្រឹក្សាអ្នកដឹកជញ្ជូនជាតិថៃ លោក Chaichan Chareonsuk បានហៅសាលក្រមរបស់តុលាការធម្មនុញ្ញថៃចំពោះលោក សេដ្ឋា ថាជាការកំណត់រដ្ឋាភិបាលសារជាថ្មី ហើយដំណើរការជ្រើសរើសមេដឹកនាំថ្មីមិនគួរអូសបន្លាយយូរទេ ដើម្បីកុំឱ្យមានផលប៉ះពាល់ធ្ងន់ធ្ងរដល់ការនាំចេញ និងការវិនិយោគផ្ទាល់ពីបរទេស ដែលធ្វើឱ្យរាំងស្ទះដល់ការស្ទុះងើបនៃកំណើនសេដ្ឋកិច្ច។ នេះបើតាមការចុះ ផ្សាយរបស់កាសែតបាងកកប៉ុស្តិ៍។

ស្រដៀងគ្នានឹងអ្នកជំនាញផ្សេងទៀតដែរ លោក Somjai Phagaphasvivat អ្នកវិភាគនយោបាយ និងសេដ្ឋកិច្ចឯករាជ្យ បានប្រាប់បាងកកប៉ុស្តិ៍ ថា ការដកតំណែងរបស់លោក សេដ្ឋា ថា ទំនងជាមានឥទ្ធិពលផ្លូវចិត្តក្នុងរយៈពេលខ្លី លើផ្សារហ៊ុនថៃ ដែលអាចបង្កឱ្យវិនិយោគិគបរទេសពន្យារពេលវិនិយោគក្នុងប្រទេសថៃ។

ដូចការលើកឡើងនេះ តម្លៃប្រាក់បាតថៃ ដែលធ្លាក់ចុះប្រហែល ៣ ភាគរយរួចទៅហើយនៅឆ្នាំនេះ បានធ្លាក់ចុះ ០,១ ភាគរយ នៅថ្ងៃព្រហស្បតិ៍នេះ ខណៈភាគហ៊ុននៅផ្សារហ៊ុនថៃ (SET) បានធ្លាក់ចុះ ០,៨ ភាគរយ។ រាប់តាំងពីដើមឆ្នាំមក ទីផ្សារភាគហ៊ុនថៃបានធ្លាក់ចុះ ៩,៤ ភាគរយ ដែលនេះជាអត្រាអាក្រក់បំផុតក្នុងចំណោមទីផ្សារភាគហ៊ុនអាស៊ី ក្រោយធ្លាក់ចុះប្រមាណ ១៥ ភាគរយ កាលពីឆ្នាំមុន។ កន្លងមក អ្នកជំនាញបានទាញភ្ជាប់ភាពមិនច្បាស់លាស់នៃនយោបាយថៃ ទៅនឹងការធ្លាក់ចុះនៃទីផ្សារភាគហ៊ុនរបស់ប្រទេសនេះ បន្ថែមពីលើតម្លៃថោកនៃប្រាក់បាត និងកំណើនសេដ្ឋកិច្ចយឺតយ៉ាវជាដើម។

កាលពីឆ្នាំមុន សេដ្ឋកិច្ចថៃមានកំណើនត្រឹមតែ ១,៩ ភាគរយប៉ុណ្ណោះ ដែលយឺតយ៉ាវជាងប្រទេសក្នុងតំបន់ផ្សេងៗទៀត។ យ៉ាងណាមិញ ទីភ្នាក់ងារសារព័ត៌មានបានចុះផ្សាយនៅថ្ងៃព្រហស្បតិ៍នេះថា សេដ្ឋកិច្ចថៃរំពឹងថានឹងកើនឡើងពី ១,៥ ភាគរយក្នុងត្រីមាសទី១ ដល់ ២,១ ភាគរយ នៅត្រីមាសទី ២ ចន្លោះពីខែមេសា-មិថុនា ឆ្នាំ ២០២៤ ដែលជំរុញដោយកំណើននៃការចំណាយរបស់រដ្ឋាភិបាល និងការវិនិយោគ ទោះបីការប្រើប្រាស់ខ្សោយ ហើយការនាំចេញមានកំណើនយឺតយ៉ាវដោយសារភាពស្រពិចស្រពិលជាសកល និងក្ដីព្រួយបារម្ភពីការធ្លាក់ចុះនៃសេដ្ឋកិច្ចអាមេរិកក៏ដោយ។

ទោះបីជាកត់ត្រាពីភាពប្រសើរឡើងនេះក៏ដោយ អ្នកជំនាញនៅតែគូសបញ្ជាក់ពីហានិភ័យនយោបាយ ដែលអាចធ្វើឱ្យការព្យាកររបស់ក្រសួងសេដ្ឋកិច្ចស្ថិតនៅលើផ្លូវមិនច្បាស់លាស់។ យ៉ាងណាមិញ អ្នកខ្លះលើកឡើងថា ការដកដំណែងរបស់លោក សេដ្ឋា មិនប៉ះពាល់ដល់កំណើនសេដ្ឋកិច្ចថៃនោះទេ ដរាបណាគណបក្សភឿថៃ នៅតែជាស្នូលនៃរដ្ឋាភិបាលចម្រុះប៉ុន្តែវានៅតែទាមទារឱ្យថាមានស្ថេរភាពនយោបាយ ឆាប់តាមតែអាចធ្វើទៅបាន។

ហើយដើម្បីកាត់បន្ថយហានិភ័យផ្សេងៗ អ្នកជំនាញស្នើសុំឱ្យ រដ្ឋាភិបាលថ្មីពន្លឿនលើដំណើរការនាំផែនការសេដ្ឋកិច្ចទាំងអស់ ដើម្បីកុំឱ្យរាំងស្ទះដល់ការជំរុញសេដ្ឋកិច្ច ខណៈខ្លះស្នើឱ្យរដ្ឋាភិបាលថ្មីបន្តគោលនយោបាយដែលមានស្រាប់ ដែលដាក់ចេញដោយរដ្ឋាភិបាលរបស់លោក សេដ្ឋា ដូចជាគោលនយោបាយទេសចរណ៍ Ignite Thailand ផែនការមជ្ឈមណ្ឌលអាកាសចរណ៍ និងការលើកលែងទិដ្ឋាការជាដើម។

កន្លងមក រដ្ឋាភិបាលថៃបានអនុវត្តគោលនយោបាយ និងលើកកម្ពស់វិស័យទេសចរណ៍ រួមទាំងការលើកលែងទិដ្ឋាការនៅពេលធ្វើដំណើរចូលប្រទេសថៃ សម្រាប់ពលរដ្ឋពី ៩៣ ប្រទេស ទន្ទឹមនឹងការជំរុញប្រទេសឱ្យក្លាយជាមជ្ឈមណ្ឌលប្រគុំតន្ត្រី និងព្រឹត្តិការណ៍នានាជាដើម។ ខណៈវិស័យទេសចរណ៍កំពុងដើរតួនាទីសំខាន់សម្រាប់កំណើនសេដ្ឋកិច្ចថៃបច្ចុប្បន្ន មន្រ្តីថៃទទូចថា ការដកលោក សេដ្ឋា នឹងមិនគួរប៉ះពាល់ដល់លំហូរទេសចរបរទេសនោះទេ៕

The post តើការដកតំណែងនាយករដ្ឋមន្រ្តីរបស់លោក សេដ្ឋា អាចប៉ះពាល់សេដ្ឋកិច្ចថៃដោយរបៀបណា? appeared first on Kampuchea Thmey Daily.

Breaking News! តុលាការថៃ ដកតំណែងលោក សេដ្ឋា ក្រោយកាន់អំណាច មិនដល់មួយឆ្នាំផង

Sok Sovann — Wed, 14 Aug 2024 09:09:56 +0000

តុលាការធម្មនុញ្ញរបស់ប្រទេសថៃនៅថ្ងៃពុធទី១៤ខែសីហា បានចេញសាលក្រម ដកតំណែងនាយករដ្ឋមន្រ្តី សេដ្ឋា ថាវីស៊ីន ដោយសាររំលោភរដ្ឋធម្មនុញ្ញ ជុំវិញការតែងតាំងអតីតមេធាវីដែលធ្លាប់ជាប់ពន្ធនាគារ ឲ្យចូលធ្វើការក្នុងគណៈរដ្ឋមន្ត្រី។

លោក សេដ្ឋា ថាវីស៊ីន (រូបថត៖ AP)

សាលក្រមរបស់តុលាការ គឺពាក់ព័ន្ធការដែលលោក សេដ្ឋា តែងតាំងអតីតមេធាវីមានទំនាក់ទំនងជាមួយគ្រួសារត្រកូល ស៊ីណាវ៉ាត្រា ឈ្មោះថា Pichit Chuenban ដែលធ្លាប់ជាប់ពន្ធនាគាររយៈពេល៦ខែ ពីបទមើលងាយតុលាការក្នុងឆ្នាំ២០០៨។

ត្បិតតែលោក Pichit បានលាលែងពីគណៈរដ្ឋមន្ត្រី ក្នុងគោលបំណងជួយសង្គ្រោះលោក សេដ្ឋា ទៅហើយក៏ដោយ ប៉ុន្តែតុលាការនៅតែបន្តនីតិវិធីនេះ ហើយលោក សេដ្ឋា ក៏មិនទទួលស្គាល់កំហុសនេះដែរ។

សូមបញ្ជាក់ថា លោក សេដ្ឋា ក្លាយជានាយករដ្ឋមន្ត្រីថៃទី៤ ក្នុងរយៈពេល១៦ឆ្នាំ ដែលត្រូវបានតុលាការធម្មនុញ្ញដកចេញពីតំណែង។

ការដកតំណែងនេះកើតឡើង បន្ទាប់ពីលោក សេដ្ឋា កាន់អំណាចមិនដល់មួយឆ្នាំផង។ ដូច្នេះមានន័យថា សភាត្រូវតែកោះប្រជុំដើម្បីជ្រើសរើសនាយករដ្ឋមន្ត្រីថ្មី៕

អត្ថបទ៖ សុខ សុវណ្ណ

ចុចអាន៖ តុលាការថៃ កំណត់ថ្ងៃបើកសវនាការរឿងក្ដីដកតំណែងលោក សេដ្ឋា

The post Breaking News! តុលាការថៃ ដកតំណែងលោក សេដ្ឋា ក្រោយកាន់អំណាច មិនដល់មួយឆ្នាំផង appeared first on Kampuchea Thmey Daily.

តុលាការថៃ កំណត់ថ្ងៃបើកសវនាការរឿងក្ដីដកតំណែងលោក សេដ្ឋា

Chheang — Wed, 10 Jul 2024 07:06:42 +0000

តុលាការធម្មនុញ្ញរបស់ប្រទេសថៃ នៅថ្ងៃពុធនេះ បានកំណត់យកថ្ងៃទី២៤ ខែកក្កដា ជាថ្ងៃសវនាការបន្ទាប់សម្រាប់សំណុំរឿងស្វែងរកការបណ្តេញចេញពីតំណែងនាយករដ្ឋមន្ត្រីរបស់លោក សេដ្ឋា ថាវីស៊ីន។ តុលាការធម្មនុញ្ញថៃ បានឲ្យដឹងទៀតថា សំណុំរឿងនេះនឹងឈានដល់ការប្រកាសសាលក្រមមុនខែកញ្ញាខាងមុខ ខណៈឥលូវនេះតុលាការកំពុងស្វែងរកភស្តុតាងបន្ថែមទៀត។

លោក សេដ្ឋា ថាវីស៊ីន (រូបភាព៖ AP)

សំណុំរឿងប្រឆាំងនឹងលោក សេដ្ឋា ត្រូវបានធ្វើឡើង បន្ទាប់ពីមានបណ្តឹងរបស់សមាជិកព្រឹទ្ធសភាដែលតែងតាំងដោយយោធាចំនួន ៤០នាក់ កាលពីខែឧសភា ដែលត្រូវបានបញ្ជូនបន្តទៅតុលាការធម្មនុញ្ញ។

សំណុំរឿងនេះ មានគោលបំណងចង់ដកតំណែងនាយករដ្ឋមន្ត្រីពីលោក សេដ្ឋា ជុំវិញការតែងតាំងមេធាវីម្នាក់ឈ្មោះ Pichit Chuenban ដែលធ្លាប់ជាប់ពន្ធនាគារពីបទមើលងាយតុលាការ ឲ្យធ្វើជារដ្ឋមន្ត្រីទីស្ដីការនាយករដ្ឋមន្ត្រី។ បណ្ដឹងនោះចោទថា លោក Pichit ខ្វះក្រមសីលធម៌ និងសុចរិតភាពសម្រាប់ធ្វើជារដ្ឋមន្ត្រី ដូចដែលបានចែងក្នុងរដ្ឋធម្មនុញ្ញ។

យ៉ាងណាមិញ លោក Pichit បានលាលែងពីតំណែងរួចទៅហើយ ក្នុលគោលបំណងដើម្បីការពារលោក សេដ្ឋា មិនឲ្យទាក់ទិននឹងសំណុំរឿងរបស់តុលាការ។

គួរបញ្ជាក់ថា ប្រសិនបើលោក សេដ្ឋា ត្រូវបានដកចេញពីតំណែង នោះរដ្ឋាភិបាលថ្មីត្រូវតែបង្កើតឡើង ហើយគណបក្សភឿថៃដែលកំពុងកាន់អំណាចរបស់លោក នឹងត្រូវដាក់បេក្ខភាពថ្មីសម្រាប់តំណែងនាយករដ្ឋមន្ត្រី ដើម្បីទទួលការបោះឆ្នោតពីសភា។

បច្ចុប្បន្ន សំណុំរឿងប្រឆាំងនឹងនាយករដ្ឋមន្ត្រី កំពុងត្រូវបានស៊ើបអង្កេត រួមជាមួយនឹងបណ្តឹងមួយទៀតដែលទាមទារឲ្យរំលាយគណបក្សប្រឆាំង Move Forward ដែលជាអ្នកឈ្នះការបោះឆ្នោតដ៏គួរឱ្យភ្ញាក់ផ្អើលកាលពីឆ្នាំ២០២៣ និងជាគណបក្សធំជាងគេនៅក្នុងសភា។

ក្រុមអ្នកវិភាគ បាននិយាយថា ករណីទាំង២នេះ បានបង្កើនភាពមិនច្បាស់លាស់ខាងផ្នែកនយោបាយនៅក្នុងប្រទេសថៃ៕

ដោយ៖ ឈាង

The post តុលាការថៃ កំណត់ថ្ងៃបើកសវនាការរឿងក្ដីដកតំណែងលោក សេដ្ឋា appeared first on Kampuchea Thmey Daily.

លោក សេដ្ឋា សល់ពេល ១៥ថ្ងៃ ដើម្បីសង្គ្រោះតំណែងនាយករដ្ឋមន្ត្រី

Sok Sovann — Wed, 19 Jun 2024 01:21:00 +0000

តាមការចុះផ្សាយរបស់ Bangkok Post, តុលាការធម្មនុញ្ញកាលពីថ្ងៃអង្គារទី១៨ខែមិថុនាឆ្នាំ២០២៤ បានបញ្ជាឲ្យគ្រប់ភាគីពាក់ព័ន្ធក្នុងសំណុំរឿងក្រមសីលធម៌របស់លោកនាយករដ្ឋមន្ត្រី សេដ្ឋា ថាវីស៊ីន យកព័ស្តុតាងមកបង្ហាញក្នុងរយៈពេល១៥ថ្ងៃ ខណៈតុលាការ នឹងពិចារណាលើសំណុំនេះរឿងម្តងទៀតនៅថ្ងៃទី ១០ខែកក្កដា។ ដូច្នេះមានន័យថា ជោគវាសនាជានាយករដ្ឋមន្ត្រីរបស់លោក ថាវីស៊ីន គឺត្រូវកំណត់ក្នុងរយៈពេល១៥ថ្ងៃនេះហើយ។

លោក សេដ្ឋា ថាវីស៊ីន (រូបថត៖ AFP)

ត្បិតតែតុលាការនឹងត្រូវជួបពិភាក្សាជាថ្មីម្តងទៀតនៅថ្ងៃទី១០ ខែកក្កដាក៏ដោយ ប៉ុន្តែគេនៅមិនទាន់ដឹងច្បាស់ថាតើ តុលាការនឹងចេញសាលក្រមនៅថ្ងៃនោះមែនឬក៏អត់នោះទេ។

រម្លឹកទៅកាលពីសប្តាហ៍មុន, តុលាការធម្មនុញ្ញថៃ បានទទួលយកបណ្តឹងរបស់សមាជិកព្រឹទ្ធសភាទាមទារឲ្យដកលោក សេដ្ឋា ចេញពីតំណែងជានាយករដ្ឋមន្ត្រី ដោយសារតែរឿងតែងតាំងអតីតមេធាវីដែលជាប់រឿងក្ដីក្ដាំព្រហ្មទណ្ឌ មកកាន់តំណែងជារដ្ឋមន្ត្រី។

លោក សេដ្ឋា ថាវីស៊ីន (រូបថត៖ Nation)

សមាជិកព្រឹទ្ធសភាចំនួន៤០រូបដែលដាក់ញត្តិទៅតុលាការ និយាយថា លោក សេដ្ឋា បានបំពានរដ្ឋធម្មនុញ្ញ បន្ទាប់ពីនាយករដ្ឋមន្ត្រីរូបនេះ តែងតាំងលោក Pichit Chuenban ធ្វើជារដ្ឋមន្ត្រីទីស្តីការនាយករដ្ឋមន្ត្រីកាលពីខែមុន ដោយសារតែអតីតមេធាវីរូបនេះខ្វះសុចរិតភាព និងបទដ្ឋានសីលធម៌ដែលតម្រូវដោយរដ្ឋធម្មនុញ្ញ ជាពិសេសលោកជាប់ពាក់ព័ន្ធទោសព្រហ្មទណ្ឌ ។

យ៉ាងណា លោក Pichit បានលាលែងពីតំណែងរួចទៅហើយ ក្នុលគោលបំណងដើម្បីការពារលោក សេដ្ឋា មិនឲ្យទាក់ទិននឹងសំណុំរឿងរបស់តុលាការ។

លោក Pichit Chuenban (រូបថត៖ Bangkok Post)

លោក Pichit ត្រូវបានផ្តន្ទាទោសឲ្យជាប់ពន្ធនាគាររយៈពេល ៦ ខែកាលពីឆ្នាំ ២០០៨ ពីបទមិនគោរពតុលាការ ក្រោយមានការចោទប្រកាន់ថា បានប៉ុនប៉ងសូកប៉ាន់មន្ត្រីតុលាការចំនួន ២ លានបាត (៥៥,២១៨ ដុល្លារ) ដោយលាក់លុយនៅក្នុងថង់គ្រឿងទេសមួយ ខណៈអាជ្ញាប័ណ្ណច្បាប់របស់លោកត្រូវបានក្រុមប្រឹក្សាមេធាវីនៃប្រទេសថៃព្យួររយៈពេល ៥ ឆ្នាំ បន្ទាប់ពីមានករណីនេះ។

គួរបញ្ជាក់ថា សេចក្តីសម្រេចរបស់តុលាការធម្មនុញ្ញ នឹងក្លាយជាការរង្គោះរង្គើដល់រាជរដ្ឋាភិបាលថៃ ព្រោះថាមានរដ្ឋមន្ត្រី ៣រូបក៏បានលាលែងរួចទៅហើយ ស្របពេលបច្ចុប្បន្ន សេដ្ឋកិច្ចថៃក៏មិនទាន់ដំណើរការល្អនៅឡើយដែរ ជាពិសេសពាក់ព័ន្ធនឹងកិច្ចសន្យាផ្ដល់សាច់ប្រាក់ដល់ប្រជាជន ៥០ លាននាក់ តែម្តង៕

អត្ថបទ៖ សុខ សុវណ្ណ

ចុចអាន៖ លោក សេដ្ឋា ប្រឈមអស់តំណែងជានាយករដ្ឋមន្ត្រី ថៃ

The post លោក សេដ្ឋា សល់ពេល ១៥ថ្ងៃ ដើម្បីសង្គ្រោះតំណែងនាយករដ្ឋមន្ត្រី appeared first on Kampuchea Thmey Daily.

នាយករដ្ឋមន្ត្រីថៃ និងភរិយា ប្រកាសទ្រព្យសម្បត្តិ

Sok Sovann — Mon, 17 Jun 2024 08:10:18 +0000

តាមការប្រកាសទ្រព្យសកម្មនិងបំណុលចុងក្រោយ, នាយករដ្ឋមន្ត្រីថៃ លោក សេដ្ឋា ថាវីស៊ីន និងភរិយា មានទ្រព្យសម្បត្តិសរុប ១.០២ ពាន់លានបាត បើគិតជាដុល្លារស្មើនឹង ២៧.៧លានដុល្លារអាមេរិក។

នាយករដ្ឋមន្ត្រីថៃ លោក សេដ្ឋា ថាវីស៊ីន និងភរិយា (រូបថត៖ Khaosod)

លោកសេដ្ឋា បានប្រកាសទ្រព្យសម្បត្តិ នៅចំពោះមុខគណៈកម្មាធិការជាតិប្រឆាំងអំពើពុករលួយ នៅថ្ងៃចន្ទទី១៧ខែមិថុនា និងត្រូវបានចុះផ្សាយដោយគេហទំព័រ The Nation។

បើគិតតែលោកម្នាក់ឯង នាយករដ្ឋមន្ត្រីថៃរូបនេះ បានប្រកាសមានទ្រព្យសម្បត្តិ ៦៥៩លានបាត ក្នុងនោះរួមបញ្ចូលទាំងសាច់ប្រាក់១លានបាត, ប្រាក់បញ្ញើ ៦៨.៩៨លានបាត, ប្រាក់វិនិយោគ១.៣០លានបាត, រថយន្ត Aston Martin DB5 មួយគ្រឿងតម្លៃ ៥០លានបាត, ដីឡូត៍តម្លៃ ១៥៨.៤លានបាត, អចលនទ្រព្យតម្លៃ១៥៦.៤២លានបាត និងនាឡិកាតម្លៃ១២១.៩៥លានបាត រួមទាំងនាឡិកា Patek Philippe 5470P-001 តម្លៃ៣០លានបាតផងដែរ។

នាយករដ្ឋមន្ត្រីថៃ លោក សេដ្ឋា ថាវីស៊ីន (រូបថត៖ Bloomberg)

ចំណែកភរិយាគឺលោកស្រីវេជ្ជបណ្ឌិត Pakpilai Thavisin វិញ បានប្រកាសមានទ្រព្យសម្បត្តិប្រមាណ ៣៦១លានបាត។ នេះរាប់បញ្ចូលទាំងសាច់ប្រាក់ ១.៨០លានបាត, ប្រាក់បញ្ញើ ៤៧.០២លានបាត និងការវិនិយោគ៥២.៣៥លានបាត។

សូមបញ្ជាក់ជាថ្មី លោក សេដ្ឋា មកពីគណបក្សភឿថៃ បានចូលកាន់តំណែងជានាយករដ្ឋមន្ត្រីថៃ បន្ទាប់ពីការជាប់គាំងនយោបាយអស់រយៈពេល៣ខែ។ ការឡើងកាន់តំណែងរបស់លោក គឺបន្ទាប់ពីបេក្ខជនឈ្នះឆ្នោតមកពីគណបក្សចលនាឆ្ពោះទៅមុខលោក ភីថា មិនទទួលបានសំឡេងគាំទ្រគ្រប់គ្រាន់ពីសភា៕

អត្ថបទ៖ សុខ សុវណ្ណ

ចុចអាន៖ នាយករដ្ឋមន្ត្រីថៃ លោក សេដ្ឋា ថាវីស៊ីន និងភរិយា ប្រកាសទ្រព្យសម្បត្តិរបស់ខ្លួន

The post នាយករដ្ឋមន្ត្រីថៃ និងភរិយា ប្រកាសទ្រព្យសម្បត្តិ appeared first on Kampuchea Thmey Daily.

លោក សេដ្ឋា ថាវីស៊ីន Archives - Kampuchea Thmey Daily

ផែថងថាន ​រងការស៊ើបអង្កេត​លើ​ក្រមសីលធម៌ អាច​​ឈាន​​ទៅដកដំណែង​​ ដូច​​​​លោក ថាវីស៊ីន ដែរ

លោក​ សេដ្ឋា ថាវីស៊ីន​ បង្ហើប​​គម្រោង​​ព្រែកជីក​ «Kra» ​ស្របពេលថាក់ស៊ី​ន​ទៅខាងត្បូង​​

ប្រវត្តិត្រួសៗ​របស់​កូនស្រីពៅ​លោក​ថាក់ស៊ីន​ដែល​​ទំនង​ក្លាយ​ជា​​នាយករដ្ឋមន្ត្រី​ថៃ​​ទី​៣១​

តើ​ការ​ដក​តំណែង​នាយករដ្ឋ​មន្រ្តី​របស់​លោក​ សេដ្ឋា អាច​ប៉ះ​ពាល់​សេដ្ឋកិច្ច​ថៃ​ដោយ​របៀប​ណា​?

Breaking News! តុលាការថៃ ដកតំណែងលោក សេដ្ឋា ក្រោយកាន់អំណាច មិនដល់មួយឆ្នាំផង

តុលាការ​ថៃ កំណត់​ថ្ងៃ​បើក​សវនាការ​រឿង​ក្ដី​ដក​តំណែង​លោក សេដ្ឋា

លោក សេដ្ឋា សល់ពេល ១៥ថ្ងៃ ដើម្បីសង្គ្រោះតំណែងនាយករដ្ឋមន្ត្រី

នាយករដ្ឋមន្ត្រីថៃ និងភរិយា ប្រកាសទ្រព្យសម្បត្តិ

ផែថងថាន រងការស៊ើបអង្កេតលើក្រមសីលធម៌ អាចឈានទៅដកដំណែង ដូចលោក ថាវីស៊ីន ដែរ

លោក សេដ្ឋា ថាវីស៊ីន បង្ហើបគម្រោងព្រែកជីក «Kra» ស្របពេលថាក់ស៊ីនទៅខាងត្បូង

ប្រវត្តិត្រួសៗរបស់កូនស្រីពៅលោកថាក់ស៊ីនដែលទំនងក្លាយជានាយករដ្ឋមន្ត្រីថៃទី៣១

តើការដកតំណែងនាយករដ្ឋមន្រ្តីរបស់លោក សេដ្ឋា អាចប៉ះពាល់សេដ្ឋកិច្ចថៃដោយរបៀបណា?

តុលាការថៃ កំណត់ថ្ងៃបើកសវនាការរឿងក្ដីដកតំណែងលោក សេដ្ឋា