Breaking News! លោក សេដ្ឋា ប្រឈមអស់តំណែងជានាយករដ្ឋមន្ត្រី ថៃ

តុលាការធម្មនុញ្ញរបស់ប្រទេសថៃនៅថ្ងៃព្រហស្បតិ៍នេះបានទទួលយកបណ្តឹងរបស់សមាជិកព្រឹទ្ធសភាទាមទារឲ្យដកលោក សេដ្ឋា ថាវីស៊ីន ចេញពីតំណែងជានាយករដ្ឋមន្ត្រី ដោយសារតែរឿងតែងតាំងតំណែងរដ្ឋមន្ត្រីទៅឲ្យអតីតមេធាវីដែលជាប់រឿងក្ដីក្ដាំព្រហ្មទណ្ឌ ។ នេះបើយោងតាមការចេញផ្សាយដោយទីភ្នាក់ងារព័ត៌មាន Reuters នៅថ្ងៃទី២៣ ខែឧសភានេះ ។

សមាជិកព្រឹទ្ធសភាចំនួន ៤០ រូបដែលបានដាក់ញត្តិទៅតុលាការបាននិយាយថា លោក សេដ្ឋា បានបំពានរដ្ឋធម្មនុញ្ញ បន្ទាប់ពីលោកនាយករដ្ឋមន្ត្រីបានតែងតាំងលោក Pichit Chuenban ធ្វើជារដ្ឋមន្ត្រីទីស្តីការនាយករដ្ឋមន្ត្រីកាលពីខែមុន ដោយសារតែអតីតមេធាវីរូបនេះខ្វះសុចរិតភាព និងបទដ្ឋានសីលធម៌ដែលតម្រូវដោយរដ្ឋធម្មនុញ្ញ ជាពិសេសលោកជាប់ពាក់ព័ន្ធទោសព្រហ្មទណ្ឌ ។ ទោះយ៉ាងណា លោក Pichit បាន​លាលែង​ពី​តំណែង​រួចទៅហើយកាលពី​ថ្ងៃ​អង្គារដើមសប្ដាហ៍​នេះក្នុង​កិច្ច​ប្រឹងប្រែង​ដើម្បីការពារ​លោក សេដ្ឋា មិនឲ្យទាក់ទិននឹង​សំណុំរឿង​របស់​តុលាការ ។

លោក Pichit ត្រូវបានផ្តន្ទាទោសឲ្យជាប់ពន្ធនាគាររយៈពេល ៦ ខែកាលពីឆ្នាំ ២០០៨ ពីបទមិនគោរពតុលាការ ក្រោយមានការចោទប្រកាន់ថា បានប៉ុនប៉ងសូកប៉ាន់មន្ត្រីតុលាការចំនួន ២ លានបាត (៥៥,២១៨ ដុល្លារ) ដោយលាក់លុយនៅក្នុងថង់គ្រឿងទេសមួយ ខណៈអាជ្ញាប័ណ្ណច្បាប់របស់លោកត្រូវបានក្រុមប្រឹក្សាមេធាវីនៃប្រទេសថៃព្យួររយៈពេល ៥ ឆ្នាំ បន្ទាប់ពីមានករណីនេះ ។

លោក Pichit គឺជាជំនួយការជិតស្និទ្ធរបស់គ្រួសារមហាសេដ្ឋី ស៊ីណាវ៉ាត្រា ជាយូរយារណាស់មកហើយ ។ ក្នុង​នាម​ជា​មេធាវី លោកបាន​ចាញ់​ក្តីក្នុង​សំណុំរឿង​ធំ​ៗ​ប្រឆាំង​នឹង​អតីត​នាយករដ្ឋមន្ត្រី​លោកស្រី យីងឡាក់ ស៊ីណាវ៉ាត្រា និង​លោក ថាក់ស៊ីន ជា​ស្ថាបនិក​នៃគណបក្ស​ភឿថៃដែល​កំពុង​កាន់​អំណាច ។

គួរបញ្ជាក់ថា ការសម្រេចចិត្តតុលាការធម្មនុញ្ញនៅពេលនេះនឹងក្លាយជាការរង្គោះរង្គើដល់រដ្ឋាភិបាលថៃ បន្ទាប់ពីមានការលាលែងពីតំណែងរបស់រដមន្ត្រី ៣ រូបទៅហើយក្នុងរយៈពេលប៉ុន្មានសប្ដាហ៍ថ្មីៗនេះ ក្រោយការរុះរើគណៈរដ្ឋមន្ត្រី ស្របពេលដែលបច្ចុប្បន្នសេដ្ឋកិច្ចថៃក៏មិនទាន់ដំណើរការល្អនៅឡើយដែរ ជាពិសេសពាក់ព័ន្ធនឹងកិច្ចសន្យាផ្ដល់សាច់ប្រាក់ដល់ប្រជាជន ៥០ លាននាក់ ៕

ដោយ ៖ សុខ ជីវ័ន្ត

ចុចអាន ៖ ថៃ ព្រមប្រគល់វត្ថុបុរាណ ២០ទៀត មកឲ្យកម្ពុជា វិញ