ព័ត៌មានអន្ដរជាតិ

ផែថងថាន រងការស៊ើបអង្កេតលើក្រមសីលធម៌ អាចឈានទៅដកដំណែង ដូចលោក ថាវីស៊ីន ដែរ

បានផុស

១ year មុន

នៅ

ថ្ងៃអង្គារ ២៤ មិថុនា ២០២៥

ដោយ

គណៈកម្មាធិការជាតិប្រឆាំងអំពើពុករលួយ (NACC) បានចាប់ផ្តើមបើកការស៊ើបអង្កេតលើករណីបំពានក្រមសីលធម៌ធ្ងន់ធ្ងរ របស់ នាយក្រដ្ឋមន្ត្រី លោកស្រី ផែថងថាន ស៊ីណាវ៉ាត្រ (Paetongtarn Shinawatra) ជុំវិញការលេចធ្លាយសារចរចាតាមទូរស័ព្ទជាមួយសម្តេចតេជោ ហ៊ុន សែន ប្រធានព្រឹទ្ធសភាកម្ពុជា។ ការស៊ើបអង្កេតបឋមនឹងត្រូវរយៈពេល១០ថ្ងៃ។ ក្នុងករណីរកឃើញកំហុសដែលមានចែង លោកស្រី ប្រឈមការដកហូតដំណែង ដូចអតីតនាយករដ្ឋមន្ត្រី សេដ្ឋា ថាវីស៊ីន មកពីគណបក្សភឿថៃដែរ។

លោកស្រី ផែថងថាន ស៊ីណាវ៉ាត្រ និង លោក សេដ្ឋា ថាវីស៊ីន ក្នុងអំឡុងពេលឃោសនាបោះឆ្នោត។ឆ្នាំ២០២៣។ Bangkok Post

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅថ្ងៃទី២០ខែមិថុនាឆ្នាំ២០២៥ ព្រឹទ្ធសមាជិកនៃប្រទេសថៃបានស្នើសុំជាផ្លូវការឱ្យទាំង NACC និងតុលាការធម្មនុញ្ញពិនិត្យមើលថាតើការប្រព្រឹត្តរបស់នាយករដ្ឋមន្ត្រីគឺស្មើនឹង ការប្រព្រឹត្តខុសក្រមសីលធម៌យ៉ាងធ្ងន់ធ្ងរ»។ ការស៊ើបអង្កេតនេះកើតឡើង ចំពេលមានសម្ពាធកាន់តែខ្លាំងឡើង បន្ទាប់ពីបែកធ្លាយការសន្ទនាតាមទូរស័ព្ទជាមួយសម្តេច ហ៊ុន សែន ដែលបង្កជាព្យុះនយោបាយសម្រាប់ការបន្តតំណែងរបស់នាយករដ្ឋមន្ត្រី ផែថងថាន ក៏ដូចជាអនាគតមិនច្បាស់លាស់នៃការដឹកនាំរដ្ឋាភិបាលចម្រុះរបស់គណបក្សភឿថៃរបស់លោកស្រី។

តាមសេចក្តីរាយការណ៍របស់សារព័ត៌មាន The Nation គណៈកម្មាធិការជាតិប្រឆាំងអំពើពុករលួយ (NACC) នៅថ្ងៃចន្ទ បានឯកភាពជាឯកច្ឆ័ន្ទក្នុងការចាប់ផ្តើមការស៊ើបអង្កេតបឋមលើវីដេអូឃ្លីបដែលលេចធ្លាយនៃការសន្ទនារវាង នាយក្រដ្ឋមន្ត្រី លោកស្រី ផែថងថាន ស៊ីណាវ៉ាត្រ និង សម្តេចតេជោ ហ៊ុន សែន ប្រធានព្រឹទ្ធសភាកម្ពុជា។

គណៈកម្មាការជឿជាក់ថា ខ្លឹមសារអាចបង្កើតជាការបំពានយ៉ាងធ្ងន់ធ្ងរលើបទដ្ឋានសីលធម៌ ជាពិសេសទាក់ទងនឹងការកត់សម្គាល់ដែលទាក់ទងនឹងភាពតានតឹងនៅតាមព្រំដែនកម្ពុជា-ថៃ។

តាមសេចក្តីរាយការណ៍នោះ NACC បានកំណត់ពេលវេលា ១០ថ្ងៃដើម្បីបញ្ចប់ការស៊ើបអង្កេតបឋម។ ដំណើរការនេះនឹងរួមបញ្ចូលការចម្លង និងការបកប្រែយ៉ាងត្រឹមត្រូវនូវសំឡេងពីខ្មែរទៅជាភាសាថៃ ការសាកសួរសាក្សីដែលពាក់ព័ន្ធ និងពិនិត្យមើលច្បាប់ជាធរមាន។

ការត្រួតពិនិត្យនេះក៏នឹងយោងទៅលើសេចក្តីសម្រេចរបស់តុលាការធម្មនុញ្ញពីមុន ដែលនាំទៅដល់ការដកសិទ្ធិរបស់អតីតនាយករដ្ឋមន្ត្រី សេដ្ឋា ថាវីស៊ីន ជុំវិញការតែងតាំង លោក Phichit Chuenban ជារដ្ឋមន្ត្រីទីស្តីការគណៈរដ្ឋមន្ត្រី ដ៏ចម្រូងចម្រាស។

លើសពីនេះ គណៈកម្មការនឹងពិនិត្យថាតើតុលាការធម្មនុញ្ញបានទទួលយកញត្តិពាក់ព័ន្ធទាក់ទងនឹងស្ថានភាពរបស់លោកស្រី ផែថងថាន រួចហើយឬនៅ។ ប្រសិនបើការស៊ើបអង្កេតបឋមរកឃើញហេតុផលគ្រប់គ្រាន់ សំណុំរឿងនឹងបន្តទៅការស៊ើបអង្កេតជាផ្លូវការដោយក្រុមប្រឹក្សា NACC ហើយប្រសិនបើចាំបាច់ ការស៊ើបអង្កេតពេញលេញអាចនឹងត្រូវចាប់ផ្តើម។

បណ្ដឹងសីលធម៌ប្រឆាំងនឹងនាយករដ្ឋមន្ត្រីត្រូវបានចុះហត្ថលេខាដោយសមាជិកព្រឹទ្ធសភាជាច្រើនរូប រួមទាំងប្រធានព្រឹទ្ធសភាលោក Mongkol Surasajja ហើយត្រូវបានដាក់ទៅ NACC រួចហើយ។ ពាក្យបណ្តឹងដូចគ្នានេះក៏ត្រូវបានបញ្ជូនទៅតុលាការធម្មនុញ្ញផងដែរ ដើម្បីពិចារណាថាតើតំណែងនាយករដ្ឋមន្ត្រីរបស់ផែថងថាន គួរតែត្រូវបានបញ្ចប់ ដោយផ្អែកលើសកម្មភាពរបស់នាងនៅក្នុងការសន្ទនាដែលលេចធ្លាយនោះដែរទេ៕

រ៉ាន់ រើយ