លោកបានបញ្ជាក់ថា ដើមត្នោតមួយដើម អាចផលិតស្ករត្នោតបានជាមធ្យមប្រមាណ ២៥គីឡូក្រាម ដែលជាផលិតផលមានតម្លៃ និងមានតម្រូវការកើនឡើងនៅលើទីផ្សារ។ លើសពីនេះ ទឹកសេរ៉ត្នោត ក៏ជាផលិតផលថ្មីមានសក្តានុពលខ្ពស់ សម្រាប់ការកែច្នៃ និងនាំចេញទៅកាន់ទីផ្សារអន្តរជាតិផងដែរ។

ការអភិវឌ្ឍខ្សែច្រវាក់តម្លៃពីដើមត្នោត មិនត្រឹមតែជួយបង្កើនប្រាក់ចំណូលដល់ប្រជាពលរដ្ឋនៅតាមជនបទប៉ុណ្ណោះទេ ប៉ុន្តែថែមទាំងរួមចំណែកជំរុញសេដ្ឋកិច្ចបៃតង ការអភិរក្សធនធានធម្មជាតិ និងការអភិវឌ្ឍប្រកបដោយចីរភាពរបស់កម្ពុជាផងដែរ។

ដោយហេតុនេះ សេដ្ឋកិច្ចបៃតងដែលផ្អែកលើអត្តសញ្ញាណ និងធនធានក្នុងស្រុក អាចនឹងលេចចេញជារូបរាងកាន់តែច្បាស់នៅកម្ពុជានាពេលឆាប់ៗខាងមុខ៕

The post កម្ពុជាអាចក្លាយជាប្រទេសដំបូងនៅអាស៊ាន ដែលទាញយកតម្លៃសេដ្ឋកិច្ចពីដើមត្នោត ១លានដើម appeared first on Kampuchea Thmey Daily.

ក្នុងសន្និសីទសារព័ត៌មានស្ដីទីលទ្ធផលនៃទស្សនកិច្ចទៅកាន់ប្រទេសជប៉ុន ធ្វើឡើងនៅអាកាសយានដ្ឋានអន្តរជាតិតេជោ កាលពីថ្ងៃទី១៩​ ខែកុម្ភៈ  រដ្ឋមន្ត្រីក្រសួងបរិស្ថាន បានថ្លែងដូច្នេះអំពីបញ្ហាខ្យល់ពុលដូច្នេះ ៖« បញ្ហាគុណភាពខ្យល់ទាំងប្រជាជន ទាំងខ្ញុំសុទ្ធតែមានកង្វល់ ប៉ុន្តែជាមួយនឹងកង្វល់ហ្នឹង ខ្ញុំសូមឱ្យយើងរួមគ្នាចាត់វិធានការការពារផង។ កុំគ្រាន់តែបង្ហាញក្ដីកង្វល់! កុំគ្រាន់តែផ្សព្វផ្សាយថាជាតិពុលមកហើយ ផ្សែងពុលមកហើយ អ័ព្ទមកហើយ ប៉ុន្តែត្រូវរួមគ្នាកុំដុតសំរាម ជាពិសេសសំរាមប្លាស្ទិកហ្នឹង សូមកុំដុតវាលស្រែ សូមកុំដុតព្រៃរបស់យើង ព្រោះការដុតទាំងនោះ ដែលនាំជាតិពុលឱ្យមកយើងកើតក្ដីបារម្ភ បើយើងមិននាំគ្នាដុតទេ យើងក៏មិនពិបាកបារម្ភរឿងគុណភាពខ្យល់ដែរ។»។

រដ្ឋមន្ត្រីក្រសួងបរិស្ថាន អំពាវនាវជាថ្មីម្ដងទៀត ទៅកាន់ពលរដ្ឋខ្មែរនៅទូទាំងប្រទេសឱ្យបញ្ឈប់សកម្មភាពដុតសំរាមប្លាស្ទិក ដុតព្រៃ និងសំណល់កសិកម្ម ដើម្បីចូលថែរក្សាធនធានធម្មជាតិ និងថែរក្សាសុខភាពសាធារណៈ និងគុណភាពខ្យល់ឱ្យល្អប្រសើរ។

ជាការកត់សម្គាល់ អំឡុងដើមសប្ដាហ៍ទី២ នៃខែកុម្ភៈ ឆ្នាំ២០២៦ នេះ អ្នកប្រើប្រាស់បណ្ដាញសង្គម បានបង្ហាញក្ដីបារម្ភខ្លាំងអំពីបញ្ហាខ្យល់ពុលនៅរាជធានីភ្នំពេញ ដែលជាទីប្រជុំជនដែលមានប្រជាជនរស់នៅជាង២លាននាក់ បន្ទាប់ពីស្ថានភាពផ្ទៃមេឃមានសភាពចុះអ័ព្ទខ្លាំង។ ជុំវិញករណីនេះ ក្រសួងបរិស្ថាន បានអះអាងថា គុណភាពខ្យល់នៅកម្ពុជា មានការប្រែប្រួលខ្លាំងនៅតាមតំបន់ខ្លះប៉ុណ្ណោះ ហើយការធ្លាក់ចុះគុណភាពខ្យល់នៅកន្លែងទាំងនោះ គឺរយៈពេលខ្លីហើយត្រឡប់មកល្អធម្មតាវិញ និងមិនដល់កម្រិតប្រកាសអាសន្ននៅឡើយ។

ដោយហេតុថា បញ្ហាគុណភាពខ្យល់ជាក្ដីកង្វល់រួម ដូច្នេះ ក្រសួងបរិស្ថានកម្ពុជាមានបំណងធ្វើទំនើបកម្មប្រព័ន្ធតាមដានគុណភាពខ្យល់ ដី និងទឹក ដើម្បីការពារសុខភាពសាធារណៈឲ្យកាន់តែប្រសើរ។ តាមរយៈនេះ ក្រសួងបរិស្ថានកម្ពុជា បានចុះហត្ថលេខាលើអនុស្សរណៈនៃកិច្ចសហប្រតិបត្តិការ (MoC) ជាមួយក្រសួងបរិស្ថានជប៉ុន ក្នុងដំណើរទស្សនកិច្ចរបស់រដ្ឋមន្ត្រីក្រសួងបរិស្ថាន អ៊ាង សុផល្លែត ទៅកាន់ប្រទេសជប៉ុន។

តាមរយៈMoC នេះ រដ្ឋមន្ត្រី អ៊ាង សុផល្លែត អះអាងថា ក្រុមហ៊ុនជប៉ុន នឹងផ្ដល់ឧបករណ៍ត្រួតពិនិត្យគុណភាពខ្យល់មកឱ្យកម្ពុជា ដើម្បីពិនិត្យគុណភាពខ្យល់ពុល។ឧបករណ៍ត្រួតពិនិត្យគុណភាពខ្យល់ដ៏ទំនើប នឹងផ្ដល់ភាពងាយស្រួលក្នុងការតាមដានគុណភាពខ្យល់នៅកម្ពុជា ដោយគ្រាន់តែបើកដំណើរ មន្ត្រីជំនាញនឹងអាចដឹងបានភ្លាមថា​នៅក្នុងខ្យល់មានសារធាតុពុល និងសារធាតុវិទ្យុសកម្ម សារធាតុគីមីអ្វីខ្លះ។

រដ្ឋមន្ត្រីក្រសួងបរិស្ថាន បានឱ្យដឹងថា ក្រសួងក៏មានគម្រោងបំពាក់បន្ថែមទៀតនូវឧបករណ៍តាមដាន ពិនិត្យគុណភាពខ្យល់នៅតាមបណ្ដាខេត្តបន្ថែមពីលើឧបករណ៍តាមដានគុណភាពខ្យល់ដែលបានបំពាក់រួចហើយ ដោយបំពាក់ឱ្យបានយ៉ាងហោចណាស់ចំនួន ២ ឬ៣ឧបករណ៍តាមដានគុណភាពខ្យល់នៅតាមបណ្ដាខេត្តនីមួយៗ។ 

ដើម្បីទប់ស្កាត់ការបំពុលខ្យល់នេះដែរ  ក្នុងពេលបំពេញទស្សនកិច្ចនៅជប៉ុន លោក អ៊ាង សុផល្លែត  រដ្ឋមន្ត្រីក្រសួងបរិស្ថាន បានបញ្ជាទិញឡបច្ចេកទេសសម្រាប់ដុតសំណល់វេជ្ជសាស្ត្រ និងសំណល់ប្លាស្ទិក ដែលដុតហើយគ្មានផ្សែង ពីប្រទេសជប៉ុន និងតម្រូវឱ្យក្រុមហ៊ុនផលិត កែច្នៃឡនេះ ទៅជាឡដែលប្រើប្រាស់ថាមពលពន្លឺព្រះអាទិត្យ ជំនួសថាមពលអគ្គិសនីវិញ។  

គួរឱ្យដឹងថា គិតត្រឹមបច្ចុប្បន្ន ក្រសួងបរិស្ថានដាក់ពង្រាយឧបករណ៍ប្រព័ន្ធត្រួតពិនិត្យគុណភាពខ្យល់កម្រិតខ្ពស់ ចំនួន៥៩កន្លែងនៅទូទាំងប្រទេសកម្ពុជា រួមជាមួយស្ថានីយផ្កាយរណប ចំនួន១គ្រឿង និងរថយន្តចល័តចំនួន៣គ្រឿង ដើម្បីតាមដានគុណភាពខ្យល់ (កំហាប់ភាគល្អិត PM2.5) ឱ្យបានត្រឹមត្រូវ និងលទ្ធផលគុណភាពខ្យលល់ដែលបានមកពីឧបករណ៍ប្រព័ន្ធត្រួតពិនិត្យ គឺក្រសួងបរិស្ថានផ្សព្វផ្សាយផ្ទាល់ជូនសាធារណជន បានជ្រាបអំពីទិន្នន័យគុណភាពខ្យល់ និងវិធានការការពារសុខភាព តាមរយៈបណ្ដាញសង្គមរបស់ក្រសួង៕

ដោយ៖ ង៉ិល ណារ៉ាត់

The post រដ្ឋមន្ត្រីបរិស្ថាន៖ បើមិនចង់ភ័យរឿងខ្យល់ពុល ពលរដ្ឋត្រូវរួមគ្នាទប់ស្កាត់ការដុតសំរាម ដុតព្រៃ appeared first on Kampuchea Thmey Daily.

ក្នុងសន្និសីទសារព័ត៌មាននៅឯអាកាសយានដ្ឋានអន្តរជាតិតេជោ ក្រោយបញ្ចប់បេសកកម្មនៅក្នុងប្រទេសជប៉ុន ហើយមកដល់ប្រទេសកម្ពុជាវិញនៅថ្ងៃទី១៩ ខែកុម្ភៈនេះ លោក អ៊ាង សុផល្លែត ថ្លែងថា៖«យើងបានទៅធ្វើទស្សនកិច្ចរោងចក្រផលិតឡសំណល់វេជ្ជសាស្ត្រនិងសំណល់ប្លាស្ទិក ដែលជាឡមួយដុតទៅអត់មានផ្សែង។ ដុតទៅអត់មានផ្សែងទេ មានតែចំហាយទឹកមកវិញ‌! បច្ចេកទេសគាត់ល្អ! យើងបានទៅមើល ហើយយើងបានបញ្ជាទិញ ដើម្បីយកមកប្រើប្រាស់នៅកម្ពុជាយើងផងដែរ។ ការបញ្ជាទិញនេះ សង្ឃឹមថា កិច្ចសហប្រតិបត្តិការជាមួយភាគីជប៉ុន ក្រសួងបរិស្ថានជប៉ុន និងក្រុមហ៊ុនជប៉ុន នឹងជួយយើងឱ្យបានច្រើនគ្រឿង។ គោលដៅរបស់យើង គឺធ្វើយ៉ាងណាឱ្យមួយស្រុកមានមួយគ្រឿង»។ ឯកឧត្តម បន្តថា ឡដុតសំណល់វេជ្ជសាស្ត្រ និងសំណល់ប្លាស្ទិក នឹងមិនប្រើប្រាស់ថាមពលអគ្គិសនីនោះទេ ប៉ុន្តែនឹងជំនួសមកវិញដោយការប្រើប្រាស់ថាមពលទាញពីប្រភពពន្លឺព្រះអាទិត្យ(Solar)។»។

គួរឱ្យដឹងថា ក្នុងកិច្ចសហប្រតិបត្តិការរួមគ្នា ឆ្លើយតបនឹងការប្រែប្រួលអាកាសធាតុ និងការគ្រប់គ្រងសំណល់ ក្រសួងបរិស្ថានកម្ពុជា-ជប៉ុន ក៏បានឯកភាពគ្នាលើចំណុចចំនួន៦រួមមាន៖ ១.យន្តការឥណទានរួម ដែលមានស្រាប់ និងគម្រោងផ្នែកជីវម៉ាស, ២. សកម្មភាពឆ្លើយតបនឹងការប្រែប្រួលអាកាសធាតុក្នុងក្របខណ្ឌអាស៊ាន,  ៣. ការគាំទ្រលើផែនការជាតិ ការបន្ស៊ាំនឹងការ ប្រែប្រួលអាកាសធាតុជាពិសេសប្រព័ន្ធព្រមានជាមុន, ៤. ការកែច្នៃសំរាម-សំណល់ឡើងវិញ និងការទាញយកថាមពលអគ្គីសនីពីសំណល់, ៥. ការផ្សព្វផ្សាយព័ត៌មានអំពីផលប៉ះពាល់នៃសំរាម-សំណល់ ការផលិតថង់ជីវម៉ាសងាយបំបែកធាតុ, ៦. ការផ្លាសប្តូរបទពិសោធលើការគ្រប់គ្រងឧទ្យានជាតិ។

ក្នុងឱកាសនោះដែរ ក៏មានការចុះហត្ថលេខាលើអនុស្សរណៈនៃកិច្ចសហប្រតិបត្តិការរវាងក្រសួងបរិស្ថានកម្ពុជា និងសហព័ន្ធសមាគមមេធាវីជប៉ុន លើការលើកកម្ពស់ការអនុវត្តច្បាប់បរិស្ថាន, ការពង្រឹងតម្លាភាពក្នុងការអនុញ្ញាត និងអភិបាលកិច្ចបរិស្ថាន, និងការកសាងក្របខ័ណ្ឌស្ថាប័នឱ្យកាន់តែរឹងមាំសម្រាប់ការគ្រប់គ្រងធនធានធម្មជាតិ៕

រដ្ឋមន្ត្រីក្រសួងបរិស្ថាន លោក អ៊ាង សុផល្លែត បានឱ្យដឹងថា លោកបានបញ្ជាទិញឡដុតសំណល់វេជ្ជសាស្ត្រនិងសំណល់ប្លាស្ទិកដែលគ្មានផ្សែង ក្រោយពីបានទស្សនកិច្ចនៅរោងចក្រផលិតផ្ទាល់។  លោកបញ្ហាក្ដីសង្ឃឹមថា តាមរយៈកិច្ចសហប្រតិបត្តិការរវាងក្រសួងបរិស្ថានកម្ពុជាជាមួយភាគីជប៉ុន ភាគីជប៉ុន និងក្រុមហ៊ុនផលិត នឹងផ្ដល់ឡដុតសំណល់នេះ ឱ្យកម្ពុជាក្នុងចំនួនច្រើន៕

The post កម្ពុជាបញ្ជាទិញឡដុតសំណល់វេជ្ជសាស្ត្រ និងសំណល់ប្លាស្ទិកគ្មានផ្សែង កែច្នៃប្រើពន្លឺព្រះអាទិត្យ ដើម្បីកាត់បន្ថយការបំពុលខ្យល់ appeared first on Kampuchea Thmey Daily.

ដោយឡែកការសាងសង់ផ្លូវ ប្រវែង ៧,២ គ.ម ទទឹងប្រវែង៨ម ចាប់ពីវត្តតាំងបំពង់ ដល់ជើងភ្នំឡើងតំបន់ខ្នងផ្សារ របស់ក្រសួងអភិវឌ្ឍន៍ជន បានរៀបចំចាក់ដី និងក្រាលគ្រួសស្អាតរួចរាល់ ឌែលបានសម្រួលការធ្វើដំណើរងាយស្រួលផងដែរ។

លោកបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន បានថ្លែងថា ក្រសួងបរិស្ថានបានរៀចំគម្រោងអភិវឌ្ឍន៍គោលដៅលម្ហែបៃតងនៅភ្នំខ្នងផ្សារ គឺជាការឆ្លើយតបនឹងគោលនយោបាយ និងយុទ្ធសាស្រ្តរបស់រាជរដ្ឋាភិបាល និងប្រសាសន៍ដឹកនាំដ៏ខ្ពង់ខ្ពស់ របស់សម្តេចមហាបវរធិបតី ហ៊ុន ម៉ាណែត សំដៅការអភិវឌ្ឍប្រកបដោយចីរភាព និងការគ្រប់គ្រងធនធានធម្មជាតិ បានយូរអង្វែង ដើម្បីប្រយោជន៍ដល់ប្រជាពលរដ្ឋ និងកូនចៅជំនាន់ក្រោយ។

លោកក៏បានថ្លែងដែរថា ការអភិវឌ្ឍគោលដៅលម្ហែបៃតងភ្នំខ្នងផ្សារ ដែលនាំឱ្យមានភាពរីកចម្រើន ដោយមានការគាំទ្រ ទៅលើការគ្រប់គ្រងបរិស្ថាន និងធនធានធម្មជាតិ និងជីវៈចម្រុះ ហើយហេដ្ឋារចនាសម្ព័ន្ធទាំងនេះ នឹងចូលរួមលើកកម្ពស់ជីវភាពគ្រួសារ និងប្រែក្លាយសហគមន៍ ឱ្យទៅជាសហគ្រិន ដែលជាការផ្លាស់ប្តូរយ៉ាងសំខាន់ ពីការពឹងផ្អែកលើការកាប់ឈើ និងបរបាញ់សត្វព្រៃខុសច្បាប់ មកចូលរួមចំណែកកាន់តែប្រសើរ ក្នុងការការពារ និងអភិរក្សធនធានធម្មជាតិ និងបានបង្កើនចំណូលជីវភាពគ្រួសារបន្ថែមទៀត ពីគោលដៅលំហែបៃតងនៅតាមសហគមន៍។

សូមបញ្ជាក់ថា លោកបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន បានអញ្ជើញដឹកនាំប្រតិភូថ្នាក់ដឹកនាំ និងមន្រ្តីរាជការ ក្រសួងបរិស្ថាន ចូលរួមពិនិត្យមើសមិទ្ធផលថ្មីនៃគម្រោងគោលដៅលម្ហែបៃតងភ្នំខ្នងផ្សារ និងរៀបចំផែនការអភិវឌ្ឍន៍ ផ្លូវឡើងភ្នំ និងតំបន់នៅលើភ្នំខ្នងផ្សារ នាថ្ងៃសៅរ៍ ទី៣១ ខែមករា ឆ្នាំ២០២៦។ ក្នុងដំណើទស្សនកិច្ចនៅតំបន់ភ្នំខ្នងផ្សារ នាពេលនេះ ក៏មានការអញ្ជើញចូលរួមផងដែរពី លោក ថោ ជេដ្ឋា រដ្ឋមន្ត្រីក្រសួងធនធានទឹកនិងឧតុនិយម និងប្រតិភូក្រសួងជាច្រើននាក់ តំណាងអង្គការ ដៃគូអភិវឌ្ឍន៍ ផ្នែកឯកជន និងប្រជាពលរដ្ឋនៃសហគមន៍តំបន់ការពារធម្មជាតិរលាក់កងជើងផងដែរ។

ប្រតិភូបានអញ្ជើញចូលរួមដាំដើឈើ«សន្តិភាព» នៅក្លោងទ្វាចូល ដំណាក់ដំរី ចំណុចជើងភ្នំ មុនឡើងទៅលើភ្នំខ្នងផ្សារ។ លោករដ្ឋមន្រ្តីទាំងពីរ រួមជាមួយអ្នកចូលរួមទាំងអស់ បានធ្វើដំណើរឡើងភ្នំដោយថ្មើជើង ចាប់ពីដំណាក់ដំរី ឆ្លងកាត់ដំណាក់នីមួយៗ ដែលបានសាងសង់រួចរាល់ ជាមួយកន្លែងអង្គុយសម្រាកលម្ហែដ៏ស្រស់ស្អាត អ្នកទេសចរណ៍អាចស្រូបយកខ្យល់អាកាសល្អបរិសុទ្ធ គយគន់ទេសភាពធម្មជាតិ រុក្ខជាតិ ផ្កាព្រៃជាដើម។ ជាមួយគ្នានេះ គម្រោងបានដាក់ស្លាកព័ត៌មាន ដែលបង្ហាញពីចម្ងាយផ្លូវ និងសារៈប្រយោជន៍នៃការឡើងភ្នំចំពោះសុខភាព នៅតាមកន្លែងសម្រាកនីមួយៗថែមទៀត។

សូមបញ្ជាក់ដែរថា ការធ្វើដំណើរឡើងភ្នំខ្នងផ្សារដោយថ្មើជើង មានចំងាយជាង៤គម និងចំណាយពេលប្រមាណ៤ម៉ោង ទើបធ្វើដំណើរ ដល់កន្លែងបោះតង់ តំបន់លើខ្នងភ្នំ៕

The post គម្រោងអភិវឌ្ឍន៍តំបន់ភ្នំខ្នងផ្សារ បានក្លាយជាគោលដៅលំហែបៃតង ដោយលើកកម្ពស់ទាំងជីវភាព ការចូលរួមការពារ និងអភិរក្សធនធានធម្មជាតិ appeared first on Kampuchea Thmey Daily.

លោក Alfaro និង​ក្រុម​របស់​ការងារ​លោក នឹង​ធ្វើការ​រួមគ្នា​ជាមួយ​លោក សិរី មុនី ស្ថាបនិក BC News ដែល​មាន​ទំនាក់ទំនង​យ៉ាង​ជិតស្និទ្ធ​ជាមួយ សម្តេច​បណ្ឌិត យ៉ន សេងយៀត ជា​ព្រះសង្ឃ​មាន​ឥទ្ធិពល​នៅ​ក្នុង​ប្រទេស និង​បាន​ប្រកាស​តែងតាំង​ប្រធានាធិបតី​សហរដ្ឋអាមេរិក​លោក Trump សម្រាប់​រង្វាន់​ណូបែល​សន្តិភាព​កាលពី​ឆ្នាំមុន។

ការ​ត្រឡប់​មក​ខ្មែរ​ជា​លើក​ទី ៣ នេះ បាន​​ក្លាយជា​ព្រឹត្តិការណ៍​ដ៏​សំខាន់​មួយ​សម្រាប់​ភាព​ជា​ដៃគូ​ដ៏​គួរ​ឱ្យ​រំភើប​រវាង​ប្រព័ន្ធ​ផ្សព្វផ្សាយ​ចក្រភព​អង់គ្លេស សហរដ្ឋអាមេរិក និង​កម្ពុជា ដោយ​នាំ​យក​អ្នក​ជំនាញ​ផ្នែក​ព័ត៌មាន​មកពី​គ្រប់​ប្រទេស​ដោយ​សហការ​ជាមួយគ្នា​ទៅវិញទៅមក។

ដើម្បី​ចាប់ផ្ដើម​ភាព​ជា​ដៃគូ លោក Alfaro គណៈប្រតិភូ​អាមេរិក រួម​ជាមួយ​នឹង លោក​បណ្ឌិត អ៊ាង សុផល្លែត រដ្ឋមន្ត្រី​ក្រសួងបរិស្ថាន និង​ព្រះសង្ឃ​ដ៏​លេចធ្លោ​របស់​កម្ពុជា នឹង​ដាំ​ដើមឈើ​សន្តិភាព​នៅ​លើ​ភ្នំ​ខ្នង​ផ្សារ។ ការ​ដាំ​ដើមឈើ​នេះ ត្រូវ​បាន​គេ​រំពឹង​ថា ជា​ព្រឹត្តិការណ៍​ដ៏​សំខាន់​មួយ​សម្រាប់​កម្ពុជា ដែល​មាន​ការ​ចូលរួម​ពី​មន្ត្រី​ជាន់​ខ្ពស់​រដ្ឋាភិបាល​កម្ពុជា ហើយ​នឹង​ប្រព្រឹត្ត​ទៅ​នៅ​ចុងខែ​មករា និង​ដើម​ខែ​កុម្ភៈ នៅ​ស្រប​ពេល​ភាព​ដែល​ NewsX និង BC News ចាប់ផ្ដើម​ជា​ធរមាន។

លោក Alfaro បាន​ក្លាយ​ជា​ប្រធានបទ​សំខាន់​មួយ​ដែល​ត្រូវ​ប្រព័ន្ធ​ផ្សព្វផ្សាយ​ទូទាំង​ពិភពលោក​បាន​ផ្សាយ​ពី​លោក​កាលពី​ខែ​កក្កដា ឆ្នាំមុន នៅ​ពេល​ដែល​លោក​ក្លាយ​ជា​អ្នកកាសែត​អន្តរជាតិ​ដំបូង​គេ​ដែល​ចុះទៅ​ផ្សាយ​ផ្ទាល់​ពី​ព្រំដែន​កម្ពុជា​នៅ​ភូមិ​ជោគជ័យ នៅ​ខេត្ត​បន្ទាយមានជ័យ។ ការ​ផ្សាយ​បន្ត​ផ្ទាល់​នោះ មាន​អ្នក​ចូល​មើល​ជាង ៩ លាន​ដង ក្នុង​រយៈពេល ២៤ ម៉ោង លើ​ទំព័រ​ហ្វេស​ប៊ុក​របស់​លោក។ ចាប់​តាំងពី​ពេលនោះ​មក ការ​ផ្សាយ​របស់​លោក បាន​ជំរុញ​ឱ្យ​មាន​ការ​បោះពុម្ព​ផ្សាយ និង​ប្រព័ន្ធ​ផ្សព្វផ្សាយ​សំខាន់ៗ ជាច្រើន​រួមមាន National World , The European , DailyGoat.com និង The Epoch Times ចាប់អារម្មណ៍​ផ្សាយ​ពី​សកម្មភាព​របស់​លោក។

ការ​ត្រលប់​មកវិញ​របស់ Alfaro ត្រូវ​បាន​គេ​ទន្ទឹង​រង់ចាំ​យ៉ាង​ខ្លាំង​នៅ​ក្នុង​ប្រទេស​កម្ពុជា។ លោក ម៉ៃ​ឃ​ល ត្រូវ​បាន​ពលរដ្ឋ​កម្ពុជា ចាត់ទុកថា ជន​គំរូ​មួយ​រូប ​(Idol)​ និង​ជា​អ្នក​ឈឺឆ្អាល​ចំពោះ​ប្រជាជន​ខ្មែរ និង​ប្រទេស​កម្ពុជា។ ការ​មក​កាន់​កម្ពុជា​ជា​លើក​ទី ៣ របស់ Alfaro គឺ​ស្រប​ពេល​ជាមួយ​នឹង​ដំណើរ​ទស្សនកិច្ច​របស់​តារា​ល្បី​របស់​សហរដ្ឋអាមេរិក​ផ្សេងទៀត​មក​កាន់​ប្រទេស​កម្ពុជា រួម​ទាំង​តារា​សម្តែង Angelina Jolie និង Rev. Franklin Graham ជា​អ្នក​មាន​ឥទ្ធិពល​ខ្លាំង​ក្នុង​សាសនា​គ្រិស្ត​ផ្នែក​ប្រ៉ូ​តេស្ត​ង់។

“Wow , រីករាយ​ដែល​បាន​ឮ​ថា​អ្នក​ត្រលប់​មក​កម្ពុជា​ម្តង​ទៀត។ ខ្ញុំ​ពិត​ជា​ស្រលាញ់ ហើយ​អរគុណ​ចំពោះ​អ្វី​ដែល​អ្នក​បាន​ធ្វើ​សម្រាប់​ប្រទេស​ដ៏​ស្រស់​ស្អាត​របស់ខ្ញុំ។ សូម​ធ្វើដំណើរ​ប្រកប​ដោយ​សុវត្ថិភាព​” នេះ​ជា​ខំ​មិន​របស់ Hengly Pheng នៅលើ Facebook របស់ Alfaro។ ការ​ខំ​មិន​នេះ គឺជា​សារ​មួយ​ក្នុងចំណោម​សារ​ស្រដៀង​គ្នា​ជាង​មួយ​ពាន់​ផ្សេងទៀត។

នៅ​កម្ពុជា ព័ត៌មាន​ពុទ្ធសាសនា ​(BC News) ដែល​ជា​សារព័ត៌មាន​បោះពុម្ព​ផ្សាយ​ក្នុង​ស្រុក​ខ្មែរ ផ្តោត​លើ​កិច្ច​ការងារ​សាសនា និង​មាន​ទំនាក់ទំនង​យ៉ាង​ស៊ីជម្រៅ​ជាមួយ​ពុទ្ធសាសនា និង​សាសនា​ផ្សេង​ទៀត​នៅ​កម្ពុជា។ លោក សិរី មុនី បាន​និយាយ​ថា ការ​ចាប់​ដៃគូ​ជាមួយ NewsX និង​លោក Alfaro បាន​ក្លាយ​ជា​ផ្នែក​មួយ នៃ​យុទ្ធសាស្ត្រ​ទូ​ដ៏​មាន​សារៈសំខាន់​ក្នុង​គោលដៅ​ផ្សាយ​ព្រឹត្តិការ​នានា និង​រឿងរ៉ាវ​នានា ស្តី​អំពី​កំណើន​សេដ្ឋកិច្ច​របស់​កម្ពុជា​ទៅកាន់​អន្តរជាតិ ការ​លើក​កម្ពស់​សន្តិភាព​នៅ​ក្នុង​តំបន់ និង​ផ្សាយ​ពី​ការ​រងគ្រោះ​របស់​កម្ពុជា ដែល​ត្រូវ​ប្រទេស​ថៃ​ឡោមព័ទ្ធ បង្ក​ជា​ជម្លោះ​ដើម្បី​បង្កើត​សង្គ្រាម។

លោក Alfaro បាន​មាន​ប្រសាសន៍​ថា “​ខ្ញុំ​ចូលចិត្ត​គំនិត នៃ​ការ​ធ្វើការ​ជាមួយ​ព័ត៌មាន​ព្រះពុទ្ធសាសនា​តាំងពី​ដំបូង​មក ពីព្រោះ​ថា បេសកកម្ម គឺ​សន្តិភាព​មួយ ហើយ​ព័ត៌មាន​ពុទ្ធសាសនា​ក៏​ផ្តោត​សំខាន់​លើ​សេដ្ឋកិច្ច​ផង​ដែរ ប្រធានបទ​ពីរ​ដែល​ខ្ញុំ​បាន​ព្យាយាម​ជាប់​លាប់​ក្នុង​ការ​រាយការណ៍​របស់​ខ្ញុំ​” Alfaro បាន​និយាយ។

ជា​ការ​ពិត​ណាស់ ជម្លោះ​កម្ពុជា​-​ថៃ បាន​ចាប់ផ្តើម​នៅ​ខែ​កក្កដា ឆ្នាំ ២០២៥ ហើយ​នៅ​ចុងខែ​ធ្នូ ឆ្នាំ ២០២៥ ទើប​មាន​បទ​ឈប់​បាញ់​គ្នា​មួយ​រំពេច​នៅ​ដំណាច់​ឆ្នាំនេះ គឺជា​ជម្លោះ​ជា​សាកល​មួយ ដែល​​ទទួល​បាន​ការ​រ៉ាប់រង និង​ឈឺឆ្អាល​តិច​ពី​សំណាក់​អន្តរជាតិ នេះ​បើ​ប្រៀបធៀប​ទៅ​នឹង​ប្រទេស​ដែល​មាន​ឥទ្ធិ​ពេល​ជាង ដូចជា​ប្រទេស​អ៊ីរ៉ង់។ ហើយ​អ្វី​ជា​ចំណុច​សំខាន់​បំផុត គឺ កម្ពុជា រង​សម្ពាធ​យ៉ាង​ខ្លាំង​ពី​សង្គ្រាម​ពាណិជ្ជកម្ម​អាមេរិក​-ចិន និង​សម្រាប់​ខ្សែ​ចង្វាក់​ផ្គត់ផ្គង់​ទូទាំង​ពិភពលោក។ ព្រំដែន​រវាង​ប្រទេសជិតខាង​អាស៊ីអាគ្នេយ៍​ទាំងពីរ គឺ កម្ពុជា​-​ថៃ នៅតែ​បន្ត​បិទ បន្ទាប់ពី​មាន​ភាព​តានតឹង​អស់​រយៈពេល ៩ ខែ ខណៈ​ដែល​ផ្ទៃដី​សំខាន់ៗ នៅ​តាម​បណ្ដោយ​ព្រំដែន​ប្រទេស​កម្ពុជា ត្រូវ​បាន​កាន់កាប់​ដោយ​កងកម្លាំង​ថៃ​ដែល​អះអាង​ថា វា​ជា​កម្មសិទ្ធិ​របស់​ពួកគេ។

យោង​តាម​របាយការណ៍​ពី​មន្ត្រី​ជំនាញ អះអាង​ថា នៅ​ខេត្ត​ជាប់​ព្រំដែន​មាន​ជនភៀសខ្លួន​ជាង ៧០០,០០០ នាក់ នៅ​ក្នុង​ប្រទេស​ទាំងពីរ បាន​ជម្លៀស​រក​ទីតាំង​មាន​សុវត្ថិភាព។ ហើយ​គេ​សង្កេត​ឃើញ​ថា ពលរដ្ឋ​ជនភៀសសឹក​កម្ពុជា គឺ​រងគ្រោះ​ច្រើន​ជាងគេ​ដោយសារ​ជម្លោះ​នេះ។

ទោះបីបើ​កម្ពុជា​មាន​សង្គ្រាម​យ៉ាងណាក៏ដោយ ប៉ុន្តែ​សេដ្ឋកិច្ច​កម្ពុជា​មាន​សន្ទុះ​រីកចម្រើន​ជាង ៦% ក្នុង​មួយ​ឆ្នាំ។ ភាគច្រើន​ជា​លទ្ធផល នៃ​ការ​វិនិយោគ​ឡើងវិញ​យ៉ាង​ខ្លាំងក្លា​នៅ​ក្នុង​ឧស្សាហកម្ម ដែល​អ្នក​ជំនាញ​យល់ថា ជា​អត្ថប្រយោជន៍​មួយ​ដែល​បាន​កើត​ឡើង​ពី​ការ​កើន​ឡើង នៃ​ផលិតកម្ម​ក្នុង​ស្រុក តាមរយៈ​ការ​បិទ​ព្រំដែន​ថៃ។

តាមរយៈ​ភាព​ជា​ដៃគូ​របស់ ​NewsX-BC News ដែល​ដឹកនាំ​ដោយ​លោក​ Alfaro និង​លោក​ មុនី មាន​គោលបំណង​ផ្សាយ​ឱ្យ​បាន​ល្អ​ពី​ធាតុ​សំខាន់​នៅ​កម្ពុជា គឺ​ មនុស្សធម៌ គុណធម៌ ស្ថិរភាព សន្តិភាព និង​សេដ្ឋកិច្ច ដែល​មិនទាន់​ត្រូវ​បាន​សារព័ត៌មាន​អន្តរជាតិ​លើក​ឡើង និង​ដើម្បី​ទាក់ទាញ​ចំណាប់​អារម្មណ៍​អ្នកអាន​ជា​ជនបរទេស។

BC News លោក មុនី បាន​មាន​ប្រសាសន៍​ថា “​នៅ​ចុង​បញ្ចប់ នៃ​ថ្ងៃ​នោះ សេដ្ឋកិច្ច​រីកចម្រើន ព្រោះ​មាន​សន្តិភាព និង​វិបុលភាព ហើយ​គ្មាន​រឿង​ណា​ដែល​ល្អ​ជាង​រឿង​សេដ្ឋកិច្ច និង​សន្តិភាព នោះ​ទេ ហើយ​គ្មាន​រឿង​អ្វី​ដែល​ចាំបាច់​ជាង​ការ​ដោះស្រាយ​របស់​ប្រជាជាតិ​មួយ ជាពិសេស​គឺ​រឿង​របស់​ប្រទេស​កម្ពុជា នៅ​ពេលនេះ​”។ “​ព័ត៌មាន​របស់​យើង គឺ​បាន​មកពី​ការ​ជ្រៀតចូល​ជ្រៅ​បំផុត នៃ​សង្គម​កម្ពុជា ចាប់​តាំងពី​ព្រះពុទ្ធសាសនា គឺជា​កម្លាំង​ចង​តែមួយ​នៅ​ក្នុង​តំបន់​ដែល​ឆ្លងកាត់​វណ្ណៈ និង​ព្រំដែន​”។

កន្លងទៅ​ថ្មីៗ នេះ លោក Alfaro បាន​សរសេរ​សៀវភៅ​មួយ​ស្តីពី​ជម្លោះព្រំដែន​កម្ពុជា​-​ថៃ ដែល​គ្រោង​នឹង​បោះពុម្ព​ក្នុង​ពេល​ឆាប់ៗ នេះ។ លោក​បាន​ទទួល​សិទ្ធិ​ដើម្បី​បោះពុម្ព​ផ្សាយ​រួចហើយ​គ្រឹះស្ថាន​បោះពុម្ពផ្សាយ និង​បណ្ដាញ​ព័ត៌មាន​នៅ​អាមេរិក។ លោក ម៉ៃ​ឃល កំពុង​ពិភាក្សា​ជាមួយ​ភ្នាក់ងារ​ដ៏​ធំ​បំផុត​មួយ​របស់​សហរដ្ឋអាមេរិក ពី​កំណត់ត្រា​នយោបាយ ដែល​បាន​សរសេរ និង​រៀបរាប់​នៅ​ក្នុង​សៀវភៅ​នេះ។ លោក​គ្រោង​នឹង​ចេញផ្សាយ មុន​ការ​បោះឆ្នោត​ពាក់កណ្ដាល​អាណត្តិ​របស់​សហរដ្ឋអាមេរិក។

លោក ម៉ៃ​ឃ​ល បាន​មាន​ប្រសាសន៍​ថា “​រឿង​កម្ពុជា គឺជា​រឿង​មួយ​មិនមែន​គ្រាន់តែ​ជា​ចំនួន​ប្រជាជន​ដែល​មាន​ការ​ចាប់​អារម្មណ៍​ចំពោះ​ប្រទេស​ខ្លាំង​ប៉ុណ្ណោះ​ទេ ប៉ុន្តែ​វា​ក៏​ជា​សក្ខីភាព​ដ៏​សំខាន់​មួយ​ចំពោះ​ជោគជ័យ នៃ​សន្តិភាព​ដែល​មេដឹកនាំ​កម្ពុជា​បាន​ប្រកាន់​ភ្ជាប់ ហើយ​ពិភពលោក​បាន​ឱ្យ​តម្លៃ ហើយ​លោក ត្រាំ Trump បាន​យល់ស្រប​ថា សន្តិភាព​សំខាន់​ណាស់​សម្រាប់​ពិភពលោក​”។

លោក Alfaro បាន​និយាយ​ថា “​យើង​អាច​នាំ​យក​មិន​ត្រឹមតែ​រឿងរ៉ាវ នៃ​ជម្លោះព្រំដែន​ប៉ុណ្ណោះ​ទេ ប៉ុន្តែ​យើង​អាច​និយាយ​ពី​ការ​កើនឡើង នៃ​សេដ្ឋកិច្ច​ដ៏​មិន​គួរ​ឱ្យ​ជឿ​របស់​កម្ពុជា​ទៅកាន់​ទស្សនិកជន​ជុំវិញ​ពិភពលោក នេះ​គឺជា​ព័ត៌មាន​ដែល​នឹង​មាន​សារៈសំខាន់។ នេះ​ជា​រឿង​ដែល​មាន​សារៈសំខាន់​បំផុត​សម្រាប់​ជនជាតិ​អាមេរិក និង​អឺរ៉ុប ដែល​កំពុងតែ​ស្វែងរក​ឱកាស​ពាណិជ្ជកម្ម និង​ចង់​ឈ្វេងយល់​ពី​កំណើន​សេដ្ឋកិច្ច​នៅ​អាស៊ី​”៕

អត្ថបទ ៖ National World , UK និង BC News

The post លោក ម៉ៃឃល នឹងមកខ្មែរចុងសប្ដាហ៍នេះ ជាមួយគណៈប្រតិភូអាមេរិក និងអ្នកព័ត៌មានចក្រភពអង់គ្លេស appeared first on Kampuchea Thmey Daily.

រដ្ឋមន្ត្រីបរិស្ថាននៃកម្ពុជា ពន្យល់ថា៖« ខ្ញុំប្រើពាក្យ “ឧក្រិដ្ឋកម្មបរិស្ថាន” ដោយសារនៅក្នុងច្បាប់អន្តរជាតិមានចែងហាមឃាត់ មិនឱ្យវាយប្រហារ ប៉ះពាល់បរិស្ថាន ឬក៏តំបន់ការពារទេ។»។

រដ្ឋមន្ត្រីបរិស្ថាន ក៏ឱ្យបានដឹងដែរថា ក្រសួងបរិស្ថានក៏បានធ្វើរបាយការណ៍ជូននាយករដ្ឋមន្ត្រី សម្ដេច ហ៊ុន ម៉ាណែត អំពីទង្វើព្រៃផ្សៃយោធាថៃឈ្លានពានវាយប្រហារប្រើយុទ្ធោបករណ៍បំផ្លិចបំផ្លាញធនធានធម្មជាតិក្នុងដែនអធិបតេយ្យកម្ពុជា រំលោភបំពានច្បាប់អន្តរជាតិ​ត្រង់មាត្រាណាខ្លះ។ ​

បណ្ឌិត អ៊ាង សុផល្លែត សង្កត់ធ្ងន់ថា៖« បរិស្ថានជាជីវិត មិនគោរពបរិស្ថាន គឺមិនគោរពជីវិត។ មិនគោរពជីវិត គឺបំពានសិទ្ធិមនុស្ស សិទ្ធិនៃការរស់រានមានជីវិត។»។

ក្នុងច្បាប់មនុស្សធម៌អន្តរជាតិ (International humanitarian law «IHL») ត្រង់មាត្រា៣៥ ចំណុចទី៣ បានហាមឃាត់មិនឱ្យប្រើប្រាស់វិធីសាស្ត្រ ឬយុទ្ធោបករណ៍ធ្វើសង្គ្រាមណា ដែលបង្កឱ្យមានការខូចខាតយ៉ាងធ្ងន់ធ្ងរ រាលដាលក្នុងទ្រង់ទ្រាយធំ និងយូរអង្វែង ដល់បរិស្ថានធម្មជាតិឡើយ។

ត្រឹមថ្ងៃទី២៣ ខែធ្នូ ក្រសួងការពារជាតិកម្ពុជា បានឱ្យដឹងថា យោធាថៃបានឈ្លានពានលើកម្ពុជារយៈពេល១៧ថ្ងៃជាប់ៗគ្នា ដោយបានប្រើប្រាស់យុទ្ធោបករណ៍ជាច្រើនប្រភេទដែលរំលោភច្បាប់អន្តរជាតិ ក្នុងនោះមានដូចជា ប្រើយន្តហោះចម្បាំងឈ្លាន​ពានទម្លាក់គ្រាប់បែក បាញ់ផ្សែងពុល ប្រើប្រាស់គ្រាប់បែកចង្កោមជាដើម ដោយបានវាយប្រហារលើសពីគោលដៅយោធា បំពានលើទីតាំងស៊ីវិលជាច្រើនកន្លែង។

ក្រសួងមហាផ្ទៃកម្ពុជា បានហៅទង្វើយោធាថៃ​ ថាជាទង្វើព្រៃផ្សៃ ជា«ឧក្រិដ្ឋកម្មសង្គ្រាម» បណ្ដាលឱ្យពលរដ្ឋខ្មែរស្លូតត្រង់ចំនួន២១នាក់(ទារក១នាក់) បាត់​បង់ជីវិត,រងរបួសជាង៨០នាក់, ពលរដ្ឋភៀសសឹកកើនឡើងដល់ជិត៥៥ម៉ឺននាក់, បង្កការខូចខាតផ្ទះសម្បែងជាង១រយខ្នង, បំផ្លិចបំផ្លាញប្រាសាទបុរាណដែលមហាបុព្វបុរសខ្មែរបន្សល់ទុក និងជាសម្បត្តិបេតិកភណ្ឌពិភពលោក, វត្តអារាម, ហេដ្ឋារចនាសម្ព័ន្ធស៊ីវិលជាច្រើនផ្សេងទៀត គិតត្រឹមព្រឹកថ្ងៃទី២៣ ខែធ្នូ៕

ដោយ៖ ង៉ិល ណារ៉ាត់  

The post រដ្ឋមន្ត្រីបរិស្ថានហៅទង្វើថៃបាញ់ផ្សែងពុល ទម្លាក់គ្រាប់បែកឱ្យខូចខាតធនធានធម្មជាតិថាជា«ឧក្រិដ្ឋកម្មបរិស្ថាន» appeared first on Kampuchea Thmey Daily.

រដ្ឋមន្ត្រីមានប្រសាសន៍ថាក្រសួងបរិស្ថានអនុវត្តទៅតាមច្បាប់ដោយគ្មានការលើកលែងចំពោះក្រុមហ៊ុននេះ ដោយផ្អែកទៅលើក្រមបរិស្ថាននិងធម្មជាតិ។រដ្ឋមន្ត្រីក្រសួងបរិស្ថានបានបញ្ជាឲ្យបិទទ្វារទីតាំងក្រុមហ៊ុន ហាមមិនឱ្យធ្វើសកម្មភាព និងដាក់កម្លាំងសមត្ថកិច្ចឲ្យបន្តតាមដានចំពោះសកម្មភាពក្រុមហ៊ុន ជៀសវាងក្រុមហ៊ុនធ្វើសកម្មភាពជីករ៉ែបន្តទៀត។

លោក អ៊ាង សុផល្លែត បញ្ជាក់ថា ក្រសួងបរិស្ថាន នឹងសិក្សាយ៉ាងលម្អិតអំពីហេតុប៉ះពាល់ដល់បរិស្ថាននិងការប៉ះពាល់ដល់ជីវិតសត្វពាហនៈទ្រព្យសម្បត្តិរបស់ប្រជាជន ហើយក្រសួងបានតម្រូវឲ្យក្រុមហ៊ុនស្ដារចំពោះផលប៉ះពាល់លើបរិស្ថាន រៀបចំអាងប្រព្រឹត្តិកម្មទឹកស្អាតនៅក្នុងប្រភពទឹកសាធារណៈ និងផ្ដល់សំណងដល់ប្រជាពលរដ្ឋដែលរស់នៅតំបន់នោះ។

ក្រោយពីទទួលបានគោលការណ៍បញ្ជារបស់រដ្ឋមន្ត្រីក្រសួងបរិស្ថាន, លោក ស៊ុន សុវណ្ណារិទ្ធ អភិបាលខេត្តកំពង់ឆ្នាំងធានាដាក់កម្លាំងសមត្ថកិច្ចតាមដានសកម្មភាពរបស់ក្រុមហ៊ុនមិនឲ្យធ្វើសកម្មភាពបន្តទៀត។

សូមរំលឹកថានៅយប់ថ្ងៃទី០៦ ខែកក្កដា ក្រសួងបរិស្ថានបានចាត់វិធានការបន្ទាន់ដោយសម្រេចបិទអាជីវកម្ម ក្រុមហ៊ុនខាងលើនេះបន្ទាប់ពីរកឃើញថា ក្រុមហ៊ុនបានប្រព្រឹត្តល្មើសច្បាប់បរិស្ថាន ដោយបានបញ្ចេញសំណល់រាវមិនត្រឹមត្រូវប៉ះពាល់ទឹកនៅក្នុងប្រព័ន្ធទឹកអូឬស្សីក្នុងភូមិសាស្ត្រឃុំខ្លុងពពក ឃុំជាប ឃុំអភិវឌ្ឍ និងឃុំតាំងក្រសាំង ស្រុកទឹកផុស ខេត្តកំពង់ឆ្នាំង ។ ក្រុមហ៊ុន ត្រូវបានរកឃើញការគ្រប់គ្រងសំណល់រាវពុំបានត្រឹមត្រូវ ដោយអាងស្តុកសំណល់រាវជាស្រះស្តុកធម្មតាមិនមានបំពាក់ប្រព័ន្ធសម្អាតត្រឹមត្រូវទេ ដោយគ្រប់សំណល់រាវចេញពីទីតាំងកិន និងរែងរ៉ែបានបង្ហូរលាយឡំជាមួយប្រព័ន្ធលូទឹកភ្លៀង។ លើសពីនេះ ក្រុមហ៊ុនមិនមានកន្លែងទុកដាក់សំណល់រឹង និងសារធាតុគ្រោះថ្នាក់ ត្រឹមត្រូវនៅឡើយទេ។ លើសពីនេះ ក្រុមហ៊ុនពុំបានអនុវត្តធ្វើរបាយការណ៍បាយតម្លៃហេតុប៉ះពាល់បរិស្ថាន ស្របតាមក្រមបរិស្ថាននិងធនធានធម្មជាតិ និងបទដ្ឋានគតិយុត្តជាធរមាន។

យោងតាមលទ្ធផលសំណាកទឹកទាំង៦ទីតាំងខាងលើ គឺមានស្ថានភាពគុណភាពទឹកមិនអនុលោម តាមស្តង់ដារទឹកសាធារណៈ ជាពិសេសប៉ារ៉ាមែត្រ Cyanide នៅចំនួន៥ទីតាំង មានកំហាប់ប្រែប្រួល ទាប់ ខ្ពស់ ។ សារធាតុ Cyanide នេះត្រូវបានគេប្រើប្រាស់ជាទូទៅនៅក្នុងវិស័យឧស្សាហកម្ម សម្រាប់ចម្រាញ់រ៉ែមាស។ ចំពោះប៉ារ៉ាមែត្រ CODCr ជាប៉ារ៉ាមែត្របញ្ជាក់ពីសាធាតុគីមីចេញពីរោងចក្រ ដែលជាធម្មតាមិនអាចរកឃើញនៅក្នុងទឹកធម្មជាតិ គឺត្រូវបានរកឃើញគ្រប់ទីតាំងយកសំណាកទាំងអស់ ទោះបីជាស្ថិតក្នុងកម្រិតទាបក៏ដោយ។

ក្រសួងបរិស្ថាន ស្នើដល់ប្រជាពលរដ្ឋដែលពាក់ព័ន្ធនៅក្នុងតំបន់ប្រើប្រាស់ទឹកអូរឬស្សី ក្នុងស្រុកទឹកផុស ខេត្តកំពង់ឆ្នាំង ផ្អាកការប្រើប្រាស់ទឹក នេសាទ ឬយកសត្វចិញ្ចឹមចុះផឹកទឹកអូរ ជាបណ្តោះអាសន្ន រហូតដល់មានការណែនាំជាថ្មី។ ជាមួយគ្នានេះក្រសួងបរិស្ថាន សម្រេចបិទអាជីវកម្មក្រុមហ៊ុន CAMBODIAN XUAN YI MINERALS CO., LTD.៕

The post រដ្ឋមន្ត្រីបរិស្ថានបញ្ជាដាច់ណាត់ឱ្យបិទអាជីវកម្មក្រុមហ៊ុនរករ៉ែ បំពុលទឹក ងាប់សត្វគោ ត្រី នៅកំពង់ឆ្នាំង និងដាក់សមត្ថកិច្ចយាមកាម appeared first on Kampuchea Thmey Daily.

ថ្លែងនាសន្និសីទសារព័ត៌មាន នាអាកាសយានដ្ឋានអន្តរជាតិតេជោ រដ្ឋមន្ត្រី អ៊ាង សុផល្លែត  បានបញ្ជាក់ថា គម្រោងសំខាន់ៗចំនួន៦ ត្រូវបានទទួលការគាំទ្រពីអង្គការសហប្រជាជាតិ និងដៃគូអភិវឌ្ឍធ្វើឱ្យប្រសើរឡើងនូវភាពស្អាត ភាពបៃតង កាត់បន្ថយការប្រែ ប្រួលអាកាសធាតុ និងការរស់នៅប្រកបដោយចីរភាព។

 គម្រោងទាំង៦ ដែលទទូលបានការគាំទ្រនោះគឺ៖ ទី១/ កម្មវិធីចីរភាពបឹងទន្លេសាបសម្រាប់អនុវត្តរយៈពេល២៥ឆ្នាំ រហូតដល់ឆ្នាំ២០៥០ ដោយផ្តោតលើសុខភាពនៃបឹងសាប ការការពារបរិស្ថានទប់ស្កាត់ការបំពុល ការបង្កើននូវជីវចម្រុះ និងមច្ឆាជាតិ និងការបង្កើនជីវភាពសហគមន៍មូលដ្ឋានដែលធន់ការប្រែប្រួលអាកាសធាតុ។ ទី២/ គម្រោងរៀបចំកោះស្រឡៅ ក្នុងភូមិសាស្ត្រខេត្តកោះកុង ឱ្យក្លាយជាកោះអព្យាក្រិតកាបូន និងជាកោះដែលល្អជាងគេបំផុតនៅអាស៊ី។ ទី៣/ គម្រោងអភិរក្សពូជក្តាមតំបន់ឆ្នេរក្នុងភូមិសាស្រ្តស្រុកស្រែអំបិល ខេត្តកោះកុង។

 ទី៤/ គម្រោងអភិវឌ្ឍន៍តំបន់ខ្នងផ្សារ ខេត្តកំពង់ស្ពឺ ស្របតាមការណែនាំរបស់សម្តេចធិបតី ហ៊ុន ម៉ាណែត នាយករដ្ឋមន្រ្តី ដើម្បីផ្តល់ជូនសហគមន៍មានការអភិវឌ្ឍជីវភាពឱ្យកាន់តែប្រសើរ និងចូលរួមការពារនិងអភិរក្សធនធានធម្មជាតិប្រកបដោយចីរភាព។ ៥. គម្រោងអភិវឌ្ឍន៏តំបន់ទេទឹកពុះ នៅខេត្តកំពង់ស្ពឺ ដើម្បីប្រែក្លាយឱ្យសហគមន៍ជាសហគមន៍អព្យាក្រឹតកាបូន និងផ្តល់ប្រយោជន៏ផ្ទាល់ដល់ប្រជាពលរដ្ឋនៅក្នុងមូលដ្ឋាន ដែលបានទទួលប្រយោជន៍ពីគម្រោងសម្រាប់ការបង្កើនជីវភាពកាន់តែប្រសើរ។ ៦. កម្ពុជាទទួលបានគម្រោងអភិវឌ្ឍន៍ក្នុងទឹកប្រាក់ប្រមាណ ៤លានដុល្លារ សម្រាប់ការកាត់បន្ថយការសាយភាយកាបូនខ្មៅ ចូលរួមក្នុងការឆ្លើយតបនឹងការប្រែប្រួលអាកាសធាតុ ដែលជាបញ្ហាសកល។

គួរ​​​ឱ្យដឹងថា ក្នុងឱកាសនៃសន្និសីទ COP30 រដ្ឋមន្ត្រីក្រសួងបរិស្ថានកម្ពុជា បានអញ្ជើញចូលរួមក្នុងព្រឹត្តិការណ៍សំខាន់ៗចំនួន១១ និងបានឡើងថ្លែងសន្ទរកថាគន្លឹះតំណាងឱ្យប្រទេសកម្ពុជា និងកិច្ចប្រជុំថ្នាក់រដ្ឋមន្រ្តី សម្រាប់ភាពជាដៃគូកិច្ចដឹកនាំសម្រាប់វិស័យព្រៃឈើ និងអាកាសធាតុ រួមទាំងការចែករំលែក និងបង្ហាញពីដំណើរការរបស់កម្ពុជា រួមចំណែកឆ្លើយតបនឹងការប្រែប្រួលអាកាសធាតុ តាមរយៈផែនការរួម ចំណែកជាតិ NDC3.0 ដែលរាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃរបស់ សម្តេចអគ្គមហា សេនាបតីតេជោ ហ៊ុន សែន អតីតនាយករដ្ឋមន្រ្តី និងបច្ចុប្បន្ន ជាប្រធានព្រឹទ្ធសភា និងបានបន្តវេនដឹកនាំប្រកបដោយស្វាហាប់និងវាងវៃ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានដាក់ជូនយ៉ាងជោគជ័យ ទៅកាន់អនុសញ្ញាក្របខ័ណ្ឌសហប្រជាជាតិ ស្តីពីការប្រែប្រួលអាកាសធាតុ (UNFCCC) នៅថ្ងៃទី៨ ខែសីហា ឆ្នាំ២០២៥។

រដ្ឋមន្ត្រីក្រសួងបរិស្ថាន អះអាងថា  ការដាក់ជូននូវផែនការជាតិនេះ សបញ្ជាក់ពីការប្តេជ្ញាចិត្តឥតងាករេរបស់កម្ពុជា ក្នុងការឆ្លើយតបនឹងការប្រែប្រួលអាកាសធាតុសកល និងដើម្បីសម្រេចគោលបំណងនៃកិច្ចព្រម ព្រៀងទីក្រុងប៉ារីស ស្តីពីការប្រែប្រួលអាកាស ធាតុ។ កម្ពុជាបានគូសបញ្ជាក់អំពីការពង្រឹងគោលដៅក្នុងការកាត់បន្ថយការបញ្ចេញឧស្ម័នផ្ទះកញ្ចក់ និងការបន្ស៊ាំនឹងការប្រែប្រួលអាកាសធាតុ តាមរយៈវិស័យអាទិភាព ចំនួន៥ គឺវិស័យឧស្សាហកម្ម ថាមពល កសិកម្ម ព្រៃឈើ និងសំណល់ ក្នុងគោលដៅកាត់បន្ថយការបញ្ចេញឧស្ម័នផ្ទះកញ្ចក់រហូតដល់ ៥៥% នៅឆ្នាំ ២០៣៥។

ក្រៅពីការចូលរួមជាអធិបតី និងជាភ្ញៀវកិត្តិយស ក្នុងឱកាសស្នាក់នៅនិងអញ្ជើញចូលរួមក្នុងសន្និសីទ COP30 ឆ្នាំ២០២៥នេះ រដ្ឋមន្ត្រី អ៊ាង សុផល្លែត ក៏បានជួបពិភាក្សាជាមួយថ្នាក់ដឹកនាំនៃបណ្តាប្រទេសមួយចំនួន បណ្តាដៃគូសហការ និងដៃគូអភិវឌ្ឍអន្តរជាតិ ដើម្បីពង្រឹងទំនាក់ទំនង និងកិច្ចសហប្រតិបត្តិការទ្វេភាគី និងពហុភាគី រួមចំណែកជាមួយសហគមន៍អន្តរជាតិឆ្លើយតបនឹងការប្រែប្រួលអាកាសធាតុ និងការពង្រឹងកិច្ចការការពារបរិស្ថាន និងគ្រប់គ្រងធនធានធម្មជាតិនៅកម្ពុជាឱ្យបានកាន់តែប្រសើរថែមទៀត៕

The post រដ្ឋមន្ត្រីបរិស្ថាន៖ គម្រោងសំខាន់ៗចំនួន៦ ទទួលបានការគាំទ្រពីUN និងដៃគូអភិវឌ្ឍនាកិច្ចប្រជុំ COP30 នៅប្រេស៊ីល appeared first on Kampuchea Thmey Daily.