វេទិការដ្ឋាភិបាលឌីជីថល ២០២៥ Archives - Kampuchea Thmey Daily

តើសួនឌីជីថលកម្ពុជា នឹងលេចរូបរាងឆាប់ៗនេះមានអ្វីខ្លះ?

Dy Bunnara — Mon, 15 Dec 2025 03:44:59 +0000

រដ្ឋាភិបាលគ្រោងបង្កើតសួនឌីជីថល (Digital Garden) គោលបំណងដើម្បីជំរុញឲ្យប្រទេសកម្ពុជាវិវត្តទៅរកឌីជីថល។ សួនបច្ចេកវិទ្យានេះនឹងក្លាយជាមជ្ឈមណ្ឌលប្រព័ន្ធអេកូឡូស៊ី ប្រមូលផ្ដុំឌីជីថលនៅក្នុងទីតាំងតែមួយ។

លោក ឃឹម ឌីណារ៉ុង មន្រ្តីក្រុមការងារសួនឌីជីថលបានលើកឡើងពីមុខងារសំខាន់ៗក្នុងសួនឌីជីថលរួមមាន៖

1. មជ្ឈមណ្ឌលទិន្នន័យជាតិ (National Data Center)
2. ភណ្ឌាគាគយមានដែនកំណត់ (Bonded Warehouse)
3. សាលពិព័រណ៍ និងសាលតាំងបង្ហាញ
4. សាលសន្និសីទ
5. មជ្ឈមណ្ឌលបណ្ដុះបណ្ដាល
6. បណ្ដុំសាកលវិទ្យាល័យ
7. បណ្តុំក្រុមហ៊ុនបច្ចេកវិទ្យាឌីជីថល
8. បណ្តុំធុរកិច្ចថ្មីឌីជីថល

លោក ឃឹម ឌីណារ៉ុង ក្រុមការងារសួនឌីជីថល

ពាក់ព័ន្ធការរៀបចំសួនឌីជីថលនេះ លោក ឃឹម ឌីណារ៉ុង បានគូសបញ្ជាក់ថា ជំហានទីមួយគឺការសិក្សារៀបចំមជ្ឈមណ្ឌលទិន្នន័យជាតិ (Data National Center) និងពាក់ព័ន្ធភណ្ឌាគាគយមានដែនកំណត់ (Bonded Warehouse)។

លោករំពឹងថា មជ្ឈមណ្ឌលទិន្នន័យជាតិ (National Data Center) នឹងកើតឡើងនៅឆ្នាំ ២០២៧។ ទោះជាយ៉ាងណាក៏ដោយ ការអភិវឌ្ឍអាចនឹងកាន់តែលឿនបន្ថែមទៀត បើសិនជាមានអ្នកវិនិយោគដែលមានបំណងចង់វិនិយោគឲ្យបានលឿន។

នៅប្រទេសជិតខាងដូចជាប្រទេសម៉ាឡេស៊ីមានសួនឌីជីថលរួចហើយ។ រដ្ឋាភិបាលកម្ពុជាព្យាយាមស្វែងរកកិច្ចសហការទាំងថ្នាក់ជាតិ និងថ្នាក់អន្តរជាតិ ដើម្បីមកវិនិយោគនិងជំរុញឲ្យប្រទេសកម្ពុជាឆ្ពោះទៅមុខដូចប្រទេសជិតខាង។

លោក ឃឹម ឌីណារ៉ុងបានលើកឡើងពីដំណើរការបង្កើតសួនឌីជីថល មន្រ្តីជំនាញបានចុះទៅសិក្សាស្វែងយល់ពីប្រទេសមួយចំនួនដូចជាប្រទេសសិង្ហបុរី កូរ៉េ និងប្រទេសជប៉ុន រួមទាំងប្រទេសចិន។

ពាក់ព័ន្ធភណ្ឌាគាគយមានដែនកំណត់ (Bonded Warehouse) សព្វថ្ងៃនេះ មិនទាន់មានភណ្ឌាគាគយមានដែនកំណត់សម្រាប់ថ្នាក់ជាតិនៅឡើយទេ គឺមានតែជាថ្នាក់ឯកជន ដូចជា DHL ឬ FedEx។ ឃើញចំណុចខ្វះខាតនេះ ទើបរដ្ឋាភិបាលជំរុញប្រឹងបង្កើតភណ្ឌាគាគយមានដែនកំណត់ (Bonded Warehouse) នេះឡើង។ នេះបើតាមលោក ឃឹម ឌីណារ៉ុង។

យ៉ាងណាមិញ ការប៉ាន់ស្មានថវិកាដំណើរការគម្រោងទាំងមូលមិនទាន់បានសិក្សាលម្អិតនៅឡើយទេ។ លោក ឃឹម ឌីណារ៉ុង បន្ថែម។

ថ្លែងនៅក្នុងពិធីបើកវេទិការដ្ឋាភិបាលឌីជីថលឆ្នាំ ២០២៥ និងពិព័រណ៍បច្ចេកវិទ្យាឌីជីថល លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍បានលើកឡើងពីចក្ខុវិស័យរបស់រដ្ឋាភិបាល គឺការប្រែក្លាយកម្ពុជាឱ្យទៅជាប្រទេសដែលពុំនិយមប្រើប្រាស់ក្រដាសបន្តទៀត ដោយឈរលើការប្រើប្រាស់បច្ចេកវិទ្យាឌីជីថល ដែលប្រជាពលរដ្ឋមានទំនុកចិត្ត ព្រមទាំងអាចលើកតម្កើងតួនាទីរបស់កម្ពុជាលើឆាកអន្តរជាតិ។

លោកថា ការរៀបចំ និងអភិវឌ្ឍន៍សួនឌីជីថលជាលើកដំបូង ក្នុងគោលដៅគាំទ្រដល់ធុរកិច្ចថ្មីឌីជីថល និងប្រែក្លាយប្រទេសកម្ពុជាទៅជាមជ្ឈមណ្ឌលឌីជីថល សំដៅរួមចំណែកដល់ការអភិវឌ្ឍសេដ្ឋកិច្ច និងសង្គមឌីជីថលនៅកម្ពុជា។

បើតាមលោករដ្ឋមន្រ្តី តាមរយៈគម្រោងអភិវឌ្ឍសួនឌីជីថល ( Digital Hub) នឹងជួយជំរុញដល់ការធ្វើបរិវត្តកម្ម សហគ្រិនភាព នវានុវត្តន៍ ជាពិសេសការបង្កើតជាប្រព័ន្ធអេកូឡូស៊ីមួយ ដែលផ្សារភ្ជាប់ការអប់រំបណ្តុះបណ្តាលជំនាញទៅនឹងឧស្សាហកម្មក្នុងវិស័យឌីជីថល។

ប្រភពពីមន្រ្តីក្រសួងប្រៃសណីយ៍ និងទូរគមនាគមន៍បានប្រាប់កម្ពុជាថ្មី សួនឌីជីថលគ្រោងអភិវឌ្ឍនៅលើផ្ទៃដីទំហំ ១០០ ហិកតា ស្ថិតនៅតាមបណ្តោយផ្លូវជាតិលេខ ៦៕

The post តើសួនឌីជីថលកម្ពុជា នឹងលេចរូបរាងឆាប់ៗនេះមានអ្វីខ្លះ? appeared first on Kampuchea Thmey Daily.

នេះជាឧបករណ៍តេស្តគុណភាពសេវាទូរសព្ទចង់ដឹងខ្លាំងឬខ្សោយ?

Dy Bunnara — Sat, 13 Dec 2025 03:15:33 +0000

មន្រ្តីនិយ័តករទូរគមនាគមន៍បានបង្ហាញពីដំណើរការឧបករណ៍តេស្តគុណភាពសេវាទូរសព្ទ។ ឧបករណ៍តេស្តនេះមានពីរប្រភេទសម្រាប់តេស្តក្នុងអគារ និងតេស្តនៅបរិវេណខាងក្រៅ។

១. ឧបករណ៍សម្រាប់ធ្វើ Drive Test បំពាក់លើរថយន្ត

ឧបករណ៍សម្រាប់ធ្វើតេស្តសម្រាប់បំពាក់លើរថយន្តមានឈ្មោះ (Accuver) គឺដើម្បីតេស្តគុណភាពសេវាខាងក្រៅអគារ។ ធម្មតាស្ថានីយបង្គោលផ្សាយសេវាទៅដល់ទូរស័ព្ទចល័ត។ ដើម្បីដឹងថាសេវាទូរសព្ទខ្សោយ ឬខ្លាំង គឺគេប្រើឧបករណ៍នេះ។

ការធ្វើតេស្តិត្រូវមាន System ឬ Software ដើម្បី Generate លទ្ធផលមើលថាតើគុណភាពសេវាហ្នឹងល្អ ឬមិនល្អ ខ្សោយ ឬខ្លាំង។

២. ឧបករណ៍សម្រាប់តេស្តគុណភាពសេវាក្នុងអាគារ

ឧបករណ៍មួយទៀតសម្រាប់តេស្តគុណភាពសេវានៅក្នុងអាគារមានឈ្មោះថា (Ammonizer)។ ឧបករណ៍នេះគឺគេស្ពាយ ហើយដើរតេស្តសេវាទូរសព្ទនៅក្នុងអាគារតែម្តង។ ការតេស្តនេះធ្វើឡើងក្នុងអគារខ្ពស់ៗដូចជាខុនដូ ឬអាផាតមិន។

ដោយសារតែសេវាទូរសព្ទពីខាងក្រៅ (ពីបង្គោល) ពេលចូលក្នុងអាគារ មានរបាំង និងឧបសគ្គ ដែលធ្វើឲ្យសេវាមានភាពខ្សោយ។ ដូច្នេះគេប្រើប្រព័ន្ធ IPS (ប្រព័ន្ធ IP) ដើម្បីផ្សាយសេវានៅក្នុងអាគារ ហើយឧបករណ៍នេះត្រូវបានប្រើដើម្បីតេសស្តគុណភាពសេវានៅក្នុងប្រព័ន្ធ IPS នោះ។

ពាក់ព័ន្ធទៅនឹងគុណភាពសេវា គឺមានស្តង់ដាកំណត់។ គេកំណត់កម្រិត (level) ជា dB ហើយក៏មានការចាត់ថ្នាក់តាមកម្រិតផ្សេងៗគ្នា៕

The post នេះជាឧបករណ៍តេស្តគុណភាពសេវាទូរសព្ទចង់ដឹងខ្លាំងឬខ្សោយ? appeared first on Kampuchea Thmey Daily.

រដ្ឋាភិបាលមានគម្រោងបង្កើតថ្នាលឌីជីថល ៤០ ទៀត ឆ្លើយតបតម្រូវការសាធារណៈ

Dy Bunnara — Fri, 12 Dec 2025 03:11:32 +0000

រដ្ឋាភិបាលមានគម្រោងនឹងបង្កើតថ្នាលឌីជីថលប្រមាណជា ៤០ ទៀត សម្រាប់បម្រើជាប្រយោជន៍ប្រើប្រាស់ក្នុងរដ្ឋបាលសាធារណៈ។ នេះបើតាមលោក ជាង វុត្ថា អគ្គលេខាធិការរងនៃអគ្គលេខាធិការដ្ឋានគណៈកម្មាធិការរដ្ឋាភិបាលឌីជីថល។

លោក ជាង វុត្ថា បានបញ្ជាក់ថា រដ្ឋាភិបាលមានគម្រោងបង្កើតថ្នាលប្រមាណ ៤០ ទៀត ប៉ុន្តែមិនអាចឆ្លើយបានថាមានថ្នាលអ្វីខ្លះទេ លុះត្រាតែធ្វើរួចរាល់ហើយទើបប្រកាសជាសាធារណៈ។

នៅក្នុងវេទិការដ្ឋាភិបាលឌីជីថល និងពិព័រណ៍បច្ចេកវិទ្យាឌីជីថលដែលទើបបញ្ចប់កាលពីពេលថ្មីៗនេះ គណៈកម្មាធិការរដ្ឋាភិបាលឌីជីថលបានបង្ហាញថ្នាលឌីជីថលដែលបង្កើតឡើងសម្រាប់ប្រើប្រាស់ក្នុងរដ្ឋបាលសាធារណៈមានជាង ១០។ ក្នុងចំណោមនោះ ថ្នាលដែលបានដាក់ឲ្យប្រើប្រាស់ជាផ្លូវការមានចំនួន ៥ ក្នុងនោះមានថ្នាល Verify.gov.kh ថ្នាល Go.gov.kh, ថ្នាល Sarika.gov.kh, ថ្នាល Nomsa.gov.kh និង FormKH។

លោក ជាង វុត្ថា បានពន្យល់ពីមុខងាររបស់ថ្នាលសំខាន់ៗក្នុងនោះថ្នាល FormKH ប្រើប្រាស់ដើម្បីផ្លាស់ប្ដូរទិន្នន័យនៅក្នុងរដ្ឋាភិបាល ដោយមិនព្រួយបារម្ភអំពីការទាញយកទិន្នន័យទៅប្រើប្រាស់ដោយអ្នកដទៃ ដែលជួយធានាសុវត្ថិភាពទិន្នន័យដែលបានដាក់ចូល។

ថ្នាល Sarika.gov.kh គឺជាថ្នាលដែលបំប្លែងអក្សរទៅជាសំឡេង ដើម្បីជួយសម្រួលការងារ។ ឧទាហរណ៍ ពេលបើកបរអាចស្ដាប់សំឡេងបានដោយមិនបាច់អានអក្សរទៀតទេ។ ថ្នាល Nomsa.gov.kh គឺជាឃ្លាំងឯកសារសាធារណៈ សម្រាប់ផ្ញើទិន្នន័យ ឯកសារ ឬព័ត៌មានទៅសាធារណជន។ ថ្នាលនេះជួយសម្រួលដល់ប្រជាជន ដែលពិបាកក្នុងការចាំថាព័ត៌មានសាធារណៈណាដែលចេញពីក្រសួងណា។

ថ្នាល Go.gov.kh ជាឃ្លាំងផ្ទុកឯកសារសាធារណៈផ្លូវការសម្រាប់ក្រសួង ស្ថាប័ន អាចប្រើប្រាស់ក្នុងការផ្សព្វផ្សាយព័ត៌មាន ឬឯកសារសាធារណៈ។ ដោយឡែកថ្នាល Verify.gov.kh គឺជាថ្នាលពិសេសបំផុតឈានមុខគេប្រើប្រាស់សម្រាប់ផ្ទៀងផ្ទាត់ឯកសាររដ្ឋាភិបាល។

បើតាមលោក ជាង វុត្ថា ថ្នាល Verify ត្រូវបានទទួលស្គាល់ជាអន្តរជាតិ ក្រោយដំណើរការរយៈពេលពីរឆ្នាំមានប្រទេសចំនួន ៤ បានស្នើសុំយកទៅប្រើប្រាស់។

ប្រទេសហ្វីលីពីនបានដាក់ឲ្យប្រើប្រាស់ថ្នាល Verify.gov.kh ដែលក្នុងមួយថ្ងៃមានការស្កេន QR កូដប្រើប្រាស់ដល់ទៅ ១៧០ លានដង។ ប្រទេសទីម័រលេស្តក៏បានប្រកាសដាក់ឱ្យប្រើប្រាស់ថ្នាល Verify ហើយប្រទេសបង់ក្លាដេសក៏បានស្នើសុំយកថ្នាលកម្ពុជានេះទៅប្រើប្រាស់ផងដែរ។

ការប្រើប្រាស់ថ្នាលផ្ទៀងផ្ទាត់ឯកសារ verify ត្រូវតែមាន QR កូដ។ ទោះបីជាឯកសារមានត្រាឬមើលទៅផ្លូវការក៏ដោយ បើគ្មាន QR កូដទេ ក៏មិនអាចផ្ទៀងផ្ទាត់បានដែរ ព្រោះឯកសារនោះមិនត្រូវបានដាក់បញ្ចូលក្នុងថ្នាល។ នេះបើតាមលោក ជាង វុត្ថា។

ប្រព័ន្ធថ្នាល Verify អនុញ្ញាតឱ្យប្រជាជនអាចដឹងថាឯកសារក្លែងក្លាយឬមិនក្លែងក្លាយ ដោយគ្រាន់តែដកទូរស័ព្ទស្កេនកាមេរ៉ា ដោយមិនចាំបាច់ធ្វើដំណើរមកភ្នំពេញដើម្បីផ្ទៀងផ្ទាត់ទៀតទេ។ បន្ថែមពីនេះបច្ចុប្បន្ន ថ្នាល verify ក៏បានដាក់ឲ្យអនុវត្តនៅក្នុងក្រសួងចំនួន ១៦ ក្នុងរដ្ឋាភិបាល។ លោក ជាង វុត្ថា បន្ថែម។

យ៉ាងណាមិញ លោក ជាង វុត្ថា មើលឃើញថា ការប្រើប្រាស់ថ្នាលទាំងនេះនៅមានកម្រិត។ ថ្ងៃខាងមុខ គណៈកម្មាធិការរដ្ឋាភិបាលឌីជីថលនឹងបង្កើតថ្នាលទាំងអស់ឱ្យមានស្តង់ដារតែមួយ ហើយស្តង់ដារនោះត្រូវផ្គូផ្គងនឹងស្តង់ដារអន្តរជាតិ៕

The post រដ្ឋាភិបាលមានគម្រោងបង្កើតថ្នាលឌីជីថល ៤០ ទៀត ឆ្លើយតបតម្រូវការសាធារណៈ appeared first on Kampuchea Thmey Daily.

៣ ថ្ងៃ វេទិការដ្ឋាភិបាលឌីជីថលឆ្នាំ២០២៥ សម្រេចបានសមិទ្ធផលអ្វីខ្លះ?

Dy Bunnara — Mon, 08 Dec 2025 04:04:17 +0000

វេទិការដ្ឋាភិបាលឌីជីថល ពិព័រណ៍បច្ចេកវិទ្យាឌីជីថល និងព្រឹត្តិការជាតិ-អន្តរជាតិពាក់ព័ន្ធក្រោមប្រធានបទ «ការពន្លឿនអនាគតឌីជីថល៖ អភិបាលកិច្ច កំណើន និងភាពជាដៃគូសកល» ដែលបានប្រព្រឹត្តទៅអស់រយៈពេល ៣ ថ្ងៃ ចាប់ពីថ្ងៃទី ៥ ដល់ថ្ងៃទី ៧ ខែធ្នូ ឆ្នាំ២០២៥ នៅមជ្ឈមណ្ឌលសន្និបាត និងពិព័រណ៍កោះពេជ្របានបញ្ចប់ដោយជោគជ័យ។

វេទិកានេះបានប្រមូលផ្តុំអ្នកចូលរួមសរុបប្រមាណ ២ ម៉ឺននាក់ រួមទាំងវត្តមានរដ្ឋមន្ត្រីឌីជីថលអាស៊ាន បណ្តាប្រទេសនានា គណៈប្រតិភូអន្តរជាតិ ដៃគូអភិវឌ្ឍន៍ ក្រសួង-ស្ថាប័ន ថ្នាក់ដឹកនាំវិស័យឯកជន ក្រុមហ៊ុនបច្ចេកវិទ្យាឌីជីថល ធុរកិច្ចថ្មីឌីជីថល គ្រឹះស្ថានអប់រំ សិស្សានុសិស្ស និងសាធារណជន។

ចំនួនអ្នកចូលរួមក៏កើនឡើងពីរដងបើធៀបនឹងការរៀបចំជាលើកទី ១ កាលពីឆ្នាំមុន។ មានក្រុមហ៊ុនជាច្រើនបានចូលរួមក្នុងពិព័រណ៍ រួមទាំងក្រុមហ៊ុនធុរកិច្ចថ្មីៗ (Startup) ក៏កើនឡើង និងបានចូលរួមក្នុងការប្រកួតប្រជែងយកពានរង្វាន់ផលិតផលបច្ចេកវិទ្យាឌីជីថល។

ថ្លែងនៅក្នុងពិធីបញ្ចប់វេទិកាវេទិការដ្ឋាភិបាលឌីជីថល ពិព័រណ៍បច្ចេកវិទ្យាឌីជីថល ធ្វើឡើងនៅរសៀលថ្ងៃទី ៧ ខែធ្នូ ឆ្នាំ២០២៥ លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍បានរំលេចលទ្ធផលសម្រេចបានសម្រាប់វេទិកាឆ្នាំ២០២៥ នេះមាន៖

១. ការចុះហត្ថលេខាលើអនុស្សរណៈយោគយល់ចំនួន ៧ ជាមួយប្រទេសជាមិត្ត និងដៃគូពាក់ព័ន្ធ ក្នុងវិស័យឌីជីថល បង្ហាញអំពីតួនាទីសំខាន់របស់កម្ពុជាក្នុងតំបន់ ។
២. ការប្រកាសដាក់ឱ្យដំណើរការជាផ្លូវកានៃសេវាទូរសព្ទចល័ត 5G ចាប់ពីឆ្នាំ២០២៦ ដែលនឹងជួយបង្កើនផលិតភាពសេដ្ឋកិច្ចរបស់កម្ពុជាក្នុងកម្រិតខ្ពស់ ជាពិសេសក្នុងវិស័យឧស្សាហកម្ម សិប្បកម្ម និងសេវាកម្ម ព្រមទាំងជួយជំរុញល្បឿននៃដំណើរការបរិវត្តកម្មឌីជីថលនៅក្នុងគ្រប់វិស័យទាំងអស់។
៣. លោក David L. Almirol Jr. អនុរដ្ឋមន្ត្រីក្រសួងបច្ចេកវិទ្យាគមនាគមន៍និងព័ត៌មានហ្វីលីពីន បានលើកឡើងថា ហ្វីលីពីនបានដាក់ឱ្យប្រើនិម្មាបនកម្មរបស់ថ្នាល verify លើអត្តសញ្ញាណឌីជីថល ជូនប្រជាជនជាង ៩០ លាននាក់ និងមានប្រតិបត្តិការជាង ១៧២ លានដង ក្នុងរយៈពេលដ៏ខ្លី ហើយនឹងត្រៀមដាក់នៅលើបណ្ណបើកបរនៅក្នុងឆ្នាំ២០២៦។
៤.ក្រសួងប្រៃសណីយ៍និងទូរគមនាគមន៍កម្ពុជា បានជួយរៀបចំដាក់ឱ្យប្រើថ្នាល verify ជាជំហានដំបូងនៅលើបណ្ណបើកបររបស់ប្រទេសទីម័រឡេស្តេ។
៥. ប្រទេសបង់ក្លាដេស បានស្នើសុំប្រើប្រាស់ថ្នាល verify នៅក្នុងប្រទេសរបស់ខ្លួន ដែលមានប្រជាជនសរុបប្រមាណ ១៧៤ លាននាក់។
៦. ថ្នាល DG SuperApp របស់កម្ពុជា នឹងមានវត្តមានក្នុងដំណើរការបរិវត្តកម្មឌីជីថលក្នុងឆ្នាំ២០២៦។
៧. វត្តមានរបស់ក្រុមហ៊ុន Plug and Play បានធ្វើឱ្យក្តីសង្ឃឹមរបស់អ្នកបច្ចេកវិទ្យា និងយុវជនដែលចាប់អារម្មណ៍លើធុរកិច្ចថ្មីឌីជីថល មានការកើនឡើងខ្ពស់ ក្រោយការប្រកាសអំពីបំណងនៃការវិនិយោគលើ Bamnang Academy ដែលជាធុរកិច្ចថ្មីឌីជីថលរបស់យុវជនខ្មែរ។
៨. សួនឌីជីថល (Digital Park) នឹងជំរុញឱ្យមានកំណើនការងារ ប្រែក្លាយកម្ពុជាទៅជាមជ្ឈមណ្ឌលបច្ចេកវិទ្យាឌីជីថល (Digital Hub) មួយក្នុងតំបន់។ ក្រសួងប្តេជ្ញានឹងបន្តជំរុញការអភិវឌ្ឍសួនឌីជីថល ឱ្យបានជោគជ័យ។

ក្នុងឱកាសនោះដែរ លោក សូ វិសុទ្ធី រដ្ឋលេខាធិការក្រសួងប្រៃសណីយនិងទូរគមនាគមន៍បានលើកឡើងពីរបាយការណ៍លទ្ធផលការងារនៃវេទិការដ្ឋាភិបាលឌីជីថលរយៈពេល ៣ ថ្ងៃនេះ។

លោកថា វេទិការដ្ឋាភិបាលឌីជីថលឆ្នាំ ២០២៥ បែងចែកជាពីរផ្នែកធំៗ៖

1. ផ្នែកពិភាក្សា និងបទបង្ហាញគន្លឹះ៖ បង្ហាញពីវឌ្ឍនភាពនៃការកសាងរដ្ឋាភិបាល ការអនុវត្តគោលនយោបាយអភិបាលកិច្ច ការជំរុញកិច្ចសហប្រតិបត្តិការក្នុងតំបន់ និងការចែករំលែកការអនុវត្តលើការអភិវឌ្ឍអភិបាលកិច្ចឌីជីថល សន្តិសុខតាមប្រព័ន្ធអ៊ីនធឺណិត គោលនយោបាយបញ្ញាសិប្បនិម្មិត (AI) និងការរួមបញ្ចូលបរិយាប័ន្នឌីជីថល។
2. ពិព័រណ៍បច្ចេកវិទ្យាឌីជីថល (Digital Technology Expo)៖ បានបង្ហាញពីសមិទ្ធផលរបស់រដ្ឋាភិបាល ដំណោះស្រាយឌីជីថលជំនាន់ក្រោយ និងធុរកិច្ចថ្មីឌីជីថល។

ក្នុងវេទិកា មានការចុះអនុស្សរណៈនៃការយោគយល់គ្នា (MoU) សរុបចំនួន ៦ រវាងក្រសួងប្រៃសណីយ៍ និងទូរគមនាគមន៍ (កបទ) ជាមួយស្ថាប័នទទួលបន្ទុកសេវាសាធារណៈរបស់សាធារណរដ្ឋអាស៊ែបៃហ្សង់ ក្រសួងសិប្បនិម្មិតរបស់សាធារណរដ្ឋកាហ្សាក់ស្ថាន គណៈកម្មាធិការសេដ្ឋកិច្ច និងសង្គមរបស់អង្គការសហប្រជាជាតិសម្រាប់អាស៊ីប៉ាស៊ីហ្វិក (UN ESCAP) ទីភ្នាក់ងារអភិវឌ្ឍន៍បារាំង (AFD) ក្រុមហ៊ុននៃចក្រភពអង់គ្លេស និងក្រុមហ៊ុន STMicroelectronics។

ដោយឡែកពិព័រណ៍បច្ចេកវិទ្យាឌីជីថល មានស្តង់ចូលរួមសរុបចំនួន ២០៩ ស្តង់ ដោយមានការតាំងបង្ហាញពីក្រសួង-ស្ថាប័ន និងក្រុមហ៊ុនបច្ចេកវិទ្យាចំនួន ១៥១ អង្គភាព។ មានក្រុមហ៊ុន និងដៃគូអន្តរជាតិចំនួន ១៧ ចូលរួមផងដែរ។ ឧបករណ៍ដែលបានបង្ហាញរួមមាន ថ្នាលសេវាសាធារណៈឌីជីថលរបស់រដ្ឋាភិបាល ដំណោះស្រាយឌីជីថល ឧបករណ៍បច្ចេកវិទ្យា វេទិកាអប់រំឆ្លាតវៃ បច្ចេកវិទ្យាក្លោត ឧបករណ៍ IoT និងកម្មវិធីបញ្ញាសិប្បនិម្មិតជាច្រើន។

ក្រៅពីវេទិកាសំខាន់ ក៏មានកម្មវិធីព្រឹត្តិការណ៍ជាតិ និងអន្តរជាតិពាក់ព័ន្ធចំនួន ៦ ផងដែរ៖

1. កិច្ចប្រជុំគណៈកម្មាធិការតម្រង់ទិសនៃគម្រោង Asia-Pacific Information Superhighway និងការត្រួតពិនិត្យកម្រិតតំបន់ ដែលសហការរៀបចំដោយ UN ESCAP)
2. វេទិកាអភិបាលកិច្ចអ៊ីនធឺណិតកម្ពុជា 2025 (Cambodia Internet Governance Forum 2025)
3. សន្និសីទបច្ចេករដ្ឋាភិបាល 2025
4. កម្មវិធីពង្រីកបណ្តាញអាជីវកម្ម និងបណ្តាញគំនិតធុរកិច្ចថ្មី រៀបចំដោយក្រុមហ៊ុន Plug and Play)
5. ការជួបជុំបណ្តាញទំនាក់ទំនងធុរកិច្ចឌីជីថលអាស៊ាន ជាលើកទីមួយ រៀបចំដោយ (កបទ) ក្នុងក្របខណ្ឌកិច្ចសហប្រតិបត្តិការរវាងរដ្ឋមន្ត្រីឌីជីថលអាស៊ាន និងជប៉ុន)
6. កម្មវិធីពានរង្វាន់ឌីជីថលកម្ពុជា 2025 (Cambodia Digital Award 2025)

The post ៣ ថ្ងៃ វេទិការដ្ឋាភិបាលឌីជីថលឆ្នាំ២០២៥ សម្រេចបានសមិទ្ធផលអ្វីខ្លះ? appeared first on Kampuchea Thmey Daily.

ត្រឹមឆ្នាំ ២០៣០ កម្ពុជាដាក់មហិច្ឆតាមានក្រុមហ៊ុនបច្ចេកវិទ្យា Start Up យ៉ាងតិចមួយមានតម្លៃ ១ ប៊ីលានដុល្លារ

Dy Bunnara — Mon, 08 Dec 2025 03:08:22 +0000

ត្រឹមឆ្នាំ ២០៣០ កម្ពុជាមានបំណងចង់ឲ្យមានក្រុមហ៊ុន Unicorn (ក្រុមហ៊ុនដែលមានតម្លៃ ១ ០០០ លានដុល្លារឡើងទៅ) យ៉ាងតិចបំផុតមួយនៅកម្ពុជា។ នេះបើតាមលោក ជា វ៉ាន់ដេត រដ្ឋមន្រ្តីក្រសួងប្រៃសណីយ៍ និងទូរគមនាគមន៍ ថ្លែងក្នុងពិធីបិទបញ្ចប់វេទិការដ្ឋាភិបាលឌីជីថលឆ្នាំ ២០២៥ និងពិព័រណ៍បច្ចេកវិទ្យាឌីជីថលកាលពីម្សិលមិញនេះ។

ថ្លែងក្នុងកម្មវិធីដែលមានការចូលរួមពីរដ្ឋមន្ត្រីឌីជីថលអាស៊ាន បណ្តាប្រទេសនានា គណៈប្រតិភូអន្តរជាតិ ដៃគូអភិវឌ្ឍន៍ ក្រសួង-ស្ថាប័ន ក្រុមហ៊ុនបច្ចេកវិទ្យាឌីជីថល ធុរកិច្ចថ្មីឌីជីថល លោករដ្ឋមន្រ្តីបានគូសបញ្ជាក់ថា មហិច្ឆតារបស់កម្ពុជាគឺចង់ឲ្យមានក្រុមហ៊ុន Startup អាចពង្រីកខ្លួនមិនត្រឹមតែក្នុងទីផ្សារក្នុងស្រុក តែដល់ទីផ្សារតំបន់និងទីផ្សារអន្តរជាតិដែលមាននៅអាស៊ី អាមេរិកឡាទីន និងអាហ្វ្រិក។

លោករដ្ឋមន្រ្តីបានកត់សម្គាល់ពីវត្តមានរបស់ក្រុមហ៊ុន Plug and Play ដែលជាក្រុមហ៊ុនភ្ញាស់ធុរកិច្ចថ្មីដ៏មានបទពិសោធន៍ និងជោគជ័យនៅក្នុងពិភពលោក ដែលស្ថាបនិករបស់ក្រុមហ៊ុន Plug and Play បានប្រកាសពីបំណងចង់វិនិយោគទៅលើក្រុមហ៊ុនធុរកិច្ចរបស់កម្ពុជា។

លោកថា តាមរយៈការគាំទ្រពីក្រុមហ៊ុនលំដាប់ពិភពលោកនេះនឹងជួយភ្ញាស់ក្រុមហ៊ុន Startup នៅកម្ពុជា ដើម្បីឈានសម្រេចគោលដៅរួមទាំងពង្រឹងសមត្ថភាពនិងលទ្ធភាពឈានជើងចូលទីផ្សារអន្តរជាតិ។

វេទិការដ្ឋាភិបាលឌីជីថលឆ្នាំ ២០២៥ បានប្រព្រឹត្តទៅដោយជោគជ័យក្នុងរយៈពេល ៣ ថ្ងៃ ចាប់ពីថ្ងៃទី ៥ ដល់ថ្ងៃទី ៧ ខែធ្នូ ឆ្នាំ ២០២៥។ ព្រឹត្តិការណ៍នេះត្រូវបានរៀបចំឡើងក្រោមប្រធានបទ “ការពន្លឿនអនាគតឌីជីថល៖ អភិបាលកិច្ច កំណើន និងភាពជាដៃគូសកល”។

វេទិកានេះបានប្រមូលផ្តុំអ្នកចូលរួមសរុបប្រមាណ ២ ម៉ឺននាក់ រួមមានរដ្ឋមន្ត្រីឌីជីថលអាស៊ាន និងបណ្តាប្រទេសនានា គណៈប្រតិភូអន្តរជាតិ ដៃគូអភិវឌ្ឍន៍ ក្រសួង-ស្ថាប័ន ថ្នាក់ដឹកនាំវិស័យឯកជន ក្រុមហ៊ុនបច្ចេកវិទ្យាឌីជីថល ធុរកិច្ចថ្មីឌីជីថល គ្រឹះស្ថានអប់រំ សិស្សានុសិស្ស និងសាធារណជន។

ក្នុងរយៈពេល ៣ ថ្ងៃ វេទិកាបានបង្ហាញនូវសមិទ្ធផលរដ្ឋាភិបាលរបស់កម្ពុជា ក៏ដូចជាការពង្រឹងភាពជាដៃគូក្នុងតំបន់ លើកកម្ពស់ឧត្តមភាព និងឱកាសវិនិយោគ ព្រមទាំងផ្តល់នូវបទពិសោធន៍ចំណេះដឹង និងឧត្តមានុវត្តលើការផ្លាស់ប្តូរ ឌីជីថល ហេដ្ឋារចនាសម្ព័ន្ធ និងវត្តមានឌីជីថល។

ចំនួនអ្នកចូលរួមក៏កើនឡើងពីរដងបើធៀបនឹងការរៀបចំជាលើកទី ១ កាលពីឆ្នាំមុន។ មានក្រុមហ៊ុនជាច្រើនបានចូលរួមក្នុងពិព័រណ៍ រួមទាំងក្រុមហ៊ុនធុរកិច្ចថ្មីៗ (Startup) ដែលកំពុងកើតឡើង និងបានចូលរួមក្នុងការប្រកួតប្រជែងយកពានរង្វាន់។

នៅក្នុងវេទិកា មជ្ឍមណ្ឌលបច្ចេកវិទ្យាឌីជីថល Plug and Play ដែលមានមូលដ្ឋាននៅ Silicon សហរដ្ឋអាមេរិក បានជ្រើសរើសក្រុមហ៊ុន Start Up មួយចំនួនរបស់កម្ពុជា ដើម្បីវិនិយោគ និងជំរុញឱ្យទៅជាក្រុមហ៊ុនកម្រិតអន្តរជាតិ។

លោក ជា វ៉ាន់ដេត រដ្ឋមន្រ្តីក្រសួងប្រៃសណីយ៍ និងទូរគមនាគមន៍បានគូសបញ្ជាក់ថា ការសម្រេចចិត្តរបស់ Plug and Play វិនិយោគលើក្រុមហ៊ុន Start Up នៅកម្ពុជា ស្ដែងឱ្យឃើញពីលទ្ធផលនៃកិច្ចខិតខំរបស់គ្រប់ភាគគីពាក់ព័ន្ធ ក្នុងការកសាងបរិយាកាសអំណោយផល សម្រាប់អ្នកមានសមត្ថភាពក្នុងការចាប់ឱកាសរីកចម្រើនទាំងក្នុងស្រុកនិងសាកលលោក។

ការវិនិយោគនេះគឺជាសមិទ្ធផលដ៏សំខាន់ សម្រាប់ប្រព័ន្ធអេកូឡូស៊ីធុរកិច្ចថ្មីឌីជីថលរបស់កម្ពុជាដែលកំពុងរីកចម្រើន និងឆ្លុះបញ្ចាំងពីសមត្ថភាពលេចធ្លោរបស់ធុរជនកម្ពុជាក្នុងវិស័យបច្ចេកវិទ្យាឌីជីថល៕

The post ត្រឹមឆ្នាំ ២០៣០ កម្ពុជាដាក់មហិច្ឆតាមានក្រុមហ៊ុនបច្ចេកវិទ្យា Start Up យ៉ាងតិចមួយមានតម្លៃ ១ ប៊ីលានដុល្លារ appeared first on Kampuchea Thmey Daily.

ក្រុមហ៊ុនទី ១ របស់កម្ពុជា ទទួលបានការវិនិយោគពីក្រុមហ៊ុននៅ Silicon អាមេរិកឱ្យទៅជាក្រុមហ៊ុនកម្រិតអន្តរជាតិ

Dy Bunnara — Sun, 07 Dec 2025 07:12:04 +0000

ក្រុមហ៊ុន Bamnang Academy ត្រូវបានមជ្ឈមណ្ឌលបច្ចេកវិទ្យា Plug and Play ដែលមានមូលដ្ឋាននៅ Silicon Valley សហរដ្ឋអាមេរិក ជ្រើសរើសជាក្រុមហ៊ុនទី ១ របស់កម្ពុជា ដើម្បីវិនិយោគ និងជំរុញឱ្យទៅជាក្រុមហ៊ុនកម្រិតអន្តរជាតិ។

នៅក្នុងកម្មវិធីពានរង្វាន់ឌីជីថលកម្ពុជា ឆ្នាំ២០២៥ Bamnang Academy ត្រូវបានជ្រើសរើសជាជយលាភីលេខ ២ ពានរង្វាន់រដ្ឋមន្ត្រីក្រសួងប្រៃសណីយ៍និងទូរគមនាគមន៍ ប្រចាំឆ្នាំ២០២៥ ពីក្នុងចំណោមធុរកិច្ចថ្មីនិងក្រុមហ៊ុន ៨៦ ដែលបានចូលរួមប្រកួតប្រជែង។ ពិធីប្រកាសពានរង្វាន់ឆ្នាំនេះ ចូលរួមដោយថ្នាក់ដឹកនាំក្រសួងស្ថាប័ន ធុរកិច្ចថ្មីឌីជីថលអាស៊ាន និងភ្ញៀវបរទេសមកពីប្រមាណ ២៧ ប្រទេស។

លោក ជា វ៉ាន់ដេត រដ្ឋមន្រ្តីក្រសួងប្រៃសណីយ៍និងទូរគមនាគមន៍បានគូសបញ្ជាក់ថា ការសម្រេចចិត្តរបស់ Plug and Play វិនិយោគលើក្រុមហ៊ុន Bamnang Academy ស្ដែងឱ្យឃើញពីលទ្ធផលនៃកិច្ចខិតខំរបស់គ្រប់ភាគគីពាក់ព័ន្ធក្នុងការកសាងបរិយាកាសអំណោយផលសម្រាប់អ្នកមានសមត្ថភាពក្នុងការចាប់ឱកាសរីកចម្រើន ទាំងក្នុងស្រុង និងសាកលលោក។

ក្នុងឱកាសនោះ លោក David L.Almirol អនុរដ្ឋមន្ត្រី ក្រសួងបច្ចេកវិទ្យាគមនាគមន៍និងព័ត៌មាន (DICT) នៃសាធារណរដ្ឋហ្វ៊ីលីពីន បានផ្ដល់ការលេីកទឹកចិត្តជាប្រាក់រង្វាន់ដល់ក្រុមហ៊ុន Jobify និង Bamnang ចំនួន ១ ម៉ឺនដុល្លារ ក្នុង ១ ក្រុមហ៊ុន។

Plug and Play គឺជាក្រុមពន្លឿនធុរកិច្ចថ្មី (Startup Accelerator) ដ៏ល្បីល្បាញបំផុតមួយក្នុងពិភពលោក ដែលមានស្នាដៃជួយស្ថាបនិកអាជីវកម្មដំណាក់កាលដំបូងឱ្យរីកចម្រើនក្លាយជា Unicorns (ធុរកិច្ចថ្មីដែលមានតម្លៃសរុបលើសពី ១ ពាន់ លានដុល្លារ) ជាង 30 នៅទូទាំងពិភពលោក។

ក្រុមហ៊ុន Google ក៏បានពង្រីកខ្លួនចេញពីការគាំទ្ររបស់ Plug and Play ផងដែរ។ ប្រព័ន្ធអេកូឡូស៊ីរបស់ Plug and Play ភ្ជាប់ស្ថាបនិកអាជីវកម្មជាមួយអ្នកវិនិយោគធំៗ ដៃគូក្រុមហ៊ុន និងប្រឹក្សាយោបល់លំដាប់ពិភពលោក ដែលផ្ដល់មូលដ្ឋានរឹងមាំដល់ធុរកិច្ចថ្មីឱ្យពង្រីកអាជីវកម្មបានលឿនជាងមុន ច្នៃប្រឌិតដោយក្លាហាន និងឈានដល់សក្ដានុពលដែលមានតម្លៃរាប់ពាន់លានដុល្លារ។

Bamnang Academy ត្រូវបានបង្កើតដោយអតីតនិស្សិត ៣នាក់ ដែលរៀននៅសាកលវិទ្យាល័យអាមេរិកាំងភ្នំពេញ និងនៅសហរដ្ឋអាមេរិក៕

The post ក្រុមហ៊ុនទី ១ របស់កម្ពុជា ទទួលបានការវិនិយោគពីក្រុមហ៊ុននៅ Silicon អាមេរិកឱ្យទៅជាក្រុមហ៊ុនកម្រិតអន្តរជាតិ appeared first on Kampuchea Thmey Daily.

ប្រទេសនៅតំបន់អាស៊ានបន្តបន្ទាប់ ប្រើប្រាស់ថ្នាលផ្ទៀងផ្ទាត់ទិន្នន័យ Verify របស់កម្ពុជា

Dy Bunnara — Sun, 07 Dec 2025 05:09:37 +0000

លោក ជា សេរីវឌ្ឍ អគ្គលេខាធិការនៃអគ្គលេខាធិការដ្ឋានគណៈកម្មាធិការរដ្ឋាភិបាលឌីជីថលបានថ្លែងថា ថ្នាល Verify.gov.kh កំពុងត្រូវបានប្រើប្រាស់យ៉ាងទូលំទូលាយនៅក្នុងប្រទេសកម្ពុជា រួមទាំងប្រទេសមួយចំនួននៅក្នុងតំបន់អាស៊ាន។

«យើងឃើញថា មហាវិទ្យាល័យរដ្ឋទាំងអស់ក្នុងប្រទេសកម្ពុជាបានប្រើប្រាស់រួចហើយ ខណៈវិស័យឯកជនមានប្រហែលជា ៧០%។ ដោយឡែកស្ថាប័នរដ្ឋាភិបាល មាន ២៤ ក្រសួង ក្នុងចំណោម ២៦ ក្រសួង ដែលបានប្រើប្រាស់ថ្នាលមួយនេះ»។

លោកបន្តថា បច្ចុប្បន្នមានឯកសារជាង ៤ លាន ត្រូវបានដាក់នៅលើថ្នាល Verify។ ឯកសារទាំងអស់នេះអាចប្រើប្រាស់បានទាំងក្នុងទម្រង់ក្រដាស និងទម្រង់ឌីជីថល (digital) ដោយមិនចាំបាច់ត្រូវការវាយត្រាម្តងទៀតទេ។

ថ្នាល Verify កម្ពុជាមិនត្រឹមកំពុងប្រើប្រាស់ក្នុងប្រទេសអាស៊ានមួយចំនួន ក៏កំពុងដំណើរការក្នុងកម្រិតអន្តរជាតិផងដែរ។ ថ្នាលនេះអាចប្រើប្រាស់នៅប្រទេសដទៃដែលបានចុះអនុស្សារណៈនៃការយោគយល់ដូចជានៅ៖ សាធារណរដ្ឋកូរ៉េ ប្រទេសថៃ សហរដ្ឋអាមេរិក សិង្ហបុរី និងប្រទេសដទៃមួយចំនួនទៀត។

សម្រាប់កម្រិតអាស៊ាន ប្រទេសឡាវកំពុងតែអនុម័ត (adopt) ថ្នាល Verify និងប្រទេសទីម័រលេស្តេក៏បានដាក់ឲ្យប្រើប្រាស់ថ្នាលរបស់កម្ពុជានេះដែរ ហើយប្រទេសហ្វីលីពីនបានដាក់ប្រើប្រាស់យ៉ាងច្រើនសន្ធឹកសន្ធាប់។

លើសពីនេះ កម្ពុជាក៏ទទួលបានសំណើផ្លូវការពីការចែករំលែកនិងប្រើប្រាស់ថ្នាល Verify ជូនដល់សាធារណរដ្ឋប្រជាមានិតបង់ក្លាដែស។ នេះបើតាមលោក ជា សេរីវឌ្ឍ។

គណៈកម្មាធិការរដ្ឋាភិបាលឌីជីថលចាត់ទុកថ្នាល Verify មិនមែនគ្រាន់តែជាការចាប់ផ្តើមទេ ប៉ុន្តែជាថ្នាលធំដែលអាចប្រមូលផ្តុំឯកសារទាំងអស់ពីគ្រប់ប្រទេសមកកន្លែងតែមួយ។

កម្ពុជាបានជួបពិភាក្សាជាមួយប្រតិភូមកពីប្រទេសកាហ្សាក់ស្ថាន និងអាហ្សាបៃហ្សង់ ដើម្បីចែករំលែកថ្នាលដែលអាចប្រើប្រាស់បម្រើជាប្រយោជន៍ប្រទេសនីមួយៗ។

បច្ចុប្បន្ន កម្ពុជាកំពុងរៀបចំជាក្របខ័ណ្ឌមួយដែលគេហៅថា G2G Solution (Government-to-Government Solution) ដែលអនុញ្ញាតឱ្យប្រទេសដែលចង់ចែករំលែកថ្នាល អាចដាក់ចូលហើយប្រទេសផ្សេងទៀតអាចរួមគ្នាប្រើប្រាស់ទាំងអស់គ្នា។

តាមរយៈកិច្ចសហការគ្នា ថ្នាល verify របស់កម្ពុជា ត្រូវបានរដ្ឋាភិបាលហ្វីលីពីនយកទៅប្រើប្រាស់លើអត្តសញ្ញាណឌីជីថលជូនប្រជាជនជាង ៩០ លាននាក់។

ថ្លែងក្នុងពិធីបើកវេទិការដ្ឋាភិបាលឌីជីថលឆ្នាំ២០២៥ និងពិព័រណ៍បច្ចេកវិទ្យាឌីជីថល កាលពីព្រឹកថ្ងៃទី ៥ ខែធ្នូ លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍គូសបញ្ជាក់ថា ក្រៅពីជោគជ័យក្នុងប្រទេស ថ្នាលផ្ទៀងផ្ទាត់ឯកសាររបស់កម្ពុជា verify បានក្លាយជាឧត្តមានុវត្តន៍ដែលត្រូវបានប្រទេសជាមិត្តក្នុងតំបន់ដកពិសោធន៍។

បើតាមលោករដ្ឋមន្រ្តី ហ្វីលីពីនបានដាក់ឱ្យប្រើនិម្មាបនកម្មរបស់ថ្នាល verify លើអត្តសញ្ញាណឌីជីថល ជូនប្រជាជនជាង ៩០ លាននាក់ និងមានប្រតិបត្តិការជាង ១៦៤ លានដង ក្នុងរយៈពេលដ៏ខ្លី ដែលបង្ហាញពីសក្តានុពលយ៉ាងធំសម្បើមនៃបច្ចេកវិទ្យារបស់កម្ពុជា។

ដោយឡែកក្នុងសន្នីសីទពិសេសមួយកាលពីរសៀលម្សិលមិញនេះឆ្លើយតបសំនួររបស់កម្ពុជាថ្មី លោក David L. Almirol Jr. អនុរដ្ឋមន្ត្រី ក្រសួងបច្ចេកវិទ្យាគមនាគមន៍និងព័ត៌មាន (DICT) នៃសាធារណរដ្ឋហ្វីលីពីនបានបញ្ជាក់ថា កម្ពុជានិងហ្វីលីពីន បានធ្វើកិច្ចសហការគ្នាក្នុងការផ្ទេរបច្ចេកវិទ្យាឌីជីថលទៅវិញទៅមក ដើម្បីជំរុញល្បឿននៃការធ្វើបរិវត្តកម្មរដ្ឋាភិបាលឌីជីថលរបស់ប្រទេសទាំងពីរ។

តាមរយៈកិច្ចសហការគ្នានេះ ថ្នាល verify.gov របស់កម្ពុជា ត្រូវបានដាក់ឲ្យប្រើប្រាស់លើឯកសារអត្តសញ្ញាណបណ្ណពលរដ្ឋហ្វីលីពីន។ ដោយឡែកហ្វីលីពីនក៏បានចែករំលែកពីការប្រើប្រាស់ថ្នាល SuperApp ដែលរួមចំណែកយ៉ាងសំខាន់ក្នុងការអភិវឌ្ឍកម្មវិធី SuperApp របស់កម្ពុជា។

លោកថា ការផ្ទេរបច្ចេកវិទ្យា និងបទពិសោធគ្នាទៅវិញទៅមកនេះ បានជួយជំរុញល្បឿននៃការធ្វើបរិវត្តកម្មឌីជីថលរបស់ប្រទេសទាំងពីរផ្អែកបទពិសោធដែលប្រទេសទាំងពីរបានជួបប្រទះ ដើម្បីជំរុញអភិវឌ្ឍប្រព័ន្ធបច្ចេកវិទ្យាឌីជីថលមានសន្ទុះទៅមុខ។

ផ្ទាលផ្ទៀងផ្ទាត់ឯកសារ verify.gov.kh គឺជាថ្ពាលរបស់រាជរដ្ឋាភិបាល ដែលអភិវឌ្ឍដោយក្រសួងប្រៃសនីយ៍និងទូរគមនាគមន៍ និងត្រូវបានដាក់ឱ្យប្រើក្នុងគោលបំណងលុបបំបាត់ការក្លែងបន្លំឯកសារ ផ្តល់ភាពងាយស្រួល ក្នុងការ ប្រើប្រាស់និងផ្ទៀងផ្ទាត់ភាពត្រឹមត្រូវនៃឯកសារផ្តល់ទំនុកចិត្ត ចំណេញពេលវេលា និងកាត់បន្ថយចំណាយនានា ព្រមទាំង ជំរុញការធ្វើបរិវត្តកម្មឌីជីថល ស្របតាមឧត្តមានុវត្តន៍ជាអន្តរជាតិ។

ការផ្ទៀងផ្ទាត់ឯកសារនៅលើថ្នាល verify.gov.kh ត្រូវធ្វើឡើងតាមរយៈការដាក់បញ្ចូល QR Code ស្តង់ដារ ដោយប្រើបច្ចេកវិទ្យាប្លុកឆេន (Blockchain) ដែលមានសុវត្ថិភាព ខ្ពស់នៅលើសន្លឹកនៃឯកសារនីមួយៗ។ ការប្រើប្រាស់ឯកសារដែលមានដាក់បញ្ចូល QR Code ស្តង់ដារនេះ មិនតម្រូវឱ្យមានការធ្វើនីត្យានុកូលកម្ម នៅលើឯកសារថតចម្លងក្នុងទម្រង់ជាក្រដាសឡើយ៕

The post ប្រទេសនៅតំបន់អាស៊ានបន្តបន្ទាប់ ប្រើប្រាស់ថ្នាលផ្ទៀងផ្ទាត់ទិន្នន័យ Verify របស់កម្ពុជា appeared first on Kampuchea Thmey Daily.

ក្នុងវេទិកាអភិបាលកិច្ចអ៊ីនធឺណិតកម្ពុជា រដ្ឋមន្ត្រីក្រសួងប្រៃសណីយ៍ ជំរុញឱ្យពង្រឹងកិច្ចសហការពហុភាគី ប្រយុទ្ធប្រឆាំងការក្លែងបន្លំតាមអ៊ីនធឺណិត

Dy Bunnara — Sun, 07 Dec 2025 02:27:18 +0000

លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានជំរុញឱ្យពង្រឹងកិច្ចសហប្រតិបត្តិការពហុភាគី ដើម្បីសម្របសម្រួលកិច្ចខិតខំប្រឹងប្រែងក្នុងសន្តិសុខតាមអ៊ីនធឺណិត ប្រយុទ្ធប្រឆាំងនឹងការក្លែងបន្លំតាមអ៊ីនធឺណិត និងខ្លឹមសារខុសច្បាប់ និងកសាងបរិយាកាសឌីជីថលដែលគួរឱ្យទុកចិត្ត។

ការជំរុញនេះ បានធ្វើឡើងនៅថ្ងៃទី ៦ ខែធ្នូ ឆ្នាំ២០២៥ ខណៈលោករដ្ឋមន្ត្រី ជា វ៉ាន់ដេត បានអញ្ជើញជាអធិបតីបើក វេទិកាអភិបាលកិច្ចអ៊ីនធឺណិតកម្ពុជា ២០២៥ ក្រោមប្រធានបទ “ការកសាងសង្គមឌីជីថលកម្ពុជា ប្រកបដោយបរិយាបន្ន (Building Cambodia’s Inclusive Digital Society)” ដែលជាព្រឹត្តិការណ៍អមក្នុង វេទិការដ្ឋាភិបាលឌីជីថល ពិព័រណ៍បច្ចេកវិទ្យាឌីជីថល និងព្រឹត្តិការជាតិ-អន្តរជាតិពាក់ព័ន្ធ។

ក្នុងឱកាសនោះ លោករដ្ឋមន្ត្រី ជា វ៉ាន់ដេត ក៏បានជំរុញការអភិវឌ្ឍក្របខ័ណ្ឌគោលនយោបាយរហ័សរហួន ដើម្បីទាញយកអត្ថប្រយោជន៍ពីបច្ចេកវិទ្យាថ្មីៗ ដូចជាបញ្ញាសិប្បនិម្មិត ខណៈពេលដែលគ្រប់គ្រងហានិភ័យដែលទាក់ទងនឹងភាពឯកជននៃទិន្នន័យ សន្តិសុខតាមអ៊ីនធឺណិត និងភាពសុខដុមរមនាក្នុងសង្គមប្រកបដោយប្រសិទ្ធភាព។

លោករដ្ឋមន្ត្រី ជា វ៉ាន់ដេត ក៏បានលើកឡើងពីការលើកកម្ពស់ការដាក់បញ្ចូល និងអក្ខរកម្មឌីជីថល ដើម្បីធានាថាប្រជាពលរដ្ឋទាំងអស់ ជាពិសេសយុវជន ស្ត្រី និងអ្នកដែលនៅតំបន់ជនបទ អាចចូលប្រើប្រើប្រាស់ និងបង្កើតតម្លៃតាមរយៈឧបករណ៍ឌីជីថល ដោយមិនទុកនរណាម្នាក់ឱ្យនៅខាងក្រោយក្នុងការផ្លាស់ប្តូរឌីជីថលឡើយ។

ក្រៅពីនេះ លោករដ្ឋមន្ត្រីក៏បានលើកឡើងបន្ថែមពីលើកកម្ពស់នវានុវត្តន៍ និងការអភិវឌ្ឍហេដ្ឋារចនាសម្ព័ន្ធ ដោយកសាងលើសមិទ្ធផលជាតិថ្មីៗក្នុងការត្រួតពិនិត្យបទប្បញ្ញត្តិ ខ្សែកាបអុបទិកក្រោមដី និងហេដ្ឋារចនាសម្ព័ន្ធទូរគមនាគមន៍ទំនើប ដើម្បីបង្កើតមូលដ្ឋានគ្រឹះរឹងមាំសម្រាប់ការរីកចម្រើន។ ទន្ទឹមនេះ ពង្រឹងយុវជនជាអ្នកដឹកនាំឌីជីថល តាមរយៈគំនិតផ្តួចផ្តើមដូចជា Youth IGF ដែលទើបនឹងបង្កើតថ្មី ដោយធានាថាមនុស្សជំនាន់ក្រោយគឺជាស្ថាបត្យករនៃគោលនយោបាយឌីជីថលដែលនឹងកំណត់អនាគតរបស់ពួកគេ។

លោករដ្ឋមន្ត្រី បានលើកទឹកចិត្តឱ្យមានការចូលរួមពិភាក្សា និងផ្លាស់ប្តូរទស្សនៈឱ្យបានផុលផុស សម្រាប់ជាទុនក្នុងការកសាងអនាគតឌីជីថលរួមគ្នា ជាពិសេសយកឱកាសនេះបង្កើតបណ្តាញទំនាក់ទំនង និងកសាងភាពជាដៃគូឱ្យកាន់តែស៊ីជម្រៅនិងទូលំទូលាយបន្ថែមទៀត ដើម្បីរួមគ្នាសម្រេចសមិទ្ធផលបន្ថែមទៀតជូនជាតិ និងប្រជាជនរបស់ខ្លួន។

វេទិកាអភិបាលកិច្ចអ៊ីនធឺណិតកម្ពុជា ២០២៥ ត្រូវបានរៀបចំឡើងដោយក្រសួងប្រៃសណីយ៍ និងទូរគមនាគមន៍ អង្គការយូណេស្កូ (UNESCO) អង្គការ Open Development Cambodia (ODC) និងបណ្ឌិត្យសភាបច្ចេកវិទ្យាឌីជីថលកម្ពុជា (CADT) ដោយផ្តោតជាពិសេសសម្រាប់កំណើន និងស្ថិរភាពរបស់ប្រទេសយើង រួមមានដូចជា៖ សុវត្ថិភាពអនឡាញក្នុងយុគសម័យបញ្ញាសិប្បនិម្មិត (AI) -ការតភ្ជាប់អ៊ីនធឺណិតជាសកល និងប្រកបដោយអត្ថន័យ -ការពង្រឹងសមត្ថភាពយុវជនសម្រាប់អនាគតឌីជីថល៕

The post ក្នុងវេទិកាអភិបាលកិច្ចអ៊ីនធឺណិតកម្ពុជា រដ្ឋមន្ត្រីក្រសួងប្រៃសណីយ៍ ជំរុញឱ្យពង្រឹងកិច្ចសហការពហុភាគី ប្រយុទ្ធប្រឆាំងការក្លែងបន្លំតាមអ៊ីនធឺណិត appeared first on Kampuchea Thmey Daily.

វេទិការដ្ឋាភិបាលឌីជីថល ២០២៥ Archives - Kampuchea Thmey Daily

តើ​សួន​ឌីជីថល​កម្ពុជា​ នឹង​លេច​រូបរាង​ឆាប់ៗ​​នេះ​មាន​​អ្វីខ្លះ?

នេះជា​ឧបករណ៍​តេស្តគុណភាពសេវាទូរសព្ទចង់​ដឹង​ខ្លាំង​ឬខ្សោយ?

រដ្ឋាភិបាល​មាន​គម្រោង​បង្កើត​ថ្នាល​ឌីជីថល​ ៤០ ទៀត ឆ្លើយតប​តម្រូវការ​សាធារណៈ

៣ ថ្ងៃ វេទិការដ្ឋាភិបាលឌីជីថលឆ្នាំ២០២៥ សម្រេច​​​បាន​សមិទ្ធផលអ្វីខ្លះ?

ប្រទេស​នៅ​តំបន់​អាស៊ាន​បន្ត​បន្ទាប់ ​ប្រើប្រាស់​ថ្នាល​​ផ្ទៀងផ្ទាត់​ទិន្នន័យ Verify របស់​កម្ពុជា

តើសួនឌីជីថលកម្ពុជា នឹងលេចរូបរាងឆាប់ៗនេះមានអ្វីខ្លះ?

នេះជាឧបករណ៍តេស្តគុណភាពសេវាទូរសព្ទចង់ដឹងខ្លាំងឬខ្សោយ?

រដ្ឋាភិបាលមានគម្រោងបង្កើតថ្នាលឌីជីថល ៤០ ទៀត ឆ្លើយតបតម្រូវការសាធារណៈ

៣ ថ្ងៃ វេទិការដ្ឋាភិបាលឌីជីថលឆ្នាំ២០២៥ សម្រេចបានសមិទ្ធផលអ្វីខ្លះ?

ប្រទេសនៅតំបន់អាស៊ានបន្តបន្ទាប់ ប្រើប្រាស់ថ្នាលផ្ទៀងផ្ទាត់ទិន្នន័យ Verify របស់កម្ពុជា